രക്ഷപ്പെട്ട യുവതി സംഭവത്തെ കുറിച്ച് ഇന്നാണ് വെളിപ്പെടുത്തിയത്. തിരുവല്ല സ്വദേശിയയായ ഇടനിലക്കാരി അമ്പിളി വഴിയാണ് യുവതിയെ കുറ്റപ്പുഴയിലെ വീട്ടിലെത്തിച്ചത്. യുവതി പൊലീസില്‍ മൊഴി നല്‍കിയ അടിസ്ഥാനത്തില്‍ തിരുവല്ല പൊലീസ് എ.ഡി.ജി.പിക്ക് റിപ്പോര്‍ട്ട് നല്‍കി.

പത്തനംതിട്ടയിലെ ഇലന്തൂരില്‍ നടന്ന നരബലിയുടെ നാള്‍വഴി ഏതാണ്ട് അനാവരണം ചെയ്യപ്പെട്ടുകഴിഞ്ഞു. കേന്ദ്രപ്രതി ഭഗവല്‍സിംഗ് തന്റെ പൂര്‍വജന്മം എവിടെ, എന്തായിട്ടായിരുന്നു എന്ന് കണ്ടെത്തുന്നത് മുതല്‍ അത് ആരംഭിക്കുന്നു. അദ്ദേഹം തന്നെ പറഞ്ഞതനുസരിച്ച് തമിഴ്‌നാട്ടിലെ ചിദംബരത്തുള്ള താന്ത്രികവിദ്യകളില്‍ അഗ്രഗണ്യനായ ഒരാളില്‍ നിന്നാണ് അത് കണ്ടെത്തുന്നത്. ചിദംബരത്തെ സ്വാമിയുടെ അടുക്കല്‍ എല്ലാവരുടെയും പൂര്‍വ ജന്മത്തെകുറിച്ചുള്ള പ്രമാണമുണ്ടത്രെ. അതനുസരിച്ച് ബംഗാളിലെ വൈദ്യകുടുംബാംഗമായിരുന്നുവത്രെ കഴിഞ്ഞ ജന്മത്തില്‍ അദ്ദേഹം. മരുന്നു മാറിക്കൊടുത്തതിന്റെ പേരില്‍ വൈദ്യരെ നാട്ടുകാര്‍ തല്ലിക്കൊന്നു. തുടര്‍ന്നുള്ള ജന്മമായിരുന്നു ഇപ്പോഴത്തേത് എന്ന് വിശ്വസിക്കുന്ന ഈ കക്ഷിയെ അലട്ടുന്നത് തന്റെ പൂര്‍വജന്മത്തിലെ ശാപമാണ്. ഇത്തരമൊരു കഥ കേള്‍ക്കാന്‍ പാകപ്പെട്ട മനസ്സിന്റെ ഉടമയായ ലൈല ഇയാളുടെ ജീവിതസഖിയായി എത്തുകകൂടി ചെയ്യുന്നതോടെ ശാപമോക്ഷത്തിനുള്ള വഴികള്‍ അന്വേഷിച്ചുതുടങ്ങി രണ്ടുപേരും. നരബലി നല്‍കിയാല്‍ ശാപമോക്ഷവും തുടര്‍ന്ന് ഐശ്വര്യവും വരുമെന്ന് അവര്‍ വിശ്വസിച്ചു. ഇതിനിടയിലാണ് ഫെയ്‌സ്ബുക്കില്‍നിന്നും മുഹമ്മദ് ശാഫി എന്ന തട്ടിപ്പുവീരനുമായി ഇവര്‍ ബന്ധപ്പെടുന്നത്. ശ്രീദേവി എന്ന പേരിലുള്ള എക്കൗണ്ടിലൂടെ ഇത്തിരി പ്രേമവിവശനായിട്ടായിരുന്നു ബന്ധത്തിന്റെ തുടക്കം. പിന്നെ ദൈവ പ്രീതിക്ക്‌വേണ്ടി നരബലിക്ക് വേണ്ട കാര്യങ്ങള്‍ താന്‍ ചെയ്തുതരാം എന്ന് ശ്രീദേവി പറയുന്നു, ശ്രീദേവി ഒരു കര്‍മിയെ അയച്ചുകൊടുക്കുന്നു. കര്‍മിയായി ശാഫി തന്നെ, ഒറ്റപ്പെട്ടു കഴിയുന്ന റോസ്‌ലിന്‍ എന്ന തെരുവു കച്ചവടക്കാരിയുമായി വരുന്നു, അവളെ ബലി നല്‍കുന്നു, കാര്യമായ ഫലങ്ങളൊന്നും അനുഭവപ്പെടാത്തതിനെതുടര്‍ന്ന് സിംഗും ലൈലയും കാര്യം തിരക്കുന്നു, കുടുംബത്തിന് മേലുള്ള ശാപമാണ് എന്ന് വിശ്വസിപ്പിച്ച് ഒരു നരബലി കൂടി നടത്താനുള്ള കോള് ശാഫി ഒപ്പിക്കുന്നു, തുടര്‍ന്ന് പത്മം എന്ന മറ്റൊരുത്തിയെ കൊണ്ട്‌വന്ന് ബലി നല്‍കുന്നു. ഇങ്ങനെയാണ് കഥ പുരോഗമിച്ചത്. ഇതിനിടയിലൊക്കെ മനസ്സാക്ഷിയെ നടുക്കുന്ന കുറേ സംഭവങ്ങള്‍ നടക്കുന്നുണ്ട്. കഥയുടെ കഥ പൊളിയാതിരിക്കാന്‍ ചെയ്ത വേലകളാണ് അവയെല്ലാം.

