റഷ്യയില്‍ നിന്നും ചന്ദ്രിക ചീഫ് ന്യൂസ് എഡിറ്ററും പ്രമുഖ ഫുട്‌ബോള്‍ നിരൂപകനുമായ കമാല്‍ വരദൂരിന്റെ മൈ ടീം പ്രത്യേക കോളം…

ദീദിയര്‍ ദെഷാംപ്‌സും സംഘവും ഫുട്‌ബോള്‍ ലോകം കീഴടക്കിയിരിക്കുന്നു. പക്ഷേ ഫ്രാന്‍സ് ജയിച്ചതിനേക്കാള്‍ ഫുട്‌ബോള്‍ ലോകം ചര്‍ച്ച ചെയ്യുന്നത് ക്രൊയേഷ്യ എന്ത് കൊണ്ട് തോറ്റു എന്നതാണ്. എവിടെയാണ് അവര്‍ക്ക് പിഴച്ചത്…? ഫ്രഞ്ച് ജയത്തിന് പിറകില്‍ അവരുടെ സൂപ്പര്‍ താരനിര, സമീപനം, പരിശീലകന്‍ എന്നീ ഘടകങ്ങളെല്ലാമുണ്ട്. ക്രൊയേഷ്യക്കാര്‍ ലോകകപ്പിന്റെ ഫൈനല്‍ വരെ വന്നത് അവരുടെ പോരാട്ടവീര്യത്തിലും ആത്മവിശ്വാസത്തിലുമായിരുന്നു. അതിന് എന്ത് സംഭവിച്ചു എന്നതാണ് സോക്കര്‍ ലോകം അന്വേഷിക്കുന്നത്.

ഫ്രാന്‍സിന്റെ ഗെയിം പ്ലാന്‍-പ്രത്യേകിച്ച്് രണ്ടാം പകുതിയില്‍ അവര്‍ സ്വീകരിച്ച സമീപനത്തിലാണ് ക്രോട്ടുകാര്‍ തളര്‍ന്നതും തകര്‍ന്നതും. 1-2ന് പിറകില്‍ നില്‍ക്കുന്ന സമയമായതിനാല്‍ ക്രൊയേഷ്യ രണ്ടാം പകുതിയില്‍ രണ്ടും കല്‍പ്പിച്ച് കളിക്കുമെന്നുറപ്പായിരുന്നു ഫ്രാന്‍സിന്. ഈ ഘട്ടത്തില്‍ പ്രത്യാക്രമണത്തിന് യഥേഷ്ടം അവസരങ്ങളുണ്ടാവും. ഈ അവസരങ്ങളെ പ്രയോജനപ്പെടുത്തുക എന്ന ദെഷാംപ്‌സിന്റെ ബുദ്ധിയെയാണ് എംബാപ്പേയും പോള്‍ പോഗ്ബയും ഗോളാക്കി മാറ്റിയത്.

4-1 എന്ന നിലയില്‍ ഒരുഘട്ടത്തില്‍ ക്രൊയേഷ്യ പിറകിലേക്ക് പോയതോടെ അവര്‍ മാനസികമായി തളര്‍ന്നു. ലോകകപ്പ് ഫൈനല്‍ പോലെ ഒരു പോരാട്ടത്തില്‍ നാല് ഗോളുകള്‍ക്ക്് പിറകില്‍ നില്‍ക്കുമ്പോള്‍ തിരിച്ചുവരാന്‍ കഴിയാത്ത അവസ്ഥയാണ്. മല്‍സരത്തിന്റെ ഗതി നിര്‍ണയിച്ചത് ദെഷാംപ്‌സിന്റെ പ്രായോഗികബുദ്ധി തന്നെയാണ്.

ആദ്യം പിറന്ന സെല്‍ഫ് ഗോള്‍ നോക്കുക- മാന്‍സുകിച്ച് ആ പന്തിന് തല വെച്ചില്ലെങ്കില്‍ ഗ്രിസ്മാന്റെ ഷോട്ട് പുറത്താണ്. രണ്ടാം ഗോള്‍ അനാവശ്യമായി വഴങ്ങിയ ഒരു കോര്‍ണറും ആ കോര്‍ണറില്‍ നിന്നും പിറന്ന പെനാല്‍ട്ടിയുമാണ്. ഫ്രഞ്ച് ടീം വളരെ മാന്യമായി കളിച്ചു. വലിയ ലീഡ് സ്വന്തമാക്കിയിട്ടും അവര്‍ നെഗറ്റീവ് തന്ത്രങ്ങളിലേക്ക് പോയില്ല. ആക്രമണത്തില്‍ അവരും താല്‍പ്പര്യമെടുത്തു. ആദ്യ പകുതിയില്‍ മഞ്ഞക്കാര്‍ഡ് കണ്ട് നക്കാലേ കാണ്ടെയെ കോച്ച് രണ്ടാം പകുതിയില്‍ വിളിപ്പിച്ചത് പോലെ തന്ത്രപരമായി തന്നെ ദെഷാംപ്‌സ് മല്‍സരത്തെ കണ്ടു.

മല്‍സരത്തിന് ശേഷവും കപ്പില്‍ മതിമറക്കാതെ ഫ്രഞ്ച് കോച്ച്് മൈതാനത്ത് ശരിക്കുമൊരു മാതൃകയായി. അദ്ദേഹം ക്രോട്ട്് താരങ്ങളുടെ അരികിലെത്തി എല്ലാവരെയും ആശ്വസിപ്പിച്ചു. ക്രോട്ടുകാര്‍ മെഡലുകള്‍ സ്വീകരിക്കാന്‍ വരുമ്പോള്‍ ഫ്രഞ്ച് താരങ്ങള്‍ അവര്‍ക്ക് പ്രത്യേക സ്‌നേഹവഴിയൊരുക്കി. ക്രൊയേഷ്യക്കാര്‍ക്ക് ഈ രണ്ടാം സ്ഥാനം കപ്പിന് തുല്യമാണ്. ഒരു മല്‍സരത്തില്‍ മാത്രം തോറ്റവര്‍-അവര്‍ കീഴടക്കിയത് ഫുട്‌ബോള്‍ മനസ്സായിരുന്നു. ഫ്രാന്‍സിന്റെ കിരീട നേട്ടത്തിലും ട്രോഫി അവര്‍ക്ക് ഫിഫ പ്രസിഡണ്ട് ഇന്‍ഫാന്‍ഡിനോ സമ്മാനിക്കുമ്പോഴും ഗ്യാലറി പോലും മൗനമായി ക്രോട്ടുകാര്‍ക്കൊപ്പമായിരുന്നു. ഏറ്റവും മികച്ച താരമായി ലുക്കാ മോദ്രിച്ചിനെ പ്രഖ്യാപിച്ചപ്പോള്‍ ലഭിച്ച കയ്യടി ഫ്രാന്‍സ് ലോകകപ്പ് ഏറ്റുവാങ്ങുമ്പോള്‍ ലഭിച്ചിരുന്നില്ല.

ലോകകപ്പ് സമാപിക്കുമ്പോള്‍ പുത്തന്‍ ടീമുകളുടെ, പുതിയ താരങ്ങളുടെ സമ്മേളന വേദിയായാണ് റഷ്യ അടയാളപ്പെടുത്താന്‍ പോവുന്നത്. പരാതികളില്ലാത്ത ലോകകപ്പ്, സംഘാടനത്തില്‍ പ്രകടമായ കൃത്യത, ഫിഫ പ്രകടിപ്പിച്ച അച്ചടക്കം-എല്ലാം പ്രൊഫഷണലിസത്തിന്റെ വ്യക്തമായ ദൃഷ്ടാന്തങ്ങളായിരുന്നു. ഫൈനല്‍ കാണാനും സ്വന്തം ടീമുകളെ പ്രോല്‍സാഹിപ്പിക്കാനും ഫ്രഞ്ച്, ക്രൊയേഷ്യന്‍ ഭരണത്തലവന്മാരെത്തി. കിരീടം സമ്മാനിക്കാന്‍ റഷ്യന്‍ പ്രസിഡണ്ടുമെത്തി. വലിയ ചാമ്പ്യന്‍ഷിപ്പിന്റെ സമാപനത്തില്‍ ആകാശവും മഴയോടെ പുഷ്പവൃഷ്ടി നടത്തി.

ഇനി നാല് വര്‍ഷത്തിന് ശേഷം ഖത്തര്‍… ഇപ്പോള്‍ തന്നെ ഒരുക്കങ്ങളുടെ പകുതി ദൂരം പിന്നിട്ടവരാണ് ഖത്തര്‍. റഷ്യയില്‍ നിന്നും പഠിക്കാനുള്ളതെല്ലാം ഖത്തര്‍ സ്വീകരിക്കും. 2018 ല്‍ നിന്നും 2022 ലേക്കുള്ള ആ നാല് വര്‍ഷ ദൂരത്തില്‍ ഫ്രാന്‍സ് മാത്രമല്ല ക്രൊയേഷ്യയും ബെല്‍ജിയവും ഇംഗ്ലണ്ടും റഷ്യയും ജപ്പാനുമെല്ലാം ചര്‍ച്ച ചെയ്യപ്പെടും.

റഷ്യയില്‍ നിന്നും ചന്ദ്രിക ചീഫ് ന്യൂസ് എഡിറ്ററും പ്രമുഖ ഫുട്‌ബോള്‍ നിരൂപകനുമായ കമാല്‍ വരദൂരിന്റെ മൈ ടീം പ്രത്യേക കോളം…

ഒരു മാസത്തെ ലോകകപ്പ് ആവേശം ഫുട്‌ബോള്‍ ലോകത്തിന് സമ്മാനിച്ചിരിക്കുന്നത് പുതിയ ചിന്തകളും ടീമുകളും താരങ്ങളും. മാറിയ കാലത്തിനൊപ്പം മല്‍സരിക്കുന്നവരായിരിക്കുന്നു ടീമുകള്‍. പഴഞ്ചന്‍ പിന്തിരിപ്പന്‍ സമീപനത്തിന് വിപണിയില്ല. പ്രതിരോധമെന്ന സൂത്രവാക്യത്തിലും ഒഫന്‍സീവ് മുദ്രാവാക്യത്തിലും പരിശീലകര്‍ക്ക് താല്‍പ്പര്യമില്ലാതായിരിക്കുന്നു.

