Peru – Chandrika Daily

കോപ്പയില്‍ ഇന്ന് രാത്രി മരക്കാന മാമാങ്കം

chandrika — Sun, 07 Jul 2019 05:00:28 +0000

റിയോ: അല്‍ഭുതങ്ങള്‍ പ്രതീക്ഷിക്കാം. ഫുട്‌ബോള്‍ മൈതാനത്ത് വമ്പന്മാര്‍ പതറിയ ചരിത്രവുമുണ്ട്-പക്ഷേ ഇന്ന് കോപ്പയുടെ ഫൈനലില്‍, അതും മരക്കാനയില്‍ ബ്രസീല്‍ പെറുവിന് മുന്നില്‍ തല താഴ്ത്തുമെന്ന് പ്രതീക്ഷിക്കുന്ന പെറുവീയന്മാര്‍ പോലുമുണ്ടാവില്ല. ബ്രസീലിന്റെ സ്വന്തം മൈതാനത്ത് ഇന്ന് പുലര്‍ച്ചെ നടക്കുന്ന കോപ്പ കലാശത്തില്‍ ബ്രസീല്‍ കപ്പുയര്‍ത്തിയാല്‍ അത് ചരിത്രമാണ്. ഇത് വരെ സ്വന്തം തട്ടകങ്ങളില്‍ നടന്ന വന്‍കരാ ചാമ്പ്യന്‍ഷിപ്പില്‍ ബ്രസീല്‍ തോറ്റിട്ടില്ല. ഈ കോപ്പയില്‍ ഇത് വരെ തോല്‍വിയില്ല ബ്രസീലിന്. വെനിസ്വേലക്കാരുമായി പ്രാഥമിക ഘട്ടത്തില്‍ വഴങ്ങിയ സമനിലയായിരുന്നു കാര്യമായ തിരിച്ചടി. ക്വാര്‍ട്ടറില്‍ പരാഗ്വേക്ക് മുന്നിലും തളക്കപ്പെട്ടെങ്കിലും ഷൂട്ടൗട്ട് ഭാഗ്യം തുണച്ചു.

പക്ഷേ ഇന്ന് ഫൈനലില്‍ പെറുവിനെ എതിരിടുമ്പോള്‍ ടീമിന്റെ വലിയ ആശ്വാസമെന്നത് ആദ്യ റൗണ്ടിലെ വമ്പന്‍ വിജയമാണ്. അഞ്ച് ഗോളിനായിരുന്നു അന്ന് ബ്രസീല്‍ പെറുവിനെ കീഴടക്കിയത്.
നെയ്മറില്ലെങ്കിലും ഉജ്ജ്വല ഫോമിലാണ് ഗബ്രിയേല്‍ ജീസസ്. റോബര്‍ട്ടോ ഫിര്‍മിനോയും സെമിയില്‍ മികവ് കാട്ടി. എവര്‍ട്ടണും കൂട്ടീന്യോയും കാസിമിറോയും അലിസണുമെല്ലാം മരക്കാനയില്‍ മിന്നുന്നവരാണ്. പെറുവിയന്‍ സംഘത്തില്‍ സൂപ്പര്‍ താരങ്ങളില്ല. പക്ഷേ രണ്ട് അട്ടിമറികള്‍ നടത്തിയാണ് അവരുടെ വരവ്. ക്വാര്‍ട്ടറില്‍ കൊളംബിയയെയും സെമിയില്‍ സാക്ഷാല്‍ ചിലിയെയും. അതിനാല്‍ ബ്രസീല്‍ ജാഗ്രതയില്‍ പിറകോട്ട് പോവില്ല.

പെറുവില്‍ അഭയം തേടി വെനസ്വേലക്കാരുടെ ഒഴുക്ക്

chandrika — Mon, 27 Aug 2018 08:23:36 +0000

ലിമ: വെനസ്വേലയില്‍നിന്ന്് എത്തിയ നൂറുകണക്കിന് ആളുകള്‍ പെറുവില്‍ അഭയത്തിന് അപേക്ഷ നല്‍കി. സാമ്പത്തിക പ്രതിസന്ധി രൂക്ഷമായ വെനസ്വേലയില്‍നിന്ന് ആയിരക്കണക്കിന് ആളുകളാണ് അയല്‍രാജ്യങ്ങളിലേക്ക് പലായനം ചെയ്യുന്നത്. അഭയാര്‍ത്ഥികളുടെ ഒഴുക്ക് കുറക്കാന്‍ പ്രവേശന നിയന്ത്രണങ്ങള്‍ പെറു അല്‍പം കര്‍ക്കശമാക്കിയിട്ടുണ്ട്. വെനസ്വേലയില്‍നിന്നുള്ളവര്‍ക്ക് പെറുവിലെ അധികൃതര്‍ പാസ്‌പോര്‍ട്ട് നിര്‍ബന്ധമാക്കി. ഇതുവരെ തിരിച്ചറിയല്‍ കാര്‍ഡ് ഉണ്ടായാല്‍ തന്നെ അതിര്‍ത്തി കടക്കമായിരുന്നു.