സംഭവത്തിലേക്ക് നയിച്ച കാര്യങ്ങളെ കുറിച്ചുള്ള ചര്‍ച്ചയില്‍ ആദ്യം മുതലേ ഉയര്‍ന്നുവന്ന പ്രതി അന്ധവിശ്വാസമാണ്. എന്താണ് വിശ്വാസം, എന്താണ് അന്ധവിശ്വാസം, ഈ നടന്നതൊക്കെ അന്ധവിശ്വാസത്തിന്റെ പ്രചോദനം കൊണ്ടാണോ എന്നീ ചോദ്യങ്ങള്‍ക്കാണ് ഉത്തരം ലഭിക്കേണ്ടത്. ആദ്യം മനസ്സിലാക്കേണ്ടത് വിശ്വാസം എന്നാല്‍ അത് വ്യക്തമായി അറിവിന്റെ പരിധിയില്‍വരുന്ന കാര്യമല്ല എന്നതാണ്. അത്തരം കാര്യങ്ങളെ വിശ്വാസം എന്നു പറയുകയില്ല. ഉദാഹരണമായി ഒരാളുടെ കൈവിരലില്‍ ഒരു മോതിരമുണ്ട്. അതയാള്‍ കാണുന്നുണ്ട്. അയാള്‍ക്കത് തൊട്ടുനോക്കി ഉണ്ടെന്ന് ഉറപ്പിക്കാന്‍ കഴിയുകയും ചെയ്യും. എങ്കില്‍ അത് ഒരു വിശ്വാസമല്ല, അറിവാണ്. എന്നാല്‍ അറിയാന്‍ സാധ്യമല്ലാത്ത കാര്യങ്ങളാണ് പൂര്‍ണമായും വിശ്വാസത്തിന്റെ പരിധിയില്‍വരുന്നത് എന്ന് ഈ പറഞ്ഞതിന് അര്‍ഥമില്ല. മനുഷ്യബുദ്ധിയില്‍ തീരെ പിടിച്ചുനില്‍ക്കാത്തതും ബോധിക്കാത്തതുമായ ധാരണകള്‍ വിശ്വാസമല്ല, മിത്തുകള്‍ തുടങ്ങിയതൊക്കെയാണ്. യുക്തിഭദ്രവും തെളിവുകളുടെ സഹായത്താല്‍ സ്ഥാപിക്കാനും ബോധ്യപ്പെടുത്താനും കഴിയുന്ന തരത്തിലുള്ള ബലമുള്ള ധാരണകളാണ് വിശ്വാസം. അതിന് ഏറ്റവും സരളമായ ഉദാഹരണമാണ് ഇസ്‌ലാമിലെ ദൈവ സങ്കല്‍പ്പവും വിശ്വാസവും. ഈ പ്രപഞ്ചത്തിന് സ്രഷ്ടാവും നിയന്ത്രകനുമായി ഒരു സര്‍വശക്തനുണ്ട് എന്നത് ഇസ്‌ലാം നിര്‍ബന്ധിക്കുന്ന വിശ്വാസമാണ്. അത് തെളിയിക്കുന്നതും സ്ഥാപിക്കാന്‍ സഹായിക്കുന്നതും പ്രപഞ്ചവും അതിലെ ചരാചരങ്ങളുമാണ്. അന്യൂനമായ പ്രപഞ്ചത്തിന്റെയും അതിന്റെ ഘടകങ്ങളുടെയും സൃഷ്ടിപ്പും ഘടനയും പ്രവര്‍ത്തനവും സര്‍വശക്തനായ അല്ലാഹുവിലേക്ക് വിരല്‍ചൂണ്ടുന്നു.

