കേന്ദ്രനിര്‍ദ്ദേശ പ്രകാരമുള്ള അടിസ്ഥാന ശമ്പളം 20,000 രൂപയാക്കാന്‍ ചര്‍ച്ചയില്‍ തീരുമാനിച്ചു. ഇതിനപ്പുറം നേഴ്‌സുമാര്‍ക്ക് അധിക ശമ്പളം വേണമെന്ന ആവശ്യം പഠിക്കാന്‍ ഒരു സമിതി രൂപീകരിക്കും. സമിതി ഒരു മാസത്തിനകം റിപ്പോര്‍ട്ട് സമര്‍പ്പിക്കുകയും ചെയ്യും. തൊഴില്‍-ആരോഗ്യ നിയമ സെക്രട്ടറിമാരാണ് സമിതിയില്‍ ഉണ്ടാവുന്ന അംഗങ്ങള്‍.

സമരം ചെയ്തവരോട് പ്രതികാര നടപടി പാടില്ലെന്ന് മുഖ്യമന്ത്രി മാനേജ്‌മെന്റുകളോട് ആവശ്യപ്പെട്ടിട്ടുണ്ട്.കഴിഞ്ഞ 22 ദിവസമായി സെക്രട്ടേറിയറ്റിനു മുന്നില്‍ നേഴ്്‌സുമാര്‍ സമരം ചെയ്തുവരികയായിരുന്നു. ഇതിനിടയില്‍ പലപ്പോഴായി നടത്തിയ ചര്‍ച്ചകള്‍ പരാജയപ്പെടുകയായിരുന്നു. തുടര്‍ന്ന് ഇന്ന് മുഖ്യമന്ത്രിയുമായുള്ള ചര്‍ച്ചയില്‍ തീരുമാനമായി.

20,000 രൂപ അടിസ്ഥാന ശമ്പളം വേണമെന്ന ആവശ്യത്തില്‍ നേഴ്‌സുമാര്‍ ഉറച്ചുനില്‍ക്കുകയായിരുന്നു. എന്നാല്‍ ഈ ആവശ്യം അംഗീകരിക്കാന്‍ മാനേജുമെന്റുകള്‍ തയ്യാറായില്ല. ഇതോടെ ചര്‍ച്ച പരിഹാരമാകാതെ പിരിയുകയായിരുന്നു. ഈ സാഹചര്യത്തിലാണ് നാളെ നേഴ്‌സുമാര്‍ കൂട്ടഅവധിയെടുത്ത് പ്രതിഷേധിക്കുന്നത്. അത്യാഹിത വിഭാഗവും മറ്റ് അവശ്യസേവനങ്ങളും തടസ്സപ്പെടുത്തില്ലെന്നും മൂന്നിലൊന്ന് നേഴ്‌സുമാര്‍ ഹാജരാകുമെന്നും യു.എന്‍.എ പറയുന്നു.

അതേസമയം, ചര്‍ച്ച പരാജയമല്ലെന്ന നിലപാടിലാണ് മാനേജുമെന്റുകള്‍. ലഭ്യമാകുന്ന നഴ്‌സുമാരെ വെച്ച് ആശുപത്രികള്‍ നാളെ മുതല്‍ പ്രവര്‍ത്തിക്കുമെന്ന് മാനേജുമെന്റുകള്‍ വ്യക്തമാക്കി. സര്‍ക്കാരുമായി നടത്തുന്ന ചര്‍ച്ചയിലൂടെ മാത്രമേ ഇക്കാര്യത്തില്‍ അന്തിമ തീരുമാനമുണ്ടാകൂ എന്നാണ് മാനേജുമെന്റുകളുടെ നിലപാട്.