ചില കോവിഡ് രോഗമുക്തരില്‍ വിവിധ അവയവങ്ങളില്‍ അസാധാരണത്വങ്ങള്‍ പഠനം കണ്ടെത്തി. 58 കോവിഡ് രോഗികളിലെ ദീര്‍ഘകാല കോവിഡ് പ്രഭാവമാണ് ഓക്‌സ്ഫഡ് സര്‍വകലാശാല വിലയിരുത്തിയത്.

പഠന വിധേയരാക്കിയ കോവിഡ് രോഗികളില്‍ 64 ശതമാനം പേര്‍ക്കും തുടര്‍ന്നും ശ്വാസംമുട്ടലുണ്ടായപ്പോള്‍ 55 ശതമാനം പേര്‍ക്ക് കാര്യമായ ക്ഷീണം അനുഭവപ്പെട്ടു. 60 ശതമാനം പേര്‍ക്ക് ശ്വാസകോശത്തിനും 29 ശതമാനം പേര്‍ക്ക് കിഡ്‌നിക്കും 26 ശതമാനം പേര്‍ക്ക് ഹൃദയത്തിനും 10 ശതമാനം പേര്‍ക്ക് കരളിനും പ്രശ്‌നങ്ങളുണ്ടെന്ന് എംആര്‍ഐ സ്‌കാന്‍ റിപ്പോര്‍ട്ടുകള്‍ വെളിപ്പെടുത്തുന്നു.

ആശുപത്രിയില്‍ നിന്ന് ഡിസ്ചാര്‍ജ് ചെയ്ത കോവിഡ് രോഗികള്‍ക്ക് കൂടുതല്‍ പരിചരണം കിട്ടേണ്ട ആവശ്യകതയാണ് പഠനം ബോധ്യപ്പെടുത്തുന്നത് എന്ന് സര്‍വകലാശാലാ റാഡ്ക്ലിഫ് ഡിപ്പാര്‍ട്‌മെന്റ് ഓഫ് മെഡിസിനിലെ ഡോക്ടര്‍ ബെറ്റി രാമന്‍ പറഞ്ഞു.

ഓഗസ്റ്റ് 22 മുതലാണ് ഇന്ത്യയില്‍ ഓക്‌സ്‌ഫോഡ് വാക്‌സിന്റെ മൂന്നാം ഘട്ട പരീക്ഷണങ്ങള്‍ ആരംഭിക്കുന്നത്. ആദ്യ ദിവസം നൂറോളം പേര്‍ക്ക് പ്രതിരോധ കുത്തിവയ്പ്പ് നല്‍കുമെന്നും റിപ്പോര്‍ട്ടുകള്‍ വ്യക്തമാക്കുന്നു.

സെറം ഇന്‍സ്റ്റിറ്റിയൂട്ട് ഓഫ് ഇന്ത്യയും ഓക്‌സ്ഫഡ് യൂണിവേഴ്‌സിറ്റിയും സംയുക്തമായി ചേര്‍ന്നാണ് വാക്‌സിന്‍ വികസിപ്പിച്ചത്. രാജ്യത്തെ 20 കേന്ദ്രങ്ങളിലാണ് മൂന്നാം ഘട്ടത്തിലെ പരീക്ഷണം. പുനെ, മുംബൈ, മഹാരാഷ്ട്ര, ഗുജറാത്തിലെ അഹമ്മദാബാദ് എന്നിവിടങ്ങളിലായാണ് പരീക്ഷണം. ഈ ഘട്ടത്തില്‍ 1,600 പേര്‍ക്കാണ് വാക്‌സിന്‍ നല്‍കുക.

പരീക്ഷണത്തിനായി തിരഞ്ഞെടുത്തിരിക്കുന്ന 20 സ്ഥലങ്ങളിലുള്ള ഹോട്‌സ്‌പോട്ടുകളായ അഞ്ച് വ്യത്യസ്ത പ്രദേശങ്ങളിലെ ആശുപത്രികളാണ് പരീക്ഷണത്തിനായി തിരഞ്ഞെടുത്തിരിക്കുന്നത്. 1,112 ആശുപത്രികളില്‍ ഐസിഎംആറുമായി സഹകരിച്ച് പരീക്ഷണങ്ങള്‍ നടത്താനാണ് ആലോചനയെന്ന് സെറം ഇന്‍സ്റ്റിറ്റിയൂട്ടിന്റെ വക്താവ് വ്യക്തമാക്കി.

രാജ്യത്തുടനീളം തിരഞ്ഞെടുത്ത 17 സൈറ്റുകളിലായി 18 വയസ്സിനു മുകളില്‍ പ്രായമുള്ള 1,600 ആളുകളുമായി സെറം മനുഷ്യയിലെ പരീക്ഷണത്തിന്റെ രണ്ടാം ഘട്ടം ആരംഭിച്ചിരുന്നു.ഭാരത് ബയോടെക്കിന്റെ കോവാക്‌സിന്‍ ആദ്യഘട്ട പരീക്ഷണത്തിലാണ്. ഓക്‌സ്‌ഫോര്‍ഡ് വാക്‌സിന്‍ യുകെയിലെ മനുഷ്യ പരീക്ഷണങ്ങളുടെ ആദ്യ ഘട്ടങ്ങള്‍ പൂര്‍ത്തിയാക്കി മികച്ച ഫലങ്ങള്‍ കാണിച്ചിരുന്നു.

നിലവിലെ റിപ്പോര്‍ട്ടുകളുടെ അടിസ്ഥാനത്തില്‍ മനുഷ്യനിലെ വാക്‌സിന്റെ രണ്ടാംഘട്ടം വിജയിക്കുകയാണെങ്കില്‍ നവംബറില്‍ വാക്‌സിന്‍ വിപണിയിലെത്തും.