വിഷയത്തില്‍ തുടര്‍ പ്രതികരണത്തിനില്ലെന്ന് കഴിഞ്ഞ ദിവസം നിഷ വ്യക്തമാക്കിയിരുന്നു. എന്നാല്‍ റെയില്‍വേ പൊലീസ് കേസെടുത്ത സ്ഥിതിക്ക് നിഷ ജോസിന് സഹകരിക്കേണ്ടിവരും. ട്രെയിന്‍ യാത്രയില്‍ ആരാണ് അപമര്യാദയായി പെരുമാറിയതെന്ന് അവര്‍ക്ക് വെളിപ്പെടുത്തേണ്ടി വരും. നിഷ ജോസ്, അന്നത്തെ ടി.ടി.ആര്‍ തുടങ്ങിയവരുടെ മൊഴി രേഖപ്പെടുത്തും. അന്നത്തെ യാത്രാവിവരങ്ങള്‍ ലഭിക്കാനും, ടി.ടി.ആറിനെ കണ്ടെത്താനും പൊലീസ് ശ്രമം ആരംഭിച്ചിട്ടുണ്ട്.

നിഷ ജോസിന്റെ ആരോപണത്തില്‍ തനിക്കെതിരെയുണ്ടായ വിവാദത്തിന്റെ സത്യാവസ്ഥ പുറത്തുകൊണ്ടുവരണമെന്ന് ആവശ്യപ്പെട്ട് ഷോണ്‍ ജോര്‍ജ് പരാതി നല്‍കിയിരുന്നു. ഡി.ജി.പി ആദ്യം പരാതി തള്ളിയെങ്കിലും ഷോണ്‍ വീണ്ടും ഡി.ജി.പിയെ സമീപിച്ചതിനെ തുടര്‍ന്ന് അദ്ദേഹം റെയില്‍വേ പൊലീസിന് പരാതി കൈമാറുകയായിരുന്നു. ഈ പരാതിയിലാണ് ഇപ്പോള്‍ അന്വേഷണം നടക്കുന്നത്.

നിഷയുടെ ‘ദി അദര്‍ സൈഡ് ഓഫ് ദിസ് ലൈഫ്’ എന്ന പുസ്തകത്തിലെ ഒരു അധ്യായത്തിലാണ് ട്രെയിന്‍ യാത്രയിലെ ദുരനുഭവം വിവരിക്കുന്നത്. തിരുവനന്തപുരത്ത് നിന്ന് കോട്ടയത്തേക്ക് ട്രെയിനില്‍ വരുന്ന വഴിക്ക് ഒരു പ്രമുഖ നേതാവിന്റെ മകന്‍ തന്നെ അപമാനിക്കാന്‍ ശ്രമിച്ചെന്നാണ് പുസ്തകത്തിലുള്ളത്. വിഷയം ടി.ടി.ആറിനെ അറിയിച്ചെങ്കിലും രാഷ്ട്രീയനേതാവിന്റെ മകനായതിനാല്‍ ഇടപെടാന്‍ അദ്ദേഹം തയ്യാറായില്ലെന്ന് നിഷ പുസ്തകത്തില്‍ പറയുന്നു. അയാളെ ഇറക്കിവിട്ട് പ്രശ്‌നം പരിഹരിക്കുകയായിരുന്നുവെന്ന് പറഞ്ഞ നിഷ അപമാനിക്കാന്‍ ശ്രമിച്ച ആളുടെ പേര് നിഷ വെളിപ്പെടുത്തിയിരുന്നില്ല. പിന്നീട് വിവാദമായപ്പോഴും പേര് വെളിപ്പെടുത്താന്‍ തയ്യാറല്ലെന്നായിരുന്നു നിഷയുടെ ഭാഗം.

പുസ്തകം പുറത്തിറങ്ങയതോടെ വന്‍ വിവാദമാണ് ഉണ്ടായത്. അപമാനിക്കാന്‍ ശ്രമിച്ചത് പി.സി ജോര്‍ജിന്റെ മകന്‍ ഷോണ്‍ ജോര്‍ജ് ആണെന്ന പ്രചാരണം ശക്തിപ്പെട്ടു. വിഷയത്തില്‍ പി.സി ജോര്‍ജ്ജും രംഗത്തെത്തി. ഇതേത്തുടര്‍ന്ന് ഷോണ്‍ ജോര്‍ജ്ജ് ഡി.ജി.പിക്ക് പരാതി നല്‍കുകയായിരുന്നു.

