പൗരത്വ ഭേദഗതി നിയമം, പൗരത്വ രജിസ്റ്റര്‍ എന്നിവ നടപ്പിലാക്കുന്നതിന്റെ ഭാഗമായി എല്ലാ സംസ്ഥാനങ്ങളിലും കേന്ദ്ര ഭരണ പ്രദേശങ്ങളിലും ഡിറ്റന്‍ഷന്‍ സെന്ററുകള്‍ (തടങ്കല്‍ പാളയം) ആരംഭിക്കണമെന്ന് 2019 ല്‍ ആഭ്യന്തര മന്ത്രാലയം ഉത്തരവിലൂടെ നിര്‍ദേശങ്ങള്‍ നല്‍കിയിരുന്നു. നിലവിലുള്ള ജയിലുകള്‍ക്കും പൊലീസ് വകുപ്പിന്റെ അധീനതയിലുള്ള ഭൂമിക്കും പുറത്താണ് തടങ്കല്‍ പാളയങ്ങള്‍ നിര്‍മിക്കേണ്ടതെന്നും പൊലീസ് സേനയിലെ എണ്ണ കുറവ് കണക്കിലെടുത്ത് നടത്തിപ്പിന് പ്രത്യേക സംവിധാനം ഏര്‍പെടുത്തണമെന്നും കേന്ദ്ര സര്‍ക്കാര്‍ ഇറക്കിയ മോഡല്‍ ഡിറ്റന്‍ഷന്‍ മാന്വലിലെ പ്രധാന നിര്‍ദേശങ്ങളാണ്. കേന്ദ്ര സര്‍ക്കാരിന്റെ തീരുമാനം നടപ്പിലാക്കുന്നതിന്റെ ഭാഗമായി പിണറായി സര്‍ക്കാര്‍ കേരളത്തിലെ ജയിലുകളില്‍ വിദേശികളുടെ കണക്കെടുപ്പ് നടത്തുന്നതുമായി ബന്ധപ്പെട്ട് ദേശീയ മാധ്യമമായ ദി ഹിന്ദുവിന്റെ റിപ്പോര്‍ട്ടിനെ തുടര്‍ന്ന് വലിയ രാഷ്ട്രീയ വാഗ്വാദങ്ങളാണ് സംസ്ഥാനത്ത് നടന്നത്. തടങ്കല്‍ പാളയ വിഷയത്തില്‍ പ്രതിപക്ഷവും മാധ്യമങ്ങളും ആശങ്ക പ്രകടിപ്പിച്ചപ്പോള്‍ രൂക്ഷ വിമര്‍ശനമാണ് അന്ന് മുഖ്യമന്ത്രി പിണറായി നടത്തിയത്. ഒരു തടങ്കല്‍ പാളയവും ഈ കേരളത്തില്‍ ഉണ്ടാകില്ല. ജനം സാക്ഷി, നമ്മുടെ നാട് സാക്ഷി, ഈ നാട് സര്‍ക്കാരില്‍ അര്‍പിച്ച ഉത്തരവാദിത്തം ഞങ്ങള്‍ നിറവേറ്റുമെന്ന് നിയമസഭയിലും മലപ്പുറത്ത് ഭരണഘടനാസംരക്ഷണ റാലിയിലും മുഖ്യമന്ത്രി നല്‍കിയ വിഖ്യാത ഉറപ്പാണ് കൊല്ലത്ത് തടങ്കല്‍ പാളയം തുറന്നതിലൂടെ ജലരേഖയായി മാറിയത്.

മൂന്ന് നൈജീരിയക്കാരും ഒരു എല്‍സാല്‍വദോര്‍ പൗരനും ഉള്‍പെടെ നാല് വിദേശികളുടെ ജയില്‍ മോചനവുമായി ബന്ധപെട്ട് ശിക്ഷാകാലാവധി കഴിഞ്ഞവര്‍ക്ക് അവരുടെ നാട്ടില്‍ തിരിച്ചുപോകുന്നതുവരെ ജയിലില്‍ അല്ലാത്ത സ്ഥലത്ത് താമസിപ്പിക്കാന്‍ സൗകര്യം തരപ്പെടുത്തണമെന്ന് ഹൈകോടതി വിധിച്ചിരുന്നു. തടവുകാരുടെ മോചനവുമായി ബന്ധപെട്ടുണ്ടായ ഹൈക്കോടതി വിധിയുടെ പശ്ചാതലത്തിലാണ് തടങ്കല്‍ പാളയം സംസ്ഥാന സര്‍ക്കാര്‍ ആരംഭിച്ചതെന്ന വാദത്തിലൂടെ ജനങ്ങളെ കബളിപ്പിക്കാനാണ് സര്‍ക്കാര്‍ ശ്രമിക്കുന്നത്. ഹൈകോടതി വിധി വന്ന് രണ്ട് മാസത്തിന്‌ശേഷം 2020 ഫെബ്രുവരിയില്‍ ചേര്‍ന്ന നിയമസഭാസമ്മേളനത്തിലാണ് കരുതല്‍ പാളയം ആരംഭിക്കില്ലന്ന് മുഖ്യമന്ത്രി പ്രഖ്യാപിച്ചത്. ഹൈക്കോടതി വിധിയുടെ പശ്ചാത്തലത്തിലാണെങ്കില്‍ സാധാരണഗതിയില്‍ സര്‍ക്കാര്‍ പുറത്തിറക്കുന്ന ഉത്തരവില്‍ അത് വ്യക്തമായി പരാമര്‍ശിക്കാറുണ്ട്. തടങ്കല്‍ പാളയം നിര്‍മാണവുമായി ബന്ധപ്പെട്ട് സന്നദ്ധ സംഘടനകളുടെ സഹായം തേടി പുറത്തിറക്കിയ വിജ്ഞാനപനത്തിലോ ഉത്തരവിലോ ഒരിടത്തും അത്തരമൊരു പരാമര്‍ശം പോലുമില്ല എന്നതാണ് വാസ്തവം.

