ആസിഫ് അൻസാരിയും ഞാനും IUML National Asst. Secretary പദവിയിൽ തെരഞ്ഞെടുക്കപ്പെട്ട കാരണം യൂത്ത് ലീഗ് പ്രസിഡണ്ട്/ ജന. സെക്രട്ടറി പദവികൾ പുതിയ ടീമിന് ഔദ്യോഗികമായി കൈമാറി. 2017 ലാണ് യൂത്ത് ലീഗ് ദേശീയ കമ്മിറ്റിയുടെ ഭാഗമാകുന്നത്. മുൻമാതൃകകൾ ഒന്നുമില്ലായിരുന്നു ഞങ്ങൾക്ക് മുന്നിൽ. കലുഷിതമായ ഒരു കാലമായിരുന്നു. അത്രമേൽ പരിമിതമായ വിഭവങ്ങളുമായി ഞങ്ങൾ നടന്നു തുടങ്ങി. സാബിർ ഗഫാറും സി കെ സുബൈറും നയിച്ച കമ്മിറ്റിയിലേക്ക് മലപ്പുറം ജില്ലാ യൂത്ത് ലീഗ് ജനറൽ സെക്രട്ടറി പദവി വിട്ട് ദേശീയ വൈസ് പ്രസിഡന്റ് ആയിട്ടായിരുന്നു തുടക്കം. പിന്നീട് ദേശീയ കമ്മിറ്റിയുടെ ജനറൽ സെക്രട്ടറി പദവി ഏറ്റെടുത്തു.
മുസ്ലിം ലീഗിന് ശക്തമായ സാന്നിധ്യവും സ്വാധീനവും വിഭവങ്ങളും ഉള്ള കേരളത്തിലെ സംഘടന പ്രവർത്തന രീതികളൊന്നും പുതിയ മേഖലകളിൽ നടപ്പാക്കുവാൻ കഴിയുമായിരുന്നില്ല. ഒട്ടും കാത്തിരിക്കാനും കഴിയുമായിരുന്നില്ല. ക്രൂരമായ ആൾക്കൂട്ട കൊലപാതകങ്ങൾ നിത്യ സംഭവങ്ങളായ കാലം. ഫാസിസ്റ്റു ഭരണകൂടം അതിന്റെ വംശീയ നിയമ നിർമാണങ്ങൾ തുടർച്ചയായി നടത്തിയ കാലം. ബുൾഡൊസർ രാജിലൂടെ ആയിരങ്ങളെ തെരുവിലേക്കേറിഞ്ഞ കാലം.

അങ്ങനെയൊരു കാലത്ത് ഒരു യുവജന സംഘടനയെ നയിക്കുക എന്നത് ചെറിയ ഒരു ഉത്തരവാദിത്വമായിരുന്നില്ല.
അധികാരത്തിന്റെ യന്ത്രക്കൈകൾ പാവം മനുഷ്യ ജീവിതങ്ങൾക്ക് നേരെ ഉയർന്ന ഒരു സന്ദർഭത്തിലും നമ്മൾ നിശബ്ദരാ യില്ല. മൗനം പാലിച്ചില്ല. പ്രതിരോധത്തിന്റെ, കരുതലിന്റെ, സംരക്ഷണത്തിന്റെ, കവചമാകാൻ ആവുന്നത്ര നമ്മൾ ശ്രമിച്ചു. നിങ്ങളുടെ ഒക്കെ പ്രതിനിധിയായി അവിടെയൊക്കെ ഓടിയെത്തൻ ശ്രമിച്ചു.
