plusone allotment – Chandrika Daily

പ്ലസ് വൺ ട്രയൽ അലോട്ട്മെന്റ്: മലപ്പുറത്ത് പകുതിയിലധികം വിദ്യാർഥികൾക്കും സീറ്റില്ല

webdesk14 — Sun, 02 Jun 2024 06:13:34 +0000

മലപ്പുറം: പ്ലസ് വൺ ട്രയൽ അലോട്ട്മെന്റ് കഴിഞ്ഞപ്പോൾ മലപ്പുറം ജില്ലയിലെ പകുതിയിലധികം വിദ്യാർഥികൾക്കും സീറ്റില്ല. 82,425 കുട്ടികൾ അപേക്ഷിച്ചതിൽ 36,385 വിദ്യാർഥികൾക്കാണ് അലോട്ട്മെൻ്റ് ലഭിച്ചത്.

സർക്കാർ, എയ്ഡഡ് സ്കൂളുകളിലായി 49,664 മെറിറ്റ് സീറ്റുകളാണ് മലപ്പുറം ജില്ലയിൽ ആകെയുള്ളത്. അപേക്ഷ നൽകിയത് 82,425 പേർ. ട്രയൽ അലോട്ട്മെൻ്റ് കഴിഞ്ഞപ്പോൾ 36,385 വിദ്യാർഥികൾക്കാണ് സീറ്റ് ലഭിച്ചത്. സീറ്റുകൾ വർധിപ്പിക്കാത്ത സാഹചര്യത്തിൽ 32,761 വിദ്യാർഥികൾക്ക് മെറിറ്റ് സീറ്റിൽ പഠിക്കാൻ കഴിയില്ല.

വി.എച്ച്.എസ്.ഇ, ഐ.ടി.ഐ, പോളിടെക്നിക്ക് സീറ്റുകൾ കൂട്ടിയാലും ഇരുപതിനായിരത്തോളം കുട്ടികൾക്ക് സീറ്റില്ല. സർക്കാർ പുതിയ ബാച്ചുകൾ അനുവദിച്ചില്ലെങ്കിൽ പണം നൽകി ബദൽ മാർഗങ്ങൾ തേടേണ്ട അവസ്ഥയിലാണ് വിദ്യാർഥികൾ.

പ്ലസ് വണ്‍: സപ്ലിമെന്ററി അലോട്‌മെന്റില്‍ മലപ്പുറം ജില്ലയില്‍ 13,705 പേര്‍ പുറത്ത്

webdesk14 — Fri, 14 Jul 2023 12:39:13 +0000

പ്ലസ് വണ്‍ ആദ്യ സപ്ലിമെന്ററി അലോട്ട്‌മെന്റ് പട്ടിക പുറത്തുവന്നപ്പോള്‍ മലപ്പുറം ജില്ലയില്‍ സീറ്റ് കിട്ടാതെ 13,705 കുട്ടികള്‍ പുറത്ത്. സപ്ലിമെന്ററി അലോട്‌മെന്റിലേക്ക് 19,710 പേരാണ് ആകെ അപേക്ഷിച്ചത്. ഇതില്‍ 19,659 പേരുടെ അപേക്ഷ സ്വീകരിച്ചു. അലോട്‌മെന്റ് കിട്ടിയത് 6,005 പേര്‍ക്ക് മാത്രമാണ്. ഇതോടെ സപ്ലിമെന്ററി ഘട്ടത്തിലെങ്കിലും സീറ്റ് കിട്ടുമെന്ന് പ്രതീക്ഷ പതിനായിരത്തിലധികം കുട്ടികള്‍ക്ക് നിരാശരായിരിക്കുകയാണ്.

ഇനി ജില്ലയില്‍ നാല് മെറിറ്റ് സീറ്റുകളേ ഒഴിവുള്ളൂ. സപ്ലിമെന്ററി അലോട്ട്‌മെന്റ് ആദ്യഘട്ടത്തില്‍ സംസ്ഥാനത്ത് ഏറ്റവും കുറഞ്ഞ സീറ്റുകള്‍ ഒഴിവുള്ളത് മലപ്പുറത്താണ്. ഈ നാലിന് പുറമേ ജില്ലയില്‍ ഇനി മാനേജ്‌മെന്റ്, അണ്‍ എയ്ഡഡ് മേഖലകളില്‍ മാത്രമാണ് സീറ്റകള്‍ ഒഴിവുള്ളത്. അവിടെ കൂടുതല്‍ പണം മുടക്കി പഠിക്കേണ്ടിവരും. മാനേജ്‌മെന്റ്, അണ്‍ എയ്ഡഡ് മേഖലകളിലായി 13,056 സീറ്റുകളാണ് ഒഴിവുള്ളത്. മാനേജ്‌മെന്റ് ക്വാട്ടയില്‍ 3,184, അണ്‍ എയ്ഡഡില്‍ 9,872.

