ന്യൂഡല്‍ഹി: യൂണിവേഴ്‌സിറ്റി ഗ്രാന്‍ഡ് കമ്മിഷനെ (യു.ജി.സി) പിരിച്ച് വിട്ടു രൂപീകരിക്കുന്ന ഉന്നത വിദ്യാഭ്യാസ കമ്മീഷന്‍ ഓഫ് ഇന്ത്യ (എച്ച്.ഇ.സി.ഐ) ബില്ല് പാര്‍ലമെന്റിലെത്തും മുന്‍പേ പ്രതിഷേധം. ഇന്നലെ നടന്ന ലോക്‌സഭാ ചോദ്യോത്തര വേളയില്‍ തൃണമൂല്‍ കോണ്‍ഗ്രസ് അംഗം പ്രഫ. സുഗന്ധ ബോസ് ആണ് പുതിയ ബോര്‍ഡിനെ പറ്റി വിശദീകരണം ആവശ്യപ്പെട്ടത്.
യുജിസിയെക്കാള്‍ എങ്ങനെയാണ് പുതിയ കമ്മീഷന്‍ മികച്ചതാകുന്നതെന്ന് തൃണമൂല്‍ അംഗം ചോദിച്ചു. ഹയര്‍ എഡ്യൂക്കേഷന്‍ കമ്മീഷന്‍ ഓഫ് ഇന്ത്യ ബില്ല് ഉടന്‍ പാര്‍ലമെന്റിലെത്തുമെന്ന് മാനവശേഷി വികസനമന്ത്രി പ്രകാശ് ജാവേദ്ക്കര്‍ വ്യക്തമാക്കി. നിലവിലെ യു.ജി.സിയുടെ പോരായ്മകള്‍ നികത്തി അതു ശക്തിപ്പെടുത്തുന്നതിന് പകരമാണ് ഉന്നത വിദ്യാഭാസ സ്ഥാപനങ്ങള്‍ക്ക് കൂടുതല്‍ സ്വയം നിര്‍ണയ, ഭരണാവകാശം നല്‍കാനും വിദ്യാഭാസ രംഗത്തിന്റെ സമഗ്ര വളര്‍ച്ചക്ക് പ്രോത്സാഹനം ലക്ഷ്യമിട്ടുമുള്ള ഹയര്‍ എഡ്യൂക്കേഷന്‍ കമ്മീഷന്‍ ഓഫ് ഇന്ത്യ എന്ന് മന്ത്രി വ്യക്തമാക്കി.
ഉന്നത വിദ്യാഭ്യാസം സംസ്ഥാന സര്‍ക്കാരുകളില്‍ നിന്നും അടര്‍ത്തി മാറ്റി കേന്ദ്രത്തിന്റെ കൈകളിലെത്തിക്കുന്ന തന്ത്രമാണിതെന്ന് ഡെപ്യൂട്ടി സ്പീക്കര്‍ എം. തമ്പിദുരൈ ആരോപിച്ചു. എംപി എന്ന നിലയിലാണ് അദ്ദേഹം ഈ ആരോപണം ഉന്നയിച്ചത്. പുതിയ സംവിധാനം നിലവില്‍ വരിക വഴി സാമ്പത്തിക കാര്യങ്ങളും കേന്ദ്രത്തിന്റെ കൈകളിലെത്തും. എന്തു കാരണത്താലാണ് യുജിസിയെ വിപുലപ്പെടുത്താത്തതെന്നും അദ്ദേഹം ആരോപിച്ചു.

