2008ല്‍ നടന്ന സ്‌ഫോടനക്കേസില്‍ 17 വര്‍ഷത്തിനിടെ ഇത് അഞ്ചാം തവണയാണ് ജഡ്ജിമാരെ സ്ഥലംമാറ്റുന്നത്. ബോംബെ ഹൈക്കോടതി രജിസ്ട്രാര്‍ ജനറലാണ് ലാഹോട്ടിയടക്കമുള്ള ജഡ്ജിമാരെ സ്ഥലംമാറ്റി ഉത്തരവിട്ടത്. സ്ഥലംമാറ്റം വേനല്‍ക്കാല അവധിക്ക് ശേഷം ജൂണ്‍ ഒമ്പതിന് കോടതികള്‍ വീണ്ടും തുറക്കുമ്പോള്‍ പ്രാബല്യത്തില്‍ വരും.

ബിജെപി എംപി പ്രഗ്യാസിങ് ഠാക്കൂര്‍, ലെഫറ്റനന്റ് കേണല്‍ പ്രസാദ് പുരോഹിത്, റിട്ട. മേജര്‍ രമേശ് ഉപാധായ്, അജയ് രഹിര്‍കാര്‍, സുധാകര്‍ ദ്വിവേദി, സമീര്‍ കുല്‍ക്കര്‍ണി എന്നിവരാണ് കേസിലെ പ്രതികള്‍. ഇവര്‍ക്കെതിരെ യുഎപിഎ, ഐപിസി വകുപ്പുകള്‍ പ്രകാരം കുറ്റപത്രം സമര്‍പ്പിച്ചിട്ടുണ്ട്.

ജഡ്ജിയെ സ്ഥലംമാറ്റിയത് നീതിയെ കൂടുതല്‍ വൈകിപ്പിക്കുമെന്ന് സ്‌ഫോടനത്തിന്റെ ഇരകള്‍ പറയുന്നു. ‘ഹൈക്കോടതിയില്‍ അപേക്ഷ സമര്‍പ്പിക്കാനൊരുങ്ങുകയാണ് ഞങ്ങള്‍. വിധി പറയുംവരെ ജഡ്ജിയുടെ കാലാവധി നീട്ടണമെന്നാവശ്യപ്പെട്ട് നേരത്തെ ചീഫ് ജസ്റ്റിസിന് കത്ത് നല്‍കിയിരുന്നു’- ഇരകളുടെ അഭിഭാഷകന്‍ ഷാഹിദ് നദീം പറഞ്ഞു.

ശനിയാഴ്ച നടന്ന അവസാന വാദം കേള്‍ക്കലില്‍, ഏപ്രില്‍ 15നകം ബാക്കി വാദങ്ങള്‍ പൂര്‍ത്തിയാക്കാന്‍ ജഡ്ജി ലഹോട്ടി പ്രോസിക്യൂഷനോടും പ്രതിഭാഗത്തോടും നിര്‍ദേശിച്ചിരുന്നു. അടുത്ത ദിവസം വിധി പറയാന്‍ കേസ് മാറ്റിവയ്ക്കുമെന്ന് പ്രതീക്ഷിച്ചിരുന്നതായി പ്രതിഭാഗം അഭിഭാഷകരിലൊരാള്‍ പറഞ്ഞു.

2008 സെപ്തംബര്‍ 29നാണ് വടക്കന്‍ മഹാരാഷ്ട്രയിലെ നാസിക് ജില്ലയിലെ മലേഗാവിലെ ഒരു പള്ളിക്ക് സമീപം മോട്ടോര്‍ സൈക്കിളില്‍ കെട്ടിയിരുന്ന സ്‌ഫോടകവസ്തു പൊട്ടിത്തെറിച്ചത്. സംഭവത്തില്‍ ആറ് പേര്‍ കൊല്ലപ്പെടുകയും നൂറിലധികം പേര്‍ക്ക് പരിക്കേല്‍ക്കുകയും ചെയ്തു. വിചാരണയ്ക്കിടെ പ്രോസിക്യൂഷന്‍ 323 സാക്ഷികളെയും പ്രതിഭാഗം എട്ട് പേരെയും വിസ്തരിച്ചു. 2011ല്‍ എന്‍ഐഎയ്ക്ക് കൈമാറുംമുമ്പ് മഹാരാഷ്ട്ര തീവ്രവാദ വിരുദ്ധ സ്‌ക്വാഡാണ് കേസ് അന്വേഷിച്ചിരുന്നത്.