ഉപരിപഠനത്തിന് അവസരമില്ല; മുസ്‌ലിം യൂത്ത് ലീഗ് നിയമ പോരാട്ടത്തിന്

webdesk11 — Tue, 11 Jul 2023 11:18:41 +0000

കോഴിക്കോട് : പ്ലസ് വണ്‍ അഡ്മിഷന്റെ മൂന്നാം ഘട്ട അലോട്ട്‌മെന്റ് കഴിഞ്ഞിട്ടും മലബാറിന്റെ ആറു ജില്ലകളിലായി 43,000ത്തോളം വിദ്യാര്‍ത്ഥികള്‍ക്ക് സീറ്റ് ലഭിച്ചിട്ടില്ല. മതിയായ മാര്‍ക്ക് ലഭിച്ചിട്ടും അഡ്മിഷന്‍ ലഭിക്കാത്ത വിദ്യാര്‍ത്ഥികള്‍ക്കായി നിയമപോരാട്ടം നടത്തുമെന്ന് മുസ്ലിം യൂത്ത് ലീഗ് സംസ്ഥാന പ്രസിഡന്റ് സയ്യിദ് മുനവ്വറലി ശിഹാബ് തങ്ങളും ജനറല്‍ സെക്രട്ടറി പി. കെ ഫിറോസും പറഞ്ഞു. ഇതിനായി സര്‍ക്കാര്‍, എയ്ഡഡ് മേഖലയില്‍ അഡ്മിഷന്‍ കിട്ടാത്തവരുടെയും, എവിടേയും അഡ്മിഷന്‍ ലഭിക്കാത്തവരുടെയും ഇഷ്ടപ്പെട്ട കോഴ്‌സിന് അവസരം ലഭിക്കാത്തവരുടെയും വിവരശേഖരണം ഗൂഗിള്‍ ഫോം വഴി നടത്തും.

എസ് എസ് എല്‍ സി പരീക്ഷയില്‍ എല്ലാ വിഷയങ്ങളിലും എ പ്ലസും മറ്റ് ഉന്നത വിജയം നേടിയവര്‍ക്ക് പോലും ഇഷ്ടപ്പെട്ട കോഴ്‌സിലോ സ്‌കൂളിലോ പ്രവേശനം ലഭിക്കാത്ത സാഹചര്യമാണ് നിലവിലുള്ളത്. പ്രയാസപ്പെട്ട് പഠിച്ച് പരീക്ഷ പാസായിട്ടും ഉപരിപഠനത്തിന് അവസരമില്ലാതെ നെട്ടോട്ടമോടുകയാണ് വിദ്യാര്‍ത്ഥികളും അവരുടെ രക്ഷിതാക്കളും. ഇവരില്‍ ഭൂരിഭാഗം പേര്‍ക്കും വലിയ ഫീസ് നല്‍കി സ്വാശ്രയ സ്ഥാപനങ്ങളില്‍ പ്രവേശനം നേടാന്‍ സാധിക്കാത്തവരാണ്. ഈ സാഹചര്യത്തെ മുന്‍നിര്‍ത്തി നേരത്തേ തന്നെ മുസ്ലിം ലീഗ് ഉള്‍പ്പെടെയുള്ളവര്‍ സര്‍ക്കാറിന്റെ ശ്രദ്ധയില്‍ പെടുത്തിയിരുന്നു. എന്നാല്‍ ആവശ്യമായ ഇടപെടലുകള്‍ നടത്താന്‍ സര്‍ക്കാറും വിദ്യാഭ്യാസ വകുപ്പും തയ്യാറായിട്ടില്ലയെന്ന് നേതാക്കള്‍ തുടര്‍ന്നു.

ഈ സാഹചര്യത്തിലാണ് ഉപരിപഠനത്തിന് അവസരം നിഷേധിക്കപ്പെടുന്ന വിദ്യാര്‍ത്ഥികള്‍ക്കായി മുസ്ലിം യൂത്ത് ലീഗ് സംസ്ഥാന കമ്മറ്റി നിയമ പോരാട്ടത്തിന് ഒരുങ്ങുന്നതെന്ന് മുനവ്വറലി തങ്ങളും ഫിറോസും കൂട്ടിച്ചേര്‍ത്തു.

ഹയര്‍സെക്കന്‍ഡറി (വൊക്കേഷണല്‍) വിഭാഗം പ്രവേശനത്തിനുള്ള മൂന്നാം അലോട്ട്മെന്റ് പ്രസിദ്ധീകരിച്ചു

webdesk11 — Fri, 30 Jun 2023 15:30:19 +0000

ഹയര്‍സെക്കന്‍ഡറി (വൊക്കേഷണല്‍) വിഭാഗം ഒന്നാം വര്‍ഷ ഏകജാലക പ്രവേശനത്തിനായുള്ള മൂന്നാമത്തെയും അവസാനത്തെയും അലോട്ട്മെന്റ് www.admission.dge.kerala.gov.in എന്ന അഡ്മിഷന്‍ വെബ് സൈറ്റിലെ Higher Secondary (Vocational) Admission എന്ന പേജില്‍് പ്രസിദ്ധീകരിച്ചു.