90 മിനുട്ടിലെ ഫുട്‌ബോള്‍ പൂര്‍ണസമയത്തും ലൈവായി മാറണമെന്നതായിരിക്കുന്നു പുതിയ ചിന്ത. അതിന് കാലത്തിന് മാര്‍ക്ക് നല്‍കണം. അതിവേഗമാണ് ലോക സഞ്ചാരം. കളിയിടം ആ വേഗതയില്‍ പോവേണ്ടിയിരിക്കുന്നു. സ്‌റ്റേഡിയങ്ങളില്‍ വന്ന് കളി കാണുന്നവരേക്കാള്‍ ആവേശത്തിലാണ് സ്വന്തം മൊബൈലില്‍ ആളുകള്‍ കളിയെ കാണുന്നതും വിസ്തരിക്കുന്നതും വിമര്‍ശിക്കുന്നതും. സോഷ്യല്‍ മീഡിയയില്‍ നടക്കുന്ന കൂലംകഷമായ ചര്‍ച്ചകളും ട്രോളുകളും താരങ്ങളെ പോലും സാരമായി ബാധിക്കുന്നു. വിശകലനമെന്നത് വിശാരദന്റെ ജോലിയായിരുന്നെങ്കില്‍ അതിപ്പോള്‍ എല്ലാവരും ചെയ്യുന്നു. ആ ചിന്തയുടെ പുതിയ വഴിയാണ് ഈ ലോകകപ്പ്.

ടീമുകളെ നോക്കുക. മുമ്പെല്ലാം ലോകകപ്പ് വരുമ്പോള്‍ ചര്‍ച്ചാ ടേബിളിലേക്ക് വരുക സ്ഥിരക്കാരാണ്. ജര്‍മനി, ഇറ്റലി, ഇംഗ്ലണ്ട്, ഫ്രാന്‍സ്, ബ്രസീല്‍, അര്‍ജന്റീന, സ്‌പെയിന്‍ തുടങ്ങിയവര്‍. ഇവരെല്ലാം പരമ്പരാഗത ഫുട്‌ബോല്‍ ശക്തികളാണ്. പക്ഷേ ഇത്തവണ മേല്‍പ്പറഞ്ഞ പരമ്പരാഗതവാദികളില്‍ രണ്ട് ടീമുകള്‍ മാത്രമാണ് സെമിഫൈനല്‍ കണ്ടത്. ഇംഗ്ലണ്ടും ഫ്രാന്‍സും. ഇതില്‍ ഇംഗ്ലണ്ട് പുറത്തായിരിക്കുന്നു. അതിന് കാരണമാവട്ടെ പഴഞ്ചന്‍ ശൈലി പുറത്തെടുത്തത്. സെമി വരെ പോസിറ്റീവായി വേഗതയില്‍ കളിച്ച ഇംഗ്ലണ്ട് സെമിയില്‍ ഇന്നലെകളിലെ അടവുകളിലേക്ക് പോയി. ദുരന്തവുമായി. അല്‍ഭുതങ്ങളുമായാണ് പുതിയ ടീമുകള്‍ വന്നത്. ഫുട്‌ബോളെന്നത് ആഗോളീയമായിരിക്കുന്നുവെന്നും ആര്‍ക്കും ആരെയും തോല്‍പ്പിക്കാമെന്നതുമാണ് റഷ്യ നല്‍കുന്ന സന്ദേശം. ആതിഥേയരായ റഷ്യക്ക് ആരും ഒരു സാധ്യതയും കല്‍പ്പിച്ചിരുന്നില്ല. അവര്‍ ക്വാര്‍ട്ടര്‍ കളിച്ച് വീരോചിതം മടങ്ങി.

ക്രൊയേഷ്യക്കാര്‍ ഇത് വരെ കളിച്ച എല്ലാ മല്‍സരങ്ങളും ജയിച്ചു. തോല്‍പ്പിച്ചവരുടെ പട്ടികയില്‍ അര്‍ജന്റീനയും ഇംഗ്ലണ്ടുമുണ്ട്. അവര്‍ കിരീടത്തിന് അരികില്‍ നില്‍ക്കുന്നു. ബെല്‍ജിയത്തിന്റെ യാത്രയോ- ഗംഭീരമായിരുന്നു. ബ്രസീലിനെ പോലും നാമാവശേഷമാക്കിയ യുവ ടീം. ജപ്പാന്റെ വരവ് രാജകീയമായിരുന്നു. കൊളംബിയക്കാരെ തോല്‍പ്പിച്ചും ബെല്‍ജിയത്തെ വിറപ്പിച്ചുമാണ് അവര്‍ മടങ്ങിയത്. ലോക ചാമ്പ്യന്മാരായ ജര്‍മനിയെ വരച്ച വരയില്‍ നിര്‍ത്തിയുളള വിജയമായിരുന്നു മെക്‌സിക്കോ നേടിയത്. കൊറിയക്കര്‍ ജര്‍മനിയെ രണ്ട് ഗോളിന് തോല്‍പ്പിക്കുമെന്ന് അന്യായ സ്വപ്‌നത്തില്‍ പോലും ആരും കരുതിയിരുന്നില്ല. അതും സംഭവിച്ചു. എന്തിന് കന്നിക്കാരായ പാനമ കളിച്ച മൂന്ന് കളികളിലും തോറ്റെങ്കിലും അവര്‍ രണ്ട് ഗോള്‍ പ്രതിയോഗികള്‍ക്ക് സമ്മാനിച്ചു. അര്‍ജന്റീനയും സ്‌പെയിനും ജര്‍മനിയുമെല്ലാം അതിവേഗം വന്ന വഴിയേ മടങ്ങി.

ലയണല്‍ മെസിയും നെയ്മര്‍ ജൂനിയറും കൃസ്റ്റിയാനോ റൊണാള്‍ഡോയുമായിരുന്നു ലോകകപ്പിന്റെ പോസ്റ്റര്‍ താരങ്ങള്‍. മെസി നേടിയത് ഒരു ഗോള്‍-സമ്പൂര്‍ണ്ണ പരാജയമായിരുന്നു ആ താരം. പൗലോ ഡിബാലെയെ പോലെ ഒരു യുവതാരത്തെ കരക്കിരുത്തിയ പാതകത്തില്‍ മെസിക്കും വലിയ പങ്കുണ്ടായിരുന്നു. കൃസ്റ്റിയാനോ സ്‌പെയിനിനെതിരെ ഹാട്രിക്ക് നേടി. പക്ഷേ നോക്കൗട്ടില്‍ പുറത്തായി. നെയ്മറാണ് മൂന്ന് പേരില്‍ മികച്ച പോരാട്ടം നടത്തിയത്. എല്ലാ മല്‍സരങ്ങളിലും പതിവ് വേഗതയില്‍ ഉജ്ജ്വലമായി കളിച്ചു അദ്ദേഹം. പക്ഷേ ക്വാര്‍ട്ടറില്‍ വീണു. ഇവര്‍ക്കെല്ലാം പകരം ഈഡന്‍ ഹസാര്‍ഡ്, റുമേലു ലുക്കാക്കു, കൈലിയന്‍ എംബാപ്പേ, ലുക്കാ മോദ്രിച്ച്, മരിയോ മാന്‍സുകിച്ച്, അന്റോണിയോ ഗ്രിസ്മാന്‍, അഹമ്മദ് മൂസ, ജോര്‍ദ്ദാന്‍ പിക്‌ഫോര്‍ഡ്, ഹാരി കെയിന്‍, അലക്‌സി ചെര്‍ച്ചഷേവ് തുടങ്ങിയവരെല്ലാമാണ് തിളങ്ങിയത്.

2018 ലെ റഷ്യന്‍ ലോകകപ്പ് അറിയാന്‍ പോവുന്നത് കൊലകൊമ്പന്മാരുടെ പതന വേദിയായാണ്. അത് നല്ല യുവ ഫുട്‌ബോളിനുള്ള വഴിയുമാവുന്നു. ഞായറാഴ്ച്ച മികച്ച കളിക്കാരനായി, ടോപ് സ്‌ക്കോററായി, മികച്ച ഗോള്‍ക്കീപ്പറായി, മികച്ച യുവതാരമായെല്ലാം തെരഞ്ഞെടുക്കപ്പെടാന്‍ പോവുന്നത് പുതിയ താരങ്ങളാണ്. പുതിയ ലോകത്തേക്കുള്ള പുതിയ വാതായനമാണ് റഷ്യ-സംശയമില്ല.

റഷ്യയില്‍ നിന്നും ചന്ദ്രിക ചീഫ് ന്യൂസ് എഡിറ്ററും പ്രമുഖ ഫുട്‌ബോള്‍ നിരൂപകനുമായ കമാല്‍ വരദൂരിന്റെ മൈ ടീം പ്രത്യേക കോളം…

ബ്രസീലിനെ തോല്‍പ്പിക്കാന്‍ എന്താണ് മാര്‍ഗ്ഗം… ബെല്‍ജിയം ടീം ക്യാമ്പിലെ എല്ലാവരും ഒറ്റയടിക്ക് പറഞ്ഞു- വേഗനീക്കങ്ങള്‍. മുന്‍നിരക്കാര്‍ മാത്രമാവരുത് വേഗനീക്കങ്ങളിലെ പങ്കാളികള്‍. എല്ലാവര്‍ക്കും ആ ജോലിയില്‍ പങ്കാളികളാവാമെന്ന് ടീം യോഗത്തില്‍ പറഞ്ഞത് തിയറി ഹെന്‍ട്രിയെന്ന പഴയ ഫ്രഞ്ചുകാരന്‍. അദ്ദേഹമിപ്പോള്‍ ടീമിന്റെ ഗോളടി കോച്ചാണല്ലോ…വേഗതയില്‍ മാത്രമേ ബ്രസീലിനെ നിയന്ത്രിക്കാനാവു എന്ന സൂത്രവാക്യത്തിന്റെ പ്രായോഗികവല്‍ക്കരണമായിരുന്നു കസാനില്‍ കണ്ടത്. എന്തായിരുന്നു അതിനുളള ടിറ്റേയുടെ മറുമരുന്ന്- പതുക്കെ തിരിച്ചടിക്കുക. ഈ തന്ത്രവും ഫലപ്രദമായേനേ-പക്ഷേ ടീമിന് തെല്ലും ഭാഗ്യമുണ്ടായിരുന്നില്ല. അങ്ങനെ ലാറ്റിനമേരിക്കയുടെ കഥ ഇരുപത്തിയൊന്നാമത് ലോകകപ്പില്‍ അവസാനിച്ചിരിക്കുന്നു. ഇനി എല്ലാം യൂറോപ്പ് മയമാണ്.

