nationalanthem – Chandrika Daily

ചൈനീസ് ഗാനത്തെ അപമാനിച്ചാല്‍ മൂന്നു വര്‍ഷം തടവ് ശിക്ഷ

chandrika — Sat, 04 Nov 2017 12:53:58 +0000

ബീജിങ്: ചൈനയുടെ ദേശീയ ഗാനത്തെ അപമാനിച്ചാല്‍ ക്രിമിനല്‍ കുറ്റത്തിന് ശിക്ഷ ഉറപ്പാക്കുന്ന നിയമം നിയമ നിര്‍മാണ സഭയായ നാഷണല്‍ പിപ്പീള്‍സ് കോണ്‍ഗ്രസ് പാസാക്കി. മൂന്നു വര്‍ഷം തടവു ശിക്ഷ ലഭിക്കാവുന്ന കുറ്റമായാണ് ഭേദഗതി ചെയ്തിരിക്കുന്നത്. പരസ്യമായി ദേശീയ ഗാനത്തെ അവമതിക്കുന്ന വിധത്തില്‍ പെരുമാറിയാല്‍ ശിക്ഷ ഉറപ്പാക്കുന്ന നിയമഭേദഗതി ഇന്നലെയാണ് കൊണ്ടുവന്നത്.
അടുത്ത കാലത്ത് ഹോങ്കോംങില്‍ നടന്ന രാഷ്ട്രീയ പ്രക്ഷോഭത്തിനിടെ ചൈനീസ് ദേശീയ ഗാനത്തെ ദുരുപയോഗിച്ചതിനും സോക്കര്‍ മത്സരത്തില്‍ ഉപയോഗിച്ചതുമാണ് ഇത്തരത്തില്‍ ചിന്തിക്കാന്‍ ചൈനയെ പ്രേരിപ്പിച്ചത്. ചൈനയുടെ അര്‍ദ്ധ സ്വയംഭരണാധികാരമുള്ള ഹോങ്കോംങിനും മക്കാവൂവിനും പ്രത്യേകം ദേശീയഗാനം കൊണ്ടുവരാനുള്ള നീക്കവും പീപ്പില്‍സ് കോണ്‍ഗ്രസ് നടത്തിയിട്ടുണ്ട്.

തമിഴ്‌നാട്ടില്‍ വിദ്യാഭ്യാസ സ്ഥാപനങ്ങളില്‍ വന്ദേമാതരം നിര്‍ബന്ധമാക്കി ഹൈക്കോടതി ഉത്തരവ്

