motor – Chandrika Daily

മത്സ്യക്കുളത്തിലെ മോട്ടോറിൽ നിന്ന് ഷോക്കേറ്റ് യുവാവ് മരിച്ചു

webdesk13 — Sun, 14 Jan 2024 09:39:27 +0000

ആലപ്പുഴയിൽ യുവാവ് ഷോക്കേറ്റ് മരിച്ചു. പഴവീട് ചിറയിൽ അഖിൽ രാജ്(28) ആണ് മരിച്ചത്. മത്സ്യക്കുളത്തിലെ മോട്ടോറിൽ നിന്നാണ് ഷോക്കേറ്റതെന്നാണ് വിവരം.

ഹരിപ്പാട് വീയപുരത്ത് പാട്ടത്തിനെടുത്ത ഭൂമിയിൽ സുഹൃത്തുക്കൾക്കൊപ്പം മീൻ കൃഷി ചെയ്യുകയായിരുന്നു അഖിൽ. ഇന്ന് രാവിലെ മത്സ്യക്കുളം വറ്റുന്നതിനിടെയാണ് അപകടമുണ്ടായത്. മത്സ്യക്കുളത്തിലെ മോട്ടോറിൽ നിന്ന് ഷോക്കടിക്കുകയായിരുന്നു.

ഉടൻ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. മൃതദേഹം വണ്ടാനം മെഡിക്കൽ കോളജിലേക്ക് മാറ്റി.

ടാങ്കര്‍ മറിഞ്ഞ് ഡീസല്‍ ചോര്‍ന്നു; മോട്ടറിന്റെ സ്വിച്ചിട്ടതോടെ സമീപത്തെ കിണറ്റില്‍ തീപിടിത്തം

webdesk13 — Tue, 22 Aug 2023 14:04:41 +0000

മലപ്പുറം പരിയാപുരം ചീരട്ടമാലയില്‍ ടാങ്കര്‍ ലോറി മറിഞ്ഞ് ഡീസല്‍ ചോര്‍ന്നതിന് പിന്നാലെ സമീപ പ്രദേശത്തെ കിണറ്റില്‍ വന്‍ തീപിടിത്തമുണ്ടായി. കൊച്ചിയില്‍ നിന്ന് മലപ്പുറത്തേക്ക് ഡീസലുമായി വരികയായിരുന്ന ടാങ്കര്‍ 2 ദിവസം മുമ്പാണ് മറിഞ്ഞ് അപകടമുണ്ടായത്.

20000 ലിറ്ററോളം ഡീസലുണ്ടായിരുന്ന ടാങ്കറില്‍. നയാര കമ്പനിയുടെ ടാങ്കറിലുള്ള ഭൂരിപക്ഷം ഡീസലും പുറത്തേക്ക് ഒഴുകിയിരുന്നു. ഈ ഡീസല്‍ താഴ്ന്ന പ്രദേശത്തുള്ള വീടുകളിലെ കിണറുകളിലേക്കെത്തിയതാണ് തീ പിടിത്തത്തിനിടയാക്കിയത്.

പരിയാപുരം കൊല്ലറേശ്ശുമറ്റത്തില്‍ ബിജുവിന്റെ വീട്ടില്‍ ഇന്ന് മോട്ടോര്‍ പ്രവര്‍ത്തിപ്പിക്കാന്‍ സ്വിച്ചിട്ടപ്പോഴാണ് വലിയ രീതിയില്‍ തീപിടിത്തമുണ്ടായത്. വെള്ളത്തില്‍ പൂര്‍ണ്ണമായും ഡീസല്‍ പടര്‍ന്നതിനാല്‍ കിണറിലെ തീ ഇതുവരെ അണയ്ക്കാന്‍ സാധിച്ചിട്ടില്ല. സമീപത്തെ മറ്റുവീടുകളിലെ കിണറുകളിലും ഡീസല്‍ പടര്‍ന്നിട്ടുണ്ട്. അധികൃതര്‍ ഇത് പരിശോധിച്ച് വരികയാണ്.

ഞായറാഴ്ച പുലര്‍ച്ചെ 2 മലക്കം മറിച്ചിലിന് ശേഷം 30 അടി താഴ്ചയിലേക്കാണ് ടാങ്കര്‍ ലോറി പതിച്ചത്. ഞായറാഴ്ച പുലര്‍ച്ചെ മൂന്നുമണിയോടെയാണ് സംഭവം. ശബ്ദം കേട്ടെത്തിയ പ്രദേശവാസികള്‍ െ്രെഡവര്‍ രക്ഷപ്പെട്ട് കാബിനില്‍നിന്ന് പുറത്തുവരുന്നതാണ് കണ്ടത്. ഇയാള്‍ മാത്രമാണ് വണ്ടിയില്‍ ഉണ്ടായിരുന്നത്.

