ജിയോട്യൂബ് പദ്ധതി വൈകുന്നതിനെതിരെയാണ് മന്ത്രി വിമര്‍ശനം ഉന്നയിച്ചതെങ്കിലും മുഖ്യമന്ത്രിക്കെതിരായ അതൃപ്തികൂടിയാണ് അവര്‍ പ്രകടിപ്പിച്ചത്. ഏത് പദ്ധതിയും മുഖ്യമന്ത്രിയുടെ അനുമതിയോടെ മാത്രമേ തുടങ്ങാനും മുന്നോട്ട് പോവാനും പാടുള്ളൂ എന്ന നിലപാട് മന്ത്രിമാര്‍ക്കിടയില്‍ അസ്വാരസ്യത്തിന് കാരണമായിട്ടുണ്ട്.

മുഖ്യമന്ത്രിക്ക് പരമാധികാരം ലഭിക്കുന്ന തരത്തില്‍ പുതിയ നിയമഭേദഗതിക്ക് നീക്കം തുടങ്ങിയതിന് എതിരെയുള്ള പ്രതിഷേധം കൂടിയാണ് മേഴ്‌സിക്കുട്ടിയമ്മ രേഖപ്പെടുത്തിയത്. പ്രതിപക്ഷം കടുത്ത വിമര്‍ശനം ഉന്നയിച്ചതിനെ തുടര്‍ന്ന് നിയമഭേദഗതി ഉടനുണ്ടാവില്ലെന്നും മുഖ്യമന്ത്രി വ്യക്തമാക്കിയിരുന്നു.

പ്രതീക്ഷ, പ്രത്യാശ എന്നീ പേരുകളിലുള്ള രണ്ട് മറൈന്‍ ആംബുലന്‍സുകളാണ് ഫിഷറീസ് വകുപ്പ് പുറത്തിറക്കിയത്. മത്സ്യബന്ധനത്തിനിടെ അപകടത്തില്‍ പെടുന്ന മത്സ്യത്തൊഴിലാളികള്‍ക്ക് അടിയന്തര വൈദ്യസഹായം നല്‍കുക എന്നതാണ് ഫിഷറീസ് ആംബുലന്‍സുകളുടെ ലക്ഷ്യം. അഞ്ച് പേര്‍ക്ക് ഒരേ സമയം ക്രിട്ടിക്കല്‍ കെയര്‍, 24 മണിക്കൂറും പാരാമെഡിക്കല്‍ സേവനം, പ്രത്യേക പരിശീലനം ലഭിച്ച നാല് സീറെസ്‌ക്യു സ്‌ക്വാഡ്, പോര്‍ട്ടബിള്‍ മോര്‍ച്ചറി, ആധുനിക മെഡിക്കല്‍ ഉപകരണങ്ങളും, മരുന്നുകളും ഉള്‍പ്പെടെ എല്ലാ സംവിധാനങ്ങളും മറൈന്‍ ആംബുലന്‍സുകളില്‍ ഒരുക്കിയിട്ടുണ്ട്.

സന്ദര്‍ശനത്തിനിടെ പൂന്തുറയില്‍ മന്ത്രിമാരായ മേഴ്‌സിക്കുട്ടിയമ്മക്കും കടകംപള്ളിക്കും എതിരെ നാട്ടുകാരുടെ പ്രതിഷേധമുണ്ടായി. മന്ത്രിമാര്‍ മടങ്ങിപ്പോകണമെന്ന് നാട്ടുകാര്‍ ആവശ്യപ്പെടുകയായിരുന്നു. കേന്ദ്രമന്ത്രിക്കൊപ്പമായിരുന്നു സംസ്ഥാന മന്ത്രിമാര്‍ പൂന്തുറയിലെത്തിയത്. ഈ സമയത്ത് കേന്ദ്രമന്ത്രി ജനങ്ങളോട് െൈമക്കിലൂടെ സംസാരിക്കുകയായിരുന്നു. നിങ്ങളുടെ വേദന ഞങ്ങള്‍ മനസ്സിലാക്കുന്നുണ്ടെന്നും പ്രതിഷേധിക്കാന്‍ നില്‍ക്കാതെ രക്ഷാപ്രവര്‍ത്തനത്തിന് സഹായകരമാവുന്ന നിലപാടാവണം ജനങ്ങള്‍ സ്വീകരിക്കേണ്ടതെന്നും നിര്‍മ്മലാസീതാരാമന്‍ പറഞ്ഞു. കാണാതായ മത്സ്യത്തൊഴിലാളികളുടെ കുടുംബാംഗങ്ങള്‍ക്ക് ധൈര്യം നല്‍കാനും ആശ്വാസിപ്പിക്കാനുമാണ് ഈ സമയം എല്ലാവരും ശ്രമിക്കേണ്ടതെന്നും പ്രതിരോധമന്ത്രി കൂട്ടിച്ചേര്‍ത്തു. എന്നാല്‍ തമിഴിലൂടെ സംസാരിച്ച മന്ത്രിയെ ആദ്യം കേള്‍ക്കാന്‍ തയ്യാറാവാതിരുന്ന നാട്ടുകാര്‍ മന്ത്രി സംസാരം ആവര്‍ത്തിച്ചതോടെ മാത്രമേ ശാന്തരായുള്ളൂ. നഷ്ടപരിഹാരം ഉറപ്പാക്കുമെന്നും അവസാന ആളേയും കണ്ടെത്തുന്നതുവരേയും തിരച്ചില്‍ തുടരുമെന്നും മന്ത്രി ഉറപ്പുനല്‍കുകയായിരുന്നു.

ഇന്ന് രണ്ട് ബോട്ടുകളിലായി 20പേരെ ഇന്ന് നാവികസേന രക്ഷിച്ചു. 11പേരെ തിരുവനന്തപുരത്ത് നിന്നും കൊച്ചിയിലെത്തിക്കും. എല്ലാ തൊഴിലാളികളും സുരക്ഷിതരാണെന്ന് നാവികസേന അറിയിച്ചു. അതേസമയം, ഓഖി ചുഴലിക്കാറ്റ് മഹാരാഷ്ട്ര തീരത്തേക്ക് നീങ്ങുകയാണ്.