chandrika — Tue, 25 Jul 2017 14:06:15 +0000

ചെന്നൈ: തമിഴ്‌നാട്ടിലെ വിദ്യാഭ്യാസ സ്ഥാപനങ്ങളില്‍ അടക്കം വന്ദേമാതരം നിര്‍ബന്ധമാക്കണമെന്ന് മദ്രാസ് ഹൈക്കോടതി. ആഴ്ചയില്‍ ഒരിക്കലെങ്കിലും വന്ദേമാതരം ആലപിക്കണമെന്നാണ് ഹൈക്കോടതിയുടെ നിര്‍ദേശം. തിങ്കളോ വെള്ളിയോ ഏതെങ്കിലും ഒരുദിവസം സ്‌കൂളുകളിലും കോളജുകളിലും സര്‍വകലാശാലകളിലും വന്ദേമാതരം ആലപിക്കണം. കൂടാതെ, മാസത്തിലൊരിക്കല്‍ സര്‍ക്കാര്‍ ഓഫിസുകളിലും സ്ഥാപനങ്ങളിലും സ്വകാര്യ കമ്പനികളിലും ഫാക്ടറികളിലും വ്യവസായശാലകളിലും വന്ദേമാതരം ആലപിക്കണമെന്നും ജസ്റ്റിസ് എം.വി. മുരളീധരന്‍ ഉത്തരവിട്ടു. ബംഗാളിയിലോ സംസ്‌കൃതത്തിലോ പാട്ടുപാടാന്‍ ജനങ്ങള്‍ക്കു ബുദ്ധിമുട്ടുണ്ടെങ്കില്‍ തമിഴിലേക്ക് മൊഴിമാറ്റാനുള്ള നടപടികള്‍ സ്വീകരിക്കണം. മൊഴിമാറ്റി തമിഴ്, ഇംഗ്ലിഷ് ഭാഷയില്‍ സര്‍ക്കാര്‍ വെബ്‌സൈറ്റുകളിലും സമൂഹമാധ്യമങ്ങളിലും പോസ്റ്റ് ചെയ്യാന്‍ ഡയറക്ടര്‍ ഓഫ് പബ്ലിക് ഇന്‍ഫര്‍മേഷനോട് കോടതി നിര്‍ദേശിച്ചു. എന്നാല്‍ പാടുന്നതിനോട് ആര്‍ക്കെങ്കിലും എതിര്‍പ്പുണ്ടെങ്കില്‍ അവരെ നിര്‍ബന്ധിക്കരുതെന്നും കോടതി ഉത്തരവിട്ടു. കെ. വീരമണി എന്നയാളുടെ ഹര്‍ജിയിലായിരുന്നു കോടതി തീരുമാനം. സ്‌കൂള്‍ അധ്യാപന തസ്തികയിലേക്ക് നടത്തിയ പരീക്ഷയില്‍ ഒരു മാര്‍ക്കിനാണ് വീരമണിക്ക് യോഗ്യത നേടാനാവാതെ പോയത്. വന്ദേമാതരം ഏതു ഭാഷയിലാണ് എഴുതിയതെന്ന ചോദ്യത്തിന് ബംഗാളി എന്നാണ് ഇയാള്‍ ഉത്തരം എഴുതിയത്. ഇതു തെറ്റാണെന്നു കാട്ടി ടീച്ചേഴ്‌സ് റിക്രൂട്ട്‌മെന്റ് ബോര്‍ഡ് വീരമണിയുടെ മാര്‍ക്ക് ഇല്ലാതാക്കുകയായിരുന്നു. ഇതേത്തുടര്‍ന്നാണ് ഇയാള്‍ കോടതിയെ സമീപിച്ചത്. പിന്നീട് കോടതി നിര്‍ദേശപ്രകാരം അഡ്വക്കേറ്റ് ജനറല്‍ നല്‍കിയ വിശദീകരണത്തില്‍ വന്ദേമാതരത്തിന്റെ യഥാര്‍ഥ ഭാഷ സംസ്‌കൃതമാണെന്നും എന്നാല്‍ എഴുതിയിരിക്കുന്നത് ബംഗാളിയിലാണെന്നും വ്യക്തമാക്കി. ഇതേത്തുടര്‍ന്നു വീരമണിയെ ബിടി അസിസ്റ്റന്റ് തസ്തികയില്‍ നിയമിക്കണമെന്ന് ജഡ്ജി സര്‍ക്കാരിനോട് ആവശ്യപ്പെട്ടു.

ദേശീയ പതാക തലതിരിച്ച് ഉയര്‍ത്തി: അടിവസ്ത്രം തിരിച്ചിട്ടതു പോലെ കരുതിയാല്‍ മതിയെന്ന് അസം ബി.ജെ.പി അധ്യക്ഷന്‍

chandrika — Fri, 27 Jan 2017 16:59:21 +0000

ഗുവാഹത്തി: ദേശീയ പതാകയെ അടിവസ്ത്രത്തോട് ഉപമിച്ച അസം ബിജെപി സംസ്ഥാന പ്രസിഡണ്ട് രജ്ഞിദ് ദാസ് നടത്തിയ പരാമര്‍ശം വിവാദത്തില്‍. ഗുവാഹതിയിലെ ബിജെപി സംസ്ഥാന കമ്മറ്റി ഓഫീസില്‍ നടത്തിയ റിപ്പബ്ലിക് ദിനാഘോഷത്തിലാണ് സംഭവം. ആദ്യം തലതിരിച്ച് ദേശീയ പതാക കെട്ടിയ ആസ്ഥാനത്ത്്, തെറ്റു തിരിച്ചറിഞ്ഞ് വീണ്ടും ഉയര്‍ത്തുകയായിരുന്നു. എന്നാല്‍ പിന്നീട്, ഇതേക്കുറിച്ച് മാധ്യമങ്ങളോട് നടത്തിയ പ്രതികരണമാണ് വിവാദത്തിനു വഴിവെച്ചത്. ‘ദേശീയ പതാക തെറ്റായാണ് ഉയര്‍ത്തിയതെന്ന് മനസ്സിലായ നിമിഷം തന്നെ അതിന്റെ ഉത്തരവാദിത്വം ഏല്‍പ്പിച്ചയാളെ ഞാന്‍ വിളിപ്പിച്ചു. അയാള്‍ ക്ഷമ ചോദിക്കുകയും അടിവസ്ത്രം ചില ദിവസങ്ങളില്‍ അറിയാതെ തിരിച്ചിടുന്നത് പോലെ കരുതിയാല്‍ മതിയെന്നും പറഞ്ഞു’ എന്നായിരുന്നു ദാസിന്റെ വിശദീകരണം.
ദേശീയ പതാക തല തിരിച്ചുയര്‍ത്തുകയും അടിവസ്ത്രത്തോട് ഉപമിക്കുകയും ചെയ്ത ബിജെപി പ്രസിഡണ്ട് രാജ്യത്തെ അപമാനിക്കുകയാണ് ചെയ്തതെന്ന് സംസ്ഥാന കോണ്‍ഗ്രസ് പ്രസിഡണ്ട് റിപുണ്‍ ബോറ പറഞ്ഞു.