നാല് വര്‍ഷം മുമ്പ് ബ്രസീലില്‍ നടന്ന ലോകകപ്പില്‍ ജര്‍മനിക്ക് മുന്നില്‍ പ്രതിരോധം തകര്‍ന്ന് ഏഴ് ഗോള്‍ വാങ്ങിയത് ലൂയിസ് ഫിലിപ്പ് സ്‌ക്കോളാരിയുടെ ടീമായിരുന്നു. ആ മല്‍സരത്തില്‍ ജര്‍മനിയുടെ പരിശീലകനായ ജോക്കിം ലോ പ്രയോഗിച്ച തന്ത്രം ഇതായിരുന്നില്ലേ…? ബ്രസീലിനെ വേഗതയില്‍ പേടിപ്പിക്കുക. ഒന്നോ രണ്ടോ ഗോള്‍ നേടുക. ആ തന്ത്രത്തില്‍ ബ്രസീല്‍ പേടിച്ചു. പേടിച്ച് കളിക്കുന്ന ബ്രസീല്‍ എന്നും ദുരന്തമാണ്. കസാനിലും സംഭവിച്ചത് അത് തന്നെ. പ്രതിയോഗികളെ ബഹുമാനിക്കുന്നവരാണ് ബ്രസീല്‍. പക്ഷേ ഭയപ്പെടുന്നവരല്ല. ഒന്നും രണ്ടും മൂന്നും തവണ ലുക്കാക്കുവും ഹസാര്‍ഡും ഡി ബ്രുയനും കുതിച്ച് കയറിയപ്പോള്‍ ബ്രസീല്‍ ഡിഫന്‍സ് പൊട്ടി. ഗോള്‍ക്കീപ്പര്‍ അലിസണ്‍ പരിഭ്രമിച്ചു. അങ്ങനെ വന്ന പേടിയെ അകറ്റാന്‍ പിന്നിടൊരിക്കലും കഴിഞ്ഞില്ല. രണ്ട് ഗോളിന് ലീഡ് നേടിയിട്ടും ബെല്‍ജിയം ആക്രമണം അവസാനിപ്പിച്ചില്ല. പ്രതിരോധത്തിന്റെ ബോറന്‍ വഴിയിലേക്കും പോയില്ല.

ബെല്‍ജിയത്തിന്റെ വിജയരഹസ്യമെന്നത് വേഗത തന്നെയാണ്. ലുക്കാക്കുവിനെ പോലെ ആജാനബാഹിവായ ഒരാളെ പിടിച്ചുകെട്ടുക ഏത് ഡിഫന്‍സിനും തലവേദനയാണ്. നായകന്‍ ഈഡന്‍ ഹസാര്‍ഡ് തളരുന്നില്ല-ഒരേ വേഗതയില്‍ പറക്കുന്നു. മധ്യനിരയില്‍ ഡി ബ്രുയന്‍ ഈ രണ്ട് പേര്‍ക്കുമിടയില്‍ പാലമായി വര്‍ത്തിക്കുന്നു. ഈ മൂന്ന് പേരുമാണ് ടീമിന്റെ വിലാസക്കാര്‍. ഇവര്‍ മൂന്ന് പേരും ഒരു പോലെ ഫോമിലെത്തിയപ്പോള്‍ പേടി അകറ്റാനുള്ള സമയം ബ്രസീലിന് ലഭിച്ചില്ല. വിജയങ്ങളുടെ രസതന്ത്രമറിയുന്നയാളാണ് ടിറ്റേ. അദ്ദേഹം പോലും പരിഭ്രമിച്ചെങ്കില്‍ പിന്നെ നെയ്മറെ പഴി പറയാന്‍ കഴിയില്ലല്ലോ… മാര്‍സിലോ തിരിച്ചുവന്നത് മുന്‍നിരയെ ഉണര്‍ത്തി. പക്ഷേ പൗലിഞ്ഞോ മധ്യനിരയില്‍ താളം കണ്ടെത്തിയില്ല. പിന്‍നിരയില്‍ കാസിമിറോയുടെ ആ കഠിന ഹൃദയവുമുണ്ടയിരുന്നില്ലല്ലോ…

ഫ്രാന്‍സിനെതിരെ ഉറുഗ്വേ തീര്‍ത്തും നിഷ്പ്രഭമാവാന്‍ കാരണം എഡ്ഗാര്‍ കവാനിയുടെ അഭാവം തന്നെ. ലൂയിസ് സുവാരസിന് ശക്തമായ പിന്തുണ നല്‍കുന്ന സഹ സ്‌ട്രൈക്കറാണ് കവാനി. പോര്‍ച്ചുഗലിനെതിരായ മല്‍സരത്തില്‍ രണ്ട് സുന്ദര ഗോളുകള്‍ അദ്ദേഹം നേടിയിരുന്നല്ലോ.. ആ മല്‍സരത്തിനിടെ സംഭവിച്ച പരുക്കില്‍ നിര്‍ണായകമായ ക്വാര്‍ട്ടര്‍ നഷ്ടമായതോടെ തന്നെ ടീമിന്റെ പകുതി ജീവന്‍ പോയിരുന്നു. പിന്നെ മുസലേരയിലെ ഗോള്‍ക്കീപ്പറില്‍ ഒരിക്കലും കാണാത്ത പിഴവുകളും സംഭവിച്ചു. ലോകകപ്പിലെ ഉന്നത നിലവാരമുളള ഗോള്‍ക്കീപ്പറായിരുന്നു മുസലേര. ഒരു ഗോള്‍ പോലും നാല് മല്‍സരങ്ങളില്‍ വഴങ്ങിയിരുന്നില്ല. ആ മുസലേരയാണ് അന്റോണിയോ ഗ്രിസ്മാന്റെ ലോംഗ് റേഞ്ചറില്‍ പരിഭ്രമിച്ചത്. പന്ത് തട്ടിത്തെറിപ്പിക്കുന്നതിനിടെ കൈകളില്‍ തട്ടി സ്വന്തം വലയില്‍ തന്നെ കയറിയ അപൂര്‍വ്വ കാഴ്ച്ച.

ഫ്രാന്‍സ് പക്ഷേ ധാരാളം നാടകങ്ങള്‍ നടത്തി ടീമിനോടുണ്ടായിരുന്നു സ്‌നേഹം ഇല്ലാതാക്കി. വിശിഷ്യാ-കൈലിയന്‍ എംബാപ്പെ. വെറുതെ ഡൈവിംഗ് നടത്തി മഞ്ഞക്കാര്‍ഡ് വാങ്ങി പത്താം നമ്പറുകാരന്‍. പോള്‍ പോഗ്ബയും വെറുതെ വഴക്കിനായി കളിച്ചത് പോലെ തോന്നി. ഇത്തരത്തിലുള്ള പെരുമാറ്റൊമൊന്നും കോച്ച് ദെഷാംപ്‌സ് അനുവദിക്കരുത്. ബെല്‍ജിയം നായകന്‍ ഈഡന്‍ ഹസാര്‍ഡിനെ നോക്കുക. എത്ര തവ അദ്ദേഹം ഫൗള്‍ ചെയ്‌പ്പെട്ടു. ഒരഭിനയവും നടത്തിയില്ലല്ലോ…കാര്‍ഡുകളുടെ വില ഇപ്പോഴറിയില്ല. അടുത്ത മല്‍സരം സെമിയാണ്. അവിടെയു കാര്‍ഡ് കിട്ടിയാല്‍ പിന്നെ ഫൈനല്‍ പോലും നഷ്ടമാവുന്ന അവസ്ഥ സംജാതമാവും.

എന്തായാലും അര്‍ജന്റീനിയന്‍ ഫാന്‍സ് വളരെ ഹാപ്പിയാണ്. ബ്രസീല്‍ തോറ്റതില്‍ ബെല്‍ജിയക്കാരേക്കാള്‍ ഇവിടെ ആഘോഷം അര്‍ജന്റീനക്കാരുടെ വകയാണ്. നാട്ടിലും അതിന് മാറ്റമുണ്ടാവില്ലല്ലോ.. പക്ഷേ മഞ്ഞപ്പടയും പുറത്തായതോടെ ലോകകപ്പിന്റെ ഗ്ലാമര്‍ മങ്ങുകയാണ്.
ഇന്നത്ത ആദ്യ മല്‍സരത്തില്‍ സ്വീഡനെതിരെ ഇംഗ്ലണ്ടിനാണ് സാധ്യത. പക്ഷേ സ്വീഡന്റെ സംഘബലത്തെ ഗൗരവതരത്തില്‍ ഇംഗ്ലണ്ട് മാനിക്കാത്തപക്ഷം ദുരന്തവും സംഭവിക്കാം. പക്ഷേ റഷ്യക്കാര്‍ കാത്തിരിക്കുന്നത് അവരുടെ ടീമിന്റെ മല്‍സരത്തിനെയാണ്. ക്രൊയേഷ്യയാണ് പ്രതിയോഗികള്‍. റഷ്യന്‍ ആവേശമാണിവിടെയെങ്ങും. അവരുടെ പതാകകളും തൊപ്പികളും ടാറ്റുകളും മഫ്‌ളോറുകളുമെല്ലാം ചൂടപ്പം പോലെയാണ് വിറ്റുപ്പോവുന്നത്. ജയിച്ചാല്‍ രാജ്യം ഇന്നുറങ്ങില്ല. തോറ്റാലോ-പബ്ബുകളിലെ തിരക്ക് ഇരട്ടിയാവും.

റഷ്യയില്‍ നിന്നും ചന്ദ്രിക ചീഫ് ന്യൂസ് എഡിറ്ററും പ്രമുഖ ഫുട്‌ബോള്‍ നിരൂപകനുമായ കമാല്‍ വരദൂരിന്റെ മൈ ടീം പ്രത്യേക കോളം…

മൈതാനത്ത് പരാജയപ്പെട്ടാല്‍ ആരാണ് പഴി കേള്‍ക്കുക…? ടീമിന്റെ നായകന്മാരല്ല-പരിശീലകരാണ്. നായകന്മാരെയോ കളിക്കാരെയോ ഫുട്‌ബോള്‍ ഫെഡറേഷനുകള്‍ പിരിച്ചുവിടാറില്ല. എപ്പോഴും ദുരന്തമുഖത്ത് ബലിയാടുകളായി മാറുക പരിശീലകരായിരിക്കും. ലോകകപ്പില്‍ ഇനി അവശേഷിക്കുന്നത് എട്ട് പരിശീലകര്‍. അവരുടെ സമ്മര്‍ദ്ദങ്ങള്‍ എത്രയായിരിക്കുമല്ലേ…. അവരിലേക്കാണ് ഇന്നത്തെ യാത്ര.

