അധികൃതരുടെ അനാസ്ഥയാണ് അപകടത്തിനു കാരണമെന്ന് ഹരജിയില്‍ ആരോപിക്കുന്നു. ഹര്‍ജി അടിയന്തരമായി പരിഗണിക്കണമെന്ന് ആവശ്യത്തോട് കോടതി കഴിഞ്ഞ ദിവസം അനുകൂല പ്രതികരണമാണ് നടത്തിയത്.

ഒക്ടോബര്‍ 30 നാണ് മോര്‍ബി പാലം തകര്‍ന്ന് 135 പേര്‍ മരിച്ചത്. 100 ലധികം പേര്‍ക്ക് പരിക്കേല്‍ക്കുകയും ചെയ്തു. നിര്‍മാണ പ്രവര്‍ത്തനത്തിലെ ക്രമക്കേടും രക്ഷാപ്രവര്‍ത്തനത്തിലെ വീഴ്ചകളും ചൂണ്ടിക്കാട്ടി സര്‍ക്കാരിനെതിരെ ശക്തമായ വിമര്‍ശനമാണ് ഉയരുന്നത.്‌

ഒക്ടോബര്‍ 30 ന് മോര്‍ബിയിലെ തൂക്കുപാലം തകര്‍ന്ന് 135 പേര്‍ക്കാണ് ജീവന്‍ നഷ്ടമായത്. സംസ്ഥാന ആഭ്യന്തര വകുപ്പ്, മുന്‍സിപ്പാലിറ്റി, ജില്ലാ കലക്ടര്‍ എന്നിവര്‍ മുഖേന സംസ്ഥാന സര്‍ക്കാരിനും പ്രാദേശിക അധികാരികള്‍ക്കും നോട്ടീസ് അയക്കുകയായിരുന്നു. പത്രവാര്‍ത്തയുടെ അടിസ്ഥാനത്തിലാണ് കോടതി സ്വമേധയാ കേസെടുത്തത്.

അത്യഗാധമായ ദുഃഖത്തോടെയാണ് ഗുജറാത്തിലെ മോര്‍ബിയില്‍നിന്നുള്ള വാര്‍ത്ത കേട്ടത്. നൂറ്റാണ്ട് പഴക്കമുള്ള മോര്‍ബിയിലെ തൂക്കുപാലം മരണത്തിലേക്കുള്ള പാതയായപ്പോള്‍, പുരുഷന്‍മാരും സ്ത്രീകളും കുട്ടികളുമടക്കം 142 പേര്‍ താഴെവീണ് മുങ്ങിപ്പൊന്തി നിലവിളിക്കുന്ന ദൃശ്യം തല്‍സമയം ലോകരുടെ ഹൃദയം തൊട്ടു. ഒരുകാര്യം പ്രഥമ ദൃഷ്ട്യാല്‍ പറയാന്‍ പറ്റും; ബി.ജെ.പി ഭരണത്തിന്റെ അഴിമതിയും കഴിവുകേടും മുതലാളിത്ത ദാസ്യവും ഒരുപറ്റം സാധാരണ മനുഷ്യരെ നദിയിലെറിഞ്ഞ് ശ്വാസംമുട്ടിച്ച് കൊല്ലുകയായിരുന്നു എന്ന്. ഒരേസമയം കേന്ദ്രവും സംസ്ഥാനവും ഭരിക്കുന്നത്‌കൊണ്ട് ഡബ്ള്‍ എന്‍ഞ്ചിന്‍ സര്‍ക്കാര്‍ എന്നാണ് ബി. ജെ.പി മന്ത്രിമാര്‍ സ്വയം പരിചയപ്പെടുത്താറുള്ളത്. അധികാരത്തിന്റെ ലഹരി നല്‍കുന്ന വെറും ഗര്‍വാണ് ഈ പറച്ചില്‍. തങ്ങളുടെ ഉറ്റവരെവിടെ എന്ന് ചോദിച്ച് ബന്ധുക്കള്‍ വിലപിക്കുമ്പോള്‍ തടാകത്തില്‍ ബോട്ടിംഗ് നടത്തുന്ന ലാഘവത്തോടെ തപ്പിക്കളിക്കുകയായിരുന്നു സുരക്ഷാവേഷമണിഞ്ഞവര്‍, ഒരു ഫലവുമില്ലാതെ. ‘ഇത്രവലിയ ദുരന്തം തല്‍സമയം കണ്ടിട്ട് ആംബുലന്‍സ് പോലും പെട്ടെന്ന് എത്തിയില്ല. വൈകി വന്ന ആംബുലന്‍സുകള്‍ രൂക്ഷമായ ഗതാഗതക്കുരുക്കില്‍ പെട്ട് പിന്നെയും ഏറെ സമയമെടുത്തു. ഈ ഘട്ടത്തിലും റോഡിലെ തിരക്ക് നിയന്ത്രിക്കാന്‍ ട്രാഫിക് പൊലീസ് പോലും ആവശ്യത്തിന് ഉണ്ടായിരുന്നില്ല’- ദുരന്ത മുഖത്ത്‌നിന്ന് രക്ഷപ്പെട്ട യശ്വന്ത്‌സിംഗ് ദോദിയ മാധ്യമങ്ങളോട് പറഞ്ഞു. തന്ത്രപ്രധാനമായ സ്ഥലത്ത് അപകടം സംഭവിച്ചിട്ട് ഒരു മണിക്കൂര്‍ കഴിഞ്ഞാണ് പൊലീസ് സേന എത്തുന്നത്. അടിയന്തിര സാഹചര്യം കൈകാര്യം ചെയ്യുന്ന ഡിസാസ്റ്റര്‍ മാനേജ്‌മെന്റില്‍ പൂജ്യം മാര്‍ക്കാണ് ഗുജറാത്തിന് എന്ന് ചുരുക്കം.

