minister thomas issac – Chandrika Daily

ധനമന്ത്രിയ്ക്ക് കൊവിഡ്: മുഖ്യമന്ത്രിയും ആരോഗ്യമന്ത്രിയുമടക്കം മന്ത്രിമാര്‍ സ്വയം നിരീക്ഷണത്തില്‍

chandrika — Mon, 07 Sep 2020 04:12:28 +0000

തിരുവനന്തപുരം: ധനമന്ത്രി തോമസ് ഐസകിന് കൊവിഡ് സ്ഥിരീകരിച്ചതിനെ തുടര്‍ന്ന് മുഖ്യമന്ത്രി പിണറായി വിജയന്‍, ആരോഗ്യമന്ത്രി കെ കെ ശൈലജ അടക്കമുള്ള മന്ത്രിമാര്‍ സ്വയം നിരീക്ഷണത്തില്‍ പോയി. വ്യവസായ മന്ത്രി ഇ പി ജയരാജന്‍, തൊഴില്‍ മന്ത്രി ടി പി രാമകൃഷ്ണന്‍, വൈദ്യുതി മന്ത്രി എം എം മണി, എന്നിവരാണ് നിരീക്ഷണത്തിലേക്ക് പോയ മറ്റു മന്ത്രിമാര്‍.

കഴിഞ്ഞ ദിവസം തോമസ് ഐസക്ക് സിപിഐഎം സംസ്ഥാന സെക്രട്ടേറിയേറ്റില്‍ പങ്കെടുത്തിരുന്നു. ഇതേതുടര്‍ന്നാണ് മുഖ്യമന്ത്രി സ്വയം നിരീക്ഷണത്തില്‍ പോയത്. സിപിഎം സംസ്ഥാന സെക്രട്ടറി കോടിയേരി ബാലകൃഷ്ണന്‍, സിപിഐഎം പൊളിറ്റ് ബ്യൂറോ അംഗം എസ് രാമചന്ദ്രന്‍ പിള്ള എന്നിവരും യോഗത്തില്‍ പങ്കെടുത്തിരുന്നു. ഇവരും ധനമന്ത്രിയുടെ പേഴ്സണല്‍ സ്റ്റാഫ് അടക്കമുള്ളവരും നിരീക്ഷണത്തില്‍ പ്രവേശിച്ചു.

ഇത് രണ്ടാം തവണയാണ് മുഖ്യമന്തി നിരീക്ഷണത്തില്‍ പോകുന്നത്. നേരത്തെ മലപ്പുറം ജില്ലാ കളക്ടര്‍ക്ക് കൊവിഡ് സ്ഥിരീകരിച്ചതിനെ തുടര്‍ന്ന് കരിപ്പൂര്‍ വിമാനത്താവളം സന്ദര്‍ശിച്ച മുഖ്യമന്ത്രി നിരീക്ഷണത്തില്‍ പോയിരുന്നു.

സംസ്ഥാനത്ത് ഇത് ആദ്യമായാണ് ഒരു മന്ത്രിയ്ക്ക് കൊവി‍ഡ് സ്ഥിരീകരിക്കുന്നത്. ഞായറാഴ്ച നടത്തിയ
ആന്റിജന്‍ പരിശോധനയിലാണ് മന്ത്രിയ്ക്ക് കൊവിഡ് സ്ഥിരീകരിച്ചത്. സ്രവ പരിശോധന ഉടന്‍ നടത്തും. നിലവില്‍ മന്ത്രിയുടെ ആരോഗ്യനില തൃപ്തികരമാണ്. കാര്യമായ ആരോഗ്യ പ്രശ്നങ്ങളില്ലെന്ന് മന്ത്രിയുടെ ഓഫീസ് അറിയിച്ചു. രോഗത്തിന്‍റെ ഉറവിടം വ്യക്തമല്ല.