നിങ്ങള്‍ കണ്ടിട്ടില്ലേ ഉറുഗ്വേ കളിക്കുമ്പോള്‍ വാക്കിംഗ് സ്റ്റിക്കിന്റെ സഹായത്തോടെ മൈതാനത്തേക്ക് വരുന്ന ഒരു വയോധികനെ. പ്രായം 80 പിന്നിട്ടിരിക്കുന്നു. പക്ഷേ ഓസ്‌ക്കാര്‍ ടബരസ് എന്ന പരിശീലകനെ എന്ത് കൊണ്ട് ഉറുഗ്വേ ഒഴിവാക്കുന്നില്ല. അവിടെയാണ് ടബരസ് എന്ന സീനിയര്‍ പരിശീലകന്‍ അംഗീകരിക്കപ്പെടുന്നത്. കളിയിലുള്ള സൂക്ഷ്മപഠനം. അദ്ദേഹത്തിന് മുന്നില്‍ 23 കളിക്കാരും ഒന്നാണ്. വലുപ്പ ചെറുപ്പമില്ല. എഡ്ഗാര്‍ കവാനിയും ലൂയിസ് സുവാരസുമെല്ലാം യൂറോപ്പിലെ സൂപ്പര്‍ താരങ്ങളായിരിക്കാം. പക്ഷേ ടബരസിന് അവര്‍ സാധാരണ താരങ്ങള്‍. ടീമിനെ നിശ്ചയിക്കുന്നത് ടബരസാണ്. അദ്ദേഹം പരിശീലന വേളയില്‍ കര്‍ക്കശ നിരീക്ഷണം നടത്തും. ആവശ്യമായ മാറ്റങ്ങള്‍ വരുത്തുമ്പോള്‍ താരങ്ങളോട് കാര്യങ്ങള്‍ പറയും. മൈതാനത്ത്് ആഘോഷപരതയില്ല. സീരിയസായി ഇരിക്കും. തന്റെ സഹായികളെ അദ്ദേഹത്തിന് വിശ്വാസമാണ്. ഈ പരസ്പര വിശ്വാസമാണ് ഉറുഗ്വേയുടെ ക്വാര്‍ട്ടര്‍ യാത്രയും. ഉറുഗ്വേ പത്രക്കാരോട് ഞാന്‍ ടബരസിനെക്കുറിച് ചോദിച്ചപ്പോള്‍ അദ്ദേഹം ടീമിലെ ഫാദര്‍ ഫിഗര്‍ എന്നാണ് അവര്‍ പറഞ്ഞത്. ആരും അദ്ദേഹത്തെ ധിക്കരിക്കില്ല.

ദീദിയര്‍ ദെഷാംപ്‌സ്

ഫ്രഞ്ച് സംഘത്തിലേക്ക് വന്നാല്‍ ദീദിയര്‍ ദെഷാംപ്‌സ് എന്ന പഴയ ഫ്രഞ്ച് നായകന്‍. 1998 ല്‍ ഫ്രാന്‍സിന് ലോകകപ്പ് സമ്മാനിച്ച ക്യാപ്റ്റന്‍. അതിന് ശേഷം പരിശീലകന്റെ കുപ്പായത്തില്‍ ദീര്‍ഘവര്‍ഷങ്ങള്‍. കരീം ബെന്‍സേമയെ പോലെ ഒരാളെ ധൈര്യസമേതം പുറത്തിരുത്തിയ കോച്ച്. ആ ധൈര്യം തന്നയാണ് ദെഷാംപ്‌സിലെ പരിശീലകന്റെ കരുത്തും. സൂപ്പര്‍ താരങ്ങള്‍ നിരവധിയുണ്ട് ടീമില്‍. പക്ഷേ കണിശതയിലും ഇവരെ കോച്് സ്‌നേഹിക്കുന്നു. എല്ലാവര്‍ക്കും അവസരം നല്‍കുന്നു. അവരില്‍ നിന്നും ഏറ്റവും മികച്ച ടീമിനെ എടുക്കുന്നു. ആരോടും അധിക സംസാരമില്ല. പത്രക്കാരോടുമില്ല വാചകമടി. സ്വന്തം ജോലിയില്‍ വിശ്വസിക്കുന്ന പരിശീലകന്‍.

ബ്രസീല്‍ ഹെഡ് കോച്ച് ടിറ്റേയുടേത് കൂര്‍മബുദ്ധിയാണ്. ആര്‍ക്കും അദ്ദേഹം വഴങ്ങില്ല. തന്റെ അഭിപ്രായത്തില്‍ ഉറച്ച് നില്‍ക്കും. പെട്ടെന്ന് അഭിപ്രായം പറയില്ല. ചോദ്യങ്ങള്‍ക്ക് പോലും ആലോചിച്ചുള്ള പ്രതികരണം. സ്ഥിരം ക്യാപ്റ്റനെ അദ്ദേഹം പ്രഖ്യാപിക്കില്ല. ഓരോ മല്‍സരത്തിനും ഓരോ നായകര്‍. സെര്‍ബിയക്കെതിരെ മിറാന്‍ഡക്കായിരുന്നു നായകന്റെ ആം ബാന്‍ഡെങ്കില്‍ മെക്‌സിക്കോക്കെതിരെ അത് തിയാഗോ സില്‍വക്ക്് നല്‍കി. ഇന്നാര്‍ക്കായിരിക്കും-അത് അദ്ദേഹം രാവിലെ തീരുമാനിക്കും. അദ്ദേഹത്തിന്റെ വ്യക്തമായ പ്ലാനിംഗിലാണ് ബ്രസീല്‍ മുന്നേറുന്നത്. ഒരു ഉദാഹരണം മാത്രം- വില്ലിയാന്‍ എന്ന മധ്യനിരക്കാരനെ മെക്‌സിക്കോക്കെതിരായ പ്രീക്വാര്‍ട്ടറില്‍ അദ്ദേഹം അറ്റാക്കിംഗ് മിഡ്ഫീല്‍ഡറുടെ റോളിലേക്ക് കൊണ്ട് വന്നു. വ്യക്തമായ നിര്‍ദ്ദേശവും നല്‍കി. വിംഗുകളിലൂടെയല്ല കയറേണ്ടത്. മൈതാന മധ്യത്തിലൂടെ. അത്തരമൊരു നീക്കം മെക്‌സിക്കോക്കാര്‍ ആലോചിച്ചിട്ട് പോലുമുണ്ടായിരുന്നില്ല. ബ്രസീല്‍ നേടിയ രണ്ട് ഗോളിലും വിലിയന്റെ മധ്യലൈന്‍ കുതിപ്പായിരുന്നു ഗോളുകളായത്. ടിറ്റേക്കുള്ള ഗുണം അദ്ദേഹം തന്റെ തന്ത്രങ്ങള്‍ക്കൊപ്പമാണ് താരങ്ങളെ റിക്രൂട്ട് ചെയ്തത്. സൂപ്പര്‍ താരങ്ങളെ അദ്ദേഹത്തിന് വേണ്ട-തന്റെ പ്ലാനിന് അനുയോജ്യരായവരെ മാത്രം മതി.

റോബര്‍ട്ടോ മാര്‍ട്ടിനസ്‌

ബെല്‍ജിയത്തിന്റെ പരിശീലകന്‍ മാര്‍ട്ടിനസിനെ ജപ്പാനെതിരായ മല്‍സരതിന് മുമ്പ് നിങ്ങള്‍ ശ്രദ്ധിച്ചിരുന്നോ…? സൗമ്യഭാവം- മല്‍സരത്തില്‍ ജപ്പാന്‍ രണ്ട് ഗോളടിക്കുന്നു. അപ്പോഴും ഞാന്‍ അദ്ദേഹത്തെ ശ്രദ്ധിച്ചു. അതേ സൗമ്യത. ആശങ്കയോ കോപമോ ഒന്നും ആ മുഖത്തില്ല. അര്‍ജന്റീനക്കാരന്‍ സാംപോളിയായിരുന്നു അതെങ്കില്‍ മൈതാനത്ത് നിന്ന് പറപറക്കുമായിരുന്നു. രണ്ട് ഗോള്‍ വഴങ്ങിയിട്ടും താരങ്ങളെ വിളിച്ച്് ആശങ്കാ നിര്‍ദ്ദേശമൊന്നും നല്‍കിയില്ല. ശാന്തനായി തന്റെ പ്ലാന്‍ സഹപരിശീലകനോട് പറഞ്ഞു. അദ്ദേഹമത് താരങ്ങള്‍ക്ക് കൈമാറി. പിന്നെ കണ്ടത് മൂന്ന് ഗോളുകള്‍.

റഷ്യന്‍ പരിശീലകന്‍ സ്റ്റാനിസ്ലാവ് ചര്‍ച്ചഷേവ് കണിശതയുള്ള പട്ടാളക്കാരനാണ്. ഇംഗ്ലണ്ടിന്റെ ജെറാത്ത് സൗത്ത്‌ഗെയിറ്റ് താരങ്ങളുടെ സ്വന്തം പരിശീലകന്‍. സ്വീഡന്റെ ജാനേ ആന്‍ഡേഴ്‌സണ്‍ കര്‍ക്കശക്കാരനാണ്. സാകോ ഡാലിച്ച് എന്ന ക്രോട്ട് പരിശീലകന്‍ ജനകീയനും. എല്ലാ താരങ്ങളോടും അഭിപ്രായം തേടുന്ന സ്വഭാവം. കാര്‍ക്കശ്യമെന്നത് അദ്ദേഹത്തിന്റെ നിഘണ്ടുവില്ലില്ല-നന്നായി കളിക്കുന്നവര്‍ക്കൊപ്പം നില്‍ക്കും.

നാളെയും മറ്റന്നാളും അത് കഴിഞ്ഞാലും ഈ പരിശീലകരുടെ തന്ത്രങ്ങളാണ് ഫുട്‌ബോള്‍ ടേബിളുകളില്‍ കൂലംകഷമായി ചര്‍ച്ച ചെയ്യപ്പെടുക. പരിശീലകരിപ്പോള്‍ കേവലം മൈതാന പരിശീലകരല്ല-സാങ്കേതിക പരിശീലകരാണ്. വീഡിയോ അനാലിസിസ്, കംപ്യൂട്ടര്‍ അനാലിസിസ് എന്നിവക്കൊപ്പം ഫിറ്റ്‌നസ് അവലോകനവും നടത്തി ശരിക്കും പോസിറ്റീവായി ചിന്തിക്കുന്നവര്‍. എല്ലാവരിലും പ്രകടമാവുന്ന വലിയ ഗുണം ആരും സൂപ്പര്‍ താരങ്ങള്‍ക്ക് പിറകെ പോവുന്നില്ല. എല്ലാവരും 100 ല്‍ 100 മാര്‍ക്ക് നല്‍കുന്നത് ആരോഗ്യത്തിനാണ്.

കവാനിക്ക് പരുക്കാണെങ്കില്‍ പുറത്ത്. മാര്‍സിലോക്ക് പരുക്കാണെങ്കില്‍ പുറത്ത്. മൈതാനതത്ത് വേണ്ടത് സമര്‍പ്പണമാണ്. അതിന് വേണ്ടത് ആരോഗ്യമാണ്. അതറിയുന്ന പരിശീലകരുടെ സമ്മര്‍ദ്ദവും ചെറുതല്ല. ഷൂട്ടൗട്ട് വേളയില്‍ തലയും താഴ്ത്തിയിരുന്ന ക്രോട്ട് കോച്ച് ഡാലിച്ചിനെ മാറ്റി നിര്‍ത്തിയാല്‍ ചങ്കുറപ്പുളളവരാണ് എല്ലാവരും. നാല് വര്‍ഷത്തോളമായി അവരുടെ ഒരുക്കങ്ങളുടെ പരിസമാപ്തിയാണിപ്പോള്‍. എല്ലാവരും കപ്പിലേക്കാണ് നോക്കുന്നത്-അത് പരസ്യമായി പറയുന്നില്ലെന്ന് മാത്രം. ആരായിരിക്കും ജൂലൈ 15ന് ലുഷിനിക്കി സ്‌േേഡിയത്തില്‍ തല ഉയര്‍ത്തുക. കാത്തിരിക്കാമല്ലേ….

