pak – Chandrika Daily

ചൈനയും സഊദിയുമില്ലാതെ ജി20 ഉച്ചകോടിക്ക് കശ്മീരില്‍ തുടക്കം

Chandrika Web — Tue, 23 May 2023 13:32:04 +0000

ജി.20 ടൂറിസം സമ്മേളനത്തിന് കശ്മീരില്‍ തുടക്കമായി. ചൈനയെയും സഊദിയെയും കൂടാതെ വിവിധ രാജ്യങ്ങളിലെ 90ഓളം പ്രതിനിധികളാണ് പങ്കെടുക്കുന്നത്. പാക്കിസ്താന്‍ സമ്മേളനം കശ്മീരില്‍ നിശ്ചയിച്ചതിനെ അപലപിച്ചു. അധിനിവിഷ്ടകശ്മീരില്‍ സമാധാനമുണ്ടെന്ന് സ്ഥാപിക്കാനാണ് ഇന്ത്യ ശ്രമിക്കുന്നതെന്ന് പാക് നേതാവ് ബിലാവല്‍ ഭൂട്ടോ ആരോപിച്ചു. കഴിഞ്ഞവര്‍ഷം 253 പേര്‍ താഴ് വരയില്‍ കൊല്ലപ്പെട്ടതായി പറഞ്ഞ പാക് ദിനപത്രം ഡാണ്‍ കൊല്ലപ്പെട്ടവരുടെ സംഖ്യ കുറഞ്ഞത് സൈനികഭരണം മൂലമാണെന്ന് കുറ്റപ്പെടുത്തി. ഭൂമിയിലെ സ്വര്‍ഗമെന്ന് വിശേഷിപ്പിച്ചാണ് ഇന്ത്യ കശ്മീരില്‍ ടൂറിസം വ്യാപിപ്പിക്കുന്നതെന്ന് ഡാണ്‍ പറഞ്ഞു.

ലാഹോറിലും റാവല്‍പിണ്ടിയിലും സൈനികാസ്ഥാനത്തേക്ക് കയറി പി.ടി.ഐ പ്രവര്‍ത്തകര്‍; സര്‍ക്കാര്‍ വാഹനങ്ങള്‍ അഗ്നിക്കിരയാക്കി

