pg – Chandrika Daily

പി.ജി. ക്യാപ് 2024; 13-ന് മുൻപായി പ്രവേശനം നേടണം

webdesk13 — Sun, 08 Sep 2024 08:48:16 +0000

കാലിക്കറ്റ് സർവകലാശാലയുടെ 2024 – 2025 അധ്യായന വർഷത്തെ ബിരുദാനന്തര ബിരുദ പ്രോഗ്രാമുകളുടെ രണ്ടാം അലോട്ട്മെന്റിന് ശേഷം നിലനിൽക്കുന്ന ഒഴിവുകൾ നികത്തുന്നതിനായുള്ള വിദ്യാർഥികളുടെ പരിഷ്കരിച്ച റാങ്ക് ലിസ്റ്റിൽ നിന്നും പ്രവേശനം ആഗ്രഹിക്കുന്നവർ തങ്ങളുടെ റാങ്ക്, വെബ്‌സൈറ്റിൽ ലഭ്യമാക്കിയിട്ടുള്ള സീറ്റൊഴിവ് എന്നിവ പരിശോധിച്ച് കോളേജ് / സെന്ററുമായി ബന്ധപ്പെട്ട് അവർ നിർദ്ദേശിക്കുന്ന സമയക്രമ പ്രകാരം സെപ്റ്റംബർ 13-ന് മുൻപായി പ്രവേശനം നേടേണ്ടതാണ്.

കൂടുതൽ വിവരങ്ങൾക്ക്‌

https://admission.uoc.ac.in/admission?pages=pg

നീറ്റ് പി.ജി പരീക്ഷയുടെ തിയതി പ്രഖ്യാപിച്ചു

webdesk13 — Fri, 05 Jul 2024 10:38:27 +0000

നീറ്റ് പി.ജി പരീക്ഷയുടെ പുതിയ തിയതി പ്രഖ്യാപിച്ചു. ആഗസ്റ്റ് 11 ആണ് പുതിയ തിയതി. രണ്ട് ഷിഫ്റ്റുകളിലായാണ് പരീക്ഷ നടത്തുകയെന്ന് എൻ.ടി.എ അറിയിച്ചു. ചോദ്യപേപ്പർ ചോർന്നതിനെ തുടർന്ന് ജൂൺ 23ന് നടത്താനിരുന്ന പരീക്ഷ റദ്ദാക്കുകയായിരുന്നു.

നീറ്റ് യു.ജി അടക്കമുള്ള പ്രവേശന പരീക്ഷയുടെ ചോദ്യപേപ്പറുകൾ ചോർന്നിരുന്നു. ഇതിന് പിന്നാലെയാണ് പി.ജി പരീക്ഷയും വിവാദത്തിൽപെട്ടതും പരീക്ഷ മാറ്റിവെച്ചതും. നാഷണൽ ബോർഡ് ഓഫ് എക്സാമിനേഷൻസ് ഇൻ മെഡിക്കൽ സയൻസസിലെ ഉദ്യോഗസ്ഥരും കേന്ദ്ര ആരോഗ്യ മന്ത്രാലയവും തമ്മിൽ നടത്തിയ അവലോകന യോഗത്തിന് ശേഷമാണ് പുതിയ പരീക്ഷ തിയതിൽ തീരുമാനമുണ്ടായത്.

ഫിഷറീസ് സർവകലാശാലയിൽ യു.ജി./പി.ജി./പിഎച്ച്.ഡി പ്രോഗ്രാമിലേക്ക്‌ അപേക്ഷിക്കാം

webdesk13 — Thu, 18 Apr 2024 14:43:50 +0000

കേരള ഫിഷറീസ് സമുദ്രപഠന സർവകലാശാലയിൽ (കുഫോസ്) 2024-2025 അധ്യയനവർഷത്തെ യു.ജി./ പി.ജി./ പി.എച്ച്‌ഡി/പി.ഡി. എഫ്. പ്രോഗ്രാമുകളിലേക്കുള്ള പ്രവേശനത്തിന് ഇപ്പോൾ അപേക്ഷിക്കാം.

. സമുദ്രശാസ്ത്രം, ഫിഷറീസ് എന്നീ മേഖലകളുമായി ബന്ധപ്പെട്ടുള്ള വിവിധ വിഷയങ്ങളിലാണ് അവസരം.

. അപേക്ഷ http://admission.kufos.ac.in/ എന്ന വെബ്സൈറ്റ് വഴി ഓൺലൈനായി സമർപ്പിക്കണം (എൻ.ആർ.ഐ. ജി, ക്വാട്ടയിലേക്കും ഓൺലൈനായി അപേക്ഷിക്കണം).

