ലഡാക്ക് ട്രിപ്പിന്റെ വിശേഷങ്ങളും സാങ്കേതിക, സാമ്പത്തിക കാര്യങ്ങളുമറിയാന്‍ നിരവധി പേര്‍ തന്നെ സമീപിക്കുന്നതായി ലാലു പറയുന്നു. അത്തരക്കാര്‍ക്കു വേണ്ടി തന്റെ യാത്രയുടെ വിശദാംശങ്ങളും പ്രധാന അനുഭവങ്ങളും ചുരുക്കി വിവരിച്ചിരിക്കുകയാണ് ലാലു തന്റെ പുതിയ പോസ്റ്റില്‍. (യാത്രാപ്രിയര്‍ക്ക്, അതും ഒരല്‍പം സാഹസികത ഇഷ്ടമുള്ളവര്‍ക്ക് ഉപകാര പ്രദമായ കാര്യങ്ങള്‍ ഉള്‍ക്കൊള്ളുന്ന പോസ്റ്റും, നബീലുമായി സംസാരിച്ച് ചേര്‍ത്ത ചില കാര്യങ്ങളുമായിട്ടാണ് ഈ ലേഖനം തയ്യാറാക്കിയിരിക്കുന്നത്.)

18 കാരന്‍ ലഡാക്ക് പോയപ്പോള്‍ കിട്ടിയ വിവരങ്ങള്‍

പല കൂട്ടുകാരും അന്വേഷിക്കുന്ന കാര്യമാണ് ലഡാക്ക് ട്രിപ്പിന് എത്ര ബഡ്ജറ്റ് ആയി എന്ന്. എന്നെ സംബന്ധിച്ചിടത്തോളം വളരെ കുറഞ്ഞ ബഡ്ജറ്റിലാണ് ലഡാക്കില്‍ പോയി വന്നത്. അതിന് കാരണം എന്റെ നല്ല കൂട്ടുകാര്‍ തന്നെ.

1. മൈലേജ്:
ഇത്രയധികം ദൂരം ബൈക്കില്‍ യാത്ര ചെയ്യുമ്പോള്‍ പ്രധാന ചെലവ് ഇന്ധനം (പെട്രോള്‍) ആയിരിക്കും. വണ്ടിയുടെ സ്വാഭാവിക മൈലേജ് കണക്കുകൂട്ടി ഒരു ബഡ്ജറ്റ് നേരത്തെ തയ്യാറാക്കാന്‍ കഴിയുകയില്ല താനും. ഉദാഹരണത്തിന്, എന്റെ വണ്ടിക്ക് (ഹോണ്ട ഡിയോ) സാധാരണ ഗതിയിലുള്ള ഇന്ധനക്ഷമത 49 കിലോമീറ്ററിനും 53-നുമിടയിലാണ്. പക്ഷേ, ഈ മൈലേജ് മണാലിയില്‍ നിന്ന് കയറിയാല്‍ കിട്ടുകയില്ല; അത് 25നു താഴെ ആയി കുറഞ്ഞു; കാരണം ഓക്‌സിജന്റെ കുറവ് തന്നെ. ആകെ മൊത്തം, പെട്രോളിന് മാത്രം ഏകദേശം 15,000 രൂപയില്‍ താഴെയാണ് എനിക്ക് ചെലവ് വന്നത്.
പെട്രോളിന് പല സംസ്ഥാനങ്ങളിലും പല വിലയാണ്. ലിറ്ററിന് 62 രൂപ മുതല്‍ 80 രൂപ വരെ ഞാന്‍ പെട്രഓള്‍ അടിച്ചിട്ടുണ്ട്. മാഹി, ഗോവ, ഡല്‍ഹി എന്നിവിടങ്ങളിലാണ് ഏറ്റവും കുറവ്. ഇത്തരം സ്ഥലങ്ങളില്‍ നിന്ന് ഫുള്‍ടാങ്ക് അടിക്കുന്നതിനൊപ്പം കുറച്ച് സ്റ്റോക്ക് ചെയ്യുന്നതും നല്ലതാണ്.