ഇങ്ങനെ വിശ്വാസം നിര്‍വചിക്കപ്പെടുന്നതോടെ അന്ധവിശ്വാസം സ്വയമേവ നിര്‍വചിക്കപ്പെടും. അതനുസരിച്ച് യുക്തിസഹമല്ലാത്ത വിശ്വാസങ്ങളും അവയെച്ചൊല്ലിയുള്ള ആചാരങ്ങളുമാണ് അന്ധവിശ്വാസത്തിന്റെ കോളത്തില്‍ വരിക. അമാനുഷികമായ കഴിവു കൊണ്ടുമാത്രം വിശദീകരിക്കാവുന്നതും ആധുനിക ശാസ്ത്രത്തിനും കേവല യുക്തിക്കും വിരുദ്ധവുമായ വിശ്വാസത്തെയോ ആചാരത്തെയോ ആണ് അന്ധവിശ്വാസം എന്നത് കൊണ്ട് അര്‍ത്ഥമാക്കുന്നത്. അടിസ്ഥാനപരമായി വിശ്വാസം, അന്ധവിശ്വാസം എന്നിങ്ങനെയുള്ള വര്‍ഗീകരണം മുമ്പില്ലായിരുന്നു. ഇത് സത്യത്തില്‍ യുക്തിവാദികള്‍ സൃഷ്ടിച്ചെടുത്ത പദമാണ്. ദൈവത്തിലോ പിശാചിലോ വിശ്വസിച്ച് ആരാധനകള്‍ അര്‍പ്പിക്കുന്ന സമൂഹങ്ങളെ പരിഹസിക്കുന്നതിനുവേണ്ടിയാണ് ഈ പദം ഇവര്‍ ഉപയോഗിക്കുന്നത്. അതായത്, യുക്തിവാദികള്‍ എന്നു സ്വയം വിശേഷിപ്പിക്കുന്ന ആള്‍ക്കാര്‍ക്ക് ഗ്രഹിക്കാന്‍ കഴിയാത്ത ആശയങ്ങള്‍ പുലര്‍ത്തുന്ന ഏതൊരു വ്യക്തിയും ഇവരുടെ കാഴ്ചപ്പാടില്‍ അന്ധവിശ്വാസിയാണ്. ദൈവവിശ്വാസവും വിഗ്രഹാരാധനയുമൊക്കെ ഒരേ ഗണത്തില്‍പ്പെടുന്ന അന്ധവിശ്വാസങ്ങളായാണ് ഇവര്‍ ധരിച്ചുവച്ചിരിക്കുന്നത്. യുക്തിവാദികളെ സംബന്ധിച്ചിടത്തോളം ശാസ്ത്രീയമായ തെളിവാണ് എല്ലാറ്റിന്റെയും അടിസ്ഥാനം.

മനുഷ്യന്റെയും കുലത്തിന്റെയും അടിസ്ഥാന പ്രകൃതം വിശ്വാസമാണ്. പ്രപഞ്ചത്തിലേക്ക് കടന്നുവരികയും ഒരു കുലമായി വളരുകയും ചെയ്യുമ്പോഴെല്ലാം മനുഷ്യന്‍ വിശ്വാസി മാത്രമായിരുന്നു. ഇക്കാര്യം വിശുദ്ധ ഖുര്‍ആന്‍ ഒന്നിലധികം സ്ഥലങ്ങളില്‍ പറയുന്നു. അല്ലാഹു പറയുന്നു: അല്ലാഹുവിന്പുറമേ, അവര്‍ക്ക് ഉപദ്രവമോ ഉപകാരമോ ചെയ്യാത്തതിനെ അവര്‍ ആരാധിച്ചുകൊണ്ടിരിക്കുന്നു. അവര്‍ (ആരാധ്യര്‍) അല്ലാഹുവിന്റെ അടുക്കല്‍ ഞങ്ങള്‍ക്കുള്ള ശുപാര്‍ശകരാണ് എന്നു പറയുകയും ചെയ്യുന്നു. (നബിയേ) താങ്കള്‍ പറയുക: ആകാശങ്ങളിലോ ഭൂമിയിലോ ഉള്ളതായി അല്ലാഹുവിനറിയാത്ത വല്ല കാര്യവും നിങ്ങള്‍ അവന് അറിയിച്ചുകൊടുക്കുകയാണോ? അല്ലാഹു അവര്‍ പങ്കുചേര്‍ക്കുന്നതില്‍ നിന്നെല്ലാം എത്രയോ പരിശുദ്ധനും ഉന്നതനുമായിരിക്കുന്നു. മനുഷ്യര്‍ ഒരൊറ്റ സമൂഹം മാത്രമായിരുന്നു. എന്നിട്ടവര്‍ ഭിന്നിച്ചിരിക്കുകയാണ്. നിന്റെ രക്ഷിതാവിങ്കല്‍നിന്ന് ഒരു വചനം മുന്‍കൂട്ടി ഉണ്ടായിരുന്നില്ലെങ്കില്‍ അവര്‍ ഭിന്നിച്ചു കൊണ്ടിരിക്കുന്ന വിഷയത്തില്‍ അവര്‍ക്കിടയില്‍ (ഇതിനകം) തീര്‍പ്പുകല്‍പ്പിക്കപ്പെട്ടിരുന്നേനേ (യൂനുസ്: 18,19). അടിസ്ഥാന പ്രകൃതം വിശ്വാസമാണെന്നും അതില്‍ നിന്നും മനുഷ്യന്‍ പിശാചിന്റെ സഹായത്തോടെ സ്വയം തെന്നിമാറുകയായിരുന്നു എന്നു ചുരുക്കം. അതുകൊണ്ടാണ് വിശ്വാസമല്ലാത്തതെല്ലാം ഇങ്ങനെ പലപ്പോഴും അപകടത്തില്‍ ചാടുന്നത്.

