oakhi – Chandrika Daily

ഓഖി: 91 പേരെ കണ്ടെത്താനായില്ല

chandrika — Mon, 19 Mar 2018 14:42:14 +0000

തിരുവനന്തപുരം: ഓഖി ദുരന്തത്തില്‍പ്പെട്ട് കാണാതായത് 91 പേരെയെന്ന് മന്ത്രി ജെ മേഴ്സിക്കുട്ടിയമ്മ. ദുരന്തത്തില്‍ 52 പേര്‍ മരിച്ചതായി സ്ഥിരീകരിച്ചതായും മന്ത്രി നിയമസഭയില്‍ വ്യക്തമാക്കി.
ദുരന്തത്തില്‍ 102 പേരെ കാണാതായെന്ന് ആദ്യ എഫ്.ഐ.ആര്‍ രജിസ്റ്റര്‍ ചെയ്തു. ഇവരില്‍ ആറു പേര്‍ കന്യാകുമാരി ജില്ലക്കാരാണ്. ഇവരുടെ എഫ്.ഐ.ആര്‍ പൊലീസ് തമിഴ്നാടിന് കൈമാറി.. ശേഷിക്കുന്ന ആറു പേരില്‍ മൂന്നു പേര്‍ ഓഖി ദുരന്തത്തിന് മൂന്ന് മാസം മുമ്പ് കാണാതായവരാണ്. മറ്റ് മൂന്നുപേര്‍ മൂന്നു വര്‍ഷം മുമ്പ് കാണാതായവരാണ്. കാണാതായ 91 പേര്‍ക്ക് നഷ്ട പരിഹാരത്തുക നല്‍കുന്നതിനുള്ള നടപടികള്‍ പുരോഗമിക്കുകയാണെന്നും മന്ത്രി ചോദ്യോത്തരവേളയില്‍ പറഞ്ഞു.