ഗുജറാത്തുകാരനായ പ്രധാനമന്ത്രി സംസ്ഥാനത്തുണ്ടായിട്ടും പിന്നെയും രണ്ട് ദിവസം വൈകിയാണ് എത്തിയത്. സ്വന്തം ജനത ശ്വാസംമുട്ടി മരിക്കുമ്പോഴും മോദി വരാന്‍ വൈകിയതിന്റെ കാരണം പരതണ്ട. നല്ലോണം ഒരുക്കണം. അതുകൊണ്ട് ഇമേജ് മാനേജ്‌മെന്റ് ഗ്രൂപ്പ് പെട്ടെന്ന് സമ്മതം കൊടുക്കില്ല. പി.ആര്‍ ഗ്രൂപ്പാണല്ലോ ‘ശുഭനേരം’ നിശ്ചയിക്കുന്നത്. ചിട്ടപ്പെടുത്തിയ തിരക്കഥയില്‍, അമ്മയെ വണങ്ങല്‍ മുതല്‍ അന്താരാഷ്ട്ര ഇടങ്ങള്‍ വരെ ഷൂട്ടിംഗ് ലൊക്കേഷനായി സങ്കല്‍പ്പിച്ച് നിറഞ്ഞാടി അഭിനയിക്കുന്ന ഒരാളാണ് ഇപ്പോള്‍ പ്രധാനമന്ത്രി. അപ്പോള്‍ മറുത്തൊന്നും പ്രതീക്ഷിക്കരുത്.