ആരോപിതന്റെ പേര് വെളിപ്പെടുത്തണോ വേണ്ടയോ എന്നത് വ്യക്തിപരമായ കാര്യമാണ്. എന്തായാലും വിഷയത്തില്‍ കൂടുതല്‍ വിവാദത്തിനില്ലെന്ന് ജോസ് കെ മാണി വ്യക്തമാക്കി. ട്രെയിന്‍ യാത്രക്കിടെ കേരളത്തിലെ പ്രമുഖ രാഷ്ട്രീയ നേതാവിന്റെ മകന്‍ തന്നെ അപമാനിച്ചിട്ടുണ്ടെന്ന് ജോസ് കെ മാണി എം.പിയുടെ ഭാര്യ നിഷാ ജോസിന്റെ വെളിപ്പെടുത്തല്‍ വിവാദമായിരുന്നു. നിഷ എഴുതിയ ജീവിതാനുഭവക്കുറിപ്പുകളുടെ സമാഹാരമായ ‘ദി അദര്‍ സൈഡ് ഓഫ് ദിസ് ലൈഫ്’ എന്ന പുസ്തകത്തിലാണ് വെളിപ്പെടുത്തല്‍. സംഭവം വിവാദമായതോടെ വനിതാ കമ്മീഷനും രംഗത്തെത്തി. നിഷ പേര് വെളിപ്പെടുത്തുകയാണെങ്കില്‍ കേസെടുക്കുമെന്ന് കമ്മീഷന്‍ ചെയര്‍പേഴ്‌സണ്‍ എം.സി ജോസഫൈന്‍ പറഞ്ഞു.

പേരുവെളിപ്പെടുത്തിയാല്‍ അന്വേഷിക്കാന്‍ തയാറാണ്. സംഭവം നടന്നിട്ട് ഇത്രകൊല്ലമായിട്ടും പുറത്ത് പറയാത്തത് എന്തുകൊണ്ടാണെന്നും വനിത കമ്മീഷന്‍ചോദിച്ചു. അതേസമയം, നിഷക്കെതിരെ പി.സി ജോര്‍ജ് നടത്തുന്ന പ്രസ്താവനകള്‍ സ്ത്രീവിരുദ്ധമാണെന്നും അവര്‍ പറഞ്ഞു.

ജോസ് കെ.മാണിയുടെ ഭാര്യയായ നിഷ ജോസ് പുസ്തകത്തിലൂടെ അപകീര്‍ത്തികരമായ പരാമര്‍ശം നടത്തിയത് അന്വേഷിക്കണമെന്നാവശ്യപ്പെട്ട് പി.സി ജോര്‍ജിന്റെ മകന്‍ ഷോണ്‍ ജോര്‍ജ് നേരത്തെ രംഗത്ത് എത്തിയിരുന്നു. സംഭവത്തില്‍ ഷോണ്‍ ജോര്‍ജ് ഡി.ജി.പിക്കും കോട്ടയം എസ്.പിക്കും പരാതി നല്‍കി. ആരാണ് കടന്നു പിടിക്കാന്‍ ശ്രമിച്ചതെന്ന വെളിപ്പെടുത്തണമെന്നും അത് താനാണോ എന്ന് തുറന്നു പറയണമെന്നുമാണ് ഷോണ്‍ നല്‍കിയ പരാതിയില്‍ ആവശ്യപ്പെടുന്നത്. എന്നാല്‍ താന്‍ ട്രെയിന്‍ യാത്ര നടത്തിയത് കോഴിക്കോട്ട് നിന്ന് കോട്ടയത്തേക്കാണെന്നും. അന്നു മൂന്ന് സിപിഎം പ്രവര്‍ത്തകര്‍ തങ്ങള്‍ക്കൊപ്പമുണ്ടായിരുന്നുവെന്നും ഷോണ്‍ പറഞ്ഞു. ഇപ്പോള്‍ തന്നെ അപമാനിക്കാന്‍ നടക്കുന്ന ശ്രമത്തിനെതിരെ കോടതിയില്‍ പരാതി നല്‍കുമെന്നും അദേഹം അറിയിച്ചു.

നിഷ ജോസ് എഴുതിയ ജീവിതാനുഭവക്കുറിപ്പുകളുടെ സമാഹാരമായ ‘ദി അദര്‍ സൈഡ് ഓഫ് ദിസ് ലൈഫ്’ എന്ന പുസ്തകത്തിലാണ് വിവാദമായ വെളിപ്പെടുത്തല്‍. പ്രമുഖ രാഷ്ട്രീയനേതാവിന്റെ മകന്‍ ട്രെയിന്‍ യാത്രയില്‍ തന്നെ അപമാനിമാക്കാന്‍ ശ്രമിച്ചുവെന്ന് നിഷ പറയുന്നു. തിരുവനന്തപുരത്തുനിന്നു കോട്ടയത്തേക്കുള്ള ട്രെയിന്‍ യാത്രയ്ക്കിടെ തനിക്കു നേരെ പീഡനശ്രമമുണ്ടായെന്നാണു നിഷ വിവരിച്ചത്. അതേസമയം, തന്നെ അപമാനിച്ച രാഷ്ട്രീയ നേതാവിന്റെ മകന്റെ പേര് വെളിപ്പെടുത്തില്ലെന്ന നിലപാടിലാണ് നിഷ ജോസ്.