Patidar – Chandrika Daily

പട്ടേല്‍ സംവരണം; കോണ്‍ഗ്രസിന് എളുപ്പമാകില്ലെന്ന്

chandrika — Wed, 22 Nov 2017 13:48:49 +0000

അഹമ്മദാബാദ്: ഹര്‍ദിക് പട്ടേലിന്റെ ആവശ്യങ്ങളോട കോണ്‍ഗ്രസ് വഴങ്ങിയെങ്കിലും, പട്ടേല്‍മാര്‍ക്ക് തൊഴില്‍-ഉദ്യോഗ സംവരണം നല്‍കുന്നത് അത്രയെളുപ്പത്തില്‍ നടക്കില്ലെന്ന് വിദഗ്ധര്‍. സാമുദായികമായി താരതമ്യേന മികച്ച നിലയിലുള്ള സമുദായമാണ് ഗുജറാത്തിലെ പട്ടേലുമാര്‍. പട്ടേലുമാര്‍ക്ക് കൂടി സംവരണം നല്‍കിയില്‍ സര്‍ക്കാര്‍ ജോലികളും ഉന്നത വിദ്യാഭ്യാസ മേഖലയിലെ അവസരങ്ങളും സംവരണ വിഭാഗങ്ങളിലേക്ക് ചുരുങ്ങും എന്ന ആശങ്ക നിലനില്‍ക്കുന്നുണ്ട്. മൊത്തം സംവരണം അമ്പത് ശതമാനത്തില്‍ കൂടുതലാകരുത് എന്നാണ് സുപ്രീം കോടതി വ്യവസ്ഥ.
ജനസംഖ്യയുടെ 40 ശതമാനം വരുന്ന ഒ.ബി.സി വിഭാഗക്കാര്‍ക്ക് നിലവില്‍ 27 ശതമാനം സംവരണമുണ്ട്. ഇതിന് പുറമേ, പട്ടിക ജാതിക്കാര്‍ക്ക് ഏഴും പട്ടിക വര്‍ഗക്കാര്‍ക്ക് 15 ശതമാനവും സംവരണവുമുണ്ട്. അഥവാ, മൊത്തം 49 ശതമാനമാണ് ഗുജറാത്തിലെ സംവരണം. സുപ്രീംകോടതി അനുവദിച്ചതിലും ഒരു ശതമാനം മാത്രം താഴെ.
ബാക്കി വരുന്ന ഒരു ശതമാനം സംവരണം ഹര്‍ദിക് ആഗ്രഹിക്കുന്നില്ല. പട്ടേലുമാരെ ഒ.ബി.സി പട്ടികയില്‍ ഉള്‍പ്പെടുത്തണം എന്നാണ് അദ്ദേഹത്തിന്റെ ആവശ്യം. രാജ്യത്തിനകത്തും പുറത്തും താരതമ്യേന മികച്ച സാമ്പത്തിക നിലയില്‍ കഴിയുന്ന പട്ടേലുമാരെ ഒ.ബി.സി വിഭാഗത്തില്‍ ഉള്‍പ്പെടുത്തുന്നതിലെ സാംഗത്യം ചോദ്യം ചെയ്യപ്പെടും.
ഹര്‍ദികിന്റെ പ്രക്ഷോഭം കര്‍ഷകര്‍, വജ്രവ്യാപാരികള്‍, വ്യവസായികള്‍ എന്നിവരുള്‍പ്പെട്ട പട്ടേല്‍ സമുദായത്തിനിടയില്‍ വന്‍ മാറ്റങ്ങള്‍ ഉണ്ടാക്കിയിട്ടുണ്ട്.