ജനത്തെ വരിഞ്ഞു മുറുക്കുന്ന ബജറ്റ്: മുനീര്‍

chandrika — Thu, 31 Jan 2019 17:33:04 +0000

സാധാരണ ജനങ്ങളെ വരിഞ്ഞു മുറുക്കുന്നതാണ് ബജറ്റെന്ന് പ്രതിപക്ഷ ഉപനേതാവ് എം.കെ മുനീര്‍. വെറും അധരവ്യായാമമായ ബജറ്റ്, കേരളത്തിന് ബാധ്യതയാകുമെന്നും അദ്ദേഹം വാര്‍ത്താസമ്മേളനത്തില്‍ പറഞ്ഞു. എതിരാളികളെ ആക്ഷേപിക്കാനും വിമര്‍ശിക്കാനും ഇടതുപാര്‍ട്ടികള്‍ പതിവായി ഉന്നയിച്ചിരുന്ന ‘കോര്‍പറേറ്റ്, ബഹുരാഷ്ട്ര കുത്തക’ തുടങ്ങിയ പദപ്രയോഗങ്ങള്‍ വളരെ പച്ചക്ക് ഉപയോഗിച്ച ബജറ്റാണ് തോമസ് ഐസകിന്റേതെന്ന് മുനീര്‍ ചൂണ്ടിക്കാട്ടി. എപ്പോഴും പൊതിഞ്ഞു പറയാന്‍ ശ്രമിച്ചിരുന്ന കോര്‍പറേറ്റ് വിധേയത്വം ഇപ്പോള്‍ തുറന്ന് പറഞ്ഞിരിക്കുന്നു. ‘കോര്‍പറേറ്റ് നിക്ഷേപം കേരളത്തില്‍ നിന്ന് വഴിമാറി ഒഴുകുകയാണെന്നാണ്’ ബജറ്റിലെ തന്നെ പരാമര്‍ശം. ഇനി കേരളത്തെ രക്ഷിക്കാന്‍ കോര്‍പറേറ്റുകളേ ഉള്ളൂ എന്ന നിലയിലാണ് അവതരണം. ഇവര്‍ക്ക് മാത്രമേ ഇനി തൊഴിലവസരങ്ങള്‍ സൃഷ്ടിക്കാനാകുവെന്നാണ് ധനമന്ത്രി പറയുന്നത്. എല്ലാ പദ്ധതികള്‍ക്കും കിഫ്ബി സഹായമുണ്ടാകുമെന്ന് ആവര്‍ത്തിക്കുന്നുണ്ടെങ്കിലും കിഫ്ബിയെ ആര് സഹായിക്കുമെന്ന് പറഞ്ഞിട്ടില്ല. നവ കേരള സൃഷ്ടിക്കായി പുതിയ പദ്ധതികളൊന്നുമില്ല. മുമ്പ് പ്രഖ്യാപിച്ചിട്ടുള്ളതും നടന്നുകൊണ്ടിരിക്കുന്നതുമായ പദ്ധതികള്‍ പേരുമാറ്റി അവതരിപ്പിക്കുകയായിരുന്നു. ബജറ്റിലെ പൊള്ളത്തരങ്ങള്‍ ജനങ്ങള്‍ക്ക് മുന്നില്‍ തുറന്നുകാട്ടുമെന്നും അദ്ദേഹം പറഞ്ഞു.