ഓഖി പാക്കേജ്: കേരളത്തിന് ഒരു രൂപ പോലും നല്‍കാതെ കേന്ദ്രസര്‍ക്കാര്‍

chandrika — Wed, 14 Mar 2018 14:19:08 +0000

തിരുവനന്തപുരം: ഓഖി ദുരിതാശ്വാസത്തിനായി 7340.45 കോടി സഹായം ആവശ്യപ്പെട്ട കേരളത്തിന് ഒരു രൂപ പോലും നല്‍കാതെ കേന്ദ്രസര്‍ക്കാര്‍. ദേശീയ ദുരന്തനിവാരണ ഫണ്ടില്‍ നിന്ന് 133 കോടി മാത്രമാണ് ആകെ അനുവദിച്ചത്. നിയമസഭയില്‍ കെ.ദാസന്റെ ശ്രദ്ധക്ഷണിക്കലിന് മറുപടി നല്‍കിയ മന്ത്രി ജെ.മേഴ്‌സിക്കുട്ടിയമ്മ അറിയിച്ചതാണ് ഇക്കാര്യം. ഓഖി ദുരന്തം ഉണ്ടായിട്ട് മൂന്നര മാസം പിന്നിട്ടു.
പ്രത്യേക പാക്കേജില്‍ നിന്നുള്ള സഹായം നേടിയെടുക്കാന്‍ മുഖ്യമന്ത്രിയുടെ നേതൃത്വത്തില്‍ കേന്ദ്രത്തില്‍ സമ്മര്‍ദ്ദം ചെലുത്തുകയാണ്. കേന്ദ്രം അനുവദിച്ച 133 കോടി അപര്യാപ്തമാണ്. സംസ്ഥാനം സമര്‍പ്പിച്ച 7340.45കോടിയുടെ പ്രത്യേക പാക്കേജുമായി അനുവദിച്ച തുകയ്ക്ക് ബന്ധമില്ല. തുക ദേശീയ ദുരന്തനിവാരണ ഫണ്ടില്‍ നിന്നും സംസ്ഥാന ദുരന്ത പ്രതികരണ നിധിയിലേക്ക് അടിയന്തിര സഹായമായി അനുവദിച്ചിട്ടുള്ളതാണ്. ഓഖിയില്‍പെട്ട് കാണാതായ 102പേരുടെ കുടുംബങ്ങള്‍ക്ക്, മരിച്ചവര്‍ക്ക് നല്‍കുന്ന ധനസഹായം നല്‍കനാണ് തീരുമാനം. ഇതിനുള്ള നിയമതടസങ്ങള്‍ ഒഴിവാക്കിയെടുക്കാനുള്ള ത്വരിത പ്രവര്‍ത്തനങ്ങള്‍ നടത്തിവരികയാണ്. ഒടുവിലെ ഒദ്യോഗിക കണക്ക് പ്രകാരം ഓഖി ദുരന്തത്തില്‍ 52 മത്സ്യത്തൊഴിലാളികള്‍ക്ക് ജീവഹാനിയുണ്ടാവുകയും 102 മത്സ്യത്തൊഴിലാളികളെ കാണാതാവുകയും ചെയ്തിട്ടുണ്ട്. 384 മത്സ്യത്തൊഴിലാളികള്‍ക്ക് അവരുടെ വള്ളവും വലയും മറ്റ് അനുസാരികളും നഷ്ടപ്പെടു കയോ കേടുപാടുകള്‍ സംഭവിക്കുകയോ ചെയ്തിട്ടുണ്ട്. മത്സ്യമേഖലയിലെ 74 വീടുകള്‍ പൂര്‍ണ്ണമായും 458 വീടുകള്‍ ഭാഗികമായും നഷ്ടമുണ്ടായി.
കേന്ദ്രത്തിന് സമര്‍പ്പിച്ച പുനരധിവാസ പാക്കേജനുസരിച്ച് കൂടുതല്‍ ധനസഹായം ലഭിക്കുന്നതിന് കേന്ദ്ര ആഭ്യന്തര മന്ത്രാലയവും മറ്റ് വകുപ്പുകളുമായി ബന്ധപ്പെട്ട് പ്രവര്‍ത്തനങ്ങള്‍ എകോപിപ്പിക്കാന്‍ മത്സ്യബന്ധന വകുപ്പ് പ്രിന്‍സിപ്പല്‍ സെക്രട്ടറി കണ്‍വീനറായും റവന്യൂഭവനനിര്‍മ്മാണദുരന്ത നിവാരണം, ആരോഗ്യം, വൈദ്യുതി, സാമൂഹ്യനീതി, പൊതുമരാമത്ത്, ജലവിഭവം വകുപ്പുകളുടെ സെക്രട്ടറിമാര്‍ അംഗങ്ങളുമായി ഉന്നതതല ഔദ്യോഗിക സമിതി രൂപീകരിച്ചിട്ടുണ്ടെന്നും മന്ത്രി വ്യക്തമാക്കി.

ഓഖി ദുരന്തം: കേന്ദ്രസംഘം നാളെ കേരളത്തിലെത്തും

chandrika — Mon, 25 Dec 2017 18:12:09 +0000

ഓഖി ചുഴലിക്കാറ്റ് ദുരന്തത്തിന്റെ നാശനഷ്ടം വിലയിരുത്താനായി കേന്ദ്രസംഘം നാളെ കേരളത്തിലെത്തും. കേന്ദ്ര ആഭ്യന്തര അഡീഷണല്‍ സെക്രട്ടറി ബിപിന്‍മാലിക്കിന്റെ നേതൃത്വത്തിലുള്ള സംഘമാണ് ദുരന്തമേഖലകളില്‍ സന്ദര്‍ശനം നടത്തുന്നത്.