2. ഭക്ഷണം:
യാത്രയില്‍ ഒഴിവാക്കാന്‍ പറ്റാത്ത ഘടകമാണല്ലോ ഭക്ഷണം. കേരളം കഴിഞ്ഞാല്‍ ഭക്ഷണത്തിന്റെ കാര്യം ഒക്കെ ഒരു കണക്കാണ്. പലയിടത്തം റൈഡേഴ്‌സിന് മാത്രമായി പ്രത്യേക വില തന്നെയാവും. അതുകൊണ്ട് ആദ്യം തന്നെ വില അന്വേഷിച്ചതിനു ശേഷം ഭക്ഷണം തെരഞ്ഞെടുക്കുന്നതാവും നല്ലത്. ഒരു റൊട്ടിക്ക് ഏഴ് രൂപ മുതല്‍ 25 രൂപ വരെ നല്‍കേണ്ടി വന്നിട്ടുണ്ട്. ഭക്ഷണത്തിനു മാത്രം 7000 രൂപയോളം എനിക്ക് ചെലവായി.

3. താമസം:
താമസത്തിന് റൂമെടുക്കുന്നതാവും നല്ലത്. ടെന്റ് അത്ര സുരക്ഷിതമാണെന്ന് തോന്നുന്നില്ല. മുന്‍കൂട്ടി ഓണ്‍ലൈന്‍ വഴി റൂം ബുക്ക് ചെയ്യുന്നത് വളരെ നല്ലതാണ്. ഞാന്‍ കുറഞ്ഞ വിലയുടെ റൂമുകളാണ് തെരഞ്ഞെടുത്തത്. ഏറ്റവും വില കൂടിയ റൂമിന് എനിക്ക് ചെലവായത് 700 രൂപ മാത്രം. മണാലിയില്‍ നിന്ന് ലേയിലേക്കുള്ള ഹൈവേയില്‍ പ്രദേശവാസികളുടെ ടെന്റും വളരെ കുറഞ്ഞ വിലക്ക് ലഭിക്കും. ഒരാള്‍ക്ക് 100 മുതല്‍ 150 വരെ ഒക്കെയാണ് ടെന്റിന് ഈടാക്കുന്നത്. ഏതായാലും താമസ സൗകര്യം തെരഞ്ഞെടുക്കുമ്പോള്‍ വില പേശി മാത്രം എടുക്കുക.

4. ലൈറ്റ്:
വണ്ടിയില്‍ അത്യാവശ്യമുള്ള ഒരു എക്‌സ്ട്രാ ഫിറ്റിങ് ഉപകരണം ആണ് അഡീഷണല്‍ ലൈറ്റ്. എന്റെ അനുഭവത്തില്‍, യെല്ലോ ലാംപിനേക്കാളും കൂടുതല്‍ സഹായകമായത് ഫോഗ് ലാംപ് ആണ്. (തീര്‍ത്തും വ്യക്തിപരമായ അനുമാനം.)

5. സിം കാര്‍ഡ്:
ജമ്മു കശ്മീരില്‍ പോസ്റ്റ് പെയ്ഡ് സിം മാത്രമേ വര്‍ക്ക് ചെയ്യുക ഉള്ളൂ. ബി.എസ്.എന്‍.എല്‍, എയര്‍ടെല്‍ എന്നിവയുടെ പോസ്റ്റ്‌പെയ്ഡ് ഉണ്ട്. ഇവയില്‍ ഇന്റര്‍നെറ്റിന്റെ ആവശ്യത്തിന് പ്രത്യേകം റീചാര്‍ജ് ചെയ്യേണ്ടി വരും. നമ്മുടെ നാട്ടിലെ ബി.എസ്.എന്‍.എല്‍ ഓഫീസില്‍ നിന്ന് 600 രൂപ അടച്ച് പോസ്റ്റ്‌പെയ്ഡ് സിം വാങ്ങാം. പിന്നെ, യാത്രയിലുടനീളം അംബാനി നമ്മുടെ കൂട്ടിനുണ്ട്. കശ്മീരൊഴികെ എല്ലാ സ്റ്റേറ്റിലും ജിയോ ഉണ്ട്.

