muhamadali shihab thangal – Chandrika Daily

ശിഹാബ് തങ്ങളുടെ ക്ഷമയുടെയും സമാധാനത്തിന്റെയും ജീവിത സന്ദേശം ഭാവിതലമുറക്ക് കൈമാറണം: മുഹമ്മദ് അസ്ഹറുദ്ധീന്‍

webdesk13 — Wed, 04 Sep 2024 09:46:54 +0000

ശിഹാബ് തങ്ങൾ പകർന്നു നൽകിയ ക്ഷമയുടെയും സമാധാനത്തിന്റെയും ജീവിത സന്ദേശം ഭാവിതലമുറക്ക് കൈമാറണമെന്ന് മുൻ എം.പിയും മുൻ ഇന്ത്യൻ ക്രിക്കറ്റ് ടീം ക്യാപ്റ്റനുമായ മുഹമ്മദ് അസ്ഹറുദ്ദീൻ പറഞ്ഞു. മുസ്ലിംലീഗ് സംസ്ഥാന കമ്മിറ്റി മലപ്പുറത്ത് സംഘടിപ്പിച്ച ശിഹാബ് തങ്ങൾ അനുസ്മരണ സമ്മേളനത്തിൽ മുഖ്യാതിഥിയായി പങ്കെടുത്ത് സംസാരിക്കുകയായിരുന്നു അദ്ദേഹം.

ബാബരി മസ്ജിദ് തകർക്കപ്പെട്ട സമയത്ത് രാജ്യത്തെങ്ങും സംഘർഷമുണ്ടായപ്പോൾ ക്ഷേത്രങ്ങൾ സംരക്ഷിക്കാൻ ആഹ്വാനം നൽകിയ ശിഹാബ് തങ്ങളുടെ ചരിത്രം ഭാവിതലമുറ പഠിക്കേണ്ടതുണ്ട്. അദ്ദേഹത്തിന്റെ ക്ഷമയും സഹനവും കൈമാറ്റം ചെയ്യപ്പെടേണ്ട സന്ദേശമാണെന്നും ക്ഷമിക്കുന്നവരോടൊപ്പം അല്ലാഹു ഉണ്ടാകുമെന്നും അദ്ദേഹം പറഞ്ഞു.

അര നൂറ്റാണ്ട് കാലമായി തുടരുന്ന കോൺഗ്രസ്- മുസ്‌ലിംലീഗ് ബന്ധം വിസ്മയിപ്പിക്കുന്ന രാഷ്ട്രീയ ബന്ധമാണ്. മാനവികതക്കാണ് നാം മുൻഗണന നൽകുന്നത്. കഴിഞ്ഞ കാലങ്ങളിൽ വളരെ എളുപ്പത്തിലാണ് പാർലമെന്റിൽ ബില്ലുകൾ പാസ്സാക്കിയിരുന്നത്. എന്നാൽ വഖഫ് ബിൽ ഉൾപ്പെടെ പാർലമെന്റ് കമ്മിറ്റിക്ക് വിടുന്നതാണ് കണ്ടത്. ഇത് രാജ്യത്ത് സംഭവിച്ച വലിയ മാറ്റമാണെന്നും അദ്ദേഹം പറഞ്ഞു. മൂന്നര പതിറ്റാണ്ട് കാലം മുസ്ലിംലീഗിന് നേതൃത്വം നൽകിയ ശിഹാബ് തങ്ങൾ കേരളത്തിന് മാത്രമല്ല, ലോകത്തിന് ആകമാനം മാതൃകയായ നേതാവാണെന്നും അദ്ദേഹം പറഞ്ഞു.

