PDP Harthal – Chandrika Daily

ഹര്‍ത്താല്‍: വ്യാജപ്രചരണത്തില്‍ അങ്കലാപ്പിലായി ജനം; പലയിടത്തും വാഹനങ്ങള്‍ തടഞ്ഞു

chandrika — Mon, 16 Apr 2018 05:54:38 +0000

കോഴിക്കോട്: സാമൂഹ്യമാധ്യമങ്ങളിലൂടെ നടന്ന ഹര്‍ത്താലെന്ന വ്യാജപ്രചരണത്തില്‍ അങ്കലാപ്പിലായി ജനം. ഹര്‍ത്താലുണ്ടോ ഇല്ലയോ എന്ന ആശങ്കയിലാണ് പൊതുജനം. എന്നാല്‍ പുറത്തിറങ്ങിയവരെയാകട്ടെ പലയിടങ്ങളിലായി തടയുന്നുമുണ്ട്.

ഒരു കൂട്ടം ആളുകള്‍ രാവിലെ തന്നെ ദേശീയപാതകളിലുള്‍പ്പെടെ ഗതാഗതം തടസ്സപ്പെടുത്തി. വടക്കന്‍ ജില്ലകളില്‍ പലയിടങ്ങളിലും കടകള്‍ അടപ്പിച്ചു. ബസ്സുകള്‍ പൂര്‍ണ്ണമായും സര്‍വ്വീസുകള്‍ നടത്തുന്നില്ല. ചില ഒറ്റപ്പെട്ട പ്രദേശങ്ങളില്‍ പൂര്‍ണ്ണമായും ഹര്‍ത്താല്‍ പ്രതീതിയാണ്. കാസര്‍കോഡ് വിദ്യാനഗര്‍ അണങ്കൂറിലും മലപ്പുറത്തും വള്ളുവമ്പ്രത്തും വെട്ടിച്ചിറയിലും ചങ്കുവെട്ടിയിലും ബസ്സുകള്‍ തടഞ്ഞു.

കോഴിക്കോട് താമരശ്ശേരി-കൊയിലാണ്ടി റൂട്ടിലും, ബേപ്പൂര്‍-വടകര എന്നിവിടങ്ങളിലും ബസ്സുകള്‍ തടഞ്ഞു. മൂവാറ്റുപുഴയിലും കണ്ണൂരിലും തിരൂരും ഹര്‍ത്താല്‍ അനുകൂലികള്‍ പ്രകടനം നടത്തി. അതേസമയം, വാഹനങ്ങള്‍ തടയുന്നവര്‍ക്കെതിരേയും വ്യാജവാര്‍ത്തകള്‍ പ്രചരിപ്പിക്കുന്നവര്‍ക്കെതിരേയും നടപടിയെടുക്കുമെന്ന് പൊലീസ് അറിയിച്ചു.

‘പാര്‍ട്ടി പ്രവര്‍ത്തകര്‍ വൈകാരികമാകരുത്; ഹര്‍ത്താലല്ലാത്ത ജനാധിപത്യപരമാമായ മാര്‍ഗ്ഗങ്ങള്‍ തേടണം’; മഅ്ദനി

chandrika — Tue, 25 Jul 2017 09:40:54 +0000

ബാംഗളൂരു: സംസ്ഥാനത്ത് നാളെ പി.ഡി.പി ആഹ്വാനം ചെയ്ത ഹര്‍ത്താല്‍ പിന്‍വലിക്കുമെന്ന് അറിയിച്ച് ചെയര്‍മാന്‍ അബ്ദുല്‍നാസര്‍ മഅ്ദനി. പാര്‍ട്ടി പ്രവര്‍ത്തകര്‍ വൈകാരികമായി വിഷയത്തെ കാണരുത്. ജനാധിപത്യപരമായ മറ്റു മാര്‍ഗ്ഗങ്ങള്‍ കൊണ്ട് പ്രതിഷേധിക്കണമെന്നും മഅ്ദനി പറഞ്ഞു. മകന്‍ ഉമര്‍ മുക്താറിന്റെ വിവാഹത്തിനുവേണ്ടി കേരളത്തില്‍ എത്തണമെന്നായിരുന്നു ആഗ്രഹം. കര്‍ണാടക സര്‍ക്കാര്‍ അനുമതി നല്‍കുമെന്നായിരുന്നു പ്രതീക്ഷ. എന്നാല്‍ ലഭിച്ചില്ല. ഈ സംഭവത്തെ തുടര്‍ന്നാണ് കേരളത്തില്‍ ഹര്‍ത്താല്‍ നടത്താന്‍ പാര്‍ട്ടി ആഹ്വാനം ചെയ്യുന്നത്. എന്നാല്‍ ഇതില്‍ നിന്നും പാര്‍ട്ടി പ്രവര്‍ത്തകര്‍ പിന്തിരിയണമെന്ന് താന്‍ അറിയിച്ചിട്ടുണ്ട്. ഹര്‍ത്താല്‍ നടത്തുന്നത് വൈകാരികമാണ്. അതുമാറ്റിവെച്ച് മറ്റു പ്രതിഷേധങ്ങളുമായി സഹകരിക്കണമെന്നും മഅ്ദനി അഭ്യര്‍ത്ഥിച്ചു. മഅ്ദനി സംസാരിക്കുന്ന 13 മിനിറ്റോളം നീണ്ടുനില്‍ക്കുന്ന വീഡിയോയിലാണ് ഇക്കാര്യങ്ങള്‍ പറയുന്നത്.

watch video:

പിഡിപി ആഹ്വാനം ചെയ്ത നാളത്തെ ഹര്‍ത്താല്‍ പിന്‍വലിച്ചു

chandrika — Tue, 25 Jul 2017 08:21:33 +0000

തിരുവനന്തപുരം: സംസ്ഥാനത്ത് നാളെ പിഡിപി ആഹ്വാനം ചെയ്ത ഹര്‍ത്താല്‍ പിന്‍വലിച്ചു. പരപ്പന അഗ്രഹാര ജയിലില്‍ കഴിയുന്ന അബ്ദുല്‍ നാസര്‍ മദനിയുടെ നിര്‍ദേശപ്രകാരമാണ് ഹര്‍ത്താല്‍ നടത്താനുള്ള തീരുമാനത്തില്‍ നിന്ന് പിന്മാറുന്നതെന്ന് പിഡിപി വൈസ്പ്രസിഡന്റ് സുബൈര്‍ സ്വലാഹി പറഞ്ഞു.
മകന്റെ വിവാഹത്തില്‍ പങ്കെടുക്കാന്‍ അനുവദിക്കണമെന്നാവശ്യപ്പെട്ട് മദനി സമര്‍പ്പിച്ച അപേക്ഷ തള്ളിയ കര്‍ണാടക എന്‍ഐഎ കോടതി വിധിയില്‍ പ്രതിഷേധിച്ചാണ് ബുധനാഴ്ച സംസ്ഥാന വ്യാപകമായി ഹര്‍ത്താലിന് പിഡിപി ആഹ്വാനം ചെയ്തത്. രാവിലെ ആറു മുതല്‍ വൈകിട്ട് ആറു വരെയായിരുന്നു ഹര്‍ത്താല്‍ തീരുമാനിച്ചിരുന്നത്. എന്നാല്‍ ഹര്‍ത്താലിനെതിരെ മദനി പ്രതികരിച്ചതോടെയാണ് പിഡിപി നിലപാട് മാറ്റിയത്.