postal vote – Chandrika Daily

മുതിര്‍ന്ന പൗരന്മാര്‍ക്കുള്ള തപാല്‍ വോട്ട് ഇനി 85 വയസ്സിന് മുകളിലുള്ളവര്‍ക്ക്

webdesk13 — Sat, 02 Mar 2024 10:36:20 +0000

തിരുവനന്തപുരം: തിരഞ്ഞെടുപ്പില്‍ 80 വയസ്സിന് മുകളില്‍ പ്രായമുള്ളവര്‍ക്ക് നല്‍കിയിരുന്ന തപാല്‍ വോട്ട് സൗകര്യം 85 വയസ്സിന് മുകളിലുള്ളവര്‍ക്കായി ഭേദഗതി വരുത്തി. വോട്ടര്‍ പട്ടികയില്‍ പേരുള്ള 85 വയസ്സിനു മുകളില്‍ പ്രായമുള്ളവര്‍ക്ക് ഈ സൗകര്യം ഉപയോഗിക്കാമെന്ന് ചീഫ് ഇലക്ടറല്‍ ഓഫീസര്‍ സഞ്ജയ് കൗള്‍ പറഞ്ഞു. പ്രായാധിക്യം കൊണ്ടുള്ള ബുദ്ധിമുട്ടുള്ളവര്‍ക്ക് പോളിംഗ് കേന്ദ്രത്തില്‍ പോകാതെ തന്നെ വോട്ട് ചെയ്യുന്നതിനുള്ള അവസരമാണ് ഇതിലൂടെ ഒരുക്കുന്നത്.

ദേശീയ ഇലക്ഷന്‍ കമ്മീഷന്റെ അഭിപ്രായം തേടിയ ശേഷം കേന്ദ്ര നിയമ മന്ത്രാലയമാണ് ഇത് സംബന്ധിച്ച ഉത്തരവ് പുറത്തിറക്കിയത്. ഇത്തരത്തില്‍ വോട്ട് ചെയ്യേണ്ടവര്‍ ബന്ധപ്പെട്ട നിയോജകമണ്ഡലത്തിലെ വരണാധികാരിക്ക് നിശ്ചിത ഫോമില്‍ (ഫോം 12 ഡി) തിരഞ്ഞെടുപ്പ് വിജ്ഞാപനം വന്ന് അഞ്ചുദിവസത്തിനകം അപേക്ഷ നല്‍കണം.

ബൂത്ത് ലെവല്‍ ഓഫീസര്‍മാരില്‍ നിന്ന് അപേക്ഷാഫോം വാങ്ങി പൂരിപ്പിച്ച് നല്‍കാം. അപേക്ഷകള്‍ പരിശോധിച്ചു വോട്ട് ചെയ്യുന്നവരുടെ പട്ടിക വരണാധികാരി തയ്യാറാക്കും. പോളിംഗ് ഉദ്യോഗസ്ഥര്‍ ഇവരെ സന്ദര്‍ശിച്ച് പോസ്റ്റല്‍ ബാലറ്റ് നല്‍കും. വോട്ട് രേഖപ്പെടുത്തി നല്‍കുന്ന ബാലറ്റ് കൈപ്പറ്റി അധികൃതര്‍ക്ക് നല്‍കും.

ഇത്തവണ കൂടുതല്‍ വിഭാഗങ്ങള്‍ക്ക് പോസ്റ്റല്‍ വോട്ട് സൗകര്യം; ആര്‍ക്കൊക്കെ എന്നറിയാം

web desk 1 — Sat, 27 Feb 2021 12:19:00 +0000

തിരുവനന്തപുരം: ഇത്തവണ തെരഞ്ഞെടുപ്പില്‍ കൂടുതല്‍ വിഭാഗങ്ങള്‍ക്ക് പോസ്റ്റല്‍ വോട്ട് സൗകര്യം ഏര്‍പ്പെടുത്തി. അത്യാവശ്യ സേവന വിഭാഗത്തില്‍ പെടുന്ന ആരോഗ്യം, പൊലീസ്, ഫയര്‍ഫോഴ്സ്, ജയില്‍, എക്സൈസ്, മില്‍മ, വൈദ്യുതി വകുപ്പ്, വാട്ടര്‍ അതോറിറ്റി, കെ.എസ്.ആര്‍.ടി.സി, വനംവകുപ്പ്, ട്രഷറി, അംഗീകൃത മാധ്യമ സ്ഥാപനങ്ങള്‍, ആംബുലന്‍സ്, റെയില്‍വേ, എ.ഐ.ആര്‍, ദൂരദര്‍ശന്‍ എന്നിവയില്‍ ജോലി ചെയ്യുന്നവര്‍ക്കും ഇത്തവണ പോസ്റ്റല്‍ ബാലറ്റ് സൗകര്യം ലഭിക്കും. ഇതിനായി 12ഡി ഫോം പൂരിപ്പിച്ച് നല്‍കണമെന്ന് മുഖ്യ തിരഞ്ഞെടുപ്പ് ഓഫിസര്‍ ടീക്കാറാം മീണ പറഞ്ഞു.