. കോഴ്സു‌കൾ, ഫീസ്, സീറ്റുകളുടെ എണ്ണം തുടങ്ങി വിശദവിവരങ്ങൾക്ക് വെബ്സൈറ്റ് സന്ദർശിക്കുക.

വെബ്സൈറ്റ്:
kufos.ac.in

സി.യു.ഇ.ടി പി.ജി: സമയം വീണ്ടും നീട്ടി

webdesk14 — Thu, 01 Feb 2024 06:50:34 +0000

മികച്ച ഭൗതിക സാഹചര്യങ്ങൾ, കഴിവുറ്റ അധ്യാപകർ,വിശാലമായ ക്യാമ്പസുകൾ,മികവുറ്റലൈബ്രറികൾ, മിതമായ ഫീസ് തുടങ്ങി നിരവധി സവിശേഷതകളുള്ള കേന്ദ്ര സർവ്വകലാശാലകളിലെ ബിരുദാനന്തര പ്രോഗ്രാമുകൾക്ക് പ്രവേശനം നേടാനുള്ള പൊതു പ്രവേശന പരീക്ഷയായ കോമൺ യൂണിവേഴ്സിറ്റി എൻട്രൻസ് ടെസ്റ്റ് – പോസ്റ്റ് ഗ്രാജ്വേററിൻ്റെ (സി.യു.ഇ.ടി – പി.ജി ) അപേക്ഷാ തിയ്യതി വീണ്ടും നീട്ടി.
നാഷണൽ ടെസ്റ്റിംഗ് ഏജൻസി (എൻ.ടി.എ)യുടെ പുതിയ അറിയിപ്പ് പ്രകാരം ഫെബ്രുവരി 7 ന് രാത്രി 11:50 വരെ അപേക്ഷ സമർപ്പിക്കാം.

പ്രവേശന സ്ഥാപനങ്ങൾ

കേരള സെൻട്രൽ യൂണിവേഴ്സിറ്റി കാസർക്കോട്,
ആസാം, ആന്ധ്ര പ്രദേശ്, സൗത്ത് ബീഹാർ, ഗുജറാത്ത്, ഹരിയാന,ഹിമാചൽ പ്രദേശ്,ജമ്മു, ജാർഖണ്ഡ്, കർണാടക, പഞ്ചാബ് ,രാജസ്ഥാൻ, തമിഴ്നാട് ,
ഗുരു-ഗാസി ദാസ് വിശ്വ വിദ്യാലയ ,
ജവഹർലാൽ നെഹ്റു ,പോണ്ടിച്ചേരി,ഇംഗ്ലീഷ് ആൻഡ് ഫോറിൻ ലാംഗ്വേജസ്,ത്രിപുര, ഹൈദരാബാദ് ,ഡൽഹി തുടങ്ങിയ സെൻട്രൽ യൂനിവേഴ്സിറ്റികൾ, ടാറ്റാ ഇൻസ്റ്റിറ്റ്യൂട്ട് ഓഫ് സോഷ്യൽ സയൻസ്,
ഫൂട് വെയർ ഡിസൈൻ ആൻഡ് ഡെവലപ്മെൻറ് ഇൻസ്റ്റ്യൂട്ട് ,
ഇന്ത്യൻ കളിനറി ഇൻസ്റ്റ്യൂട്ട് ,ഇന്ത്യൻ ഇൻസ്റ്റിറ്റ്യൂട്ട് ഓഫ് മാസ് കമ്യൂണിക്കേഷൻ,
കേരള ഡിജിറ്റൽ യൂണിവേഴ്സിറ്റി, ഇന്ത്യൻ ഇൻസ്റ്റ്യൂട്ട് ഓഫ് ടൂറിസം ആൻഡ് ട്രാവൽ മാനേജ്മെൻറ് തുടങ്ങി നിരവധി സ്ഥാപനങ്ങളിൽ സി.യു.ഇ.ടി പി.ജി സ്കോർ വഴിയാണ് പ്രവേശനം. കൂടാതെ വിവിധ സംസ്ഥാന/കൽപ്പിത/സ്വകാര്യ സർവകലാശാലകളും പ്രവേശന മാനദണ്ഡമായി സി.യു.ഇ.ടി സ്കോർ പരിഗണിക്കുന്നുണ്ട്.