ബജറ്റ്; കര്‍ഷകര്‍ക്ക് അവഗണന മാത്രം; പറഞ്ഞുപറ്റിക്കാന്‍ വീണ്ടും പ്രഖ്യാപനങ്ങള്‍

chandrika — Thu, 31 Jan 2019 17:25:54 +0000

. തിരുവനന്തപുരത്ത് നവോത്ഥാന മ്യൂസിയം.
. എല്ലാ ജില്ലകളിലും നവോത്ഥാനമതിലുകള്‍.
. സ്ത്രീശാക്തീകരണ പ്രവര്‍ത്തകക്ക് ദാക്ഷായണി വേലായുധന്‍ അവാര്‍ഡ്.
. 2018-19 ല്‍ 10 കോടി തൊഴില്‍ ദിനങ്ങള്‍, വേതനം കൊടുക്കാന്‍ 2500 കോടി.
. അയ്യന്‍കാളി തൊഴിലുറപ്പ് പദ്ധതിക്ക് 75 കോടി.
. പ്രളയബാധിത പഞ്ചായത്തുകള്‍ക്ക് 250 കോടി പ്രത്യേക സഹായം.
. വ്യവസായ പാര്‍ക്കുകള്‍ക്ക് 6700 ഏക്കര്‍ ഭൂമി ഏറ്റെടുക്കും
. ഭൂമി ഏറ്റെടുക്കാന്‍ 15600 കോടി.
.കണ്ണൂര്‍ വിമാനത്താവളത്തിനു ചുറ്റും വ്യവസായ സമുച്ചയങ്ങളുടെ ശൃംഖല.
. വിഴിഞ്ഞം തുറമുഖത്തിന്റെ സാധ്യതകള്‍ പ്രയോജനപ്പെടുത്താന്‍ ഔട്ടര്‍ റിംഗ് റോഡും ഗ്രോത്ത് കോറിഡോറും.
. ഐ.ടി പാര്‍ക്കുകളില്‍ ഒരു ലക്ഷം തൊഴിലവസരം.
. കേരള സ്റ്റാര്‍ട്ടപ്പ് മിഷന് 70 കോടി.
. യുവ സംരംഭകര്‍ക്ക് സീഡ് ഫണ്ടിംഗ്.
. വയനാട്ടിലെ കാപ്പിപ്പൊടി ഇനി മലബാര്‍ ബ്രാന്‍ഡില്‍.
. വയനാട്ടില്‍150 കോടി രൂപയുടെ കിന്‍ഫ്രാ മെഗാ ഫുഡ് പാര്‍ക്ക്.
. നെല്‍കൃഷിയുടെ വിസ്തൃതി മൂന്നുലക്ഷം ഹെക്ടറാക്കും.
. കുട്ടനാട് കുടിവെള്ള പദ്ധതിയ്ക്ക് 250 കോടി രൂപയുടെ കിഫ്ബി പദ്ധതി.
. തീരദേശത്ത് എല്ലാവര്‍ക്കും ലൈഫ് മിഷനില്‍ നിന്ന് വീട്, കടലാക്രമണം തടയാന്‍ 227 കോടി.
. മത്സ്യഫെഡിന് 100 കോടി രൂപയുടെ അടിയന്തര വായ്പ.
. 8 കോടി സിഎഫ്എല്ലിനു പകരം എല്‍ഇഡി ബള്‍ബുകള്‍.
. വൈദ്യുതി മേഖലയ്ക്ക് 1781 കോടി.
. മുഖഛായ മാറ്റാന്‍ ഡിസൈന്‍ഡ് റോഡുകള്‍.
