padma award – Chandrika Daily

പത്മ പുരസ്‌കാരം: മമ്മൂട്ടിയുടെയും കെ എസ് ചിത്രയുടെയുമടക്കം പേരുകള്‍ ഒഴിവാക്കി കേന്ദ്രം

webdesk13 — Thu, 06 Feb 2025 04:14:59 +0000

കേരളം നിര്‍ദ്ദേശിച്ച ഭൂരിപക്ഷം പേരുകളും തള്ളിയാണ് ഇത്തവണയും പത്മ പുരസ്‌ക്കാരങ്ങള്‍ കേന്ദ്ര സര്‍ക്കാര്‍ പ്രഖ്യാപിച്ചത്. കെ.എസ് ചിത്രയ്ക്ക് പത്മവിഭൂഷണും മമ്മൂട്ടിയ്ക്ക് പത്മഭൂഷണും പ്രൊഫ.എം.കെ സാനുവിന് പത്മശ്രീയും നല്‍കണമെന്നായിരുന്നു കേരളത്തിന്റെ ശിപാര്‍ശ. കേരളം കേന്ദ്രത്തിന് നല്‍കിയ ശുപാര്‍ശ പട്ടിക പുറത്തുവന്നു.

റിപ്പബ്ലിക് ദിനത്തില്‍ പ്രഖ്യാപിച്ച പത്മ പുരസ്‌ക്കാരങ്ങളില്‍ കേരളം നിര്‍ദ്ദേശിച്ച പേരുകളില്‍ ഭൂരിപക്ഷവും കേന്ദ്ര സര്‍ക്കാര്‍ പരിഗണിച്ചില്ലെന്ന് തെളിയിക്കുന്നതാണ് പുറത്ത് വരുന്ന രേഖകള്‍. സംസ്ഥാന സര്‍ക്കാര്‍ ശിപാര്‍ശ പ്രകാരം എഴുത്തുകാരന്‍ എം.ടി വാസുദേവന്‍ നായര്‍ക്ക് പത്മവിഭൂഷണും ഒളിമ്പ്യന്‍ പി.ആര്‍ ശ്രീജേഷ് പത്മഭൂഷണും മാത്രമാണ് നല്‍കിയത്.

സര്‍ക്കാര്‍ നല്‍കിയ 20 അംഗ പട്ടികയില്‍ ഇടം പിടിയ്ക്കാത്ത ഹൃദയശസ്ത്രക്രിയാ വിദഗ്ധനായ ഡോ. ജോസ് ചാക്കോ പെരിയപ്പുറത്തിനും സിനിമ താരവും നര്‍ത്തകിയുമായ ശോഭനയ്ക്കും പത്മഭൂഷണ്‍ നല്‍കി. മലയാളി ഫുട്‌ബോള്‍ താരം ഐ.എം. വിജയന്‍, കലാകാരി ഓമനക്കുട്ടിയമ്മ എന്നിവര്‍ക്കും പത്മശ്രീ നല്‍കി.

കേരളം നല്‍കിയ പട്ടികയില്‍ കെ എസ് ചിത്രയ്ക്ക് പത്മവിഭൂഷണനും മമ്മൂട്ടിയ്ക്കും, എഴുത്തുകാരന്‍ ടി പത്മനാഭനും പത്മഭൂഷണും നല്‍കണമെന്നായിരുന്നു ശിപാര്‍ശ. ഇത് പൂര്‍ണ്ണമായും കേന്ദ്രം തഴഞ്ഞു.

പ്രഫ. എം കെ സാനു, സൂര്യ കൃഷ്ണമൂര്‍ത്തി, വൈക്കം വിജയലക്ഷ്മി, പുനലൂര്‍ സോമരാജന്‍, പത്മിനി തോമസ്, കെ ജയകുമാര്‍ ഐഎഎസ്, വ്യവസായി ടി എസ് കല്യാണരാമന്‍ എന്നിവര്‍ക്ക് പത്മശ്രീ നല്‍കണമെന്ന കേരളത്തിന്റെ ശിപാര്‍ശയും കേന്ദ്രം പരിഗണിച്ചില്ല. കേരളം നല്‍കിയ പട്ടികയില്‍ ഒരാളെ പോലും പത്മശ്രീയ്ക്ക് പരിഗണിച്ചില്ല.