മൂന്നുടീമുകളായെത്തുന്ന സംഘം തിരുവനന്തപുരം ,കൊല്ലം ജില്ലകള്‍ക്ക് പുറമെ തൃശ്ശൂര്‍, മലപ്പുറം, എറണാകുളം, ആലപ്പുഴ എന്നിവിടങ്ങളിലും സ്ഥിതിഗതികള്‍ വിലയിരുത്തും. 29 വരെ കേന്ദ്രസംഘം കേരളത്തിലുണ്ടാകും. അഭൂതപൂര്‍വ്വമായ നാശനഷ്ടമാണ് ഓഖി ചുഴലിക്കാറ്റ് മൂലം സംസ്ഥാനത്തുണ്ടായത്.ഓഖി ദുരന്തം നാശം വിതച്ച കേരളത്തിന്റെ തീരപ്രദേശങ്ങളില്‍ കേന്ദ്രസംഘം പ്രത്യേക സന്ദര്‍ശനം നടത്തണമെന്ന സംസ്ഥാന സര്‍ക്കാരിന്റെ അഭ്യര്‍ത്ഥന മാനിച്ചാണ് ദുരന്തത്തിന്റെ വ്യാപ്തി മനസ്സിലാക്കാനായി കേന്ദ്രസംഘം എത്തുന്നത്.

കേന്ദ്ര ആഭ്യന്തര അഡീഷണല്‍ സെക്രട്ടറി ബിപിന്‍മാലിക്കിന്റെ നേതൃത്വത്തില്‍ മൂന്ന് സംഘങ്ങളായാണ് കേന്ദ്രസംഘം ദുരന്തബാധിത പ്രദേശങ്ങളിലെത്തി നാശനഷ്ടം വിലയിരുത്തുക. ബിപിന്‍മാലിക്കിന് പുറമെ ഫിഷറീസ് വകുപ്പ് അസിസ്റ്റന്റ് കമ്മീഷണര്‍ ഡോ.സന്‍ജയ് പാണ്ഡൈ, ഡിസാസ്റ്റര്‍ മാനേജ്‌മെന്റ് ഡിവിഷന്‍ ടെക്‌നിക്കല്‍ ഓഫീസര്‍ ഓംപ്രകാശ് എന്നിവരാണ് ആദ്യസംഘത്തിലുള്ളത്. തിരുവനന്തപുരം,കൊല്ലം ജില്ലകളില്‍ ആദ്യ ടീം സന്ദര്‍ശനം നടത്തും. എം.എം.ദാക്കത്തിന്റെ നേതൃത്വത്തിലുള്ള രണ്ടാമത്തെ സംഘത്തില്‍ ആകെ മൂന്നുപേരാനുള്ളത്. രണ്ടാമത്തെ സംഘം തൃശ്ശൂര്‍, മലപ്പുറം ജില്ലകളിലെ ദുരന്ത പ്രശ്‌നങ്ങള്‍ വിലയിരുത്തും.

