കോഴിക്കോട്: ഓഖി ചുഴലിക്കാറ്റിനെ തുടര്‍ന്നുള്ള മരണ വാര്‍ത്തകള്‍ക്ക് അറുതിയാവുന്നില്ല. ദുരന്തം നടന്ന് രണ്ടാഴ്ച പിന്നിട്ടിട്ടും കടലില്‍നിന്ന് മൃതദേഹങ്ങള്‍ കണ്ടെടുക്കുന്നത് തുടരുകയാണ്. ഇന്നലെ മാത്രം സംസ്ഥാനത്തിന്റെ വിവിധ ഭാഗങ്ങളില്‍ നിന്നായി 12 മൃതദേഹങ്ങളാണ് കണ്ടെടുത്തത്. ഇതോടെ സംസ്ഥാനത്ത് ഓഖി ദുരന്തത്തില്‍ മരിച്ചവരുടെ എണ്ണം 64 ആയി ഉയര്‍ന്നു.
കോഴിക്കോട്ടു മാത്രം ഒമ്പത് മത്സ്യത്തൊഴിലാളികളുടെ മൃതദേഹങ്ങള്‍ കരക്കെത്തിച്ചു. മറൈന്‍ എന്‍ഫോഴ്‌സ്‌മെന്റും തീരദേശ പോലീസും കോസ്റ്റ് ഗാര്‍ഡും ഫിഷറീസും സംയുക്തമായി നടത്തിയ തിരച്ചിലിലാണ് കൂടുതല്‍ മൃതദേഹങ്ങള്‍ കണ്ടെത്തിയത്. ഇതോടെ രണ്ടു ദിവസത്തിനിടെ കോഴിക്കോട് കോസ്റ്റ് ഗാര്‍ഡും ഫിഷറീസും സംയുക്തമായി നടത്തിയ തിരച്ചിലില്‍ കണ്ടെത്തിയ മൃതദേഹങ്ങളുടെ എണ്ണം 17 ആയി.
മൃതദേഹങ്ങള്‍ കോഴിക്കോട് മെഡിക്കല്‍ കോളേജ് ആസ്പത്രി മോര്‍ച്ചറിയിലേക്ക് മാറ്റി. വെള്ളയിലിനും പുതിയാപ്പക്കും ഇടയില്‍ കരയില്‍ നിന്നു എട്ട് നോട്ടിക്കല്‍ മൈല്‍ ദൂരത്തിലാണ് ഏഴു മൃതദേഹങ്ങള്‍ കണ്ടെത്തിയത്. കടല്‍ വെള്ളത്തില്‍ 200 മീറ്റര്‍ പരിധിക്കുള്ളിലാണ് ഇവ ഉണ്ടായിരുന്നത്. കൂടാതെ, കാപ്പാട് കടപ്പുറത്ത് നിന്നും ഏഴ് നോട്ടിക്കല്‍ മൈല്‍ അകലെ ഒരു മൃതദേഹം കണ്ടെത്തി.
പുതിയാപ്പ ഹാര്‍ബറില്‍ മൃതദേഹം എത്തിച്ചതിന് ശേഷം പോസ്‌മോര്‍ട്ടത്തിനായി മെഡിക്കല്‍കോളേജിലേക്ക് മാറ്റി. ഇന്നലെ പുലര്‍ച്ചെ 5 മണിയോടെ ബേപ്പൂരില്‍ നിന്നും പുറപ്പെട്ട തിരച്ചില്‍ സംഘമാണ് മൃതദേഹം കണ്ടെത്തിയത്. ആരെയും തിരിച്ചറിഞ്ഞില്ലെങ്കിലും മൃതദേഹങ്ങളില്‍ നിന്ന് വാച്ച്, കുരിശുമാല എന്നിവ കണ്ടെടുത്തു. മൃതദേഹങ്ങളില്‍ അടിവസ്ത്രവും ഷര്‍ട്ടും മാത്രമാണുണ്ടായിരുന്നത്. മൃതദേഹങ്ങള്‍ പൂര്‍ണ്ണമായും അഴുകി വികൃതമായ നിലയിലായിരുന്നു വെന്ന് മറൈന്‍ എന്‍ഫോഴ്‌സ്‌മെന്റിന് കീഴിലുള്ള സീറസ്‌ക്യൂ ടീമിലെ ടി.രജീഷ് പറഞ്ഞു. പുറംകടലില്‍ മൃതദേഹങ്ങള്‍ കണ്ടെന്ന വിവരത്തെ തുടര്‍ന്ന് ഉച്ചക്ക് ശേഷവും തിരച്ചില്‍ തുടര്‍ന്നു. രാത്രി വളരെ വൈകിയതിന് ശേഷമാണ് തിരച്ചില്‍ അവസാനിപ്പിച്ചത്.