Moment I noticed it(flag unfurled upside-down),it was corrected;Was oversight similar to wearing vest inside-out sometimes: Ranjit Das, BJP pic.twitter.com/DYnHJz8fOQ

— ANI (@ANI_news) January 27, 2017

ദേശീയഗാനത്തിന്റെ പേരില്‍ ഹിന്ദുത്വ ദേശീയത അടിച്ചേല്‍പിക്കാനാവില്ല: എം.ജി.എസ്

chandrika — Tue, 27 Dec 2016 17:55:49 +0000

കോഴിക്കോട്: സിനിമാഹാളില്‍ ദേശീയഗാനം ആലപിക്കുന്നതുമായി ബന്ധപ്പെട്ട കോടതിവിധിയുടെ മറില്‍ ഹിന്ദുത്വ ദേശീയത അടിച്ചേല്‍പിക്കാനുള്ള ശ്രമം വിലപ്പോവില്ലെന്ന് പ്രശസ്ത ചരിത്രകാരന്‍ ഡോ. എം.ജി.എസ് നാരായണന്‍. ഒരു വാരികക്ക് അനുവദിച്ച അഭിമുഖത്തിലാണ് ഇക്കാര്യം വ്യക്തമാക്കിയത്. ദേശീയഗാനത്തിന്റെ പേരില്‍ വര്‍ഗീയ ധ്രുവീകരണവും രാജ്യദ്രോഹ-ദേശസ്‌നേഹ യുഗ്മവും ഉണ്ടാക്കാനുള്ള ശ്രമം പരാജയപ്പെടുക തന്നെ ചെയ്യും. സ്വാതന്ത്ര്യസമരകാലത്ത് ദേശീയഗാനമെന്ന മട്ടില്‍ ഉപയോഗിച്ചിരുന്നത് വന്ദേമാതരം ആയിരുന്നു. ജനഗണമനയല്ല. ഇക്കാര്യം ഓര്‍ക്കേണ്ടതാണ്. ദേശീയഗാനം അടിച്ചേല്‍പിക്കുന്നതില്‍ അര്‍ത്ഥമില്ല. അത് ജനാധിപത്യത്തിന് എതിരാണ്. ജനാധിപത്യത്തില്‍ പലതരത്തിലുള്ള വാദമുഖങ്ങള്‍ ഉണ്ടാകും. ഒരേ സമയം പല കാഴ്ചപ്പാടുകള്‍ക്കും നിലനില്‍ക്കാനും മത്സരിക്കാനും കഴിയുന്നു എന്നതാണ് ജനാധിപത്യത്തിന്റെ മേന്മ. മനുഷ്യരില്‍ പൊതുവെ ഒരു അധികാരവാസനയുണ്ട്. എന്നാല്‍ ഒരാള്‍ മറ്റൊരാളുടെ മേല്‍ അധികാരം ചെലുത്തുന്നത് അധാര്‍മികമാണ്. ദേശീയഗാന വിവാദം അധികാരവുമായി ബന്ധപ്പെട്ടതാണ്. ദേശീയത എന്ന കാര്യം തന്നെ വലിയൊരു അധികാര സ്വരൂപമാണ്. ബ്രിട്ടനിലെ ദേശീയഗാനം മാറ്റണമെന്ന് ബ്രിട്ടീഷുകാരില്‍ ചിലര്‍ തന്നെ മുമ്പ് ആവശ്യപ്പെട്ടിരുന്നു. അവിടെയും ദേശീയഗാനം ആലപിച്ചപ്പോള്‍ ആളുകള്‍ എഴുന്നേറ്റു നില്‍ക്കാത്ത സന്ദര്‍ഭങ്ങള്‍ ഉണ്ടായിട്ടുണ്ട്. എം.ജി.എസ് പറഞ്ഞു.