. പൊതുമരാമത്തിന് 1367 കോടി.
. മാഹി- വളപട്ടണം കനാല്‍ നിര്‍മ്മിക്കുന്നതിന് 600 കോടി.
. പ്രവാസിക്ഷേമത്തിന് 81 കോടി.
. പ്രവാസികള്‍ക്ക് അടിയന്തിരഘട്ടങ്ങളില്‍ ധനസഹായം നല്‍കാന്‍ 25 കോടി.
. കേരള ബാങ്ക് ഇക്കൊല്ലം.
. സ്ത്രീകള്‍ക്കുള്ള സ്‌കീമുകള്‍ക്ക് 1420 കോടി.
. കുടുംബശ്രീയുടെ കീഴില്‍ കേന്ദ്രീകൃത ബ്രാന്‍ഡിംഗും മാര്‍ക്കറ്റിംഗും.
. കുടുംബശ്രീ അയല്‍ക്കൂട്ടങ്ങള്‍ക്ക് നാലു ശതമാനം പലിശക്ക് 3500 കോടിയുടെ ബാങ്കുവായ്പ.
. 10000 പട്ടികവിഭാഗക്കാര്‍ക്ക് പ്ലെയ്‌സ്‌മെന്റ്.
. ഭൂരഹിത ഭവനരഹിതര്‍ക്കുള്ള ഭവന സമുച്ചയങ്ങള്‍ക്കായി 1296 കോടി.
. ആശാപ്രവര്‍ത്തകരുടെ ഹോണറേറിയത്തില്‍ 500 രൂപ വര്‍ദ്ധന.
. 30,000 കോടി രൂപയുടെ കിഫ്ബി പദ്ധതികള്‍ പ്രവര്‍ത്തന പഥത്തിലേക്ക്.
. കാര്‍ഷിക മേഖലയില്‍ 2500 കോടി.
. മൃഗപരിപാലന മേഖലക്ക് 450 കോടി. ഡയറി ഡിപ്പാര്‍ട്ട്‌മെന്റിന് 108 കോടി.
. കാഷ്യൂ ബോര്‍ഡിന് സര്‍ക്കാര്‍ ഗ്യാരണ്ടിയില്‍ 250 കോടിയുടെ വായ്പ.
. കയര്‍ വ്യവസായത്തിന് 142 കോടി.
. കൈത്തറി സ്‌കൂള്‍ യൂണിഫോം പദ്ധതിക്ക് 170 കോടി.
. ഐടി മേഖലക്ക് 574 കോടി.
. ടൂറിസം മേഖലക്ക് 372 കോടി.
. ക്ഷേമപെന്‍ഷനുകള്‍ 100 രൂപ വര്‍ദ്ധിപ്പിക്കും.
. ഭിന്നശേഷിക്കാരുടെ സംരക്ഷണത്തിന് 1000 കോടി
. പട്ടികജാതിവിഭാഗത്തിന് 1977 കോടിയുടെ പദ്ധതി.
. ന്യൂനപക്ഷ ക്ഷേമത്തിനായി 49 കോടി രൂപ.
. കേരള സ്റ്റേറ്റ് മുന്നോക്കക്ഷേമ വെല്‍ഫെയര്‍ കോര്‍പ്പറേഷന് 42 കോടി.
. തിരുവിതാംകൂര്‍ ദേവസ്വം ബോര്‍ഡിന് 100 കോടി രൂപയുടെ പ്രത്യേക സഹായം.
. പാട്ടക്കുടിശികക്ക് ഒറ്റത്തവണ തീര്‍പ്പാക്കല്‍.