6. ലഗ്ഗേജ്:
യാത്രയില്‍ ലഗ്ഗേജ് പരമാവധി കുറക്കുക. കാരണം വണ്ടിക്കും നിങ്ങള്‍ക്കും അത് കൂടുതല്‍ ഉപകാരം ചെയ്യും. സമുദ്രനിരപ്പില്‍ നിന്ന് ഉയരത്തിലേക്ക് (ഹൈ ആള്‍ട്ടിറ്റിയൂഡ്) പോകുംതോറും വണ്ടിയുടെ വലിവ് ലഗ്ഗേജിനെ കൂടി ആശ്രയിച്ചിരിക്കും. ഞാന്‍ ആകെ കൊണ്ടുപോയത് രണ്ട് പാന്റ്‌സും മൂന്നു ഷര്‍ട്ടും മാത്രം.

7. എ.എം.എസ് (അക്യൂട്ട് മൗണ്ടന്‍ സിക്ക്‌നസ്):
എ.എം.എസ് എന്ന് പേരിട്ടു വിളിക്കുന്ന ഇവന്‍ വളരെ അപകടകാരിയാണ്. ആള്‍ട്ടിറ്റിയൂഡില്‍ ഉള്ളമാറ്റം കാരണം ശരീരത്തിന് ആവശ്യമായ ഓക്‌സിജന്‍ ലഭിക്കാതെ വരുമ്പോള്‍ ഉള്ള അസുഖങ്ങളാണ് എ.എം.എസ്. തലവേദന, ഛര്‍ദ്ദി തുടങ്ങിയവ മുതല്‍ മരണകാരണമാകുന്ന അസുഖങ്ങള്‍ വരെ ഉണ്ടാകാം. അതിനുള്ള മുന്‍കരുതല്‍ ഡോക്ടറെ കണ്ട് യാത്ര പുറപ്പെടുന്നതിനു മുമ്പു തന്നെ എടുക്കുന്നത് നല്ലതാണ്. ഉശാീഃശി എന്ന ഗുളിക രാവിലെയും രാത്രിയും കഴിച്ചാല്‍ മതി.

8. സ്ലീപ്പിങ് ബാഗ്:
ഒരു ലഡാക്ക് യത്രികന്റെ അടുക്കല്‍ വേണ്ട അവശ്യ സാധനമാണ് സ്ലീപ്പിങ് ബാഗ്. ദൗര്‍ഭാഗ്യവശാല്‍ എന്റെ കൈയില്‍ ഇത് ഇല്ലായിരുന്നു. ഇതുണ്ടെങ്കില്‍ തണുപ്പില്‍ നിന്ന് ഒരു പരിധി വരെ രക്ഷപ്പെടാം. 1300 രൂപക്ക് നല്ല സ്ലീപ്പിങ് ബാഗ് ലഭിക്കും.

9. ഭൂപടം:
ലക്ഷ്യത്തിലേക്ക് എത്താന്‍ ഒരു പ്രധാന സഹായി ആണ് സ്ഥല വിവരങ്ങളടങ്ങുന്ന മാപ്പ്. ഞാന്‍ ഉപയോഗിച്ചിരുന്നത് ഗൂഗിള്‍ മാപ്പ് ആയിരുന്നു. ഗൂഗിള്‍ മാപ്പില്‍ ഓഫ് ലൈന്‍ ഓപ്ഷന്‍ ഉണ്ട്. അതുവഴി മാപ്പ് സേവ് ചെയ്ത് പിന്നീട് ഉപയോഗിക്കാന്‍ കഴിയും.

