pak cricket – Chandrika Daily

ഇമ്രാന്‍ ഖാനോട് മാപ്പു പറഞ്ഞ് മിയാന്‍ദാദ്; മനംമാറ്റത്തിന് പിന്നില്‍ ബന്ധു നിയമനമെന്ന് ആരോപണം

web desk 1 — Sat, 22 Aug 2020 14:35:13 +0000

ഇസ്ലാമാബാദ്: കഴിഞ്ഞ ദിവസം വരെ പാക് പ്രധാനമന്ത്രി ഇമ്രാന്‍ ഖാനെ പരസ്യമായി വിമര്‍ശിച്ച പാക് മുന്‍ ക്രിക്കറ്റ് താരം ജാവേദ് മിയാന്‍ദാദ് മലക്കം മറിഞ്ഞു. ഇമ്രാനോട് മാപ്പ് പറഞ്ഞ് മിയാന്‍ ദാദ് രംഗത്ത് എത്തി. തന്റെ യൂട്യൂബ് ചാനലിലൂടെയാണ് മിയാന്‍ദാദിന്റെ മാപ്പ് പറച്ചില്‍.

കുറച്ച് ദിവസം മുന്‍പാണ് പാക് പ്രധാനമന്ത്രിക്കെതിരെ ശക്തമായ വിമര്‍ശനം മിയാന്‍ദാദ് ഉയര്‍ത്തിയത്. പാക്കിസ്ഥാന്‍ ക്രിക്കറ്റിനെ തകര്‍ക്കുന്നതു പ്രധാനമന്ത്രി ഇമ്രാന്‍ ഖാന്‍ ആണെന്നായിരുന്നു മിയന്‍ദാദിന്റെ പ്രധാന ആരോപണം. അധികം വൈകാതെ ഇമ്രാന്‍ ഖാനെതിരെ താന്‍ രാഷ്ട്രീയത്തിലിറങ്ങുമെന്നും താന്‍ ആരാണെന്ന് ഇമ്രാനു കാട്ടിക്കൊടുക്കുമെന്നും മിയന്‍ദാദ് പറഞ്ഞു.

ഇപ്പോള്‍ തന്റെ പേരിലുള്ള യൂട്യൂബ് അക്കൌണ്ടില്‍ പോസ്റ്റ് ചെയ്ത വീഡിയോയിലാണ് മിയാന്‍ദാദിന്റെ മാപ്പ് പറച്ചില്‍. എന്റെ വാക്കുകള്‍ ആരെയെങ്കിലും വേദനിപ്പിച്ചിട്ടുണ്ടെങ്കില്‍ ഞാന്‍ ക്ഷമ ചോദിക്കുന്നു. പ്രത്യേകിച്ചും പ്രധാനമന്ത്രി ഇമ്രാന്‍ ഖാനോട്. ഇംഗ്ലണ്ടിനെതിരായ ഒന്നാം ക്രിക്കറ്റ് ടെസ്റ്റില്‍ പാക്കിസ്ഥാന്‍ ടീമിന്റെ ദയനീയ പ്രകടനം കണ്ടതോടെ എനിക്ക് നിയന്ത്രണം നഷ്ടമായി.

അതുകൊണ്ടാണ് കടുത്ത വിമര്‍ശനം നടത്തിയത്. ഇമ്രാന്‍ ഖാനോടും ലോകത്തിന്റെ എല്ലാ ഭാഗത്തുമുള്ള ക്രിക്കറ്റ് ആരാധകരോടും എനിക്ക് വലിയ ബഹുമാനമുണ്ട് – മിയാന്‍ദാദ് വീഡിയോയില്‍ പറയുന്നു.

എന്നാല്‍ മിയാന്‍ദാദ് മാപ്പ് പറഞ്ഞത് തക്കതായ നേട്ടം ഉണ്ടായതുകൊണ്ടാണ് എന്നാണ് പാക് മാധ്യമങ്ങളുടെ വിമര്‍ശനം. മിയാന്‍ദാദിന്റെ അടുത്ത ബന്ധുവായ ഫൈസല്‍ ഇക്ബാലിനെ കഴിഞ്ഞ ദിവസമാണ് ആഭ്യന്തര ടീമുകളില്‍ ഒന്നിന്റെ പരിശീലകനായി പാകിസ്ഥാന്‍ ക്രിക്കറ്റ് ബോര്‍ഡ് നിയമിച്ചത്. ഇതിനു പിന്നാലെയാണ് മിയാന്‍ദാദ് നിലപാട് മാറ്റിയതെന്ന് പാക് മാധ്യമങ്ങള്‍ പറയുന്നത്.