സംവരണത്തില്‍ ഉറപ്പ്; കോണ്‍ഗ്രസിനെ പിന്തുണയ്ക്കുമെന്ന് ഹര്‍ദിക് പട്ടേല്‍

chandrika — Wed, 22 Nov 2017 13:19:46 +0000

അഹമ്മാദാബാദ്: പട്ടീദാര്‍മാര്‍ക്ക് സംവരണം നല്‍കുന്നതില്‍ അനുകൂല സമീപനം സ്വീകരിച്ച സാഹചര്യത്തില്‍ ഗുജറാത്ത് തെരഞ്ഞെടുപ്പില്‍ കോണ്‍ഗ്രസിനെ പിന്തുണയ്ക്കുമെന്ന് പട്ടേല്‍ പ്രക്ഷോഭ നേതാവ് ഹര്‍ദിക് പട്ടേല്‍. ബി.ജെ.പിയെ തോല്‍പ്പിക്കാന്‍ ആവുന്നത് എല്ലാം ചെയ്യുമെന്നും അഹമ്മാദാബാദില്‍ വിളിച്ചു ചേര്‍ത്ത വാര്‍ത്താ സമ്മേളനത്തില്‍ അദ്ദേഹം പറഞ്ഞു. ബി.ജെ.പിയും കോണ്‍ഗ്രസും സമാനമാണ് എന്ന പ്രസ്താവന നടത്തി മണിക്കൂറുകള്‍ക്കകമാണ് ഹര്‍ദിക് കോണ്‍ഗ്രസിന് പിന്തുണ പ്രഖ്യാപിച്ചത്. ഹര്‍ദിക് നേതൃത്വം നല്‍കുന്ന പട്ടീദാര്‍ അനാമത് ആന്ദോളന് സീറ്റ് വിഭജനത്തില്‍ വേണ്ടത്ര പ്രാതിനിധ്യം ലഭിച്ചില്ലെന്ന് ആരോപിച്ച് നേരത്തെ ഇരുകക്ഷികളും തമ്മില്‍ പ്രശ്‌നങ്ങളുണ്ടായിരുന്നു. സംസ്ഥാനത്ത് പലയിടത്തും പ്രതിഷേധവും അരങ്ങേറിയിരുന്നു. എന്നാല്‍ സീറ്റ് ആവശ്യപ്പെട്ടിട്ടില്ലെന്ന് ഹര്‍ദിക് പട്ടേല്‍ വ്യക്തമാക്കി. ‘ഞങ്ങള്‍ കോണ്‍ഗ്രസിനോട് ടിക്കറ്റ് ചോദിച്ചിട്ടില്ല. ബി.ജെ.പി അടിസ്ഥാനരഹിതമായ കഥകള്‍ സൃഷ്ടിക്കുകയാണ്. അനാമത് ആന്ദോളനെ തകര്‍ക്കാന്‍ 200 കോടി രൂപയാണ് ബി.ജെ.പി ചെലവഴിച്ചത്. പട്ടീദാര്‍വോട്ട് ഭിന്നിപ്പിക്കാന്‍ വേണ്ടി ചില സ്വതന്ത്ര സ്ഥാനാര്‍ത്ഥികളെ നിര്‍ത്തുകയും ചെയ്യുന്നു’ – അദ്ദേഹം പറഞ്ഞു. എന്നാല്‍ പട്ടേല്‍ യുവാക്കള്‍ക്ക് വേണ്ടത്ര പ്രാതിനിധ്യം ലഭിക്കണമെന്നും അദ്ദേഹം ആവശ്യപ്പെട്ടു. നേരത്തെ, സമിതി 10 സീറ്റ് ചോദിച്ചതായി റിപ്പോര്‍ട്ടുണ്ടായിരുന്നു. സംസ്ഥാന ജനസംഖ്യയില്‍ 12 ശതമാനത്തിലേറെ വരുന്ന പട്ടേല്‍മാര്‍ 60 നിയമസഭാ മണ്ഡലങ്ങളില്‍ നിര്‍ണായക ശക്തിയാണ്.

അതിനിടെ ഹര്‍ദിക് പട്ടേലിന്റെ പിന്തുണയ്ക്ക് കോണ്‍ഗ്രസ് നന്ദി അറിയിച്ചു. പാട്ടിദാര്‍ അനാമത് ആന്ദോളന്‍ സമിതിക്കും ഹാര്‍ദിക് പട്ടേലിനും നന്ദി പറഞ്ഞ് കോണ്‍ഗ്രസ് നേതാവ് കപില്‍ സിബലാണ് രംഗത്തെത്തയത്. ഗുജറാത്ത് തെരഞ്ഞെടുപ്പില്‍ ബിജെപിയെ അധികാരത്തില്‍ നിന്ന് താഴെയിറക്കാന്‍ പട്ടേല്‍മാരുടെ പിന്തുണ സഹായകരമാകുമെന്ന് കോണ്‍ഗ്രസ് നേതാവ് കപില്‍ സിബല്‍ പറഞ്ഞു.

