മുസ്‌ലിം ലീഗ് കയ്പ്പമംഗലം നിയോജക മണ്ഡലം കമ്മറ്റി പുതിയകാവിൽ സംഘടിപ്പിച്ച സൗഹൃദ സംഗമത്തിന്റെ ഭാഗമായ ഇഫ്ത്താറും കെ.എം സീതി സാഹിബ് 62-ാം ചരമവാർഷിക അനുസമരണയോഗവും ഉദ്ഘാടനം ചെയ്ത് സംസാരിക്കുകയായിരുന്നു പി.എം സാദിഖലി . മുസ്‌ലിംകൾ ഒരു ആഗോള മത സമൂഹമാണെന്നതും അതേ സമയം അവരുടെ ജീവിത യാഥാർത്ഥ്യങ്ങൾ അതാത് നാടുകളുമായി അഭേദ്യമായി ബന്ധപ്പെട്ട് നിൽക്കുന്നതാണെന്നതും എല്ലാവർക്കും ഒരു വലിയ തിരിച്ചറിവാകേണ്ടതുണ്ട്.

ഇതര ജനവിഭാഗങ്ങളിലേയും മുസ്‌ലിം കളിൽ തന്നെയും പലർക്കും ഇത് ഉൾകൊള്ളാനാവാത്തതാണ് പലപ്പോഴും പല അസ്വാര സ്യങ്ങൾക്കും വഴി വെക്കു ന്നത് എന്നും ജനാധിപത്യ ഇന്ത്യയിൽ ഈ യാഥാർത്ഥ്യം ആദ്യം തിരിച്ചറിഞ്ഞ നേതാക്കളിൽ മുൻപന്തിയിൽ നിൽക്കുന്ന ഒരാളെന്നതാണ് കെ.എം സീതി സാഹിബിന്റെ പ്രത്യേകത എന്നും സാദിഖലി പറഞ്ഞു.

മതവും മാതൃരാജ്യവുമെന്ന എന്ന സവിശേഷ ദ്വിത്വത്തെ ഇഴ ചേർത്തു വെച്ച് ഇന്ത്യൻ മുസ്‌ലിം കളുടയും രാജ്യത്തിന്റേയും പുരോഗതിക്കു വേണ്ടി വലിയ ആശയങ്ങൾക്ക് രൂപം നൽകിയ മഹാനായ നേതാവാണ് കെ.എം.സീതി സാഹിബ്. ഇന്ത്യയിൽ ജീവിച്ചാൽ മാത്രമേ ഇന്ത്യയിലെ മുസ്‌ലിംകൾ ജീവിക്കു . ഇന്ത്യയുടെ നിലനില്പാണ് ഇന്ത്യയിലെ മുസ്‌ലിംകളുടെ നിലനിൽപ്പ് എന്ന് സീതി സാഹിബ് പറഞ്ഞു വെച്ചു. ഈ വാക്കുകളുടെ എത്രത്തോളം എതിർ ദിശയിലാണ് നിലവിലെ ഇന്ത്യൻ സാഹചര്യങ്ങൾ എത്തി നിൽക്കുന്നതെന്നത് മുസ്‌ലിം കളെ മാത്രമല്ല ഭയപ്പെടുത്തേണ്ടത്. ജനാധിപത്യ മതേതര ഇന്ത്യ നിലനിന്നു കാണാൻ ആഗ്രഹിക്കുന്ന സർവ്വർക്കും ഒരു മുന്നറിവായിരിക്കണമത്.

മുസ്‌ലിം കളുടെ നിയമപരവും മൗലികവുമായ അവകാശ സംരക്ഷണത്തിനാണ് മുസ്‌ലിം ലീഗെന്നാണ് സീതി സാഹിബ് പറഞ്ഞത്. നിയമപരമെന്നത് രാജ്യത്തിന്റെ വ്യവസ്ഥിതിയുമായി ബന്ധപ്പെട്ട മുസ്‌ലിംകളുടെ വ്യവഹര ജീവിതവും മൗലികമെന്നത് മുസ്‌ലിം കളുടെ വിശ്വാസ ജീവിതവുമാണ്.
ഇവ രണ്ടും ഇന്ത്യൻ മുസ്‌ലിം കളുടെ അസ്തിത്വത്തിന്റെ യും പുരോഗതിയുടേയും അനിവാര്യ ഘടകങ്ങളാണെ ന്നത് സീതി സാഹിബ് തിരിച്ചറിഞ്ഞു. ഇന്ത്യയിൽ ഇപ്പോൾ ഇവ രണ്ടും ഒരുപോലെ വെല്ലുവിളി നേരിടുകയാണ്. മുന്നിലുള്ള വെല്ലുവിളികളെ അതിജയിക്കാനും ജനാധിപത്യ ഇന്ത്യയെ ശക്തിപ്പെടുത്താനും മുസ്ലിംകൾ രാഷ്ട്രീയമായി സംഘടിക്കുകയല്ലാതെ മറ്റു വഴികളില്ലെന്നതാണ് സീതി സാഹിബിന്റെ ജീവിത സന്ദേശമെന്നും സാദിഖലി കൂട്ടി ചേർത്തു.
കയ്പമംഗലം നിയോജക മണ്ഡലം പ്രസിഡണ്ട് എസ് എ സിദ്ധിക്ക് അദ്ധ്യക്ഷത വഹിച്ചു.

ബെന്നി ബെഹന്നാൻ എം.പി മുഖ്യ പ്രഭാഷണം നടത്തി മുസ്‌ലിം ലീഗ് ജില്ലാ വൈ.പ്രസിഡണ്ട് കെ.എ ഹാറുൺ റഷീദ്, ടി.എം നാസർ, സി.സി ബാബുരാജ്, ഡോ. അബ്ദുൾ സലാം ഫൈസി, മുജീബ് റഹ്മാൻ ദാരിമി, അഷറഫ് അഷ്റഫി, സഹൽ ഫൈസി, ഷറഫുദ്ദീൻ മൗലവി വെമ്പേ നാട്, അയ്യൂബ് കുന്നത്പടി, ഷാജി കാട്ടകത്ത്, ഫസൽ കാതിക്കോട്, എ.എ.അബ്ദുൽ കരീം മൗലവി, യൂസഫ് പടിയത്ത്,കെ.കെ സക്കരിയ, ടി.എ. ഫഹദ്, സി എ ജലീൽ, കെ.എ അഷറഫ്,കെ.കെ സഗീർ, പി.എം മൊയ്തു, ഹൈദർ അന്താറത്തറ, കെ.എം നിഷാദ്, വി.എച്ച് സൈയ്തു മുഹമ്മദ് ഹാജി, പി എം സലീം, എ.എം മൻസൂർ തുടങ്ങിയവർ പ്രസംഗിച്ചു.
മുസ്‌ലീം ലീഗ് മണ്ഡലം ജന.സെക്രട്ടറി കെ.എം ഷാനിർ സ്വാഗതവും ട്രഷറർ ടി.കെ ഉബൈദ് നന്ദിയും പറഞ്ഞു

പിഎം സാദിഖലിയുടെ കുറിപ്പ്:

പ്രത്യക്ഷത്തില്‍ തന്നെ തൊഴിയും പഴിയുമേല്‍ക്കുന്ന പേരും പതാകയുമായാണ് മുസ്ലിം ലീഗ് സ്വതന്ത്ര ഇന്ത്യയില്‍ പിറവിയെടുക്കുന്നത്.
രാജ്യത്തെ മുസ്ലിം ന്യൂനപക്ഷത്തിന്റെ ഏറ്റവും അഭിശപ്തമായ ആ ഘട്ടത്തില്‍ അങ്ങിനെയൊരു പേരുമായി ജാനാധിപത്യത്തില്‍ മാറ്റുരക്കാന്‍ ഇറങ്ങിത്തിരിച്ച ക്രാന്തദര്‍ശികളായ അന്നത്തെ മഹാരഥന്മാര്‍ അത്രക്കങ്ങ് മണ്ടുണ്ണികളാണെന്ന് ധരിക്കരുത്.
ജനാധിപത്യ, മതേതര ബഹുസ്വര സമൂഹത്തില്‍ സ്വന്തം അസ്തിത്വം ഉയര്‍ത്തിപ്പിടിച്ച് രാജ്യത്തെ മഹാ ന്യൂനപക്ഷത്തെ രാജ്യ വിചാരങ്ങളിലേക്കും കൈകാര്യങ്ങളിലേക്കും കൈ പിടിച്ചുയര്‍ത്തുന്ന ആ ജാലവിദ്യ ലോകസമക്ഷം തന്നെ ഇന്നൊരു മഹാവിസ്മയമാണ്.
ന്യൂനപക്ഷമായിരിക്കെ, ഒരു ബഹുസ്വര സമൂഹത്തില്‍ ജനാധിപത്യ മതേതര മാര്‍ഗ്ഗത്തിലൂടെ ജീവിച്ചു വിജയിച്ച കേരളീയ മുസ്ലിംകളുടെ കഥ അത് കൊണ്ട് തന്നെ ഏതൊരു രാഷ്ട്രീയ വിദ്യാര്‍ത്ഥിക്കും വേണ്ടുവോളം വക നല്‍കുന്ന പാഠ്യവിഷയവുമാണ്.
ഇന്നത്തെ കോലാഹലങ്ങള്‍ കേള്‍ക്കുമ്പോള്‍ മുസ്ലിം ലീഗ് ഇന്നോ ഇന്നലെയോ വന്നതാണെന്ന് തോന്നും.
ജമാഅത്തെ ഇസ്ലാമിയുടെ വെല്‍ഫെയര്‍ പാര്‍ട്ടി പോലെയോ എന്‍ ഡി എഫിന്റെ എസ്ഡിപിഐ പോലെയോ സമീപകാലത്ത് ഉണ്ടായതല്ല അത്.
മത രാഷ്ട്ര ലക്ഷ്യത്തിനായി നിലകൊള്ളുന്ന ബി ജെ പി ക്കു പിന്നില്‍ ആര്‍ എസ് എസ് എന്ന പോലെ മുസ്ലിം ലീഗിനു വേണ്ടി ഒരു കാലത്തും ഒരു നിഗൂഢ ശക്തിയും അണിയറയില്‍ പ്രവര്‍ത്തിച്ചില്ല.
സ്ഫടിക സമാനമായ സുതാര്യത കൈമുതലാക്കി
ജനാധിപത്യത്തില്‍ പത്തര മാറ്റോടെ തിളങ്ങി വിളങ്ങി നിന്ന അതിന്റെ നേര്‍ രേഖാചിത്രം കേരള രാഷ്ട്രീയ ചരിത്രത്തിലെ ശോഭയാര്‍ന്ന അദ്ധ്യായമാണ്.
കേരളപിറവിക്കു മുമ്പേ മലബാറില്‍ നിന്ന് ശക്തിയാര്‍ജ്ജിച്ച് മദിരാശി അസംബ്ലിയിലും പിന്നീട് നാളിത് വരെ കേരളത്തിന്റെ ഒപ്പവും നടന്ന് ലീഗ് എല്ലാ വിഭാഗം ജനങ്ങളുടേയും സ്‌നേഹാദരങ്ങള്‍ ഏറ്റുവാങ്ങി.
മുസ്ലിംകള്‍ മാത്രം വോട്ട് ചെയ്തല്ല മുസ്ലിം ലീഗ് വളര്‍ന്ന് വലുതായതും
എത്തി പിടിക്കാനാകാത്ത പദവികളും സ്ഥാനങ്ങളും നേടിയതും.
കേരളത്തിലെ ഹിന്ദു മുസ്ലിം ക്രിസ്ത്യന്‍ പാരസ്പര്യത്തില്‍ വിശ്വാസ്യതയും യോഗ്യതയും ആര്‍ജ്ജിക്കും വിധം മുസ്ലിമിന്റെ ഈ പാര്‍ട്ടി രാഷ്ട്രീയ സത്യസന്ധതക്കും സഭ്യതക്കും ജനാധിപത്യ മര്യാദകള്‍ക്കും മതേതര ആദരങ്ങള്‍ക്കും പുകള്‍പെറ്റു.
ഇവരുടേത് മുസ്ലിം പേരാകട്ടെ പച്ച കൊടിയാകട്ടെ, ഇവര്‍ കൊള്ളാവുന്നവരാണ്, വിശ്വസിക്കാവുന്നവരാണ് എന്ന് കേരള സമൂഹം വിധിയെഴുതി.
‘അന്യന്റെ തലനാരിഴ ഞങ്ങള്‍ക്ക് വേണ്ട!
ഞങ്ങളുടെ തലനാരിഴ ആര്‍ക്കും വിട്ടുകൊടുക്കില്ല !! ‘
ഒരു ആപ്തവാക്യം പോലെ കൊണ്ടു നടന്ന ഈ സൂത്രവാക്യം ഒരേ സമയം സ്വന്തം സമുദായത്തെ തൃപതിപ്പെടുത്താനും
മുറ്റു സമുദായങ്ങളെ ബോധ്യപ്പെടുത്താനും
ലീഗ് സത്യസന്ധതയോടെ പ്രയോഗവല്‍ക്കരിച്ചു.
എല്ലാ അര്‍ത്ഥത്തിലും അതൊരു നൂല്‍ പാല നടത്തമായിരുന്നു.
ഒരു രീതി ശാസ്ത്രം.
ഒരടി മുന്നോട്ട് വെക്കാന്‍ രണ്ടുവട്ടം ആലോചിക്കണം.
അഭ്യാസവും മെയ് വഴക്കവും പരിശീലിക്കണം.
പൂര്‍വ്വസൂരികള്‍ വിയര്‍പ്പൊഴുക്കി അദ്ധ്വാനിച്ചുണ്ടാക്കിയതാണ് ഇന്നത്തെ ഈ മനോഹാരിത.
ഏഴു പതിറ്റാണ്ടിലധികമായ ഈ സംഘടന ഒരു സുപ്രഭാതത്തില്‍ താല്‍ക്കാലിക ലാഭത്തിനു വേണ്ടി അതെല്ലാം തച്ചു തകര്‍ക്കുമെന്നാണോ ചിലര്‍ വ്യാമോഹിക്കുന്നത്?
മുസ്ലിം ലീഗ് അതിന്റെ പാരമ്പര്യവും പൈതൃകവും കളഞ്ഞുകുളിക്കുമെന്നാണോ?
മുസ്ലിം ലീഗിനെ മുന്‍ നിര്‍ത്തി കളിക്കുന്ന വര്‍ഗീയ വിഭജന അജണ്ടകള്‍ക്ക് ലീഗ് അങ്ങിനെ നിന്ന് തരുമെന്ന് ഈ തിരുമണ്ടന്മാര്‍ കരുതുന്നുവോ?
പ്രതിപക്ഷത്തിരിക്കുന്ന ഒരു ഘടകക്ഷിയെ മുന്‍ നിര്‍ത്തിയാണ് ഈ പുകിലുകള്‍ എന്ന മിനിമം ബോധ്യമെങ്കിലും ജനങ്ങള്‍ക്കുണ്ട്.
ലീഗ് ഭരണത്തില്‍ ഇരുന്നപ്പോള്‍ ഇല്ലാത്ത പച്ച വിവാദം കെട്ടിപ്പൊക്കിയിട്ട് ഇപ്പൊള്‍ എന്തായി?
അന്ന് ആ വര്‍ഗീയ കാളകൂട വിഷം മുഴുവന്‍ ഊറ്റി കുടിച്ച് ഇപ്പോള്‍ സുഖിച്ച് ഭരിക്കുന്നവര്‍ക്ക്
ഇനിയും ഭരിക്കണമെങ്കില്‍ മുസ്ലിം ലീഗിന്റെ ചോര തന്നെ വേണം.
അതല്ലെ ചുരുക്കം ?
മുഖ്യന്‍ പിണറായിക്കും കേന്ദ്ര മുരളീധരനും ഇവിടെ ഒരേ സ്വരം, ഒരേ ലയം..
ബി ജെ പിക്ക് മേല്‍വിലാസം ഉണ്ടാക്കി കൊടുത്ത് തനി തനിക്കാക്കി വെടക്കാക്കല്‍…
അങ്ങിനെ പിന്നേം പിന്നേം രാസാവ് നാന്‍ താന്‍.
ബഹു. വിജയ മുരളീധരാ…
ഒരു പാട് കൊമ്പുള്ള വമ്പന്മാര്‍ കുഴിച്ച വാരിക്കുഴികള്‍ താണ്ടി കടന്ന മുസ്ലിം ലീഗ് ഇപ്പോള്‍ കുറച്ചു കുഴിയാനകള്‍ കുഴിക്കുന്ന കുഴികളില്‍ വീഴുമെന്നാണോ നിങ്ങളുടെ വിചാരം?
ഇ.എം.എസ് നെ അതിജയിച്ച സിഎച്ചിന്റെ ചരിത്രം മിനിമം കെടി ജലീലിനോട് എങ്കിലും ചോദിച്ചു പഠിക്കൂ ബഹു.മുഖ്യമന്ത്രീ..

ഇന്നും ഒരു കമ്മ്യുണിസ്റ്റ്കാരനെ ഹിന്ദുത്വ വര്‍ഗീയ വാദികള്‍ വെട്ടിക്കൊന്നു. പക്ഷെ, ഈ സംഭവത്തില്‍ കൊല്ലപ്പെട്ടയാളുടെ ഫോട്ടോയുമായി വിലാപ ഫ്‌ലക്‌സുകള്‍ക്ക് താഴെ വര്‍ഗീയത തുലയട്ടെയെന്ന ശാപ വാക്കുകള്‍ നമ്മള്‍ കാണില്ലെന്ന് അദ്ദേഹം കുറിച്ചു. ഫെയ്‌സ്ബുക്കിലൂടെയായിരുന്നു പ്രതികരണം.