നമ്പി നാരായണനും മോഹന്‍ലാലിനും പത്മഭൂഷണ്‍

chandrika — Fri, 25 Jan 2019 17:52:15 +0000

ന്യൂഡല്‍ഹി: ഈ വര്‍ഷത്തെ പത്മ പുരസ്‌കാരങ്ങള്‍ പ്രഖ്യാപിച്ചു. സിനിമാ താരം മോഹന്‍ലാല്‍, ശാസ്ത്രജ്ഞന്‍ നമ്പി നാരായണന്‍, കുല്‍ദീപ് നയ്യാര്‍ (മരണാനന്തരം), ബചേന്ദ്രി പാല്‍, നാടന്‍ കലാകാരന്‍ ടീജന്‍ ഭായ്, ജിബൂത്തി പ്രസിഡന്റ് ഇസ്മാഈല്‍ ഉമര്‍ ഗുല്ല, എല്‍ ആന്റ് ജി കമ്പനി ചെയര്‍മാന്‍ അനില്‍ മിഭായ് നായിക്, എഴുത്തുകാരന്‍ ബല്‍വന്ത് മൊറേശ്വര്‍ പുരന്ദരെ എന്നിവര്‍ പത്മഭൂഷണ്‍ പുരസ്‌കാരത്തിനും, ഗായകരായ കെ.ജി ജയന്‍, ശങ്കര്‍ മഹാദേവന്‍, പ്രഭുദേവ, പുരാവസ്തു ഗവേഷകന്‍ കെ.കെ മുഹമ്മദ്, ശിവമണി, ഫുട്‌ബോള്‍ താരം സുനില്‍ ഛേത്രി, ബജ്‌റംഗ് പൂനിയ, ക്രിക്കറ്റ് താരം ഗൗതം ഗംഭീര്‍, ശ്രീനാരായണ ധര്‍മ സംഘം ട്രസ്റ്റ് പ്രസിഡന്റ് സ്വാമി വിശുദ്ധാനന്ത എന്നിവര്‍ പത്മ ശ്രീ പുരസ്‌കാരത്തിന് അര്‍ഹരായി.

സംസ്ഥാന പട്ടികയില്‍ പേരില്ല; പി.പരമേശ്വരനെ പദ്മ അവാര്‍ഡിന് ശുപാര്‍ശ ചെയ്തത് അദ്ദേഹം തന്നെയെന്ന് കേന്ദ്രം

chandrika — Tue, 30 Jan 2018 10:13:29 +0000

ന്യൂഡല്‍ഹി: ഭാരതീയ വിചാരകേന്ദ്രം ഡയറക്ടര്‍ പി.പരമേശ്വരന് പദ്മ അവാര്‍ഡിന് ശുപാര്‍ശ ചെയ്തത് അദ്ദേഹം തന്നെയാണെന്ന് കേന്ദ്ര ആഭ്യന്തര മന്ത്രാലയം. ആഭ്യന്തര മന്ത്രാലയത്തിന്റെ വെബ്‌സൈറ്റില്‍ നല്‍കിയിരിക്കുന്ന വിവരങ്ങളിലാണ് അവാര്‍ഡിനായി പരമേശ്വരന്‍ സ്വയം നാമനിര്‍ദേശം ചെയ്തതായി വ്യക്തമാക്കുന്നത്. കേരള സര്‍ക്കാര്‍ ശുപാര്‍ശ ചെയ്ത പട്ടികയില്‍ പരമേശ്വരന്‍ ഉള്‍പ്പെട്ടിട്ടില്ലെന്ന് നേരത്തെ വ്യക്തമായിരുന്നു.
വെബ്‌സൈറ്റിലെ വിവരങ്ങളനുസരിച്ച് നാലു വ്യക്തികളാണ് പദ്മ അവാര്‍ഡിനായി പി.പരമേശ്വരന്റെ പേര് ശുപാര്‍ശ ചെയ്തത്. ഇതില്‍ തിരുവനന്തപുരത്ത് നിന്നുള്ള ഒരു ‘കെ’ എന്ന പേരും പി.പരമേശ്വരനും സുരേഷും പാര്‍ലമെന്റംഗം പ്രൊഫസര്‍ റിച്ചാര്‍ഡ് ഹേയുമാണ് നാലു വ്യക്തികളായി ചൂണ്ടിക്കാട്ടുന്നത്. ഇതില്‍ ‘കെ’യും സുരേഷും സ്വാമി പ്രകാശാനന്ദയുടെ പേരും പദ്മ അവാര്‍ഡിനായി ശുപാര്‍ശ ചെയ്തിട്ടുണ്ട്. കോട്ടയം സ്വദേശി അനിരുദ്ധ് ഇന്ദുചൂഡന്‍ കുമ്മനം രാജശേഖരന്റെ പേരും പദ്മ അവാര്‍ഡിനായി ശുപാര്‍ശ ചെയ്തിട്ടുണ്ട്.
കേരളം നല്‍കിയ 42 പേരുടെ പട്ടികയില്‍ 41 പേരുകളും കേന്ദ്രം തള്ളിയിരുന്നു. എം.ടി വാസുദേവന്‍ നായര്‍, മമ്മൂട്ടി, മോഹന്‍ലാല്‍, സുഗതകുമാരി, കലാമണ്ഡലം ഗോപി, സൂര്യ കൃഷ്ണമൂര്‍ത്തി തുടങ്ങിയവരുടെ പേരുകളാണ് കേരളം ശുപാര്‍ശ ചെയ്തത്. എന്നാല്‍ സംസ്ഥാനം നല്‍കിയ പട്ടികയില്‍ ഇടം നേടാത്ത പി.പരമേശ്വരന്‍, ഡോ.എം.ആര്‍ രാജഗോപാല്‍, ലക്ഷ്മിക്കുട്ടിയമ്മ എന്നിവരെയാണ് കേന്ദ്രം പദ്മ പുരസ്‌കാരത്തിനായി തെരഞ്ഞെടുത്തത്.