Prakash Karatt – Chandrika Daily

കാരാട്ടിന്റെ ബി.ജെ.പി അനുകൂല പരാമര്‍ശത്തില്‍ വിശദീകരണം തേടി

chandrika — Sun, 12 May 2019 17:17:43 +0000

പശ്ചിമ ബംഗാളില്‍ ബി.ജെ.പിക്ക് അനുകൂലമായ പ്രസ്താവമയുമായി രംഗത്തെത്തിയ സി.പി.എം മുന്‍ ജനറല്‍ സെക്രട്ടറി പ്രകാശ് കാരാട്ടിനോട് വിശദീകരണം തേടി പാര്‍ട്ടി. ബംഗാളില്‍ ബി.ജെ.പി നേട്ടമുണ്ടാക്കുമെന്നായിരുന്നു കാരാട്ടിന്റെ പ്രസ്താവന. തെരഞ്ഞെടുപ്പ് പ്രചാരണത്തിനിടെ ഒരു സ്വകാര്യ വാര്‍ത്താ ചാനലിന് നല്‍കിയ അഭിമുഖത്തിലാണ് വിവാദ പരാമര്‍ശമുണ്ടായത്.

വിഷയത്തില്‍ ബംഗാള്‍ ഘടകവും ജനറല്‍ സെക്രട്ടറി സീതാറാം യെച്ചൂരിം അസംതൃപ്തി പ്രകടിപ്പിച്ചിരുന്നു. ഇതിന് പിന്നാലെയാണ് പാര്‍ട്ടി കാരാട്ടില്‍ നിന്നും വിശദീകരണം തേടിയത്. വിവാദ പരാമര്‍ശത്തില്‍ കാരാട്ട് വിശദീകരണം നല്‍കിയതായി സി.പി.എം ബംഗാള്‍ നേതൃത്വം അറിയിച്ചു. ബി.ജെ.പിയും മമതയും ഒത്തുകളിച്ചെന്നാണ് പരാമര്‍ശത്തിലൂടെ ഇദ്ദേശിച്ചതെന്ന് കാരാട്ട് വിശദീകരിച്ചതായും അദ്ദേഹം പറഞ്ഞു.

അതേസമയം ബംഗാളില്‍ സിപിഎം പ്രവര്‍ത്തകള്‍ മമതക്കെതിരെ ബിജെപിക്ക് പ്രചാരണം നടത്തുന്നുവെന്ന വെളിപ്പെടുത്തലുകള്‍ക്കിടെയാണ് കാരാട്ടിന്റെ പരാമര്‍ശം വിവാദമായത്.