ഓഖി: കോഴിക്കോട്ട് എട്ട് മൃതദേഹങ്ങള്‍ കണ്ടെത്തി; മരണസംഖ്യ 50 കടന്നു

chandrika — Tue, 12 Dec 2017 16:31:46 +0000

കോഴിക്കോട്: ഓഖി ചുഴലിക്കാറ്റ് ദുരന്തത്തില്‍ അകപ്പെട്ട എട്ട് പേരുടെ മൃതദേഹം കൂടി കണ്ടെത്തി. കോഴിക്കോട്ട് പുറംകടലില്‍ നിന്നാണ് മൃതദേഹങ്ങള്‍ കണ്ടെത്തിയത്. ഇതോടെ സംസ്ഥാനത്ത് ദുരന്തത്തില്‍ മരിച്ചവരുടെ എണ്ണം അമ്പത് കടന്നു. ഇന്നലെ മത്സ്യ ബന്ധനത്തിന് പോയ തൊഴിലാളികള്‍ വിവരം അറിയിച്ചതിനെ തുടര്‍ന്ന് കോഴിക്കോട് കടല്‍ത്തീരത്ത് നിന്ന് 12 നോട്ടിക്കല്‍ മൈല്‍ അകലെ കോസ്റ്റ് ഗാര്‍ഡും മറൈന്‍ എന്‍ഫോഴ്‌സും നടത്തിയ തെരച്ചിലിലാണ് മൃതദേഹങ്ങള്‍ കണ്ടത്.
മൃതദേഹങ്ങള്‍ തിരിച്ചറിയാനാവാത്ത അവസ്ഥയിലാണുള്ളത്. കോസ്റ്റ് ഗാര്‍ഡിന്റെ സി 144 നമ്പര്‍ കപ്പലില്‍ ബേപ്പൂരിലെത്തിച്ച മൃതദേഹങ്ങള്‍ കോഴിക്കോട് മെഡിക്കല്‍ കോളേജ് ആസ്പത്രി മോര്‍ച്ചറിയിലേക്ക് മാറ്റി. ആളെ തിരിച്ചറിയുന്നതിന് വേണ്ടി ഡിഎന്‍എ പരിശോധന നടത്തുമെന്ന് ജില്ലാ ഭരണകൂടം അറിയിച്ചു. ജില്ലാ കലക്ടര്‍ യു.വി. ജോസ് സ്ഥലം സന്ദര്‍ശിച്ച് അനന്തര നടപടികള്‍ക്കായി ബന്ധപ്പെട്ടവര്‍ക്ക് നിര്‍ദ്ദേശം നല്‍കി.
ദുരന്ത നിവാരണ വിഭാഗം ഡെപ്യൂട്ടി ഡയറക്ടര്‍ പി.പി. കൃഷ്ണന്‍കുട്ടി, ഫിഷറീസ് ഡെപ്യൂട്ടി ഡയറക്ടര്‍ മറിയം ഹസീന, എ.ഡി.ഒ പി.കെ. രഞ്ജിനി, തഹസിര്‍ദാര്‍ കെ.ടി സുബ്രഹ്മണ്യന്‍, അഡീഷണല്‍ തഹസില്‍ദാര്‍ ഇ. അനിത കുമാരി എന്നിവര്‍ നടപടികള്‍ക്ക് നേതൃത്വം നല്‍കി. കഴിഞ്ഞ ദിവസം പൊന്നാനി തീരത്തുനിന്നും ഒരു മൃതദേഹം കണ്ടെത്തിയിരുന്നു. കാണാതായവര്‍ക്കു വേണ്ടി നാവികസേനയുടെയും കോസ്റ്റ് ഗാര്‍ഡിന്റെയും തിരച്ചില്‍ തുടരുകയാണ്.
വെള്ളയില്‍ ഭാഗത്ത് ഒരു മൃതദേഹം കരയ്ക്കടിഞ്ഞതായി വാര്‍ത്ത പരന്നെങ്കിലും അധികൃതര്‍ നിഷേധിച്ചു. കടലില്‍ മൃതദേഹങ്ങള്‍ ഒഴുകി നടക്കുന്നു എന്ന വിവരത്തെ തുടര്‍ന്ന് നാവികസേനയും തീരസേനയും തിരച്ചില്‍ ഊര്‍ജിതമായി തുടരുകയാണ്. ഇന്ന് കാലത്ത് ഏഴു മണി മുതല്‍ സംയുക്ത പരിശോധന പുനരാരംഭിക്കുമെന്ന് കോസ്റ്റ് ഗാര്‍ഡ് അറിയിച്ചു. തീരദേശ പൊലീസിലെ എസ്‌ഐ സതീഷ് ബാബു, മുഹമ്മദ് പി, ഷംനാസ് വി.വി, പ്രസാദ് ആര്‍, ഉമ്മര്‍ ഫാറൂഖ് എന്നിവരും ബോട്ട് ജീവനക്കാരായ സൈനുദ്ദീന്‍, മജീദ്, സന്ദീപ്, സുബീഷ് എന്നിവരും തെരച്ചിലില്‍ പങ്കെടുത്തു. മറൈന്‍ എന്‍ഫോഴ്‌സമെന്റിലെ സി.ഐ സുജിത്തിന്റെ നേതൃത്വത്തില്‍ താജുദ്ദീന്‍, ഷൈജു, രാജേഷ് സിവില്‍ പൊലീസ് ഓഫീസറായ രൂപേഷ്, ബോട്ട് ജീവനക്കാരനായ ഹനീഫ് എന്നിവര്‍ തെരച്ചിലില്‍ പങ്കെടുത്തിരുന്നു.