ആര്‍.എസ്.എസിന്റെ ഉന്നത നേതാക്കള്‍ പ്രതികളായ കേസുകളാണ് പിന്‍വലിക്കുന്നത്. എം.പിമാരായ സഞ്ജീവ് ബല്യാണ്‍, ഭാരതേന്ദ്ര സിങ്, എം.എല്‍.എമാരായ സംഗീത് സോം, ഉമേഷ് മാലിക്ക് തുടങ്ങിയവര്‍ പ്രതികളായ കേസുകളാണ് പിന്‍വലിക്കുന്നത്.

2013 ആഗസ്റ്റ്, സെപ്റ്റംബര്‍ മാസങ്ങളില്‍ നടന്ന കലാപത്തില്‍ 60 പേര്‍ കൊല്ലപ്പെടുകയും 40,000 പേര്‍ ഭവനരഹിതരാവുകയും ചെയ്തിരുന്നു. കലാപകേസുകള്‍ അന്വേഷിക്കാന്‍ പ്രത്യേകാന്വേഷണ സേനയെ യു.പി സര്‍ക്കാര്‍ നിയോഗിച്ചിരുന്നു. ഇതില്‍ 175 കേസുകളില്‍ എസ്.ഐ.ടി കുറ്റപത്രം സമര്‍പ്പിച്ചിരുന്നു. 6869 പേര്‍ക്കെതിരില്‍ കേസ് എടുക്കുകയും 1480 പേരെ അറസ്റ്റ് ചെയ്യുകയും ചെയ്തിരുന്നു. തെളിവില്ലാത്ത കാരണങ്ങളാല്‍ 54 കേസുകളിലെ 418 പേരെ വെറുതെവിടുകയായിരുന്നു.

കേസുകള്‍ പിന്‍വലിക്കാനുള്ള തീരുമാനത്തിനെതിരെ കോണ്‍ഗ്രസ്, എസ്.പി നേതാക്കള്‍ രംഗത്തെത്തി. കലാപകാരികളെ വെറുതെവിട്ട് അവരെ ആദരിക്കുകയാണ് ബി.ജെ.പി ചെയ്യുന്നതെന്ന് കോണ്‍ഗ്രസ് വക്താവ് അഖിലേഷ് പ്രതാപ് സിംഗ് പറഞ്ഞു. ഹിന്ദുത്വ തീവ്രവാദികളെ പ്രോത്സാഹിപ്പിച്ച് ഭാവിയില്‍ തെരഞ്ഞെടുപ്പില്‍ നേട്ടമുണ്ടാക്കാനാണ് യോഗി സര്‍ക്കാര്‍ ശ്രമിക്കുന്നതെന്ന് എസ്.പി വക്താവ് ഗന്‍ശ്യാം തിവാരി പറഞ്ഞു.

കേസുകള്‍ പിന്‍വലിക്കുന്നുവെന്ന ആരോപണം കേന്ദ്ര ന്യൂനപക്ഷകാര്യവകുപ്പ് മന്ത്രി മുഖ്താര്‍ അബ്ബാസ് നഖ്‌വി നിഷേധിച്ചു. രാഷ്ട്രീയമായി കെട്ടിച്ചമച്ച കേസുകള്‍ മാത്രമാണ് പിന്‍വലിക്കുന്നതെന്ന് അദ്ദേഹം പറഞ്ഞു.

ലഖ്‌നൗ: അറുപത്തിമൂന്ന് പേര്‍ കൊല്ലപ്പെട്ട മുസാഫര്‍ നഗര്‍ കലാപവുമായി ബന്ധപ്പെട്ട് ബി.ജെ.പി നേതാക്കള്‍ എതിരെയുള്ള കേസുകള്‍ പിന്‍വലിക്കാന്‍ മുഖ്യമന്ത്രി യോഗി ആദിത്യനാഥ് സര്‍ക്കാറിന്റെ ശ്രമം. ബി..െജപി നേതാക്കളായ സാധ്വി പ്രാചി, മുന്‍ കേന്ദ്രമന്ത്രിയും എം.പിയുമായ സഞ്ജീവ് ബലിയാന്‍, മറ്റൊരു എംപി ബര്‍തേന്ദ്ര സിംഗ്, സംസ്ഥാന മന്ത്രി സുരേഷ് റാണ, എം.എല്‍.എമാരായ ഉമേഷ് മാലിക്, ഷാംലി, സംഗീത് സിങ് സോം എന്നിവര്‍ അടക്കം പ്രതികളായ കേസുകള്‍ പിന്‍വലിക്കാനാണ് ഉത്തര്‍പ്രദേശ് സര്‍ക്കാരിന്റെ ശ്രമം. ഇക്കാര്യത്തില്‍ ജനഹിതം എന്തെന്നറിയാന്‍ ജില്ല കലക്ടറോട് യോഗി ആദിത്യനാഥ് ആവശ്യപ്പെട്ടു എന്നാണ് റിപ്പോര്‍ട്ടുകള്‍.

ഉത്തര്‍പ്രദേശ് നിയമ വകുപ്പ് ഇക്കാര്യത്തില്‍ ജില്ലാ മജിസ്‌ട്രേറ്റിന്റെ റിപ്പോര്‍ട്ട് ആവശ്യപ്പെട്ടെന്നാണ് വിവരം. 2013 ആഗസ്ത് 31 ന് നടന്ന മഹാപഞ്ചായത്തില്‍ നടത്തിയ പ്രകോപന പ്രസംഗമാണ് ബി.ജെ.പി നേതാക്കള്‍ക്കെതിരായ ഒരു കേസ്. കലാപത്തിന് പ്രേരണയായത് സാധ്വി പ്രാചി അടക്കമുള്ള നേതാക്കള്‍ നടത്തിയ ഈ പ്രസംഗമാണ് എന്നാണ് നിഗമനം .

2013ലാണ് രാജ്യത്തെ നടുക്കിയ ഉത്തര്‍പ്രദേശിലെ മുസാഫര്‍ നഗറില്‍ ഹിന്ദു-മുസ്‌ലിം വര്‍ഗ്ഗീയ കലാപം അരങ്ങേറുന്നത്. തുടര്‍ന്ന് അറുപത്തിമൂന്ന് പേരുടെ ജീവന്‍ നഷ്ടമാവുകയും നാല്‍പതിനായിരത്തിലേറെ പേര്‍ മുസാഫര്‍ നഗര്‍ വിട്ട് മറ്റ് നാടുകളിലേക്ക് പോയെന്നുമാണ് വിവരം.