മരിച്ചവരെ മോര്‍ച്ചറിയിലാക്കി
മതിലിന് ചായം പൂശുന്ന നാട്

മൃതദേഹങ്ങള്‍ സൂക്ഷിച്ച മോര്‍ച്ചറിയുടെ മുന്നില്‍ വന്ന് ബന്ധുക്കള്‍ വിവരങ്ങള്‍ തേടുമ്പോള്‍ മോര്‍ബി ഗവ. ആശുപത്രിയിലെ അധികൃതര്‍ക്ക് ഉത്തരം പറയാന്‍ പറ്റുന്നില്ല. മോദിയുടെ വരവില്‍ അവര്‍ തിരക്കിലായിരുന്നു. മിനുക്ക് പണിയുടെ വന്‍ തിരക്ക്. പുതിയ കിടക്കകള്‍ വിരിച്ചും ഫര്‍ണിച്ചറുകള്‍ നിരത്തിയും ഫാനും ലൈറ്റും ഘടിപ്പിച്ചും ഭിത്തിയില്‍ ചായം തേച്ചും തിരക്കോട് തിരക്ക്. പ്രധാനമന്ത്രിയുടെ സന്ദര്‍ശന വേളയുടെ ചിത്രങ്ങളും ദൃശ്യങ്ങളും മാധ്യമങ്ങളിലൂടെ പുറം ലോകത്തെത്തുമ്പോള്‍ ‘പശ്ചാത്തലഭംഗി’ ഉറപ്പുവരുത്താന്‍ മുകളില്‍നിന്ന് ഉത്തരവുണ്ടാകും. മൃതദേഹങ്ങള്‍ അനാഥ പ്രേതങ്ങളായി മോര്‍ബി സര്‍ക്കാറാശുപത്രിയുടെ മോര്‍ച്ചറിയില്‍ നിറഞ്ഞപ്പോള്‍, തിരിച്ചറിയാന്‍ പറ്റാതെ, തങ്ങളുടെ പ്രിയപ്പെട്ടവരെവിടെ എന്നന്വേഷിക്കുന്ന ബന്ധുക്കളുടെ കണ്ണുനീര്‍ ഒരു നേരിനെ സാക്ഷ്യപ്പെടുത്തുന്നുണ്ട്. മറ്റൊന്നുമല്ല; ഗുജറാത്തിന്റെ പ്രാഥമികാരോഗ്യ സൂചികയും പൂജ്യത്തിലാണ്.

കാര്യക്ഷമത ഒന്നിലുമില്ല

ഇന്ത്യയില്‍ മറ്റൊരിടത്തുമില്ലാത്തത് എന്ന വിശേഷണത്തോടെയാണ് ടൂറിസം വകുപ്പ് മോര്‍ബി പാലത്തെ പരിചയപ്പെടുത്തുന്നത്. ഒരേ സമയം 100 പേര്‍ മാത്രം കയറേണ്ടിടത്ത് 650 പേര്‍ കയറിയത് പൊലീസുണ്ടെങ്കില്‍ നിയന്ത്രിക്കാമായിരുന്നു. പൊതുമരാമത്തിലുള്ള എഞ്ചിനീയര്‍മാര്‍ പാലം പരിശോധിച്ചിട്ടുപോലുമില്ല. അറ്റകുറ്റപണിക്ക്‌ശേഷം ജില്ലാ മജിസ്‌ട്രേറ്റും ഈ പൈതൃക പാലം കണ്ടിട്ടില്ല. അഥവാ ഗുജറാത്തിലെ സുരക്ഷാസേന കൃത്യമല്ല. പൊതുമരാമത്ത് കാര്യക്ഷമമല്ല. ജില്ലാഭരണകൂടം ഒന്നും ചെയ്യുന്നില്ല. മോര്‍ബി ദുരന്തം ഇരന്ന് വാങ്ങിയതാണെന്ന് വ്യക്തം. ആടുന്ന പാലമായത്‌കൊണ്ട് കൊല്‍ക്കത്തയിലെ ഹൗറയേക്കാള്‍ ഋഷികേശിലെ പാലത്തേക്കാള്‍ മികച്ചതാണത്രെ.
(കേരളത്തിലെ ചെറു ഗ്രാമങ്ങളിലെ പുഴകള്‍ക്ക് മീതെപ്പോലും ഇത്തരം തൂക്കുപാലങ്ങള്‍ വ്യാപകമായുണ്ട് എന്നത് കേരളത്തെ ഗുജറാത്താക്കുമെന്ന് വായ്ത്താരി നടത്തുന്ന ബി.ജെ.പി നേതാക്കളെങ്കിലും ഓര്‍ക്കണം.)