ജനറല്‍ മോട്ടോഴ്‌സ് ഇന്ത്യയില്‍ നിന്നും പിന്‍വാങ്ങുന്നു

chandrika — Thu, 18 May 2017 16:03:36 +0000

ന്യൂഡല്‍ഹി: ജനറല്‍ മോട്ടോഴ്‌സ് ഇന്ത്യയിലെ കാര്‍ വില്‍പ്പന അവസാനിപ്പിക്കുന്നു. ഈ വര്‍ഷം അവസാനത്തോടെ വില്‍പ്പന നിര്‍ത്താനാണ് ജനറല്‍ മോട്ടോഴ്‌സിന്റെ (ജിഎം) തീരുമാനം. ലോകത്തെ ഏറ്റവും വലിയ കാര്‍ വിപണികളില്‍ ഒന്നായ ഇന്ത്യയില്‍ രണ്ട് പതിറ്റാണ്ടിലേറെ നീണ്ട മത്സരത്തിനു ശേഷമാണ് ജിഎം പിന്‍വാങ്ങുന്നത്. ഷെവര്‍ലെ കാറുകളുടെ ഇന്ത്യയിലെ വില്‍പ്പന ജി.എമ്മിനാണ് നിലവില്‍ ഒരു ശതമാനത്തില്‍ താഴെയാണ് ജി.എമ്മിനു ഇന്ത്യന്‍ മാര്‍ക്കറ്റില്‍ സ്ഥാനം. വില്‍പ്പന നിര്‍ത്തുന്നുവെങ്കിലും ഇന്ത്യന്‍ വിപണിയില്‍ നിന്നു പൂര്‍ണമായും ജി.എം പിന്‍മാറില്ല. ബംഗളൂരുവിലെ ടെക്‌നിക്കല്‍ യൂണിറ്റ് കമ്പനി നിലനിര്‍ത്തും. നിര്‍മാണ മേഖലയില്‍ ശ്രദ്ധയൂന്നുന്നതിനായി മുംബൈയിലെ ടെലഗോണിലും ഗുജറാത്തിലെ ഹലോലും പ്ലാന്റുകള്‍ ഉണ്ടായിരിക്കും. ഹലോലിലെ പ്ലാന്റ് ചൈനീസ് സംയുക്ത സംരംഭമായ സയ്ക് മോട്ടോര്‍ കോര്‍പിന് വില്‍ക്കുന്നതിനും പദ്ധതിയുണ്ട്. മെക്‌സിക്കോ, ലാറ്റിന്‍ അമേരിക്കന്‍ രാജ്യങ്ങളിലേക്കാണ് പ്രധാനമായും ജി.എം ഇന്ത്യയില്‍ നിന്നു കയറ്റുമതി നടത്തുന്നത്. ഈ സാമ്പത്തിക വര്‍ഷം മാര്‍ച്ച് വരെ 70969 വാഹനങ്ങളാണ് കയറ്റി അയച്ചത്. ടെലഗോണ്‍ പ്ലാന്റിന് പ്രതിവര്‍ഷം 130,000 വാഹനങ്ങള്‍ നിര്‍മിക്കാനുള്ള ശേഷിയുണ്ട്. 1995ല്‍ ഇന്ത്യയില്‍ അരങ്ങേറ്റം കുറിച്ച ഷെവര്‍ലെ നിരയില്‍ ബീറ്റ്, ടവേര, സ്പാര്‍ക്ക്, എന്‍ജോയി, സെയില്‍ ഹാച്ച്ബാക്ക്, ക്രൂസ്, സെയില്‍ സെഡാന്‍, ട്രെയില്‍ ബ്ലേസര്‍ എന്നിവയാണ് ഇതുവരെ പുറത്തിറങ്ങിയത്. പുതുതലമുറ ബീറ്റ്, എസന്‍ഷ്യ മോഡലുകള്‍ അടുത്തിടെ പുറത്തിറങ്ങുമെന്ന് പ്രചാരണവുമുണ്ടായി.

