‘ഓപ്പറേഷന്‍ വനരക്ഷ’ എന്ന പേരില്‍ ശനിയാഴ്ച രാവിലെയാണ് സംസ്ഥാന വ്യാപകമായി വിജിലന്‍സ് മിന്നല്‍ പരിശോധന നടത്തിയത്. ലാന്‍ഡ് എന്‍ഒസി, മരംമുറി അനുമതി തുടങ്ങി നിരവധി ഇടപാടുകളില്‍ വന്‍ അഴിമതി നടന്നതായി കണ്ടെത്തി.

വള്ളക്കടവ് റേഞ്ച് ഓഫീസറുടെയും ബന്ധുക്കളുടെയും അക്കൗണ്ടുകളില്‍ കരാറുകാരന്‍ 72 ലക്ഷം രൂപ നിക്ഷേപിച്ചതായും, അതേ കരാറുകാരന്‍ തേക്കടി റേഞ്ച് ഓഫീസര്‍ നല്‍കിയ അക്കൗണ്ടുകളില്‍ 31 ലക്ഷം രൂപ അടിച്ചുകയറ്റിയതായും പരിശോധനയില്‍ വ്യക്തമായി.

ഉദ്യോഗസ്ഥരുടെ ഭാഗത്ത് ഗൗരവമായ കൃത്യവിലോപം നടന്നുവെന്ന് പ്രാഥമിക അന്വേഷണത്തില്‍ തെളിഞ്ഞതോടെ ഇരുവരെയും സസ്പെന്‍ഡ് ചെയ്തു. ”കുറ്റക്കാരെ ആരെയും സംരക്ഷിക്കില്ല; തെറ്റ് ചെയ്താല്‍ ഉയര്‍ന്ന പദവിയിലുള്ളവര്‍ക്കും നടപടി നേരിടേണ്ടിവരും” എന്ന് വനംമന്ത്രി എ.കെ. ശശീന്ദ്രന്‍ വ്യക്തമാക്കി.

പ്രധാനമായും ലാന്‍ഡ് എന്‍.ഒ.സി., മരം മുറി അനുമതികള്‍ എന്നിവയുമായി ബന്ധപ്പെട്ട ഫയലുകളാണ് പരിശോധനയ്ക്ക് വിധേയമാക്കിയത്. ഇത്തരം അനുമതികള്‍ അനുവദിക്കുമ്പോള്‍ ഉദ്യോഗസ്ഥരുടെ ഭാഗത്ത് വ്യാപകമായ ക്രമക്കേടുകള്‍ നടക്കാമെന്നാണ് ലഭിച്ച രഹസ്യ വിവരങ്ങള്‍. പരിശോധനയുടെ മുഖ്യ ലക്ഷ്യം ഈ ക്രമക്കേടുകള്‍ സംബന്ധിച്ച കൂടുതല്‍ തെളിവുകള്‍ കണ്ടെത്തലാണ്.

തിരുവനന്തപുരത്ത് പാലോട് വനം വകുപ്പ് ഓഫീസില്‍ തുടങ്ങിയ പരിശോധനക്ക് തലസ്ഥാനത്തു നിന്നുള്ള പ്രത്യേക വിജിലന്‍സ് സംഘം നേതൃത്വം നല്‍കുന്നു. സാധാരണക്കാര്‍ക്കും വനം മേഖലയുമായി ബന്ധപ്പെട്ട ജനങ്ങള്‍ക്കും സമയം പാലിച്ചുള്ള സേവനങ്ങള്‍ ലഭിക്കുന്നുണ്ടോയെന്നും, ആദിവാസി പ്രദേശങ്ങളിലെ ഭൂമി സംബന്ധമായ ഫയലുകളിലും ക്രമക്കേടുകള്‍ ഉണ്ടോയെന്നുമാണ് വിജിലന്‍സ് സംഘം പരിശോധിക്കുന്നത്.

പരിശോധനയുടെ അന്തിമ റിപ്പോര്‍ട്ട് പുറത്തുവരുന്നതോടെ കൂടുതല്‍ ഉദ്യോഗസ്ഥര്‍ക്കെതിരെ നടപടി എടുക്കുമെന്നും സൂചനകള്‍ ഉണ്ട്. വനവിഭവങ്ങള്‍ കൈകാര്യം ചെയ്യുന്നതില്‍ സുതാര്യത ഉറപ്പാക്കാനും അഴിമതി തടയാനും ‘ഓപ്പറേഷന്‍ വനരക്ഷ’ ലക്ഷ്യമിട്ടിരിക്കുന്നതായി വിജിലന്‍സ് വ്യക്തമാക്കിയിട്ടുണ്ട്.