‘നോട്ടു നിരോധനത്തിനു മുമ്പ് മോദി ദേശീയഗാനം ആലപിച്ചിരുന്നെങ്കില്‍’; ചോദ്യങ്ങളുമായി രാംഗോപാല്‍ വര്‍മയുടെ ട്വിറ്റ്

chandrika — Sat, 03 Dec 2016 04:31:19 +0000

സിനിമ ആരംഭിക്കുന്നതിന് മുമ്പ് എല്ലാ തിയേറ്ററുകളിലും ദേശീയഗാനം കേള്‍പ്പിക്കണമെന്ന സുപ്രീംകോടതി ഉത്തരവ് പുറത്തുവന്നതിനു പിന്നാലെ സമ്മിശ്ര പ്രതികരണമാണ് രാജ്യത്തുടനീളമുള്ളത്. ദേശീയഗാനം കേള്‍പ്പിക്കുമ്പോള്‍ കാണികള്‍ എല്ലാവരും ബഹുമാന സൂചകമായി എഴുന്നേറ്റ് നില്‍ക്കണമെന്നും സ്‌ക്രീനില്‍ ദേശീയ പതാക പ്രദര്‍ശിപ്പിക്കണമെന്നുമായിരുന്നു സുപ്രീംകോടതി ഉത്തരവ്. എന്നാല്‍ അനുകൂലമായ പ്രതികരണങ്ങള്‍ സിനിമ മേഖലയില്‍ നിന്ന് ഇതുവരെ വന്നിട്ടില്ലെങ്കിലും ബോളിവുഡ് സംവിധായകന്‍ രാംഗോപാല്‍ വര്‍മ്മ തന്റെ അഭിപ്രായം തുറന്നടിക്കാന്‍ ധൈര്യം കാണിച്ചു.

ട്വിറ്ററിലൂടെയാണ് വര്‍മ്മ തിയേറ്ററിലെ ദേശീയഗാന വിഷയത്തില്‍ പ്രതികരിച്ചത്. സുപ്രീംകോടതി ഉത്തരവിനെ കണക്കിന് പരിഹസിക്കുന്നതായിരുന്നു ട്വിറ്റ്. ഉത്തരവിനെതിരെ ചില ചോദ്യങ്ങള്‍ തൊടുത്തുവിടുകയാണ് വര്‍മ. ദേശീയഗാനത്തോടുള്ള ബഹുമാനം അടിച്ചേല്‍പ്പിക്കേണ്ട ഒന്നല്ല. നിര്‍ബന്ധബുദ്ധിയോടെ എന്തിനെയെങ്കിലും ബഹുമാനിക്കാല്‍ ശഠിച്ചാല്‍ വിപരീത ഫലമേ ഉണ്ടാവുകയുള്ളൂവെന്ന് വര്‍മ പറയുന്നു. ദേശീയഗാനത്തിന്റെ അര്‍ത്ഥം ചോദിച്ച് പരീക്ഷയിട്ടാല്‍ 99 ശതമാനം പേരും പരാജയപ്പെടുമെന്നും അദ്ദേഹം തുറന്നടിച്ചു. അഞ്ഞൂറിന്റെയും ആയിരത്തിന്റെയും നോട്ടുകള്‍ നിരോധിക്കുന്നതിനു മുമ്പ് പ്രധാനമന്ത്രി നരേന്ദ്രമോദി ദേശീയഗാനം ആലപിച്ചിരുന്നെങ്കില്‍ എന്ന് ആഗ്രഹിച്ചു പോവുകയാണ്. ഇന്ത്യന്‍ പൗരന്‍ എന്ന നിലയില്‍ അദ്ദേഹം അത് ചെയ്യേണ്ടതായിരുന്നുവെന്നും രാംഗോപാല്‍ വര്‍മ്മ ട്വിറ്റ് ചെയ്തു.