കോര്‍പറേറ്റ് ദാസ്യം

പാലത്തിന്റെ പുനരുദ്ധാരണം കരാര്‍ കൊടുത്തത് ഒറേവ എന്ന സ്വകാര്യ കമ്പനിക്കായിരുന്നു. മുനിസിപ്പാലിറ്റിയില്‍നിന്ന് ഫിറ്റ്‌നസ് രേഖ കിട്ടാതെ പാലം ജനങ്ങള്‍ക്കായി തുറന്ന്‌കൊടുത്ത ‘ധൈര്യം’ ഒരു വസ്തുതയെ സമ്മതിക്കുന്നുണ്ട്. പ്രാദേശിക ഭരണകൂടം എന്ന സംവിധാനം തന്നെ ഗുജറാത്തില്‍ പ്രവര്‍ത്തിക്കുന്നില്ല എന്നതാണത്. ദുരന്ത നേരത്ത് ബി.ജെ.പി സര്‍ക്കാര്‍ ഒട്ടും ജാഗ്രത കാണിച്ചില്ല എന്ന് കുറ്റപ്പെടുത്തരുത്. മാധ്യമങ്ങളുടെ ക്യാമറക്കണ്ണുകള്‍ പതിയും മുമ്പ് ടവറില്‍ ഘടിപ്പിച്ചിരുന്ന ഒറേവാ കമ്പനിയുടെ പേരുള്ള വലിയ ഫലകം വെള്ളത്തുണി കൊണ്ട് കൃത്യമായി മറച്ചു. ഘടികാരം നിര്‍മിച്ച് മാത്രം പരിചയമുള്ള സ്വകാര്യ കമ്പനിക്ക് പാലം പുനരുദ്ധാരണത്തിന്റെ കരാര്‍ നല്‍കിയ കച്ചവടത്തിലെ കമ്മീഷന്‍ പറഞ്ഞുറപ്പിച്ച മട്ടില്‍ കിട്ടിക്കാണും. ആ കടപ്പാടാണ് കമ്പനിയുടെ ബ്രാന്റ് ഇമേജിനെ വെള്ളത്തുണിയില്‍ പൊതിഞ്ഞ് സംരക്ഷിക്കാന്‍ ഭരണകൂട മെഷിനറി ശുഷ്‌കാന്തി കാട്ടിയത്. സാധാരണഗതിയില്‍ രാഷ്ട്രീയ പാര്‍ട്ടികള്‍ ഭരിക്കുമ്പോള്‍ കോര്‍പറേറ്റുകള്‍ ഇടപെടും, സഹായിക്കും. എന്നാല്‍ ബി.ജെ.പി ഭരിക്കുമ്പോള്‍ തിരിച്ചാണ്; കോര്‍പറേറ്റുകള്‍ നേരിട്ട്തന്നെ ഭരിക്കും.