അവസാനിപ്പിക്കുന്നതിന് മുമ്പ് ഒരു കാര്യം കൂടി പറായം-ഇവിടെ കണ്ട 32 പരിശീലകരിലെ അബദ്ധം അര്‍ജന്റീനക്കാരന്‍ ജോര്‍ജ് സാംപോളിയായിരുന്നു. സര്‍ക്കസ് റിംഗിലെ കോമാളിയെ പോലെയാണ് അദ്ദേഹത്തെ തോന്നിയത്. ഒരു നിലപാടുമില്ലാത്ത, സ്വന്തം താരങ്ങളെ അറിയാത്ത വെറിയനായ ഒരു കാരണവര്‍…..

നോക്കൗട്ട് ഇന്ന് തുടങ്ങുന്നു. യോഗ്യത നേടിയ പതിനാറ് പേരും കേമന്മാര്‍. ആദ്യ മല്‍സരത്തില്‍ തന്നെ തീപ്പാറുമെന്നുറപ്പ്. ആദ്യ മല്‍സരത്തില്‍ അര്‍ജന്റീനയും ഫ്രാന്‍സും മുഖാമുഖം. രണ്ടാം മല്‍സരത്തില്‍ കൃസ്റ്റിയാനോ റൊണാള്‍ഡോയുടെ പോര്‍ച്ചുഗലും ലൂയിസ് സുവാരസിന്റെ ഉറുഗ്വേയും ബലാബലം. ഒന്നുറപ്പാണ്- മേല്‍പ്പറഞ്ഞ നാല് ടീമുകളും പ്രൊഫഷണല്‍ ഫുട്‌ബോളില്‍ വിശ്വസിക്കുന്നവരാണ്. അതിനാല്‍ കളി ഗംഭീരമാവും. എല്ലാവരും സ്വന്തം ശൈലിയിലേക്ക് വരും. അവരുടെ ഗെയിം പ്ലാന്‍ അനുസരിച്ച് കളിക്കാനാവും. അപ്പോള്‍ കളത്തിലെ മികവും അല്‍പ്പം ഭാഗ്യവുമുണ്ടെങ്കില്‍ ജയിച്ചു കയറാം.

അര്‍ജന്റീനയും ഫ്രാന്‍സും പ്രാഥമിക റൗണ്ടിലെ മൂന്ന് മല്‍സരങ്ങളിലും നേരിട്ട പ്രധാന പ്രശ്‌നം പ്രതിയോഗികളുടെ നെഗറ്റീവ് പ്ലാനുകളായിരുന്നു. ഐസ്‌ലാന്‍ഡായിരുന്നു മെസിയുടെ ടീമിന്റെ ആദ്യ എതിരാളി. ഐസ്‌ലാന്‍ഡിന്റെ ഗെയിം വ്യക്തമായിരുന്നു-ഏത് വിധേനയും അര്‍ജന്റീനിയന്‍ താരങ്ങളുടെ വഴി മുടക്കുക. ആ പ്ലാനില്‍ അര്‍ജന്റീനക്ക് സ്വന്തം ഗെയിം കളിക്കാന്‍ കഴിയുമായിരുന്നില്ല. ക്രൊയേഷ്യയായിരുന്നു രണ്ടാമത്തെ പ്രതിയോഗികള്‍. ആദ്യ മല്‍സരം ജയിച്ചതിനാല്‍ രണ്ടാം മല്‍സരത്തില്‍ സമനില ലക്ഷ്യമിട്ട് ലുക്കാ മോദ്രിച്ചിന്റെ സംഘം കളിച്ചപ്പോള്‍ അവിടെയും സ്വന്തം ഗെയിം അര്‍ജന്റീനക് നഷ്ടമായി. അവര്‍ കടന്നാക്രമണത്തിന് രണ്ടാം പകുതിയില്‍ തുനിഞ്ഞപ്പോഴാവട്ടെ മൂന്ന് ഗോള്‍ സ്വന്തം വലയില്‍ വീഴുകയും ചെയ്തു. നൈജീരിയക്കെതിരെയാണ് അര്‍ജന്റീന സ്വന്തം വേഗ ഗെയിമിലേക്ക് വന്നത്. അതിന് നൈജീരിയക്കും നന്ദി പറയണം. അവര്‍ക്കും ജയിക്കേണ്ട മല്‍സരമായതിനാല്‍ മെസിയെ മാത്രം ലക്ഷ്യമിട്ട്് അവര്‍ കളിച്ചില്ല. തുറന്ന് കിട്ടുന്ന അവസരങ്ങളെ പ്രയോജനപ്പെടുത്തുക എന്ന ഗെയിമിലേക്ക് പോയി. ഇവിടെയാണ് അര്‍ജന്റീനക്ക് ജയം വന്നത്. ഇന്ന് ഫ്രാന്‍സ് എതിരാളികളാവുമ്പോള്‍ ഒരിക്കലും ബോഡി ഗെയിം അവര്‍ കളിക്കില്ല. ഫ്രാന്‍സിന്റെ പരിശീലകന്‍ ദീദിയര്‍ ദെഷാംപ്‌സ് ടീം ഗെയിമില്‍ ശക്തമായി വിശ്വസിക്കുമ്പോള്‍ അവര്‍ പുറത്തെടുക്കുക അര്‍ജന്റീനയെ തടയുന്നതിന് പകരം സ്വന്തം ഗെയിമായിരിക്കും. അവിടയാണ് അര്‍ജന്റീനക്ക് സ്വന്തം പ്ലാന്‍ നടപ്പിലാക്കാന്‍ കഴിയുക. ഫ്രാന്‍സും പ്രാഥമിക റൗണ്ടില്‍ തപ്പിതടയാന്‍ കാരണം പ്രതിയോഗികളുടെ പിന്തിരിപ്പന്‍ ഗെയിമായിരുന്നു. ഓസ്ട്രേലിയയും പെറുവും ഡെന്മാര്‍ക്കും ഫ്രാന്‍സിനെതിരെ കളിച്ചത് പിടിച്ചുനില്‍ക്കല്‍ ഗെയിമായിരുന്നു. അര്‍ജന്റീന ആ വഴിക്ക് സഞ്ചരിക്കാതിരിക്കുമ്പോള്‍ പ്രൊഫഷണല്‍ ഫുട്‌ബോളിന്റെ ശക്തമായ സൗന്ദര്യം ഇന്ന് കാണാം.

അപ്പോള്‍ ആര് ജയിക്കും…? അവിടെയാണ് ഭാഗ്യമെന്ന ഘടകത്തിന്റെ സാന്നിദ്ധ്യം നിര്‍ബന്ധമാവുക. നിങ്ങള്‍ എത്ര മനോഹരമായി കളിച്ചാലും ഭാഗ്യമില്ലെങ്കില്‍ രക്ഷയില്ല. നൈജീരിയക്കെതിരെ മെസി നേടിയ ആ സുന്ദര ഗോളില്ലേ-അദ്ദേഹം കാല്‍മുട്ടിലാണ് എവര്‍ ബനേഗയുടെ ലോംഗ് ബോള്‍ സ്വീകരിക്കുന്നത്. കാല്‍മുട്ടില്‍ സോഫ്റ്റായി പന്ത് സ്വീകരിക്കുക പ്രയാസമാണ്. പന്ത് സ്വീകരിച്ച ശേഷമുള്ള ആ വെട്ടിത്തിരിയിലുണ്ടല്ലോ- അതിലാണ് മെസിയിലെ താരം അമാനുഷനായത്-അത് ഭാഗ്യമാണ്. പലപ്പോഴും കാല്‍മുട്ടില്‍ പന്ത് സ്വീകരിച്ച ശേഷം തൊട്ടരികിലുള്ള പ്രതിയോഗിയെ മറികടന്ന് പന്തുമായി വെട്ടിത്തിരിയാന്‍ കഴിയില്ല…
പൗളോ ഡിബാലെയിലെ താരത്തെ ഇത് വരെ സാംപോളി ആദ്യ ഇലവനിലേക്ക് കൊണ്ട് വന്നിട്ടില്ല. ഇന്ന് അത്തരത്തിലൊരു മാറ്റത്തിന് പരിശീലകന്‍ തയ്യാറായാല്‍ അതും അര്‍ജന്റീനക്ക് കരുത്താവും. ഗോണ്‍സാലോ ഹ്വീഗിന്‍ എന്ന സീനിയര്‍ താരത്തെക്കാള്‍ എത്രയോ വേഗവും മികവുമുണ്ട് ഡിബാലേക്ക്. മെസി മാര്‍ക്കിംഗിന് വിധേയനാവുമ്പോള്‍ ഒരു പക്ഷേ കുതറി കളിക്കാന്‍ ഡിബാലേക്ക് കഴിയും. അത്തരമൊരു മാറ്റത്തിലേക്ക് നിര്‍ണായക മല്‍സരത്തില്‍ കോച്ച് വരാന്‍ സാധ്യത കുറവാണ്. രണ്ട് ടീമുകളും തുടക്കത്തില്‍ സേഫ് ഗെയിമാവും കളിക്കുകയെന്നുറപ്പാണ്. ഒരു പക്ഷേ മല്‍സരം അധികസമയത്തേക്ക് ദീര്‍ഘിക്കാനാണ് സാധ്യതയും.

ഫ്രഞ്ച് സംഘത്തില്‍ ഒലിവര്‍ ജിറോര്‍ഡ് എന്ന മുന്‍നിരക്കാരനെ അര്‍ജന്റീന ഭയപ്പെടണം. കഴിഞ്ഞ മല്‍സരങ്ങളില്‍ ഫോമിലേക്കുയരാന്‍ അദ്ദേഹത്തിനായിട്ടില്ല. പക്ഷേ ഉയരക്കൂടുതലിനെ ഉപയോഗപ്പെടുത്തി ഹെഡ്ഡറില്‍ അദ്ദേഹം വില്ലനാവാനുള്ള സാധ്യത തള്ളിക്കളയരുത്. മെസിയുടെ ഫോമും ഭാഗ്യവും അനുകൂലമായാല്‍ ഒരു ഗോളിനെങ്കിലും അര്‍ജന്റീന ജയിക്കും. മെസി തളക്കപ്പെട്ടാല്‍ ഫ്രാന്‍സ് മല്‍സരം നേടും.

