കാമ്പസുകളിലെ എസ്.എഫ്.ഐയുടെ ജനാധിപത്യ വിരുദ്ധതയെ ഉയര്‍ത്തിക്കാണിച്ച എം.എസ്.എഫ് പല സ്ഥാപനങ്ങളിലും അപ്രതീക്ഷിത മുന്നേറ്റമാണ് നടത്തിയത്. കഴിഞ്ഞ വര്‍ഷങ്ങളില്‍ എം.എസ്.എഫിന്റെ കയ്യില്‍ നിന്ന് നഷ്ടപ്പെട്ട കാമ്പസുകള്‍ ഈ തെരഞ്ഞെടുപ്പില്‍ എം.എസ്.എഫ് തിരിച്ചു പിടിച്ചു. കൂടാതെ ചരിത്രത്തിലാദ്യമായി മലപ്പുറം ഗവ. കോളേജടക്കം 10 ഗവന്മെന്റ് കോളേജുകളില്‍ എം.എസ്.എഫ് മുന്നണി ജയിച്ചത് ശ്രദ്ധേയമാണ്.

ഭരണം പിടിച്ചെടുത്ത അധിക കാമ്പസുകളിലും മുഴുവന്‍ സീറ്റുകളും തൂത്തുവാരി. പതിനെട്ട് വര്‍ഷങ്ങള്‍ക്ക് ശേഷം പൊന്നാനി എം ഇ എസ് കോളേജും എട്ട് വര്‍ഷങ്ങള്‍ക്ക് ശേഷം തിരൂര്‍ ടി എം ജി കോളേജും എം എസ് എഫ് മുന്നണി പിടിച്ചെടുത്തു. മലപ്പുറം ഗവണ്‍മെന്റ് കോളേജ്, കൊണ്ടോട്ടി ഗവണ്‍മെന്റ് കോളേജ്, തുഞ്ചത്തെഴുത്തച്ഛന്‍ സ്മാരക ഗവണ്‍മെന്റ് കോളേജ് തിരൂര്‍, നിലമ്പൂര്‍ ഗവണ്‍മെന്റ് കോളേജ്, കുന്നമംഗലം ഗവണ്‍മെന്റ് കോളേജ്, എല്‍ബിഎസ് പരപ്പനങ്ങാടി, ഐ.എച്ച്.ആര്‍.ഡി മലപ്പുറം, മലപ്പുറം ഗവണ്‍മെന്റ് വുമണ്‍സ് കോളേജ്, കൊടുവള്ളി ഗവ. കോളേജ്, നാദാപുരം ഗവണ്‍മെന്റ് കോളേജ് അടക്കം ഗവണ്‍മെന്റ് കോളേജികളിലും മുന്നണിക്ക് വിജയം നേടിയെടുക്കാനായി.

യു.യു.സിമാരുടെ എണ്ണത്തിലും വലിയ വര്‍ധനവുണ്ടായി. എല്ലാ മേഖലയിലും വ്യക്തമായ മുന്‍തൂക്കം മുന്നണിക്ക് സൃഷ്ടിക്കാനായി. എം.എസ്.എഫ് ഉയര്‍ത്തിയ വിദ്യാര്‍ത്ഥി പക്ഷ രാഷ്ട്ട്രീയത്തെ വിദ്യാര്‍ത്ഥി സമൂഹം ഏറ്റെടുത്തുവെന്നതിന് തെളിവാണ് കാലിക്കറ്റ് യൂണിവേഴ്‌സിറ്റി തെരഞ്ഞെടുപ്പിലെ എംഎസ്എഫ് ചരിത്ര വിജയമെന്ന് സംസ്ഥാന പ്രസിഡന്റ് പി.കെ നവാസ് ജനറല്‍ സെക്രട്ടറി സി.കെ നജാഫ് എന്നിവര്‍ പറഞ്ഞു.

പോണ്ടിച്ചേരി : പോണ്ടിച്ചേരി യൂണിവേഴ്‌സിറ്റിയില്‍ ചരിത്ര വിജയത്തോടെ എം.എസ്.എഫ്. യൂണിവേഴ്‌സിറ്റി കൗണ്‍സില്‍ തെരഞ്ഞെടുപ്പില്‍ മത്സരിച്ച 10 സീറ്റുകളില്‍ 8 സീറ്റും എം.എസ്.എഫ് പിടിച്ചെടുത്തു. ഇതോടെ യൂണിവേഴ്‌സിറ്റിയിലെ ഏറ്റവും വലിയ രണ്ടാമത്തെ ഒറ്റ കക്ഷിയായി എം.എസ്.എഫ് മാറി. ആദ്യ ഘട്ട തെരഞ്ഞെടുപ്പാണ് ഇപ്പോള്‍ കഴിഞ്ഞത്.

ഗവേഷണ വിഭാഗത്തില്‍ സെയ്തു മുഹമ്മദ്,ഷക്കീല്‍ പി.ടി, ഡിപ്പാര്‍ട്ട്‌മെന്റ് ഓഫ് ലോയില്‍ ഹംസ, ബിരുദാനന്തര ബിരുദത്തില്‍ നിന്ന് അഹ്മദ് അംജദ്,ഇര്‍ഷാദ് അലി,ഫയാസ്,മുഹമ്മദ് ഷദീദ് സി.കെ,യശ്വന്ത് കുമാര്‍ തുടങ്ങിയവരാണ് എം.എസ്.എഫിനെ പ്രതിനിധീകരിച്ച് മിന്നും ജയം വരിച്ചത്. പ്രമുഖ ദലിത് കൂട്ടായ്മയായ അംബേദ്കര്‍ സ്റ്റുഡന്റ് അസോസിയേഷനുമായി സഖ്യകക്ഷിയാണ് എം.എസ്.എഫ്. പോണ്ടിച്ചേരി യൂണിവേഴ്‌സിറ്റിയില്‍ മല്‍സരിക്കുന്നത്.