അനധികൃതമായി രാജ്യത്ത് പ്രവേശിച്ച വിദേശികളെയും പാസ്‌പോര്‍ട്ട്, വിസ കാലാവധി കഴിഞ്ഞ വിദേശികളെയും നടപടിക്രമങ്ങള്‍ പൂര്‍ത്തിയാക്കുന്നത് വരെ താല്‍ക്കാലികമായി പാര്‍പ്പിക്കാനുള്ള കേന്ദ്രമാണ് ഡിറ്റക്ഷന്‍ സെന്ററെന്ന് പിണറായി സര്‍ക്കാരിന്റെ പുതിയ ഭാഷ്യം മോദിയില്‍നിന്നും അമിത്ഷായില്‍നിന്നും കടം കൊണ്ടതാണ്. ആഭ്യന്തര മന്ത്രാലയ ഉത്തരവിന് അനുസരിച്ച് പൗരത്വം തെളിയിക്കാന്‍ കഴിയാത്തവരെയും ട്രിബ്യൂണലുകള്‍ വഴി വിദേശികളായി പ്രഖ്യാപിക്കുന്നവരെയും പൗരത്വ നിയമം വഴി സ്വദേശികളെ വിദേശി മുദ്ര ചാര്‍ത്തി കാരാഗ്രഹത്തിലടക്കുന്ന അസം മോഡല്‍ ഡിറ്റന്‍ഷന്‍ സെന്ററാണ് കൊല്ലത്തെ കൊട്ടിയത്തും ആരംഭിച്ചിട്ടുള്ളത്.

പൗരത്വ പ്രക്ഷോഭ കാലത്ത് ന്യൂനപക്ഷ രക്ഷക വേഷം കെട്ടി വോട്ടുകള്‍ പെട്ടിയിലാക്കിയതിനുശേഷമുള്ള മുഖ്യന്റെ മലക്കം മറിച്ചലാണ് അസമിനും കര്‍ണ്ണാടകക്കുംശേഷം ഡിറ്റന്‍ഷന്‍ സെന്ററിനായി സാമൂഹിക നീതി വകുപ്പിന് ചുമതല നല്‍കിയും നടത്തിപ്പിനായി അരക്കോടി രൂപ മാറ്റി വെച്ചതിലും പ്രകടമാവുന്നത്. മോദിയുടെയും അമിത്ഷായുടെയും ഗുഡ് ബുക്കില്‍ ഇടം കിട്ടാന്‍ ആഭ്യന്തര വകുപ്പ് ആര്‍.എസ്.എസിന് കാഴ്ച വെച്ചുകൊണ്ടുള്ള പ്രവര്‍ത്തനങ്ങളാണ് പല ഘട്ടങ്ങളിലായി തുടര്‍ ഭരണത്തിലും പിണറായി നടത്തികൊണ്ടിരിക്കുന്നത്. പൗരത്വ സമര കേസ് പിന്‍വലിക്കലിലെ മനംമാറ്റം ഉദാഹരണമാണ്. പൗരത്വ പ്രക്ഷോഭത്തില്‍ 835 കേസുകളിലായി ആയിരങ്ങളെയാണ് പിണറായിയുടെ പൊലീസ് പ്രതികളാക്കിയത്.

500 ല്‍പരം കേസുകളില്‍ ഇതിനകം കുറ്റപത്രം സമര്‍പ്പിച്ചു കഴിഞ്ഞു. പൗരത്വ കേസുകള്‍ പിന്‍വലിക്കുമെന്ന വാഗ്ദാനം മോദി ഭക്തിയും ഭയവും മൂലം ഇതുവരെ നടപ്പിലാക്കാന്‍ സര്‍ക്കാരിനു കഴിഞ്ഞിട്ടില്ല. തമിഴ്‌നാട്ടിലെ സ്റ്റാലിന്‍ സര്‍ക്കാര്‍ പൗരത്വ കേസുകള്‍ കൂട്ടത്തോടെ പിന്‍വലിച്ച സംഭവം ചേര്‍ത്തു വായിക്കുമ്പോഴാണ് സംഘി പ്രീണനത്തിന്റെ ആഴം വ്യക്തമാവുന്നത്. കേന്ദ്ര ഭരണകൂടം അന്വേഷണ ഏജന്‍സികളെ ദുരുപയോഗം ചെയ്ത് നടത്തുന്ന രാഷ്ട്രീയ വേട്ടയില്‍ പ്രതിഷേധിച്ച് ഹരിയാനയിലെ സൂരജ് കുണ്ഡില്‍ കഴിഞ്ഞ മാസം അമിത്ഷാ വിളിച്ചുചേര്‍ത്ത ആഭ്യന്തര മന്ത്രിമാരുടെ യോഗം മമതാ ബാനര്‍ജി, സ്റ്റാലിന്‍, അശോക് ഗെഹലോട്ട്, നവീന്‍ പട്‌നായിക് തുടങ്ങിയ പ്രതിപക്ഷ നിരയിലെ മുഖ്യമന്ത്രിമാര്‍ ബഹിഷ്‌ക്കരിച്ചപ്പോള്‍ യോഗിക്കും ഷാക്കും നടുവില്‍ ഇരിക്കുന്ന പിണറായിയുടെ ചിത്രമാണ് സംഘികള്‍ നാടാകെ പ്രചരിപ്പിച്ചത്.

കേരളത്തില്‍ ബി.ജെ.പിക്ക് ഭരണമില്ലങ്കിലും ആഭ്യന്തര വകുപ്പ് മുഖാന്തരം ഫാസിസ്റ്റ് ഇംഗിതം നിറവേറ്റി കൊടുക്കുന്നതില്‍ പിണറായി ബദ്ധശ്രദ്ധനാണ്.

മൂന്നാംമുറ പ്രയോഗിക്കുന്നവരുടെ തൊപ്പി തെറിപ്പിക്കുമെന്ന് മുഖ്യമന്ത്രി തുടര്‍ച്ചയായി നല്‍കുന്ന താക്കീതുകള്‍ വകവെക്കാതെ, കാക്കിയുടെ ബലത്തില്‍ ജനത്തെ ഇടിച്ചു പിഴിയുകയാണ് കേരള പൊലീസ്. കൊല്ലം കിളികൊല്ലൂരില്‍ പൊലീസുകാരെ ആക്രമിച്ചെന്നു കള്ളക്കേസെടുത്തു സൈനികനേയും സഹോദരനെയും ഇടിച്ചു ഇഞ്ചപ്പരുപമാക്കിയതാണ് സമീപകാലത്തെ മൂന്നാംമുറ.
മൂന്നാം മുറക്ക് പുറമെ കുട്ടികളെ തല്ലല്‍, സ്ത്രീകള്‍ക്ക് നേരെയുള്ള അതിക്രമം എന്നിങ്ങനെ അടുത്ത കാലത്ത് പൊലീസിനെതിരെ പരാതി പ്രളയമാണ്. എന്നിട്ടും ഇത്തരം ഉദ്യോഗസ്ഥന്മാരെ സര്‍വീസില്‍നിന്ന് പിരിച്ചുവിടാനോ ഇത്തരക്കാര്‍ക്കെതിരെ നടപടി കൈകൊള്ളാനോ ഭരണകൂടം ശ്രമിക്കാത്തത് എന്ത് കൊണ്ടാണ്.