വാഹന രജിസ്‌ട്രേഷന്‍-ലൈസന്‍സ് നിരക്കുകള്‍ കുത്തനെ കൂട്ടി

chandrika — Sat, 07 Jan 2017 05:13:13 +0000

ന്യൂഡല്‍ഹി: ഡ്രൈവിങ് ടെസ്റ്റിനും ലൈസന്‍സ് ലഭിക്കാനുമുള്ള നിരക്കുകള്‍ കുത്തനെ കൂട്ടി.
ഡ്രൈവിങ് ലൈസന്‍സ് ലഭിക്കാനും പുതുക്കാനുമുള്ള നിരക്ക് നാല്‍പ്പതില്‍നിന്ന് 200 രൂപയാക്കി. കേന്ദ്ര ഗതാഗത മന്ത്രാലയത്തിന്റെ നിര്‍ദ്ദേശപ്രകാരമാണ് ഫീസ് നിര്ക്കുകളില്‍ വന്‍ വര്‍ദ്ധന വരുത്തിയിത്. വാഹനരജിസ്ട്രേഷന്‍ നിരക്ക് പത്തിരട്ടിവരെയാണ് വര്‍ധിപ്പിച്ചത്. ലൈസന്‍സുടമയ്ക്ക് മറ്റൊരുവിഭാഗം വാഹനത്തിന് ലൈസന്‍സ് എടുക്കാനുള്ള ഫീസ് ഇരുനൂറില്‍നിന്ന് 500 രൂപയാക്കി ഉയര്‍ത്തി. ഡ്യൂപ്ലിക്കേറ്റ് ലൈസന്‍സിന് 5000 രൂപ നല്‍കണം. ഇരുചക്രവാഹനങ്ങള്‍ക്കുള്ള രജിസ്ട്രേഷന്‍ ഫീസ് 50 രൂപയാക്കി. ഡ്രൈവിങ് സ്‌കൂളുകളുടെ ലൈസന്‍സ് ഫീസ് രണ്ടായിരത്തിയഞ്ഞൂറില്‍നിന്ന് പതിനായിരം രൂപയായി വര്‍ധിപ്പിച്ചു. ഇവ കൂടാതെ സംസ്ഥാനങ്ങള്‍ ചുമത്തുന്ന സെസും മറ്റും കൂടിയാവുമ്പോള്‍ ഫീസ് നിരക്കുകളില്‍ ഇനിയും ഉയര്‍ച്ചയുണ്ടാവും.

മറ്റു നിരക്കുകളില്‍ വന്ന മാറ്റങ്ങള്‍

ലേണേഴ്സ് ലൈസന്‍സ് ഫീസ് മുപ്പതില്‍നിന്ന് 150 രൂപയാക്കി.
മുച്ചക്ര, ലൈറ്റ് മോട്ടോര്‍ വെഹിക്കിള്‍ രജിസ്ട്രേഷന്‍ ഫീസ് 300 രൂപ. നോണ്‍-ട്രാന്‍സ്പോര്‍ട്ടിന് 600, ട്രാന്‍സ്പോര്‍ട്ട് 1000.
ഇന്റര്‍നാഷണല്‍ ഡ്രൈവിങ് പെര്‍മിറ്റിനുള്ള ഫീസ് അഞ്ഞൂറില്‍നിന്ന് 1000 രൂപയാക്കി.
ഗ്രേസ് കാലയളവിനുശേഷം ലൈസന്‍സ് പുതുക്കുന്നതിന് 300 രൂപയാണ് ഫീസ്. വൈകിയാല്‍ വര്‍ഷംതോറും 1000 രൂപ അധികം നല്‍കണം.
സ്മാര്‍ട്ട് കാര്‍ഡ് മാതൃകയിലുള്ള രജിസ്ട്രേഷന്‍ സര്‍ട്ടിഫിക്കറ്റിന് 200 രൂപ അധികമായി നല്‍കണം.
ഉടമസ്ഥാവകാശ കൈമാറ്റം, വിലാസം മാറ്റല്‍ എന്നിവയ്ക്ക് രജിസ്ട്രേഷന്‍ ഫീസിന്റെ പകുതി ഫീസായി നല്‍കണം.
ഇടത്തരം ഗുഡ്സ്, പാസഞ്ചര്‍ വാഹനങ്ങളുടെ രജിസ്ട്രേഷന്‍ ഫീസ് നാനൂറില്‍നിന്ന് 1000 രൂപയായി ഉയര്‍ത്തി.
ഹെവി ഗുഡ്സ്, പാസഞ്ചര്‍ വാഹനങ്ങളുടെ രജിസ്ട്രേഷന്‍ ഫീസ് അറുനൂറില്‍നിന്ന് 1500 രൂപയായി ഉയര്‍ത്തി.
ഇറക്കുമതിചെയ്യുന്ന വാഹനങ്ങളുടെ രജിസ്ട്രേഷന്‍ ഫീസ് എണ്ണൂറില്‍നിന്ന് 5000 രൂപയാക്കി.
ഇറക്കുമതിചെയ്യുന്ന ഇരുചക്രവാഹനങ്ങളുടെ രജിസ്ട്രേഷന്‍ ഫീസ് ഇരുനൂറില്‍നിന്ന് 2500 രൂപയാക്കി.
മേല്‍പ്പറഞ്ഞ വിഭാഗങ്ങളില്‍ ഉള്‍പ്പെടാത്ത വാഹനങ്ങളുടെ രജിസ്ട്രേഷന്‍ ഫീസ് മുന്നൂറില്‍നിന്ന് 3000 രൂപയായി ഉയര്‍ത്തി.