നരബലി എന്ന ചിന്തയിലേക്ക് ഭഗവല്‍സിംഗ് എന്ന കേന്ദ്രപ്രതി എത്തിച്ചേരുന്ന പൂര്‍വ ജന്മത്തിലെ ശാപം, അതില്‍ നിന്നുളള മോചനമാര്‍ഗം തുടങ്ങിയതെല്ലാം ഉണ്ടായത് അന്ധവിശ്വാസങ്ങളില്‍ നിന്നാണ് എന്നതില്‍ സന്ദേഹമില്ല. പക്ഷേ, പിന്നീട് ഉണ്ടായ എല്ലാ കാര്യങ്ങളുടെയും പ്രചോദനം വിശ്വാസമോ അന്ധവിശ്വാസമോ ഒന്നുമല്ല. മുഖ്യ ആസൂത്രകനായ ശാഫി ശ്രീവിദ്യയായി വേഷം കെട്ടുന്നതും നരബലി നടത്തിയാല്‍ ഐശ്വര്യം വരും എന്നു പറയുന്നതും അയാളുടെ വിശ്വാസത്തിന്റെ വെളിച്ചത്തിലല്ല. നിരപരാധരും ആരോരുമില്ലാത്തവരുമായ സ്ത്രീകളെ അറുത്ത് ബലി എന്ന് വിശ്വസിപ്പിച്ച് അവരില്‍നിന്ന് പണം തട്ടാനുള്ള സൂത്രത്തിന്റെ വെളിച്ചത്തിലാണ്. പണമല്ലാതെ തന്റെ ഇരയുടെ ശാപമകറ്റുക എന്നതിനെ ഒരിക്കലും അയാള്‍ ലക്ഷ്യമായി കണ്ടിട്ടില്ല. അത്തരമൊരു വിശ്വാസിയുമല്ല അയാള്‍. തന്റെ സൂത്രം വിജയിച്ചു എന്നുറപ്പാക്കിയ ശാഫി പിന്നെ എല്ലാം മുതലെടുക്കുകയായിരുന്നു. ഭര്‍ത്താവിന്റെ മുമ്പിലിട്ട് ഭാര്യയെ കര്‍മത്തിന്റെ ഭാഗമെന്ന് വിശ്വസിപ്പിച്ച് വ്യഭിചരിക്കുമ്പോഴും ഇറച്ചിവെട്ടിന്റെ ലാഘവത്തില്‍ രണ്ടു മനുഷ്യ സ്ത്രീകളെ വെട്ടിക്കൂട്ടുമ്പോഴും അയാളുടെ ഉള്ളില്‍ മദ്യവും ആര്‍ത്തിയുമല്ലാതെ മറ്റൊന്നും പ്രവര്‍ത്തിക്കുന്നുണ്ടായിരുന്നില്ല. അയാളുടെ ഉള്ളില്‍ വിശ്വാസമോ അന്ധവിശ്വാസം പോലുമോ തെല്ലും ഉണ്ടായിരുന്നില്ല.