‘സിനിമയില്‍ മാത്രമേ നന്‍മയുള്ളൂ, സിനിമക്ക് പുറത്തില്ല’; സാമുവലിന്റെ പ്രതിഷേധത്തില്‍ പ്രതികരണവുമായി മന്ത്രി തോമസ് ഐസക്

chandrika — Mon, 02 Apr 2018 06:52:51 +0000

തിരുവനന്തപുരം: സുഡാനി ഫ്രം നൈജീരിയ സിനിമയുമായി ബന്ധപ്പെട്ട വിവാദങ്ങളില്‍ പ്രതികരണവുമായി മന്ത്രി തോമസ് ഐസക്. സിനിമ കണ്ടുവെന്നും മലപ്പുറത്തെ ഗ്രാമീണ നന്‍മ മനസ് നിറഞ്ഞ് അറിഞ്ഞുവെന്നും മന്ത്രി പറഞ്ഞു. എന്നാല്‍ ആ നന്‍മകളൊക്കെ സിനിമയില്‍ മാത്രമേ ഉള്ളൂവെന്നും സിനിമക്ക് പുറത്ത് നന്‍മ ഉണ്ടായില്ലെന്നും സാമുവലിന്റെ പ്രതിഷേധത്തില്‍ നിന്ന് മനസ്സിലാവുന്നത്. തീര്‍പ്പ് കല്‍പ്പിക്കണമെങ്കില്‍ നൈജീരിയക്കാരന്‍ നടനുമായി ഉണ്ടാക്കിയ കരാര്‍ മാത്രമല്ല മറ്റുള്ള നടന്മാരുമായി ഉണ്ടാക്കിയിരുന്ന കരാറുകളെ കുറിച്ച് കൂടി അറിയണമെന്നും മന്ത്രി കൂട്ടിച്ചേര്‍ത്തു.

പോസ്റ്റിന്റെ പൂര്‍ണ്ണരൂപം:

സുഡാനി ഫ്രം നൈജീരിയ കണ്ടു. ഇപ്പോഴാണ് മന്ത്രി ജലീല്‍ ഈ സിനിമ കാണണമെന്ന് ഇത്ര നിര്‍ബന്ധിച്ചതിന്റെ കാരണം മനസ്സിലായത്. മലപ്പുറത്തെ ഗ്രാമീണ നന്മകള്‍ മനസ്സ് നിറഞ്ഞു കണ്ടു. സുഡാനിയെ തങ്ങളുടെ വീടിന്റെ ഭാഗമാക്കാന്‍ ആ ഗ്രാമീണ കുടുംബങ്ങള്‍ക്ക് നിറമോ മതമോ ഒന്നും തടസമായില്ല. ഫുട്‌ബോള്‍ കളിക്കാരന്‍ സാമുവലിന് നല്‍കിയ ശുശ്രൂഷയും സ്‌നേഹവും പിന്നെ അവസാനം വിടവാങ്ങല്‍ വേളയില്‍ നല്‍കിയ കമ്മലും വാച്ചുമൊന്നും ഒരു കരാറിന്റെയും ഭാഗമായിരുന്നില്ല. പക്ഷെ ഇതൊക്കെ സിനിമയിലേ ഉണ്ടായുള്ളൂ, സിനിമയ്ക്ക് പുറത്തുണ്ടായില്ല എന്നാണ് സാമുവലിന്റെ പ്രതിഷേധത്തില്‍ നിന്ന് മനസ്സിലാവുന്നത്. തീര്‍പ്പ് കല്‍പ്പിക്കണമെങ്കില്‍ നൈജീരിയക്കാരന്‍ നടനുമായി ഉണ്ടാക്കിയ കരാര്‍ മാത്രമല്ല മറ്റുള്ള നടന്മാരുമായി ഉണ്ടാക്കിയിരുന്ന കരാറുകളെ കുറിച്ച് കൂടി അറിയണം. ഏതായാലും സിനിമ ഗംഭീര വിജയം നേടിയ സ്ഥിതിക്ക് പരാതികള്‍ പരിഹരിക്കപ്പെടും എന്ന് കരുതട്ടെ.