അപേക്ഷാ യോഗ്യത

ബന്ധപ്പെട്ട വിഷയങ്ങളിൽ അംഗീകൃത ബിരുദം നേടിയവർക്കും അവസാനവർഷ
പരീക്ഷ എഴുതുന്നവർക്കും അപേക്ഷിക്കാം.
പ്രായപരിധിയില്ല. എന്നാൽ ചേരാൻ ഉദ്ദേശിക്കുന്ന സ്ഥാപനങ്ങളിലെ വ്യവസ്ഥകൾ പാലിക്കേണ്ടി വരും.
ഓരോ കോഴ്സിനും വിവിധ സർവകലാശാലകളിൽ വ്യത്യസ്ത പ്രവേശന യോഗ്യതയായിരിക്കും.

കമ്പ്യൂട്ടർ അധിഷ്ഠിത പരീക്ഷ

മാർച്ച് 11 നും 28 നു മിടയിലാണ് പരീക്ഷ.ഒരു ദിവസം മൂന്ന് ഷിഫ്റ്റുകളുണ്ട്. 75 മൾട്ടിപ്പിൾ ചോയ്സ് ചോദ്യങ്ങൾക്ക് 105 മിനിറ്റ് സമയം. ശരിയുത്തരത്തിന് 4 മാർക്ക് തെറ്റിയാൽ ഒരു മാർക്ക് നഷ്ടപ്പെടും.
താല്പര്യമനുസരിച്ച് നാല് ടെസ്റ്റ് പേപ്പറുകൾ വരെ എഴുതാം. ചേരാനുദ്ദേശിക്കുന്ന
സർവകലാശാലയിലെ താല്പര്യമുള്ള കോഴ്സിന് ഏത് പേപ്പറാണ് വേണ്ടതെന്ന് മനസ്സിലാക്കി വേണം പേപ്പറുകൾ തിരഞ്ഞെടുക്കുന്നത്.

പരീക്ഷാകേന്ദ്രങ്ങൾ

കേരളത്തിലെ എല്ലാ ജില്ലകളിലും പരീക്ഷയെഴുതാം.
24 വിദേശ കേന്ദ്രങ്ങളടക്കം മുന്നൂറോളം പരീക്ഷാകേന്ദ്രങ്ങളുണ്ട്.
മുൻഗണനയനുസരിച്ച് രണ്ട് പരീക്ഷാകേന്ദ്രങ്ങൾ അപേക്ഷയിൽ കാണിക്കണം.
സ്ഥിര മേൽവിലാസമോ ഇപ്പോഴുള്ള മേൽവിലാസമോ ഉൾപ്പെട്ട സംസ്ഥാനത്തെ കേന്ദ്രങ്ങൾ മാത്രമേ തിരഞ്ഞെടുക്കാൻ സാധിക്കുകയുള്ളൂ.
അഡ്മിറ്റ് കാർഡ് മാർച്ച് ഏഴ് മുതൽ വെബ്സൈറ്റിൽ ലഭ്യമാകും .

അപേക്ഷ

pgcuet.samarth.ac.in വഴിയാണ് അപേക്ഷിക്കേണ്ടത്. ജനറൽ വിഭാഗക്കാർക്ക് രണ്ട് പേപ്പർ വരെ എഴുതാൻ 1200 രൂപയാണ് ഫീസ്. ഓരോ അധിക പേപ്പറിനും 600 രൂപ വീതവും.
ഒ.ബി.സി, ഇ.ഡബ്ല്യു എസ്,പട്ടിക വിഭാഗങ്ങൾ, ഭിന്നശേഷിക്കാർ എന്നിവർക്ക് ഫീസിളവുണ്ട്.
വിദേശത്ത് പരീക്ഷ എഴുതാൻ എല്ലാ വിഭാഗക്കാരും രണ്ട് പേപ്പർ വരെ ആറായിരം രൂപയും ഓരോ അധിക പേപ്പറിന് 2000 രൂപ വീതവും അടയ്ക്കണം.
ഫെബ്രുവരി 8 രാത്രി 11:50 വരെ ഫീസടക്കാം.
അപേക്ഷയിലെ അപാകതകൾ പരിഹരിക്കുന്നതിന് ഫെബ്രുവരി 9 മുതൽ 11 ന് രാത്രി 11:50 വരെ സമയമുണ്ട്.