റോസ്‌ലിയെ കാണാതായതിനെ തുടര്‍ന്ന് യു.പി യിലുള്ള മകള്‍ ഓഗസ്റ്റ് 17ന് കാലടി പൊലീസില്‍ പരാതി നല്‍കി. എന്നാല്‍ മൂന്നാഴ്ച്ച മുമ്പ് മാത്രമാണ് പൊലീസ് ഇവര്‍ വാടകക്ക് താമസിക്കുന്ന ഔട്ട്ഹൗസിലേക്ക് എത്തിയതെന്ന് വീട്ടുടമ പറയുന്നു. പരാതി നല്‍കിയതിന് ശേഷം അന്വേഷണം നടക്കുന്നുണ്ടെന്നും ഫോണിന്റെ ഐ.എം.ഇ നമ്പര്‍ കണ്ടുപിടിക്കാനായില്ലെന്നുമായിരുന്നു പൊലീസിന്റെ പ്രതികരണമെന്ന് റോസ്‌ലിന്റെ മകള്‍ മഞ്ജു പറഞ്ഞു. പൊലീസില്‍ ചോദിക്കുമ്പോഴെല്ലാം അന്വേഷിക്കുന്നുണ്ടെന്നും ക്രൈംബ്രാഞ്ച് അന്വേഷണം ഏറ്റെടുത്തെന്നുമാണ് അറിയിച്ചത്. ഇന്നലെ രാവിലെ പൊലീസ് വിളിച്ചു വിലാസം ചോദിച്ചിരുന്നു. വാര്‍ത്ത അറിഞ്ഞ് പൊലീസില്‍ ചോദിച്ചപ്പോള്‍ ഇതുവരെയും ഉറപ്പിച്ചിട്ടില്ലെന്നായിരുന്നു മറുപടി. ഇപ്പോഴും എന്താണ് സംഭവിച്ചത് എന്ന കാര്യത്തില്‍ പൊലീസ് മറുപടി നല്‍കിയിട്ടില്ലെന്നും മഞ്ജു പറയുന്നു. സെപ്തംബര്‍ 26നാണ് കടവന്ത്ര പൊലീസിന് രണ്ടാമത്തെ സ്ത്രീയുടെ മിസിങ് പരാതി ലഭിച്ചത്. കടവന്ത്ര പൊന്നുരുന്നി സ്വദേശിനി പത്മത്തിന്റെ മകനായിരുന്നു പരാതിക്കാരന്‍. രണ്ടാമത്തെ സ്ത്രീയെ കാണാതായത് രജിസ്റ്റര്‍ ചെയ്തത് ഓഗസ്റ്റിലാണെന്ന് സിറ്റി പൊലീസ് കമ്മീഷണര്‍ പറഞ്ഞു. ആദ്യത്തെ കൊലപാതകം ജൂണില്‍ നടന്നു. രണ്ടാമത്തെ കൊലപാതകം സെപ്റ്റംബറിലാണ് നടന്നതെന്നും കമ്മീഷണര്‍ പറഞ്ഞു.

ആദ്യത്തെ മിസിങ് കേസില്‍ ശരിയായ അനേഷണം നടക്കാത്തതാണ് രണ്ടാമത്തെ തട്ടിക്കൊണ്ടുപോകലിനും കൊലപാതകത്തിനും ഇടയാക്കിയതെന്ന് ആരോപണമുണ്ട്. ഇക്കാര്യത്തില്‍ പൊലീസിന്റെ ഭാഗത്ത് ഗുരുതരവീഴ്ചയാണ് ഉണ്ടായിരിക്കുന്നതെന്നും, വീഴ്ച വരുത്തിയ പൊലീസ് ഉദ്യോഗസ്ഥര്‍ക്കെതിരെ നടപടി സ്വീകരിക്കണമെന്നും ആവശ്യമുയരുന്നുണ്ട്.

അതേസമയം ഇലന്തൂരില്‍ മൂവര്‍ സംഘം ചേര്‍ന്ന് നടത്തിയ നരബലികളില്‍ ആദ്യം കൊല്ലപ്പെട്ടത് കാലടി സ്വദേശിനിയായ റോസ്‌ലിനെന്ന് വിവരം. കഴിഞ്ഞ ജൂണിലാണ് റോസ്‌ലിനെ കൊലപ്പെടുത്തിയത്. എന്നാല്‍ കടവന്ത്ര സ്വദേശി പത്മത്തിന്റെ തിരോധാനാവുമായി നടത്തിയ അന്വേഷണത്തില്‍ മാത്രമാണ് റോസ്്‌ലിന്‍ കൊല്ലപ്പെട്ട വിവരം പുറത്തറിയുന്നത്. പൊലീസ് പിടിയിലായ വ്യാജ സിദ്ധന്‍ ഷാഫിയാണ് രണ്ട് കൊലപാതകങ്ങളും ആസൂത്രണം ചെയ്തതെന്നാണ് പൊലീസിന് ലഭിച്ച മൊഴി. ശ്രീദേവി എന്ന പേരിലുള്ള വ്യാജ ഫേസ്ബുക്ക് അക്കൗണ്ട് വഴിയാണ് ഇയാള്‍ നാട്ടു വൈദ്യനും തിരുമ്മല്‍ വിദഗ്ധനുമായ ഭഗവല്‍സിങുമായി അടുത്തത്.