ശിഹാബ് തങ്ങള്‍ സൂപ്പര്‍ സ്‌പെഷാലിറ്റി ഹോസ്പിറ്റലില്‍ ഹൃദ്രോഗചികിത്സാ വിഭാഗം

Chandrika Web — Tue, 20 Dec 2022 11:07:14 +0000

തിരൂര്‍: ശിഹാബ് തങ്ങള്‍ സൂപ്പര്‍ സ്‌പെഷാലിറ്റി ഹോസ്പിറ്റലില്‍ അത്യാധുനികസംവിധാനങ്ങളോടെ ഹൃദ്രോഗചികിത്സാ വിഭാഗം ആരംഭിക്കാന്‍ തീരുമാനമായി. ആരോഗ്യരംഗത്ത് അന്തര്‍ദേശീയ പ്രശസ്തരായ ദുബൈ ഫാത്തിമ ഹെല്‍ത്ത് കെയറുമായി സഹകരിച്ചാണു നവീനമായ കാത്ത് ലാബും മറ്റ് അടിസ്ഥാന സൗകര്യങ്ങളുമൊരുക്കുന്നത്. ഇതുവഴി ഹൃദ്രോഗ ചികിത്സ രംഗത്ത് പ്രശസ്തരായ വിദഗ്ധ ഡോക്ടര്‍മാരുടെ സേവനം കൂടി ആശുപത്രിയില്‍ ലഭ്യമാവും.
ഇതുസംബന്ധമായുള്ള ധാരണപത്രത്തില്‍ സയ്യിദ് മുനവ്വറലി ശിഹാബ്തങ്ങളുടെ സാന്നിധ്യത്തില്‍ ശിഹാബ്തങ്ങള്‍ ഹോസ്പിറ്റല്‍ സി.ഇ. ഒ ഹുസൈന്‍ നൂറുദ്ദീന്‍കുഞ്ഞും ഫാത്തിമ ഹെല്‍ത്ത്കെയര്‍ ജനറല്‍ മാനേജര്‍ ജേക്കബ് മാത്യുവും ഒപ്പു വെച്ചു. നിലവില്‍ വിവിധ ഡിപ്പാര്‍ട്ട്മെന്റുകളിലായി അമ്പതിലധികം ഡോക്ടര്‍ മാരുടെ സേവനം ഇപ്പോള്‍ ലഭ്യമാണ്.

സി.ടി സ്‌കാന്‍ അടക്കമുള്ള ചികിത്സാസൗകര്യങ്ങള്‍ സജ്ജീകരിച്ചിട്ടുണ്ട്.ഹോസ്പിറ്റല്‍ ചെയര്‍മാന്‍ അബ്ദുറഹിമാന്‍ രണ്ടത്താണി,വൈസ് ചെയര്‍മാന്‍ കീഴേടത്തില്‍ ഇബ്രാഹീം ഹാജി,ഫെസിലിറ്റി ചെയര്‍മാന്‍ ഡോ.കെ.പി ഹുസൈന്‍, സെക്രട്ടറി അഡ്വ.മുസമ്മില്‍, മെഡിക്കല്‍ ഡയറക്ടര്‍ ഡോക്ടര്‍ മുസ്തഫ,ഡയറക്ടര്‍ വാഹിദ് കൈപാടത്ത്, എം.അബ്ദുല്ലകുട്ടി,കെ.എം മുത്തുകോയ തങ്ങ ള്‍,മാനേജര്‍ ഫസലുദ്ദീന്‍,പി. ആര്‍.ഒ ശംസുദ്ദീന്‍,എഫ്.എം. സി മാനേജര്‍ ജെയിംസ് ആന്റണി,ലീഗല്‍ അഡൈ്വസര്‍ പ്രക്ഷത പങ്കെടുത്തു.

ഇത് ഉപ്പക്കുള്ളതാണ്, കൊടുക്കണം’ – മുഹമ്മദലി ശിഹാബ് തങ്ങളുടെ ഓര്‍മയില്‍ മുനവ്വറലി തങ്ങള്‍