സി.യു.ഇ.ടി പി.ജി പരീക്ഷയിൽ മികച്ച സ്കോർ നേടിയത് കൊണ്ട് മാത്രം
പ്രവേശനം ലഭിക്കുകയില്ല.
താല്പര്യമുള്ള സർവകലാശാലകളിൽൽ പ്രത്യേകം അപേക്ഷിക്കേണ്ടതുണ്ട്. അപേക്ഷിക്കുന്ന വിദ്യാർത്ഥികളുടെ സ്കോർ പരിഗണിച്ച്, ഓരോ സർവ്വകലാശാലയും പ്രത്യേക റാങ്ക് ലിസ്റ്റ് തയ്യാറാക്കിയാണ് പ്രവേശനം നടത്തുക

പി.കെ അന്‍വര്‍ മുട്ടാഞ്ചേരി

കരിയര്‍ വിദഗ്ധന്‍ anver@live.in

2023-2024 അദ്ധ്യയന വര്‍ഷത്തെ പി.ജി. ഏകജാലക പ്രവേശനത്തോടനുബന്ധിച്ചുള്ള രണ്ടാം അലോട്ട്‌മെന്റ് പ്രസിദ്ധീകരിച്ചു

webdesk14 — Thu, 27 Jul 2023 12:27:26 +0000

അലോട്ട്‌മെന്റ് ലഭിച്ച വിദ്യാര്‍ത്ഥികള്‍ മാന്‍ഡേറ്ററി ഫീസ് അടച്ച് അലോട്ട്‌മെന്റ് ഉറപ്പാക്കേണ്ടതാണ്. ആദ്യ അലോട്ട്‌മെന്റ് ലഭിച്ച് മാന്‍ഡേറ്ററി ഫീസ് അടച്ചവര്‍ രണ്ടാം അലോട്ട്‌മെന്റിന് ഫീസ് അടയ്‌ക്കേണ്ടതില്ല. മാന്‍ഡേറ്ററി ഫീസടയക്കാനുള്ള അവസാന സമയം ആഗസ്റ്റ് 1ന് 3 പി.എം വരെ.

ഫീസ്

1. ജനറല്‍ 510 രൂപ

2. എസ്‌സി, എസ്ടി 125 രൂപ

അലോട്ട്‌മെന്റ് പരിശോധിക്കുന്നതിനും, ഫീസ് അടക്കുന്നതിനും താഴെയുള്ള ലിങ്കില്‍ ക്ലിക്ക് ചെയ്യുക https://admission.uoc.ac.in

ഒന്നാം തീയതി മുതല്‍ പിജി ഡോക്ടര്‍മാരുടെ സേവനം ഗ്രാമീണ മേഖലയിലും; മന്ത്രി വീണാ ജോര്‍ജ്

webdesk13 — Mon, 27 Feb 2023 15:42:19 +0000

തിരുവനന്തപുരം: മാര്‍ച്ച് മാസം ഒന്നു മുതല്‍ പിജി ഡോക്ടര്‍മാരുടെ സേവനം ഗ്രാമീണ മേഖലയിലും ലഭിക്കുമെന്ന് ആരോഗ്യമന്ത്രി വീണാ ജോര്‍ജ്. സംസ്ഥാനത്തെ സര്‍ക്കാര്‍, സ്വകാര്യ മേഖലയിലെ ഡോക്ടര്‍മാരുടെ സേവനമാണ് ലഭ്യമാക്കുക. മെഡിക്കല്‍ കോളജുകളിലെ രണ്ടാം വര്‍ഷ പിജി ഡോക്ടര്‍മാരെ താലൂക്ക്, ജില്ല, ജനറല്‍ ആശുപത്രികളിലേക്ക് നിയമിക്കും.

പിജി വിദ്യാര്‍ഥികളുടെ ട്രെയിനിങ്ങിന്റെ ഭാഗമായാണ് നിയമനം. സേവനം ലഭ്യമാകുന്നതോടെ പൊതുജനങ്ങള്‍ക്ക് ഏറെ സഹായകരമാകുമെന്നാണ് കണക്ക് കൂട്ടല്‍. സര്‍ക്കാര്‍ മെഡിക്കല്‍ കോളജുകളിലെ 854, സ്വകാര്യ മെഡിക്കല്‍ കോളജുകളിലെ 430, എറണാകുളം അമൃത ഇന്‍സ്റ്റിറ്റിയൂട്ടിലെ 98 എന്നിങ്ങനെ ആകെ 1382 പിജി ഡോക്ടര്‍മാരെയാണ് വിവിധ ആശുപത്രികളിലേക്ക് നിയമിക്കുന്നത്.

