PMO – Chandrika Daily

പ്രധാനമന്ത്രിയുടെ ഓഫീസ് വില്‍പനക്ക്; ഒഎല്‍എക്‌സില്‍ പരസ്യം, നടപടി

web desk 1 — Fri, 18 Dec 2020 13:23:33 +0000

വാരണാസി: പ്രധാനമന്ത്രി നരേന്ദ്ര മോദിയുടെ വാരണാസി ഓഫീസ് ഒഎല്‍എക്‌സില്‍ വില്‍പ്പനക്കെന്ന് പരസ്യം നല്‍കിയ നാലുപേര്‍ അറസ്റ്റില്‍. ലോക്‌സഭയില്‍ വാരണാസിയെ പ്രതിനിധീകരിക്കുന്ന മോദിയുടെ ‘ജന്‍സാംപാര്‍ക്ക് കരിയാലെയുടെ (പബ്ലിക് റിലേഷന്‍സ് ഓഫീസ്)’ ചിത്രമെടുത്ത് ഒഎല്‍എക്‌സ് വെബ്‌സൈറ്റില്‍ വില്‍പ്പനക്ക് വച്ചിട്ടുണ്ടെന്നു പരസ്യം നല്‍കിയ നാലുപേരെയാണ് അറസ്റ്റു ചെയ്തതെന്ന് പൊലീസ് അറിയിച്ചു. ഏഴു കോടി രൂപയാണ് പ്രധാനമന്ത്രിയുടെ ഓഫീസിന് പരസ്യം നല്‍കിയവര്‍ വെബ്‌സൈറ്റില്‍ വിലയിട്ടത്.

കേസില്‍ ഉള്‍പ്പെട്ട നാല് പേരെ കസ്റ്റഡിയിലെടുത്തിട്ടുണ്ട്. ചിത്രമെടുത്ത് വെബ്‌സൈറ്റില്‍ ഇട്ട വ്യക്തിയും അക്കൂട്ടത്തിലുണ്ടെന്നും എസ്എസ്പി പറഞ്ഞു. പ്രതികളെ ചോദ്യം ചെയ്യുകയാണെന്നും കൂടുതല്‍ നടപടികള്‍ ഉടന്‍ ഉണ്ടാകുമെന്നും അദ്ദേഹം പറഞ്ഞു.

നാല് തവണ ഗുജറാത്ത് മുഖ്യമന്ത്രിയായിരുന്ന പ്രധാനമന്ത്രി മോദി 2014 ല്‍ വാരണാസിയില്‍ നിന്ന് ലോക്‌സഭയിലേക്ക് തിരഞ്ഞെടുക്കപ്പെട്ടു, തുടര്‍ന്ന് 2019 ല്‍ വീണ്ടും ഇതേ മണ്ഡലത്തില്‍ നിന്ന് പാര്‍ലമെന്റിലേക്കു തിരഞ്ഞെടുക്കപ്പെട്ടു.

കോവിഡ് പണി പറ്റിച്ചു! ഒരു വര്‍ഷത്തിനിടെ വിദേശയാത്ര നടത്താത്ത ആദ്യ പ്രധാനമന്ത്രിയായി മോദി

Test User — Wed, 25 Nov 2020 06:40:58 +0000

ന്യൂഡല്‍ഹി: വല്ലപ്പോഴും ഇന്ത്യയിലെത്തുന്ന പ്രധാനമന്ത്രി എന്നാണ് പ്രധാനമന്ത്രി നരേന്ദ്രമോദിയെ വിമര്‍ശകള്‍ പരിഹസിച്ചു വിളിച്ചിരുന്നത്. തുടര്‍ച്ചയായ വിദേശ യാത്ര മൂലമാണ് മോദിക്ക് അത്തരമൊരു പരിഹാസം ഏല്‍ക്കേണ്ടി വന്നിരുന്നത്. എന്നാല്‍ ഒരു വര്‍ഷത്തിനിടെ വിദേശയാത്ര നടത്താത്ത പ്രധാനമന്ത്രി എന്ന റെക്കോര്‍ഡും മോദി സ്വന്തമാക്കുകയാണ് ഇപ്പോള്‍.

കാരണം മറ്റൊന്നുമല്ല, കോവിഡ് മഹാമാരി തന്നെ. പ്രധാനമന്ത്രിയുടെ ഓഫീസിലെ വെബ്‌സൈറ്റ് പ്രകാരം 2020 വര്‍ഷത്തില്‍ നവംബര്‍ 22 വരെ മോദി ഒരു വിദേശയാത്ര പോലും നടത്തിയിട്ടില്ല. ഈ വര്‍ഷം ഇനി നടത്തുമെന്ന സൂചനയുമില്ല.

