കേവല ഭൂരിപക്ഷത്തിന് 44 സീറ്റുകള്‍ വേണ്ട കശ്മീര്‍ നിയമസഭയില്‍ പി.ഡി.പിക്ക് 28 അംഗങ്ങളാണുള്ളത്. ബിജെപിക്ക് 25ഉം. രണ്ട് എം.എല്‍.എമാരുള്ള പീപ്പിള്‍ കോണ്‍ഫ്രന്‍സ് പാര്‍ട്ടി ബിജെപിയെ പിന്തുണയ്ക്കും. ഈ സാഹചര്യത്തില്‍ പി.ഡി.പിയില്‍ നിന്നും 17 എം.എല്‍.എമാരെ അടര്‍ത്തിയെടുക്കാനായാല്‍ ബി.ജെ.പിക്ക് പുതിയ സര്‍ക്കാര്‍ ഉണ്ടാക്കാം. കശ്മീരിലെ ചെറുകക്ഷികളേയും പിഡിപിയിലെ വിമതരേയും എന്ത് വില നല്‍കിയും ചാക്കിലാക്കി അധികാരം പിടിക്കാന്‍ ബി.ജെ.പി അണിയറയില്‍ ശക്തമായ കരുക്കള്‍ നീക്കുകയാണ്. പിഡിപിയുടെ പതിനെട്ടോളം വിമത എം.എല്‍.എമാര്‍ ബിജെപിക്കൊപ്പം നില്‍ക്കുമെന്നാണ് പുതിയ റിപ്പോര്‍ട്ടുകള്‍.

പി.ഡി.പിയുടെ വിമത എംഎല്‍എമാരില്‍ ഒരാളായ അബ്ദുള്‍ മജീദ് പാഡെര്‍ 28 എം.എല്‍.എമാരില്‍ 18 പേര്‍ ബിജെപിക്കൊപ്പം നില്‍ക്കുമെന്ന് കഴിഞ്ഞ ദിവസം വ്യക്തമാക്കിയിരിന്നു. ഇതോടെ ജമ്മു കശ്മീരില്‍ വീണ്ടും സര്‍ക്കാര്‍ രൂപീകരിക്കാനുള്ള ബിജെപിയുടെ നീക്കങ്ങള്‍ അന്തിമ ഘട്ടത്തിലാണെന്ന് പല രാഷ്ട്രീയ നിരീക്ഷകരും വിലയിരുത്തി. പുതിയ ബി.ജെ.പി സര്‍ക്കാര്‍ രൂപികരണത്തിന് ഡല്‍ഹിയിലെ അമിത് ഷായുടെ ഓഫീസില്‍ നിന്നുമുള്ള ഫോണ്‍കോളിന് കാത്തിരിക്കുകയാണ് സംസ്ഥാനത്തെ ബി.ജെ.പി നേതാക്കള്‍.

കശ്മീരിന്റെ സമാധാനത്തിന് വേണ്ടിയെന്ന പേരില്‍ 2014ല്‍ സംസ്ഥാനത്ത് അധികാരത്തിലെത്തിയ പിഡിപി-ബിജെപി സഖ്യസര്‍ക്കാര്‍ അടുത്തിടെയാണ് ബന്ധം ഉപേക്ഷിച്ചത്. നോമ്പുകാലം അവസാനിച്ചതിന് പിന്നാലെ വെടിനിര്‍ത്താല്‍ റദ്ദാക്കിയത് അടക്കമുള്ള വിഷയങ്ങളിലെ അഭിപ്രായ വ്യത്യാസങ്ങളെ തുടര്‍ന്ന് കഴിഞ്ഞ ജൂണ്‍ 19ന് സര്‍ക്കാറിനുള്ള പിന്തുണ ബി.ജെ.പി പിന്‍വലിക്കുകയായിരുന്നു. നിലവില്‍ രാഷ്ട്രപതി ഭരണത്തിന്റെ കീഴിലാണ് ജമ്മു കശ്മീര്‍

കശ്മീരില്‍ അധികാരം പിടിക്കാന്‍ പിഡിപിയെ പിളര്‍ത്താന്‍ ബിജെപി ശ്രമിക്കുകയാണെന്ന് കഴിഞ്ഞ ദിവസം മുന്‍ മുഖ്യമന്ത്രി മെഹ്ബൂബ മുഫ്തി ആരോപിച്ചിരുന്നു. പാര്‍ട്ടിയില്‍ വിള്ളലുണ്ടാക്കാന്‍ ശ്രമിച്ചാല്‍ അതിന്റെ പ്രത്യാഘാതം വലുതാകുമെന്നും മെഹ്ബൂബ താക്കീത് ചെയ്തിരുന്നു.

പി.ഡി.പിയെ പിളര്‍ത്തിയാല്‍ ഇനിയും യാസിന്‍ മാലിക്കിനേയും സലാഹുദ്ദീനേയും പോലുള്ളവര്‍ സൃഷ്ടിക്കപ്പെടുമെന്നായിരുന്നു മെഹ്ബൂബ മുഫ്തി പ്രസ്താവിച്ചത്. എന്നാല്‍ മുഫ്തിയുടെ വിവാദ പ്രസ്താവനയില്‍ പ്രതിഷേധിച്ച് ബിജെപി പ്രവര്‍ത്തകര്‍ അറസ്റ്റ് ചെയ്യണമെന്ന ആവശ്യപ്പെട്ട് മെഹ്ബൂബയുടെ കോലം കത്തിച്ചും പ്രതിഷേധിച്ചും രംഗത്തെത്തിയിരുന്നു.