ഓരോ ടീമുകള്‍ക്കും നല്ല ദിവസങ്ങളുണ്ട്. ഉറുഗ്വേയുടെ നല്ല ദിവസം കഴിഞ്ഞുവോ എന്നാണ് എന്റെ സംശയം. റഷ്യക്കെതിരായ മല്‍സരത്തിലായിരുന്നു ലൂയിസ് സുവാരസിന്റെ സംഘം ഏറ്റവും മികച്ച കളി പുറത്തെടുത്തത്. മൂന്ന് ഗോളിന്റെ ആ ജയം അസമയത്തായിരുന്നോ എന്നൊരു തോന്നല്‍…. കാരണം ഓരോ ടീമിനും നല്ല ദിവസങ്ങള്‍ പ്രധാനമാണ്. പോര്‍ച്ചുഗലിന് ഇത് വരെ നല്ല ദിവസമുണ്ടായിട്ടില്ല. സ്‌പെയിനിനെതിരായ മല്‍സരത്തില്‍ ഭാഗ്യത്തിന്റെ തുണയിലും മൊറോക്കോ, ഇറാന്‍ എന്നിവര്‍ക്കെതിരെ അതിജീവനത്തിലും രക്ഷപ്പെട്ട ടീം അവരുടെ വേഗ തന്ത്രത്തില്‍ ഇത് വരെ പൂര്‍ണതലത്തില്‍ കളിച്ചിട്ടില്ല.

ഇന്ന് പോര്‍ച്ചുഗലിന്റെ ദിനമായാല്‍ ഉറുഗ്വേ ഇത് വരെ നേടിയ വിജയങ്ങള്‍ വെറുതെയാവും. കൃസ്റ്റിയാനോയെ മാത്രം തടയാന്‍ എന്തായാലും ഉറുഗ്വേ കോച്ച് ടബരേസ് തന്റെ താരങ്ങള്‍ക്ക് നിര്‍ദ്ദേശം നല്‍കില്ല. ലോകകപ്പിന് വന്ന 32 ടീമുകളിലെ പരിശീലകരില്‍ സീനിയറും എത്രയോ ലോകകപ്പുകള്‍ കണ്ടയാളുമാണ് ടബരേസ്. അദ്ദേഹം ടീം ഗെയിമില്‍ വിശ്വസിക്കുന്നു. സുവാരസിനും കവാനിക്കുമൊന്നും വലിയ സ്ഥാനം നിര്‍ദ്ദേശിക്കുകയുമില്ല. നേര്‍ വീപരീതമാണ് പോര്‍ച്ചുഗലിന്റെ കാര്യം. അവരുടെ വിശ്വാസവും പ്രതീക്ഷയുമെല്ലാം കൃസ്റ്റിയാനോയിലാണ്. മെസിയെക്കുറിച്ച് പറഞ്ഞത് പോലെ കൃസ്റ്റിയാനോ ഫോമിലേക്കുയര്‍ന്നാല്‍ പോര്‍ച്ചുഗലിനൊപ്പം വിജയമുണ്ടാവും. അദ്ദേഹം നിരാശപ്പെടുത്തിയാല്‍ ഉറുഗ്വേ ക്വാര്‍ട്ടറിലെത്തും.

സത്യത്തില്‍ ഇന്നത്തെ രണ്ട് മല്‍സരങ്ങളിലും ഒരു സമാനതയുണ്ട്. രണ്ട് ടീമുകള്‍ രണ്ട് സൂപ്പര്‍ താരങ്ങളെ കാര്യമായി ആശ്രയിക്കുന്നു. പ്രതിയോഗികള്‍ സംഘബലത്തിലും വിശ്വസിക്കുന്നു. അതായത് മെസിയും ഫ്രാന്‍സും തമ്മിലാണ് പോരാട്ടം. കൃസ്റ്റിയാനോയും ഉറുഗ്വേയും തമ്മിലും. ചിലപ്പോള്‍ ലോക ഫുട്‌ബോളിലെ രണ്ട് അതികായരുടെ പതനം ഇന്നുണ്ടായേക്കാം. ലോകകപ്പ് വേദിയില്‍ ഇനി മെസിയെയും കൃസ്റ്റിയാനോയെയും ഒരു പക്ഷേ കണ്ടെന്നും വരില്ല. സൂപ്പര്‍ താരങ്ങള്‍ വിജയിക്കുമോ അതോ ടീം കരുത്ത് വിജയിക്കുമോ…? കാത്തിരിക്കാം.

മികവും ഭാഗ്യവും മൈതാനത്തെ ഇരട്ടകളാണ്. മികവിനൊപ്പം ഭാഗ്യവുമുണ്ടെങ്കിലേ വിജയശ്രീലാളിതരാവാന്‍ കഴിയു എന്ന സത്യത്തിന് കാലപ്പഴക്കമുണ്ട്. ലോക ഫുട്‌ബോളിനെ ഭരിച്ച എത്രയോ മികച്ച താരങ്ങളുണ്ടായിരുന്നു. അവരില്‍ പലര്‍ക്കും ലോകകപ്പ് എന്നത് കിട്ടാക്കനിയാവാന്‍ കാരണം അവരോ, അവരുടെ ടീമോ നിര്‍ണായക വേളകളില്‍ നിര്‍ഭാഗ്യവാന്മാരായത് കൊണ്ടായിരുന്നു. ഹംഗറിയുടെ ഫ്രാങ്ക് പുഷ്‌ക്കാസ്, ഹോളണ്ടിന്റെ യോഹാന്‍ ക്രൈഫ് തുടങ്ങിയവരുടെ പേരിലൊന്നും ലോകകപ്പില്ല. അവരുടെ കാലഘട്ടത്തിലെ അതികായന്മരായിട്ടും നിര്‍ഭാഗ്യ വഴിയില്‍ അവരെല്ലാം വലിയ വേദിയില്‍ നിന്നും നിഷ്‌കാസിതരാവുകയായിരുന്നു. ഇന്നലെ ഇറാനെ നോക്കു-പോര്‍ച്ചുഗലിനെതിരെ അവര്‍ വിജയം അര്‍ഹിച്ചിരുന്നു. സ്‌പെയിനിനെതിരെ ഞെട്ടിക്കുന്ന പ്രകടനമല്ലേ മൊറോക്കോ നടത്തിയത്. രണ്ട് പേരും സമനിലയായിരുന്നില്ല അര്‍ഹിച്ചത്-വിജയം തന്നെയായിരുന്നു. പക്ഷേ ഭാഗ്യവഴിയില്‍ അവരില്ലായിരുന്നു.

പോര്‍ച്ചുഗലിനെയു ഇറാനെയും ഒരു തരത്തിലും താരതമ്യം ചെയ്യാന്‍ കഴിയില്ല. കൃസ്റ്റിയാനോ റൊണാള്‍ഡോയുടെ ടീം യൂറോപ്പിലെ ചാമ്പ്യന്മാരാണ്. സി.ആര്‍-7 ലോകത്തിലെ ഏറ്റവും മികച്ച ഫുട്‌ബോളര്‍മാരില്‍ ഒരാള്‍. ഫിഫ റാങ്കിംഗും ഫുട്‌ബോള്‍ പാരമ്പര്യവുമെല്ലാം പരിശോധിച്ചാല്‍ രണ്ട് പേരും തമ്മില്‍ ആനയും ഉറുമ്പും തമ്മിലുളള അന്തരമുണ്ട് പക്ഷേ കളിക്കളത്തില്‍ ഇറാന്‍ അക്ഷരാര്‍ത്ഥത്തില്‍ മിന്നുന്ന പ്രകടനമാണ് നടത്തിയത്. ചെറിയ ടീമുകള്‍ക്കെല്ലാം പതിവായി സംഭവിക്കുന്ന പിഴവ് അവരെയും ബാധിച്ചു-എതിര്‍ പെനാല്‍ട്ടി ബോക്‌സില്‍ വരെ മിന്നലോട്ടം നടത്തി അവിടെ കുരുങ്ങി നില്‍ക്കുന്നു. പോര്‍ച്ചുഗീസ് താരങ്ങളുടെ സമീപനത്തിലെ നെഗറ്റീവിസം തന്നെ ഇറാന്റെ കരുത്തായിരുന്നു. കൃസ്റ്റിയാനോ പോലും വേണ്ടാത്ത നീക്കങ്ങള്‍ക്ക്് മുതിര്‍ന്നു. അദ്ദേഹം ചുവപ്പ് അര്‍ഹിച്ച പാതകമാണ് ചെയ്തത്. ഒരു വേള ടെലിവിഷന്‍ റഫറിയിലേക്ക്് കാര്യങ്ങള്‍ പോയപ്പോള്‍ അദ്ദേഹമത് ഭയപ്പെടുകയും ചെയതിരുന്നു. പക്ഷേ കഴിഞ്ഞ മല്‍സരങ്ങളില്ലെല്ലാം മാന്യനായി കളിച്ച സീനിയര്‍ താരം എന്ന നിലയിലാവാം അത് മഞ്ഞയില്‍ നിയന്ത്രിക്കപ്പെട്ടത്. കൃസ്റ്റിയാനോക്ക് ചുവപ്പായിരുന്നു ലഭിച്ചതെങ്കിലോ-പോര്‍ച്ചുഗല്‍ ടീമിന്റെ ഭാവിയും ഇരുളടയുമായിരുന്നു. പെനാല്‍ട്ടിയെന്നത് ഭാഗ്യമാണെന്ന സത്യം കൃസ്റ്റിയാനോ തന്നെ തെളിയിച്ചില്ലേ….. വെറുതെ മെസിയെ കുറ്റപ്പെടുത്തുന്നവര്‍ ഓര്‍ക്കുക-ഈ സ്‌പോട്ട് കിക്കുകള്‍ ഭാഗ്യമാണ്. ഇതേ കൃസ്റ്റിയാനോ സ്‌പെയിനിനെതിരായ മല്‍സരത്തില്‍ പായിച്ച അവസാന മിനുട്ടിലെ ആ ഫ്രീകിക്ക് ഓര്‍ക്കുക-ഡേവിഡ് ഡി ഗിയ എന്ന സ്പാനിഷ് ഗോള്‍ക്കീപ്പറെ നിശ്ചലനാക്കി, സെര്‍ജിയോ റാമോസും സംഘവും തീര്‍ത്ത പ്രതിരോധ മതിലും തകര്‍ത്താണ് ആ ബോള്‍ വലയില്‍ എത്തിയത്. അതേ താരത്തിന് പക്ഷേ ഇറാനിയന്‍ ഗോള്‍ക്കീപ്പര്‍ മാത്രം മുന്നില്‍ നില്‍ക്കെ പിഴച്ചതിന് കാരണം സമ്മര്‍ദ്ദം തന്നെയാണ്. കൃസ്റ്റിയാനോ നാല് ഗോളുകളുമായി മുന്നേറുന്ന സമയമാണ്. ആ പെനാല്‍ട്ടി ഗോളാക്കിയിരുന്നെങ്കില്‍ അദ്ദേഹത്തിന് ഹാരി കെയിനൊപ്പം അഞ്ചില്‍ എത്താമായിരുന്നു. പക്ഷേ അദ്ദേഹത്തിന്റെ കിക്ക് ഇറാനിയന്‍ ഗോള്‍ക്കീപ്പര്‍ ചാടിയ അതേ ആങ്കിളിലായി. അവിടെ ഗോള്‍ക്കീപ്പര്‍ ഭാഗ്യവാനും ഷോട്ട് പായിച്ച താരം നിര്‍ഭാഗ്യവാനുമായി. ഓര്‍ക്കേണ്ട മറ്റൊരു കാര്യം ആ ഗോള്‍ക്കീപ്പര്‍ ഒരു അനാഥ ബാല്യമാണ്. ഇല്ലായ്മകളില്‍ നിന്നും വന്ന താരം. അവനാണ് ലോകത്തിലെ മികച്ച ഫുട്‌ബോളറെ സ്തംബ്ധനാക്കിയത്.