എത്രയോ പതിറ്റാണ്ടു കാലം ജീവശ്വാസം പോലെകൊണ്ട് നടന്ന വികാരം. മുസ്ലിം യൂത്ത് ലീഗ്. യുവജന സംഘടന പ്രവർത്തനത്തിന്റെ ഒരു കാലം. മുസ്ലിം ലീഗ് ദേശീയ ഭാരവാഹി ആയി തിരഞ്ഞെടുക്കപ്പട്ടത് മുതൽ എത്രയും പെട്ടെന്ന് യുത്ത് ലീഗ് ചുമതല സഹപ്രവർത്തകർക്കു കൈമാറണം എന്നാഗ്രഹിച്ചിരുന്നു. പാർട്ടിയോട് അത് പറയുകയും ചെയ്തിരുന്നു. ഇന്നത്തോടെ ആ ദൗത്യം പൂർത്തിയാക്കുകയാണ്.

യൂത്ത് ലീഗിന്റെ ഉത്തരവാദിത്വങ്ങൾ പ്രിയ സഹപ്രവർത്തർക്ക് കൈ മാറിയിരിക്കുന്നു.
അന്ന് ഈ യാത്ര ആരംഭിച്ച കാലം മുതൽ കൂടെയുള്ളവർ. പ്രിയപ്പെട്ട സർഫറാസും, ടി പി അഷ്റഫലിയും, ഷിബു മീരാനും തന്നെയാണ് യൂത്ത് ലീഗ് ദേശീയ കമ്മിറ്റിയെ നയിക്കാനേത്തുന്നത് എന്നത് സ്വകാര്യമായ സന്തോഷമാവുകയാണ്. ഉത്തരേന്ത്യയിലേക്കുള്ള ഒരുപാടു യാത്രകളിലെ അനിശ്ചിതത്വങ്ങളും, ആശങ്കകളും, പ്രതിബന്ധങ്ങളും, പ്രയാസങ്ങളും ഒരുമിച്ചാനുഭവിച്ചവരാണ് ഞങ്ങൾ.

വിമാനത്തിൽ നിന്നുള്ള സെൽഫികൾ പോസ്റ്റ് ചെയ്ത് ആരംഭിച്ച യാത്രകൾ പലതും കൺഫേം ടിക്കറ്റ് ഇല്ലാത്ത ട്രെയിനുകളിലും, തിരക്കേറിയ പ്ലാറ്റഫോമുകളിലും, ഈ റിക്ഷകളിലും ഒക്കെയായി പുരോഗമിച്ചു ഒടുവിൽ മടങ്ങിയെത്തുമ്പഴേക്കും ശരീരം നന്നായി ക്ഷീണിച്ചുണ്ടാകും. പക്ഷെ ഒരിക്കൽ പോലും മനസ്സ് തളരാതെ അടുത്ത യാത്രക്ക് തയ്യാറെടുക്കാൻ എനിക്കും സി കെ സുബൈറിനും ഷിബുവിനുമൊക്കെ പ്രചോദനമായത് ഞങ്ങൾക്കിടയിലുണ്ടായിരുന്ന മനോഹരമായ സൗഹൃദമായിരുന്നു. അല്ല കറകളഞ്ഞ ബ്രദർഹുഡായിരുന്നു.
പ്രസിഡന്റ് ആയി വരുന്ന മീററ്റ് സ്വദേശി സർഫറാസും ഈ യാത്രകൾക്കിടയിൽ നമ്മൾ കണ്ടെത്തിയ സംഘടകനാണ് എന്നത് അഭിമാനകരമാണ്.

പ്രിയ സുഹൃത്തുക്കൾക്ക് എല്ല ആശംസകളും… ഇന്ന് വരെ കൂടെ നിന്ന ആസിഫ് അൻസാരിക്കും മറ്റു ഭാരവാഹികൾക്കും നന്ദി…. യാത്രകളൊന്നും അവസാനിക്കുന്നില്ല… തുടങ്ങി വച്ച സമരങ്ങളൊന്നും നിലക്കുന്നില്ല… ദൗത്യങ്ങളൊന്നും പാതിയിൽ ഉപേക്ഷിക്കുന്നുമില്ല… മുസ്ലിം ലീഗ് ദേശീയ ഭാരവാഹി എന്ന നിലയിൽ വരും നാളുകളിലും അതൊക്കെ തുടരും.. പ്രിയപ്പെട്ട കൂട്ടുകാരോടൊപ്പം തന്നെ.