2019 നവംബറില്‍ ബ്രസീലിലേക്കായിരുന്നു മോദിയുടെ അവസാന സന്ദര്‍ശം. ഇപ്പോഴത്തെ സൂചനകള്‍ അനുസരിച്ച് അടുത്ത മാര്‍ച്ചില്‍ അമേരിക്ക അടക്കമുള്ള രാജ്യങ്ങളിലേയ്ക്കുള്ള സന്ദര്‍ശനമാകും പ്രധാനമന്ത്രിയുടെ അടുത്ത വിദേശയാത്ര. എയര്‍ ഇന്ത്യ വണ്‍ എന്ന പേരില്‍ തയാറായ പുതിയ വിമാനത്തിലായിരിക്കും പ്രധാനമന്ത്രിയുടെ ഇനിമുതലുള്ള വിദേശയാത്രകള്‍.

മോദിയുടെ നിരന്തരമായ വിദേശയാത്രകള്‍ നേരത്തെ വിമര്‍ശനങ്ങള്‍ക്ക് വിധേയമായിരുന്നു. 2014 ജൂണ്‍ 15 നും 2019 നവംബറിനും ഇടയില്‍ 96 വിദേശയാത്രകളാണ് പ്രധാനമന്ത്രി നടത്തിയത്. 2014 ല്‍ എട്ട് രാജ്യങ്ങള്‍ സന്ദര്‍ശിച്ച മോദി 2015 ല്‍ 23 ഉം 2016 ല്‍ 17 , 2017 ല്‍ 14 , 2018 ല്‍ 20 2019 ല്‍ 14 ഉം രാജ്യങ്ങള്‍ സന്ദര്‍ശിച്ചു.

2015 മുതല്‍ 58 രാഷ്ട്രങ്ങളാണ് 2015ന് ശേഷം മോദി സന്ദര്‍ശിച്ചത്. 517.82 കോടി രൂപയാണ് ഈ യാത്രകള്‍ക്ക് ചെലവായത് എന്ന് വിദേശകാര്യമന്ത്രാലയം പാര്‍ലമെന്റില്‍ വച്ച കണക്കുകള്‍ പറയുന്നു. യുഎസ്, ചൈന, റഷ്യ എന്നിവിടങ്ങളിലേക്കാണ് മോദി കൂടുതല്‍ സഞ്ചരിച്ചത്. അഞ്ചു തവണ വീതം.

പ്രധാനമന്ത്രിയുടെ ഓഫീസില്‍ തീപിടുത്തം

ചന്ദ്രിക വെബ് ഡെസ്‌ക്‌ — Tue, 17 Oct 2017 03:09:12 +0000

ന്യൂഡല്‍ഹി: ഡല്‍ഹി റായ്‌സിനാ ഹില്‍സിലെ പ്രധാനമന്ത്രിയുടെ ഓഫീസ് കെട്ടിടത്തില്‍ തീപിടുത്തം. സെക്രട്ടേറിയറ്റ് ബില്‍ഡിങ്ങിന്റെ സൗത്ത് ബ്ലോക്കില്‍ 242-ാം മുറിയിലാണ് ഇന്നു രാവിലെ അഗ്നിബാധയുണ്ടായത്. അഗ്നിശമന വിഭാഗം തക്കസമയത്ത് രംഗത്തെത്തിയതിനാല്‍ 20 മിനുട്ടിനുള്ളില്‍ തീയണക്കാന്‍ കഴിഞ്ഞു. ആളപായമില്ല.

കെട്ടിടത്തിന്റെ രണ്ടാം നിലയിലാണ് തീപിടിച്ച മുറി. ഷോര്‍ട്ട് സര്‍ക്യൂട്ട് ആണ് അപകട കാരണമന്ന് കരുതുന്നു. പത്ത് യൂണിറ്റ് അഗ്നിശമന സേനയാണ് തീയണക്കാന്‍ രംഗത്തെത്തിയത്.

പ്രധാനമന്ത്രിയുടെ ഓഫീസിനു പുറമെ പ്രതിരോധ, വിദേശകാര്യ മന്ത്രാലയങ്ങളും ദേശീയ സുരക്ഷാ ഉപദേഷ്ടാവിന്റെ ഓഫീസും കാബിനറ്റ് സെക്രട്ടറി, വിദേശകാര്യ സെക്രട്ടറി എന്നിവരുടെ ഓഫീസുകളും സൗത്ത് ബ്ലോക്കിലാണ്. കഴിഞ്ഞ വര്‍ഷം പ്രധാനമന്ത്രിയുടെ ഓഫീസിന്റെ താഴത്തെ നിലയിലെ കോണ്‍ഫറന്‍സ് റൂമില്‍ ഇന്നത്തേതിനു സമാനമായ അഗ്നിബാധയുണ്ടായിരുന്നു.

