കഴിഞ്ഞദിവസം കഞ്ചാവ് പിടികൂടിയ സംഭവത്തിലെ പ്രധാനിയായ വിദ്യാര്‍ത്ഥിയ്ക്കും കഞ്ചാവെത്തിച്ച ഇതര സംസ്ഥാനക്കാരനും വേണ്ടിയുള്ള തിരച്ചില്‍ പൊലീസ് ഊര്‍ജിതമാക്കി. അതേസമയം കോളേജുകളുടെ പരിസരം കേന്ദ്രീകരിച്ച് പൊലീസ് പരിശോധന ശക്തമാക്കി.

കളമശ്ശേരി കുസാറ്റിന് സമീപത്തെ സ്വകാര്യ ഹോസ്റ്റലുകളും പിജികളും കേന്ദ്രീകരിച്ച് ഇന്നലെ നടത്തിയ വ്യാപക പരിശോധനയില്‍ കൂടുതല്‍ ലഹരി വസ്തുക്കളും പൊലീസ് കണ്ടെടുത്തു . ഒരു വിദ്യാര്‍ത്ഥിയില്‍ നിന്ന് രണ്ട് ഗ്രാം കഞ്ചാവും ഉപകരണങ്ങളും പൊലീസ് പിടിച്ചെടുത്തു. കൊച്ചിയില്‍ റോഡുകളിലും പൊലീസ് പരിശോധന ശക്തമാക്കിയിട്ടുണ്ട്.

അഭിരാജിനെയും ഒപ്പം പിടിയിലായ ഹരിപ്പാട് സ്വദേശി ആദിത്യനെ സ്റ്റേഷന്‍ ജാമ്യത്തില്‍ വിട്ടയച്ചു. അതേസമയം തന്റെ മുറിയില്‍ നിന്നല്ല കഞ്ചാവ് പിടിച്ചെടുത്തതെന്നും ലഹരിക്കെതിരായ പ്രവര്‍ത്തനങ്ങള്‍ക്ക് നേതൃത്വം നല്‍കുന്ന തന്നെ കുടുക്കിയതാണെന്നും അഭിരാജ് പറയുന്നു.കഴിഞ്ഞ ദിവസം പൊലീസിന്റെ ഡാന്‍സാഫ് സംഘത്തിന്റെ നേതൃത്വത്തില്‍ നടത്തിയ പരിശോധനയിലാണ് കഞ്ചാവ് പിടിച്ചെടുത്തത്.

പൊലീസിന്റെ ആദ്യത്തെ എഫ്.ഐ.ആറില്‍ കൊല്ലം കുളത്തുപ്പുഴ സ്വദേശി ആകാശിനെയാണ് (21) പ്രതി ചേര്‍ത്തിട്ടുള്ളത്. രണ്ടാമത്തെ എഫ്.ഐ.ആറില്‍ ഹരിപ്പാട് സ്വദേശി ആദിത്യന്‍ (21), കരുനാഗപള്ളി സ്വദേശി അഭിരാജ്(21) എന്നിവരാണ് ഈ കേസില്‍ പ്രതികള്‍.

അതേസമയം റെയ്ഡിനായി എത്തിയ പൊലീസിനെ കണ്ടതോടെ ചില വിദ്യാര്‍ഥികള്‍ ഓടി രക്ഷപ്പെട്ടതായി റിപ്പോര്‍ട്ടുണ്ട്. ഇവര്‍ക്കായി പൊലീസ് അന്വേഷണം തുടങ്ങിയിട്ടുണ്ട്.