ഇന്നും ഒരു കമ്മ്യുണിസ്റ്റ്കാരനെ ഹിന്ദുത്വ വര്‍ഗീയ വാദികള്‍ വെട്ടിക്കൊന്നു…ആദരാജ്ഞലികള്‍ !
പക്ഷെ, ഈ സംഭവത്തില്‍ കൊല്ലപ്പെട്ടയാളുടെ ഫോട്ടോയുമായി വിലാപ ഫ്‌ലക്‌സുകള്‍ക്ക് താഴെ വര്‍ഗീയത തുലയട്ടെയെന്ന ശാപ വാക്കുകള്‍ നമ്മള്‍ കാണില്ല. മതഭീകരവാദമാണെന്ന ആരോപണം നമ്മള്‍ എവിടേയും കേള്‍ക്കില്ല….
സിപിഎമ്മിന് ചിലത് മതേതര കൊലകളും ചിലത് മാത്രം മതവര്‍ഗീയ കൊലകളുമാണ്.
മരിച്ചൊടുങ്ങാനും കൊന്നുതീര്‍ക്കാനും കുറെ അണികള്‍, കുറെ ഗുണ്ടകള്‍…
ഇന്‍ക്വിലാബ് സിന്ദാബാദ് !
രക്തസാക്ഷികള്‍ സിന്ദാബാദ് , പി.എം.സാദിഖലി കുറിച്ചു.

തൃശൂര്‍ ചിറ്റിലങ്ങാട് പുതുശേരി സി.പി.എം ബ്രാഞ്ച് സെക്രട്ടറി പി.യു സനൂപ് ആണ് എട്ടോളം ബജ്‌റംഗ്ദള്‍ പ്രവര്‍ത്തകരാല്‍ ഇന്ന് കൊല്ലപ്പെട്ടത്. മൂന്ന് സി.പി.എം പ്രവര്‍ത്തകര്‍ക്ക് പരിക്കുണ്ട്. രണ്ട് പേരുടെ നില ഗുരുതരമാണ്. സംഭവത്തിന് പിന്നില്‍ ബി.ജെ.പിയാണെന്നാണ് സി.പി.എം ആരോപണം. സംഭവത്തില്‍ ഉള്‍പ്പെട്ടവര്‍ സഞ്ചരിച്ചതെന്നു കരുതുന്ന കാര്‍ താലൂക്ക് ആശുപത്രിയില്‍ നിന്നും പൊലീസ് കണ്ടെത്തി. എട്ടോളം ബജ്‌റംഗ്ദള്‍ പ്രവര്‍ത്തകര്‍ പതിയിരുന്ന് വാളും കത്തിയുമായി ആക്രമിക്കുകയായിരുന്നെന്ന് സി.പി.എം പറഞ്ഞു.

രാമക്ഷേത്രം, ഏകസിവില്‍കോഡ്, വകുപ്പ് 370 റദ്ദാക്കല്‍ തുടങ്ങിയ വിവാദ അജണ്ടകള്‍ക്ക് പുറമേ ആപത്കരമായ ചില പുതിയ കാര്യങ്ങള്‍ കൂടി ബിജെപി അവരുടെ പ്രകടനപത്രികയില്‍ ഉള്‍പ്പെടുത്തിയിരിക്കുന്നു.
വിജയിച്ചു വന്നാല്‍ ഇവ നടപ്പിലാക്കുന്നതിന് ജനങ്ങളുടെ മാന്‍ഡേറ്റുണ്ടെന്ന് വരുത്തി തീര്‍ക്കാനും എതിര്‍ക്കുന്നവരുടെ വായടപ്പിക്കാനും നടത്തുന്ന മുന്‍കൂട്ടിയുള്ള ശ്രമമാണിത്.
അത് കൊണ്ട് തന്നെ ഈ വിഷയങ്ങള്‍ തെരഞ്ഞെടുപ്പില്‍ ജനസമക്ഷം സജീവ ചര്‍ച്ചക്ക് വിധേയമാകേണ്ടിയിരിക്കുന്നു.

രാജ്യമാകെ പൗരത്വ രജിസ്റ്റര്‍ നടപ്പാക്കുമെന്നതാണ് ഒന്നാമത്തെ ഭീഷണി.
ലോക്‌സഭയില്‍ പാസ്സാക്കുകയും രാജ്യസഭയില്‍ പരാജയപ്പെടുകയും ചെയ്ത പൗരത്വ ഭേദഗതി ബില്‍ പ്രകാരം 2014 നു മുമ്പ് അയല്‍ രാജ്യങ്ങളില്‍ നിന്നും ഇന്ത്യയില്‍ കുടിയേറിയ മുസ്ലിംകളല്ലാത്തവര്‍ക്ക് രാജ്യത്ത് പൗരത്വം ലഭിക്കും. ആസാമിലെ പൗരത്വ രജിസ്റ്ററില്‍ ഉള്‍പ്പെടുത്തിയിട്ടില്ലാത്ത 40 ലക്ഷം പേരില്‍ 10 ലക്ഷം വരുന്ന മുസ്ലിംകള്‍ മാത്രം പൗരത്വ ഭേദഗതി ബില്‍ നിയമമാകുന്ന പക്ഷം രാജ്യത്ത് നിന്നും പുറത്താക്കപ്പെടും.

ഇതേ പൗരത്വ രജിസ്റ്റര്‍ രാജ്യമാകെ നടപ്പിലാക്കുമെന്നാണ് ബി ജെ പി പ്രകടനപത്രികയില്‍ പറയുന്നത്. ഇത് ആരെ ലക്ഷ്യമാക്കിയാണെന്നത് പകല്‍ പോലെ വ്യക്തമാണ്. അയല്‍ രാജ്യങ്ങളില്‍ നിന്നും വന്നവര്‍ക്ക് പൗരത്വം നല്‍കുന്നതില്‍ മുസ് ലിംകളോടൊപ്പം ക്രിസ്ത്യാനികളേയും പാഴ്‌സികളയും പ്രകടനപത്രികയില്‍ ഉള്‍പ്പെടുത്തിയിരുന്നില്ല. ഇന്ത്യന്‍ സാംസ്‌കാരിക ദേശീയതയുമായി ഈ മതങ്ങള്‍ക്കൊന്നും ബന്ധമില്ലെന്നാണ് ആരോപണം. സംഭവം വിവാദമായപ്പോള്‍ ക്രിസ്ത്യാനികളെ ഉള്‍പ്പെടുത്തി ഓണ്‍ലൈന്‍ പതിപ്പില്‍ തിരുത്ത് വരുത്തി.
പിറന്ന മണ്ണില്‍ ജീവിക്കാനുള്ള പൗരന്മാരുടെ ജന്മാവകാശത്തെ നിഷേധിക്കുന്ന ഇത്തരം ആസൂത്രിത നീക്കങ്ങള്‍ക്കെതിരായ ശക്തമായ പ്രതിഷേധം ഈ തെരഞ്ഞെടുപ്പില്‍ പ്രതിഫലിക്കേണ്ടതുണ്ട്.

ലോകസഭയിലേക്കും നിയമസഭയിലേക്കും ഒരുമിച്ച് തെരഞ്ഞെടുപ്പ് നടത്തുമെന്നതാണ് മറ്റൊരു വാഗ്ദാനം. കേള്‍ക്കാന്‍ സുഖമുള്ള ഈ ആര്‍ എസ് എസ് അജണ്ടയില്‍ പല മതേതര കക്ഷികളും സ്ഥാപിത താല്‍പ്പര്യക്കാരും ഇതിനകം തന്നെ കുടുങ്ങിയിട്ടുണ്ട്. ലോകത്തിലെ ഏറ്റവും വലിയ ജനാധിപത്യ രാജ്യത്തിലെ തെരഞ്ഞെടുപ്പ് ചെലവുകള്‍ ചുരുക്കാനും വിവിധ തലങ്ങളിലെ ഭരണ നടപടികളില്‍ കാലതാമസം ഒഴിവാക്കുന്നതിനുമാണ് ഇതെന്നാണ് പുറം ഭാഷ്യം.

ലോകസഭയിലും രാജ്യസഭയിലും മൂന്നില്‍ രണ്ടു ഭൂരിപക്ഷമാണ് ആര്‍ എസ് എസ് ആഗ്രഹിക്കുന്നത്. ഇന്ത്യയില്‍ ഒരു കക്ഷിക്കും അതിവേഗം ഈ ലക്ഷ്യം കൈവരിക്കാന്‍ കഴിയില്ലെന്നതാണ് നമ്മുടെ പാര്‍ലിമെന്ററി വ്യവസ്ഥിതിയെ സുശക്തവും സമ്പുഷ്ടവുമാക്കുന്നത്. നമ്മുടെ ഭരണഘടനയും വ്യവസ്ഥിതിയും അട്ടിമറിക്കപ്പെടാതിരിക്കാനും അവയ്ക്ക് സുരക്ഷയൊരുക്കുന്നതിനുമുള്ള രാഷ്ട്രശില്പികളുടെ ക്രാന്തദര്‍ശിത്വവും ബുദ്ധികൂര്‍മ്മതയും ദേശീയ ബോധവുമാണ് അതിനു പിന്നിലുണ്ടായിരുന്നത്.