Allotment Results എന്ന ലിങ്കിലെ Candidate Login ല്‍ രജിസ്റ്റര്‍ ചെയ്തിട്ടുള്ള ഫോണ്‍ നമ്പറും പാസ്സ് വേര്‍ഡും നല്‍കി അപേക്ഷകര്‍ക്ക് അലോട്ട്മെന്റ് വിവരങ്ങള്‍ മനസ്സിലാക്കുന്നതിനും അലോട്ട്മെന്റ് സ്ലിപ് ഡൗണ്‍ലോഡ് ചെയ്യുന്നതിനും കഴിയും. ഒന്ന് രണ്ട് അലോട്ട്മെന്റുകളില്‍ താത്കാലിക പ്രവേശനം നേടിയ വിദ്യാര്‍ഥികള്‍ക്ക് ഈ അലോട്ട്മെന്റില്‍ ഉയര്‍ന്ന ഓപ്ഷനില്‍ അലോട്ട്മെന്റ് ലഭിച്ചിട്ടില്ലെങ്കില്‍ പുതിയ അലോട്ട്മെന്റ് ലെറ്റര്‍ ആവശ്യമില്ല.

മൂന്നാം അലോട്ട്മെന്റിന്റെ അടിസ്ഥാനത്തില്‍ ജൂലൈ 1 മുതല്‍ ജൂലൈ 4 വൈകുന്നേരം 4 മണി വരെ അലോട്ട്മെന്റ് ലഭിച്ചിട്ടുള്ള സ്‌കൂളുകളില്‍ പ്രവേശനം നേടാം. മൂന്നാം അലോട്ട്മെന്റില്‍ വിദ്യാര്‍ഥികള്‍ക്ക് സ്ഥിര പ്രവേശനം ആണ് ലഭിക്കുന്നത്. ഈ അലോട്ട്മെന്റില്‍ താത്കാലിക പ്രവേശനം അനുവദനീയമല്ല അതിനാല്‍ അലോട്ട്മെന്റ് ലഭിച്ച എല്ലാ വിദ്യാര്‍ഥികളും ഫീസടച്ച് സ്ഥിര പ്രവേശനം നേടണം.

പ്ലസ് വൺ പ്രവേശനം; ആദ്യ അലോട്ട്മെന്റ് ലിസ്റ്റ് ജൂൺ 19ന് രാവിലെ പ്രസിദ്ധീകരിക്കും

webdesk13 — Sun, 18 Jun 2023 16:22:56 +0000

ഈ വർഷത്തെ പ്ലസ് വൺ പ്രവേശനത്തിന്റെ ആദ്യ അലോട്ട്മെന്റ് ലിസ്റ്റ് ജൂൺ 19ന് രാവിലെ 8ന് പ്രസിദ്ധീകരിക്കും. ആദ്യ അലോട്ട്മെന്റ് പ്രകാരമുള്ള പ്ലസ് വൺ പ്രവേശനത്തിന്റെ വിജ്ഞാപനം ഇറങ്ങി. ആദ്യ അലോട്ട്മെന്റ് അനുസരിച്ചുള്ള പ്ലസ് വൺ പ്രവേശനം 19ന് രാവിലെ 11മുതൽ ആരംഭിക്കും.

ജൂൺ 19മുതൽ ജൂൺ 21വരെയാണ് പ്രവേശനം. അലോട്ട്മെന്റ് വിവരങ്ങൾ പൊതുവിദ്യാഭ്യാസ വകുപ്പിന്റെ അഡ്മിഷൻ ഗേറ്റ് വേ ആയ
http://admission.dge.kerala.gov.in വഴി ലഭ്യമാകും.

വെബ്സൈറ്റിലെ “Click for Higher Secondary Admission”എന്ന ലിങ്കിലൂടെ ഹയർസെക്കണ്ടറി അഡ്മിഷൻ വെബ്സൈറ്റിൽ പ്രവേശിച്ച് Candidate Login-SWS എന്നതിലൂടെ ലോഗിൻ ചെയ്ത് ക്യാൻഡിഡേറ്റ് ലോഗിനിലെ First Allot റിസൾട്ട്സ് എന്ന ലിങ്കിലൂടെ അലോട്മെന്റ് പരിശോധിക്കാം.

