രാജ്യത്തെ ഒരു മുതിര്‍ന്ന നേതാവിനെതിരെയാണ് ഇത്രയും നിരുത്തരവാദപരമായ സമീപനം പൊലീസ് സ്വീകരിച്ചിരിക്കുന്നത്. രാജ്യത്തിന്റെ വിവിധയിടങ്ങളില്‍ കേസുകള്‍ രജിസ്റ്റര്‍ ചെയ്തതിലൂടെ സംഭവത്തിനുപിന്നിലെ ആസൂത്രണവും പുറത്തായിരിക്കുകയാണ്. യാത്ര അഞ്ചുമണിക്കൂറോളം തടസപ്പെട്ടതിനെ തുടര്‍ന്ന് ഇന്റിഗോ അധികൃതര്‍ നടത്തിയ ക്ഷമാപണം രാജ്യത്തെ മുഴുവന്‍ സംവിധാനങ്ങളേയും മോദിസര്‍ക്കാര്‍ എത്രത്തോളം ദുരുപയോഗം ചെയ്യുന്നു എന്നതിന്റെ ഉദാഹരണമാണ്. അധികൃതരുടെ നിര്‍ദേശപ്രകാരമാണ് തങ്ങള്‍ പ്രവര്‍ത്തിച്ചതെന്നാണ് യാത്രക്കാരോട് നടത്തിയ ക്ഷമാപണത്തില്‍ അവര്‍ വ്യക്തമാക്കിയത്.

രാജ്യത്ത് പ്രതിപക്ഷ സ്വരം ഉയരാനേ പാടില്ലെന്ന സംഘപരിവാരത്തിന്റെ തിട്ടൂരമാണ് പവന്‍ഖേരയുടെ അറസ്റ്റിനുപിന്നില്‍ എന്നതാണ് യാഥാര്‍ത്ഥ്യം. കോണ്‍ഗ്രസ് പാര്‍ട്ടി നടത്തിക്കൊണ്ടിരിക്കുന്ന പാര്‍ലമെന്റ് തിരഞ്ഞെടുപ്പിന് വേണ്ടിയുള്ള മുന്നൊരുക്കങ്ങള്‍ ബി.ജെ.പിയെ തെല്ലൊന്നുമല്ല അലോസരപ്പെടുത്തിക്കൊണ്ടിരിക്കുന്നത്. രാജ്യത്തിന്റെ ഹൃദയംകീഴടക്കി രാഹുല്‍ഗാന്ധിയുടെ നേതൃത്വത്തില്‍ നടന്ന ഭാരത്‌ജോഡോ യാത്രതന്നെ ബി.ജെ.പി തങ്ങള്‍ക്കുള്ള കനത്ത മുന്നറിയിപ്പായെടുത്തിട്ടുണ്ട്.

രാഷ്ട്രീയാഭിപ്രായ വ്യത്യാസങ്ങള്‍ മാറ്റിവെച്ച് എല്ലാ വിഭാഗം ജനങ്ങളും രാഹുലിനൊപ്പം അണിനിരന്നതും വിവിധ രംഗങ്ങളിലെ പ്രമുഖര്‍ അദ്ദേഹവുമായി സംവദിക്കാനെത്തിയതും അധികാരത്തിന്റെ ഹുങ്കില്‍ ജനങ്ങളെ വെല്ലുവിളിച്ചുകൊണ്ട് മുന്നോട്ടുപോകുന്ന ബി.ജെ.പി സര്‍ക്കാറിനുള്ള താക്കീതായിരുന്നു. യാത്രയിലൂടെ 2024 ലും അനായാസ വിജയം പ്രതീക്ഷിച്ചിരുന്ന മോദി അമിത്ഷാ കൂട്ടുകെട്ടിന്റെ ഉറക്കം നഷ്ടപ്പെട്ടപ്പോള്‍ മറ്റു പ്രതിപക്ഷ കക്ഷികള്‍ക്ക് കോണ്‍ഗ്രസില്‍ കൂടുതല്‍ വിശ്വാസം രൂപപ്പെടുകയും പ്രതിപക്ഷ ഐക്യം എന്ന ചര്‍ച്ച സജീവമാവുകയും ചെയ്തിരിക്കുകയാണ്. ബീഹാറിലുള്‍പ്പെടെ വിവിധ സംസ്ഥാനങ്ങളില്‍ രൂപപ്പെട്ടുവരുന്ന മോദിവിരുദ്ധ നീക്കങ്ങളും ഈ യാത്ര നല്‍കിയ ആവേശത്തിന്റെ പിന്‍ബലത്തിലാണ്.