സാധാരണക്കാരായ ആളുകള്‍ക്ക് പൊലീസ് സ്‌റ്റേഷനിലേക്ക് പരാതിയുമായി പോകാന്‍ തന്നെ ഭയമാണ്. ചില പൊലീസ് ഉദ്യോഗസ്ഥര്‍ പരാതിക്കാരോട് തട്ടിക്കയറുകയാണ്. കണ്ണൂര്‍ ജില്ലയില്‍ ഒരു പൊലീസ് സ്‌റ്റേഷനെതിരെ ഒട്ടെറെ പരാതികള്‍ ഉണ്ട്. റോഡ് സൈഡില്‍ വെച്ച് പുകവലിച്ചെന്നു ആരോപിച്ചു എസ്.ഐ യുവാവിനെ സ്‌റ്റേഷനില്‍ കൊണ്ട് പോയി മര്‍ദിച്ചു. ഫുട്‌ബോള്‍ കളിക്കിടെ റോഡിലേക്ക് വന്ന ബോള്‍ എടുക്കാന്‍ വന്ന പത്തൊന്‍പത്കാരനെ എസ്.ഐ സ്‌റ്റേഷനില്‍ കൊണ്ട് പോയി ചീത്ത പറയുകയും മര്‍ദിക്കുകയും ചെയ്ത വീഡിയോ സോഷ്യല്‍ മീഡിയയില്‍ പ്രചരിച്ചതാണ്. കോഴിക്കോട് ഫറോക്കില്‍ പി.എസ്.സി പരീക്ഷക്ക് ബൈക്കില്‍ പോകുകയായിരുന്ന ഉദ്യോഗാര്‍ത്ഥിയുടെ ബൈക്കിന്റെ താക്കോല്‍ പൊലീസ് ഊരിയെടുത്തത് ഈ അടുത്താണ്. ഇതേതുടര്‍ന്ന് അവസരം നഷ്ടമായ യുവാവിന്റെ വേദനക്ക് ആര് മറുപടി നല്‍കും.

പൊലീസിനെ പേടിച്ചു പുറത്ത് ഇറങ്ങിനടക്കാന്‍ പറ്റാത്ത അവസ്ഥയാണ് ഇപ്പോള്‍ കേരളത്തില്‍. എമാന്മാര്‍ക്ക് എന്തെങ്കിലും തിരുവുള്ളക്കേടു തോന്നിയാല്‍ ബാലപീഢനമോ, സ്ത്രീപീഢനമോ, ലഹരികടത്തോ എന്ത് കേസാണ് തലയില്‍ വെച്ച് കെട്ടുക എന്ന് അറിയില്ല. പിന്നീട് കോടതി കയറി ഇറങ്ങി നിരപരാധിത്വം തെളിയിക്കുമ്പോഴേക്ക് ജീവിതത്തിന്റെ നല്ലൊരു ഭാഗം തീര്‍ന്നിട്ടുണ്ടാവും. കിളികൊല്ലൂരില്‍ സൈനികനേയും സഹോദരനെയും ലഹരി കേസില്‍ കുടുക്കിയത് ക്രൂരതയാണ്. ഇതിലൊരു യുവാവിന്റെ വിവാഹം വരേ മുടങ്ങി. ഇതിനു മുമ്പ് കണ്ണൂരില്‍ പ്രവാസിയായ യുവാവിനെ മോഷണക്കുറ്റം ആരോപിച്ചു ചോദ്യം ചെയ്യലിന് എന്ന പേരില്‍ പൊലീസ് കൊണ്ടുപോയി പിന്നീട് പുറത്തിറങ്ങിയത് 54 ദിവസങ്ങള്‍ക്ക് ശേഷമാണ്. നിരപരാധിയാണന്നു കണ്ടു പിന്നീട് വിട്ടയക്കുകയായിരുന്നു. ജില്ലയില്‍ കോളിളക്കം സൃഷ്ടിച്ച കേസില്‍ എസ്.ഐക്ക് സ്ഥലം മാറ്റമാണ് ലഭിച്ചത്. അത്രയും നാള്‍ നിരപരാധിയായ യുവാവും കുടുംബവും അനുഭവിച്ച വേദനക്കും അപമാനത്തിനും ആരാണ് സമാധാനം പറയുക.

ആഭ്യന്തര മന്ത്രിയും ഡി.ജി.പിയുമെല്ലാം ഇതൊന്നും അറിയാഞ്ഞിട്ടാണോ അതോ അറിഞ്ഞില്ലെന്ന് നടിക്കുന്നതാണോ. ജനങ്ങള്‍ക്ക് രക്ഷയേകാന്‍ ജനമൈത്രി പൊലീസ് പോലുള്ള പദ്ധതികള്‍ നടപ്പാക്കി മാതൃകയായ കേരളത്തില്‍ പൊലീസ് എന്ന പേരിനു അര്‍ഹമല്ലാത്ത കുറെ പേരുണ്ടന്നാണ് സമീപകാല സംഭവങ്ങളില്‍ നിന്ന് മനസ്സിലാകുന്നത്. ഒരു വര്‍ഷം മുമ്പ് കസ്റ്റഡി മരണമുണ്ടായപ്പോള്‍ പൊലീസിലെ ഉന്നതരുടെ യോഗം വിളിച്ചു മുഖ്യമന്ത്രി കര്‍ശനമായ ചില നിര്‍ദേശങ്ങള്‍ നല്‍കിയിരുന്നു. പക്ഷേ പാലിക്കപെടുന്നില്ലന്നാണ് വാസ്തവം.

പൊലീസ് സ്‌റ്റേഷനുകളില്‍ സി.സി.ടി.വിയും വോയിസ് റെക്കോഡറും സ്ഥാപിക്കണമെന്നും ശബ്ദവും ദൃശ്യവും ഒന്നര കൊല്ലം സൂക്ഷിക്കണമെന്നും സുപ്രീംകോടതി വിധിച്ചത് അതിക്രമങ്ങള്‍ വര്‍ധിക്കുന്ന സാഹചര്യത്തിലാണ്. കിളികൊല്ലൂര്‍ സ്‌റ്റേഷനിലും ആ സംവിധാനമുണ്ട്. അക്കാര്യം പോലും മറന്നാണ് പൊലീസുകാര്‍ മര്‍ദിച്ചത്. ഇത്തരം പൊലീസ് ഉദ്യോഗസ്ഥര്‍ക്കെതിരെ കര്‍ശന നടപടി സ്വീകരിക്കാന്‍ ഭരണകൂടം തയ്യാറാകാത്തത്‌കൊണ്ടാണ് പൊലീസ് നിരപരാധിയായ ജനങ്ങളെ വേട്ടയാടുന്നത്. പൊലീസ് സ്‌റ്റേഷനുകള്‍ ജനസൗഹൃദമാകണമെന്ന മാര്‍ഗനിര്‍ദ്ദേശങ്ങള്‍ പാലിക്കുന്നുണ്ടോ എന്ന് പരിശോധനയില്ല. അതിക്രമം കാട്ടുന്നവരെ ഒരു തരത്തിലും സംരക്ഷിക്കില്ലെന്ന ഉറച്ച സന്ദേശം നല്‍കാന്‍ ആഭ്യന്തര വകുപ്പിന് കഴിയണം.

