എസ് ഹരീഷ് എഴുതിയ മലയാളം നോവല്‍ മീശ പ്രസിദ്ധീകരിക്കുന്നതും വിതരണം ചെയ്യുന്നതും വിലക്കണം എന്ന് അവശ്യപെട്ട് നല്‍കിയ ഹര്‍ജി സുപ്രീം കോടതി തള്ളി ചീഫ് ജസ്റ്റിസ് ദീപക് മിശ്ര അധ്യക്ഷനായ ബെഞ്ച് ആണ് ഹര്‍ജി തള്ളിയത്.

പുസ്തകത്തിന്റെ ഒരു ഭാഗം മാത്രം എടുത്തല്ല വായിക്കേണ്ടത്. എഴുത്തുകാരന്റെ ഭാവനയെയും സൃഷ്ടി വൈഭവത്തെയും ബഹുമാനിക്കണമെന്നും സുപ്രീംകോടതി ഓര്‍മ്മിപ്പിച്ചു. ഡല്‍ഹി മലയാളി രാധാകൃഷ്ണന്‍ വരേണിക്കല്‍ ആണ് മീശക്ക് എതിരെ സുപ്രീം കോടതിയെ സമീപിച്ചിരുന്നത്.

മലയാളം നോവല്‍ മീശക്കെതിരായി ഫയല്‍ ചെയ്ത ഹര്‍ജി കേള്‍ക്കുമെന്ന് സുപ്രിം കോടതി. ക്ഷേത്രത്തില്‍ പോകുന്ന ഹിന്ദു സ്ത്രീകളെ അപകീര്‍ത്തിപ്പെടുത്തിയെന്ന ആരോപണമായിരുന്ന എസ് ഹരീഷിന്റെ മീശ നോവലിനെതിരെ ഉയര്‍ന്നത്.

മാതൃഭൂമി ആഴ്ചപ്പതിപ്പില്‍ പരമ്പരയായി പ്രസിദ്ധീകരിച്ചു വന്നതായിരുന്നു മീശ. അഡ്വക്കറ്റ് ഉഷാ നന്ദിനിയാണ് ചൊവ്വാഴ്ച കോടതി മുമ്പാകെ വിഷയമുന്നയിച്ചത്. കേസ് നാളെ പരിഗണിക്കാമെന്ന് കോടതി ഉറപ്പ് നല്‍കുയായിരുന്നു.

ഹിന്ദുത്വ തീവ്രവാദികളുടെ ഭീഷണിയെ തുടര്‍ന്ന് മാതൃഭൂമി ആഴ്ചപതിപ്പില്‍ നിന്ന് പിന്‍വലിച്ച മീശ നോവല്‍ പുസ്തകമായി പ്രസിദ്ധീകരിക്കാന്‍ ഡി.സി ബുക്‌സ് തീരുമാനിച്ചിരുന്നു. ഇതിനെ തുടര്‍ന്ന് ഡി.സി ബുക്‌സിനെതിരെയും സംഘപരിവാര്‍ രംഗത്തെത്തിയിരുന്നു.

മാതൃഭൂമി ആഴ്ചപതിപ്പില്‍ പ്രസിദ്ധീകരിച്ചുകൊണ്ടിരുന്ന നോവലിലെ ഒരു അധ്യായത്തില്‍ രണ്ട് കഥാപാത്രങ്ങള്‍ തമ്മിലുള്ള സംസാരം ഹിന്ദു സ്ത്രീകളെ അപമാനിക്കുന്നതാണെന്ന് ആരോപിച്ചാണ് ഹിന്ദുത്വ തീവ്രവാദികള്‍ ഹരീഷിനെതിരെ രംഗത്ത് വന്നത്. തനിക്കും കുടുംബത്തിനുമെതിരെ ഭീഷണി ശക്തമായതോടെ നോവന്‍ പിന്‍വലിക്കാന്‍ തീരുമാനിച്ചതായി ഹരീഷ് പ്രഖ്യാപിക്കുകയായിരുന്നു.