പാക് ക്രിക്കറ്റിന്റെ തന്ത്രങ്ങളുടെ തലപ്പത്ത് ഇനി മിസ്ബാ

web desk 1 — Thu, 05 Sep 2019 04:52:37 +0000

ഇസ്ലാമബാദ്:പാക്കിസ്താന്‍ ക്രിക്കറ്റിലെ അതിശക്തന്‍ ഇനി മിസ്ബാഹുല്‍ ഹഖായിരിക്കും. ദേശീയ ടീമിന്റെമുഖ്യ പരിശീലകനായും സെലക്ഷന്‍ കമ്മിറ്റി ചെയര്‍മാനായും അദ്ദേഹത്തെ നിയോഗിച്ചു. വഖാര്‍ യൂനസാണ് പുതിയ ബൗളിംഗ് കോച്ച്. ഇന്നലെ ചേര്‍ന്ന പാക്കിസ്താന്‍ ക്രിക്കറ്റ് ബോര്‍ഡ് (പി.സി.ബി) യോഗമാണ് നിര്‍ണായകമായ തീരുമാനമെടുത്തത്. മുഖ്യ പരിശീലക സ്ഥാനത്തേക്ക് ആദ്യം അപേക്ഷ നല്‍കിയിരുന്നില്ല മിസ്ബാഹ്. പാക്കിസ്താന്‍ സൂപ്പര്‍ ലീഗില്‍ (പി.എസ്.എല്‍) കളിക്കുന്ന ഇസ്ലാമബാദ് യുനൈറ്റഡ് സംഘത്തിന്റെ മുഖ്യ പരിശീലകനായതിനാല്‍ ദേശീയ നിരയില്‍ അപേക്ഷിക്കാന്‍ അദ്ദേഹം താല്‍പ്പര്യമെടുത്തിരുന്നില്ല. ഒടുവില്‍ പരിശീലക അപേക്ഷ സമര്‍പ്പിക്കാനുള്ള അവസാന മണിക്കൂറിലാണ് മിസ്ബാഹ് അപേക്ഷ നല്‍കിയത്. ഇതോടെ മൊഹ്‌സിന്‍ ഖാന്‍, ഓസ്‌ട്രേലിയക്കാരന്‍ ഡീന്‍ ജോണ്‍സ് എന്നിവരുടെ അപേക്ഷ പി.സി.ബി തള്ളി.
പാക്കിസ്താന്‍ ക്രിക്കറ്റ് ടീമിന്റെ നായക സ്ഥാനത്തേക്ക് നാടകീയമായി വന്നത് പോലെയാണ് ഇപ്പോല്‍ പരിശീലക സ്ഥാനത്തേക്ക് മിസ്ബാഹ് കടന്നു വന്നിരിക്കുന്നത്. ഒപ്പം മറ്റൊരു വലിയ ജോലിയും അദ്ദേഹത്തിന് നല്‍കി-ചീഫ് സെലക്ടര്‍. ഇത് വരെ ഇന്‍സമാമുല്‍ ഹഖായിരുന്നു മുഖ്യ സെലക്ടര്‍. ആ പദവിയാണ് ഇപ്പോള്‍ മിസ്ബാഹിന് നല്‍കിയിരിക്കുന്നത്. മിസ്ബാഹ് ബാറ്റ്‌സ്മാന്‍ ആയതിനാല്‍ ബാറ്റിംഗ് കോച്ച് ഇല്ല. ബൗളിംഗ് കോച്ചായി വഖാറിനെ കൂടാതെ മുഹമ്മദ് അക്രമാണ് അപേക്ഷിച്ചിരുന്നത്. അദ്ദേഹത്തെ പരിഗണിച്ചില്ല. പരിശീലക രംഗത്ത്് വഖാര്‍ അഞ്ചാം തവണയാണ് ദേശീയ സംഘത്തിനൊപ്പം വരുന്നത്. 2006-07 സീസണില്‍ അദ്ദേഹം ബൗളിംഗ് കോച്ചായിരുന്നു. 2009-10 ല്‍ ബൗളിംഗ്, ഫീല്‍ഡിംഗ് കോച്ചായി. 2010-11 ല്‍ ഹെഡ് കോച്ചായി, 2014-2016 സീസണിലും മുഖ്യ പരിശീലകനായിരുന്നു. ടി-20 ലോകകപ്പിലെ മോശം പ്രകടനത്തെ തുടര്‍ന്ന് കരാര്‍ കാലാവധി പൂര്‍ത്തിയാക്കാന്‍ മൂന്ന് മാസം ബാക്കി നില്‍ക്കവെ വഖാര്‍ രാജി നല്‍കിയിരുന്നു. ഇതേ തുടര്‍ന്നാണ് മിക്കി ആര്‍തര്‍ മുഖ്യ പരിശീലകനായും അസ്ഹര്‍ മഹമൂദ് ബൗളിംഗ് കോച്ചായും വന്നത്. ഈ ലോകകപ്പിന് ശേഷം ഇവരെയും പി.സി.ബി മാറ്റി. സെലക്ഷന്‍ കമ്മിറ്റിയിലേക്ക് മുന്‍ താരങ്ങളായ ഇന്‍ത്തികാബ് ആലം, ബാസിദ് ഖാന്‍ എന്നിവരെയും മുന്‍ ക്രിക്കറ്റ് ഭരണാധികാരികളായ വാസിം ഖാന്‍,ആസാദ് അലിഖാന്‍,സഹീര്‍ഖാന്‍ എന്നിവരെയും ഉള്‍പ്പെടുത്തി.