സ്ത്രീയാണെന്ന വ്യാജേന ഭഗവല്‍ സിങുമായി നിരന്തരം നടത്തിയ ചാറ്റുകളിലാണ്, തന്റെ അറിവില്‍ റഷീദ് എന്ന ഒരു സിദ്ധനുണ്ടെന്നും അയാളെ കണ്ടാല്‍ കുടുംബത്തിന് സാമ്പത്തികാഭിവൃദ്ധി ലഭിക്കാനുള്ള വഴികള്‍ പറഞ്ഞു തരുമെന്നും ധരിപ്പിച്ചത്. തുടര്‍ന്ന് റഷീദ് എന്ന സിദ്ധനായി ഷാഫി തന്നെ ഭഗവല്‍ സിങിനെ ഫോണില്‍ വിളിച്ച് ചില ആഭിചാര ക്രിയകള്‍ നിര്‍ദേശിച്ചു. ആഭിചാരത്തിനായി ഭഗവല്‍ സിങിന്റെ വീട്ടിലെത്തിയ ഷാഫി ഇവരുമായി അടുക്കുകയും സാമ്പത്തികാഭിവൃദ്ധി ഉണ്ടാവുമെന്ന് ധരിപ്പിച്ച് ഭഗവല്‍ സിങിന്റെ സാന്നിധ്യത്തില്‍ തന്നെ അദ്ദേഹത്തിന്റെ ഭാര്യ ലൈലയുമായി ലൈംഗിക ബന്ധത്തില്‍ ഏര്‍പ്പെടുകയും ചെയ്തു. പൂജയുടെ ഭാഗമാണ് ഇതെല്ലാമെന്നാണ് ഷാഫി ഇവരെ ധരിപ്പിച്ചത്. ഇതിന്റെ തുടര്‍ച്ചയായാണ് സാമ്പത്തികാഭിവൃദ്ധി ലഭിക്കാന്‍ ഒരു സ്ത്രീയെ നരബലി നടത്തണമെന്ന് ഷാഫി ഇവരോട് ആവശ്യപ്പെട്ടത്. സ്ത്രീയെ താന്‍ തന്നെ എത്തിച്ചു തരാമെന്നും ഇയാള്‍ പറഞ്ഞു. ഇത്തരത്തില്‍ ഗുണമുണ്ടായ ആളാണ് ശ്രീദേവിയെന്നും ഇയാള്‍ ധരിപ്പിച്ചു. ഇത് ഉറപ്പാക്കാന്‍ ഭഗവല്‍സിങ് ശ്രീദേവിയുമായി ഫേസ്ബുക്കില്‍ ചാറ്റു ചെയ്തു. ശ്രീദേവി ഇത് ശരിവച്ചതോടെ നരബലിക്ക് തീരുമാനം എടുക്കുകയായിരുന്നു. എന്നാല്‍ ശ്രീദേവി ആയി ചാറ്റു ചെയ്തത് ഷാഫിയാണെന്ന് അപ്പോഴും ഭഗവല്‍സിങ് അറിഞ്ഞിരുന്നില്ലെന്ന് പൊലീസ് പറഞ്ഞു.