പ്ലസ് വൺ ഏകജാലക പ്രവേശനത്തിനുള്ള ട്രയൽ അലോട്ട്മെന്റ് ഫലം പ്രസിദ്ധീകരിച്ചു

webdesk14 — Tue, 13 Jun 2023 04:56:22 +0000

തിരുവനന്തപുരം: പ്ലസ് വൺ ഏകജാലക പ്രവേശനത്തിനുള്ള ട്രയൽ അലോട്ട്മെന്റ് ഫലം പ്രസിദ്ധീകരിച്ചു. പ്രോസ്പക്ടസ് മാനദണ്ഡങ്ങൾ അനുസരിച്ച് സാധുതയുള്ള അപേക്ഷകളും ഓപ്ഷനുകളുമാണ് അലോട്ട്മെന്റിനായി പരിഗണിച്ചിട്ടുള്ളത്.

ട്രയൽ അലോട്ട്മെന്റ് ഒരു സാധ്യത ലിസ്റ്റ് മാത്രമാണ്. ട്രയൽ റിസൾട്ട് പ്രകാരം പ്രവേശനം നേടാനാവില്ല. പ്രവേശനത്തിനായി ജൂൺ 19ന് പ്രസിദ്ധീകരിക്കുന്ന ആദ്യ അലോട്ട്മെൻറ് ലിസ്റ്റ് വരുന്നതുവരെ കാത്തിരിക്കണം.

പൊതുവിദ്യാഭ്യാസ വകുപ്പിന്റെ http://admission.dge.kerala.gov.in വഴി റിസൾട്ട് പരിശോധിക്കാം. “Click for Higher Secondary Admission” എന്ന ലിങ്കിലൂടെ പ്രവേശിച്ച് Candidate Login-SWs എന്നതിലൂടെ ലോഗിൻ ചെയ്ത് ക്യാൻഡിഡേറ്റ് ലോഗിനിലെ Trial Results എന്ന ലിങ്കിലൂടെ ട്രയൽ റിസൾട്ട് പരിശോധിക്കാവുന്നതാണ്.

ട്രയൽ റിസൾട്ട് പരിശോധിക്കുന്നതിന് വേണ്ട സാങ്കേതിക സൗകര്യങ്ങൾ അപേക്ഷകർക്ക് വീടിനടുത്തുള്ള സർക്കാർ, എയ്ഡഡ് ഹയർസെക്കണ്ടറി സ്കൂളുകളിലെ ഹെൽപ്പ് ഡെസ്കുകളിൽ നിന്നും തേടാവുന്നതാണ്. അപേക്ഷകർക്കുള്ള വിശദനിർദ്ദേശങ്ങളും ഇതേ വെബ്സൈറ്റിൽ ലഭ്യമാണ്. ജൂൺ 15 ന് വൈകിട്ട് 5 മണിവരെ അപേക്ഷകർക്ക് ട്രയൽ അലോട്ട്മെന്റ് ലിസ്റ്റ് പരിശോധിക്കാം.

എന്തെങ്കിലും തിരുത്തലുകൾ ആവശ്യമാണെങ്കിൽ ക്യാൻഡിഡേറ്റ് ലോഗിനിലെ Edit Application എന്ന ലിങ്കിലൂടെ ഉൾപ്പെടുത്തലുകൾ ജൂൺ 15 ന് വൈകിട്ട് 5 മണിക്കുള്ളിൽ നടത്തി ഫൈനൽ കൺഫർമേഷൻ ചെയ്യേണ്ടതാണ്. ആവശ്യമായ തിരുത്തലുകൾ തെറ്റായ വിവരങ്ങൾ നൽകി ലഭിക്കുന്ന അലോട്ട്മെന്റ് റദ്ദാക്കപ്പെടും. തിരുത്തലുകൾ വരുത്തുവാനുള്ള അവസാന
അവസരമാണിത്.

ഇത് സംബന്ധിച്ച് പ്രിൻസിപ്പൽമാർക്കുള്ള വിശദ നിർദ്ദേശങ്ങളും വെബ്സൈറ്റിൽ ലഭ്യമാണ്. അപേക്ഷകർക്ക് ട്രയൽ അലോട്ട്മെന്റ് റിസൾട്ട്
പരിശോധിക്കുന്നതിനും അപേക്ഷയിൽ തിരുത്തലുകൾ ഉൾപ്പെടുത്തലുകൾ നടത്തുന്നതിനും വേണ്ട സാങ്കേതിക സഹായം സംസ്ഥാനത്തെ എല്ലാ സർക്കാർ, എയ്ഡഡ് ഹൈസ്കൂൾ, ഹയർസെക്കണ്ടറി സ്കൂളുകളിലേയും ഹെൽപ് ഡെസ്കുകളിലൂടെ ലഭ്യമാകും എന്നും പൊതു വിദ്യാഭ്യാസ വകുപ്പ് അറിയിച്ചു.