Chandrika Web — Wed, 10 May 2023 01:27:59 +0000

സൈനികാസ്ഥാനത്തേക്ക് വരെ കയറി ഇമ്രാന്‍ അനുകൂലികള്‍. പാക്കിസ്താന്‍ തെഹ് രികെ ഇന്‍സാഫ് പാര്‍ട്ടിയുടെ പ്രവര്‍ത്തകര്‍ രാജ്യത്തെങ്ങും വ്യാപകമായ അക്രമമാണ ്‌നടത്തുന്നത്. മുന്‍പ്രധാനമന്ത്രിയെ അകാരണമായി അറസ്റ്റ് ചെയ്തതാണ് പരാതി. കോടതിയുടെ പരിസരത്തുവെച്ച് ഇന്നലെയാണ് ഇമ്രാന്‍ഖാനെ പ്രതീക്ഷിക്കാതെ സൈന്യം അറസ്റ്റ് ചെയ്തത്. വലിയ പ്രതിഷേധം കണക്കിലെടുത്ത് രാജ്യത്തെങ്ങും 144 പ്രഖ്യാപിച്ചു. 13 മാസം മുമ്പ് അവിശ്വാസപ്രമേയം വിജയിച്ചതോടെയാണ് ഇമ്രാന്‍ പടിയിറങ്ങിയത്. അതോടെ രാജ്യത്തെങ്ങും കടുത്ത സാമ്പത്തിക-സാമൂഹികപ്രതിസന്ധിയാണ് ഉടലെടുത്തിരിക്കുന്നത്. ഐ.എം.എഫിനുള്ള കടം വീട്ടാതിരുന്നാല്‍ വൈകാതെ രാജ്യം പാപ്പരാകും. നോമ്പുകാലത്തുപോലും വലിയ പട്ടിണിയാണ് രാജ്യത്തനുഭവപ്പെട്ടത്.
പെഷവാറില്‍ റേഡിയോ പാക്കിസ്താന്‍ കെട്ടിടം അക്രമികള്‍ തീവെച്ച് നശിപ്പിച്ചു. അടുത്ത 12 മണിക്കൂറിനകം എന്തും സംഭവിക്കാമെന്ന സ്ഥിതിയാണെന്നാണ് വിലയിരുത്തല്‍.
പലയിടങ്ങളിലും പൊലീസും പ്രവര്‍ത്തകരും തമ്മില്‍ നേര്‍ക്കുനേര്‍ ഏറ്റുമുട്ടി. നിരവധി സര്‍ക്കാര്‍ വാഹനങ്ങള്‍ അഗ്നിക്കിരയാക്കി. കറാച്ചിയിലും റാവല്‍പിണ്ടിയിലും സംഘര്‍ഷം അരങ്ങേറി. ഇസ്‌ലാമാബാദ് ഹൈക്കോടതി കെട്ടിടത്തിലേക്ക് ഇരച്ചുകയറിയ പ്രവര്‍ത്തകര്‍ ജനല്‍ ചില്ലുകള്‍ അടിച്ചു തകര്‍ക്കുകയും ബയോ മെട്രിക് സ്‌കാനര്‍ പുറത്തെറിയുകയും ചെയ്തു. റാവല്‍പിണ്ടിയിലെ സൈനിക ആസ്ഥാനമായ ജനറല്‍ ഹെഡ്ക്വാര്‍ട്ടേഴ്‌സിലേക്ക് ഇരച്ചു കയറിയ അണികള്‍ പ്രധാന കവാടം അടിച്ചു തകര്‍ത്തു. യൂണിവേഴ്‌സിറ്റി റോഡ്, പഴയ സബ്‌സി മാണ്ഡി, ബനാറസ് ചൗക്ക്, അല്‍ ആസിഫ് സ്‌ക്വയര്‍ എന്നിവിടങ്ങളിലും പൊലീസും തെഹ്‌രീകെ അണികളും തമ്മില്‍ ഏറ്റുമുട്ടി. പ്രതിഷേധക്കാരെ പിരിച്ചുവിടാന്‍ പൊലീസ് ലാത്തിച്ചാര്‍ജ്ജും കണ്ണീര്‍ വാതകയും പ്രയോഗിച്ചു.
രഹസ്യാന്വേഷണ വിഭാഗമായ ഐ.എസ്.ഐയുടെ മുതിര്‍ന്ന ഉദ്യോഗസ്ഥര്‍ക്കെതിരെ ഇമ്രാന്‍ ഖാന്‍ അടിസ്ഥാന രഹിതമായ ആരോപണങ്ങള്‍ ഉന്നയിക്കുകയാണെന്ന വാദവുമായി പാക് സൈന്യം രംഗത്തെത്തിയതിന്റെ തൊട്ടടുത്ത ദിവസമാണ് അറസ്റ്റ്. നേരത്തെ ഒന്നിലധികം തവണ ഇമ്രാന്‍ ഖാനെ അറസ്റ്റു ചെയ്യാനായി ഇ്‌സ്‌ലാമാബാദ് പൊലീസ് അദ്ദേഹത്തിന്റെ വസതിയില്‍ എത്തിയിരുന്നെങ്കിലും വിജയിച്ചിരുന്നില്ല. നേരത്തെ തയ്യാറാക്കിയ തിരക്കഥ അനുസരിച്ചാണ് ഇമ്രാന്‍ ഖാനെ ഇന്നലെ കോടതി പരിസരത്തുനിന്ന് കസ്റ്റഡിയില്‍ എടുത്തതെന്നാണ് തെഹ്‌രീകെ അണികളുടെ ആരോപണം. കോടതി പരിസരം നേരത്തെതന്നെ അര്‍ധസൈനിക വിഭാഗം വളഞ്ഞിരുന്നു. കോടതി വളപ്പിലെത്തിയ ഇമ്രാന്‍ ഖാന്‍ തന്റെ വാഹനത്തില്‍ നിന്ന് ഇറങ്ങിയതിനു പിന്നാലെ സൈനികര്‍ വളയുകയും പിടിച്ചുവലിച്ച് പൊലീസ് വാഹനത്തിലേക്ക് മാറ്റുകയുമായിരുന്നു. കസ്റ്റഡിയിലെടുക്കുന്നതിനിടെ പൊലീസ് മര്‍ദ്ദിച്ചതായി ഇമ്രാന്‍ ഖാന്‍ പറഞ്ഞത് തെഹ്‌രീകെ അണികളുടെ രോഷം വര്‍ധിപ്പിച്ചു.
അല്‍ ഖാദിര്‍ ട്രസ്റ്റ് കേസിലാണ് ഇമ്രാന്‍ ഖാനെ അറസ്റ്റു ചെയ്തതെന്ന് ഇസ്‌ലാമാബാദ് പൊലീസ് പിന്നീട് വാര്‍ത്താക്കുറിപ്പില്‍ വ്യക്തമാക്കി. ഇമ്രാനും ഭാര്യയും അടക്കമുള്ളവര്‍ അംഗങ്ങളായ അല്‍ ഖാദിര്‍ ട്രസ്റ്റിന് പ്രധാനമന്ത്രിയായിരിക്കെ സര്‍ക്കാര്‍ ഭൂമി സൗജന്യമായി പതിച്ചു നല്‍കിയതുമായി ബന്ധപ്പെട്ടാണ് കേസ്.

