ഗവാസ്‌കറെ മര്‍ദ്ദിച്ച കേസില്‍ നിലവില്‍ എഡിജിപിയുടെ മകള്‍ക്കെതിരെ ചുമത്തിയിരിക്കുന്ന വകുപ്പും ലഭിച്ചിരിക്കുന്ന തെളിവുകളും പ്രകാരം പരമാവധി 4 വര്‍ഷം വരെ ശിക്ഷ ലഭിക്കുകയുള്ളു. ഏഴ് വര്‍ഷത്തില്‍ താഴെ ശിക്ഷ കിട്ടുന്ന കേസുകളില്‍ സ്ത്രീകളുടെ അറസ്റ്റ് നിര്‍ബന്ധമില്ലെന്ന് നിയമമുണ്ടെന്നാണ് പൊലീസിന്റെ വാദം. അതിനാല്‍ കേസില്‍ ശാസ്ത്രീയ തെളിവുകള്‍ കൂടി ശേഖരിച്ചശേഷം പ്രതി ചേര്‍ത്ത് കോടതിയില്‍ റിപ്പോര്‍ട്ട് നല്‍കിയാല്‍ മതിയെന്നുമായിരുന്നു പൊലീസിന്റെ തീരുമാനം. എന്നാല്‍ അതിന് തിരിച്ചടി നേരിട്ടിരിക്കുകയാണിപ്പോള്‍.

ഗവാസ്‌കറിന്റെ ഹര്‍ജി പരിഗണിക്കുന്നത് ഹൈക്കോടതി 19 ലേക്ക് മാറ്റിയതോടെ അന്വേഷണത്തിന് കൂടുതല്‍ സമയം ലഭിച്ചെന്ന് കാട്ടി എഡിജിപിയുടെ മകളുടെ അറസ്റ്റ് വൈകിപ്പിക്കാനായിരുന്നു അന്വേഷണ ഉദ്യോഗസ്ഥരുടെ പദ്ധതി. മാത്രവുമല്ല എ.ഡി.ജി.പിയുടെ മകള്‍ ഗവാസ്‌കറിനെതിരെ മോശമായി പൊരുമാറി എന്നാരോപിച്ച് നല്‍കിയ പരാതി വ്യാജമല്ലെന്ന് സ്ഥിരീകരിക്കാന്‍ കൂടുതല്‍ തെളിവുകള്‍ ലഭിക്കുമോയെന്ന് അന്വേഷിച്ചുവരികയായിരുന്നു പൊലീസ്. ഇതിനായി ഗവാസ്‌കറുമായുള്ള തര്‍ക്കത്തിന് ശേഷം സുദേഷ്‌കുമാറിന്റെ മകളും ഭാര്യയും കയറിയ ഓട്ടോക്കാരന്റെ മൊഴിയെടുക്കാനുള്ള ശ്രമത്തിലാണ് പൊലീസ്.

പെരുമാറ്റ മോശത്തിന് ഗവാസ്‌കറിനെതിരെ അച്ഛനോട് പരാതി പറഞ്ഞിരുന്നെന്നും ഇത് അച്ഛന്‍ ചോദ്യം ചെയ്തതിലുള്ള വൈരാഗ്യമാണ് ഗവാസ്‌കറിന്റെ പരാതിക്കു പിന്നിലെന്ന് സ്‌നിഗ്ധ ജാമ്യാപേക്ഷയില്‍ പറഞ്ഞു. സംഭവ ദിവസം പ്രഭാത നടത്തത്തിനുശേഷം മടങ്ങിയെത്തിയ തന്റെ കൈയ്ക്കു കയറി ഗവാസ്‌കര്‍ പിടിച്ചുവെന്നും പിന്നിട് കാര്‍ ഇടിപ്പിക്കാന്‍ ശ്രമിച്ചുവെന്നും ചൂണ്ടിക്കാട്ടിയാണ് സ്‌നിഗ്ധ ജാമ്യാപേക്ഷ നല്‍കിയത്. ജൂണ്‍ 11നാണ് ഗവാസ്‌കറുടെ പെരുമാറ്റം മോശമാണെന്ന് അച്ഛനോട് പറഞ്ഞത്. ഇതേത്തുടര്‍ന്നു ജോലിക്കു വരരുതെന്ന് അച്ഛന്‍ നിര്‍ദ്ദേശിച്ചിരുന്നു. എന്നാല്‍ ജൂണ്‍ 13ന് ഗവാസ്‌കര്‍ വീണ്ടും വരികയായിരുന്നെന്നും ജാമ്യപേക്ഷയില്‍ പറയുന്നുണ്ട്.

നിലവില്‍ ഗവാസ്‌കറിന്റേയും സ്‌നിഗ്ധയുടേയും പരാതി ക്രൈംബ്രാഞ്ച് അന്വേഷിച്ചു വരികയാണ്. എഡിജിപി സുധേഷിന്റെ മകള്‍ സ്‌നിഗ്ധ മര്‍ദ്ദിച്ചുവെന്നാണ് ഗവാസ്‌കറുടെ പരാതി. കനകക്കുന്നില്‍ പ്രഭാത നടത്തം കഴിഞ്ഞെത്തിയ, സ്‌നിഗ്ധ പാര്‍ക്കിലെ പൊതുപാര്‍ക്കിങ് സ്ഥലത്തു വച്ച് മര്‍ദ്ദിച്ചെന്നും തലയ്ക്ക് പിന്നിലിടിച്ച് കൊല്ലാന്‍ ശ്രമിച്ചെന്നുമാണ് ഗവാസ്‌കര്‍ മ്യൂസിയം പൊലീസില്‍ നല്‍കിയ പരാതിയില്‍ പറയുന്നത്.

സ്ത്രീത്വത്തെ അപമാനിക്കല്‍, അസഭ്യം പറയല്‍ എന്നീ കുറ്റങ്ങള്‍ ചുമത്തിയാണ് സ്‌നിഗ്ധയുടെ പരാതിയില്‍ ഗവാസ്‌കറിനെതിരെ ജാമ്യമില്ലാ വകുപ്പ് പ്രകാരം മ്യൂസിയം പൊലീസ് കേസെടുത്തത്.