പാകിസ്താന് വീണ്ടും തോല്‍വി

chandrika — Tue, 09 Jan 2018 17:37:50 +0000

ക്രൈസ്റ്റ്ചര്‍ച്ച്: ന്യൂസിലന്‍ഡിനെതിരായ രണ്ടാം ഏകദിനത്തിലും പാകിസ്താന്‍ തോറ്റു. മഴ രസം കൊല്ലിയായ മത്സരത്തില്‍ എട്ടു വിക്കറ്റിനാണ് കിവീസ് പാകിസ്താനെ തോല്‍പിച്ചത്. ആദ്യം ബാറ്റു ചെയ്ത പാകിസ്താന്‍ ഒമ്പത് വിക്കറ്റിന് 246 റണ്‍സെടുത്തു. മുഹമ്മദ് ഹഫീസ് (60)ഒഴികെ മുന്‍നിര ബാറ്റ്‌സ്മാന്‍മാര്‍ പരാജയപ്പെട്ട മത്സരത്തില്‍ വാലറ്റ് ബൗളര്‍മാരായ ഹസന്‍ അലി (51), ശദാബ് ഖാന്‍ (52) എന്നിവര്‍ നടത്തിയ രക്ഷാപ്രവര്‍ത്തനമാണ് പാകിസ്താനെ വന്‍ നാണക്കേടില്‍ നിന്നും രക്ഷപ്പെടുത്തിയത്.

ഒരുഘട്ടത്തില്‍ 127ന് ആറ് വിക്കറ്റ് എന്ന നിലയിലായിരുന്നു പാകിസ്താന്‍. മറുപടി ബാറ്റിങ് ആരംഭിച്ച കിവീസിന് ഓപണര്‍ കോളിന്‍ മണ്‍റോ (0), വില്യംസണ്‍ (19) എന്നിവരുടെ വിക്കറ്റുകള്‍ തുടക്കത്തില്‍ തന്നെ നഷ്ടമായി. പിന്നീടെത്തിയ മഴ മത്സരം പാകിസ്താന്റെ കയ്യില്‍ നിന്നും അടര്‍ത്തി മാറ്റി. 25 ഓവറാക്കി മത്സരം പുനര്‍നിര്‍ണയിച്ചതോടെ കിവീസിന്റെ ലക്ഷ്യം 151 റണ്‍സാക്കി പുനര്‍ നിര്‍ണയിച്ചു. മാര്‍ട്ടിന്‍ ഗപ്റ്റില്‍ (87*), റോസ് ടെയ്‌ലര്‍ (44*) എന്നിവര്‍ ചേര്‍ന്ന് കൂടുതല്‍ നഷ്ടം കൂടാതെ കിവീസിനെ വിജയ തീരത്തെത്തിച്ചു.

