Petrol diesel – Chandrika Daily

വിലക്കയറ്റം, തിരഞ്ഞെടുപ്പ്; പെട്രോള്‍ ഡീസല്‍ വില അഞ്ച് മുതല്‍ 10 രൂപ വരെ കുറച്ചേക്കും

webdesk13 — Wed, 17 Jan 2024 04:51:25 +0000

അടുത്ത മാസത്തോടെ പെട്രോള്‍ ഡീസല്‍ വില കുറയ്ക്കുന്നത് പൊതുമേഖല എണ്ണ കമ്പനികളുടെ പരിഗണനയിലെന്ന് റിപ്പോര്‍ട്ടുകള്‍. അസംസ്‌കൃത എണ്ണയുടെ വിലയില്‍ കുറവുണ്ടാകുകയും ലാഭം കുതിച്ചുയരുകയും ചെയ്ത സാഹചര്യത്തിലാണ് ഇന്ധന വില കുറയ്ക്കുന്നത് പരിഗണിക്കുന്നതെന്ന് കമ്പനി-സര്‍ക്കാര്‍ വൃത്തങ്ങളെ ഉദ്ധരിച്ച് ഹിന്ദുസ്ഥാന്‍ ടൈംസ് റിപ്പോര്‍ട്ട് ചെയ്തു. ലോക്സഭാ തിരഞ്ഞെടുപ്പ് ആസന്നമായ ഘട്ടത്തില്‍ കേന്ദ്ര സര്‍ക്കാരിന്റെ നിര്‍ദേശംകൂടി പരിഗണിച്ചാകും നടപടി.

ക്രൂഡ് ഓയില്‍ വിലയില്‍ ഗണ്യമായ ഇടിവുണ്ടായിട്ടും 2022 ഏപ്രില്‍ മുതല്‍ ഇന്ധനവില കാര്യമായ മാറ്റമില്ലാതെ തുടരുകയാണ്. വിലനിര്‍ണ്ണയത്തില്‍ സമഗ്രമായ അവലോകനം നടക്കുന്നതോടെ അഞ്ച് രൂപ മുതല്‍ 10 രൂപ വരെ ലിറ്ററിന് കുറയുമെന്നാണ് കണക്കാക്കുന്നത്.

മൂന്ന് പൊതുമേഖല എണ്ണ കമ്പനികളും കഴിഞ്ഞ 2 പാദങ്ങളിലും ഗണ്യമായ ലാഭം നേടിയിട്ടുണ്ട്. മൂന്നാംപാദത്തിലും ഇത് തുടരുമെന്നാണ് റിപ്പോര്‍ട്ടുകള്‍. അന്താരാഷ്ട്ര വിപണിയില്‍ ഭാവിയില്‍ കുതിച്ചുചാട്ടത്തിനുള്ള സാധ്യതകള്‍ മുന്നില്‍കണ്ടാല്‍ തന്നെ പത്ത് രൂപ വരെ ലിറ്ററിന് കുറയ്ക്കാന്‍ കമ്പനികള്‍ക്ക് സാധിക്കും.

2023-24 സാമ്പത്തിക വര്‍ഷത്തിലെ ആദ്യ പകുതിയില്‍ മൂന്ന് സ്ഥാപനങ്ങളുടെയും സംയോജിത അറ്റാദായം 57,091.87 കോടി രൂപയായിരുന്നു. മൊത്ത വിപണിയിലെ വിലക്കയറ്റത്തോത് ഒമ്പത് മാസത്തെ ഉയര്‍ന്ന നിരക്കില്‍ എത്തിനില്‍ക്കുന്ന സാഹചര്യത്തില്‍ ഇന്ധന വില കുറയ്ക്കുന്നത് കേന്ദ്ര സര്‍ക്കാരും സജീവപരിഗണനയിലെടുത്തിട്ടുണ്ട്.

പെട്രോള്‍, ഡീസല്‍; അതിര്‍ത്തി കടന്നാല്‍ ലാഭം 10 രൂപ വരെ; അതിര്‍ത്തികളിലെ പമ്പുകളില്‍ തിരക്ക് കൂടുന്നു

webdesk14 — Sun, 02 Apr 2023 12:24:36 +0000

കേരളത്തില്‍നിന്നു നാടുകാണി ചുരം കയറി തമിഴ്‌നാട്ടിലെ നാടുകാണിയിലെത്തിയാല്‍ ഡീസലിന് 1.21 രൂപയും പെട്രോളിന് 3.73 രൂപയും കുറയും. ഇവിടെനിന്ന് പിന്നെയും യാത്ര ചെയ്ത് കര്‍ണാടകയിലെ ഗുണ്ടല്‍പേട്ടിലെത്തിയാല്‍ ഡീസലിന് 9.88 രൂപയും പെട്രോളിന് 6.97 രൂപയുമാണ് കുറയുക.

സംസ്ഥാന ബജറ്റില്‍ പ്രഖ്യാപിച്ച ഇന്ധന സെസ് പ്രാബല്യത്തില്‍ വന്നതോടെ അയല്‍ സംസ്ഥാനങ്ങളുമായി വിലയില്‍ കാര്യമായ വ്യത്യാസമാണ് വന്നിരിക്കുന്നത്. ഇതോടെ തമിഴ്‌നാട്ടിലും കര്‍ണാടകയിലും പോകുന്ന വാഹനങ്ങള്‍ പരമാവധി ഇന്ധനം നിറച്ചാണ് കേരളത്തിലേക്കു മടങ്ങുന്നത്. അതിര്‍ത്തികളിലെ പമ്പുകളിലെല്ലാം ഇന്നലെ ഇന്ധനം നിറയ്ക്കാന്‍ കേരളത്തില്‍നിന്നുള്ള വാഹനങ്ങളുടെ തിരക്കായിരുന്നു.