ഖുര്‍ആന് എതിരെങ്കില്‍ ബില്‍ അംഗീകരിക്കില്ലെന്ന്
വനിതാ വ്യക്തിനിയമ ബോര്‍ഡ്

ന്യൂഡല്‍ഹി: കേന്ദ്രസര്‍ക്കാര്‍ കൊണ്ടുവരുന്ന മുത്തലാഖ് ബില്‍ ഖുര്‍ആനും ഭരണഘടനയ്ക്കും എതിരാണെങ്കില്‍ അംഗീകരിക്കാനാവില്ലെന്ന് വനിതാ മുസ്്‌ലിം വ്യക്തിനിയമബോര്‍ഡ്. ബില്‍ പാര്‍ലമെന്റില്‍ ഇന്ന് അവതരിപ്പിക്കാനിരിക്കെയാണ് ബോര്‍ഡ് നിലപാട് വ്യക്തമാക്കിയത്.’
നിക്കാഹ് (വിവാഹം) ഒരു ഉടമ്പടിയാണ്. അതു പൊളിക്കുന്നവര്‍ ശിക്ഷിക്കപ്പെടണം. എന്നാല്‍ ബില്‍ ഖുര്‍ആനും ഭരണഘടനയ്ക്കും എതിരാണെങ്കില്‍ ഒരു മുസ്്‌ലിമും അതംഗീകരിക്കില്ല’ – ബോര്‍ഡ് ചെയര്‍പേഴ്‌സണ്‍ ശിയാസ്ത അംബര്‍ പറഞ്ഞു. ഇതുസംബന്ധിച്ച് നിയമകമ്മീഷന് കത്തയച്ചിട്ടുണ്ടെന്നും അവര്‍ വെളിപ്പെടുത്തി. നേരത്തെ, ബില്‍ അവതരിപ്പിക്കരുതെന്ന് മുസ്്‌ലിം വ്യക്തിനിയമ ബോര്‍ഡും വ്യക്തമാക്കിയിരുന്നു. ബില്ലിനെതിരെ മുസ്്‌ലിംലീഗും രംഗത്തുവന്നിരുന്നു.
മുത്തലാഖ് ഭരണഘടനാ വിരുദ്ധമെന്ന സുപ്രീം കോടതി വിധിക്കു പിന്നാലെയാണ് കേന്ദ്രം മുസ്്‌ലിം വുമണ്‍ (പ്രൊട്ടക്്ഷന്‍ ഓഫ് റൈറ്റ്‌സ് ഓണ്‍ മാര്യേജ്) എന്ന പേരില്‍ പുതിയ നിയമം കൊണ്ടുവരുന്നത്. മുത്തലാഖ് ജാമ്യമില്ലാത്ത ക്രിമിനല്‍ കുറ്റമായി പരിഗണിക്കുന്നതാണ് ബില്‍. ആഭ്യന്തരമന്ത്രി രാജ്‌നാഥ് സിങ് അധ്യക്ഷനായ മന്ത്രിതല സമിതിയാണ് ബില്‍ തയാറാക്കിയത്.
വാക്കു കൊണ്ടുള്ള മൊഴിചൊല്ലല്‍, ഇ-മെയില്‍, എസ്. എം. എസ്, വാട്‌സാപ്പ് വഴിയുള്ള ത്വലാഖുകള്‍ തുടങ്ങിയവയെല്ലാം നിയമപരമല്ലെന്നും അസാധുവാണെന്നും ബില്‍ നിഷ്‌കര്‍ഷിക്കുന്നു. ഇത്തരത്തില്‍ ത്വലാഖ് ചൊല്ലുന്ന ഭര്‍ത്താവിന് മൂന്നു വര്‍ഷം തടവും ബില്ലില്‍ നിര്‍ദേശിച്ചിട്ടുണ്ട്. കഴിഞ്ഞ മാസം കേന്ദ്രമന്ത്രിസഭ ബില്ലിന് അനുമതി നല്‍കിയിരുന്നു.
ബില്‍ തയാറാക്കുന്നതിന് മുമ്പ് മുസ്്‌ലിംസംഘടനകളുമായി കൂടിയാലോച്ചിട്ടില്ലെന്ന് നേരത്തെ ലോക്‌സഭയില്‍ കേന്ദ്രസര്‍ക്കാര്‍ വ്യക്തമാക്കിയിരുന്നു. സ്ത്രീയുടെ അന്തസ്സിന്റെ പ്രശ്‌നമായാണ് വിഷയത്തെ കാണുന്നതെന്നും ഇതുമായി ബന്ധപ്പെട്ട ചര്‍ച്ചയുടെ ആവശ്യമില്ലെന്നുമാണ് കേന്ദ്രത്തിന്റെ നിലപാട്. മുത്തലാഖ് ഭരണഘടനാ വിരുദ്ധമെന്ന് പ്രഖ്യാപിച്ചതിന് ശേഷം 66 കേസുകള്‍ റിപ്പോര്‍ട്ട് ചെയ്തതായി കേന്ദ്രനിയമമന്ത്രി രവിശങ്കര്‍ പ്രസാദ് വ്യക്തമാക്കിയിരുന്നു.