രാജ്യം റിപ്പബഌക്കായതു മുതല്‍ ദീര്‍ഘകാലം ഏകകക്ഷി ഭരണമായിരുന്നുവെങ്കിലും ഫെഡറല്‍ സംവിധാനത്തില്‍ സാവകാശം പാര്‍ലിമെന്ററി ജനാധിപത്യം അതിന്റെ സൗന്ദര്യം കൈവരിക്കുന്നതും ഇന്ത്യയുടെ വൈവിധ്യത്തിന്റെ പരിഛേദം പിന്നീട് പുലരുന്നതുമാണ് കണ്ടത്.
ലോകസഭയിലും നിയമസഭകളിലും ജനങ്ങള്‍ തങ്ങള്‍ക്കിഷ്ടപ്പെട്ട കക്ഷികളേയും നേതൃത്വത്തേയും മാറി മാറി അധികാരത്തിലെത്തിച്ചു.
ആദ്യ ഇരുപത് വര്‍ഷം പാര്‍ലമെന്റും നിയമസഭകളും കോണ്‍ഗ്രസ് അടിക്കിവാണെങ്കിലും കോണ്‍ഗ്രസ് തന്നെ നേതൃത്വം കൊടുത്ത ഭരണഘടനാ വ്യവസ്ഥിതിയിലൂടെ രാജ്യം സാവധാനം ബഹുകക്ഷി സംവിധാനത്തിലേക്ക് വഴിമാറി.
പാര്‍ലമെന്റിന്റെ ഇരുസഭകളിലും ഏതെങ്കിലും കക്ഷിക്ക് മൂന്നില്‍ രണ്ടു ഭൂരിപക്ഷമെന്നത് അപൂര്‍വ്വമായി മാത്രം സംഭവിച്ചു. രാജ്യം തന്നെ നിര്‍മ്മിച്ച കോണ്‍ഗ്രസ്സായിരുന്നു അപ്പോള്‍ അധികാരത്തിലെന്നത് നമ്മുടെ ജനാധിപത്യ വ്യവസ്ഥിതിയുടെ മാറ്റ് കൂട്ടാന്‍ മാത്രമേ വഴിവെച്ചുള്ളൂ.

എന്നാല്‍ വലതുപക്ഷ ശക്തിയായി വളര്‍ന്നു വന്ന ബി ജെ പി ക്കു കീഴില്‍ സ്ഥിതിഗതികള്‍ ഒട്ടും ആശാസ്യമല്ല.
കഴിഞ്ഞ തെരഞ്ഞെടുപ്പില്‍ ലോകസഭയില്‍ കേവല ഭൂരിപക്ഷം ലഭിച്ച ബിജെപിക്ക് രാജ്യസഭയില്‍ ഭൂരിപക്ഷമില്ലാത്തത് കൊണ്ട് പല വിവാദ ബില്ലുകളും പാസാക്കിയെടുക്കാനായില്ല.
തെരഞ്ഞടുപ്പുകള്‍ ഒരുമിച്ച് നടത്തുക വഴി ഈ തടസ്സം നീക്കുക മാത്രമല്ല, തങ്ങളുടെ ആത്യന്തിക ലക്ഷ്യം നേടിയെടുക്കാനും കഴിയുമെന്ന് സംഘ് പരിവാരം കരുതുന്നു. ജനാധിപത്യത്തിലെ ഭരണപ്രതിപക്ഷ പോര്‍വിളികള്‍ക്കിടയില്‍ തങ്ങള്‍ക്ക് അനുകൂലമായ ഒരു തരംഗത്തില്‍ ഒരുമിച്ചു തെരഞ്ഞെടുപ്പ് നടക്കുമ്പോള്‍ ഭൂരിപക്ഷം നിയമസഭകളിലും മേല്‍ക്കോയ്മ നേടാനാകുമെന്നാണ് ആര്‍ എസ് എസ് കണക്കുകൂട്ടുന്നത്. അത് വഴി നിയമസഭാ പ്രതിനിധികള്‍ അംഗങ്ങളെ തെരഞ്ഞെടുക്കുന്ന രാജ്യസഭയിലെ ഭൂരിപക്ഷം സൗജന്യ സമ്മാനമായി ലഭിക്കുമെന്ന് മറ്റാരേക്കാളും നന്നായി അവര്‍ക്കറിയാം. അത് പാര്‍ലമെന്റിലെ ഇരുസഭകളിലേയും മുന്നില്‍ രണ്ട് ഭൂരിപക്ഷമായാല്‍ പിന്നെ പണിയെളുപ്പം.
ഒരു നൂറ്റാണ്ടടുക്കുന്ന മതരാഷ്ട്രമെന്ന സ്വപ്‌നം പിന്നെ കൈവെള്ളയിലാക്കാം.

സുപ്രീം കോടതി നിരോധിച്ച മുത്തലാഖിന്റെ പേരില്‍ മുസ്ലിം ചെറുപ്പക്കാരെ ജയിലിലടക്കാനുള്ള കരിനിയമവും പ്രകടനപത്രിക മുന്നോട്ട് വെക്കുന്നുണ്ട്.
എല്ലാം രാജ്യത്തെ അസ്ഥിരപ്പെടുത്താനുള്ള ഫാസിസ്റ്റ് കുതന്ത്രങ്ങളുടെ നേര്‍ പതിപ്പുകള്‍ തന്നെ.

ഇത് വിധി നിര്‍ണ്ണായക ഘട്ടമാണ്.
സ്വര വര്‍ണ്ണങ്ങള്‍ മധുരതരമാക്കുന്ന ഇന്ത്യയെന്ന ഈ മനോഹരമായ ഉദ്യാന ഭൂവില്‍ വിഷം വിതക്കുന്ന ദുഃശക്തികളെ തറപറ്റിക്കാനുള്ള ഉള്‍ക്കരുത്താണ് ഈ തെരഞ്ഞെടുപ്പില്‍ നിശ്ചയമായും രാജ്യം ആര്‍ജ്ജിക്കേണ്ടത്.
ആ പ്രഖ്യാപനത്തിനായാണ് ജനാധിപത്യ ഭാരതം കാതോര്‍ക്കുന്നത്.
അതിനായാണ് നാം യത്‌നിക്കേണ്ടത്.

ആദിത്യ യോഗിയോടാണ്…

ഹേ കപട സന്യാസീ..,
ഇത് വൈറസല്ല ;
നല്ല ഒന്നാന്തരം ആന്റി വൈറസാണ്.
കാവിക്കുള്ളില്‍ അരിച്ചു കയറി രാജ്യത്തെ കാര്‍ന്ന് തിന്ന് മുച്ചൂടും നശിപ്പിച്ചു കൊണ്ടിരിക്കുന്ന വര്‍ഗീയ വൈറസുകളെ തുരത്തിയോടിക്കാനുള്ള സൂപ്പര്‍ ഡ്യൂപ്പര്‍ ആന്റി വൈറസ്.

മുസ്ലിംകള്‍ തന്നെ രാജ്യത്തിന്റെ കാന്‍സറാണെന്ന ശാപവാക്കുകള്‍ പതിവായി കേട്ടാണ് പതിതരായ ഒരു ജനതയുടെ അന്തസ്സാര്‍ന്ന ജീവിത ഭാഗധേയം കഴിഞ്ഞ ഏഴ് പതിറ്റാണ്ടോളം ജനാധിപത്യ ഇന്ത്യയില്‍ ഈ പച്ച പതാക കൊണ്ട് രാജ്യ നന്മക്കായി മുസ്ലിം ലീഗ് എഴുതിച്ചേര്‍ത്തത്.

രാഷ്ട്രീയ പരിജ്ഞാനം ലവലേശം തൊട്ട് തീണ്ടിയിട്ടില്ലെങ്കിലും വര്‍ഗീയ തിമിരം മൂടിയ കണ്ണുകള്‍ ഒരു നിമിഷം തുറന്ന് വെച്ചാല്‍ കനവുകള്‍ ചാലിച്ച് കനല്‍പഥങ്ങള്‍ താണ്ടിയ ഒരു ജനപഥം ജീവിതം കൊണ്ട് തീര്‍ത്ത ഹരിതവര്‍ണ്ണ കഥകളുടെ ഗ്രന്ഥത്താളുകള്‍ ഇവിടെ, ഈ കൊച്ചു കേരളത്തില്‍ ഓരോന്ന് ഓരോന്ന് മനോഹരമായി അടുക്കി വെച്ചിരിക്കുന്നത് താങ്കള്‍ക്ക് കാണാനാകും.
ബഹുസ്വര സമൂഹത്തിലെ സര്‍വ്വരും നെഞ്ചേറ്റിയ ഈ പച്ച പതാകയുടെ മഹത്വം അപ്പോള്‍ അനുഭവിച്ചറിയാനാകും.
അവകൂടി ചേര്‍ന്നതാണ് ജനാധിപത്യ മതേതര ഇന്ത്യയുടെ ചരിത്രമെന്ന് അപ്പോള്‍ താങ്കള്‍ക്ക് മനസ്സിലാകും.
അതിന്,
പൊട്ടക്കിണറ്റിലെ അഴുകിയ താമരയിതളുകള്‍ക്കിടയില്‍ മാത്രം മുങ്ങി നിവരുന്ന ഈ കൂപമണ്ഡൂകങ്ങള്‍ക്കെന്ത് ചരിത്രബോധം.