സാമ്പത്തിക പ്രതിസന്ധി രൂക്ഷം; പണത്തിനായി സര്‍ക്കാറിന്റെ നെട്ടോട്ടം

chandrika — Sun, 19 Nov 2017 20:15:11 +0000

തിരുവനന്തപുരം: സാമ്പത്തിക പ്രതിസന്ധി മറികടക്കാന്‍ സംസ്ഥാന സര്‍ക്കാര്‍ നെട്ടോട്ടത്തില്‍. കേന്ദ്രത്തില്‍ നിന്ന് കടമെടുക്കുന്നത് കൂടാതെ, നികുതി മുന്‍കൂറായി പിരിച്ചെടുക്കാനാണ് ആലോചന. ബിവറേജസ് കോര്‍പറേഷനില്‍ നിന്നും എണ്ണക്കമ്പനികളില്‍ നിന്നും മുന്‍കൂറായി നികുതി പണം കൈപ്പറ്റാനാണ് നീക്കം. ശമ്പളവും ക്ഷേമപെന്‍ഷനുകളം നല്‍കാന്‍ സാധിക്കാത്ത സ്ഥിതിയിലാണ് സര്‍ക്കാര്‍. ക്രിസ്മസ് വരുന്നതിനാല്‍ രണ്ട് മാസത്തെ ശമ്പളവും ആനുകൂല്യങ്ങളും ഡിസംബര്‍ 25ന് മുമ്പ് നല്‍കേണ്ടിവരും. ക്ഷേമപെന്‍ഷനു മാത്രം 1500 കോടി രൂപ വേണം. ഇതെല്ലാം കണക്കിലെടുത്താണ് കിട്ടാവുന്ന പണമെല്ലാം സ്വരുക്കൂട്ടാന്‍ സര്‍ക്കാര്‍ നടപടി തുടങ്ങിയത്.
സംസ്ഥാന ഖജനാവിലേക്ക് ഏറ്റവും അധികം സംഭാവന നല്‍കുന്ന ബിവറേജസ് കോര്‍പറേഷനില്‍ നിന്നും മുന്‍കൂര്‍ നികുതി പിരിച്ചെടുക്കും. എണ്ണക്കമ്പനികളില്‍ നിന്നും 500 കോടി രൂപ ആവശ്യപ്പെടാനാണ് തീരുമാനം. ഇതിനെല്ലാം പുറമെ കെ.എസ്.എഫ്.ഇയില്‍ നിന്നു കടമെടുക്കാനും ആലോചിക്കുന്നുണ്ട്. ഡിസംബര്‍ ആദ്യത്തോടെയായിരിക്കും ഇത്. സാമ്പത്തിക പ്രതിസന്ധി രൂക്ഷമായതോടെ വന്‍ബില്ലുകള്‍ മാറുന്നതിനും ട്രഷറികള്‍ക്ക് നിയന്ത്രണം ഏര്‍പ്പെടുത്തിയിട്ടുണ്ട്. നിലവില്‍ 10 ലക്ഷം രൂപ വരെയുള്ള ബില്ലുകള്‍ മാത്രം പാസാക്കി നല്‍കിയാല്‍ മതിയെന്നാണ് നിര്‍ദേശം. 25 ലക്ഷത്തിനു മുകളിലുള്ള ബില്ലുകള്‍ പ്രത്യേക അനുമതിയോടെ പാസാക്കിയാല്‍ മതിയെന്നും നിര്‍ദേശമുണ്ട്.
വരുമാനം കുറഞ്ഞതും പദ്ധതിയിതര ചെലവുകള്‍ വര്‍ധിച്ചതുമാണ് പ്രതിസന്ധിക്ക് കാരണം. ജി.എസ്.ടി നികുതി 17 ശതമാനം ഉയര്‍ന്നുവെങ്കിലും കെ.എസ്.ആര്‍.ടി.സിക്ക് 300 കോടി രുപയും റേഷന്‍, ആരോഗ്യ മേഖലക്ക് 500 കോടി രൂപയും അധികം നല്‍കേണ്ടി വന്നു. പുതിയ തസ്തികകള്‍ സൃഷ്ടിച്ചതും ചെലവ് കൂട്ടി. സാമ്പത്തിക പ്രതിസന്ധി മറികടക്കാന്‍ കേന്ദ്രത്തില്‍ നിന്ന് വായ്പയെടുക്കാനും നീക്കമുണ്ട്. പരമാവധി 20,400 കോടി രൂപയാണ് ഈ വര്‍ഷം കടമെടുക്കാന്‍ സംസ്ഥാന സര്‍ക്കാറിന് അനുമതിയുള്ളത്. ഇതില്‍ കഴിഞ്ഞ ഓണക്കാലത്ത് എടുത്ത 8500 കോടി ഉള്‍പ്പെടെ ഈ സാമ്പത്തിക വര്‍ഷം ഇതുവരെ 14,000 കോടി വായ്പയെടുത്തു. കഴിഞ്ഞ വര്‍ഷം 6000 കോടി രൂപ അധിക വായ്പയും എടുത്തിരുന്നു. ഈ തുക ഇത്തവണത്തെ വായ്പാപരിധിയില്‍ ഉള്‍പ്പെടുത്തിയതോടെ ഇനിയുള്ള നാലര മാസം കടമെടുക്കാവുന്ന പരമാവധി തുക 400 കോടി രൂപ മാത്രമാണ്. ഇതാവട്ടെ ഇപ്പോഴത്തെ സ്ഥിതിയില്‍ ഒന്നിനും തികയില്ല. ഈ സാഹചര്യത്തില്‍ ആറായിരം കോടിയുടെ അധിക വായ്പാ പരിധി ആവശ്യപ്പെടാന്‍ സര്‍ക്കാര്‍ ആലോചിക്കുന്നുണ്ട്. 3000 കോടി രൂപയെങ്കിലും ഇത്തരത്തില്‍ കണ്ടെത്താനാണ് ശ്രമം. ധനകാര്യ കമ്മീഷന്‍ ഗ്രാന്റ്, നികുതി വിഹിതം തുടങ്ങിയ ഇനങ്ങളിലായി എല്ലാ മാസവും കേന്ദ്രം നല്‍കുന്ന 2500 കോടി രൂപയെ ആശ്രയിച്ചാണ് സംസ്ഥാനം മുന്നോട്ടുപോകുന്നത്.