സിനിമയില്‍ അഭിനയിക്കാന്‍ അവസരമുണ്ടെന്ന് പറഞ്ഞാണ് ഷാഫി കാലടി സ്വദേശിനിയായ റോസ്‌ലിനെ സമീപിച്ചത്. പത്തുലക്ഷം രൂപ വാഗ്ദാനം ചെയ്ത് ഇലന്തൂരിലെ ദമ്പതികളുടെ വീട്ടിലെത്തിച്ച് അഭിനയത്തിന്റെ ഭാഗമെന്ന് പറഞ്ഞ് കസേരയില്‍ കെട്ടിയിട്ടു. തുടര്‍ന്ന് ലൈലയെക്കൊണ്ട് റോസ്‌ലിന്റെ കഴുത്തറുപ്പിച്ചു. പിന്നീട് കത്തി സ്വകാര്യ ഭാഗങ്ങളില്‍ കുത്തിയിറക്കി പുറത്തേക്കൊഴുകുന്ന രക്തം പാത്രത്തി ല്‍ ശേഖരിച്ച് വീട്ടില്‍ തളിച്ചു. രണ്ടര ലക്ഷം രൂപ പ്രതിഫലവും കൈപറ്റിയാണ് ഷാഫി മടങ്ങിയത്. ഇതിനു ശേഷം സാമ്പത്തികാഭിവൃദ്ധി കൈവന്നില്ലെന്ന് ഭഗവല്‍സിങ് പരാതി പറഞ്ഞതോടെയാണ് ആദ്യ നരബലി വഴി കുടുംബത്തിനു മേലുള്ള ശാപം നീങ്ങിയെന്നും രണ്ടാമതൊരു നരബലി കൂടിനടത്തിയാല്‍ സാ മ്പത്തികാഭിവൃദ്ധി കൈവരുമെന്നും ധരിപ്പിച്ചത്. ഇതിന്റെ തുടര്‍ച്ചയായാണ് കടവന്ത്ര സ്വദശിയായ പത്മത്തെ കൊലപ്പെടുത്തിയത്. സിനിമയില്‍ അഭിനിപ്പിക്കാമെന്നും പത്തുലക്ഷം രൂപ നല്‍കാമെന്നും പറഞ്ഞാണ് പത്മത്തേയും ഷാഫി കൂട്ടിക്കൊണ്ടുവന്നത്. തലക്കടിച്ച് ബോധരഹിതയാക്കിയ ശേഷം റോസ്‌ലിന്റെതിനു സമാനമായി കസേരയില്‍ കെട്ടിയിട്ട് കഴുത്തറുത്ത് കൊല്ലുകയും സ്വകാര്യ ഭാഗങ്ങളില്‍ കത്തിയിറക്കി രക്തം ശേഖരിച്ച് വീട്ടില്‍ തളിക്കുകയും ചെയ്തു. ഇതിനു ശേഷവും സമീപ വാസികള്‍ക്ക് പോലും സംശയം തോന്നാത്ത വിധമാണ് ദമ്പതികള്‍ ഇലന്തൂരിലെ വീട്ടില്‍ കഴിഞ്ഞിരുന്നത്.

ചോദ്യം ചെയ്യലില്‍ ആണ് ലൈല ഇക്കാര്യം പറഞ്ഞത്. ആഭിചാര ക്രിയകള്‍ സംബന്ധിച്ച ചില പുസ്തകങ്ങള്‍ വായിക്കാന്‍ ഷാഫി ആവശ്യപ്പെട്ടു. ഈ പുസ്തങ്ങളില്‍ നരബലി നടത്തി മാംസം കഴിക്കുന്നതിനെപ്പറ്റി പറഞ്ഞിട്ടുണ്ടെന്നും ലൈല പൊലീസിന് മൊഴി നല്‍കി.

നരബലിയില്‍ ഞെട്ടി കേരളം

പെരുമ്പാവൂരില്‍ നിന്ന് കാണാതായ ലോട്ടറി കച്ചവടക്കാരിയായ സ്ത്രീയെക്കുറിച്ചുള്ള അന്വേഷണത്തില്‍ വെളിച്ചത്തു വന്നത് മനുഷ്യ മനസാക്ഷിയെ ഞെട്ടിച്ച ക്രൂരമായ നരബലിയുടെ വിവരം. പത്തനംതിട്ട ജില്ലയിലെ ഇലന്തൂരിലാണ് രണ്ടു മാസത്തെ ഇടവേളയില്‍ നടന്ന സമാന സ്വഭാവമുള്ള രണ്ട് കൊലപാതകങ്ങളുടെ വിവരം അന്വേഷണ സംഘത്തിന് ലഭിച്ചത്. കാലടിയില്‍ താമസിച്ചിരുന്ന റോസ്‌ലിന്‍, കടവന്ത്രയില്‍ ലോട്ടറി കച്ചവടം നടത്തിയിരുന്ന പത്മം എന്നീ സ്ത്രീകളാണ് കൊല്ലപ്പെട്ടത്. സാമ്പത്തികാഭിവൃദ്ധി കൈവരാന്‍ നരബലി നടത്തണമെന്ന വ്യാജ സിദ്ധന്റെ നിര്‍ദേശപ്രകാരമാണ് ഇരുവരേയും കൊലപ്പെടുത്തിയതെന്നാണ് വിവരം. തുടര്‍ന്ന് മൃതദേഹം വെട്ടിനുറുക്കി വീട്ടുവളപ്പില്‍ കുഴിച്ചിടുകയായിരുന്നു. സംഭവത്തില്‍ ദമ്പതികളായ ഭഗവല്‍ സിങ്, ഇയാളുടെ ഭാര്യ ലൈല, വ്യാജ സിദ്ധന്‍ പെരുമ്പാവൂര്‍ സ്വദേശിയായ ഷാഫി (റഷീദ്) എന്നിവര്‍ പിടിയിലായി. പ്രതികളുടെ മൊഴിയുടെ അടിസ്ഥാനത്തില്‍ വീട്ടുവളപ്പില്‍ നടത്തിയ പരിശോധനയില്‍ രണ്ട് മൃതദേഹങ്ങളുടേയും അവശിഷ്ടങ്ങള്‍ കണ്ടെടുത്തു. വെട്ടിനുറുക്കി കഷ്ണങ്ങളാക്കിയാണ് മൃതദേഹം കുഴിച്ചിട്ടിരുന്നത്. എളുപ്പത്തില്‍ അഴുകാനായി മൃതദേഹത്തിനു മുകളില്‍ ഉപ്പു വിതറിയിരുന്നതായും കണ്ടെത്തി.