അനന്ത കോടി കോശങ്ങളില്‍ ഒന്നിന്റെ മാത്രം സ്വാര്‍ത്ഥതയാണ് മനുഷ്യ ശരീരത്തില്‍ ആകമാനം അര്‍ബുദം പടര്‍ത്തുന്നത്. രാജ്യത്തെ അര്‍ബുദ രോഗിയാക്കിയ ആ വൈറസ് എതെന്ന് എല്ലാവരും തിരിച്ചറിഞ്ഞു കഴിഞ്ഞു. അതിനുള്ള ഫലപ്രദമായ മറുമരുന്നും തയ്യാര്‍.
നാടിന്റെ വൈവിധ്യവും സംസ്‌കാരങ്ങളും സ്വത്വവും സ്വാത്രന്ത്ര്യവും അനുഭവിക്കുമ്പോഴാണ് രാജ്യത്തിന്റെ ആരോഗ്യം വീണ്ടെടുക്കാന്‍ കഴിയുകയെന്ന കോണ്‍ഗ്രസ്സ് അദ്ധ്യക്ഷന്‍ രാഹുല്‍ ഗാന്ധിയുടെ ആ തിരിച്ചറിവ് തന്നെയാണ് ഇപ്പോള്‍ പ്രധാനം.

ഇന്ത്യയുടെ വൈവിധ്യമാണ് രാഹുലിന്റെ പിന്നില്‍ അണിനിരന്നിട്ടുള്ളത്.
രാജ്യത്തെ ഫാസിസ്റ്റ് ചിന്താഗതിക്കാര്‍ മോദിക്ക് പിന്നിലും.
എന്ത് വേണമെന്ന് ഈ രാജ്യം തീരുമാനിക്കും.
നമ്മുടെ രാജ്യം തിരിച്ചു വരും.
തിരിച്ചു വന്നേ മതിയാകൂ.

പി.എം സാദിഖലിയുടെ ഫെയ്‌സ്ബുക്ക് കുറിപ്പ് പൂര്‍ണമായി വായിക്കാം

ഹിന്ദി ഹൃദയ ഭൂമിയില്‍ സംഘ്പരിവാറിനെ എന്ന പോലെ, രാഹുല്‍ ഗാന്ധിയുടെ കേരളത്തിലെ സ്ഥാനാര്‍ത്ഥിത്വം സി പി ഐ എമ്മിനെ ഭയചകിതമാക്കുന്നു. ഷാ, മോദി, യോഗി എന്നിവരുടെ ക്രിമിനല്‍ കോംബോയാണ് ദേശീയ തലത്തില്‍ കോണ്‍ഗ്രസ്സിന്റെ ചടുലമായ നീക്കങ്ങളെയും രാഹുല്‍ ഇഫക്ടിനെയും ഭയത്തോടെ വീക്ഷിക്കുന്നത്. കേരളത്തില്‍ പിണറായി, ജയരാജന്‍, മണിയടക്കമുള്ള സൈക്കൊ ക്രിമിനലുകളും സമാന വഴിയില്‍ തന്നെ.

ദേശീയ രാഷ്ട്രീയത്തെ വര്‍ഗ്ഗീയ ഫാഷിസ്റ്റ് മുക്തമാക്കുന്ന ജനാധിപത്യ പ്രക്രിയക്കൊപ്പം കേരളത്തെ രാഷ്ട്രീയ ഫാഷിസത്തില്‍ നിന്ന് കരകയറ്റുക എന്നതും ഒരു അനിവാര്യതയാണ്. അധികാരം ഏകാധിപത്യ താല്‍പര്യങ്ങള്‍ അടിച്ചേല്പിക്കാനുള്ള ടൂള്‍ ആയി മാറുന്ന ഫാഷിസ്റ്റ് രാഷ്ട്രീയത്തെ തോല്‍പ്പിക്കാനും രാഹുലിന്റെ സാന്നിധ്യം ദക്ഷിണേന്ത്യയില്‍ ഉപകരിക്കും.

ഇന്ത്യയിലാദ്യമായി മുന്നണി രാഷട്രീയത്തെ നെഞ്ചേറ്റിയ കേരളം നവോത്ഥാനത്തിന്റെയും സാമൂഹ്യ പ്രബുദ്ധതയുടെയും ഫലമായി രാഷ്ട്രീയ പക്വത ആര്‍ജ്ജിച്ച സംസ്ഥാനമാണ്. ഇതിനോട് തികച്ചും നീതി പുലര്‍ത്തിയാണ് കോണ്‍ഗ്രസ്സ് അവരുടെ സ്ഥാനാര്‍ത്ഥി നിര്‍ണയം പൂര്‍ത്തീകരിച്ചിരിക്കുന്നത് എന്ന് അഭിമാനത്തോടെ പറയാനാകും. ലോക തലത്തില്‍ തന്നെ പക്വതയുടേയും സത്യസന്ധതയുടേയും പ്രതീകമായി എണ്ണപ്പെട്ട രാഹുല്‍ ഗാന്ധി എന്ന ദേശീയ നേതാവ് മുതല്‍, ശശി തരൂരും മുരളീധരനുമടക്കമുള്ള പ്രതിഭകളായ ജനസമ്മതര്‍ കോണ്‍ഗ്രസ്സിന്റെ സ്ഥാനാര്‍ത്ഥികളായി ജനാധിപത്യത്തെ അഭിസംബോധന ചെയ്യുന്നു.

കൊലപാതകികളും, ക്രിമിനലുകളും, ഭൂമാഫിയകളും, കോമാളികളും എന്നു വേണ്ട ഒരു മസാല മൂവിക്ക് പറ്റിയ ഐറ്റം നമ്പറുകള്‍ മറുഭാഗത്ത് എല്‍ ഡി എഫ് ബാനറിലും അണിനിരക്കുന്നു. പി ജയരാജനെന്ന ക്രിമിനല്‍ ഐകൊണിക്കിന്റെ ഒരൊറ്റ സ്ഥാനാര്‍ത്ഥിത്വം കേരളത്തിലെ ഇരുപത് മണ്ഡലങ്ങളിലും സി പി എമ്മിനെ പരാജയത്തിന്റെ പാഠം പഠിപ്പിക്കാനിരിക്കുകയാണ്. അതിന്റെ കൂടെ രാഹുലിന്റെ സാന്നിധ്യം കൂടി ഉറപ്പാകുമ്പോള്‍ എല്‍ ഡി എഫ് ഏത്, ബിജെപി യേത് എന്ന് തിരിച്ചറിയാനാകാത്തവണ്ണം അവര്‍ തമ്മിലുള്ള സ്വരചേര്‍ച്ച പുറത്താവുകയാണ്.

ഫാഷിസ്റ്റ് വിരുദ്ധ മൈതാന പ്രസംഗങ്ങളില്‍ ആത്മാര്‍ത്ഥതയുണ്ടെങ്കില്‍ വയനാട്ടിലെ എല്‍ ഡി എഫ് സ്ഥാനാര്‍ത്ഥിയെ പിന്‍വലിച്ച് രാഷട്രീയ മാന്യത കാണിക്കുകയാണ് ഇടതുപക്ഷം ഇപ്പോള്‍ ചെയ്യേണ്ടത്. മറിച്ചുളള പ്രിവിലേജ് വാദം വിഷല്പിതമായ സംഘ് പരിവാര്‍ രാഷ്ട്രീയത്തെ സഹായിക്കാന്‍ മാത്രമേ ഉപകരിക്കൂ. സംഘ്പരിവാരം ഫാഷിസ്റ്റ് സ്വഭാവമുള്ളവരല്ല എന്ന് വിലയിരുത്തുന്ന കാരാട്ട് പ്രഭൃതികള്‍ അത് മനസ്സിലാക്കുന്നുവെങ്കിലാണ് അത്ഭുതം.

