modi hug – Chandrika Daily

മോദിയെ രാഹുല്‍ ആലിംഗനം ചെയ്യുന്ന ചിത്രം പോസ്റ്ററാക്കി കോണ്‍ഗ്രസ്

chandrika — Sun, 22 Jul 2018 17:26:21 +0000

മുംബൈ: ലോക്‌സഭയില്‍ മോദിക്കെതിരായ തീപ്പൊരി പ്രസംഗത്തിനു ശേഷം രാഹുല്‍ ഗാന്ധി അപ്രതീക്ഷിതമായി മോദിയെ സ്‌നേഹാലിംഗനം ചെയ്ത ചിത്രം പോസ്റ്ററാക്കി കോണ്‍ഗ്രസ്. ലോക്‌സഭയില്‍ നടന്ന അവിശ്വാസ പ്രമേയ ചര്‍ച്ചയ്ക്ക് അവസാനമാണ് രാഹുല്‍ മോദിയെ ആലിംഗനം ചെയ്തത്. നിങ്ങള്‍ എന്നെ പപ്പുവെന്നും മറ്റും വിളിച്ച് അധിക്ഷേപിക്കുമായിരിക്കുമെന്നും എന്നാല്‍ എനിക്ക് വെറുപ്പില്ലെന്നും പറഞ്ഞാണ് രാഹുല്‍ മോദിയെ ആലിംഗനം ചെയ്തത്. ആ അപ്രതീക്ഷിത സ്‌നേഹാലിംഗനത്തെ പോസ്റ്ററാക്കി നേട്ടം കൊയ്യുകയാണ് ഇപ്പോള്‍ കോണ്‍ഗ്രസ്. നമ്മള്‍ സ്‌നേഹിച്ചാണു ജയിക്കുന്നത്, വെറുപ്പു കൊണ്ടല്ല’ എന്ന വാക്യത്തോടെയാണു പോസ്റ്റര്‍ തയാറാക്കിയിട്ടുള്ളത്.

हम नफ़रत से नहीं प्यार से जीतेंगे। #IAmCongress pic.twitter.com/Ygv09TmDNy

— MumbaiCongress (@INCMumbai) July 21, 2018

ആലിംഗന ചിത്രത്തോടൊപ്പം രാഹുല്‍, സോണിയ എന്നിവരുടെ ചിത്രങ്ങളും ഉള്‍പ്പെടുത്തി മുംബൈയിലെ കോണ്‍ഗ്രസ് പ്രവര്‍ത്തകരാണു പോസ്റ്റര്‍ സ്ഥാപിച്ചത്. സമൂഹമാധ്യമങ്ങളിലും പുറത്തും രാഹുലിന്റെ ആലിംഗനം വലിയ തോതില്‍ ചര്‍ച്ചയായിരുന്നു.

മോദിയുടെ ആലിംഗനത്തെ പരിഹസിച്ച് കോണ്‍ഗ്രസ്; വൈറലായി “ഹഗ്‌പ്ലോമസി” വീഡിയോ

chandrika — Mon, 15 Jan 2018 13:55:25 +0000

ന്യൂഡല്‍ഹി: പ്രധാനമന്ത്രി നരേന്ദ്ര മോദിയുടെ കെട്ടിപ്പിടുത്തത്തെ ആലിംഗന നയതന്ത്രമെന്ന് പരിഹസിച്ച് കോണ്‍ഗ്രസ്. മറ്റു രാഷ്ട്ര നേതാക്കളെ ആശ്ലേഷിക്കുന്ന രീതിയെ കളിയാക്കുന്ന വീഡിയോ കോണ്‍ഗ്രസിന്റെ ഔദ്യോഗിക ട്വിറ്ററിലാണ് പോസ്റ്റ് ചെയ്തിരിക്കുന്നത്. ഹഗ്‌പ്ലോമസി (ആലിംഗന നയതന്ത്രം) എന്ന ഹാഷ് ടാഗോട് കൂടെ പോസ്റ്റ് ചെയ്തിരിക്കുന്ന വീഡിയോക്ക് ഒരു മിനിറ്റോളം ദൈര്‍ഘ്യമുണ്ട്.

With Israeli PM Benjamin Netanyahu visiting India, we look forward to more hugs from PM Modi! #Hugplomacy pic.twitter.com/M3BKK2Mhmf

— Congress (@INCIndia) January 14, 2018

ഇസ്രായേല്‍ പ്രധാനമന്ത്രി ബെഞ്ചമിന്‍ നെതന്യാഹുവിന്റെ ഇന്ത്യാ സന്ദര്‍ശനത്തിന് തൊട്ടുമുമ്പാണ് കോണ്‍ഗ്രസ് വീഡിയോ പോസ്റ്റ് ചെയ്തത്. സംഭവത്തില്‍ കോണ്‍ഗ്രസ് അധ്യക്ഷന്‍ രാഹുല്‍ ഗാന്ധി മാപ്പ് പറയണമെന്ന ആവശ്യവുമായി ബി.ജെ.പി നേതാക്കള്‍ രംഗത്തെത്തി. കോണ്‍ഗ്രസ് പാര്‍ട്ടി ഇപ്പോള്‍ അതിന്റെ താഴ്ന്ന നിലയാണ് കാണിക്കുന്നതെന്ന് കേന്ദ്രമന്ത്രി പ്രകാശ് ജാവേദ്ക്കര്‍ കുറ്റപ്പെടുത്തി.