80 വയസു കഴിഞ്ഞവര്‍ക്കു പുറമേ ഭിന്നശേഷിക്കാര്‍ക്കും കൊവിഡ് ബാധിതര്‍ക്കും പ്രാഥമിക സമ്പര്‍ക്ക പട്ടികയിലുള്ളവര്‍ക്കും തപാല്‍ വോട്ട് അനുവദിക്കും. ഇവരുടെ പട്ടിക തയാറാക്കി കമ്മിഷന്‍ നേരിട്ട് അപേക്ഷ വീട്ടിലെത്തിക്കും. നാമനിര്‍ദേശ പത്രിക പിന്‍വലിച്ച് മൂന്നു ദിവസത്തിനുശേഷം തപാല്‍ ബാലറ്റ് വിതരണം ചെയ്യും. തപാല്‍ ബാലറ്റുകളുടെ അച്ചടി ജില്ലാതലത്തില്‍ ആരംഭിച്ചു. തപാല്‍ ബാലറ്റിനു അപേക്ഷിക്കുന്നവരുടെ വിവരം സ്ഥാനാര്‍ത്ഥികള്‍ക്കും കൈമാറും.

രണ്ടു പോളിങ് ഓഫിസര്‍, സെക്യൂരിറ്റി, വിഡിയോഗ്രാഫര്‍ എന്നിവരുള്‍പ്പെടുന്ന സംഘം വീട്ടിലെത്തി തപാല്‍ ബാലറ്റ് കൈമാറും. നടപടികള്‍ വിഡിയോയില്‍ പകര്‍ത്തും. പോസ്റ്റല്‍ ബാലറ്റുമായി ഉദ്യോഗസ്ഥര്‍ എത്തുന്ന വിവരം വോട്ടറെയും സ്ഥാനാര്‍ത്ഥിയെയും മുന്‍കൂട്ടി അറിയിക്കും. സ്ഥാനാര്‍ഥിക്കു വീടിനുള്ളില്‍ കയറാന്‍ കഴിയില്ല. വോട്ട് ചെയ്യിപ്പിച്ച് കവര്‍ സീല് ചെയ്ത് തപാല്‍ വോട്ടുകള്‍ക്ക് ചുമതലപ്പെടുത്തിയിരിക്കുന്ന അസി.റിട്ടേണിങ് ഓഫിസര്‍ക്ക് നല്‍കണം. പോസ്റ്റല്‍ ബാലറ്റുകളുടെ ക്രമീകരണത്തിനായി ഒരു അഡീഷണല്‍ എ.ആര്‍.ഒയെ വീതം നിയമിക്കും.

പോലീസിലെ പോസ്റ്റല്‍ വോട്ട് വിവാദം; ക്രമക്കേട് നടന്നതായി ഇന്റലിജന്‍സ്

Test User — Mon, 06 May 2019 04:07:05 +0000

പൊലീസ് അസോസിയേഷന്‍ പോസ്റ്റല്‍ വോട്ടില്‍ ഇടപെട്ടതിലെ ക്രമക്കേട് സ്ഥിരീകരിച്ച് ഇന്റലിജന്‍സ് മേധാവി ഡിജിപിക്ക് റിപ്പോര്‍ട്ട് നല്‍കി. വോട്ട് ചെയ്യുന്നതിനു മുന്‍പും ശേഷവും പൊലീസ് അസോസിയേഷന്‍ ഇടപെട്ടു. ബാലറ്റ് ശേഖരിക്കാന്‍ ശ്രമിച്ച പൊലീസുകാര്‍ക്കെതിരെ നടപടിക്കും ശുപാര്‍ശ. ഭീഷണി മൂലം പലരും മൊഴി നല്‍കുന്നില്ലെന്നും വിഷയത്തില്‍ സമഗ്രമായ അന്വേഷണം വേണമെന്നും റിപ്പോര്‍ട്ടില്‍ പറയുന്നു.
പൊലീസ് അസോസിയേഷന്‍ നേതാക്കള്‍ ഇടപെട്ട് പോലീസുകാരുടെ പോസ്റ്റല്‍ ബാലറ്റുകള്‍ കൂട്ടത്തോടെ ശേഖരിച്ച് കള്ളവോട്ടാക്കുന്നതായി കഴിഞ്ഞ ദിവസമാണ് ആരോപണമുയര്‍ന്നത്. പോസ്റ്റല്‍ ബാലറ്റുകള്‍ പോലീസ് അസോസിയേഷന്‍ നേതാക്കള്‍ക്ക് നല്‍കാന്‍ നിര്‍ദേശം നല്‍കുന്നതായും വിരമിച്ച പോലീസ് ഉദ്യോഗസ്ഥരാണ് ഇതിന് നേതൃത്വം നല്‍കുന്നതെന്നുമായിരുന്നു ആരോപണം. സ്ഥലംമാറ്റുമെന്ന് ഭീഷണിപ്പെടുത്തി പോലീസുകാരില്‍ നിന്നും പോസ്റ്റല്‍ ബാലറ്റുകള്‍ അസോസിയേഷന്‍ നേതാക്കള്‍ ശേഖരിച്ച് വോട്ടു ചെയ്യുകയാണെന്നും ആരോപണം ഉയര്‍ന്നിരുന്നു.ഇതു സംബന്ധിച്ച് തിരുവനന്തപുരത്തെ പോലീസുകാരുടെ വാട്‌സ് ആപ്പ് ഗ്രൂപ്പില്‍ നടന്നതെന്നു കരുതുന്ന സംഭാഷണവും പുറത്തുവന്നിരുന്നു. പൊലീസ് അസോസിയേഷന്റെ എല്ലാ പ്രസ്താവനകളും തള്ളുന്നതാണ് നിലവിലെ ഇന്റലിജന്‍സ് റിപ്പോര്‍ട്ട്.