അതുകൊണ്ട് തന്നെ ഭാരത് ജോഡോ യാത്രയെ പാതി വഴിയില്‍ നിര്‍ത്തിപ്പിക്കാനുള്ള എല്ലാ ശ്രമങ്ങളും മോദിസര്‍ക്കാര്‍ പയറ്റിയിരുന്നു. കോവിഡിന്റെ പേരിലും സുരക്ഷയുടെ പേരിലുമെല്ലാം അവര്‍ പിന്നാലെ കൂടിയെങ്കിലും രാഹുല്‍ ഗാന്ധിയുടെ ഇഛാശക്തിയുടെ പിന്‍ബലമൊന്നുകൊണ്ടു മാത്രം യാത്രക്ക് ശുഭപര്യവസാനമൊരുങ്ങുകയായിരുന്നു.

പുതിയ അധ്യക്ഷന്റെ നേതൃത്വത്തില്‍ നടക്കുന്ന ആദ്യപ്ലീനറി സമ്മേളനത്തെയും ഇതേ വേവലാതിയോടെയാണ് ബി.ജെ.പി കാണുന്നത് എന്നതിന്റെ ഒടുവിലത്തെ ഉദാഹരണമാണ് പവന്‍രേഖയുടെ അറസ്റ്റ്. നേരത്തെ സമ്മേളനത്തിന് ആധിത്യമരുളുന്ന ചത്തീസ്ഗഢിലെ കോണ്‍ഗ്രസ് നേതാക്കളുടെ വീടുകളില്‍ റെയ്ഡ് നടത്തിയും സമ്മേളനത്തെ വെല്ലുവിളിക്കാന്‍ ശ്രമം നടത്തിയിരുന്നു. പാര്‍ട്ടി വക്താവിനെ സംരക്ഷിക്കാന്‍ കോണ്‍ഗ്രസ് നേതൃത്വം നടത്തിയ ചടുല നീക്കങ്ങള്‍ മോദിക്കും സംഘത്തിനുമുള്ള മുന്നറിയിപ്പാണ്. മുതിര്‍ന്ന നേതാവ് മനു അഭിഷേക് സിങ്‌വിയെ സുപ്രീംകോടതിയില്‍ ജാമ്യാപേക്ഷ നല്‍കാന്‍ ചുമതലപ്പെടുത്തുകയും അദ്ദേഹം കാര്യങ്ങള്‍ ഭംഗിയായി നിര്‍വഹിക്കുകയും ചെയ്തു. കടുത്ത നിബന്ധനോയടെയാണെങ്കിലും പവന്‍ ഖേരക്ക് ജാമ്യം നല്‍കിയതിലൂടെ പരമോന്നത നീതിപീഠവും സര്‍ക്കാറിന്റെ നീക്കങ്ങളെ പുഛിച്ചുതള്ളിയിരിക്കുകയാണ്.

ഏതായാലും രാജ്യം തിരഞ്ഞെടുപ്പ് ഗോഥയിലേക്കിറങ്ങാനിരിക്കെ പ്രതിപക്ഷപാര്‍ട്ടികള്‍ക്ക് നല്‍കുന്ന മുന്നറിയിപ്പാണ് കഴിഞ്ഞ ദിവസം നടന്ന അറസ്റ്റ് നാടകം. ബി.ജെ.പി സര്‍ക്കാര്‍ പത്തുവര്‍ഷം പൂര്‍ത്തിയാക്കാനിരിക്കെ രാജ്യത്തിന്റെ സകല മേഖലകളും തകര്‍ന്നു തരിപ്പണമായിരിക്കുകയാണ്. ഈ ദുര്‍ഭരണം ജനങ്ങളുടെ മുന്നില്‍ അനാവരണം ചെയ്യപ്പെടാതിരിക്കാന്‍ സര്‍ക്കാറിനെയും മന്ത്രിമാരെയും വിമര്‍ശിക്കുന്നത് രാജ്യദ്രോഹമാക്കിത്തീര്‍ക്കാനുള്ള ശ്രമമാണ് നടക്കുന്നത്. ഇതിനെതിരെയുള്ള നീതി പീഠത്തിന്റെ അവസരോചിതമായ ഇടപെടലും പ്രതിപക്ഷത്തിന്റെ ചടുലമായ നീക്കങ്ങളും രാജ്യത്തിന്റെ നന്മ ആഗ്രഹിക്കുന്നവരെ സംബന്ധിച്ച് പ്രതീക്ഷാ നിര്‍ഭരമാണ്.

