രാധിക റോയിയും പ്രണോയ് റോയിയും ചേര്‍ന്ന് രൂപവത്കരിച്ച നിക്ഷേപക കമ്പനിയായ ആര്‍.ആര്‍.പി.ആര്‍. 2009ല്‍ വിശ്വപ്രധാന്‍ കൊമേഴ്‌സ്യല്‍ െ്രെപവറ്റ് ലിമിറ്റഡ് എന്ന പേരിലുള്ള കമ്പനിയില്‍ നിന്ന് 403.85 കോടി രൂപ വായ്പയെടുത്തിരുന്നു. ആര്‍.ആര്‍.പി.ആറിലെ 99.5 ശതമാനം ഓഹരിയായിരുന്നു ഈടായി നല്‍കിയത്. ആര്‍.ആര്‍.പി.ആറിന് എന്‍.ഡി.ടി.വിയില്‍ 29.18 ശതമാനം ഓഹരിയാണ് ഉണ്ടായിരുന്നത്.

മുകേഷ് അംബാനിയുടെ റിലയന്‍സുമായി ബന്ധമുണ്ടായിരുന്ന സംരംഭമായിരുന്നു വിശ്വപ്രധാന്‍ കൊമേഴ്‌സ്. ഇതിനെ പിന്നീട് ഗൗതം അദാനി ഏറ്റെടുത്തു. ഇതിനിടെ, കടം തിരിച്ചടയ്ക്കാനുള്ള സമയപരിധിയും കഴിഞ്ഞു. ഇതോടെയാണ് ഇക്കഴിഞ്ഞ ഓഗസ്റ്റില്‍ ആര്‍.ആര്‍.പി.ആറിന്റെ നിയന്ത്രണം അവര്‍ സ്വന്തമാക്കുകയും അതുവഴി എന്‍.ഡി.ടി.വി.യുടെ 29.18 ശതമാനം ഓഹരികള്‍ കൈകളിലെത്തുകയും ചെയ്തത്. അതിന് പിന്നാലെ, ഓപ്പണ്‍ ഓഫര്‍ വഴി 8.32 ശതമാനം ഓഹരി കൂടി സ്വന്തമായതോടെ അവരുടെ പങ്കാളിത്തം ഏതാണ്ട് 37.50 ശതമാനത്തിലേക്ക് ഉയര്‍ന്നു. ഇതിന് പിന്നാലെ റോയ് ദമ്പതികളുടെ ഓഹരി കൂടി സ്വന്തമാക്കിയതിലൂടെ എന്‍ഡിടിവിയുടെ നിയന്ത്രണം അദാനിയുടെ കൈകളിലായി.

റാഫേല്‍ വിമാന ഇടപാടുമായി ബന്ധപ്പെട്ട് ചാനല്‍ പുറത്തുവിട്ട ട്രൂത്ത് ഹൈപ്പ് പരിപാടിയില്‍ തങ്ങളുടെ കമ്പനിയുടെ സല്‍പേരിന് കളങ്കമുണ്ടാക്കിയെന്നാരോപിച്ചാണ് റിലയന്‍സ് കോടതിയെ സമീപിച്ചത്.

രാജ്യത്തിന്റെ പ്രതിരോധ സംവിധാനം ശക്തിപ്പെടുത്തുന്നതിന് ഫ്രാന്‍സില്‍ നിന്ന് 36 വിമാനങ്ങള്‍ വാങ്ങുന്നതിനുള്ള കരാറില്‍ റിലയന്‍സ് ഗ്രൂപ്പിനു അനുകൂല നടപടിയുണ്ടായി എന്നാണ് വാര്‍ത്തയിലുണ്ടായിരുന്നത്. ഫ്രഞ്ച് കമ്പനിയായ ഡസോള്‍ട്ടിനെ നിര്‍ബന്ധിച്ച് റിലയന്‍സിനെ രഹസ്യപങ്കാളിയാക്കി എന്ന വെളിപ്പെടുത്തല്‍ വ്യാപക ചര്‍ച്ചാവിഷയമായിരുന്നു.