10. ഗം ബൂട്ട്:
മണാലി മുതല്‍ മുകളിലേക്ക് പോകുമ്പോള്‍ അത്യാവശ്യമുള്ള ഒരു വസ്തുവാണ് ഗം ബൂട്ട്. ചെളിയും വെള്ളവും നിറഞ്ഞ റോഡുകളിലൂടെ കടന്നുപോകുമ്പോള്‍ കാലുകള്‍ സംരക്ഷിക്കാനും തണുപ്പില്‍ നിന്ന് രക്ഷ നേടാനും അത്യാവശ്യമാണ്. മണാലിയില്‍ നിന്ന് ഞാന്‍ വാങ്ങിയ ഗം ബൂട്ടിന് 300 രൂപയാണ് വില.

11. ഹെല്‍മറ്റ്:
ഒരു റൈഡറുടെ കിരീടമാണ് ഹെല്‍മറ്റ്. ഹെല്‍മറ്റില്ലാതെ യാത്ര പോകുന്നതിനെപ്പറ്റി ചിന്തിക്കാന്‍ പോലും പാടില്ല. തലയ്ക്ക് സുരക്ഷിതത്വം ഉറപ്പു നല്‍കുന്ന ഹെല്‍മറ്റ് സ്വന്തമാക്കുക. ബൈക്ക് ട്രെയിനില്‍ കയറ്റി വിടുന്നവര്‍ക്ക് ഡല്‍ഹിയിലെ കരോള്‍ബാഗില്‍ നിന്ന് കുറഞ്ഞ വിലയ്ക്ക നല്ല ഹെല്‍മറ്റ് ലഭിക്കും. ബൈക്ക് ആക്‌സസറീസ് കുറഞ്ഞ വിലയില്‍ ലഭിക്കുന്ന ഇവിടെ നിന്ന് ഞാന്‍ 250 രൂപയ്ക്ക് ഒരു ഗ്ലൗ വാങ്ങി. നാട്ടില്‍ വില ചോദിച്ചപ്പോള്‍ അതിന് 450 രൂപയായിരുന്നു.
25,000 രൂപയില്‍ താഴെയാണ് തനിക്ക യാത്രക്ക് ചെലവായ തുക എന്ന് നബീല്‍ ലാലു പറയുന്നു. സ്വന്തമായി കരുതിയ പണത്തിനു പുറമെ സുഹൃത്തുക്കളുടെ സഹായവും തുണയായി.

ഹോണ്ടയുടെ ‘നവി’ സ്‌കൂട്ടര്‍ സ്വന്തമാക്കുകയാണ് നബീലിന്റെ അടുത്ത ലക്ഷ്യം. അത് കിട്ടിയാല്‍ ഇന്ത്യക്ക് പുറത്ത് നേപ്പാളും ഭൂട്ടാനുമൊക്കെ കറങ്ങി വരണമെന്നാണ് ആഗ്രഹം. നാട്ടിലെത്തിയപ്പോള്‍ ഹോണ്ടയുടെ പ്രതിനിധികള്‍ അനുമോദിച്ചെങ്കിലും തങ്ങളുടെ ഡിയോ സ്‌കൂട്ടറിന്റെ പെരുമ ഇന്ത്യയിലുടനീളം കൊണ്ടുനടന്ന നബീലിനെ കാര്യമായി ‘പരിഗണിച്ചില്ല’ എന്നതാണ് സത്യം. സുഹൃത്തുക്കളുടെയും സന്നദ്ധ സംഘടനകളുടെയും അനുമോദനങ്ങള്‍ക്കിടയിലും നവി വാങ്ങാനായി അധ്വാനിക്കുകയാണ് തന്റെ അടുത്ത ലക്ഷ്യമെന്ന് ലാലു പറയുന്നു.