പാക് മുന്‍പ്രധാനമന്ത്രി ഇമ്രാന്‍ ഖാനെ അറസ്റ്റ് ചെയ്തു

Chandrika Web — Tue, 09 May 2023 10:34:53 +0000

പാക് മുന്‍പ്രധാനമന്ത്രി ഇമ്രാന്‍ ഖാനെ അറസ്റ്റ് ചെയ്തു. പട്ടാളക്കാരെ വലയം ചെയ്യിച്ച് കടത്തിക്കൊണ്ടുപോയി. കോടതിക്ക് വെളിയിലാണ് സംഭവം. പാക്കിസ്താന്‍ തെഹ് രീകെ ഇന്‍സാഫ് പാര്‍ട്ടിയുടെ അല്‍ഖദീര്‍ ട്രസ്റ്റിന് പാക് ഖജനാവില്‍നിന്ന് 530 കോടി അനുവദിച്ചുവെന്നാണ് കേസ്. കോടതിയുടെ കോമ്പൗണ്ടില്‍ നിയമം ലംഘിച്ചെത്തിയാണ് അറസ്റ്റ് ചെയ്തതെന്ന ്പാര്‍ട്ടി വക്താവ് ആരോപിച്ചു. നാലുമാസം മുമ്പ് ഇമ്രാനെ അറസ്റ്റ്‌ചെയ്യാന്‍ നടത്തിയ ശ്രമം പാര്‍ട്ടിപ്രവര്‍ത്തകരിടപെട്ട് തടഞ്ഞിരുന്നു. വന്‍ അര്‍ധസൈനികസന്നാഹവുമായെത്തിയായിരുന്നു അറസ്റ്റ്. ഈ വര്‍ഷംനടക്കാനിരിക്കുന്ന തെരഞ്ഞെടുപ്പിനെ അട്ടിമറിക്കാനാണ് അറസ്റ്റെന്നും പുതിയ കമ്മിറ്റി പാര്‍ട്ടിയുടെ ചുമതലകള്‍ നിര്‍വഹിക്കുമെന്നും ഇമ്രാന്‍ പറഞ്ഞതായി പാക്പത്രം ദ ഡാണ്‍ റിപ്പോര്‍ട്ട് ചെയ്തു.

രാജ്യത്തിന്റെ സാമ്പത്തികാവസ്ഥ പരിതാപകരമായിരിക്കെയാണ് സംഭവം. പാക്കിസ്താന്‍ വലിയ പ്രയാസത്തിലേക്ക് നീങ്ങുമെന്ന് മൂഡീസ് ധനകാര്യസ്ഥാപനം പ്രവചിച്ച സമയമാണിത്. അതേസമയം രാജ്യത്തെ മുഴുവന്‍ പ്രശ്‌നങ്ങള്‍ക്കും കാരണം ഇമ്രാനാണെന്ന് മന്ത്രി മറിയും കുറ്റപ്പെടുത്തി.