Test User — Mon, 13 May 2019 10:00:02 +0000

കഴിഞ്ഞയാഴ്ച്ച കണ്ണൂരില്‍ കണ്ണങ്കണ്ടി ഷോറൂം ഉല്‍ഘാടന ചടങ്ങിന്ന് പോയതായിരുന്നു.അവിടെയുള്ള ചിലരൊക്കെ എന്റെ കൂടെ സെല്‍ഫി എടുക്കുന്നുണ്ടായിരുന്നു.കണ്ടു നിന്ന കണ്ണങ്കണ്ടി പരീത്ക്കയുടെ പാര്‍ട്ണര്‍ സലാംക്ക കണ്ണ് നിറച്ചു കൊണ്ടു പറഞ്ഞു ‘ഇത് ഉപ്പയ്ക്കുള്ളതാട്ടോ, ഇത് ഓര്‍ക്ക് കൊടുക്കണംട്ടോ’..
ഞാനുള്‍പ്പെടെ ഞങ്ങളെല്ലാവരും ഉറച്ച് വിശ്വസിക്കുന്നു! ഞങ്ങള്‍ക്ക് കിട്ടിക്കൊണ്ടിരിക്കുന്ന ഈ സ്‌നേഹവും ആദരവും അത് ബാപ്പയെ സ്‌നേഹിച്ച് കൊതി തീരാത്ത ജനതയുടേതാണ് എന്ന്. അവരുടെ ഹൃദയങ്ങളിലുള്ള ബാപ്പയുടെ സ്‌നേഹ സ്മരണകളാണ് അവര്‍ ഞങ്ങളോടും പ്രകടിപ്പിക്കുന്നതെന്ന്.
ബാപ്പയുടെ അഭാവം ഞങ്ങളനുഭവിക്കുന്ന പോലെ അദ്ദേഹത്തിന്റെ സ്‌നേഹ ജനങ്ങളും അനുഭവിക്കുന്നു. ഞങ്ങളുടെ വീടിന്റെ പൂമുഖത്ത് വന്ന് വിതുമ്പി മടങ്ങുന്നവര്‍ നിരവധി പേരുണ്ട്. ആ വിതുമ്പല്‍ കാണുമ്പോള്‍ നിയന്ത്രിക്കാനാവാതെ ഞങ്ങളും പൊട്ടിപോവുന്നു.
ബാപ്പ മരിച്ച് കുറച്ച് മാസങ്ങള്‍ക്ക് ശേഷം തമിഴ്‌നാട്ടില്‍ നിന്നും ഇടക്കൊക്കെ വന്നുകൊണ്ടിരുന്ന ഭാര്യയും ഭര്‍ത്താവും വീട്ടില്‍ വന്നു. ഞാന്‍ പുറത്തിരിക്കുന്നുണ്ടായിരുന്നു.അവര്‍ വന്ന് എന്നെ അഭിവാദ്യം ചെയ്തിട്ട് അവിടെ വരാന്തയില്‍ നിന്നു. എന്നോട് ഒന്നും സംസാരിച്ചില്ല. കുറച്ച് കഴിഞ്ഞ് ഞാന്‍ വീട്ടിനുള്ളിലേക്ക് വന്നപ്പോള്‍ അവരും പിറകെ വന്നു. അപ്പോഴും അവര്‍ ആരെയോ തിരയുകയാണ്. വീണ്ടും ബാപ്പയുടെ റൂമിനടുത്തൊക്കെ പോയി തിരിച്ചു വന്നു എന്നോട് ‘തങ്കള്‍ എവിടെയിറുക്കെ’ എന്ന് ചോദിച്ചു ‘
ഞാന്‍ പറഞ്ഞു. തങ്ങളില്ല, തങ്ങള്‍ ഇറന്തു പോയി (മരണപ്പെട്ടു )എന്ന്.പെട്ടെന്ന് അവരാകെ തകര്‍ന്നതു പോലെ, അവിടെയിരുന്ന് അവര്‍ പൊട്ടിക്കരഞ്ഞു.കരഞ്ഞുകൊണ്ട്, തീരാത്ത സങ്കട ഭാരത്താല്‍ അവരെന്തൊക്കെയോ പറഞ്ഞു കൊണ്ടിരുന്നു.ഇങ്ങനെ ബാപ്പയുടെ മരണശേഷവും പലരും വീട്ടില്‍ വരുന്നു.ബാപ്പയുടെ സാന്നിദ്ധ്യം ഓര്‍ത്തെടുക്കുന്നു. ആ ഓര്‍മ്മകളില്‍ കണ്ണീര്‍ തൂവുന്നു.മരിച്ച് വര്‍ഷങ്ങള്‍ക്കിപ്പുറവും ഇതാവര്‍ത്തിക്കുന്നു. ഇത് കാണുമ്പോള്‍,വ്യത്യസ്ത മനുഷ്യരുമായി എത്രമാത്രം ആഴത്തിലുള്ള ആത്മീയ ബന്ധമാണ് പ്രിയപിതാവ് പുലര്‍ത്തിയിരുന്നതെന്ന് പലപ്പോഴും ഓര്‍ത്ത് പോവാറുണ്ട്. ആളുകളുമായി കാര്യ കാരണങ്ങളില്‍ മാത്രം ഒതുക്കപ്പെട്ടിരുന്ന ഒരു ബന്ധമായിരുന്നില്ല അത്. അതിനപ്പുറത്തെ, ആത്മീയതലം ഓരോ ബന്ധങ്ങളിലും പിതാവും ജനങ്ങളുമായി നിലനിന്നിരുന്നതാണ് അദ്ദേഹത്തിന്റെ മരിക്കാത്ത ഓര്‍മകള്‍ ഇന്നും അവര്‍ മനസ്സില്‍ താലോലിക്കാനുള്ള കാരണം. അതിരുകളും ഉപാധികളുമില്ലാത്ത സ്‌നേഹം ജനങ്ങള്‍ക്ക് പകര്‍ന്നു നല്‍കിയാണ് അദ്ദേഹം കാലത്തിന്റെ മറുതീരത്തേക്ക് യാത്രയായത്.ഈ പരിശുദ്ധ മാസത്തിലടക്കം അത്തരത്തിലുള്ള നിരുപാധികമായ സ്‌നേഹം പരസ്പരം പങ്കിടാന്‍ നമുക്ക് കഴിയുന്നുണ്ടോ എന്നത് ചിന്തിക്കണം. നിബന്ധനകളും കാപട്യങ്ങളുമില്ലാത്ത സമ്പൂര്‍ണ്ണമായ സ്‌നേഹത്തിന്റെ വാഗ്ദാക്കളായി ഓരോ മനുഷ്യനും മാറുമ്പോള്‍ മാത്രമാണ് സമാധാനപൂര്‍ണ്ണമായ ലോകം ഉണ്ടാവുന്നത്. സര്‍വ്വശക്തന്‍ അതിനായി നമ്മെ അനുഗ്രഹിക്കട്ടെ..