ഗവര്‍ണര്‍ ആരിഫ് മുഹമ്മദ് ഖാനും കേരള സര്‍ക്കാരും തമ്മിലുള്ള കിടമത്സരം മാന്യതയുടെ സകല സീമകളും ഭേദിച്ച് മുന്നേറിക്കൊണ്ടിരിക്കുകയാണ്. ദിവസം പിന്നിടുമ്പോഴും ഗവര്‍ണറും മുഖ്യമന്ത്രിയും മന്ത്രിമാരും പരസ്പരം നടത്തുന്ന വിഴുപ്പലക്കുകള്‍ സഹിക്കുകയാണ് കേരളജനത. പിപ്പടിയും ചെപ്പടിയും പ്രീതിയുമെല്ലാമാണ് കളം നിറഞ്ഞുനില്‍ക്കുന്നത്. അതിനിടയില്‍ സംസ്ഥാനം നേരിട്ടുകൊണ്ടിരിക്കുന്ന ഗുരുതര വിഷയങ്ങള്‍ക്ക് നേരെ കണ്ണടക്കുകയാണ് ഇരുപക്ഷവും. സംസ്ഥാനത്തെ ഉന്നത വിദ്യാഭ്യാസ മേഖലയെ മുഴുവന്‍ വാളിന്റെ മുനയില്‍ നിര്‍ത്തി പന്ത്രണ്ടോളം സര്‍വകലാശാലകളെ അസ്ഥിരപ്പെടുത്തുന്ന പ്രവര്‍ത്തനങ്ങളില്‍ മത്സരിക്കുകയാണ് ഗവര്‍ണറും സര്‍ക്കാറും. എല്ലാ വൈസ് ചാന്‍സലര്‍മാരെയും ഒറ്റയടിക്ക് പിരിച്ചുവിടാനുള്ള ഗവര്‍ണറുടെ തീരുമാനം നീതീകരിക്കാന്‍ കഴിയില്ല. വൈസ് ചാന്‍സലര്‍മാര്‍ അടിയന്തിരമായി രാജിവെക്കുകയോ അവരെ പിരിച്ചുവിടുകയോ ചെയ്യേണ്ട സാഹചര്യം നിലവിലില്ല. കേരള ടെക്‌നോളജിക്കല്‍ സര്‍വകലാശാല വൈസ് ചാന്‍സലറുമായി ബന്ധപ്പെട്ട സുപ്രീംകോടതി വിധിയെ തുടര്‍ന്നാണ് ഗവര്‍ണറുടെ പ്രഖ്യാപനം. എടുത്തുചാടിയുള്ള പ്രഖ്യാപനത്തിന് മുമ്പായി സര്‍ക്കാറുമായി കൂടിയാലോചിക്കുകയും ഉചിതമായ നടപടികള്‍ കൈക്കൊള്ളുന്നതിനുള്ള ധാരണകള്‍ രൂപപ്പെടുത്തുകയുമാണ് വേണ്ടിയിരുന്നത്. ഗവര്‍ണറുടെ തിടുക്കം പിടിച്ച നടപടികളുടെ പിന്നിലുള്ള രാഷ്ട്രീയം വളരെ പ്രകടമാണ്.

ഗവര്‍ണറും മുഖ്യമന്ത്രിയും മന്ത്രിമാരും തമ്മിലുള്ള ബന്ധം ഊഷ്മളവും സുദൃഢവുമായിരിക്കുക സംസ്ഥാനത്തിന്റെ ഭരണകാര്യങ്ങളുടെ ആരോഗ്യകരമായ സുസ്ഥിതിക്ക് അനിവാര്യമാണ്. സംസ്ഥാനത്തെ പ്രഥമ പൗരനും ഭരണഘടനാ തലവനുമാണ് ഗവര്‍ണര്‍. എന്നാല്‍ സംസ്ഥാന മന്ത്രിസഭയുടെ ഉപദേശത്തിന് അനുസൃതമായാണ് ഗവര്‍ണര്‍ പ്രവര്‍ത്തിക്കേണ്ടത്. മന്ത്രിസഭയുടെ നേതാവായ മുഖ്യമന്ത്രിയുമായാണ് ഗവര്‍ണര്‍ ആശയവിനിമയം നടത്തേണ്ടത്. ആരോഗ്യകരമായ ബന്ധം നിലനിര്‍ത്തേണ്ട സംസ്ഥാന സര്‍ക്കാറും ഗവര്‍ണറും തമ്മില്‍ ഏറെ നാളുകളായി പ്രത്യക്ഷ യുദ്ധം നടന്നുവരികയാണ്. സര്‍ക്കാര്‍ പുറപ്പെടുവിച്ച ഓര്‍ഡിനന്‍സുകളില്‍ ഒപ്പുവെക്കാതെയും മുഖ്യമന്ത്രിയെയും മന്ത്രിമാരെയും വെല്ലുവിളിച്ചുകൊണ്ടുമാണ് ഗവര്‍ണര്‍ കുറേക്കാലമായി പ്രവര്‍ത്തിക്കുന്നത്. സംസ്ഥാനത്തെ മന്ത്രിമാരില്‍ പ്രീതി നഷ്ടപ്പെടുന്നു എന്ന് പറയുന്ന ഗവര്‍ണര്‍ അക്കാര്യം മുഖ്യമന്ത്രിയുമായി ആശയവിനിമയം നടത്താതെ മാധ്യമങ്ങള്‍ക്ക് മുമ്പില്‍ പറയുകയാണ് ചെയ്യുന്നത്. മന്ത്രിയെ നിയമിക്കുന്നത് ഗവര്‍ണര്‍ ആണ് എന്നത് ശരിയാണെങ്കിലും ജനാധിപത്യപരമായി അധികാരത്തില്‍ വന്ന മുഖ്യമന്ത്രിയുടെ ശുപാര്‍ശയില്‍ ഒപ്പുവെക്കുക മാത്രമാണ് ഗവര്‍ണര്‍ ചെയ്യുന്നത്. ഗവര്‍ണറാണ് മന്ത്രിയെ നിയമിച്ചതെന്നും അതുകൊണ്ട് ഗവര്‍ണര്‍ പറയുമ്പോള്‍ മന്ത്രി രാജിവെക്കണമെന്നും പറയുന്നത് ജനാധിപത്യത്തിന് വിരുദ്ധമാണ്. സംസ്ഥാന സര്‍ക്കാറും കേന്ദ്ര സര്‍ക്കാറും തമ്മിലുള്ള പാലമാണ് ഗവര്‍ണര്‍ പദവി. രണ്ടു ഭരണ കേന്ദ്രങ്ങളുടെ പ്രതിനിധികള്‍ തമ്മിലുള്ള ബന്ധമായാണ് ഇരുപക്ഷത്തെയും കാണേണ്ടത്. അവര്‍ പരസ്പരമുള്ള ബന്ധങ്ങള്‍ക്ക് രാഷ്ട്രീയം തടസ്സമാവാന്‍ പാടില്ല.