മെട്രോ രണ്ടാംഘട്ട അനുമതി വേണം; എയിംസ് അനുവദിക്കണം മുഖ്യമന്ത്രി പ്രധാനമന്ത്രിക്ക് നിവേദനം നല്‍കി

chandrika — Sat, 17 Jun 2017 18:33:49 +0000

കേരളത്തിന് എയിംസ് അടക്കമുള്ളവ അനുവദിക്കണമെന്നു കാട്ടി നല്‍കിയ നിവേദനത്തില്‍ അനുഭാവപൂര്‍ണമായ നടപടിയുണ്ടാകുമെന്ന് പ്രധാനമന്ത്രി ഉറപ്പുനല്‍കിയതായി മുഖ്യമന്ത്രിയുടെ ഓഫീസ് അറിയിച്ചു. 19 പ്രധാന ആവശ്യങ്ങളാണ് മുഖ്യമന്ത്രി പിണറായി വിജയന്‍ നല്‍കിയ നിവേദത്തിലുണ്ടായിരുന്നത്. എയിംസ് അനുവദിക്കണമെന്ന ആവശ്യം ആവര്‍ത്തിച്ച മുഖ്യമന്ത്രി, ഇതിനായി കോഴിക്കോട് ജില്ലയില്‍ 200 ഏക്കര്‍ സ്ഥലം കണ്ടെത്തിയിട്ടുണ്ടെന്നും അറിയിച്ചു.
കൊച്ചി മെട്രോ രണ്ടാം ഘട്ടം 2,577 കോടി രൂപ ചെലവ് വരുന്ന ഈ പദ്ധതി നഗരവികസന മന്ത്രാലയത്തിന്റെ പരിഗണനയിലാണെന്നും തിരുവനന്തപുരം, കോഴിക്കോട് ലൈറ്റ് മെട്രോ 2015ല്‍ നഗരവികസന മന്ത്രാലയത്തിന് സമര്‍പ്പിച്ചതാണെന്നും മുഖ്യമന്ത്രി പ്രധാനമന്ത്രിയെ ഓര്‍മിപ്പിച്ചു. അന്താരാഷ്ട്ര ആയുര്‍വേദ ഇന്‍സ്റ്റിറ്റിയൂട്ട് ആരംഭിക്കാന്‍ സാമ്പത്തിക സഹായത്തിന് വേണ്ടി ഈ പദ്ധതി സമര്‍പ്പിച്ചിട്ടുള്ള കാര്യം പ്രധാനമന്ത്രിയെ ഓര്‍മിപ്പിച്ച മുഖ്യമന്ത്രി ഇതിന് വേഗത്തില്‍ അംഗീകാരം ലഭിക്കാന്‍ ഇടപെടണമെന്ന് ആവശ്യപ്പെട്ടു. ചെന്നൈ- ബംഗ്‌ലുരു വ്യവസായ ഇടനാഴി കോയമ്പത്തൂര്‍ വഴി കൊച്ചിയിലേക്ക് നീട്ടണം. ഫാക്ടില്‍ പ്രകൃതിവാതകം അടിസ്ഥാനമാക്കിയുള്ള യൂറിയ പ്ലാന്റിന് വളം മന്ത്രാലയം ഫാക്ടിന്റെ 600 ഏക്കര്‍ സ്ഥലം 1200 കോടി രൂപ വിലക്ക് കേരളത്തിന് നല്‍കാമെന്ന് സമ്മതിച്ചിട്ടുണ്ട്. എട്ടു ലക്ഷം ടണ്‍ ശേഷിയുള്ള പ്ലാന്റ് സ്ഥാപിക്കാനാണ് ഉദ്ദേശിക്കുന്നത്. പദ്ധതിക്ക് വളം മന്ത്രാലയത്തിന്റെ ഫണ്ട് ലഭിക്കണം.
ഫാക്ടിന്റെ ഉപയോഗിക്കപ്പെടാതെ കിടക്കുന്ന ഭൂമിയില്‍ കൊച്ചിയില്‍ പെട്രോ കെമിക്കല്‍ കോംപ്ലക്‌സ് സ്ഥാപിക്കാനുള്ള പദ്ധതിക്ക് വേഗം അംഗീകാരം ലഭിക്കണം. ഇന്‍സ്ട്രുമെന്റേഷന്‍ ലിമിറ്റഡ് ഏറ്റെടുക്കാന്‍ കേരളം തയാറാണെന്നും മറ്റുള്ള പൊതുമേഖലാ സ്ഥാപനങ്ങള്‍ സ്വകാര്യവല്‍ക്കരിക്കരുത്. കൊച്ചി സ്‌പെഷ്യല്‍ ഇക്കണോമിക് സോണ്‍ വികസിപ്പിക്കണമെന്നും മുഖ്യമന്ത്രി നിവേദത്തില്‍ ആവശ്യപ്പെട്ടു.