മുംബൈ: കോടതിയില്‍ അഭിഭാഷകര്‍ക്കെതിരെ പൊട്ടിത്തെറിച്ച് മലേഗാവ് സ്‌ഫോടനക്കേസിലെ പ്രധാന പ്രതിയും ഭോപ്പാലില്‍ നിന്നുള്ള എം.പിയുമായ പ്രഗ്യ സിങ്. കോടതി മുറിക്കകത്ത് ഇരിക്കാന്‍ വൃത്തിയുള്ള കസേര ആവശ്യപ്പെട്ടാണ് അഭിഭാഷകരോട് തട്ടിക്കയറിയത്. കുറ്റാരോപിതര്‍ക്ക് പ്രത്യേക സൗകര്യങ്ങള്‍ ഒരുക്കുന്ന രീതിയില്ലെന്ന് അഭിഭാഷകനും മറുപടി നല്‍കി. മുംബൈയിലെ പ്രത്യേക എന്‍.ഐ.എ കോടതിയിലായിരുന്നു നാടകീയ രംഗങ്ങള്‍.

പൊടിപിടിച്ച് വൃത്തിയില്ലാതെ വീഴാറായ കസേരയാണോ എം.പിയായ എനിക്ക് നിങ്ങള്‍ തന്നത് എന്നാണ് പ്രഗ്യ ആക്രോശിച്ചത്. ജഡ്ജിയോടും ഇതേ ആവശ്യം ഉന്നയിച്ചു. എന്നാല്‍ കുറ്റാരോപിതര്‍ക്ക് പ്രത്യേക സൗകര്യങ്ങള്‍ ഒരുക്കാറില്ലെന്ന് എന്‍.ഐ.എ അഭിഭാഷകനും പ്രതികരിച്ചു.

മലേഗാവ് സ്‌ഫോടനക്കേസില്‍ പ്രതിചേര്‍ക്കപ്പെട്ട കുറ്റവാളിയാണ് പ്രഗ്യ സിങ്. കേസിന്റെ നടപടിക്രമങ്ങള്‍ക്കു വേണ്ടി മുമ്പ് രണ്ട് തവണ കോടതിയില്‍ ഹാജരാകാന്‍ ആവശ്യപ്പെട്ടെങ്കിലും വരാന്‍ കഴിയില്ലെന്ന് അറിയിക്കുകയായിരുന്നു. തുടര്‍ന്ന് ഇനിയും ഹാജരായില്ലെങ്കില്‍ കനത്ത പ്രത്യാഘാതം നേരിടേണ്ടി വരുമെന്ന് അറിയിച്ചതിനെ തുടര്‍ന്നാണ് കോടതിയില്‍ ഹാജരായത്. കോടതി ചോദിച്ച ചോദ്യങ്ങള്‍ക്കെല്ലാം അറിയില്ലെന്നാണ് പ്രഗ്യ മറുപടി നല്‍കിയത്.

അതേസമയം, ഉയര്‍ന്ന രക്തസമ്മര്‍ദ്ദത്തെ തുടര്‍ന്ന് പ്രഗ്യസിങ്ങിന് കോടതിയില്‍ ഹാജരാവാന്‍ കഴിയില്ലെന്ന് കോടതിയില്‍ അറിയിച്ചിരുന്നു. ഉദരസംബന്ധമായ അസുഖത്തെ തുടര്‍ന്ന് പ്രഗ്യാസിങ്ങിനെ ആസ്പത്രിയില്‍ പ്രവേശിപ്പിച്ചിരുന്നെങ്കിലും ഇന്നലെ രാത്രി ഡിസ്ചാര്‍ജ്ജ് ചെയ്യുകയായിരുന്നു. എന്നാല്‍ ഇതൊന്നും കണക്കിലെടുക്കാതെ കോടതി നിര്‍ബന്ധമായും ഹാജരാവണമെന്ന് ആവശ്യപ്പെടുകയായിരുന്നു.

ആഴ്ച്ചയിലൊരിക്കല്‍ കോടതിയില്‍ ഹാജരാകണമെന്ന് എന്‍.ഐ.എ കോടതിയുടെ നിര്‍ദ്ദേശമുണ്ട്. പ്രത്യേക കോടതി ജഡ്ജി വി.എസ് പദാല്‍ക്കറാണ് ഈ നിര്‍ദ്ദേശം നല്‍കിയത്. ലഫ്.കേണല്‍ പ്രസാദ് പുരോഹിതിനേയും സുധാകര്‍ ചതുര്‍വേദിയേയും ഒരാഴ്ച്ചത്തേക്ക് കോടതി ഒഴിവാക്കിയിരുന്നു. കേസിലിപ്പോള്‍ സാക്ഷികളുടെ മൊഴികള്‍ രേഖപ്പെടുത്തിക്കൊണ്ടിരിക്കുകയാണ് കോടതി. 2008-ല്‍ മാലേഗാവില്‍ പള്ളിക്കുസമീപമുണ്ടായ ബോംബുസ്‌ഫോടനത്തില്‍ ആറുപേര്‍ മരിക്കുകയും 100 പേര്‍ക്ക് പരിക്കേല്‍ക്കുകയും ചെയ്തിരുന്നു.