പി.എം സ്വാദിഖലി

ഹനാന്‍ ബിന്‍ത് ഹാഷിമിനെ അറിയുമോ?
കോഴിക്കോട്ടെ മുസ്ലിം പെണ്‍കുട്ടിയാണ്.
പതിനഞ്ചാം വയസ്സില്‍ അമേരിക്കന്‍ ബഹിരാകാശ ഏജന്‍സിയായ നാസയുടെ അംഗീകരം നേടി.
ഐന്‍സ്റ്റീന്റെ മഹാവിസ്‌ഫോടന സിദ്ധാന്തത്തിനും ഡാര്‍വിന്റെ പരിണാമ സിദ്ധാന്തത്തിനും മറുഭാഷ്യം ചമക്കുന്നു.
നമ്മുടെ പ്രപഞ്ചത്തെ വേര്‍തിരിക്കുന്ന പ്രകാശത്തിന്റെ അതിരിനുമപ്പുറം വേറെയും പ്രകാശ കണമുണ്ടെന്ന് വിവരിക്കുന്ന ഗണിതശാസ്ത്ര സംവിധാനം മറ്റൊരു പദ്ധതിയാണ്.

ഇനി നസ്ലിം നീലംകോടനെ പരിചയപ്പെടാം.
മലപ്പുറം എടക്കരയിലെ മുസ്ലിം പെണ്‍കുട്ടി. പിതാവിന് എടക്കരയില്‍ ഡെക്കറേഷന്‍ കട.
സിര്‍ക്കോണിയമെന്ന നക്ഷത്രം കണ്ടു പിടിച്ചു.
ഐര്‍ലന്റിലെ ബെല്‍ഫാസ്റ്റ് ക്വീന്‍ യൂണിവേഴ്‌സിറ്റിയില്‍ നിന്നും പി.എച്ച്.ഡി നേടി.
നക്ഷത്രങ്ങളെ കുറിച്ചുള്ള കൂടുതല്‍ പഠന ഗവേഷണങ്ങള്‍ തുടരുന്നു.

ഇതാണ് കേരളത്തിലെ മുസ്ലിം പെണ്‍കുട്ടികളുടെ ഇപ്പോഴത്തെ ജീവിത പരിസരം. അപ്പോഴാണ് പളളി മിനാരത്തില്‍ കയറി വാങ്ക് വിളിക്കാനുള്ള താത്തക്കുട്ടിയുടെ അവകാശത്തിനു വേണ്ടി
സയന്‍സിലും മെഡിസിനിലും എഞ്ചിനീയറിംഗിലുമൊക്കെ പ്രാവീണ്യം തെളിയിച്ച മലബാറിലെ താത്ത കുട്ടികളുടെ എണ്ണം കണക്കെടുത്താല്‍ തീരുന്നതല്ല.
അതിനു പിന്നില്‍ സമുദായത്തിന്റെ നെഞ്ചിലെ നോവുകള്‍ ചാലിച്ച് കനല്‍വഴികള്‍ താണ്ടി നിഷ്‌കാമ കര്‍മ്മം ചെയ്ത ഒട്ടേറെ പേരുടെ ത്യാഗ സുരഭില കഥകളുണ്ട്.
കുമാരനാശാന്റെ ‘ദുരവസ്ഥ’യിലെ മാപ്പിളയില്‍ നിന്ന് കരകയറി പറന്നുയര്‍ന്ന ഒരു സമുദായ പക്ഷിയുടെ ആകാശ സ്വപ്നങ്ങളുടെ ചിറകടികളുണ്ട്.
മുസ്ലിം പെണ്‍കുട്ടികള്‍ക്ക് പഠിക്കാന്‍ സര്‍ക്കാരിന്റെ സ്‌കോളര്‍ഷിപ്പ് നല്‍കിയ ഒരു മഹാരഥന്റെ ചിന്താപദ്ധതികളുണ്ട്.
നവോത്ഥാനത്തിന്റെ പുതിയ കിരീടം ചൂടാനുള്ള വിടുവായത്തങ്ങള്‍ക്കിടയില്‍ ചരിത്രത്തില്‍ ഇടം നേടിയ
ഈ സുവര്‍ണ്ണ പുസ്തകം നിങ്ങള്‍ക്കൊന്നും കാണാനാവില്ല.
കാരണം, ഈ സമുദായത്തെ എന്നും ഇരുട്ടുമുറിയില്‍ നിര്‍ത്താനേ നിങ്ങള്‍ ആഗ്രഹിച്ചിട്ടുള്ളൂ. അതുകൊണ്ടാണ് നിങ്ങളുടെ നാടകങ്ങളിലെയും സിനിമകളിലെയുമൊക്കെ മുസ്ലിം പ്രതിനിധാനങ്ങള്‍ ഇപ്പോഴും കരി കുത്തി നില്‍ക്കുന്നത്.

ഗോമാംസത്തിന്റെ പേരില്‍ ഒരു പോലീസ് ഓഫീസറെ പരസ്യമായി വെടിവെച്ച് കൊന്നിട്ടും, പശുവിനെ കൊന്ന കുറ്റം ആരോപിച്ച് 10 ഉം 12 ഉം വയസ്സുള്ള കുട്ടികള്‍ക്ക് പോലീസ് പീഡനമേല്‍ക്കേണ്ടി വരുന്ന ദൈന്യതയാണ് രാജ്യത്തെ മുസ്ലിം സമുദായത്തിന്റെ ഒടുവിലത്തെ നീറ്റല്‍.
ഈ ആസുര കാലത്തു നിന്ന് കരകയറാന്‍ ചുറ്റുമുള്ളവരിലേക്ക് ആശയുറ്റ കണ്ണുകളുമായി നോക്കുകയാണ് ജനാധിപത്യ ഇന്ത്യയിലെ മുസ്ലിം ന്യൂനപക്ഷം.

അപ്പോഴും മുസ്ലിംകളെ ഗിനിപ്പന്നികളാക്കി തങ്ങളുടെ പുരോഗമന വിപ്ലവ ആവിഷ്‌കാര പരീക്ഷണങ്ങള്‍ തുടരുകയാണ് സി.പി.എമ്മും കുട്ടി സഖാക്കളും.
ശരീഅത്ത്, മുത്തലാഖ്, ഏക സിവില്‍ കോഡ്, ഫറൂഖ് കോളേജിലെ ലിംഗസമത്വം, വത്തക്ക പ്രയോഗം, താത്ത കുട്ടികളുടെ ഫ്‌ളാഷ് മോബ്, സ്ത്രീകളുടെ പള്ളി പ്രവേശം തുടങ്ങി സാത്തനിക് വേഴ്‌സസ്, തസ്ലിമ നസ്‌റിന്‍ എന്നിവക്ക് പുറമെ ഇപ്പോള്‍ ഒരു കിത്താബും ആയി.
ഈ അശരണരുടെ മുതുകില്‍ തന്നെ വേണം കമ്യൂണിസ്റ്റുകാരന്റെ ഉഗ്ര ചുകപ്പന്‍ പരീക്ഷണങ്ങള്‍.
അല്ലെങ്കില്‍ കൈ പൊള്ളും.
ശബരിമല അയ്യപ്പന്റെ പുലിവാല് പിടിച്ചത് വിട്ടൊഴിയാനുള്ള പങ്കപ്പാട് തന്നെ അതറിയുന്നവര്‍ക്കല്ലെ തിരിയൂ.

പല്ലവി പഴയതു തന്നെ.
വാമൊഴികളും വേഷ ഭൂഷാതികളും
എല്ലാം ആ പ്രാകൃതം തന്നെ.
ആശാന്റെ ‘ദുരവസ്ഥ’യിലെ മാപ്പിളയെ മാത്രമേ
ഇവര്‍ കണ്ടിട്ടുള്ളൂ.
എന്നിട്ട് ഇതാണെത്രെ കാലത്തോട് സംവദിക്കുന്ന പുരോഗമന വിപ്ലവ നാടകം
കിത്താബ്.
ഛെ!

തങ്ങള്‍ പൊരുതി നേടിയ വിജയത്തെ കൊഞ്ഞനം കുത്തുന്ന പുരോഗമന വിപ്ലവ പരിഷകളെ പുറം കാല് കൊണ്ട് തൊഴിക്കാനുള്ള കരുത്ത് ഇസ്സമുദായം ആര്‍ജ്ജിച്ചത് അറിഞ്ഞില്ലെന്ന് വേണ്ട.
അതിന് അവര്‍ പ്രാപ്തമായി കഴിഞ്ഞു.
അല്ല, അവരെ പ്രാപ്തമാക്കിയിട്ടുണ്ട്.
കരുതിയിരുന്നോ…

1977 ഡിസംബര്‍ 19.
മലപ്പുറത്ത് നിന്ന് നിയമസഭയിലേക്ക് വിജയിച്ച സി.എച്ച് മുഹമ്മദ് കോയയെ അയോഗ്യനാക്കി കേരള ഹൈക്കോടതി വിധി.
ആര്‍.എസ്.എസ്സിനെതിരായി സി എച്ച് നടത്തിയ പ്രസംഗങ്ങള്‍, ചന്ദ്രിക പത്രത്തില്‍ വന്ന ഒരു കാര്‍ട്ടൂണ്‍, ചില വാര്‍ത്തകള്‍ ഇവയൊക്കെയാണ് ഉന്നയിക്കപ്പെട്ട ആരോപണങ്ങള്‍.