സ്വന്തം ജനതയുടെ പട്ടിണി മാറ്റൂ- പാക്കിസ്താന് ഇന്ത്യ മറുപടി നല്‍കി

Chandrika Web — Sat, 04 Mar 2023 04:56:43 +0000

ഇതരരാജ്യങ്ങളുടെ കാര്യത്തില്‍ ശ്രദ്ധിക്കുന്നതിന് പകരം സ്വന്തം ജനതയുടെ പട്ടിണി മാറ്റൂ- ഇന്ത്യ പാക്കിസ്താന് ഐക്യരാഷ്ട്രമനുഷ്യാവകാശസമിതി യോഗത്തില്‍ മറുപടി നല്‍കിയത് ഇങ്ങനെ.
കശ്മീര്‍ വിഷയം പാക്കിസ്താന്‍ ഉയര്‍ത്തിപ്പോഴാണ് ഇന്ത്യയുടെ പ്രതിനിധി സീമ പൂജാനിയുടെ തിരിച്ചടി. പാക് വിദേശകാര്യസഹമന്ത്രി ഹിന റബ്ബാനി കൗര്‍ ആണ് വിഷയം ഉന്നയിച്ചത്. കശ്മീര്‍ ജനത മനുഷ്യാവകാശം ലംഘിക്കപ്പെട്ട് തടവറയില്‍ കഴിയുകയാണെന്നായിരുന്നു പാക് പരാമര്‍ശം. തുര്‍ക്കിയുടെ അഭിപ്രായത്തെയും ഇന്ത്യ അപലപിച്ചു.ഒ.ഐ.സി ഇന്ത്യക്കെതിരെ നടത്തിയ പരാമര്‍ശം ഇതരരാജ്യങ്ങളുടെ ആഭ്യന്തരകാര്യത്തിലെ കൈകടത്തലാണ്. പാക്കിസ്താന്‍ ഇന്ത്യന്‍ മണ്ണില്‍ അധിനിവേശം നടത്തുകയാണെന്നും സീമ ആരോപിച്ചു.

പാക്കിസ്താനെ കയ്യിലെടുക്കണമെന്ന് മുന്‍ റോ മേധാവി

Chandrika Web — Sun, 26 Feb 2023 02:46:05 +0000

പാക്കിസ്താനെ വിശ്വാസത്തിലെടുത്ത് അയല്‍ക്കാരനുമായി ബന്ധം സ്ഥാപിക്കണമെന്ന് മുന്‍ രഹസ്യാന്വേഷണ മേധാവി അമര്‍ജിത്സിംഗ് ദുലാത്. അമേരിക്ക വളരെ അകലെയാണ്. അടുത്ത ശത്രുതന്നെയാണ് അകലത്തെ മിത്രത്തേക്കാള്‍ നല്ലത്. വിശേഷിച്ചും റഷ്യയും ഇറാനും ചൈനയും ഒരുമിക്കുന്ന കാലത്ത്. അദ്ദേഹം പി.ടി.ഐക്ക് നല്‍കിയ അഭിമുഖത്തില്‍ പറഞ്ഞു.
ഈ വര്‍ഷം അവസാനം മോദി അത് ചെയ്യുമെന്നാണ് കരുതുന്നത്. പാക്കിസ്താന്‍ സാമ്പത്തികമായിവളരെ പ്രയാസത്തിലാണ്. അവരെ സഹായിക്കാനും വിശ്വാസത്തിലെടുക്കാനുമുള്ളഅവസരമാണിത്. പാക്കിസ്താനും ഇതുമായി സഹകരിക്കുമെന്നുറപ്പാണ്. മുമ്പും അതവര്‍ ചെയ്തിട്ടുണ്ട്. ആ രാജ്യത്തെ ജനങ്ങളും കഴിഞ്ഞദിവസങ്ങളില്‍ ഇന്ത്യയുടെ സഹായത്തെ അനുകൂലിച്ചതായി വാര്‍ത്തകള്‍ വരുന്നുണ്ട്.