പച്ചക്കറി ഉള്‍പ്പെടെ സാധനങ്ങളെടുക്കാന്‍ കര്‍ണാടകയില്‍ പോകുന്ന വാഹനങ്ങളെല്ലാം ഇന്ധനം നിറയ്ക്കുന്നത് അവിടെ നിന്നാണ്. ഡീസല്‍ ലീറ്ററിന് ഏകദേശം 10 രൂപയുടെ വ്യത്യാസമാണുള്ളത്. ഇന്ധനം തീരാറാകുന്ന സാഹചര്യമുണ്ടായാലല്ലാതെ ചരക്കുവാഹനങ്ങള്‍ ഇവിടെനിന്ന് ഇന്ധനം നിറയ്ക്കാറില്ലെന്ന് കേരള അതിര്‍ത്തികളിലെ പമ്പ് നടത്തിപ്പുകാര്‍.

വിലവ്യത്യാസം ഇങ്ങനെ;

3 സംസ്ഥാനങ്ങളിലെയും അതിര്‍ത്തികളിലെ പമ്പുകളില്‍ ഇന്നലത്തെ ഇന്ധനവില ഇങ്ങനെ: വഴിക്കടവ് (കേരളം): ഡീസല്‍ 97.58, പെട്രോള്‍ 108.69, നാടുകാണി (തമിഴ്‌നാട്): ഡീസല്‍ 96.37, പെട്രോള്‍ 104.96, ഗുണ്ടല്‍പേട്ട് (കര്‍ണാടക): ഡീസല്‍ 87.70, പെട്രോള്‍ 101.72.

കേരളത്തിലും സെഞ്ച്വറിയടിച്ച് പെട്രോള്‍ വില

Test User — Mon, 07 Jun 2021 05:08:20 +0000

ന്യൂഡല്‍ഹി: രണ്ടുദിവസത്തെ ഇടവേളക്കു ശേഷം ഇന്ധന വില വീണ്ടും വര്‍ധിപ്പിച്ച് പൊതുമേഖലാ എണ്ണക്കമ്പനികള്‍. പെട്രോളിന് 27 പൈസയും ഡീസലിന് 30 പൈസയുമാണ് ലിറ്ററിന്മേല്‍ വില വര്‍ധിപ്പിച്ചത്. കഴിഞ്ഞ 36 ദിവസത്തിനിടെ 20 തവണയാണ് രാജ്യത്ത് ഇന്ധന വില വര്‍ധിപ്പിച്ചത്.

തിരുവനന്തപുരത്ത് ഒരു ലിറ്റര്‍ പ്രീമിയം പെട്രോളിന് 100.20 രൂപയായി. വയനാട്ടില്‍ എക്‌സ്ട്രാ പ്രീമിയം പെട്രോളിന് 100.24 രൂപയായി. തിരുവനന്തപുരത്ത് സാധാരണ ഒരു ലിറ്റര്‍ പെട്രോളിന് 97.38 രൂപയും ഡീസല്‍ ലിറ്ററിന് 92.31 രൂപയുമാണ് ഇന്നലത്തെവില. കൊച്ചിയില്‍ പെട്രോളിന് 95.68 രൂപയും ഡീസലിന് 91.03 രൂപയുമാണ് വിലയെങ്കില്‍ കോഴിക്കോട്ട് പെട്രോളിന് 95.38 രൂപയും ഡീസലിന് 90.73 രൂപയുമാണ് ഇന്നത്തെ വില.

രണ്ടു ദിവസത്തിനു ശേഷം പെട്രോള്‍ ഡീസല്‍ വിലയില്‍ വീണ്ടും വര്‍ധന

Test User — Mon, 10 May 2021 06:42:30 +0000

കൊച്ചി: രണ്ടു ദിവസത്തിനുശേഷം രാജ്യത്തെ പെട്രോള്‍ ഡീസല്‍ വില വീണ്ടും വര്‍ധിച്ചു. പെട്രോളിന് 26 പൈസയും ഡീസലിന് 35 പൈസയും വര്‍ദ്ധനവാണ് ഇന്നുണ്ടായത്.
തിരുവനന്തപുരത്ത് പെട്രോളിന് 93.51 രൂപയും ഡീസലിന് 88.25 രൂപയുമായി ഉയര്‍ന്നു. കൊച്ചിയില്‍ പെട്രോള്‍ ലിറ്ററിന് 91.73 രൂപയും ഡീസലിന് 86.48 രൂപയും വര്‍ധിച്ചു.
നിയമസഭാ തിരഞ്ഞെടുപ്പ് നടക്കുന്ന ഘട്ടങ്ങളില്‍ സംസ്ഥാനത്ത് ഇന്ധന വിലയില്‍ വര്‍ധനവ് ഉണ്ടായിരുന്നില്ല. ഫലപ്രഖ്യാപനത്തിന് വീണ്ടും വിലവര്‍ധനവ് തുടരുകയാണ്‌