പൗരത്വനിയമ കാലം തൊട്ടുതന്നെ ആരിഫ് മുഹമ്മദ് ഖാന്‍ സംഘ്പരിവാര്‍ രാഷ്ട്രീയം പ്രകടമാക്കുകയും തദനുസൃതമായ പ്രതികരണങ്ങള്‍ നടത്തുകയും ചെയ്തിട്ടുണ്ട്. സംസ്ഥാന സര്‍ക്കാര്‍ ഖാന്റെ രാഷ്ട്രീയത്തിന് മറുപടി നല്‍കാതെ തങ്ങളുടെ കാര്യസാധ്യങ്ങള്‍ക്ക് വേണ്ടി ഗവര്‍ണറെ ഉപയോഗപ്പെടുത്തുന്നതില്‍ മാത്രമായിരുന്നു ശ്രദ്ധ ചെലുത്തിയിരുന്നത്. എന്നാല്‍ ഇപ്പോള്‍ ചാന്‍സലര്‍ പദവിയെ ഉപയോഗപ്പെടുത്തി സര്‍വകലാശാലകളെ സംഘ് രാഷ്ട്രീയത്തിന് വിധേയമാക്കുന്നതിനുള്ള നിലം പാകപ്പെടുത്തുകയാണ് ആരിഫ് ഖാന്‍ എന്ന ആര്‍.എസ്.എസ് സഹയാത്രികന്‍ ചെയ്തുകൊണ്ടിരിക്കുന്നത്. അതേസമയം സംസ്ഥാനത്തെ മിക്ക സര്‍വകലാശാലകളെയും മാര്‍ക്‌സിസ്റ്റ് സൈദ്ധാന്തിക കേന്ദ്രങ്ങളാക്കിയും സി.പി.എമ്മിന്റെ ഓഫീസുകളാക്കിയുമാണ് വളരെക്കാലമായി സി.പി.എം പ്രവര്‍ത്തിച്ചുവരുന്നത്. തങ്ങളുടേതല്ലാത്ത മുഴുവന്‍ രാഷ്ട്രീയ പാര്‍ട്ടികളെയും പ്രത്യയശാസ്ത്രങ്ങളെയും ഇല്ലായ്മ ചെയ്യാന്‍ സായുധമായും സൈദ്ധാന്തികമായും അവര്‍ പ്രവര്‍ത്തിച്ചുവരുന്നു. സിന്‍ഡിക്കേറ്റുകളില്‍ അക്കാദമിക മികവുള്ളവരെ മാറ്റിനിര്‍ത്തി പകരം തങ്ങളുടെ രാഷ്ട്രീയ ഗുണ്ടാ സ്ഥാനം വഹിക്കുന്നവരെയാണ് സി.പി.എം തിരുകിക്കയറ്റിക്കൊണ്ടിരിക്കുന്നത്. അങ്ങനെ രൂപപ്പെടുന്ന സിന്‍ഡിക്കേറ്റുകളാണ് ഓരോ സര്‍വകലാശാലകളുടെയും വൈസ് ചാന്‍സലര്‍മാരെ ഭരിച്ചുകൊണ്ടിരിക്കുന്നത്. തങ്ങളുടെ നോമിനികളായി വരുന്ന വൈസ് ചാന്‍സലര്‍മാര്‍ തങ്ങളുടെ രാഷ്ട്രീയ കൈയൂക്കിന്റെ ഭാഗമായി രൂപപ്പെടുത്തിയ സിന്‍ഡിക്കേറ്റുകളുടെ കളിപ്പാവകളായി പ്രവര്‍ത്തിക്കണം എന്നതാണ് സി.പി.എമ്മിന്റെ സര്‍വകലാശാല ലൈന്‍. അതിനപ്പുറം സര്‍വകലാശാലകളുടെ അക്കാദമിക നിലവാരമോ ഭരണ കാര്യക്ഷമതയോ ഒന്നും സി.പി.എമ്മിന് വിഷയമല്ല. തങ്ങളുടെ വിദ്യാര്‍ത്ഥി സംഘടനയായ എസ്.എഫ്.ഐക്ക് മാത്രം വിഹരിക്കാനും വിളയാടാനുമുള്ള ഇടമാക്കി യൂണിവേഴ്‌സിറ്റി കാമ്പസുകളെ സി.പി.എം കാണുന്നു. പൂര്‍ണമായും മാര്‍ക്‌സിസ്റ്റ് രാഷ്ട്രീയവത്കരിക്കപ്പെട്ട താവളങ്ങളാണ് കേരളത്തിലെ മിക്ക സര്‍വകലാശാലകളും.