മുസ്‌ലിം പേരില്‍ പാക് കൗമാരിക്കാരിയെ ‘ വളച്ചു’, ഇന്ത്യയിലെത്തിയ കുട്ടിയെ നാട്ടിലേക്ക് വിട്ടയച്ചു

Chandrika Web — Fri, 24 Feb 2023 11:22:31 +0000

പാക് കൗമാരക്കാരിയായ ഇഖ്‌റയുടെ കഥ അവിശ്വസനീയമായി തോന്നാം. എന്നാല്‍ നടന്നതാണ്. ഇന്ത്യക്കാരനായ മുലായംസിംഗ് യാദവ് എന്ന യുവാവ് മുസ്‌ലിമാണെന്ന് തെറ്റിദ്ധരിപ്പിച്ച് സമൂഹമാധ്യമം വഴി പാട്ടിലാക്കിയ യുവതി ഇന്ത്യയിലെത്തിയ കഥയാണ്. കഥയുടെ അവസാനം വാഗാ അതിര്‍ത്തി വഴി കുട്ടിയെ പാക്കിസ്താനിലേക്ക് ഇന്ത്യാഅധികൃതര്‍ തിരിച്ചയച്ചു.
സംഭവം തുടങ്ങുന്നത് എന്നാണെന്ന് കൃത്യമല്ല. എന്നാല്‍ ഇഖ്‌റ ജീവാനിയെ കാണാതാകുന്നത് കഴിഞ്ഞ സെപ്തംബറിലാണ്. മുസ്‌ലിംയുവാവിനെ കല്യാണം കഴിക്കാനായി അവളെത്തിയതോ വിസയില്ലാതെ കള്ളമായും. ദുബായിലേക്കും പിന്നീട് നേപ്പാള്‍ കാഠ്മണ്ഡുവഴിയുമാണ് ംബഗളൂരുവിലെത്തുന്നത്. ഇവര്‍ ഇരുവരും ചേര്‍ന്ന് പിന്നീട് വിവാഹം ചെയ്യുകയും ചെയ്തു. പിന്നീടാണ് യഥാര്ത്ഥ്യം അറിയുന്നത്. 26കാരനായ മുലായം സിംഗാണെന്ന് പൊലീസാണ് തിരിച്ചറിഞ്ഞത്.സമീര്‍ അന്‍സാരി എന്ന പേരിലായിരുന്നു യുവാവിന്റെ ഫെയ്‌സ് ബുക് അക്കൗണ്ട് .
നാണം കുണുങ്ങിയായ കുട്ടി എങ്ങനെയാണ് ഇത്രയും ദുര്‍ഘടമായ യാത്ര ചെയ്തതെന്നാണ് രക്ഷിതാക്കള്‍ ആലോചിക്കുന്നത്. കഴിഞ്ഞദിവസം ലാഹോറിലെത്തി മകളെ ഏറ്റുവാങ്ങിയിരിക്കുകയാണ് സുഹൈല്‍ ജീവാനിയും ഭാര്യയും. തന്റെ ആഭരണങ്ങള്‍ വിറ്റാണ് കുട്ടി ദുബൈയിലേക്കും പിന്നീട് കാഠ്മണ്ഡുവിലേക്കുമുള്ള ടിക്കറ്റെടുത്തത്. ഇന്ത്യയിലേക്ക് നേപ്പാളില്‍നിന്ന് വിസയില്ലാതെ കടക്കാമെന്ന വിശ്വാസത്തിലായിരുന്നു ഈ യാത്ര. ഏതായാലും കുട്ടിയെ തിരിച്ചുകിട്ടിയ ആശ്വാസത്തിലാണ് സിന്ധിലെ ഈ കുടുംബം. ഇഖ്‌റ നിസ്‌കരിക്കുന്നത് കണ്ടതിനെതുടര്‍ന്ന് ഇവര്‍ താമസിച്ചിരുന്ന വീട്ടിനടുത്ത വീട്ടുകാര്‍ വിവരം പൊലീസിലറിയിക്കുകയായിരുന്നുവത്രെ.