ഈ തള്ളൊക്കെ യു.പിയിലേ നടക്കൂ ; അമിത് ഷായോട് തോമസ് ഐസക്

chandrika — Thu, 19 Oct 2017 08:12:25 +0000

തിരുവനന്തപുരം: നരേന്ദ്രമോദി സര്‍ക്കാര്‍ വന്നശേഷം കേരളത്തിന് 1,34,848 കോടി രൂപ ധനകാര്യ കമ്മീഷന്‍ വിഹിതമായി അനുവദിച്ചുവെന്ന അമിത് ഷായുടെ അവകാശവാദങ്ങള്‍ പൂര്‍ണമായും തെറ്റാണെന്ന് ധനമന്ത്രി തോമസ് ഐസക്. 2015 മുതല്‍ കേരളത്തിന് അനുവദിച്ച തുക അക്കമിട്ടു നിരത്തിയാണ് ധനമന്ത്രി സമൂഹമാധ്യമത്തിലൂടെ പ്രതികരിച്ചത്. ഈ തള്ളലൊക്കെ വല്ല യു.പിയിലുമായിരുന്നെങ്കില്‍ ആരെങ്കിലുമൊക്കെ വിശ്വസിച്ചേനെയെന്നും ഇതു കേരളമാണെന്ന് അമിത് ഷായെ ഓര്‍മപ്പെടുത്തിയുമായാണ് തോമസ് ഐസക് കുറിപ്പ് അവസാനിപ്പിക്കുന്നത്.
ബി.ജെ.പി നേതാക്കളുടെ തള്ളിനെക്കുറിച്ചുള്ള സോഷ്യല്‍ മീഡിയാ പരിഹാസം ശ്രദ്ധയില്‍പ്പെട്ടിട്ടുണ്ടെങ്കിലും സംഗതി ഇത്ര മാരകമായിരിക്കുമെന്ന് കരുതിയില്ലെന്ന് ഐസക് പറയുന്നു. ബി.ജെ.പിയുടെ ദേശീയ അധ്യക്ഷന്‍ തന്നെ ഇങ്ങനെ വീമ്പടിക്കുമ്പോള്‍ കേരളത്തിലെ നേതാക്കളുടെയും അണികളുടെയും അവസ്ഥ പറയാനില്ല. മോദി വന്ന ശേഷം കേരളത്തിന് 89,000 കോടി രൂപ അധികം തന്നുവെന്നാണ് അമിത് ഷാ വെച്ചു കീച്ചിയത്. 2015-16 മുതലാണ് പതിനാലാം ധനകാര്യ കമ്മീഷന്‍ അവാര്‍ഡ്. 2015-16ല്‍ 12,690 കോടി, 2016-17ല്‍ 15,225 കോടി, 2017-18ല്‍ പ്രതീക്ഷിക്കുന്നത് 16,891 എന്നിങ്ങനെയാണ് കേരളത്തിന്റെ ഫിനാന്‍സ് കമ്മീഷന്‍ അവാര്‍ഡ്. ആകെ 44,806 കോടി രൂപ. അഞ്ചു വര്‍ഷം കൊണ്ട് പഞ്ചായത്തുകള്‍ക്കുള്ള 7,681.96 കോടിയും റവന്യൂ കമ്മി ഗ്രാന്റ് 9519 കോടിയും ഡി.ആര്‍.എഫ് 766.5 ഉം ചേര്‍ത്താല്‍ 62,773.46 കോടി രൂപയാകും. അമിത് ഷാ തട്ടിവിട്ട 1,34,848 കോടിയിലെത്തണമെങ്കില്‍ അടുത്ത രണ്ടുവര്‍ഷം കൊണ്ട് നികുതി വിഹിതം ഉള്‍പ്പെടെ 72,074.54 കോടി ലഭിക്കണം. ഇതുവരെ ആകെ കിട്ടിയതിനെക്കാള്‍ തുക ഇനി രണ്ടുവര്‍ഷം കൊണ്ടു കിട്ടും പോലും. അന്യായ തള്ളലെന്നാതെ വേറൊന്നും പറയാനില്ല. ധനകാര്യ കമ്മിഷന്‍ വിഹിതം ആരുടെയും ഔദാര്യമല്ല. സംസ്ഥാനങ്ങള്‍ക്ക് ഭരണഘടനാപരമായി ലഭിക്കേണ്ട അവകാശമാണ്. പതിനാലാം ധനകാര്യ കമ്മീഷനെ നിയോഗിച്ചത് യു.പി.എ സര്‍ക്കാരാണ്. തീരുമാനവും ആ സര്‍ക്കാരിന്റെ കാലത്തു തന്നെ എടുക്കുകയും ചെയ്തിരുന്നു. അതിന്മേല്‍ മോദിയെന്താണ് ചെയ്തത്? പദ്ധതി ധനസഹായം ഇല്ലാതാക്കി. കേന്ദ്രാവിഷ്‌കൃത പദ്ധതികള്‍ വെട്ടിക്കുറച്ചു. പദ്ധതികളിലൊക്കെ സംസ്ഥാനവിഹിതം വര്‍ധിപ്പിച്ചു. സര്‍വശിക്ഷാ അഭിയാനില്‍ നേരത്തെ 30 ശതമാനമായിരുന്നു സംസ്ഥാനവിഹിതം. മോദിയത് 50 ശതമാനമാക്കി. എന്‍.ആര്‍.എച്ച്.എമ്മില്‍ 10 ശതമാനമായിരുന്ന സംസ്ഥാനവിഹിതം 40 ശതമാനമാക്കി. ആക്‌സിലറേറ്റഡ് ഡ്രിങ്കിംഗ് വാട്ടര്‍ സ്‌കീമില്‍ 10 ശതമാനം വിഹിതം 50 ശതമാനമാക്കി. ഇത്തരത്തില്‍ കേന്ദ്രപദ്ധതികളില്‍ സംസ്ഥാനങ്ങളുടെ ഭാരം വര്‍ധിപ്പിക്കുകയാണ് ചെയ്തതെന്നും ഐസക് പറയുന്നു.