ലോകം മുഴുവന്‍ ചുറ്റിക്കാണുക, അതായിരിക്കും ‘പറക്കാന്‍’ ആഗ്രഹിക്കുന്ന ഏതൊരു വ്യക്തിയുടെയും ആഗ്രഹം. അതു തന്നെയായിരുന്നു മലപ്പുറത്തുകാരനായ നബീല്‍ ലാലുവും സ്വപ്‌നം കണ്ടത്. എന്നാല്‍ നബീലിന്റെ സ്വപ്‌നത്തിന് മറ്റൊരു പ്രത്യേകത കൂടിയുണ്ടായിരുന്നു. സ്വയം അധ്വാനിച്ച് ഉണ്ടാക്കിയ പണം കൊണ്ടൊരു ബൈക്ക് വാങ്ങി അതില്‍ രാജ്യം മുഴുവന്‍ സഞ്ചരിക്കുക. ഓര്‍മവെച്ച നാള്‍ മുതലുള്ള സ്വപ്‌നം യാഥാര്‍ത്ഥ്യമാക്കാന്‍ നബീലിന് വേണ്ടിയിരുന്നത് ഒരു കുഞ്ഞു ഡിയോ സ്‌കൂട്ടര്‍ മാത്രമായിരുന്നു. ഡിയോ വെറുമൊരു സ്‌കൂട്ടര്‍ അല്ലായിരുന്നു നബീലിന്. സ്വന്തം വിയര്‍പ്പിന്റെയും അധ്വാനത്തിന്റെയും പ്രതീകമായിരുന്നു ആ കുഞ്ഞു സ്‌കൂട്ടര്‍.

ഇക്കഴിഞ്ഞ സെപ്തംബര്‍ 15നാണ് നബീല്‍ ആഗ്രഹങ്ങളുടെ കൊടുമുടി കീഴടക്കാനായി മലപ്പുറത്തെ കോട്ടക്കല്‍ പൊന്മളത്തു നിന്ന് യാത്ര തിരിച്ചത്. സേവ് നേച്ചര്‍ സേവ് വൈല്‍ഡ് ലൈഫ് എന്ന സന്ദേശമുയര്‍ത്തിയാണ് നബീല്‍ രാജ്യത്തുടനീളം യാത്ര നടത്തുന്നത്. ഹൈദരാബാദ്-മണാലി-റോത്താങ് പാസ് വഴി ലഡാക്ക്. അവിടുന്ന് തിരിച്ച് ശ്രീനഗര്‍-ജമ്മു-പഞ്ചാബ് വഴി ഡല്‍ഹിയിലെത്തിയ നബീല്‍ ഇതുവരെ 7000 കിലോമീറ്റര്‍ സഞ്ചരിച്ചു. വെള്ളിയാഴ്ച രാവിലെ ജയ്പൂരിലേക്ക് പുറപ്പെട്ട നബീല്‍ ഈ മാസം 11ന് നാട്ടില്‍ തിരിച്ചെത്തുമെന്നാണ് പ്രതീക്ഷിക്കുന്നത്. കശ്മീരിലെ മഞ്ഞുകട്ടകള്‍ക്കിടയിലൂടെയും തുരങ്ക പാതങ്ങള്‍ക്കിടയിലൂടെയും റൈഡ് നടത്തണമെങ്കില്‍ ബുള്ളറ്റു തന്നെ വേണമെന്ന പൊതുധാരണ കൂടിയാണ് നബീല്‍ ഈ യാത്രയിലൂടെ തിരുത്തി കുറിച്ചത്.

ഓരോ നാട്ടിലെത്തുമ്പോഴും യാത്രാപ്രേമികള്‍ ഏറെ കൗതുകത്തോടെയാണ് നബീലിനെ കാണുന്നത്. ഇത്രയും കിലോമീറ്റര്‍ വെറുമൊരു സ്‌കൂട്ടറില്‍ എന്ന ചോദ്യമാണ് നബീലിനു നേരെ ആദ്യമുയരുക. എന്നാല്‍ മനസ്സില്‍ അരക്കിട്ടുറപ്പിച്ച ആഗ്രഹം പതിനെട്ടാം വയസ്സില്‍ ഒറ്റക്ക് കീഴടക്കിയ നബീലിനെ പ്രശംസിക്കാനും യാത്രാപ്രേമികള്‍ മറക്കാറില്ല. തങ്ങള്‍ക്കെല്ലാവര്‍ക്കും മാതൃകയാണ് ഈ കൊച്ചു മിടുക്കനെന്നാണ് ഓരോരുത്തരും പറയുന്നത്.