സാമ്പത്തികപ്രതിസന്ധി : വിഭജനം വേണ്ടിയിരുന്നില്ലെന്ന് പാക് പൗരന്‍

Chandrika Web — Thu, 23 Feb 2023 11:12:58 +0000

ഇന്ത്യയിലായിരുന്നെങ്കില്‍ വില ഇത്രയും കൂടില്ലായിരുന്നു. രാജ്യം വിഭജിക്കപ്പെട്ടതാണ് ദുരന്തമായത്. ഇമ്രാനും ബേനസീറും മുഷറഫും ഒന്നും വേണ്ട. ചിക്കനും പച്ചക്കറിക്കും വില കുറഞ്ഞുകിട്ടിയാല്‍ മതി. പാക് പൗരന്‍ ദൃശ്യമാധ്യമത്തോട് പറയുന്ന വാക്കുകള്‍ വൈറലായി. ഇന്ത്യയിലെ സാമ്പത്തികാവസ്ഥ മെച്ചപ്പെട്ടതാണെന്നും പാക്കിസ്താനില്‍നിന്ന് ഇന്ത്യയിലേക്ക് പോകാന്‍ തോന്നുന്നുവെന്നും സന അംജദ് എന്ന മാധ്യമപ്രവര്‍ത്തകയോട് പാക് യുവാവ് പറയുന്നു. ഷഹബാസ് ശരീഫ് സര്‍ക്കാരിനെതിരെ ഇയാള്‍ രൂക്ഷമായ വിമര്‍ശനമാണ് അഴിച്ചുവിടുന്നത്. വീഡിയോ പലരും പങ്കുവെക്കുന്നുണ്ട്. പാക്കിസ്താനില്‍ അരിവില ഇന്നലെ 75 രൂപയാണ് പലയിടത്തും. 32 പൈസയാണ് പാക് രൂപയുമായുള്ള ഇന്ത്യന്‍രൂപയുടെ മൂല്യം. അങ്ങനെ നോക്കുമ്പോള്‍ ഇന്ത്യയുടെ 30 രൂപയാണ് കിലോ അരിവില. 275 രൂപയാണ് പെട്രോള്‍വില. ഏതാണ്ട് 100 ഇന്ത്യന്‍രൂപ വരുമിത്. നേരത്തെ 80 രൂപയായിരുന്നു.

https://twitter.com/i/status/1628637639061692416

കടുത്ത ഭക്ഷ്യക്ഷാമത്തിനിടെ പാക്കിസ്താന്‍ രൂപ വിലകുത്തനെയിടിഞ്ഞു

Chandrika Web — Fri, 27 Jan 2023 03:37:03 +0000

കടുത്ത ഭക്ഷ്യക്ഷാമത്തിനിടെ പാക്കിസ്താനില്‍ രൂപയുടെ വില കുത്തനെ കൂപ്പുകുത്തി. ഇന്നലെ മാത്രം 24 രൂപയാണ് ഇടിഞ്ഞത്. ഇതോടെ ഭക്ഷ്യക്ഷാമം രൂക്ഷമായി. ആട്ടയുടെ വില 300 രൂപവരെയായി. ആട്ടയാണ് പ്രധാന ഭക്ഷണഇനം. കഴിഞ്ഞ ഏതാനും മാസമായി രാജ്യത്തിന്റെ സമ്പദ് വ്യവസ്ഥ തകരാറിലാണ്.ഇമ്രാന്‍ ഖാനെ ഒഴിവാക്കി പുതിയ സര്‍ക്കാര്‍ വന്നെങ്കിലും സംവിധാനങ്ങളില്‍കാര്യമായമാറ്റമൊന്നു വന്നിട്ടില്ല. ഐ.എം.എഫ് ധനസഹായം പ്രതീക്ഷിക്കുന്നുണ്ടെങ്കിലും അത് വൈകുകയാണ്.പലയിടത്തും ഭക്ഷണത്തിനായിആളുകള്‍ ക്യൂവിലാണ്. ശ്രീലങ്കയിലെയും പാക്കിസ്താനിലെയും പോലെ ഇന്ത്യന്‍ രൂപയുടെ മൂല്യവും കുത്തനെ ഇടിയുന്നത് ആശങ്കയുയര്‍ത്തുന്നുണ്ടെന്ന ്‌സാമ്പത്തികവിദഗ്ധര്‍ പറഞ്ഞു.