തിരുവനന്തപുരം: നാല്‍പതിലധികം മത്സ്യത്തൊഴിലാളികളുടെ മരണത്തിനും വ്യാപക നാശനഷ്ടത്തിനും ഇടയാക്കിയ ഓഖി ചുഴലിക്കാറ്റിനെ കുറിച്ച് മുന്നറിയിപ്പ് ലഭിച്ചിട്ടും അത് വിശകലനം ചെയ്ത് വേണ്ട മുന്‍കരുതല്‍ എടുക്കുന്നതില്‍ വീഴ്ച വരുത്തിയവര്‍ക്കെതിരെ നടപടിയെടുക്കാതെ സംസ്ഥാന സര്‍ക്കാര്‍ ഒളിച്ചുകളിക്കുന്നു. സംസ്ഥാന ദുരന്തനിവാരണ അതോറിറ്റിക്ക് കീഴില്‍ പ്രവര്‍ത്തിക്കുന്നതും അടിയന്തര സന്ദര്‍ഭങ്ങളില്‍ ഉണര്‍ന്നുപ്രവര്‍ത്തിക്കേണ്ടതുമായ സ്റ്റേറ്റ് എമര്‍ജന്‍സി ഓപ്പറേഷന്‍ സെന്ററിന് പ്രഥമദൃഷ്ട്യാ വീഴ്ച പറ്റിയെന്ന് വ്യക്തമായിട്ടും ഇതുവരെയും നടപടിയെടുത്തിട്ടില്ല. മുന്നറിയിപ്പുകളുടെ നിരീക്ഷണം, വിശകലനം, മുന്നറിയിപ്പുകള്‍ ഉദ്യോഗസ്ഥര്‍ക്കും ദുരന്ത സാധ്യതാപ്രദേശങ്ങളലേക്കും എത്തിക്കുക, ദുരന്ത പ്രതികരണ പ്രവര്‍ത്തനങ്ങള്‍ ഏകോപിപ്പിക്കുക തുടങ്ങിയ ചുമതലകളാണ് സെന്ററിനുള്ളത്.
2005ല്‍ പാര്‍ലമെന്റ് പാസാക്കിയ ദേശീയ ദുരന്ത നിവാരണ നിയമപ്രകാരമാണ് സംസ്ഥാന ദുരന്തനിവാരണ അതോറിറ്റി രൂപീകരിച്ചത്. ദുരന്തങ്ങളെക്കുറിച്ച് മുന്നറിയിപ്പുകള്‍ നല്‍കാന്‍ വിവിധ നോഡല്‍ ഏജന്‍സികളെ കേന്ദ്ര സര്‍ക്കാര്‍ ചുമതലപ്പെടുത്തിയിട്ടുണ്ട്. വര്‍ഷപാതം, കൊടുങ്കാറ്റ് എന്നിവയെക്കുറിച്ച് കേന്ദ്ര കാലാവസ്ഥാവകുപ്പും സുനാമി, കടല്‍ക്ഷോഭം എന്നിവയെക്കുറിച്ച് ദേശീയ സമുദ്ര വിവര വിനിമയ കേന്ദ്രവും പ്രളയത്തെ സംബന്ധിച്ച് കേന്ദ്ര ജലകമ്മീഷനും ഭൂകമ്പത്തെയും ഉരുള്‍പൊട്ടലിനെയും കുറിച്ച് ഇന്ത്യന്‍ ഭൗമശാസ്ത്ര സര്‍വേയുമാണ് മുന്നറിയിപ്പ് നല്‍കേണ്ടത്. പ്രവചനം സാധ്യമായ ദുരന്തങ്ങളെക്കുറിച്ച് ഈ ഏജന്‍സികളാണ് അതാതിടങ്ങളിലെ ചീഫ് സെക്രട്ടറി, ദുരന്തനിവാരണ വകുപ്പ് സെക്രട്ടറി, ദുരന്തനിവാരണ അതോറിറ്റി സെക്രട്ടറി, സ്റ്റേറ്റ് എമര്‍ജന്‍സി ഓപ്പറേഷന്‍ സെന്റര്‍ എന്നിവരെ അറിയിക്കേണ്ടത്.
ചുഴലിക്കാറ്റിന് ഓഖി എന്ന് പേരിടുന്നതിന് മുന്‍പുതന്നെ കൊടുങ്കാറ്റിന്റെ ആവിര്‍ഭാവം, പ്രതീക്ഷിക്കുന്ന വേഗത, കടല്‍ക്ഷോഭം എന്നിവയെ സംബന്ധിച്ച് കേന്ദ്ര കാലാവസ്ഥാ വകുപ്പും ദേശീയ സമുദ്ര വിവര വിനിമയ കേന്ദ്രവും നവംബര്‍ 29ന് ബുള്ളറ്റിന്‍ ഇറക്കിയിരുന്നു. ന്യൂനമര്‍ദം, തീവ്രന്യൂനമര്‍ദം എന്നീ വാക്കുകളാണ് ഉപയോഗിച്ചത്. ഇതിന്റെ ഫലമായി കടല്‍ പ്രക്ഷുബ്ധമാകുമെന്നും 4.2 മീറ്റര്‍ ഉയരത്തില്‍ കേരള തീരത്ത് തിരമാലകള്‍ അടിക്കുമെന്നും വ്യക്തമാക്കിയിരുന്നു. മണിക്കൂറില്‍ 62 കി.മീ. വേഗതയില്‍ കാറ്റടിക്കും എന്ന നിഗമനത്തില്‍ എത്തുമ്പോഴാണ് കാലാവസ്ഥ വകുപ്പ് അതിതീവ്ര ന്യൂനമര്‍ദത്തിനെ സൈക്ലോണ്‍ എന്ന ഗണത്തില്‍പ്പെടുത്തുന്നത്.
