ശമ്പളം വര്‍ദ്ധിപ്പിക്കണമെന്നാവശ്യപ്പെട്ട് മുമ്പ് സമരം നടത്തിയ അഞ്ചു നഴ്‌സുമാരെ മാനേജ്‌മെന്റ് പിരിച്ചുവിട്ടിരുന്നു. ഇവരെ തിരിച്ചെടുക്കണമെന്ന ആവശ്യവുമായി മറ്റു നഴ്‌സുമാര്‍ നടത്തിയ സമരത്തിലാണ് സംഘര്‍ഷമുണ്ടായത്. ആസ്പത്രി കവാടത്തില്‍ സമരം നടത്തിയ നഴ്‌സുമാരെ അറസ്റ്റു ചെയ്യുന്നതിനിടെ പല നഴ്‌സുമാര്‍ക്കും പരിക്കേറ്റു. യു.എന്‍.എ സംസ്ഥാന പ്രസിഡന്റ് ജാസ്മിന്‍ഷാ ഉള്‍പ്പെടെയുള്ളവര്‍ സമരത്തില്‍ പങ്കെടുക്കാനെത്തിയിരുന്നു.

സമരത്തില്‍ ഇന്നുതന്നെ തീരുമാനം വേണം. ഇല്ലെങ്കില്‍ ശമ്പളം നിശ്ചയിച്ച് വിജ്ഞാപനം ഇറക്കേണ്ടി വരുമെന്ന് സര്‍ക്കാര്‍ അറിയിച്ചു. മാനേജുമെന്റുകളുമായുള്ള ചര്‍ച്ച താല്‍ക്കാലികമായി അവസാനിപ്പിച്ച മൂന്നു മന്ത്രിമാര്‍ അല്‍പ്പസമയത്തിനകം വീണ്ടും മാനേജുമെന്റുകളെ കാണും. ഇതില്‍ തീരുമാനമായില്ലെങ്കില്‍ സര്‍ക്കാര്‍ തീരുമാനിച്ചതുപോലെ മുന്നോട്ടുപോകുന്നതായിരിക്കും. എന്നാല്‍ ശമ്പളം സംബന്ധിച്ച് വിജ്ഞാപനം പുറപ്പെടുവിക്കുകയാണെങ്കില്‍ ഇതിനെതിരെ മാനേജുമെന്റുകള്‍ കോടതിയെ സമീപിക്കാനും സാധ്യതയുണ്ട്.

സെക്രട്ടേറിയറ്റിന് മുന്നില്‍ 12 ദിവസമായി തുടരുകയാണ് നേഴ്‌സുമാരുടെ സമരം. ഇന്ന്കൂടി സമരത്തിന് തീരുമാനമായില്ലെങ്കില്‍ നാളെ സംസ്ഥാന വ്യാപകമായി സൂചനാപണിമുടക്കും അതിനുശേഷം അനിശ്ചിതകാല പണിമുടക്കും നടത്താനാണ് നേഴ്‌സുമാരുടെ സംഘടനകള്‍ തീരുമാനിച്ചിരിക്കുന്നത്.