…..
വികെ ഫൈസൽ ബാബു
ദേശീയ അസി. സെക്രട്ടറി
ഇന്ത്യൻ യൂണിയൻ മുസ്ലിം ലീഗ്

ഹൈദരാബാദ്: അലിഗഡ് മുസ്ലിം യൂനിവേഴ്‌സിറ്റിയുടെ പൈതൃകവും പാരമ്പര്യവും നില നിര്‍ത്തണമെന്ന് എം.എസ്.എഫ് ദേശീയ കമ്മിറ്റി ആവശ്യപ്പെട്ടു.ഹൈദരാബാദില്‍ ചേര്‍ന്ന ദേശീയ എക്‌സിക്യുട്ടീവില്‍ അവതരിപ്പിച്ച പ്രമേയത്തിലൂടെയാണ് എം.എസ്.എഫ് ആവശ്യപ്പെട്ടത്.ദേശീയ പ്രസിഡന്റ് ടി.പി.അഷ്‌റഫലി അദ്ധ്യക്ഷത വഹിച്ചു.അനാവശ്യ വിവാദങ്ങളുണ്ടാക്കി അലിഗഡ് മുസ്‌ലിം യൂനിവേഴ്‌സിറ്റിയെ തകര്‍ക്കാനുള്ള ബി.ജെ.പി ശ്രമം പ്രതിഷേധാര്‍ഹമാണെന്നും പ്രതിരോധിച്ച് തോല്‍പിക്കുമെന്നും എം.എസ്.എഫ് അഭിപ്രായപ്പെട്ടു. ഭരണകൂടം പ്രഖ്യാപിച്ച നിരോധനാജ്ഞയും ഇന്റര്‍നെറ്റ് നിരോധനവും ഉടന്‍ പിന്‍വലിക്കണമെന്നും എം എസ് എഫ് ആവശ്യപ്പെട്ടു.1938 ലാണ് മുഹമ്മദലി ജിന്ന അലിഗഡ് മുസ് ലിം യൂനിവേഴ്‌സിറ്റിയുടെ ആജീവനാന്ത മെമ്പറായി തെരഞ്ഞെടുക്കപ്പെന്നുന്നത്. അന്നു മുതല്‍ ആജീവനാന്ത മെമ്പര്‍മാരായ മഹാത്മാഗാന്ധി, ജവഹര്‍ലാല്‍ നെഹ്‌റു, മൗലാന അബ്ദുല്‍ കലാം ആസാദ് തുടങ്ങിയവരുടെ ഛായ ചിത്രങ്ങള്‍ക്കൊപ്പം ജിന്നയുടെ ചിത്രവും അലിഗഡ് യൂനിവേഴ്‌സിറ്റിയില്‍ ആനാഛാദനം ചെയ്യപ്പെട്ടിട്ടുണ്ട്. ജിന്ന ഇന്ത്യയുടെ പ്രമുഖനായ സ്വതന്ത്ര സമര സേനാനാനിയാണെന്നും ഗാന്ധിജി തുടങ്ങിയ മറ്റു ദേശീയ നേതാക്കള്‍ക്കൊപ്പം രാജ്യത്തിന്റെ സ്വാതന്ത്ര്യത്തിന് വേണ്ടി പൊരുതിയ വ്യക്തിയാണെന്നും എം എസ് എഫ് പ്രമേയത്തിലൂടെ ഓര്‍മ്മിപ്പിച്ചു. ജിന്ന മാത്രമല്ല ഇന്ത്യാ വിഭജനത്തിന് ഉത്തരവാദിയെന്നും ദേശീയ സെക്രട്ടറി ഇ.