ജനവരി 11.
ഹൈക്കോടതി വിധി സുപ്രീം കോടതി സ്‌റ്റേ ചെയ്തു.
1978 സെപ്തംബര്‍.
സുപ്രീം കോടതി സി.എച്ചിന്റെ തിരഞ്ഞെടുപ്പ് വിജയം ശരി വെച്ച് കൊണ്ട് വിധി പ്രഖ്യാപിച്ചു.

സമാനമായ കേസില്‍ ഇബ്രാഹിം സുലൈമാന്‍ സേട്ട് സാഹിബിനും സുപ്രീം കോടതിയില്‍ ഈ കാലയളവില്‍ വിജയം.

2018 നവംബര്‍ 9
അഴീക്കോട് നിന്നും വിജയിച്ച കെ.എം ഷാജി അയോഗ്യനെന്ന് കേരള ഹൈക്കോടതി.
വര്‍ഗീയത പ്രചരിപ്പിച്ചുവെന്നതാണ് ഉന്നയിക്കപ്പെട്ട ആരോപണം.
വിധി സ്‌റ്റേ ചെയ്ത് മണിക്കൂറുകള്‍ക്കകം അതേ കോടതി…..

പോരാട്ടം തുടരുകയാണ്.
അത് അത്രമേല്‍ എളുപ്പമായിരുന്നില്ല നാളിത് വരെ.
കോടതിയെ തള്ളിപ്പറയില്ല.
ജനകീയ കോടതികളെ പോലെ തന്നെ നീതി പീഠങ്ങളിലും വിശ്വാസമുണ്ട്.
കോടതികളില്‍ തെളിവാണ് പ്രധാനം.
പടച്ചുണ്ടാക്കിയ തെളിവുകള്‍ കൃത്രിമമായിരുന്നുവെന്ന് തെളിയിക്കപ്പെടുക തന്നെ ചെയ്യും.

വര്‍ഗീയ തീവ്രവാദത്തിനെതിരെ കെ.എം ഷാജി പോരാടിയത് സമുദായത്തിനകത്തും പുറത്തുമായിരുന്നു.
നെല്ലും പതിരും വേര്‍തിരിക്കാന്‍
കനല്‍ വഴികളില്‍ കല്ലും മുള്ളും താണ്ടി ഒരൊന്നന്നര പോരാട്ടം.
അതിന്റ ഗുണഫലമനുഭവിച്ച കേരളത്തിന് കെ.എം.ഷാജിയോട് നന്ദികേട് കാണിക്കാനാവില്ല.
ഒപ്പം നിന്നവര്‍ക്ക് ഇന്നും ആ പോരാട്ട നാളുകള്‍ അഭിമാനത്തോടേ ഓര്‍ക്കാന്‍ കഴിയൂ..

സി (ക്രിസ്ത്യന്‍ ) എച്ച് (ഹിന്ദു ) എം (മുസ്ലിം) കോയ എന്ന ഖ്യാതിയുമായാണ് സി.എച്ച് ജീവിച്ചതും വിടവാങ്ങിയതും.
ജനങ്ങള്‍ നെഞ്ചേറ്റിയ സി എച്ചിന്റെ പ്രസ്ഥാനം ജനഹൃദയങ്ങളിലാണ് ജീവിക്കുന്നത്.
തളരില്ല, തളര്‍ത്താനാവില്ല.
തകരില്ല, തകര്‍ക്കാനാവില്ല.
വര്‍ഗീയതാ ആരോപണം
ചെലവാക്കാന്‍ ആവില്ല ഇവിടെ.
ഏഴ് പതിറ്റാണ്ടായി അതിന് കഴിഞ്ഞിട്ടില്ല, പിന്നല്ലെ?

കഥാപുരുഷ് കുമാര്‍ മാലിന്യം തെളിയിക്കാന്‍ കിണറ്റില്‍ തന്നെ ഇറങ്ങി നില്‍പ്പാണ്.
കരയില്‍ നിന്നാണ് കിണറ്റില്‍ മാലിന്യമില്ലെന്ന് നമ്മള്‍ തെളിയിച്ചത്.
ഇതും അത്രയേയുള്ളൂ.
നമുക്ക് നോക്കാമെന്നെ…

ഗുജറാത്തിലെ ഗീര്‍ സോംനാഥ് ജില്ലയിലെ ഊനാ പട്ടണത്തില്‍ ഗോരക്ഷയുടെ പേരില്‍ ഹിന്ദുത്വ ഭീകരതയുടെ ആക്രമണത്തിന് വിധേയരായ ദളിത് യുവാക്കളില്‍ ഒരാളുടെ മൊഴിയാണിത്.

ഇന്ത്യയിലെ ദളിതര്‍ ഇക്കാലവും മേലാളന്മാര്‍ക്ക് വേട്ടയാടാനുള്ള ഇരകളായി തുടരുന്നു.
മൃഗീയപീഡനങ്ങളും കൊലപാതകങ്ങളും വരെ ഇപ്പോഴും ദളിതര്‍ക്കെതിരെ നടന്നുകൊണ്ടിരിക്കുന്നു.
പണ്ടുകാലത്ത് സവര്‍ണ തമ്പുരാക്കന്മാരായ ഗ്രാമമുഖ്യന്മാരാണ് ഈ പീഡനങ്ങള്‍ക്ക് നേതൃത്വം നല്‍കിയിരുന്നതെങ്കില്‍ ഇന്ന് ജനാധിപത്യ ഭരണകൂടത്തിന്റെ ഒത്താശയോടെയാണ് എന്നതു മാത്രമാണ് മാറ്റം.

ദളിതര്‍ക്കെതിരായ അതിക്രമങ്ങള്‍ പെരുകുന്ന കാലത്ത് അവര്‍ക്കുള്ള അവസാനത്തെ ആശ്രയം രാജ്യത്തെ നീതിന്യായ വ്യവസ്ഥയാണ്.
അവരോടൊപ്പം നില്‍ക്കേണ്ട പരമോന്നത കോടതിയാകട്ടെ പട്ടികവിഭാഗ പീഡന നിരോധന നിയമത്തിലെ വ്യവസ്ഥകള്‍ ദുര്‍ബലപ്പെടുത്തിയിരിക്കുന്നു.
ഇത് അങ്ങേയറ്റം പ്രതിഷേധാര്‍ഹമാണ്. ഇതിനെതിരെ ദളിതരുടെ പ്രക്ഷോഭങ്ങള്‍ രാജ്യമെമ്പാടും നടന്നുവരികയാണ്.
ഈ സമരങ്ങളെ അടിച്ചമര്‍ത്തുന്ന സര്‍ക്കാര്‍ നിലപാട് സഹസ്രാബ്ധങ്ങളോളം അടിമകളാക്കിയ ജനവിഭാഗത്തോട് വീണ്ടുമുള്ള ക്രൂരത തന്നെയാണ്.

നമ്മുടെ രാഷ്ട്ര ശില്‍പികള്‍ ദീര്‍ഘവീക്ഷണമുള്ളവരായിരുന്നു. പുഴുക്കളെ പോലെ ഇകഴ്ത്തി നിര്‍ത്തിയ ദളിത് ജനങ്ങളെ മുഖ്യധാരയിലേക്ക് കൊണ്ടുവരുന്നതിനാണ് പ്രത്യേകം സംവരണവും അതോടൊപ്പം പീഡനവിരുദ്ധ നിയമവും അയിത്താചരണ വിരുദ്ധ നിയമവുമെല്ലാം നീതിന്യായ വ്യവസ്ഥയില്‍ അവര്‍ എഴുതിച്ചേര്‍ത്തത്.
ബി.ജെ.പിക്ക് അധികാരം ലഭിച്ചു തുടങ്ങിയതു മുതല്‍ ഇതെല്ലാം അട്ടിമറിക്കപ്പെടുന്ന കാഴ്ചയാണ് പൊതുവില്‍ കാണപ്പെടുന്നത്.
ദളിത് സരക്ഷണ ക്ഷേമ നിയമങ്ങള്‍ എത്രത്തോളം പരിപാലിക്കപ്പെടുന്നു എന്നു പരിശോധിക്കാന്‍ ഇന്നേവരെ മുതിര്‍ന്നിട്ടില്ലാത്ത ഒരു വ്യവസ്ഥിതിയിലാണ് ദളിതുകള്‍ പീഡിതരായാല്‍ ആലോചിച്ച് മാത്രം നടപടി മതിയെന്ന പുതിയ തീര്‍പ്പ് വരുന്നത്.

ഓരോ 18 മിനുട്ടിനും ഒരു ദളിതന്‍ പീഡിപ്പിക്കപ്പെടുമ്പോള്‍ പ്രതികള്‍ ശിക്ഷിക്കപ്പെടുന്നത് 5.3 ശതമാനം കേസുകളില്‍ മാത്രമാണ്.
കുതിരയെ വാങ്ങിയ കുറ്റത്തിന് ഉയര്‍ന്ന ജാതിക്കാര്‍ കൊന്നുകളഞ്ഞ ഭാവ്‌നഗറിലെ ദളിതനെക്കുറിച്ച് കഴിഞ്ഞയാഴ്ചയാണ് നമ്മള്‍ വായിച്ചത്.