പാക്കിസ്താനിലെ വൈദ്യുതിസ്തംഭനം: അന്വേഷണത്തിനുത്തരവ്

Chandrika Web — Tue, 24 Jan 2023 07:05:21 +0000

പാക്കിസ്താനെ ഇരുട്ടിലാക്കി പ്രമുഖ നഗരങ്ങളിലടക്കം വൈദ്യുതി നിലച്ചു. കറാച്ചി, ലാഹോര്‍ എന്നിവിടങ്ങളിലും വിപണികളിലും ബാങ്കുകളിലും ആശുപത്രികളിലും ഇരുട്ട് പ്രതിസന്ധി സൃഷ്ടിച്ചു. തിങ്കളാഴ്ച പൊടുന്നനെയാണ് നാഷണല്‍ പവര്‍ ഗ്രിഡ് തകരാറിലായത്. ഇതേതുടര്‍ന്ന് ഒരുപകലും രാത്രിയും ജനം ബുദ്ധിമുട്ടി.രാജ്യത്ത് വലിയതോതില്‍ ഭക്ഷ്യക്ഷാമം നിലനില്‍ക്കെയാണിത്. വൈദ്യുതിത്തകരാറിനെക്കുറിച്ച് പ്രധാനമന്ത്രി ഷഹബാസ് ഷരീഫ് അന്വേഷണത്തിന് ഉത്തരവിട്ടു.
അതേസമയം ഭക്ഷ്യപ്രതിസന്ധിക്ക് ഒരുപരിധിവരെ പരിഹാരമായി. സഊദി അറേബ്യയും മറ്റും സഹായവുമായി രംഗത്തെത്തിയതിനെതുടര്‍ന്നാണിത്. ഇന്ത്യയുമായി യുദ്ധം ചെയ്യുന്നത് സാമ്പത്തികമായി രാജ്യത്തിന് ഗുണംചെയ്യില്ലെന്ന പ്രസ്താവന വലിയവിവാദമായിരുന്നു.

മഞ്ഞിന്‍ മറവില്‍ ആയുധക്കടത്ത്: ചൈനീസ് തോക്കുകളും വെടിമരുന്നുകളും പിടികൂടി

webdesk13 — Wed, 18 Jan 2023 05:36:30 +0000

ന്യൂഡല്‍ഹി: കനത്ത മഞ്ഞിന്റെ മറവില്‍ പാകിസ്ഥാനില്‍ നിന്നും ഡ്രോണ്‍ വഴി ഇന്ത്യയിലേക്ക് നടത്തിയ ആയുധക്കടത്ത് സൈന്യം പിടികൂടി. പഞ്ചാബിലെ ഗുരുദാസ്പൂര്‍ ജില്ലയിലെ അതിര്‍ത്തി വഴി കടത്തിയ ആയുധമാണ് സൈന്യം പിടികൂടിയത്. നാലു ചൈനീസ് നിര്‍മ്മിത തോക്കുകള്‍, വെടിയുണ്ടകള്‍, വെടിമരുന്നുകള്‍ തുടങ്ങിയവയാണ് ബിഎസ്എഫ് പിടിച്ചെടുത്തു.

സമീപത്ത് നിന്ന് പ്രത്യേക ശബ്ദം കേട്ട് സൈന്യം പ്രദേശത്ത് നിരീക്ഷിപ്പോഴാണ് പാകിസ്ഥാന്‍ ഭാഗത്തു നിന്നും ഡ്രോണ്‍ വരുന്നത് ശ്രദ്ധയില്‍പ്പെട്ടത്. പിന്നാലെ എന്തോ നിക്ഷേപിക്കുന്നതിന്റെ ശബ്ദവും കേട്ടു. തുടര്‍ന്ന് നടത്തിയ തിരിച്ചിലിലാണ് ഡ്രോണ്‍ വഴി ആയുധം കടത്തിയത് പിടികൂടിയത്. ആയുധക്കടത്ത് പിടികൂടിയ പശ്ചാത്തലത്തില്‍ മേഖലയില്‍ സൈന്യം നിരീക്ഷണം ശക്തമാക്കി.