അതേസമയം, പിഡിപിയെ പിളര്‍ക്കാന്‍ ബിജെപി ശ്രമിക്കുന്നു എന്ന ആരോപണം തള്ളി ബിജെപി നേതാവ് രാം മാധവ് രംഗത്ത് വരികയും ചെയ്തു. മെഹ്ബൂബ കള്ളം പറയുകയാണ് എന്നും സ്വന്തം പാര്‍ട്ടിയെ നിയന്ത്രിക്കാന്‍ പഠിക്കണം എന്നുമാണ് രാം മാധവ് മെഹ്ബൂബ മുഫ്തിക്ക് മറുപടി നല്‍കിയത്.

If Delhi, tries to dismiss the voting rights of people like 1987, if it tries to create divisions & interfere like that then I think just like a Salahuddin and a Yasin Malik were born in 1987…if it tries to break PDP like that then outcomes will be dangerous:Mehbooba Mufti, J&K pic.twitter.com/vxmtVmFWqf

— ANI (@ANI) July 13, 2018

‘പി.ഡി.പിയില്‍ ഭിന്നത സൃഷ്ടിക്കാന്‍ ഡല്‍ഹിയില്‍നിന്നു ശ്രമുണ്ടായാല്‍, മറ്റൊരു സലാഹുദ്ദീനെയോ യാസിന്‍ മാലിക്കിനെയോ സൃഷ്ടിക്കുന്നതിനു തുല്യമായിരിക്കും അത്. പിഡിപിയ തകര്‍ക്കാന്‍ ശ്രമിച്ചാല്‍ അനന്തരഫലം വലുതായിരിക്കും. പി.ഡി.പിയെ മനപൂര്‍വ്വം ആക്രമിച്ചാല്‍ ഇന്ത്യന്‍ ജനാധിപത്യത്തിലുള്ള കശ്മീര്‍ ജനതയുടെ വിശ്വാസം തന്നെ നഷ്ടപ്പെടും മെഹബൂബ പറഞ്ഞു.

She must really be desperate if she is threatening the centre with renewed militancy if PDP breaks up. She seems to have forgotten that militancy in Kashmir has already been reborn under her most able administration. https://t.co/aEmQXe0YaL

— Omar Abdullah (@OmarAbdullah) July 13, 2018

മെഹബൂബ മുഫ്തിയുടെ പ്രസ്താവനയ്‌ക്കെതിരെ നാഷനല്‍ കോണ്‍ഫറന്‍സ് നേതാവ് ഒമര്‍ അബ്ദുല്ല രംഗത്തെത്തി. പി.ഡി.പി തകര്‍ന്നാല്‍ കശ്മീരില്‍ കലഹം ഉണ്ടാകുമെന്നു കേന്ദ്രത്തെ ഭീഷണിപ്പെടുത്തുന്ന മെഹബൂബ, അവരുടെ ഭരണകാലത്ത് കശ്മീരിലുണ്ടായ കലഹങ്ങളെ മനപ്പൂര്‍വം മറക്കുകയാണെന്നു ഒമര്‍ ട്വിറ്ററില്‍ പ്രതികരിച്ചു.

പി.ഡി.പിയുമായുള്ള ബി.ജെ.പി സര്‍ക്കാര്‍ സഖ്യം താഴെവീണ സാഹചര്യത്തിലാണ് സര്‍ക്കാര്‍ രൂപീകരിക്കാനുള്ള കോണ്‍ഗ്രസ് നീക്കം. നേരത്തെ, പി.ഡി.പിയുമായി സഖ്യത്തിനില്ലെന്ന് കോണ്‍ഗ്രസ് അറിയിച്ചിരുന്നുവെങ്കിലും ഇപ്പോള്‍ ചര്‍ച്ചകള്‍ നടക്കുന്നുണ്ടെന്നാണ് സൂചന. സഖ്യത്തില്‍ നിന്ന് ബി.ജെ.പി പിന്‍വലിഞ്ഞതോടെ മുഖ്യമന്ത്രി മെഹ്ബൂബ മുഫ്തി രാജിവെക്കുകയായിരുന്നു.

87 സീറ്റുകളാണ് കാശ്മീര്‍ നിയമസഭയിലുള്ളത്. 44 പേരുടെ പിന്തുണ ലഭിച്ചാല്‍ സര്‍ക്കാര്‍ രൂപീകരിക്കാനാകും. എന്നാല്‍ കോണ്‍ഗ്രസ്സിന് 12 സീറ്റുകള്‍ മാത്രമാണുള്ളത്. 28 സീറ്റുള്ള പി.ഡി.പിയേയും സി.പി.ഐയേയും മറ്റ് നാലുപേരേയും കൂടി ചേര്‍ത്ത്‌സഖ്യം രൂപീകരിക്കാനാണ് കോണ്‍ഗ്രസ്സിന്റെ ശ്രമം. സി.പി.ഐക്ക് ഒരു സീറ്റ് മാത്രമാണുള്ളത്. ബി.ജെ.പിക്ക് 25 സീറ്റുകളുണ്ട്.