ന്യൂനമര്‍ദം ഉണ്ടാകുന്നതു മുതല്‍ അതാത് സംസ്ഥാനങ്ങളിലെ സ്റ്റേറ്റ് എമര്‍ജന്‍സി ഓപ്പറേഷന്‍ സെന്ററുകള്‍ ന്യൂനമര്‍ദത്തിന്റെ വളര്‍ച്ചയെ സസൂഷ്മം നിരീക്ഷിക്കുകയും ഓരോ ഘട്ടത്തിലും ബന്ധപ്പെട്ട അധികാരികളെയും വകുപ്പുകളെയും പ്രതരോധ നടപടികള്‍ സ്വീകരിക്കുന്നതിന് തയാറാക്കുകയും വേണം. ചുഴലിക്കാറ്റ് എന്ന വാക്ക് ഉപയോഗിച്ചിരുന്നില്ല എങ്കിലും നവംബര്‍ 30ന് പുലര്‍ച്ചെ 1.30നും രാവിലെ 5.30നും കാലാവസ്ഥ വകുപ്പ് പുറത്തിറക്കിയ പ്രത്യേക ബുള്ളറ്റിനുകളില്‍ മണിക്കൂറില്‍ 65 കി.മീ.വരെ ശക്തിയുള്ള കാറ്റ് തെക്കന്‍ കേരളത്തില്‍ വീശുമെന്ന് വ്യക്തമായ മുന്നറിയിപ്പ് നല്‍കിയിരുന്നു. ഈ മുന്നറിയിപ്പുകളോട് 24 മണിക്കൂറും പ്രവര്‍ത്തിക്കുന്ന സ്റ്റേറ്റ് എമര്‍ജന്‍സി ഓപ്പറേഷന്‍ സെന്റര്‍ എങ്ങനെ പ്രതികരിച്ചുവെന്ന് പരിശോധിച്ചാല്‍ വീഴ്ച ബോധ്യമാകും.

കേരളത്തിന്റെ തീരമേഖയില്‍ മണിക്കൂറില്‍ 45 മുതല്‍ 65 കിലോമീറ്റര്‍ വരെ വേഗതയില്‍ കാറ്റിനു സാധ്യതയുണ്ടെന്നു കാലാവസ്ഥാ നിരീക്ഷണ കേന്ദ്രം അറിയിച്ചു. വെള്ളയിലും പൊയ്ക്കാവിലും ആളുകളെ മാറ്റപ്പാര്‍പ്പിക്കുകയാണ്. കേരളത്തിലെ ചില സ്ഥലങ്ങളില്‍ കനത്ത മഴ തുടരും. അടുത്ത 24 മണിക്കൂര്‍ മത്സ്യത്തൊഴിലാളികള്‍ കടലില്‍ ഇറങ്ങരുതെന്നു മുന്നറിയിപ്പുണ്ട്.

അതേസമയം കേരളത്തില്‍ നിന്നുള്ള 66 ബോട്ടുകളും തമിഴ്‌നാട്ടിലെ രണ്ടു ബോട്ടുകളും മഹാരാഷ്ട്ര തീരത്തെത്തിയിരുന്നു.
ഓഖി ചുഴലക്കാറ്റില്‍ സംസ്ഥാനത്ത് മരണം പതിനാലായി. അഞ്ച് മത്സ്യത്തൊഴിലാളികളുടെ മൃതദേഹം ശനിയാഴ്ച കണ്ടെടുത്തു. ഇനിയും 126 പേരെ കണ്ടെത്താന്‍ ഉണ്ടെന്നാണു സര്‍ക്കാര്‍ കണക്ക്. 37 പേരെയാണ് ശനിയാഴ്ച കേരളത്തില്‍ രക്ഷപ്പെടുത്തിയത്. മരണസംഖ്യ ഉയര്‍ന്നതോടെ ആശങ്കയിലാണ് കടലോരം. തിരച്ചില്‍ ഊര്‍ജ്ജിതമല്ലെന്ന് ആരോപിച്ച് മത്സ്യത്തൊഴിലാളികളുടെ കുടുംബം കഴക്കൂട്ടത്ത് ദേശീയപാത ഉപരോധിച്ചിരുന്നു.