ദൈവത്തിന്റെ സന്ദേശം

ഇരുപത്തിയൊന്ന് പേരുടെ ജീവനെടുത്ത 2016 ല്‍ പശ്ചിമ ബംഗാളില്‍ പാലം തകര്‍ന്ന സന്ദര്‍ഭം. ദുരന്തത്തില്‍ അകപ്പെട്ടവരോടുള്ള അനുതാപത്തേക്കാള്‍ മമതബാനര്‍ജിയോട് പക വീട്ടാനാണ് മോദി തിടുക്കപ്പെട്ടത്. ‘ഇത് ദൈവത്തില്‍ നിന്നുള്ള സന്ദേശമാണ്’ എന്നായിരുന്നു ആദ്യ പ്രതികരണം. തൃണമൂലില്‍നിന്ന് നാടിനെ രക്ഷിക്കാന്‍ ബംഗാള്‍ ജനതയോട് ആ ദുരന്ത നേരത്ത് അദ്ദേഹം ആഹ്വാനം ചെയ്തു. മരിച്ചവരുടെ കുഴിമാടങ്ങള്‍ അധികാരത്തിലേക്കുള്ള വഴിയാക്കുമ്പോള്‍ മോദിയുടെ ശീലംവെച്ച് ഔചിത്യ പ്രശ്‌നങ്ങള്‍ ഉദിക്കുന്നില്ല. എന്നാല്‍ ആര്‍.എസ്.എസ് ശാഖയില്‍ പരിശീലനം കിട്ടാത്തതിനാലാകും, രാഹുല്‍ ഗാന്ധിക്കുള്ളിലെ മനുഷ്യന്‍ എന്ന ഉണ്മ നഷ്ടപ്പെട്ടിട്ടില്ല. അത് കൊണ്ട് ‘ഈ ദുരന്തത്തെ രാഷ്ട്രീയമായി ഉപയോഗിക്കാന്‍ ഞാന്‍ ഉദ്ദേശിക്കുന്നില്ല. മരിച്ചവരുടെ ഉറ്റവര്‍ക്ക് എന്റെ അനുശോചനം’ എന്ന രണ്ട് വാചകത്തിലെ ട്വീറ്റില്‍ രാഹുല്‍ കൈകൂപ്പി. പക്ഷേ മമതക്ക് ചോദിക്കാം; ഈ ദുരന്തം ഗോഡ് വഴി സംഭവിച്ചതാണോ? അതോ, ഫ്രോഡുകള്‍ സൃഷ്ടിച്ചതാണോ? അന്ന് ബംഗാള്‍ ദുരന്തം നടക്കുമ്പോള്‍ തിരഞ്ഞെടുപ്പായിരുന്നു. ഇപ്പോള്‍ ഗുജറാത്തും തിരഞ്ഞെടുപ്പിന് ഒരുങ്ങിയ സമയമാണ്. എല്ലാം ഒത്തുവന്ന സ്ഥിതിക്ക്, അന്ന് മോദി ചോദിച്ച അതേ ചോദ്യം തൃണമൂലുകാര്‍ ഉച്ചത്തില്‍ ചോദിക്കട്ടെ. ഭരണകൂടത്തെ പ്രതിയാക്കണം

‘ജനങ്ങളുടെ ജീവനും സ്വത്തിനും സുരക്ഷ ഉറപ്പാക്കേണ്ടത് ഭരണകൂടമാണ്. അത് ചെയ്യാതിരിക്കുന്നത് ഭരണഘടനാപരമായ വീഴ്ചയാണ്. മോര്‍ബി സംഭവത്തില്‍ സംസ്ഥാന ഭരണകൂടത്തെ നിയമ നടപടിക്ക് വിധേയമാക്കണം’. സുപ്രീംകോടതി ബാര്‍ അസോസിയേഷന്‍ മുന്‍ അധ്യക്ഷന്‍ ദൃഷ്യന്ത് ദവേയുടെ വാക്കുകളാണിത്. രാഹുല്‍ഗാന്ധിയെ ട്രോളാന്‍ വ്യഗ്രത കാട്ടുന്ന മീഡിയയെ വിടാം. മറ്റു മാധ്യമങ്ങള്‍ പോലും ഗുജറാത്ത് ഭരണവര്‍ഗത്തെ തുറന്ന്കാട്ടാന്‍ ധൈര്യപ്പെടുന്നില്ല. ‘നേര് പറയലാണ് എല്ലായ്‌പ്പോഴുമുള്ള വിപ്ലവ പ്രവര്‍ത്തനം’ എന്ന ഗ്രാംഷിയുടെ ചിന്ത ഫാഷിസ്റ്റ് ഭരണകൂടങ്ങള്‍ക്കെതിരെ ജനകീയ പോരാട്ടം ഉയര്‍ത്തുന്നവര്‍ക്കുള്ള ആദ്യ പാഠമാണ്. പെരുംനുണകളാല്‍ ആവര്‍ത്തിച്ചുറപ്പിച്ച ഗുജറാത്ത് മോഡല്‍ എന്ന മിഥ്യയുടെ തീരത്തേക്കുള്ള പാലം കൂടിയാണ് മോര്‍ബിയില്‍ പകല്‍വെളിച്ചത്തില്‍ പൊളിഞ്ഞ് വീണത് എന്ന നേര് ഉറക്കെയുറക്കെ പറയേണ്ട നേരമാണിത്.
ഇരകള്‍ രക്ഷകരാകുമ്പോള്‍