സ്വാതന്ത്ര്യത്തിന് ശേഷം രാജ്യത്ത് നിലവില്‍വന്ന വിദ്യാഭ്യാസ കമ്മീഷനുകള്‍ വൈസ് ചാന്‍സലര്‍ പദവിയെ സംബന്ധിച്ച് വ്യക്തമായ ദിശാബോധം നല്‍കിയിട്ടുണ്ട്. 1948ല്‍ മുന്‍ രാഷ്ട്രപതി എസ് രാധാകൃഷ്ണന്റെ നേതൃത്വത്തില്‍ നിലവില്‍ വന്ന കമ്മീഷനുപുറമെ 1966ല്‍ കോത്താരി, 1990 ല്‍ ജ്ഞാനം, 1993ല്‍ രാംലാല്‍ പരീഖ് തുടങ്ങിയ കമ്മീഷനുകളും സമര്‍പ്പിച്ച റിപ്പോര്‍ട്ടുകളില്‍ മികച്ച ഭരണനൈപുണ്യവും ഉയര്‍ന്ന ധാര്‍മിക നിലവാരമുള്ള അറിയപ്പെടുന്ന അക്കാഡമിഷ്യന്‍ ആയിരിക്കണം വൈസ് ചാന്‍സലര്‍ പദവിയിലേക്ക് പരിഗണിക്കപ്പെടുന്ന വ്യക്തി എന്ന് വ്യക്തമാക്കിയിട്ടുണ്ട്. സര്‍ക്കാര്‍ സര്‍വീസില്‍ നിന്ന് വിരമിക്കുന്നവരെ കുടിയിരുത്താനോ രാഷ്ട്രീയ സ്വാധീനം ഉപയോഗിച്ച് കയറ്റി ഇരുത്താനോ പറ്റുന്ന കേവല ജോലിയല്ല വൈസ് ചാന്‍സലര്‍ പദവി. ആയിരക്കണക്കിന് വിദ്യാര്‍ഥികള്‍ പഠിക്കുന്ന, അവരെ ഉത്തമ പൗരന്മാരായി വാര്‍ത്തെടുക്കേണ്ട വളരെ വലിയ ഉത്തരവാദിത്തമാണ് സര്‍വകലാശാലകള്‍ നിര്‍വഹിക്കുന്നത്. അതിന്റെ തലപ്പത്ത് ഇരിക്കേണ്ടത് രാഷ്ട്രീയം തലക്ക് പിടിച്ചവരല്ല, മറിച്ച് വിദ്യാഭ്യാസത്തെ സംബന്ധിച്ച ഉന്നത കാഴ്ചപ്പാടുള്ളവരും വലിയ സിസ്റ്റത്തെ കുഴപ്പങ്ങള്‍ കൂടാതെ പ്രവര്‍ത്തിപ്പിക്കാന്‍ സാധിക്കുന്ന ഭരണമികവുള്ളവരും ഉന്നതമായ സ്വഭാവഗുണങ്ങളുള്ള വ്യക്തിത്വത്തിന് ഉടമയായവരുമായിരിക്കണം.

2013 ജൂണ്‍ 13 ന് യു.ജി.സി പുറപ്പെടുവിച്ച നോട്ടിഫിക്കേഷനില്‍ വൈസ് ചാന്‍സലര്‍ക്ക് വേണ്ട യോഗ്യതകള്‍ പ്രഖ്യാപിച്ചിട്ടുണ്ട്. കഴിവും സത്യസന്ധതയും ധാര്‍മികതയും പ്രതിബദ്ധതയുമുള്ള, യൂണിവേഴ്‌സിറ്റി സിസ്റ്റത്തില്‍ പത്ത് വര്‍ഷമെങ്കിലും പ്രൊഫസറായി പ്രവൃത്തി പരിചയമുള്ള ഒരാളെയായിരിക്കണം നിയമിക്കേണ്ടത് എന്നും സെര്‍ച്ച് കമ്മിറ്റി 35 പേര്‍ അടങ്ങുന്ന ഒരു പാനലിനെ നിര്‍ദ്ദേശിക്കുകയും അതില്‍ നിന്ന് ഒരാളെ വി.സിയായി കണ്ടെത്തുകയും ചെയ്യുകയാണ് വേണ്ടതെന്നുമാണ് അതില്‍ പറയുന്നത്. സെര്‍ച്ച് കമ്മിറ്റി അംഗങ്ങള്‍ക്ക് അതത് യൂണിവേഴ്‌സിറ്റിയുമായി ഒരുനിലക്കുമുള്ള ബന്ധവും പാടില്ലെന്നും ചട്ടം പറയുന്നുണ്ട്. എന്നാല്‍ യു.ജി.സി പ്രഖ്യാപിച്ച നിര്‍ദ്ദേശങ്ങള്‍ പലപ്പോഴും പാലിക്കപ്പെടുന്നില്ല. രാഷ്ട്രീയ താല്‍പര്യങ്ങള്‍ മാത്രം യോഗ്യതയായി നിശ്ചയിച്ചുകൊണ്ട് തങ്ങള്‍ക്കിഷ്ടമുള്ളവരെ വി.സിമാര്‍ ആക്കാനാണ് സി.പി.എം ശ്രമിച്ചുവന്നത്. അതുകൊണ്ടാണ് കേരള ടെക്‌നോളജിക്കല്‍ യൂണിവേഴ്‌സിറ്റിയുടെ വൈസ് ചാന്‍സലര്‍ പദവി ഡോ. എം.എസ് രാജശ്രീക്ക് നഷ്ടമായത്. ഏറ്റവും ചുരുങ്ങിയത് മൂന്ന് പേരെ നിര്‍ദ്ദേശിക്കണമെന്ന യു.ജി.സി ചട്ടം ലംഘിച്ചുകൊണ്ടാണ് സെര്‍ച്ച് കമ്മിറ്റി ഡോ. രാജശ്രീയുടെ പേര് നിര്‍ദ്ദേശിച്ചത്. ഇതിനെതിരെ അന്ന് വൈസ് ചാന്‍സലര്‍ പോസ്റ്റിലേക്ക് അപേക്ഷ സമര്‍പ്പിച്ചിരുന്ന ഡോ. പി.എസ് ശ്രീജിത്ത് നല്‍കിയ പരാതിയാണ് രാജശ്രീക്ക് സുപ്രീംകോടതിയില്‍നിന്നു തിരിച്ചടിയായത്. ഓസ്‌ട്രേലിയയിലെ ക്യൂന്‍സ്‌ലാന്‍ഡ് സര്‍വകലാശാല, റിയാദിലെ കിംഗ് ഖാലിദ് സര്‍വകലാശാല എന്നിവിടങ്ങളിലെ വിസിറ്റിംഗ് പ്രൊഫസര്‍ കൂടിയായ ഡോ. ശ്രീജിത്ത് കുസാറ്റിന്റെ കീഴിലുള്ള കുട്ടനാട് എഞ്ചിനീയറിങ് ക്യാമ്പസിന്റെ പ്രിന്‍സിപ്പല്‍ ആയിരുന്നു. നിലവില്‍ കുസാറ്റ് സിന്‍ഡിക്കേറ്റ് മെമ്പറുമാണ്. സെര്‍ച്ച് കമ്മിറ്റി നല്‍കുന്ന ശുപാര്‍ശ സര്‍ക്കാറിന്റെ അംഗീകാരത്തിന്‌ശേഷം ചാന്‍സലറായ ഗവര്‍ണര്‍കൂടി ഒപ്പുവെച്ച ശേഷമാണ് ഡോ. രാജശ്രീ വൈസ് ചാന്‍സലര്‍ ആയിട്ടുള്ളത്. യു.ജി.സി മാനദണ്ഡങ്ങള്‍ പാലിക്കാതെയുള്ള നിയമനത്തില്‍ ഗവര്‍ണര്‍ എന്തിന് ഒപ്പുവെച്ചു എന്ന ചോദ്യത്തിന് മറുപടി പറയേണ്ടത് രാജ്ഭവനാണ്. യോഗ്യതകള്‍ പരിഗണിക്കാതെ വി.സിയെ നിശ്ചയിച്ച സര്‍ക്കാറും അത് അംഗീകരിച്ചുകൊടുത്ത രാജ്ഭവനും കുറ്റക്കാരാണ്.