മൂന്നു മാസം വീതമുള്ള നാല് ഗ്രൂപ്പുകളായിട്ടാണ് സേവനം ലഭ്യമാകുന്നത്. പരമാവധി അതത് ജില്ലകളിലെ മെഡിക്കല്‍ കോളജുകളില്‍ നിന്നുള്ള പിജി ഡോക്ടര്‍മാരെയായിരിക്കും നിയമിക്കുക. പിജി വിദ്യാര്‍ഥികള്‍ക്കും ഈ പദ്ധതി ഏറെ ഗുണം ചെയ്യും. മികച്ച പരിശീലനം നേടാനും സംസ്ഥാനത്തെ ജില്ലാതല ആരോഗ്യ സംവിധാനങ്ങളെ അടുത്തറിയാനും ഈ പദ്ധതിയിലൂടെ കഴിയുമെന്നാണ് ആരോഗ്യവകുപ്പിന്റെ കണക്ക് കൂട്ടല്‍.

ഡെന്റൽ പിജി പ്രവേശനത്തിന് നീറ്റ് എം‍ഡിഎസ് പരീക്ഷ; അപേക്ഷ ഈ മാസം 30 വരെ

webdesk13 — Tue, 10 Jan 2023 13:01:33 +0000

അടുത്ത അധ്യയന വർഷത്തെ എംഡിഎസ് പ്രവേശനത്തിനുള്ള നീറ്റ്–എം‍ഡിഎസ് പരീക്ഷയ്ക്ക് (NEET-MDS 2023 : National Eligibility-cum-Entrance Test) ഈ മാസം 30ന് രാത്രി 11.55 വരെ ഓൺലൈൻ അപേക്ഷ സമർപ്പിക്കാം. അപേക്ഷാഫീ 4250 രൂപ. പട്ടിക, ഭിന്നശേഷി വിഭാഗക്കാർ 3250 രൂപ. ഒരു അപേക്ഷ മാത്രമേ ‌സമർപ്പിക്കാവൂ. അപേക്ഷ ആവശ്യമെങ്കിൽ ഫെബ്രുവരി 2 മുതൽ 5 വരെ എഡിറ്റ് ചെയ്യാം. പരീക്ഷയുടെ ചുമതല നാഷനൽ ബോർഡ് ഓഫ് എക്സാമിനേഷൻസിനാണ് www.nbe.edu.in www.natboard.edu.in പ്രവേശന കൗൺസലിങ് നടത്തുന്നത് കേന്ദ്ര ആരോഗ്യ മന്ത്രാലയത്തിന്റെ നിയന്ത്രണത്തിലുള്ള മെഡിക്കൽ കൗൺസലിങ് കമ്മിറ്റി www.mcc.nic.in

ബിഡിഎസ് ജയിച്ച് 2023 മാർച്ച് 31ന് എങ്കിലും ഇന്റേൺഷിപ് പൂർത്തിയാക്കി, സംസ്ഥാന ഡെന്റൽ കൗൺസിൽ റജിസ്ട്രേഷൻ നേടാവുന്നവർക്ക് അപേക്ഷിക്കാം. അ‍‍ഡ്മിറ്റ് കാർഡ് 22 മുതൽ ഡൗൺലോഡ് ചെയ്യാം. കംപ്യൂട്ടറുപയോഗിച്ചുള്ള ടെസ്റ്റ്, മാർച്ച് ഒന്നിന്. ഇന്ത്യൻ ‍‍ഡെന്റൽ കൗൺസിൽ അംഗീകരിച്ച ബിഡിഎസ് സിലബസനുസരിച്ച്, 17 വിഷയങ്ങളിൽ നിന്നുള്ള 240 മൾട്ടിപ്പിൾ–ചോയ്സ് ചോദ്യങ്ങൾക്ക് 3 മണിക്കൂറിൽ ഉത്തരം അടയാളപ്പെടുത്തണം. ശരിയുത്തരത്തിന് 4 മാർക്ക്, തെറ്റിന് ഒരു മാർക്കു കുറയ്ക്കും. പരീക്ഷാഫലം 31ന്. 76 പരീക്ഷാകേന്ദ്രങ്ങളിൽ തിരുവനന്തപുരം, കൊല്ലം, കോട്ടയം, എറണാകുളം, തൃശൂർ, കോഴിക്കോട്, കണ്ണൂർ, കോയമ്പത്തൂർ, ബെംഗളൂരു, ചെന്നൈ, മുംബൈ, ഡൽഹി എന്നിവയും ഉൾപ്പെടും. പ്രവേശനാർഹതയ്ക്ക് 50-ാം പെർസെന്റൈലിലെങ്കിലും വരണം.