ഏറ്റവും സന്തോഷകരവും മനോഹരവുമായ ദൃശ്യം ദുരന്ത സ്ഥലത്ത് കണ്ടു. അപകടസമയത്ത് മുസ്‌ലിം യുവാക്കള്‍ രക്ഷാപ്രവര്‍ത്തനം നടത്തുന്ന രംഗമാണത്. ആരെയാണോ അരികുവത്കരിച്ച് അകറ്റിനിര്‍ത്തുന്നത്, വെറുക്കണമെന്ന് ബി. ജെ.പി ആവശ്യപ്പെടുന്നത്, അവര്‍ അവരോട് ചെയ്ത അനീതികളൊന്നും വകവെക്കാതെ ദുരന്ത മുഖത്ത് അവര്‍ മനുഷ്യത്വം കാട്ടി. രക്ഷകരായി അവതരിച്ച ആ മുസ്‌ലിം ചെറുപ്പത്തെ ഹൃദയം തൊട്ട് നമുക്കഭിവാദ്യം ചെയ്യാം.
ആത്മഗതം: സബര്‍മതി എതിര്‍ ദിശയില്‍ ഒഴുകാന്‍ തുടങ്ങിയിട്ട് ദശകങ്ങള്‍ പലതായി. ഗാന്ധിയുടെ ഹൃദയദേശത്ത്‌നിന്ന് ഇനിയെന്നാണ് ശുഭ വാര്‍ത്തകള്‍ കേട്ട് തുടങ്ങുക.

അതേസമയം മോര്‍ബി തൂക്കപാലം ദുരന്തത്തില്‍ മുന്‍സിപ്പല്‍ ചീഫ് ഓഫീസറെ സസ്‌പെന്റ് ചെയ്തു. തദ്ദേശ സ്വയംഭരണ വകുപ്പ് ഉദ്യോഗസ്ഥനായ സന്ദീപ് സിങ് ഷായെയാണ് സസ്‌പെന്റ് ചെയ്തത്. 135 പേരുടെ ദാരുണാന്ത്യത്തിന് കാരണമായ ദുരന്തത്തില്‍ പാലത്തിന്റെ സുരക്ഷാ സംബന്ധിയായ പ്രാഥമിക പരിശോധനകളോ മറ്റ് നടപടിക്രമങ്ങളോ പാലിച്ചില്ലെന്ന് പ്രാഥമിക അന്വേഷണത്തില്‍ തെളിഞ്ഞതിനെ തുടര്‍ന്നാണ് നടപടി.

പാലത്തിന് ഫിറ്റ്‌നസ് സര്‍ട്ടിഫിക്കറ്റ് നല്‍കാതെ പൊതുജനങ്ങള്‍ക്കായി തുറന്നുകൊടുക്കാന്‍ അനുമതി നല്‍കിയെന്നും കണ്ടെത്തിയിരുന്നു. കഴിഞ്ഞ ഞായറാഴ്ച വൈകീട്ടാണ് രാജ്യത്തെ നടക്കിയ ദുരന്തം സംഭവിച്ചത്. മോര്‍ബിയിലെ മച്ചു നദിക്കു കുറുകെയുള്ള തൂക്കുപാലത്തില്‍ ആളുകള്‍ ഇടിച്ചുകയറിയതും ചിലര്‍ തൂക്കുപാലം ശക്തിയായി കുലുക്കിയതുമാണ് പാലം പൊട്ടിവീഴാന്‍ കാരണമെന്നാണ് ദൃക്‌സാക്ഷിമൊഴി. പാലം സ്ഥിതി ചെയ്യുന്നത് മോര്‍ബി മുന്‍സിപ്പാലിറ്റിയുടെ ഭൂമിയിലാണ്.