കൊളംബിയയും ഇക്വഡോറും വഴി പുറത്തുകടക്കുന്ന വെനസ്വേലക്കാര്‍ പെറുവില്‍ മെച്ചപ്പെട്ട ജീവിതം നയിക്കാന്‍ സാധിക്കുമെന്ന പ്രതീക്ഷയിലാണ്. പാസ്‌പോര്‍ട്ട് നിര്‍ബന്ധമാക്കുകയാണ് ചെയ്തിരിക്കുന്നതെന്നും അഭയാര്‍ത്ഥികള്‍ക്ക് പ്രവേശനം നിഷേധിച്ചിട്ടില്ലെന്നും പെറു ഭരണകൂടം വ്യക്തമാക്കിയിട്ടുണ്ട്. പെറുവില്‍ ഇപ്പോള്‍ തന്നെ നാല് ലക്ഷത്തോളം വെനസ്വേലക്കാരുണ്ട്. ഇവരില്‍ ഏറെപ്പേരും ഈ വര്‍ഷം എത്തിയവരാണ്. വെള്ളിയാഴ്ച മാത്രം 2500ലേറെ പേരാണ് അതിര്‍ത്തി കടന്നത്. ഭക്ഷണത്തിനു പോലും പ്രയാസം അനുഭവിക്കുന്ന വെനസ്വേലക്കാര്‍ മേഖലയില്‍ വന്‍ അഭയാര്‍ത്ഥി പ്രതിസന്ധി സൃഷ്ടിക്കുന്നുണ്ട്.

ഫുട്‌ബോള്‍ ലോകകപ്പ്: ഇതാണ് റഷ്യയില്‍ കളിക്കുന്ന 32 ടീമുകള്‍

ചന്ദ്രിക വെബ് ഡെസ്‌ക്‌ — Thu, 16 Nov 2017 07:18:25 +0000

ലിമ: ന്യൂസിലാന്റിനെ എതിരില്ലാത്ത രണ്ടു ഗോളിന് വീഴ്ത്തി പെറുവും കടന്നു കൂടിയതോടെ 2018 റഷ്യ ലോകകപ്പില്‍ പങ്കെടുക്കുന്ന 32 ടീമുകളും തീരുമാനമായി. ഗോള്‍രഹിത സമനിലയില്‍ അവസാനിച്ച ആദ്യ പാദത്തിനു ശേഷം സ്വന്തം തട്ടകത്തില്‍ ജെഫേഴ്‌സണ്‍ ഫര്‍ഫാന്‍, ക്രിസ്റ്റ്യന്‍ റാമോസ് എന്നിവരുടെ ഗോളുകളിലാണ് ലാറ്റിനമേരിക്കന്‍ ടീമായ പെറു ജയിച്ചു കയറിയത്.

റഷ്യ ലോകകപ്പില്‍ പങ്കെടുക്കുന്ന ടീമുകള്‍ ഇവരാണ്:

1. റഷ്യ (ആതിഥേയര്‍)
2. ബ്രസീല്‍
3. ഇറാന്‍
4. ജപ്പാന്‍
5. മെക്‌സിക്കോ
6. ബെല്‍ജിയം
7. ദക്ഷിണ കൊറിയ
8. സൗദി അറേബ്യ
9. ജര്‍മനി
10. ഇംഗ്ലണ്ട്
11. സ്‌പെയിന്‍
12. നൈജീരിയ
13. കോസ്റ്ററിക്ക
14. പോളണ്ട്
15. ഈജിപ്ത്
16. ഐസ്‌ലാന്റ്
17. സെര്‍ബിയ
18. പോര്‍ച്ചുഗല്‍
19. ഫ്രാന്‍സ്
20. യൂറുഗ്വായ്
21. അര്‍ജന്റീന
22. കൊളംബിയ
23. പാനമ
24. സെനഗല്‍
25. മൊറോക്കോ
26. തുനീഷ്യ
27. സ്വിറ്റ്‌സര്‍ലാന്റ്
28. ക്രൊയേഷ്യ
29. സ്വീഡന്‍
30. ഡെന്‍മാര്‍ക്ക്
31. ഓസ്‌ട്രേലിയ
32. പെറു

ഇറ്റലി, ഹോളണ്ട്, അമേരിക്ക തുടങ്ങിയ ടീമുകളുടെ അഭാവം ശ്രദ്ധിക്കപ്പെടുന്ന ലോകകപ്പില്‍ ഇത്തവണ അറബ് ലോകത്തു നിന്ന് അഞ്ച് ടീമുകളുണ്ട്. അടുത്തവര്‍ഷം ജൂണിലാണ് റഷ്യയില്‍ ലോകകപ്പ് അരങ്ങേറുക.