Navas Sherif – Chandrika Daily

നവാസ് ഷെരീഫിന് മത്സരിക്കുന്നതിന് ആജീവനാന്ത വിലക്ക്

chandrika — Fri, 13 Apr 2018 15:02:55 +0000

ഇസ്‌ലാമാബാദ്: അഴിമതി ആരോപണം നേരിടുന്ന മുന്‍ പാക് പ്രധാനമന്ത്രി നവാസ് ഷെരീഫിന് തെരഞ്ഞെടുപ്പില്‍ പാക് സുപ്രീംകോടതി ആജീവനാന്ത വിലക്കേര്‍പ്പെടുത്തി. പനാമ പേപ്പര്‍ വിവാദത്തെ തുടര്‍ന്ന് പ്രധാനമന്ത്രി പദം രാജിവച്ച ഷെരീഫിന്റെ അധികാരത്തിലേക്ക് തിരിച്ചു വരാനുള്ള മോഹങ്ങള്‍ക്ക് ഇതോടെ തിരിച്ചടിയായി.
പാകിസ്താന്‍ ഭരണഘടനയുടെ ആര്‍ട്ടിക്കിള്‍ 62(1) എഫ് പ്രകാരം ആജീവനാന്ത വിലക്കാണ് നവാസിന് ഏര്‍പ്പെടുത്തിയിരിക്കുന്നത്. ഉത്തരവ് പ്രകാരം ഇനി ഷെരീഫിന് പാകിസ്താനില്‍ തെരഞ്ഞെടുപ്പുകളില്‍ മത്സരിക്കാനാവില്ല. പാക് മാധ്യമങ്ങളാണ് ഇക്കാര്യം റിപ്പോര്‍ട്ട് ചെയ്തത്.
മൂന്നു തവണ പാക് പ്രധാനമന്ത്രിയായ നവാസ് ഷെരീഫ് പനാമ പേപ്പര്‍ വിവാദങ്ങളെ തുടര്‍ന്നാണ് കുരുക്കിലായത്. ഈ വിവാദത്തില്‍ അഴിമതി കേസ് രജിസ്റ്റര്‍ ചെയ്തതോടെ 2017ല്‍ പ്രധാനമന്ത്രി പദം രാജിവച്ചു. ഈ കേസ് ഇപ്പോഴും കോടതിയുടെ പരിഗണനയിലാണ്. അതേ സമയം, താന്‍ തെറ്റൊന്നും ചെയ്തിട്ടില്ലെന്നും തനിക്ക് നേരെ നടന്ന ഗൂഢാലോചനയുടെ ഫലമാണ് വിലക്കെന്നും നവാസ് ഷെരീഫ് പ്രതികരിച്ചു. നവാസ് ഷെരീഫിനെതിരെ ചുമത്തിയ വകുപ്പ് പ്രകാരം മുന്‍ വര്‍ഷം തെഹരീഖ് ഇ ഇന്‍സാഫ് നേതാവ് ജഹാംഗീര്‍ തരീനെയും തെരഞ്ഞെടുപ്പില്‍ നിന്ന് മത്സരിക്കുന്നതില്‍ നിന്ന് സുപ്രിം കോടതി വിലക്കിയിരുന്നു.

ഇന്ത്യയുമായി നല്ല ബന്ധമാണ് ആഗ്രഹിക്കുന്നതെന്ന് പാക്‌സൈനിക മേധാവി ഖമര്‍ ബാജ്‌വ്

chandrika — Thu, 21 Dec 2017 12:05:23 +0000

ന്യൂഡല്‍ഹി: ഏറെ കാലമായി തുടരുന്ന ഇന്ത്യ-പാക്കിസ്താന്‍ പ്രശ്‌നത്തില്‍ നിര്‍ണ്ണായക ചുവടുമായി പാക്കിസ്താന്‍ രംഗത്ത്. ഇന്ത്യയുമായി നല്ല ബന്ധമാണ് ആഗ്രഹിക്കുന്നതെന്ന് പാക്‌സൈനിക മേധാവി ഖമര്‍ ബാജ്‌വ് പറഞ്ഞു.