രാം ഗോപാല്‍ വര്‍മ്മയുടെ ചോദ്യങ്ങള്‍:

1. എന്തിനാണ് സിനിമ തിയറ്ററുകളില്‍ മാത്രമായി ദേശീയഗാനം ചുരുക്കുന്നത്? കടയിലേക്ക് പ്രവേശിക്കും മുമ്പ് ഉപഭോക്താവ് ദേശീയഗാനത്തിന്റെ വീഡിയോ കണ്ടുവെന്ന് ഓരോ വ്യാപാരിക്കും ഉറപ്പുവരുത്തികൂടെ?

2. ടെലിവിഷനിലൂടെയും റേഡിയോയിലൂടെയും എല്ലാ പരിപാടികള്‍ക്കു മുമ്പും ദേശീയഗാനം കേള്‍പ്പിക്കേണ്ടതല്ലെ?
3. മഹാന്മാരായ നേതാക്കളുടെ നയങ്ങളെ വിമര്‍ശിക്കുംമുമ്പ് ചാനല്‍ പരിപാടികള്‍ക്കിടെ ദേശീയഗാനം കേള്‍്പ്പിക്കേണ്ടതല്ലെ?
4. പത്രങ്ങളുടെ ഫ്രണ്ട് പേജുകളില്‍ ദേശീയ അച്ചടിക്കേണ്ടല്ലെ?
5. അമ്പലം, പള്ളി, മസ്ജിദ് എന്നിവിടങ്ങളില്‍ പ്രാര്‍ത്ഥനകള്‍ക്കു മുമ്പ് ദേശീയഗാനം കേള്‍പ്പിക്കേണ്ടതല്ലെ?

6. ഉറക്കമുണരുമ്പോള്‍ മാതാപിതാക്കളും മക്കളും ദേശീയഗാനം ചൊല്ലാന്‍ പരസ്പരം നിര്‍ബന്ധിക്കേണ്ടതല്ലെ?
7. നൈറ്റ് ക്ലബുകളിലും ദേശീയഗാനം നിര്‍ബന്ധമാക്കേണ്ടതല്ലെ?
8. ലോകസഭയിലും നിയമസഭകളിലുമെല്ലാം നടപടികള്‍ ആരംഭിക്കുംമുമ്പ് അംഗങ്ങള്‍ ദേശീയ ഗാനം ചൊല്ലേണ്ടതല്ലെ?

9. എന്തുകൊണ്ട് സ്‌കൂള്‍ കുട്ടികള്‍ മാത്രം ദേശീയഗാനം ചൊല്ലണം? കോളജുകളില്‍, ഓഫീസുകളില്‍ എന്തിന് പാര്‍ലമെന്റില്‍ പോലും അത് നിര്‍ബന്ധമില്ല. ദേശസ്‌നേഹം കുട്ടികള്‍ക്ക് മാത്രം മതിയോ?
10. അര്‍ത്ഥം മനസ്സിലാക്കുന്നതിന് ദേശീയഗാനത്തിന്റെ മറ്റ് പ്രാദേശികഭാഷാ പതിപ്പുകള്‍ കൂടി ഇറക്കേണ്ടതല്ലെ?

സിനിമാ തിയറ്ററുകളില്‍ ദേശീയഗാനം നിര്‍ബന്ധമാക്കി സുപ്രീംകോടതി

chandrika — Wed, 30 Nov 2016 06:56:35 +0000

ന്യൂഡല്‍ഹി: രാജ്യത്തെ സിനിമാ തിയറ്ററുകളില്‍ ഷോ ആരംഭിക്കുന്നതിനു മുമ്പ് ദേശീയ ഗാനം കേള്‍പ്പിക്കണമെന്ന് സുപ്രീംകോടതി ഉത്തരവ്. ഗാനം ആലപിക്കുമ്പോള്‍ സ്‌ക്രീനില്‍ ദേശീയ പതാക പ്രദര്‍ശിപ്പിക്കണമെന്നും പരമോന്നത നീതിപീഠം നിര്‍ദേശിച്ചു.

കാണികള്‍ ആദരവോടെ ദേശീയഗാനവും ദേശീയപതാകയും സ്വീകരിക്കണമെന്നും കോടതി വ്യക്തമാക്കി. ഇതുസംബന്ധിച്ച നിര്‍ദേശം എല്ലാ സെക്രട്ടറിമാര്‍ക്കും കൈമാറണമെന്ന് കേന്ദ്രസര്‍ക്കാറിനോട് കോടതി ആവശ്യപ്പെട്ടു.