റണ്‍വേ റീ കാര്‍പ്പറ്റിങ് ജോലികളുടെ ഭാഗമായി താല്‍ക്കാലികമായി നെടുമ്പാശ്ശേരിയിലേക്ക് മാറ്റിയ ഹജ്ജ് എമ്പാര്‍ക്കേഷന്‍ പോയിന്റ് കരിപ്പൂരില്‍ തന്നെ പുനഃസ്ഥാപിക്കണമെന്നും അദ്ദേഹം ആവശ്യപ്പെട്ടു. കോഴിക്കോട്ടേക്ക് ഡല്‍ഹിയില്‍നിന്ന് നിലവില്‍ നേരിട്ട് വിമാന സര്‍വീസ് ഇല്ല. മുംബൈ- കോയമ്പത്തൂര്‍ വഴി എയര്‍ഇന്ത്യ നടത്തിയിരുന്ന സര്‍വീസ് പിന്‍വലിക്കുകയും ചെയ്തിരുന്നു. ഈ സാഹചര്യത്തില്‍ കേരളത്തില്‍നിന്ന്, പ്രത്യേകിച്ച് മലബാര്‍ മേഖലയില്‍നിന്നുള്ള വ്യാപാരികള്‍, ഉദ്യോഗസ്ഥര്‍, ജനപ്രതിനിധികള്‍ തുടങ്ങിയവര്‍ക്ക് കൂടുതല്‍ സൗകര്യപ്രദമായ രീതിയില്‍ മുംബൈ വഴിയോ ചെന്നൈ വഴിയോ കോഴിക്കോട്-ഡല്‍ഹി റൂട്ടില്‍ പുതിയ ആഭ്യന്തര സര്‍വീസ് അനുവദിക്കണമെന്നും ലോക്‌സഭയില്‍ ശൂന്യവേളയില്‍ സംസാരിക്കവെ പി.കെ കുഞ്ഞാലിക്കുട്ടി ആവശ്യപ്പെട്ടു.

………………………………………………………………………………………………………………

……………………………………………………………………………………………………………….

കരിപ്പൂരില്‍ പുതിയ അന്താരാഷ്ട്ര ടെര്‍മിനല്‍ നിര്‍മാണം 6 മാസത്തിനകം പൂര്‍ത്തിയാവും

കൊണ്ടോട്ടി:കരിപ്പൂര്‍ വിമാനത്താവളത്തില്‍ പുതുതായി നിര്‍മ്മിക്കുന്ന അന്താരാഷ്ട്ര ടര്‍മിനല്‍ കെട്ടിട നിര്‍മാണം പുരോഗമിക്കുന്നു. നിലവിലുള്ള ടെര്‍മിനലിനോട് ചേര്‍ന്ന് 80 കോടി രൂപ ചെലവില്‍ നിര്‍മിക്കുന്ന കെട്ടിടംപൂര്‍ത്തിയാവുന്നതോടെ 2000 ത്തോളംയാത്രക്കാര്‍ക്ക് ഇനി സൗകര്യപ്പെടും.ഈ വര്‍ഷത്തോടെ പൂര്‍ത്തീകരിക്കാനായിരുന്നു പദ്ധതി.എന്നാല്‍ സാങ്കേതിക കാരണത്താല്‍ വൈകി.60 ശതമാനം പൂര്‍ത്തീകരിച്ച ടെര്‍മിനല്‍ അടുത്ത മാര്‍ച്ചോടെ ഉദ്ഘാടനം ചെയ്യാനാണ് പദ്ധതി. കെട്ടിടത്തിന്റെ കോണ്‍ക്രീറ്റ് മേല്‍ക്കൂര നിര്‍മാണം ഇതിനകംപൂര്‍ത്തിയായിട്ടുണ്ട്. ലിഫ്റ്റ്,എയര്‍കണ്ടീഷന്‍, എസ്‌കലേറ്റര്‍,കണ്‍വെയറുകള്‍ എന്നിവ സ്ഥാപിക്കാനുണ്ട്. ദില്ലിയില്‍ നിന്നെത്തിയ വിമാനത്താവള അതോറിറ്റി ജനറല്‍ മാനേജര്‍ സന്‍ജീവ് ജിന്‍ഡാല്‍ കഴിഞ ദിവസം ടെര്‍മിനലിന്റ പുരോഗതി പരിശോധിച്ചു. എയര്‍പ്പോര്‍ട്ട് ഡയറക്ടര്‍ ജെ.ടി. രാധാകൃഷ്ണ,കരാറെടുത്ത കമ്പനിയുടെ പ്രതിനിധി എം.ശെല്‍വരാജ്,കരിപ്പൂര്‍ ഇലക്ട്രിക്കല്‍ വിഭാഗം ജോ.ജനറല്‍ മാനേജര്‍ എം. ശിവരാജു, സിവില്‍ വിഭാഗം ജോയിന്‍ ജനറല്‍മാനേജര്‍ കെ.പി.എസ് കര്‍ത്ത പങ്കെടുത്തു.