ദളിത് പീഡന നിരോധന നിയമമനുസരിച്ച് അന്യായമായി ആരേയും അറസ്റ്റ് ചെയ്യരുതെന്നാണ് സുപ്രീം കോടതിയുടെ പുതിയ വിവക്ഷ.
യു.എ.പി.എ, എന്‍.ഐ.എ കേസുകളില്‍ അകപ്പെട്ട് പുറം ലോകം കാണാനാവാതെ നിരപരാധികളായ നൂറുകണക്കിന് മുസ്ലിംകളാണ് രാജ്യത്ത് ജയിലഴികള്‍ എണ്ണിക്കഴിയുന്നത്.
കേസുകള്‍ ചാര്‍ജ് ചെയ്യുന്ന പക്ഷം യാതൊരു മുന്നറിയിപ്പുമില്ലാതെയാണ് അറസ്റ്റുകള്‍ നടക്കുന്നതും ജാമ്യം പോലും നിഷേധിച്ച് അന്യായമായി തടങ്കലില്‍ വെക്കുന്നതും.
ഇതിലെ മനുഷ്യാവകാശ ധ്വംസനങ്ങള്‍ ഇപ്പോഴും നാം വിളിച്ചു പറഞ്ഞു കൊണ്ടിരിക്കുന്നതാണ്.
അപ്പോഴാണ് ദളിതുകളെ പീഡിപ്പിച്ചവരെ അറസ്റ്റ് ചെയ്യുന്നത് ആലോചിച്ചു മാത്രം മതി എന്ന് നീതിപീഠം പറയുന്നത്.
ഇത് അനീതിയാണ്,ഇരട്ടനീതിയാണ്.
ഭീകര വിധ്വംസക പ്രവര്‍ത്തനങ്ങളും ദളിത് പീഡനങ്ങളും രാജ്യം ഇന്ന് ഒരേ സമയം നേരിടുന്ന ഗുരതര പ്രശ്‌നങ്ങള്‍ തന്നെയാണ്.
ഒന്നിന് ഒരു നിയമവും മറ്റൊന്നിന് വേറൊന്നും അംഗീകരിക്കാനാവില്ല.

ഈ വാര്‍ത്തകള്‍ക്കൊപ്പം തന്നെയാണ് കണ്ണൂരിലെ സി.പി.എം പാര്‍ട്ടി ഗ്രാമത്തില്‍ നിന്നും ബഹിഷ്‌കൃതയാക്കപ്പെട്ട ദളിത് വനിത ചിത്രലേഖക്ക് വീട് വെക്കാന്‍ യു ഡി എഫ് സര്‍ക്കാര്‍ കനിഞ്ഞു നല്‍കിയ ഭൂമി പിണറായി സര്‍ക്കാര്‍ കവര്‍ന്നെടുക്കുന്നുവെന്ന വാര്‍ത്തയും പുറത്ത് വരുന്നത്.
ചിത്രലേഖക്ക് വീട് പണിയുന്നതിന് കെ.എം ഷാജി എം എല്‍ എ യുടെ നേതൃത്വത്തില്‍ അബുദാബി ഗ്രീന്‍ വോയ്‌സും മറ്റും നടത്തുന്ന ശ്രമങ്ങള്‍ നേരിട്ടറിവുള്ളതാണ്.
സി പി എം ഭരണം തന്നെ നേരിട്ട് നടത്തുന്ന ഈ കൊടും ക്രൂരത കാണാതെ രാജ്യത്തെ ദളിത് പീഡനങ്ങളെക്കുറിച്ച് സംസാരിക്കാന്‍ നമുക്കവകാശമില്ല.
ഇത് ജാതി സമവാക്യങ്ങള്‍ പൊളിച്ചെഴുതിയ കേരളമല്ല, അത് പാലൂട്ടന്ന പിണറായിക്കേരളമാണ്.

മുസ്ലിം ലീഗ് ദളിതര്‍ക്കൊപ്പമാണ്. അവകാശങ്ങള്‍ സംരക്ഷിക്കുന്നതിന് പോരാടുന്ന ദളിത് സഹോദരങ്ങള്‍ക്കൊപ്പം.
ഹൃദയാഭിവാദ്യങ്ങള്‍!
Sadiq Ali

പാർട്ടി ഗുണ്ടകളായ സദാചാര പോലീസുകാരെ ഭയന്നു കഴിയുന്ന പെൺകുട്ടികളെ സംരക്ഷിക്കാൻ പോലീസ് പോലും തയ്യാറാകുന്നില്ല എന്നതാണ് അവിടെനിന്ന് ലഭിക്കുന്ന വിവരം.
ഈ സ്ഥാപനത്തിലെ പെൺകുട്ടികളെ ലക്ഷ്യമിടുന്ന ലൈംഗിക രോഗികളെ നിലക്കു നിർത്താൻ കഴിയാത്ത എസ്.എഫ്.ഐക്കാരാണ് ഒരു മതപ്രസംഗത്തിന്റെ പേരു പറഞ്ഞ് ഫാറൂഖ് കോളേജിലേക്ക് മാർച്ച് നടത്തുന്നത് എന്ന വിരോധാഭാസം കേരള ജനത തിരിച്ചറിയണം. യൂണിയൻ പ്രവർത്തനം പാടില്ലെങ്കിലും എവിടെയും രക്ഷയില്ലാതായപ്പോഴാണ് ‘ഞങ്ങൾ വിൽപനയ്ക്കുള്ളതല്ല’ എന്ന് ബോർഡെഴുതി ആ പെൺകുട്ടികൾ സമരത്തിനിറങ്ങിയത്.

പതാകയിൽ എഴുതിവെച്ച ജനാധിപത്യവും സോഷ്യലിസവുമൊക്കെ എസ്.എഫ്.ഐ സെലക്ട് ചെയ്യുന്ന കോളേജുകൾക്കു വേണ്ടിയുള്ളതാണ്.
അവരുടെ ആധിപത്യമുള്ള കാമ്പസുകളിൽ ഇതു വെറും മുദ്രാവാക്യം മാത്രമാണ്.
ജനാധിപത്യവും സോഷ്യലിസവും ഫാറൂഖ് കോളേജിന് മാത്രമായി റിസർവ് ചെയ്യാൻ സമരം ചെയ്യുന്നതിനു മുമ്പ് കണ്ണൂരിലേക്ക് പോകാൻ ചങ്കൂറ്റമുണ്ടോ എന്നാണ് ചോദ്യം.
പാർട്ടി ഗുണ്ടകളുടെ ഉപദ്രവത്തെക്കുറിച്ച് പരാതി പറയുന്ന പെൺകുട്ടികളോട് ഇങ്ങനെയുള്ള വസ്ത്രങ്ങൾ ധരിക്കരുത് എന്ന് ഉപദേശിക്കുന്ന നിഫ്റ്റിലെ അധ്യാപകരെയും വാർഡന്മാരെയും കാണാൻ ചങ്കൂറ്റമുണ്ടോ എന്നാണ് ചോദ്യം.

ജനാധിപത്യമോ സ്റ്റുഡന്റ്‌സ് യൂണിയൻ തെരഞ്ഞെടുപ്പോ ഇല്ലാതെ മാനേജ്‌മെന്റുകൾ അടിച്ചേൽപിക്കുന്ന നിയമങ്ങളുമായി വീർപ്പുമുട്ടുന്ന കാമ്പസുകൾ നിരവധിയുള്ള ഇടങ്ങളിലൂടെ വെറുതെയെങ്കിലും ഒന്നു സഞ്ചരിക്കണം.
അവിടെയൊന്നും കാണിക്കാത്ത ആവേശം രാജാഗേറ്റിനു മുന്നിൽ മാത്രം കാണിക്കുമ്പോൾ നിങ്ങളുടെ ഉദ്ദേശ്യശുദ്ധിയെ സംശയിക്കാതെ തരമില്ല.

ലിംഗസമത്വ പ്രസംഗവുമായി ആരാന്റെ പറമ്പിലേക്ക് വലിഞ്ഞുകയറാൻ ആവേശം കാട്ടുന്നതിനു മുമ്പ് മുഖ്യമന്ത്രിയുടെ മൂക്കിൻ തുമ്പിലുള്ള ഈച്ചയെ ആട്ടാൻ എസ്.എഫ്.ഐ തയ്യാറുണ്ടോ?
അതോ, ലിംഗസമത്വവും സ്ത്രീ സ്വാതന്ത്ര്യവും കേരളത്തിൽ ഫാറൂഖ് കോളേജിൽ മാത്രം നടപ്പായാൽ മതി എന്നാണോ പാർട്ടിയുടെ തിട്ടൂരം?