സ്വന്തം രാഷ്ട്രീയ താല്‍പര്യങ്ങള്‍ അടിച്ചേല്‍പ്പിക്കാനുള്ള സി.പി.എം ശ്രമങ്ങളാണ് കേരളം ഇന്ന് നേരിടുന്ന വെല്ലുവിളി. ഭരണഘടനയില്‍ അധിഷ്ഠിതമായി നിന്നുകൊണ്ടുള്ള പ്രശ്‌നപരിഹാരങ്ങള്‍ക്ക് സി.പി.എം ശ്രമിക്കുന്നില്ല. അതിന്റെ ഏറ്റവും വലിയ ഉദാഹരണമാണ് ലോകായുക്ത ഭേദഗതി ബില്‍. സംഘ്പരിവാറിന്റെ താല്‍പര്യം സ്ഥാപിക്കാന്‍ വേണ്ടി ഗവര്‍ണര്‍ കളിക്കുന്ന രാഷ്ട്രീയത്തെ മുന്നില്‍ നിര്‍ത്തി സ്വന്തം കാര്യങ്ങള്‍ നേടാന്‍ ശ്രമിക്കുകയാണ് സി.പി.എം. ഗവര്‍ണറില്‍ നിന്നും ചാന്‍സലര്‍ പദവി എടുത്തുകളയുമെന്നാണ് ഇപ്പോള്‍ മുഖ്യമന്ത്രിയടക്കം വീമ്പ് പറയുന്നത്. സര്‍വകലാശാലകളെ പൂര്‍ണമായും തങ്ങളുടെ അധീശത്വത്തിന്‍ കീഴില്‍ കൊണ്ടുവരാന്‍ ഈ അവസരത്തെ സമര്‍ത്ഥമായി ഉപയോഗപ്പെടുത്താനാണ് സി.പി.എം ശ്രമിക്കുന്നത്. ആരിഫ് ഖാന്‍ കളിക്കുന്ന സംഘ്പരിവാര്‍ പിപ്പിടിയും പിണറായി കളിക്കുന്ന മാര്‍ക്‌സിസ്റ്റ് ചെപ്പടിയും ഒരുപോലെ ഉന്നതവിദ്യാഭ്യാസ മേഖലക്ക് വലിയ പരിക്കുകളാണ് ഏല്‍പിച്ചുകൊണ്ടിരിക്കുന്നത്.

കല്‍പ്പറ്റ: ചരിത്രത്തില്‍ തുല്യതയില്ലാത്ത വിധം വയനാട് ജില്ലയെ പ്രളയത്തില്‍ മുക്കിയത് ബാണാസുര ഡാം തന്നെ. ഡാമുകള്‍ തുറന്നതല്ല വെള്ളപ്പൊക്കത്തിന് കാരണമെന്ന് വരുത്തിത്തീര്‍ക്കാന്‍ മുഖ്യമന്ത്രി പിണറായി വിജയന്‍ കഴിഞ്ഞ ദിവസം നടത്തിയ വാദങ്ങളെ അപ്പാടെ തള്ളി ദേശാഭിമാനി. ബാണാസുര സാഗര്‍ അണക്കെട്ട് തുറന്ന സംഭവവുമായി ബന്ധപ്പെട്ട് മുഖ്യമന്ത്രിയുടെ ന്യായങ്ങളില്‍ പിഴവുണ്ടെന്നാണ്, സി.പി.എം മുഖപത്രമായ ദേശാഭിമാനി ഇതുസംബന്ധിച്ച് നല്‍കിയ വാര്‍ത്തകളില്‍ നിന്നു തെളിയുന്നത്.

മുന്നറിയിപ്പില്ലാതെ ഡാമുകള്‍ തുറന്നതാണ് പ്രളയത്തിന് കാരണമായതെന്ന പ്രതിപക്ഷനേതാവ് രമേശ് ചെന്നിത്തലയുടെ വാക്കുകള്‍ ശരിവെക്കുന്നതാണ് മഴക്കെടുതിയുടെ നാളുകളില്‍ ദേശാഭിമാനി പ്രസിദ്ധീകരിച്ച വാര്‍ത്തകള്‍. ആഗസ്റ്റ് 15-ലെ ദേശാഭിമാനി വാര്‍ത്തയില്‍ ബാണാസുര സാഗര്‍ അണക്കെട്ടിന്റെ ഷട്ടര്‍ ഉയര്‍ത്തിയതിനെ തുടര്‍ന്ന് പുഴകളില്‍ ജലനിരപ്പുയരുകയും പ്രദേശങ്ങള്‍ വെള്ളത്തിനടിയിലാകുകയും ചെയ്തതായി വ്യക്തമായി പറയുന്നുണ്ട്. ആഗസ്റ്റ് 14ല്‍, കനത്തമഴക്കും ഉരുള്‍പൊട്ടലിനുമൊപ്പം ഡാം തുറന്നത് വലിയ വെള്ളപ്പൊക്കത്തിനും, കനത്ത നാശനഷ്ടങ്ങള്‍ക്കും ഇടയാക്കിയിരുന്നുവെന്നും വാര്‍ത്ത നല്‍കിയിരുന്നു. ഇതാണ് മുഖ്യമന്ത്രി കഴിഞ്ഞ ദിവസം ഖണ്ഡിച്ചിരിക്കുന്നത്.

ബാണാസുര സാഗര്‍ അണക്കെട്ട് എല്ലാ വര്‍ഷവും നിറയുന്നതും, മുന്നറിയിപ്പില്ലാതെ തന്നെ തുറക്കാറുള്ളതുമായ ഡാമുകളുടെ പട്ടികയില്‍ ഉള്‍പ്പെടുന്നതുമാണെന്നാണ് മുഖ്യമന്ത്രിയുടെ വാദം. ഇത്തവണയും ജൂണ്‍, ജൂലൈ മാസങ്ങളില്‍ ഡാം നിറയുകയും തുറക്കുകയും ചെയ്തിട്ടുണ്ട്. ഈ അണക്കെട്ട് ഇങ്ങനെ ഘട്ടംഘട്ടമായി തുറക്കുമെന്ന് പ്രദേശവാസികള്‍ക്ക് അറിയാമെന്നും, അതുകൊണ്ട് തന്നെ ഈ ഘട്ടങ്ങളില്‍ അപായങ്ങളൊന്നുമുണ്ടായിട്ടില്ലെന്നും മുഖ്യമന്ത്രി പറയുന്നു.