ഷമീര്‍ അവതരിപ്പിച്ച പ്രമേയം ചൂണ്ടിക്കാട്ടി. അലിഗഡ് മുസ്‌ലിം യൂനിവേഴ്‌സിറ്റിയെ ജനാധിപത്യവിരുദ്ധരും തീ വ്രവാദ ചിന്താഗതിക്കരുമായി ചിത്രീകരിക്കാന്‍ സംഘ് പരിവാര്‍ ശ്രമിക്കുകയാണ്.രാജ്യത്തെ സ്വാതന്ത്ര സമരത്തെ ഒറ്റിക്കൊടുത്ത ചരിത്രമാണ് സംഘ് പരിവാരിന്റെത്.ഇന്ത്യ രാജ്യത്തിന് പൂര്‍ണ്ണ സ്വാതന്ത്ര്യം ആവശ്യപ്പെട്ട് ഇന്‍ക്വിലാബ് സിന്ദാബാദ് എന്ന മുദ്രാവാക്യം ആദ്യമായി ഉയര്‍ത്തിയ ഹസ്രത്ത് മൊഹാനി, ഖിലാഫത്ത് പ്രസ്ഥാനത്തിന് നേതൃത്വം നല്‍കിയ മൗലാന മുഹമ്മദലി തുടങ്ങിയ സ്വാതന്ത്ര്യ സമര സേനാനികളെ സംഭാവന ചെയ്ത പാരമ്പര്യമാണ് അലിഗഡ് യൂനിവേഴ്‌സിറ്റിക്കുള്ളത്. സംഘ് പരിവാറിന്റെ പാവകളായി പോലീസും ഭരണകൂടവും മാറരുതെന്ന് എം.എസ്.എഫ് ആവശ്യപ്പെട്ടു. സംഘ് പരിവാര്‍ നീക്കങ്ങള്‍ക്കെതിരെ സമരം ചെയ്യുന്ന വിദ്യാര്‍ത്ഥികളും സമാനമനസ്‌കരുമായി ചേര്‍ന്ന് പോരാട്ടത്തിന് എം.എസ്.എഫ് നേതൃത്വം നല്‍കും.ജനറല്‍ സെക്രട്ടറി എസ്.എച്ച്.മുഹമ്മദ് ഹര്‍ഷദ് സ്വാഗതം പറഞ്ഞു. അഡ്വ.ഫാത്തിമത തഹ്ലിയ, എന്‍.എ.കരീം ,പി.വി.അഹമ്മദ് സാജു, സിറാജുദ്ധീന്‍ നദ് വി ,അത്തീബ് ഖാന്‍(ഡല്‍ഹി) ,അല്‍ അമീന്‍ (തമിഴ്‌നാട് ), അസീസ് കളത്തൂര്‍, സെയ്ദലവി ഹൈദരാബാദ്, മന്‍സൂര്‍ കൊല്‍ക്കത്ത, മുഹമ്മദ് ഫൈസാന്‍ (വെല്ലൂര്‍), ജംഷീര്‍ മക്തല്‍ (തെലങ്കാന ), നവാസ് ശരീഫ് ഖുറേഷി (മഹാരാഷ്ട്ര), മുഹമ്മദ് തൗസീഫ് റസ്സാഖാന്‍ (ആസ്സാം ) ,ജാസിമുദ്ധീന്‍ (ബംഗാള്‍), ജവാദ് ബാസില്‍ (പോണ്ടിച്ചേരി യൂണിവേഴ്‌സിറ്റി),ആഷിഖ് റസൂല്‍ (ഹൈദരാബാദ് സെന്‍ട്രല്‍ യുണിവേഴ്‌സിറ്റി) എന്നിവര്‍ സംസാരിച്ചു. മുസ്ലിം ലീഗ് തെലങ്കാന സംസ്ഥാന പ്രസിഡന്റ് ഇംതിയാസ് ഖാന്‍ ,ജനറല്‍ സെക്രട്ടറി അബ്ദുല്‍ ഗനി, എന്നിവര്‍ ആശംസ അറിയിച്ചു.