മധ്യപ്രദേശിലെ ഭോപ്പാലില്‍ നിന്ന് മത്സരിച്ചാണ് പ്രഗ്യസിങ് താക്കൂര്‍ ലോക്‌സഭയിലെത്തിയത്. കോണ്‍ഗ്രസ് സ്ഥാനാര്‍ത്ഥിയായിരുന്ന ദ്വിഗ് വിജയ് സിങ്ങിനെ പ്രഗ്യസിങ് പരാജയപ്പെടുത്തുകയായിരുന്നു.

സുനിൽ ജോഷി കൊലപാതക കേസിലെ അന്വേഷണം തൃപ്തികരമായിരുന്നില്ലെന്നും 2017-ൽ പ്രഗ്യയെയും കൂട്ടാളികളെയും വെറുതെ വിട്ടതിനു പിന്നിൽ കേന്ദ്ര സർക്കാറിന്റെ സമ്മർദമാണെന്നും ചൂണ്ടിക്കാട്ടിയാണ് മധ്യപ്രദേശിലെ കമൽനാഥ് സർക്കാർ പുനരന്വേഷണം നടത്തുന്നത്. സുനിൽ ജോഷിയുടെ വധത്തിൽ പ്രഗ്യക്ക് പങ്കുണ്ടെന്നും കേസ് പുനരന്വേഷണം നടത്തുന്നതിന് ഹൈക്കോടതിയിൽ അപ്പീൽ പോകുമെന്നും മധ്യപ്രദേശ് നിയമമന്ത്രി പി.സി ശർമ പറഞ്ഞു.

2008-ലെ മലേഗാവ് ഭീകരാക്രമണ കേസിലെ പ്രതിയായ പ്രഗ്യാ സിങിന് ഈയിടെയാണ് ജാമ്യം ലഭിച്ചത്. ഭീകരകേസിലെ പ്രതിയായ ഇവരെ സ്ഥാനാർത്ഥിയാക്കാനുള്ള ബി.ജെ.പിയുടെ തീരുമാനത്തിനെതിരെ പ്രതിഷേധമുയർന്നിരുന്നു. മഹാത്മാ ഗാന്ധിയെ കൊലപ്പെടുത്തിയ നാഥുറാം ഗോഡ്‌സെ ദേശഭക്തനായിരുന്നു എന്ന പ്രഗ്യാ സിങിന്റെ പ്രസ്താവന വിവാദമായി. സമ്മർദത്തെ തുടർന്ന് പ്രധാനമന്ത്രി നരേന്ദ്ര മോദി പ്രഗ്യയെ തള്ളിപ്പറഞ്ഞു. എന്നാൽ, ഭോപ്പാലിൽ കോൺഗ്രസ് നേതാവ് ദിഗ്വിജയ് സിങിനെതിരെ മത്സരിക്കുന്ന പ്രഗ്യയെ പാർട്ടിയിൽ നിന്നു പുറത്താക്കാനോ സ്ഥാനാർത്ഥിത്വം റദ്ദാക്കാനോ ബി.ജെ.പി തയ്യാറായില്ല.

സംഝോത എക്‌സ്പ്രസ് സ്‌ഫോടനമടക്കം, രാജ്യത്തെ ഹിന്ദുത്വ ഭീകരത വെളിച്ചത്തു കൊണ്ടുവന്ന മഹാരാഷ്ട്ര ഭീകര വിരുദ്ധ സ്‌ക്വാഡ് തലവൻ ഹേമന്ദ് കർക്കറെയുടെ മരണം തന്റെ ശാപം കാരണമാണെന്ന് പ്രഗ്യാ സിങ് അവകാശപ്പെട്ടിരുന്നു.

‘പ്രഗ്യാ സിങിനെ സാധ്വി (സന്യാസിനി) എന്നു വിളിക്കാൻ ഞാൻ തയ്യാറല്ല. മഹാത്മാഗാന്ധിയുടെ ഘാതകനെ ദേശഭക്തൻ എന്നും രക്തസാക്ഷിയായ ഹേമന്ദ് കർക്കറെയെ രാജ്യദ്രോഹിയെന്നുമാണ് അവർ വിളിച്ചത്. സുനിൽ ജോഷിയുടെ വധത്തിൽ അവർക്കു പങ്കുണ്ടെന്നാണ് ഇതിലൂടെ വ്യക്തമാകുന്നത്.’ – പി.സി ശർമ പറഞ്ഞു.