എന്നാല്‍ ഇതിന് പിന്നാലെ ആഗസ്റ്റ് എഴിന് രാവിലെ ആറ് മണിക്ക് ഡാമിന്റെ ഷട്ടറുകള്‍ തുറന്ന് വെള്ളമൊഴുക്കി വിട്ടതായി മുഖ്യമന്ത്രി പറയുന്നു. പ്രതിപക്ഷ നേതാവ് രമേശ് ചെന്നിത്തല പറയുന്നത് പോലെ രാത്രിയില്‍ ആരും അറിയാതെയല്ല, മറിച്ച് രാവിലെ ആറരക്കാണ് ഇത് ചെയ്തതെന്നാണ് മുഖ്യമന്ത്രി പറയുന്നത്. എന്നാല്‍ ഇത് പൂര്‍ണമായും തെറ്റാണെന്ന് ദേശാഭിമാനി വായിച്ചാല്‍ മനസിലാകും. സി പി എം മുഖപത്രത്തിലെ വാര്‍ത്തയില്‍ പറയുന്നത് ഇങ്ങനെയാണ്. ”തിങ്കളാഴ്ച (ആഗസ്റ്റ് 13ന്) രാത്രി ഒമ്പതരയോടെ ഘട്ടം ഘട്ടമായി ഷട്ടര്‍ 170 സെന്റിമീറ്ററിലെത്തിച്ചു. എന്നിട്ടും ജലനിരപ്പ് ക്രമീകരിക്കാന്‍ കഴിയാതെ വന്നതോടെ രാത്രി ഒന്നരയോടെ 10 സെന്റിമീറ്റര്‍ കൂടി ഉയര്‍ത്തി” ഈ വാര്‍ത്തയുടെ അടിസ്ഥാനത്തില്‍ രാവിലെ ആറരക്കാണ് ഷട്ടര്‍ തുറന്നതെന്ന മുഖ്യമന്ത്രിയുടെ വാദം തെറ്റാണെന്ന് വ്യക്തമാണ്.

കൂടാതെ വയനാട്ടില്‍ വെള്ളപ്പൊക്കം രൂക്ഷമാകാനുള്ള കാരണം ബാണാസുര സാഗര്‍ അണക്കെട്ടിന്റെ ഷട്ടര്‍ തുറന്നതാണെന്ന് ദേശാഭിമാനി നിരവധി തവണ റിപ്പോര്‍ട്ട് ചെയ്തിരുന്നതായി കാണാം. വയനാട് ജില്ലയില്‍ വെള്ളപ്പൊക്കം രൂക്ഷമാകാനുള്ള കാരണം ബാണാസുര സാഗര്‍ അണക്കെട്ടിന്റെ ഷട്ടര്‍ തുറന്നതാണെന്ന വാദം വീണ്ടും വീണ്ടും മുഖപത്രം റിപ്പോര്‍ട്ട് ചെയ്തിരുന്നു. ആഗസ്റ്റ് 15ലെ വെള്ളപൊക്കം രൂക്ഷം എന്ന തലക്കെട്ടില്‍ നല്‍കിയ വാര്‍ത്തയില്‍ ഡാമില്‍ നിന്നും കൂടുതല്‍ വെള്ളം പുറത്തേക്കൊഴുകിയതോടെ പുഴകളില്‍ വെള്ളമുയര്‍ന്നുവെന്നും, താഴ്ന്ന പ്രദേശങ്ങള്‍ വെള്ളത്തിനടിയിലായെന്നും പറയുന്നു. മാനന്തവാടി – തലശ്ശേരി, മാനന്തവാടി – കൊയിലേരി റോഡുകളില്‍ വെള്ളം കയറി ഗതാഗതം മുടങ്ങിയതായും വാര്‍ത്ത നല്‍കിയിരുന്നു. ദേശാഭിമാനി റിപ്പോര്‍ട്ട് ചെയ്ത ബാണാസുര സാഗറിന്റെ ഷട്ടര്‍ തുറന്നതുമായി ബന്ധപ്പെട്ട വാര്‍ത്തകളെല്ലാം മുഖ്യമന്ത്രിയുടെ വാര്‍ത്താസമ്മേളനത്തിലെ അവകാശവാദങ്ങള്‍ക്കും പ്രഖ്യാപനങ്ങള്‍ക്കും എതിരാണ്.

ദേശാഭിമാനിയുടെ വാര്‍ത്തയെ ചൊല്ലിയും മുഖ്യമന്ത്രിയുടെ വാക്കുകളെ ചൊല്ലിയും വയനാട്ടില്‍ ചര്‍ച്ച സജീവമാണ്. ജനങ്ങളുടെ കണ്ണില്‍ പൊടിയുകയാണ് പാര്‍ട്ടിപത്രവും, മുഖ്യമന്ത്രിയും ചെയ്യുന്നതെന്നാണ് കൂടുതലായും ഉയരുന്ന അഭിപ്രായം. ബാണാസുര സാഗര്‍ അണക്കെട്ട് തുറന്നതിനെ തുടര്‍ന്നായിരുന്നു വെള്ളമുണ്ട, പടിഞ്ഞാറത്തറ, തരിയോട്, പനമരം, കോട്ടത്തറ ഗ്രാമപഞ്ചായത്തുകള്‍ വെള്ളത്തിനടിയിലായതും വെള്ളപ്പൊക്കം രൂക്ഷമായും. ഇത് സത്യമായിരുന്നുവെന്ന് നേരത്തെ അംഗീകരിക്കുന്ന ദേശാഭിമാനി മുഖ്യമന്ത്രിയുടെ വാര്‍ത്താ സമ്മേളനം കഴിഞ്ഞതോടെ നേരത്തെ നല്‍കിയ വാര്‍ത്ത തെറ്റാണെന്ന് സമ്മതിക്കുക കൂടിയാണ്.

മുന്നറിയിപ്പില്ലാതെയാണ് ബാണാസുര സാഗര്‍ അണക്കെട്ട് തുറന്നതെന്ന് മാനന്തവാടി എം.എല്‍.എ ഒ.ആര്‍ കേളു അഭിപ്രായപ്പെട്ടിരുന്നു. ജില്ലാ പേജില്‍ വരുന്ന വാര്‍ത്തകളും ഇതിനെ സാധൂകരിച്ച് ഭരണകക്ഷി എം.എല്‍.എ പ്രതികരിച്ചിട്ടും അറിയാതിരുന്ന മുഖ്യമന്ത്രിക്ക് വയനാടിന്റെ കാര്യത്തില്‍ എത്രമാത്രം താല്‍പര്യമുണ്ടെന്ന് തെളിയിക്കാന്‍ വിവാദം കാരണമായെന്ന് വേണം കരുതാന്‍.