ഇസ്രാഈല്‍ പ്രധാനമന്ത്രി നെതന്യാഹു ഇന്ത്യയില്‍; പ്രോട്ടോകോള്‍ ലംഘിച്ച് മോദിയുടെ സ്വീകരണം

chandrika — Sun, 14 Jan 2018 16:22:29 +0000

ന്യൂഡല്‍ഹി: ആറു ദിവസത്തെ സന്ദര്‍ശനത്തിനായി ഇസ്രാഈല്‍ പ്രധാനമന്ത്രി ബഞ്ചമിന്‍ നെതന്യാഹു ഇന്ത്യയിലെത്തി. ഇന്നലെ ഉച്ചയോടെ ഡല്‍ഹി അന്താരാഷ്ട്ര വിമാനത്താവളത്തിലെത്തിയ നെതന്യാഹുവിനെയും ഭാര്യ സാറയേയും പ്രധാനമന്ത്രി നരേന്ദ്ര മോദി നേരിട്ടെത്തി സ്വീകരിച്ചു. പ്രോട്ടോകോള്‍ ലംഘിച്ചാണ് ഇരുവരെയും സ്വീകരിക്കാന്‍ മോദി വിമാനത്താവളത്തിലെത്തിയത്.

സാധാരണയായി മറ്റു രാഷ്ട്രത്തലവന്മാര്‍ സന്ദര്‍ശനത്തിനെത്തുമ്പോള്‍ മന്ത്രിമാരും മറ്റ് ഉദ്യോഗസ്ഥരും ചേര്‍ന്നാണ് സ്വീകരിക്കാറ്. ശേഷം രാഷ്ട്രപതി ഭവനില്‍ വച്ചാണ് പ്രധാനമന്ത്രി ഔദ്യോഗികമായി അതിഥിയെ സ്വീകരിക്കുക. ഈ പ്രോട്ടോക്കോളാണ് മോദി ലംഘിച്ചത്. നേരത്തെ ജാപ്പനീസ് പ്രധാനമന്ത്രിയുടെയും നേപ്പാള്‍ പ്രധാനമന്ത്രിയുടെയും ഇന്ത്യാ സന്ദര്‍ശന വേളകളിലും മോദി പ്രോട്ടോകോള്‍ ലംഘിച്ചിരുന്നു. 15 വര്‍ഷത്തെ ഇടവേളയ്ക്കു ശേഷമാണ് ഒരു ഇസ്രാഈല്‍ പ്രധാനമന്ത്രി ഇന്ത്യ സന്ദര്‍ശിക്കുന്നത്. 2003ല്‍ ഏരിയല്‍ ഷാരോണ്‍ ആയിരുന്നു അവസാനമായി ഇന്ത്യ സന്ദര്‍ശിച്ചത്. ഇരു രാജ്യങ്ങളും തമ്മിലുള്ള വ്യാപാര-പ്രതിരോധ-നയതന്ത്ര മേഖലകളിലെ സഹകരണം മെച്ചപ്പെടുത്തുകയാണ് നെതന്യാഹുവിന്റെ സന്ദര്‍ശനത്തിന്റെ ലക്ഷ്യം. 130 അംഗ പ്രതിനിധി സംഘവും ഒപ്പമുണ്ട്.

#WATCH Israel PM Benjamin Netanyahu received by PM Narendra Modi in Delhi. #NetanyahuInIndia pic.twitter.com/CTv4rlEWSg

— ANI (@ANI) January 14, 2018

ഡല്‍ഹിയിലെത്തിയ നെതന്യാഹു മോദിയെക്കൂടാതെ രാഷ്ട്രപതി രാംനാഥ് കോവിന്ദ്, വിദേശകാര്യമന്ത്രി സുഷമ സ്വരാജ് എന്നിവരുമായി ഇന്ന് ചര്‍ച്ച നടത്തും. തുടര്‍ന്ന് മുംബൈ ഗുജറാത്ത് എന്നിവിടങ്ങളും സന്ദര്‍ശിക്കും. ഇന്ത്യ-ഇസ്രാഈലി സി.ഇ.ഒ ഫോറത്തിലും നെതന്യാഹു പങ്കെടുക്കും. കടല്‍ജലം ശുദ്ധീകരിക്കുന്നതിനുള്ള ഗാല്‍ മൊബൈല്‍ എന്ന വാഹനം നെതന്യാഹു മോദിക്ക് സമ്മാനമായി നല്‍കും. ഗുജറാത്തിലെ വദ്രാദിലെ മികവിന്റെ കേന്ദ്രവും ഇസ്രാഈല്‍ പ്രധാനമന്ത്രി സന്ദര്‍ശിക്കും. ആറു മാസങ്ങള്‍ക്കു മുമ്പ് നരേന്ദ്ര മോദി ഇസ്രാഈല്‍ സന്ദര്‍ശിച്ചിരുന്നു. നിലാരംബരായ ഫലസ്തീന്‍ ജനതയെ കൊന്നൊടുക്കുന്ന ജൂതരാജ്യം സന്ദര്‍ശിക്കുന്ന ആദ്യ ഇന്ത്യന്‍ പ്രധാനമന്ത്രി എന്ന കുപ്രസിദ്ധിയും ഇതിലൂടെ മോദി സ്വന്തമാക്കിയിരുന്നു.