കൊച്ചി നഗരത്തില്‍ ലോട്ടറി കച്ചവടം നടത്തിയിരുന്ന സ്ത്രീയെ കാണാനില്ലെന്ന പരാതിയിലാണ് പൊലീസ് അന്വേഷണം ആരംഭിച്ചത്. സെപ്തംബര്‍ 26നാണ് കടവന്ത്ര സ്വദേശിയായ പത്മത്തെ കാണാതായത്. 27ന് ബന്ധുക്കള്‍ പൊലീസില്‍ പരാതി നല്‍കി. കടവന്ത്ര പൊലീസ് നടത്തിയ അന്വേഷണത്തില്‍ പത്മത്തിന്റെ മൊബൈല്‍ ഫോണിന്റെ ടവര്‍ ലൊക്കേഷന്‍ അവസാനമായി തിരുവല്ലയിലാണെന്ന് കണ്ടെത്തി. തുടര്‍ന്ന് തിരുവല്ല കേന്ദ്രീകരിച്ച് നടത്തിയ അന്വേഷണത്തിലാണ് പെരുമ്പാവൂര്‍ സ്വദേശിയായ ഷാഫിയാണ് പത്മത്തെ കൂട്ടിക്കൊണ്ടുപോയതെന്ന വിവരം ലഭിച്ചത്. ഇയാളെ കസ്റ്റഡിയില്‍ എടുത്ത് ചോദ്യം ചെയ്തതില്‍ നിന്നാണ് കേരളത്തെ നടുക്കിയ നരബലിയുടെ ചുരുളഴിഞ്ഞത്.

ദമ്പതികളായ ഭഗവല്‍സിങിനും ലൈലക്കും വേണ്ടിയാണ് കൊലപാതകം നടത്തിയതെന്ന് ഇയാള്‍ മൊഴി നല്‍കിയതോടെ ഇത് സ്ഥിരീകരിക്കാനായി ദമ്പതികളെക്കൂടി പൊലീസ് കസ്റ്റഡിയില്‍ എടുത്തു. ഇവരെ ചോദ്യം ചെയ്തതില്‍ നിന്നാണ് മൂവരും ചേര്‍ന്നാണ് പത്മത്തെ കൊലപ്പെടുത്തിയതെന്നും മൃതദേഹം വെട്ടിനുറുക്കി കഷ്ണങ്ങളാക്കി വീട്ടുവളപ്പില്‍ തന്നെ കുഴിച്ചിട്ടതായും മൊഴി നല്‍കിയത്. മാത്രമല്ല, രണ്ടു മാസം മുമ്പ് സമാനമായ മറ്റൊരു നരബലി കൂടി നടത്തിയിരുന്നതായും പ്രതികള്‍ പൊലീസിനോടു സമ്മതിച്ചു. തുടര്‍ന്ന് പ്രതികള്‍ കാണിച്ചു കൊടുത്ത സ്ഥലങ്ങളില്‍ കുഴിയെടുത്ത് പരിശോധിച്ചതോടെയാണ് മൃതദേഹാവശിഷ്ടങ്ങള്‍ കണ്ടെടുത്തത്. നാലിടങ്ങളില്‍ നിന്നാണ് മൃതദേഹം കണ്ടെടുത്തത്. മൃതദേഹങ്ങള്‍ ആരുടേതാണെന്ന് സ്ഥിരീകരിക്കാന്‍ ഡി.എന്‍.എ പരിശോധന നടത്തുമെന്ന് പൊലീസ് വ്യക്തമാക്കി. ഇതിനായി സാമ്പിളുകള്‍ ശേഖരിച്ചു. ഫോറന്‍സിക് വിദഗ്ധര്‍ അടക്കമുള്ളവര്‍ സംഭവ സ്ഥലത്ത് തെളിവെടുപ്പ് നടത്തി.