ബൗളിങ് ആക്ഷന്‍ ; ഹഫീസിന് വീണ്ടും വിലക്ക്

chandrika — Fri, 17 Nov 2017 09:46:14 +0000

ദുബായ്: സംശയകരമായ ബൗളിങ് ആക്ഷനെ തുടര്‍ന്ന് പാക് ഓള്‍ റൗണ്ടര്‍ മുഹമ്മദ് ഹഫീസിനെ ഐ.സി.സി ബൗളിങില്‍ നിന്നും വീണ്ടും വിലക്കി. ഇതു മൂന്നാം തവണയാണ് സംശയകരമായ ബൗളിങ് ആക്ഷനെ തുടര്‍ന്ന് ഹഫീസിനെ വിലക്കുന്നത്. അബൂദാബിയില്‍ ശ്രീലങ്കക്കെതിരെ നടന്ന മൂന്നാം ഏകദിനത്തിനിടയിലാണ് മുഹമദ് ഹഫീസിന്റെ ആക്ഷന്‍ വീണ്ടും സംശയത്തിലായത്. തുടര്‍ന്ന് അന്വേഷണ വിധേയമാക്കിയ ആക്ഷന്‍ ഐ.സി.സി ഇപ്പോള്‍ വിലക്കുകയായിരുന്നു. ഇതോടെ ഓള്‍റൗണ്ടര്‍ പട്ടികയില്‍ ഒന്നാമതുള്ള ഹഫീസിന്റെ സേവനം ബൗളിങില്‍ ഇനി പാക് ദേശീയ ടീമിന് ലഭിക്കില്ല.

ഐ.സി.സിയുടെ നിയമ പ്രകാരം ബൗള്‍ ചെയ്യുമ്പോള്‍ കൈ 15 ഡ്രിഗിയില്‍ കൂടുതല്‍ വളയാന്‍ പാടില്ല. എന്നാല്‍ ഓഫ് സ്പിന്നര്‍ ഹാഫീസിന്റെ ബൗളിങില്‍ 15 ഡ്രിഗ്രിയിലധികം കൈ വളയുന്നതായി കണ്ടെത്തിയതിനെ തുടര്‍ന്നാണ് താരത്തെ അന്താരാഷ്ട്ര ക്രിക്കറ്റില്‍ നിന്നും വിലക്കിയത്. അതേസമയം പാക് ക്രിക്കറ്റ് ബോര്‍ഡിന്റെ കീഴില്‍ നടക്കുന്ന ആഭ്യന്തര മത്സരങ്ങളില്‍ ഹഫീസിന് തുടരനാകും.

2014 ഡിസംബറിലാണ് ബോളിങ് ആക്ഷനിലെ സംശയത്തെ തുടര്‍ന്ന്
പാക് ഓഫ് സ്പിന്നര്‍ ഹഫീസിനെ ആദ്യമായി ഐ.സി.സി വിലക്കുന്നത്.വിലക്ക് നീക്കി തൊട്ടടുത്ത വര്‍ഷം ഏപ്രില്‍ തിരിച്ചെത്തിയെങ്കിലും ജൂണില്‍ സമാനമായ ആരോപണത്തെ തുടര്‍ന്ന് വീണ്ടും വിലക്കി. പിന്നീട് ഒരു വര്‍ഷത്തോളം വിലക്ക് നേരിട്ട ഹഫീസ് 2016 നവംബറില്‍ ബ്രിസ്ബണിലെ ക്രിക്കറ്റ് സെന്ററില്‍ പരിശോധനയ്ക്ക് വിധേയനാകുകയും നിയമവിരുദ്ധമായ ആക്ഷനല്ല എന്നു തെളിയിച്ചാണ് ഹഫീസ് വീണ്ടും പന്ത് കൈയിലെടുത്തത്.

163 ഏകദിനങ്ങളില്‍ നിന്നായി 136 വിക്കറ്റും, 61 ടി-20യില്‍ നിന്ന് 49 വിക്കറ്റും 70 ടെസ്റ്റില്‍ നിന്ന് 52 വിക്കറ്റും ഹഫീസ് പാക്കിസ്താനുവേണ്ടി സ്വന്തമാക്കിയിട്ടുണ്ട്.