എന്നാല്‍ ഒരു ഘട്ടത്തിലും മുന്‍സിപ്പല്‍ ഉദ്യോഗസ്ഥര്‍ പാലം പണിയോ അറ്റകുറ്റപ്പണിയോ പരിശോധിച്ചില്ലെന്നാണ് കണ്ടെത്തല്‍. അതേസമയം സംഭവത്തില്‍ തിരച്ചിലും രക്ഷാപ്രവര്‍ത്തനവും അവസാനിപ്പിച്ചു. ആരെയും കാണാതായതായി ഇപ്പോള്‍ പരാതി ഇല്ലെന്നും അതിനാല്‍ തിരച്ചില്‍ അവസാനിപ്പിക്കുകയാണെന്നും ദുരന്തനിവാരണ കമ്മീഷണര്‍ ഹര്‍ഷദ് പട്ടേല്‍ അറിയിച്ചു.

ഡിസംബര്‍ ഒന്നിനും അഞ്ചിനുമായി വോട്ടെടുപ്പ് നടക്കുമ്പോള്‍ പരമാവധി വോട്ടുകള്‍ സമാഹരിക്കാനാണ് കോണ്‍ഗ്രസും ആപ്പും പരിശ്രമിക്കുന്നത്. വര്‍ഗീയകലാപത്തിന് ശേഷവും 1995ന് ശേഷവും ഇതുവരെയും ബി.ജെ.പിക്ക് ഇവിടെ ഭരണം നഷ്ടപ്പെട്ടിട്ടില്ല. പ്രധാനമന്ത്രിയുടെ തട്ടകത്തില്‍ ക്ഷീണം സംഭവിച്ചാലത് അദ്ദേഹത്തിന് വലിയ ആഘാതകമാകും. 135 പേരുടെ മരണം വരുത്തിവെച്ച തൂക്കുപാലദുരന്തം വിധിയാണെന്ന ്പ്രചരിപ്പിച്ച് സമാധാനിപ്പിക്കാനുള്ള തിടുക്കത്തിലാണിപ്പോള്‍ മോദിയും കൂട്ടരും. വ്യക്തമായ ദിശാബോധത്തോടെയാണ് കോണ്‍ഗ്രസും ആപ്പും ഇവിടെ പ്രചാരണത്തിലുള്ളതെന്നത് ബി.ജെ.പിയെ ഭയപ്പെടുത്തുന്നു. 150 സീറ്റെന്ന ലക്ഷ്യം അതിമോഹമാണെന്ന് തിരിച്ചറിയുകയാണിപ്പോളവര്‍.

കോണ്‍ഗ്രസില്‍നിന്ന് എം.എല്‍.എമാരെ കൂറുമാറ്റിയാണ് ബി.ജെ.പി ഇപ്പോള്‍ 111 നിയമസഭാംഗങ്ങളെന്ന സംഖ്യയിലെത്തിയിരിക്കുന്നത്. റോഡ് ഉള്‍പ്പെടെ വലിയ പദ്ധതികളാണ് മോദിയുടെ നേതൃത്വത്തില്‍ ഇവിടെ നടപ്പാക്കുന്നത്. പക്ഷേ മോര്‍ബി ദുരന്തം ഈ അവകാശവാദങ്ങളെയുടെയെല്ലാം മുനയൊടിച്ചിരിക്കുകയാണ്. ഡല്‍ഹിയിലും പഞ്ചാബിലും നേടിയ ആപ് വിജയം കോണ്‍ഗ്രസിനോടൊപ്പം ബി.ജെ.പിയെയും ക്ഷീണിപ്പിച്ചിരുന്നു. അത് ഇവിടെയും പാരയാകുമോ എന്ന ഭയത്തിലാണ് ഇരുപാര്‍ട്ടികളും. പക്ഷേ ബി.ജെ.പിയെ ഏതുവിധേനയും പുറത്തിറക്കാനുള്ള നീക്കത്തിലാണ് ഇരുപാര്‍ട്ടികളുമിപ്പോള്‍. 50 സീറ്റെങ്കിലും ആപ്പ് പിടിച്ചാല്‍ കോണ്‍ഗ്രസിനും ബി.ജെ.പിക്കും 65 വീതം സീറ്റുകളാകും. പക്ഷേ ഭരണവിരുദ്ധതരംഗം അലയടിച്ചാലത് കോണ്‍ഗ്രസിനാണ് കൂടുതല്‍ ഗുണകരമാകുക.