അതേസമയം പാട്ടിദാര്‍ സമിതിയുമായി കോണ്‍ഗ്രസ് എന്തു ധാരണയാണ് ഉണ്ടാക്കിയതെന്ന ചോദ്യത്തിന് വ്യക്തമായ മറുപടി പറയാന്‍ കപില്‍ സിബല്‍ തയ്യാറായില്ല. ഗുജറാത്തിലെ വിജയമാണ് പ്രധാനമെന്നും ജനങ്ങള്‍ക്ക് നല്‍കിയ വാഗ്ദാനങ്ങള്‍ പാലിക്കപ്പെടുമെന്നും അദ്ദേഹം പറഞ്ഞു. 22 വര്‍ഷക്കാലം കൂടെനിന്ന പട്ടേല്‍ സമുദായത്തെ വഞ്ചിക്കുകയാണ് ബിജെപി ചെയ്തതെന്നും കപില്‍ സിബല്‍ കുറ്റപ്പെടുത്തി.

പാട്ടിദാര്‍ അനാമത് ആന്ദോളന്‍ സമിതി നേതാക്കളുമായുള്ള ആദ്യഘട്ട ചര്‍ച്ചകളില്‍ ഭാഗഭാക്കായിരുന്നു കപില്‍സിബല്‍.

ഗുജറാത്തില്‍ ഹര്‍ദീകിന്റെ സെക്‌സ് വീഡിയോ വിവാദം; പ്രതികരിച്ച് ഹര്‍ദിക് പട്ടേല്‍

chandrika — Tue, 14 Nov 2017 07:39:01 +0000

അഹമ്മദാബാദ്: ഗുജറാത്ത് രാഷ്ട്രീയത്തില്‍ സ്ഥാനചലനം ഭയന്ന് പുതിയ നീക്കവുമായി ബിജെപി നേതൃത്വം. കോണ്‍ഗ്രസിന് പിന്തുണ പ്രഖ്യാപിച്ച പാട്ടിദാര്‍ നേതാവ് ഹര്‍ദീക് പട്ടേലിന്റേതെന്നു കരുതുന്ന ലൈംഗിക വീഡിയോ പുറത്തുവിട്ടാണ് ബിജെപി പുതിയ കരുനീക്കം നടത്തുന്നത്. എന്നില്‍ വീഡിയോയില്‍ ചിത്രീകരിക്കപ്പെട്ടയാള്‍ താനല്ലെന്ന് പ്രതികരിച്ച് ഹര്‍ദീക് പട്ടേല്‍ രംഗത്തുവന്നു.
നാലു മിനിറ്റ് ദൈര്‍ഘ്യമുള്ള വീഡിയോ 2017 മേയ് പതിനാറിന് ഒരു ഹോട്ടല്‍ മുറിയില്‍ ചിത്രീകരിച്ചതാണ്. അജ്ഞാതയായ സ്ത്രീയോടൊപ്പം ഹാര്‍ദിക്കിന്റെ രൂപസാദൃശ്യമുള്ള യുവാവിനെയാണു വീഡിയോയില്‍ കാണുന്നത്. രണ്ടു വീഡിയോ ക്ലിപ്പുകളാണ് പുറത്തുവന്നത്. എന്നാല്‍ വീഡിയിയോയിലുള്ളത് താനല്ലെന്നും ബിജെപിയുടെ ഗുഢരാഷ്ട്രീയമാണ് ഇതിനു പിന്നിലെന്നും ഹര്‍ദീക് ആവര്‍ത്തിച്ചു പറഞ്ഞു.
തെരഞ്ഞെടുപ്പിന് മുന്നോടിയായി ഒരു സിഡി പുറത്തുവരാന്‍ സാധ്യതയുണ്ടെന്ന് ഹാര്‍ദിക് പട്ടേല്‍ കഴിഞ്ഞ ദിവസങ്ങളില്‍ പറഞ്ഞിരുന്നു. തന്റെ ഒരു വ്യാജ വീഡിയോ പുറത്തുവരാനുണ്ടെന്നും അത് അധികം വൈകാതെ നിങ്ങള്‍ക്ക് കാണാനാകുമെന്നും ഹര്‍ദീക് പരിഹാസ രൂപേണ പറഞ്ഞിരുന്നു. ഇതിനു പിന്നാലെയാണ് വീഡിയോ പുറത്തുവന്നത്.
പ്രാദേശിക ഗുജറാത്തി ചാനലുകളാണു വീഡിയോ പ്രക്ഷേപണം ചെയ്തത്. ഇതൊന്നും തന്നെ ബാധിക്കില്ലെന്നു പറഞ്ഞ പട്ടേല്‍, ഗുജറാത്തിലെ ആറു കോടി ജനം തന്റെയൊപ്പമാണെന്നും വ്യക്തമാക്കി.