"कांग्रेस के साथियों के साथ हम सब @IndiGo6E की उड़ान 6E204 से महाधिवेशन के लिए रायपुर जा रहे थे

हमारे साथी @Pawankhera को प्लेन से उतार दिया।

यह कैसी तानाशाही है? क़ानून व्यवस्था एक आदमी की मनमानी नहीं है

हम सब सच के सिपाही हैं,
सच के लिए लड़ेंगे।" @rssurjewala pic.twitter.com/qgCxa8w1cn

— INC TV (@INC_Television) February 23, 2023

പ്ലീനറി സമ്മേളനത്തില്‍ പങ്കെടുക്കാന്‍ മറ്റു നേതാക്കള്‍ക്കൊപ്പമാണ് പവന്‍ ഖേര ഡല്‍ഹിയില്‍ എത്തിയത്. പ്രധാനമന്ത്രിയെ വിമര്‍ശിച്ചതിന്റെ പേരിലാണ് നടപടിയെന്നാണ് കോണ്‍ഗ്രസ് വ്യക്തമാക്കി. കഴിഞ്ഞദിവസം വാര്‍ത്താസമ്മേളനത്തില്‍ പവന്‍ ഖേര പ്രധാനമന്ത്രിയെ വിമര്‍ശിച്ചിരുന്നു. വാര്‍ത്താസമ്മേളനത്തിനിടെ മോദിയുടെ അച്ഛന്റെ പേര് പവന്‍ ഖേര തെറ്റിച്ച് പറഞത് വിവാദമായിരുന്നു. മോദിയുടെ അച്ഛനെ അപമാനിച്ചു എന്ന് പറഞ്ഞ് ബിജെപി പ്രതിഷേധം സംഘടിപ്പിച്ചിട്ടുണ്ട്. അതിനിടെയാണ് പവന്‍ ഖേരയെ വിമാനത്തിനുള്ളില്‍ നിന്ന് പുറത്താക്കിയത്. ഇദ്ദേഹത്തെ പിന്നീട് അറസ്റ്റ് ചെയ്തു. ഇതിനെതിരെ സുപ്രീംകോടതിയില്‍ ഹര്‍ജി നല്‍കിയിരിക്കുകയാണ് അദ്ദേഹം. ഇത് മൂലം വിമാനം പുറപ്പെടാന്‍ വൈകി. കോണ്‍ഗ്രസ് പ്രവര്‍ത്തകര്‍ വിമാനം തടഞ്ഞുവെച്ചതാണ് കാരണം. ഗുണ്ടാസംഘത്തെപോലെയാണ് ആസാം പൊലീസ് പെരുമാറിയതെന്ന് കെ.സി പറഞ്ഞു.

കഴിഞ്ഞദിവസം അദാനിയുമായി ചേര്‍ത്ത് നരേന്ദ്രമോദി ഗൗതം ദാസ് മോദിയെന്ന് ഖേര വിശേഷിപ്പിച്ചിരുന്നു.ഹിന്‍ഡര്‍ബെര്‍ഗ് റിപ്പോര്‍ട്ടിന്റെ പേരില്‍ അദാനിക്കെതിരെ ലോക്‌സഭാ സമിതി അന്വേഷണത്തിന് തയ്യാറാകാത്ത നരേന്ദ്രഗൗതം ദാസ് മോദിയെന്നാണ് ഖേര പറഞ്ഞത്. ഉടന്‍തന്നെ അദ്ദേഹം സ്വയം തിരുത്തുകയും ചെയ്തിരുന്നു.