സ്‌കൂട്ടറിനുള്ള പണം കണ്ടെത്തുന്നതിലും തന്റേതായ പരീക്ഷണം നടത്തിയിരുന്നു നബീല്‍. സാധാരണ ഒരു വ്യവസായം തുടങ്ങുന്നതിനേക്കാള്‍ എന്തെങ്കിലും വ്യത്യസ്തത വേണമെന്ന് നബീലിന് നിര്‍ബന്ധമുണ്ടായിരുന്നു. അതിനായി കോഴിമുട്ട വിരിയിക്കുന്ന യന്ത്രം (എഗ് ഇന്‍ക്യുബേറ്റര്‍) വിപണിയിലെത്തിച്ച് തന്റെ സാങ്കേതിക മികവും നാടിനു മുന്നില്‍ തെളിയിച്ചു. യന്ത്ര നിര്‍മാണത്തിനായി തിരുവനന്തപുരത്തേക്ക് ഒരു യാത്ര തന്നെ വേണ്ടി വന്നു നബീലിന്. ഇത്തരത്തില്‍ നിര്‍മിക്കുന്ന എഗ് എന്‍ക്യുബേറ്റര്‍ ഒ.എല്‍.എക്‌സ് പോലുള്ള ഓണ്‍ലൈന്‍ വ്യാപാര മാധ്യമങ്ങളിലൂടെ വിപണനം നടത്തിയാണ് സ്‌കൂട്ടര്‍ വാങ്ങാനുള്ള പണം കണ്ടെത്തിയത്.

കോട്ടക്കല്‍ പൊന്മളയില്‍ അബ്ദുറഹിമാന്‍ കടവത്ത്-ഹൗവ്വാ ഉമ്മ ദമ്പതികളുടെ രണ്ടു മക്കളില്‍ ഇളയവനായി 1999 മാര്‍ച്ച് 28ന് ജനിച്ച നബീല്‍ പഠനത്തോടൊപ്പം തന്നെ കാട ഫാം നടത്തിയും വരുമാനം കണ്ടെത്തിയിരുന്നു. മൂത്ത സഹോദരി നാജിയയാണ് നബീലിന്റെ പ്രധാന സഹായി. കേരളം മുതല്‍ കശ്മീരെന്ന സ്വപ്‌നം യാഥാര്‍ത്ഥ്യമാക്കി നാട്ടില്‍ തിരിച്ചെത്തും മുമ്പേ നബീലിന്റെ മനസ്സില്‍ മറ്റൊരു ആഗ്രഹം കൂടി മൊട്ടിട്ടിട്ടുണ്ട്.

കാസര്‍കോട് മുതല്‍ കന്യാകുമാരി വരെ ഒരു മാസത്തെ യാത്ര. നാട്ടിലെത്തിയാല്‍ ഇതിനാവശ്യമായ പണം സ്വരൂപിക്കാന്‍ വീണ്ടും വ്യവസായത്തിലേക്ക് തിരിയാനാണ് ഈ പതിനെട്ടുകാരന്റെ തീരുമാനം. ഒപ്പം ലഡാക്ക് യാത്രയില്‍ പിന്തുണയും സഹായവും നല്‍കിയ ഓരോ പ്രദേശത്തെയും നല്ലവരായ സുഹൃത്തുക്കള്‍ക്കുള്ള നന്ദിയും നബീല്‍ പങ്കുവെക്കുന്നു.