അല്‍ക്വയ്ദ ബന്ധമുള്ള അല്‍ ഷബാബ് ഭീകരരാണ് ആക്രമണത്തിനു പിന്നിലെന്നാണ് സൂചന. എന്നാല്‍ ആക്രമണത്തിന്റെ ഉത്തരവാദിത്വം ഏറ്റെടുക്കുന്നതായി അല്‍ഷബാബ് ഭീകര സംഘടന അറിയിച്ചിട്ടില്ല. അല്‍ഷബാബിനെതിരെ പുതിയ പ്രസിഡന്റ് നടത്തിയ സൈനിക നടപടികള്‍ സംഘടനയെ ചൊടിപ്പിച്ചിരുന്നു. ഇതിനെ തുടര്‍ന്ന് രാജ്യത്ത് ചെറിയ തോതില്‍ അക്രമങ്ങള്‍ അല്‍ഷബാബ് നടത്തി വരികയായിരുന്നു. സ്‌ഫോടനത്തെ തുടര്‍ന്ന് മൂന്നു ദിവസത്തെ ദേശീയ ദുഃഖാചരണം പ്രസിഡന്റ് അബ്ദുള്ളാഹി ഫര്‍മാജോ പ്രഖ്യാപിച്ചിരിക്കുകയാണ്. ദുരിതാശ്വാസത്തിനായി പണവും രക്തവും ദാനം ചെയ്യാന്‍ ജനങ്ങളോട് അദ്ദേഹം അഭ്യര്‍ഥിച്ചു.

സ്‌ഫോടനത്തിന്റെ ശക്തിയില്‍ സമീപത്തെ ബിസിനസ് സ്ഥാപനങ്ങളും വീടുകളും വാഹനങ്ങളും തകര്‍ന്നു. പല കെട്ടിടങ്ങളും നിലംപൊത്തിയ നിലയിലാണ്. ആക്രമണത്തിന്റെ ഉത്തരവാദിത്തം ആരും ഏറ്റെടുത്തിട്ടില്ല. കെട്ടിടങ്ങളുടെ അവശിഷ്ടങ്ങള്‍ക്കടിയില്‍ കുടുങ്ങിയാണ് പലരും മരിച്ചത്. സിറ്റി മേയറുടെ അഭ്യര്‍ത്ഥന പ്രകാരം പരിക്കേറ്റവര്‍ക്ക് രക്തം നല്‍കാന്‍ നൂറുകണക്കിന് ആളുകള്‍ ആസ്പത്രികളിലെത്തി. സോമാലിയന്‍ പ്രതിരോധ മന്ത്രിയും സൈനിക മേധാവിയും രാജിവെച്ച് 48 മണിക്കൂര്‍ പിന്നിടുമ്പോഴാണ് രാജ്യത്തെ ഞെട്ടിച്ച് വന്‍ സ്‌ഫോടനമുണ്ടായത്.

കൊല്ലപ്പെട്ടവരോടുള്ള ആദര സൂചകമായി പ്രസിഡന്റ് മുഹമ്മദ് അബ്ദുല്ലാഹി മുഹമ്മദ് ഫര്‍മജോ മൂന്നു ദിവസത്തെ ദേശീയ ദു:ഖാചരണം പ്രഖ്യാപിച്ചു. ആക്രമണത്തിനിരയായവരെ സഹായിക്കാന്‍ അദ്ദേഹം ജനങ്ങളോട് അഭ്യര്‍ത്ഥിച്ചു.