എന്നാല്‍ വസ്തുതകള്‍ അടിച്ചമര്‍ത്താനും മാധ്യമങ്ങളെ തങ്ങളുടെ ജോലിയില്‍ നിന്ന് തടയാനുമാണ് അനില്‍ അംബാനിയും സംഘവും ശ്രമിക്കുന്നതെന്ന് എന്‍ഡിടിവി പ്രതികരിച്ചു. പൊതുതാല്‍പര്യം പരിഗണിച്ച് റാഫേല്‍ ഇടപാടിനെക്കുറിച്ച് ചോദ്യങ്ങള്‍ ചോദിക്കുന്നതിനും ഉത്തരങ്ങള്‍ ആരായുന്നതിനും എന്താണ് തെറ്റെന്ന് എന്‍ഡിടിവി സിഇഒ സുപര്‍ണ സിങ് ചോദിച്ചു.

മാധ്യമസ്വാതന്ത്ര്യത്തിനു നേരെയുള്ള കടന്നുകയറ്റമാണ് അംബാനി ഗ്രൂപ്പിന്റേതെന്നും ഇതിനെതിരെ തങ്ങള്‍ പോരാടുമെന്നും സുപര്‍ണ ട്വിറ്ററിലൂടെ വ്യക്തമാക്കി.

ചാനല്‍ ചര്‍ച്ച നടക്കുന്നതിനിടെ ഇടക്കു കയറിയ ബിജെപി നേതാവ് സാംബിത് പാട്ര എന്‍ഡിടിവി മോദി സര്‍ക്കാരിനെതിരായ അജണ്ട നടപ്പിലാക്കുകയാണെന്നും ഇതംഗീകരിക്കാനാവില്ലെന്നും തുറന്നടിച്ചു. ആരോപണം നിഷേധിച്ച അവതാരക ഗുരുതരമായ ആരോപണമാണ് ഉന്നയിച്ചിരിക്കുന്നതെന്ന് ഓര്‍മപ്പെടുത്തിയെങ്കിലും ബിജെപി നേതാവ് ആരോപണം വീണ്ടും ആവര്‍ത്തിക്കുകയാണുണ്ടായത്.
സഹികെട്ട ചാനല്‍ അവതാരക നിധി റസ്ദാന്‍ അങ്ങനെയെങ്കില്‍ താങ്കള്‍ക്ക് പാനലില്‍ നിന്നും പുറത്തുപോവാമെന്ന് മാന്യമായി അറിയിച്ചു. പാനലില്‍ നിന്ന് പുറത്തുപോവില്ലെന്ന് മാത്രമല്ല, ഇവിടെ ഇരുന്നു കൊണ്ടു തന്നെ എന്‍ഡിടിവിയുടെ അജണ്ട വിളിച്ചു പറയുമെന്നായി സാംബിത് പാട്ര.
ഇത്രയുമായതോടെ അവതാരക ചര്‍ച്ചയില്‍ നിന്നും താങ്കള്‍ പുറത്തുപോവണമെന്ന് ശഠിച്ചു. വാഗ്വാദം മുറുകുമ്പോള്‍ ചര്‍ച്ചക്കെത്തിയ മറ്റു പാനല്‍ അംഗങ്ങള്‍ അസ്വസ്ഥത പ്രകടിപ്പിക്കുന്നുണ്ടായിരുന്നു. ബിജെപി നേതാവ് പുറത്തുപോവാന്‍ തയാറല്ലെന്ന് കണ്ടതോടെ അവതാരക മറ്റു അതിഥികളോട് ചോദ്യങ്ങള്‍ ചോദിച്ച് ചര്‍ച്ച പൂര്‍ത്തിയാക്കുകയായിരുന്നു.