വേഗമുണ്ട് ഇറാന്, തന്ത്രമുണ്ട് ഇറാന്-ലക്ഷ്യബോധമാണ് കുറഞ്ഞത്. അതുണ്ടെങ്കില്‍ ഈ ടീം വരും നാളുകളില്‍ ശക്തരായി മുന്നേറും. സ്‌പെയിന്‍ ടീം നിരയെടുക്കുക-എല്ലാവരും ലോകോത്തരക്കാര്‍. എല്ലാവരും യൂറോപ്പിലെ വന്‍കിട ക്ലബുകള്‍ക്കായി കളിക്കുന്നവര്‍. എല്ലാവരും രാജ്യാന്തര ഫുട്‌ബോളില്‍ അമ്പതിലധികം മല്‍സരം കളിച്ചവര്‍. പലരും മൂന്നാമത്തെ ലോകകപ്പ് കളിക്കുന്നവര്‍. എന്നിട്ടും മൊറോക്കോയെ പോലെ ഒരു ടീമിനെതിരെ അവര്‍ വിറച്ചുനിന്നു. മൊറോക്കോ ചാമ്പ്യന്‍ഷിപ്പിലെ ഏറ്റവും വലിയ നിര്‍ഭാഗ്യവാന്മാരാണ്. ആദ്യ മല്‍സരത്തില്‍ നന്നായി കളിച്ചിട്ടും ഇറാനോട് അവസാന മിനുട്ടിലെ സെല്‍ഫ് ഗോളില്‍ പരാജയപ്പെട്ടു. രണ്ടാം മല്‍സരത്തില്‍ പോര്‍ച്ചുഗലിനെ വിറപ്പിച്ചു വിട്ടു, അവസാന മല്‍സരത്തില്‍ സ്‌പെയിനുമായി 2-2 സമനില. ഒരു ഘട്ടത്തില്‍ അവര്‍ വിജയത്തിന് അരികില്‍ പോലുമെത്തിയിരുന്നു. മുന്‍ ലോക ചാമ്പ്യന്മാര്‍ക്കെതിരെ ഒരു ആഫ്രിക്കന്‍ ടീം ഇത്തരത്തില്‍ പ്രകടിപ്പിക്കുന്ന മികവിനെ എത്ര അഭിനന്ദിച്ചാലും അധികമാവില്ല. സ്‌പെയിനും പോര്‍ച്ചുഗലും സ്വന്തം ഗ്രൂപ്പില്‍ നിന്ന് യോഗ്യത നേടിയെങ്കിലും അവരത് അര്‍ഹിച്ചിരുന്നോ എന്ന ചോദ്യത്തിന് പ്രസക്തിയുണ്ട്. കളിച്ച മൂന്ന് മല്‍സരങ്ങളിലും ഇവരുടെ നിലവാരം പകുതിയായിരുന്നു. ആദ്യ മല്‍സരത്തില്‍ സ്‌പെയിനും പോര്‍ച്ചുഗലും മുഖാമുഖം വന്നപ്പോള്‍ പോലും ആറ് ഗോളിലും (3-3) മല്‍സരം ശരാശരി മാത്രമായിരുന്നു.

റഷ്യയുടെ തോല്‍വി അവര്‍ക്കുള്ള ഷോക്കാണ്. ലോകകപ്പ് ആരംഭിക്കുന്നതിന് മുമ്പ് ഇതായിരുന്നു റഷ്യ-അലസമായി കളിച്ചവര്‍. പക്ഷേ ലോകകപ്പിലെ ആദ്യ രണ്ട് മല്‍സരങ്ങളില്‍ മിന്നിയപ്പോള്‍ എട്ട് ഗോളുകള്‍ സ്‌ക്കോര്‍ ചെയ്തു. ഉറുഗ്വേക്കെതിരെ ഇന്നലെ കളിച്ചപ്പോഴാവട്ടെ പഴയ റഷ്യക്കാരായി. എന്തായാലും പ്രി ക്വാര്‍ട്ടറില്‍ സ്‌പെയിനുമായി കളിക്കുമ്പോള്‍ മെച്ചപ്പെടാത്തപക്ഷം പണി പാളും. സഊദിക്കാര്‍ മാനം കാത്തു. ആദ്യ മല്‍സരത്തില്‍ അഞ്ച് ഗോള്‍ വാങ്ങിയവര്‍ അവസാന മല്‍സരത്തില്‍ വലിയ വിജയവുമായാണ് മടങ്ങിയിരിക്കുന്നത്. അവിടെ ഒരു വേദനയായി മുഹമ്മദ് സലാഹ്. ഇംഗ്ലീഷ് പ്രീമിയര്‍ ലീഗിലും യുവേഫ ചാമ്പ്യന്‍സ് ലീഗിലും ലിവര്‍പൂളിന് വേണ്ടി മിന്നിയ മുന്‍നിരക്കാരന്‍. കീവിലെ ആ ഫൈനലില്‍ സെര്‍ജിയോ റാമോസിന്റെ ഫൗള്‍ കെണിയില്‍ അകപ്പെട്ട് പരുക്കില്‍ തളര്‍ന്ന സലാഹ്….. റാമോസിന് ആര്് മാപ്പ് നല്‍കിയാലും ഈജിപ്ഷ്യന്‍ ജനത മാപ്പ് നല്‍കില്ല. കാരണം അത്രമാത്രം പ്രതീക്ഷകള്‍ അവര്‍ക്ക് സലാഹിലുണ്ടായിരുന്നു. ആ താരമാണ് വേദനയില്‍ മങ്ങി തലയും താഴ്ത്തി മടങ്ങിയത്. എങ്കിലും ഇസാം ഹദാരിയെന്നെ 45 കാരനായ ഗോള്‍ക്കീപ്പര്‍ ഈജിപ്തിന്റെ അടയാളമാണ്….. ആ പ്രായത്തിലും ലോകകപ്പ് കളിച്ചുവെന്ന് മാത്രമല്ല ഒരു പെനാല്‍ട്ടി തടഞ്ഞിടുകയും ചെയ്തല്ലോ….

ഇന്ന് അര്‍ജന്റീന…. കഴിഞ്ഞ രണ്ട് കളികളാണ് സാക്ഷിയെങ്കില്‍ ഇന്ന് ലയണല്‍ മെസിയുടെ സംഘത്തിന് കാര്യങ്ങള്‍ കടുപ്പമാവും. പക്ഷേ മെസിയിലെ പ്രതിഭക്ക് ലോക വേദിയില്‍ പലതും തെളിയിക്കാനുണ്ട്. അവിടെയാണ് അര്‍ജന്റീനയുടെ പ്രതീക്ഷയും.

തുല്യ ദു:ഖിതരാണ് ലണയല്‍ മെസിയും റോബര്‍ട്ടോ ലെവന്‍ഡോവിസ്‌ക്കിയും. ലോക ഫുട്‌ബോളിലെ രണ്ട് മികച്ച താരങ്ങള്‍. പക്ഷേ സ്വന്തം ടീമന്റെ ദയനീയതയില്‍, വ്യക്തിഗതമായി ഒരു ചലനവും സൃഷ്ടിക്കാന്‍ കഴിയാതെ രണ്ട് പേരും ഖിന്നരാണ്. അര്‍ജന്റീന രണ്ട് മല്‍സരങ്ങള്‍ പിന്നിട്ടപ്പോള്‍ മെസി സ്പര്‍ശം മൈതാനങ്ങളില്‍ കണ്ടില്ല. പോളണ്ട് രണ്ട് കളികളിലും തോറ്റ് പുറത്തായിരിക്കുന്നു. ലോകകപ്പ് യോഗ്യതാ റൗണ്ടില്‍ രാജ്യത്തിനായി 16 ഗോളുകള്‍ സ്‌ക്കോര്‍ ചെയ്ത ലെവന്‍ഡോവിസ്‌ക്കിയാവട്ടെ രണ്ട് കളിയിലും നിസ്സഹായനായിരുന്നു. ബാര്‍സിലോണ എന്ന ക്ലബിനായി തകര്‍ത്തു കളിക്കുമ്പോള്‍ മെസിക്ക് പന്ത് യഥേഷ്ടം നല്‍കാന്‍ ഇനിയസ്റ്റയും സംഘവുമുണ്ട്. ബയേണിലാണ് ലെവന്‍ഡോവിസ്‌ക്കി. ജര്‍മന്‍ ബുണ്ടസ്‌ലീഗില്‍ ബയേണ്‍ തകര്‍ക്കുമ്പോള്‍ ആര്‍ജന്‍ റൂബനും ഫ്രാങ്ക് റിബറിയുമെല്ലാമുണ്ട് ലെവന്‍ഡോവിസ്‌ക്കിക്ക് പന്ത് എത്തിക്കാന്‍. ദേശീയ നിരയിലേക്ക് വരുമ്പോള്‍ ആരുമില്ലാത്ത അവസ്ഥ.