ഫെയ്‌സ് ബുക്ക് കുറിപ്പിന്റെ പൂര്‍ണ്ണരൂപം വായിക്കാം

തുടക്കം എം.ടിയെ ഉദ്ധരിച്ച്; സംസ്ഥാന ബജറ്റ് -2017 അവതരിപ്പിക്കുന്നു

chandrika — Fri, 03 Mar 2017 04:32:31 +0000

തിരുവനന്തപുരം: സംസ്ഥാന സര്‍ക്കാരിന്റെ ബജറ്റ്-2017 നിയമസഭയില്‍ ധനമന്ത്രി തോമസ് ഐസക് അവതരിപ്പിക്കുന്നു. നോട്ട് നിരോധനവുമായി ബന്ധപ്പെട്ട് എം.ടി വാസുദേവന്‍ നായര്‍ ഉന്നയിച്ച വിമര്‍ശനങ്ങള്‍ ചൂണ്ടിക്കാണിച്ചായിരുന്നു ബജറ്റിന് തുടക്കമിട്ടത്. നോട്ട് നിരോധന കാലത്തെ ബജറ്റ് അവതരണം വെല്ലുവിളിയാണ്. അഞ്ചുമാസം പിന്നിട്ടിട്ടും നോട്ട് നിരോധനത്തിന്റെ ദുരിതങ്ങള്‍ തീര്‍ന്നിട്ടില്ലെന്നും മന്ത്രി പറഞ്ഞു. ബാങ്കുകളില്‍ പണമുണ്ട്. എന്നാല്‍ വായ്പ്പയെടുക്കാന്‍ ആളില്ല. നോട്ടുനിരോധനം നികുതി വരുമാനത്തെ ബാധിക്കും. കേന്ദ്രബജറ്റ് നിരാശാജനകമാണെന്നും മന്ത്രി കൂട്ടിച്ചേര്‍ത്തു.

ബജറ്റിലെ പ്രഖ്യാപനങ്ങള്‍

എല്ലാ സാമൂഹ്യ പെന്‍ഷനുകളും 1100രൂപയാക്കി
60വയസ് കഴിഞ്ഞ പെന്‍ഷനില്ലാത്ത 2 ഏക്കറില്‍ കൂടുതല്‍ ഭൂമിയില്ലാത്ത എല്ലാവര്‍ക്കും പെന്‍ഷന്‍
അമൃത് പദ്ധതിക്ക് 150കോടി
ജനകീയാസൂത്രണം രണ്ടാം പതിപ്പ് തയ്യാറാക്കും
അഞ്ച് വര്‍ഷത്തിനുള്ളില്‍ 16000 കോടിയുടെ പദ്ധതി
ആധുനിക അറവുശാലകള്‍ക്ക് 100 കോടി രൂപ.
മണ്ണ് ജലസംരക്ഷണത്തിന് 150കോടി രൂപ. ചെറുകിട ജലസേചനത്തിന് 250കോടി രൂപ
6മാസം കൊണ്ട് കിഫ്ബി അഭിമാനകരമായ നേട്ടം കൈവരിച്ചു
ജീവിതശൈലി രോഗങ്ങള്‍ക്ക് സൗജന്യ ചികിത്സ
കാരണ്യപദ്ധതിക്ക് 350കോടി, മറ്റു പദ്ധതികള്‍ ചേര്‍ത്ത് 1000കോടി
ഓട്ടിസം ബാധിച്ച കുട്ടികള്‍ക്കായി ഓരോ ജില്ലകളിലും ഓട്ടിസം പാര്‍ക്ക്. ഇതിനായി ഏഴുകോടി രൂപ വകയിരുത്തി.
സ്മാര്‍ട്ട് സിറ്റികള്‍ക്ക് 100കോടി
സ്‌കൂള്‍ നവീകരണത്തിന് മാസ്റ്റര്‍ പ്ലാന്‍, കിഫ്ബിയില്‍ നിന്ന് 500കോടി
ബൃഹത് ആരോഗ്യ പരിപാലന പദ്ധതി വൈകും
സര്‍ക്കസ് കലാകാരന്‍മാരുടെ പുനരധിവാസത്തിന് 1കോടി രൂപ
ചെറുകിട ജലസേചന പദ്ധതികള്‍ക്ക് 208കോടി രൂപ