സ്മൃതി പ്രകത്യോത്സവ് മേളയില്‍ സംസാരിക്കവെ, ”ഗ്രാമം സന്ദര്‍ശിക്കുമ്പോള്‍ മുസ്ലിം വിഭാഗത്തില്‍ പെട്ട ആരെയും കാണാനായില്ല. അതിനാല്‍ ഗ്രാമത്തിന്റെ പേര് ‘കബീര്‍ധാം’ എന്ന് മാറ്റി യഥാര്‍ത്ഥ സാംസ്‌കാരിക സ്വത്വം പുനഃസ്ഥാപിക്കണം എന്നാണ് ഞാന്‍ കരുതുന്നത്,” എന്ന് യോഗി പറഞ്ഞു.

അദ്ദേഹം മുന്‍ സര്‍ക്കാരുകളെ വിമര്‍ശിച്ച്, ”കോണ്‍ഗ്രസ് ഭരണകാലത്ത് സാംസ്‌കാരിക പൈതൃകം ഇല്ലാതാക്കാനുള്ള ശ്രമങ്ങളായിരുന്നു നടന്നത്. അയോധ്യയെ ഫൈസാബാദ് എന്നും, പ്രയാഗ്രാജിനെ അലഹബാദ് എന്നും, കബീര്‍ധാമിനെ മുസ്തഫാബാദ് എന്നും ആക്കിയതിലൂടെ അവര്‍ അത് തെളിയിച്ചു. ഞങ്ങള്‍ അധികാരത്തിലെത്തിയതോടെ, ആ സ്ഥലങ്ങള്‍ അവരുടെ യഥാര്‍ത്ഥ പേരുകള്‍ തിരിച്ചുപിടിച്ചു,” എന്നും യോഗി വ്യക്തമാക്കി.

യോഗിയുടെ പുതിയ നിര്‍ദേശം സാമൂഹിക മാധ്യമങ്ങളിലും രാഷ്ട്രീയ വൃത്തങ്ങളിലും ചര്‍ച്ചയാവുകയാണ്. ബി.ജെ.പി നേതാക്കള്‍ ഇത് ”സാംസ്‌കാരിക പുനരുദ്ധാരണം” എന്ന് വിശേഷിപ്പിക്കുന്നിടത്ത്, പ്രതിപക്ഷം അത് ”സമുദായ വൈരുദ്ധ്യം വളര്‍ത്താനുള്ള നീക്കം” എന്ന് യോഗി ആരോപിച്ചു.

മുസ്തഫാബാദിൽ നിന്നും പുതുതായി തെരഞ്ഞെടുക്കപ്പെട്ട ബിഷ്ത്, എംഎൽഎ ആയാലുടനെ തന്റെ മണ്ഡലത്തിന്റെ പേര് ശിവ പുരി എന്നോ ശിവ വിഹാർ എന്നോ പുനർനാമകരണം ചെയ്യുമെന്ന് പ്രചാരണത്തിനിടെ പ്രഖ്യാപിച്ചിരുന്നു. തുടർന്ന്, ആം ആദ്മി സ്ഥാനാർഥിയായ അദീൽ അഹമ്മദിനെ പരാജയപ്പെടുത്തി ബിഷ്ത് നിയമസഭയിലെത്തുകയും ചെയ്തു. ഇതോടെയാണ് പേരുമാറ്റ നീക്കം ആരംഭിച്ചത്.

“മുസ്തഫാബാദ് എന്ന പേര് ശിവ് പുരി അല്ലെങ്കിൽ ശിവ് വിഹാർ എന്നാക്കി മാറ്റുമെന്ന് മുമ്പ് പറഞ്ഞിട്ടുണ്ട്. രാഷ്ട്രീയ പാർട്ടികൾ മുസ്തഫാബാദ് എന്ന പേര് നിലനിർത്താൻ നിർബന്ധിക്കുന്നത് എന്തുകൊണ്ടാണെന്ന് എനിക്ക് മനസിലാകുന്നില്ല. ഹിന്ദുക്കൾ കൂടുതലായി അധിവസിക്കുന്ന ഒരു പ്രദേശത്തിന് ശിവ് പുരി അല്ലെങ്കിൽ ശിവ് വിഹാർ എന്ന് പേരിടാൻ കഴിയാത്തത് എന്തുകൊണ്ട്? ‘മുസ്തഫ’ എന്ന പേര് ആളുകളെ ബുദ്ധിമുട്ടിക്കുന്നു, അത് മാറ്റണം. അത് ഞാൻ ഉറപ്പാക്കും”- ബിഷ്ത് പറഞ്ഞു.

2020ൽ ദേശീയ തലസ്ഥാനത്ത് നടന്ന വർഗീയ കലാപത്തിൽ ഏറ്റവും കൂടുതൽ നാശനഷ്ടങ്ങൾ സംഭവിച്ച പ്രദേശങ്ങളിലൊന്നായിരുന്നു വടക്കുകിഴക്കൻ ഡൽഹിയിൽ സ്ഥിതി ചെയ്യുന്ന മുസ്തഫാബാദ്. ബിഷ്തിന്റെ പ്രമേയം നിയമസഭയിൽ ചർച്ച ചെയ്യപ്പെടുമെങ്കിലും, ഔദ്യോഗിക നാമമാറ്റത്തിന് ഇന്ത്യൻ തെരഞ്ഞെടുപ്പ് കമ്മീഷന്റെ അനുമതി ആവശ്യമാണ്.

തെക്കുപടിഞ്ഞാറൻ ഡൽഹിയിലെ നജഫ്ഗഢിന്റെ പേര് നഹർഗഢ് എന്ന് പുനർനാമകരണം ചെയ്യണമെന്നാവശ്യപ്പെട്ട് ബിജെപി എംഎൽഎ നീലം പഹൽവാൻ കഴിഞ്ഞമാസം രം​ഗത്തെത്തിയിരുന്നു. ഇതിനിടെ, ഡൽഹിയിലെ റോഡിന്റെ പേര് ബിജെപി എംപിയും മന്ത്രിയും സ്വന്തം ഇഷ്ടത്തിന് മാറ്റിയിരുന്നു. തുഗ്ലക് ലെയ്നിന്റെ പേരാണ് മാറ്റിയത്.

കേന്ദ്ര സഹമന്ത്രി കിഷന്‍ പാല്‍ ഗുജറും രാജ്യസഭാ എംപി ദിനേശ് ശര്‍മയുമാണ് വീടിന് മുന്നിലെ റോഡിന്റെ പേര് മാറ്റിയെഴുതിയത്. ഔദ്യോഗിക വസതിക്ക് മുന്നില്‍ വീടിന്റെ പേര് വച്ച ബോര്‍ഡില്‍ തുഗ്ലക് ലെയ്നിന് പകരം സ്വാമി വിവേകാനന്ദ മാര്‍ഗ് എന്ന് എഴുതിച്ചേർക്കുകയായിരുന്നു. ഇതു കൂടാതെ, മുഹമ്മദ്പുരിനെ മാധവ്പുരം എന്നാക്കണമെന്ന ആവശ്യവും ബിജെപി നേതാക്കൾ ഉന്നയിച്ചിട്ടുണ്ട്.