ഇന്ത്യയുമായി നല്ല ബന്ധമാണ് ആഗ്രഹിക്കുന്നത്. ഇന്ത്യയുമായി നല്ല സൗഹൃദമാണ് പാക്‌സൈന്യം ആഗ്രഹിക്കുന്നത്. യുദ്ധമല്ല, ചര്‍ച്ചയാണ് പ്രശ്‌നപരിഹാരത്തിന് വേണ്ടത്. ഇന്ത്യയുമായുള്ള സമാധാന ചര്‍ച്ചയെ പിന്തുണക്കുന്നുവെന്നും അദ്ദേഹം പാക് പാര്‍ലമെന്റിന്റെ ഉപരിസഭയായ സെനറ്റില്‍ സുരക്ഷാസ്ഥിതിയെക്കുറിച്ച് നല്‍കിയ വിശദീകരണത്തില്‍ പറഞ്ഞു.

പാനമ അഴിമതി; വിചാരണയ്ക്കായി നവാസ് ഷെരീഫ് ലാഹോറിലെത്തി

chandrika — Thu, 02 Nov 2017 15:15:13 +0000

ലാഹോര്‍: പാനമ അഴിമതി ആരോപണത്തില്‍ വിചാരണ നേരിടുന്ന പാക് മുന്‍ പ്രധാനമന്ത്രി ലണ്ടനില്‍ നിന്നും പാകിസ്താനിലെത്തി. പാനമ പേപ്പര്‍ അഴിമതി ആരോപണത്തെ തുടര്‍ന്ന് നവാസിനെതിരെ മൂന്ന് കേസുകള്‍ നിലവിലുണ്ട്.
പലതവണ നോട്ടീസ് നല്‍കിയിട്ടും ഹാജരാകാത്തതിനെ തുടര്‍ന്നാണ് പാകിസ്താന്‍ അഴിമതി വിരുദ്ധ കോടതി അറസ്റ്റ് വാറണ്ട് പുറപ്പെടുവിച്ചത്. ഭാര്യ കുല്‍സുവിന്റെ ചികിത്സയ്ക്കായി ലണ്ടനില്‍ തുടരുകയായിരുന്നു. കോടതിയില്‍ നേരിട്ട് ഹാജരാകുന്നതിന് ഇളവ് അനുവദിക്കണമെന്നുള്ള ഷെരീഫിന്റെ അഭ്യര്‍ത്ഥന കോടതി തള്ളിയിരുന്നു.
കോടതിയില്‍ ഹാജരാകാതിരുന്നതിനെ തുടര്‍ന്ന് നവാസ് ഷെരീഫിനെതിരെ അറസ്റ്റ് വാറണ്ട് പുറപ്പെടുവിച്ചിരുന്നു. ഇതിനെ തുടര്‍ന്നാണ് ലണ്ടനില്‍ നിന്നും ഷെരീഫ് വിചാരണ നേരിടുന്നതിനായി ലാഹോറിലെത്തിയത്. കഴിഞ്ഞ മാസമാണ് നവാസ് ഷെരീഫ് ലണ്ടനിലെത്തിയത്. ഭാര്യ കുല്‍സും ഷെരീഫ് ക്യാന്‍സര്‍ രോഗത്തെ തുടര്‍ന്ന് ചികിത്സയിലാണ്. വിചാരണയ്ക്കായി നവാസ് ഇന്ന് കോടതിയില്‍ ഹാജരാവും. കേസില്‍ മകള്‍ മറിയം, മരുമകന്‍ മുഹമ്മദ് സാഫ്ദര്‍ എന്നിവര്‍ കോടതിയില്‍ കീഴടങ്ങിയിരുന്നു. പാനമ ആസ്ഥാനമായുള്ള മൊസാക് ഫൊന്‍സക എന്ന നിയമസ്ഥാപനം വഴി ഷെരീഫും മൂന്നു മക്കളും ലണ്ടനില്‍ വസ്തുവകകള്‍ വാങ്ങിയെന്നാണ് ആരോപണം.