ഈ ലോകകപ്പിന്റെ നഷ്ടമാണ് ലെവന്‍ഡോവിസ്‌ക്കി. മാസ്മരികമായി സ്‌ക്കോര്‍ ചെയ്യുന്ന ഒരു മുന്‍നിരക്കാരന്‍. പോളണ്ടിന്റെ രണ്ട് മല്‍സരങ്ങള്‍ ഞാന്‍ കണ്ടു-ലെവന്‍ഡോവിസ്‌ക്കി കാഴ്ച്ചക്കാരന്റെ റോളിലായിരുന്നു-മെസിയെ പോലെ. സെനഗലുമായുളള അങ്കത്തില്‍ മൂന്ന് തവണ മാത്രമായിരുന്നു ലെവന്‍ഡോവിസ്‌ക്കിക്ക് പന്ത് കിട്ടിയത്. ആ സമയത്താവട്ടെ അദ്ദേഹത്തിന് ബോക്‌സിലേക്ക് പ്രവേശിക്കാന്‍ പോലും കഴിഞ്ഞില്ല. കൊളംബിയയോട് മൂന്ന് ഗോളാണ് പോളണ്ട് വഴങ്ങിയത്. യൂറോപ്യന്‍ ഫുട്‌ബോള്‍ പരിശോധിച്ചാലറിയാം പോളണ്ടുകാരുടെ മന:ക്കരുത്ത്. മറ്റൊരു യൂറോപ്യന്മാര്‍ക്കുമില്ലാത്ത ആത്മവീര്യത്തില്‍ കളിക്കുന്നവരാണവര്‍. ഫുട്‌ബോളില്‍ പോളിഷ് ഹുങ്ക് എന്നൊരു പ്രയോഗം തന്നെയുണ്ട്. മൈതാനത്ത് ഹുങ്ക് പ്രകടിപ്പിക്കുമ്പോഴും അവര്‍ ജയിച്ച് വരാറുണ്ടായിരുന്നു. ഇവിടെ അവര്‍ കളിച്ച രണ്ട് മല്‍സരങ്ങളിലും അത് കണ്ടില്ല. കൊളംബിയക്കാരുടെ തിരിച്ചുവരവ് പക്ഷേ ശക്തരായാണ്. പവര്‍ ഫുട്‌ബോളാണ് അവര്‍ യൂറോപ്പിനെതിരെ പുറത്തെടുത്തത്. മൂന്ന് ഗോളുകളും ഉഗ്രന്‍ ഗോളുകളായിരുന്നു. ഫല്‍ക്കാവോ നേടിയ ഗോളാവട്ടെ ടീമിനെ പ്രചോദിപ്പിക്കുകയും ചെയ്യും. ജെയിംസ് റോഡ്രിഗസ് എന്ന കഴിഞ്ഞ ലോകകപ്പിലെ താരം പരുക്കില്‍ നിന്നും മുക്തനായി മധ്യനിരയിലെ തന്റെ റോള്‍ ആസ്വദിക്കുന്നുണ്ട്.

ഇവര്‍ കളിക്കുന്ന ഗ്രൂപ്പ് എച്ചാണ് സങ്കീര്‍ണം. പോളണ്ട് മാത്രമേ പുറത്തായിട്ടുള്ളു. ജപ്പാനും കൊളംബിയക്കും സെനഗലിനും തുല്യ സാധ്യതയാണ്. ജപ്പാന്‍ വീണ്ടും അല്‍ഭുതപ്പെടുത്തി. ആദ്യ മല്‍സരത്തില്‍ കൊളംബിയയെ പരാജയപ്പെടുത്തിയത് ഫഌക്കല്ല എന്ന് തെളിയിച്ചാണ് സെനഗലിനെതിരെ രണ്ട് വട്ടം പിറകിലായിട്ടും തിരിച്ചുവന്ന് 2-2 ല്‍ എത്തിയത്. ഇതോടെ ഗ്രൂപ്പിലവര്‍ക്ക് നാല് പോയിന്റായിരിക്കുന്നു. സെനഗലാവാട്ടെ പോളണ്ടിനെ തോല്‍പ്പിച്ചവരെന്ന ഖ്യാതിയിലായിരുന്നു ജപ്പാനെതിരെ ഇറങ്ങിയത്. സാദിയോ മാനേയുടെ ഗോളില്‍ ഭാഗ്യലീഡ് നേടിയ ടീമിന് പക്ഷേ ജപ്പാന്റെ പോരാട്ടവീര്യമാണ് വിനയായത്. സെനഗലിനുമുണ്ട് നാല് പോയിന്റ്. കൊളംബിയക്കാര്‍ പോളണ്ടിനെ തോല്‍പ്പിച്ചത് വഴി മൂന്ന് പോയന്റില്‍ നില്‍ക്കുന്നു. 28 നാണ് ഈ ഗ്രൂപ്പിലെ അവസാന മല്‍സരങ്ങള്‍. അന്നത്തെ അങ്കങ്ങളെല്ലാം തീപ്പോരാട്ടങ്ങളാണ്. സെനഗല്‍-കൊളംബിയ മല്‍സരമായിരിക്കും വിധി നിര്‍ണയിക്കുക.

പാനമക്കെതിരെ ഇംഗ്ലണ്ടിന്റെ വിജയം പ്രതീക്ഷിച്ചത് മാത്രമാണ്. ആറ് ഗോളിന്റെ ജയം പക്ഷേ അല്‍ഭുതവുമായി. ഹാരി കെയിന്‍ എന്ന നായകനെ സൂക്ഷിക്കേണ്ടിയിരിക്കുന്നു. അഞ്ച് ഗോളുകള്‍ അദ്ദേഹം സ്‌ക്കോര്‍ ചെയ്തു. കഴിഞ്ഞ സീസണില്‍ ഇംഗ്ലീഷ് പ്രീമിയര്‍ ലീഗില്‍ ടോട്ടനത്തിനായി ഗോള്‍വേട്ട നടത്തുന്നത് പോലെയാണ് അദ്ദേഹം ഗോളടിക്കുന്നത്. പാനമക്കെതിരെ രണ്ട് പെനാല്‍ട്ടി ഉള്‍പ്പെടെയാണ് മൂന്ന് ഗോളുകള്‍. ടൂണീഷ്യക്കെതിരെ രണ്ട് ഗോളുകളും. ലോകകപ്പിലെ ആദ്യ ഇംഗ്ലീഷ് ഹാട്രിക്കുകാരന്‍ എന്ന ബഹുമതിയും അദ്ദേഹത്തെ തേടി വന്നിരിക്കുന്നു. ജെസി ലിന്‍ഗാര്‍ഡും റഹീം സ്‌റ്റെര്‍ലിംഗും റാഷ്‌ഫോര്‍ഡുമെല്ലാം ഉള്‍പ്പെട്ട യുവസംഘത്തിന്റെ കളി അപാരമാണ്. പാനമക്ക് ആശ്വസിക്കാം-അവര്‍ ലോകകപ്പില്‍ കളിക്കാന്‍ മാത്രം വന്നവരാണ്. കന്നി ലോകകപ്പില്‍ തന്നെ ഫിലിപ്പ് ബലോയിലൂടെ അവര്‍ ചരിത്രവും കുറിച്ചല്ലോ-ലോകകപ്പിലെ ആദ്യപാനമ ഗോള്‍ സ്‌ക്കോറര്‍ എന്നത് തനിക്ക് ലോകകപ്പ് ലഭിച്ച ബഹുമതി പോലെയാണെന്ന് ബലോയി തന്നെ പറഞ്ഞിരിക്കുന്നു.

ഇനി പ്രാഥമിക ഗ്രൂപ്പിലെ അവസാന പോരാട്ടങ്ങളാണ്. ഇന്ന് മുതല്‍ ഗ്രൂപ്പ് മല്‍സരങ്ങളെല്ലാം ഒരേ സമയം. ഗ്രൂപ്പ് മല്‍സരങ്ങള്‍ അവസാനിക്കുമ്പോള്‍ വലിയ കണ്‍ഫ്യൂഷന്‍ ഗ്രൂപ്പ് എച്ചിലാണ്. പോളണ്ട് ഒഴികെ ഗ്രൂപ്പിലെ മൂന്ന് പേര്‍ക്കും-ജപ്പാന്‍, സെനഗല്‍, കൊളംബിയ ടീമുകള്‍ക്ക്് വ്യക്തമായ സാധ്യതയാണ്. കളിച്ച രണ്ട് മല്‍സരങ്ങളും തോറ്റ പോളണ്ട് പുറത്തായിരിക്കുന്നു. അവര്‍ക്ക് പക്ഷേ ജപ്പാന്റെ വഴി തടയാനാവും. കൊളംബിയയെ തോല്‍പ്പിക്കുകയും സെനഗലിനെ 2-2 ല്‍ തളക്കുകയും ചെയ്ത സമുറായികള്‍ക്ക് നാല് പോയിന്റുണ്ട്. പോളണ്ടിനെതിരെ സമനില നേടിയാല്‍ യോഗ്യത നേടാം. ഏഷ്യയില്‍ നിന്ന് എല്ലാവരും പുറത്തേക്കായി നില്‍ക്കുമ്പോള്‍ ജപ്പാനാണ് വലിയ പ്രതീക്ഷ.

സെനഗലിനും നാല് പോയിന്റുണ്ട്. അവര്‍ പോളണ്ടിനെ പരാജയപ്പെടുത്തി, ജപ്പാനോട് സമനില വഴങ്ങി. അവര്‍ക്കും അവസാന പോരാട്ടത്തില്‍ കൊളംബിയയുമായി സമനില മതി. പക്ഷേ കൊളംബിയക്ക് മൂന്ന് പോയിന്റാണുള്ളത്. അവര്‍ക്ക് വിജയമാണ് പ്രധാനം. ജയിച്ചാല്‍ കൊളംബിയക്ക് പ്രയാസങ്ങളില്ല. കൊളംബിയ-സെനഗല്‍ പോരാട്ടം തുല്യശക്തികളുടേതാണ്. അതായിരിക്കും അതിനിര്‍ണായകം. ഗ്രൂപ്പ് എയില്‍ തീരെ കണ്‍ഫ്യൂഷനില്ല. ബിയില്‍ ഇറാന് പോര്‍ച്ചുഗലിനെ തോല്‍പ്പിച്ചാല്‍ മാത്രം സാധ്യത. സിയില്‍ നിന്ന് ഫ്രാന്‍സ് യോഗ്യത നേടിയിരിക്കുന്നു. ഡെന്മാര്‍ക്കിനാണ് അടുത്ത സാധ്യത. ഡിയില്‍ നിന്നും ക്രൊയേഷ്യ വരുന്നു. രണ്ടാം ടീമിനെ ഇന്നറിയാം. നൈജീരിയക്കും അര്‍ജന്റീനക്കും ഐസ് ലാന്‍ഡിനും സാധ്യത നിലനില്‍ക്കുന്നു. ഇ യില്‍ കോസറ്റാറിക്ക പുറത്തായി. ബ്രസീലിനും സ്വിറ്റ്‌സര്‍ലാന്‍ഡിനും സെര്‍ബിയക്കും സാധ്യതയുണ്ട്. എഫില്‍ കൊറിയ പുറത്തായപ്പോള്‍ മെക്‌സിക്കോ സീറ്റ് ഉറപ്പാക്കി. രണ്ടാം ടീമായി ജര്‍മനിക്കാണ് സാധ്യത. പക്ഷേ സ്വീഡന് നേരിയ സാധ്യത നിലനില്‍ക്കുന്നു. ജിയില്‍ നിന്നും ഇംഗ്ലണ്ട്, ബെല്‍ജിയം യോഗ്യത നേടിക്കഴിഞ്ഞു. ഗ്രൂപ്പ് ചാമ്പ്യന്മാരെ മാത്രമാണ് അറിയാനുള്ളത്.