പാര്‍ട്ടി കോണ്‍ഗ്രസിന്റെ ബാക്കിപത്രം

chandrika — Mon, 23 Apr 2018 09:47:29 +0000

ചരിത്രത്തില്‍ തുല്ല്യതയില്ലാത്തവിധം അഭിപ്രായ വ്യത്യാസങ്ങള്‍ പ്രകടമാക്കിയാണ് സി.പി.എം പാര്‍ട്ടി കോണ്‍ഗ്രസിന് ഹൈദരാബാദില്‍ സമാപനമായിരിക്കുന്നത്. കോണ്‍ഗ്രസ് ബന്ധവുമായി ബന്ധപ്പെട്ട രാഷ്ട്രീയ പ്രമേയത്തിലെ തര്‍ക്ക ഭാഗത്തിന്‍മേല്‍ തലനാരിഴ വ്യത്യാസത്തിനാണ് വോട്ടെടുപ്പ് ഒഴിവായത്. കോണ്‍ഗ്രസുമായി രാഷ്ട്രീയ സഖ്യവും ധാരണയും പാടില്ലെന്ന പി.ബി അംഗം പ്രകാശ് കാരാട്ട് അവതരിപ്പിച്ച കരട് രാഷ്ട്രീയ പ്രമേയത്തില്‍ ജനറല്‍ സെക്രട്ടറി സീതാറാം യെച്ചൂരി ഭേദഗതി നിര്‍ദേശിക്കുകയും ഇരു വിഭാഗവും നിലപാടില്‍ ഉറച്ചു നില്‍ക്കുകയും ചെയ്തതോടെയാണ് വോട്ടെടുപ്പിന്റെ വക്കോളമെത്തിയ സംഭവ വികാസങ്ങള്‍ക്ക് 22-ാം പാര്‍ട്ടി കോണ്‍ഗ്രസ് വേദിയായത്. ഇതോടെ പാര്‍ട്ടിയുടെ കേന്ദ്ര നേതൃത്വത്തില്‍ തന്നെ വ്യക്തമായ വിഭാഗീയത രൂപപ്പെട്ടിരിക്കുകയാണ്.
രാജ്യത്തെ വര്‍ത്തമാനകാല യാഥാര്‍ത്ഥ്യങ്ങളോട് പുറം തിരിഞ്ഞു നിന്നുകൊണ്ട് പ്രകാശ് കാരാട്ടും അദ്ദേഹത്തിന്റെ പിന്‍ബലമായി വിലയിരുത്തപ്പെടുന്ന കേരള ഘടകവും സ്വീകരിച്ചുപോരുന്ന അന്ധമായ കോണ്‍ഗ്രസ് വിരോധത്തെ സി.പി.എം പാര്‍ട്ടി കോണ്‍ഗ്രസ് തൂത്തെറിഞ്ഞുവെന്നത് മതേതര വിശ്വാസികളെ സംബന്ധിച്ചിടത്തോളം ആശ്വാസിക്കാന്‍ വക നല്‍കുന്നതാണ്. കേന്ദ്ര കമ്മിറ്റിയിലും സമ്മേളന പ്രതിനിധികള്‍ക്കുമിടയിലും തങ്ങള്‍ക്കുള്ള മുന്‍തൂക്കം ഉപയോഗപ്പെടുത്തി കോണ്‍ഗ്രസ് വിരുദ്ധ ബി.ജെ.പി വിരുദ്ധ രാഷ്ട്രീയ പ്രമേയം നിഷ്പ്രയാസം പാസാക്കിയെടുക്കാമെന്നായിരുന്നു കാരാട്ട് അനുകൂലികളുടെ കണക്കുകൂട്ടല്‍. എന്നാല്‍ അപ്രതീക്ഷിത നീക്കത്തിലൂടെ ബംഗാള്‍ ഘടകത്തിനൊപ്പം മുതിര്‍ന്ന നേതാവ് വി.എസ് അച്ചുതാനന്ദനുള്‍പ്പെടെയുള്ളവരുടെ പിന്തുണയോടെ സീതാറാം യെച്ചൂരി വിജയം നേടിയെടുത്തിരിക്കുകയാണ്. രഹസ്യവോട്ടെടുപ്പെന്ന യെച്ചൂരിയുടെ തുറുപ്പ്ചീട്ടിനു മുന്നില്‍ മറുഭാഗം മുട്ടുമടക്കുകയായിരുന്നു.
രഹസ്യ വോട്ടെടുപ്പ് നടന്നാല്‍ പരസ്യമായി പിന്തുണക്കാന്‍ മടിക്കുന്ന പലരും ഒപ്പമുണ്ടാവുമെന്നും അതുവഴി വിജയം ഉറപ്പിക്കാമെന്നും യെച്ചൂരി കണക്കുകൂട്ടിയപ്പോള്‍ കേരളത്തില്‍ നിന്നുള്‍പ്പെടെ പിന്തുണക്കുന്ന പലരും കാലുവാരുമെന്ന ഭയത്തിലായിരുന്നു കാരാട്ടും കൂട്ടരും. അതോടെയാണ് തുടക്കത്തില്‍ ഒരു ഭേദഗതിയും അംഗീകരിക്കില്ലെന്ന് തറപ്പിച്ചു പറഞ്ഞ അവര്‍ ഒടുവില്‍ നിലപാടുമാറ്റാന്‍ തയ്യാറായത്. പ്രമേയത്തില്‍ ഉന്നയിച്ച ഭേദഗതികള്‍ പിന്‍വലിക്കില്ലെന്ന മുതിര്‍ന്ന അംഗം വി.എസ് അച്ചുതാനന്ദന്റെ കടുംപിടുത്തവും ഇവരെ പ്രതിരോധത്തിലാക്കി. പാര്‍ട്ടി പിളര്‍പ്പിന്റെ സമയത്ത് ഇറങ്ങിപ്പോന്ന 32 പേരില്‍ ജീവിച്ചിരിക്കുന്ന രണ്ടേരണ്ടുപേരില്‍ ഒരാളെന്ന നിലയില്‍ വി.എസിന് ലഭിച്ചേക്കാവുന്ന വൈകാരിക പിന്തുണയും സ്വാഭാവികമായും ഇവര്‍ ഭയപ്പെടുകയായിരുന്നു.
കേരളഘടകത്തിന്റെ ശക്തമായ സമ്മര്‍ദ്ദമാണ് കോണ്‍ഗ്രസുമായി സഖ്യമോ ധാരണയോ വേണ്ടെന്ന കാരാട്ടിന്റെ കരട് രാഷ്ട്രീയ പ്രമേയത്തിന് പിന്നില്‍ എന്നത് വ്യക്തമാണ്. സംസ്ഥാനത്ത് ഭരണപരമായും രാഷ്ട്രീയ പരമായും കടുത്ത പ്രതിസന്ധികളിലൂടെ കടന്നു പോകുന്ന പാര്‍ട്ടിയുടെ ഏക പിടിവളളി ബി.ജെ.പി വരുദ്ധതയെന്ന ആയുധം മാത്രമാണ്. നരേന്ദ്ര മോദി സര്‍ക്കാറിന്റെ താല്‍പര്യങ്ങളോട് തീര്‍ത്തും സമരസപ്പെട്ട് മുന്നോട്ട് പോകുന്ന പിണറായി സര്‍ക്കാര്‍ ബി.ജെ.പിക്കെതിരായുള്ള വൈകാരിക പ്രകടനങ്ങളിലൂടെയാണ് ന്യൂനപക്ഷങ്ങളുള്‍പ്പെടെയുള്ള വിഭാഗങ്ങളില്‍ സ്വാധീനം ചെലുത്താന്‍ ശ്രമിക്കുന്നത്. ഈ സാഹചര്യത്തില്‍ ബി.ജെ.പിയെ നേരിടാന്‍ കോണ്‍ഗ്രസുമായി ധാരണയുണ്ടാക്കി കഴിഞ്ഞാല്‍ കേരളത്തില്‍ തങ്ങളുടെ പ്രസക്തി തന്നെ ചോദ്യംചെയ്യപ്പെടുമെന്ന ആശങ്കയാണ് ആസുരമായ ഈ വര്‍ത്തമാന സാഹചര്യത്തിലും കോണ്‍ഗ്രസ് വിരോധത്തിന്റെ മേല്‍ നിലകൊള്ളാന്‍ അവരെ പ്രേരിപ്പിക്കുന്നത്. ബംഗാളുള്‍പ്പെടെയുള്ള പാര്‍ട്ടിക്ക് ആളനക്കമുള്ള ഏതാണ്ടെല്ലാ സംസ്ഥാനങ്ങളും നിലവിലെ ഇന്ത്യന്‍ സാഹചര്യങ്ങളെ ഉള്‍ക്കൊള്ളാന്‍ തയ്യാറാകുമ്പോള്‍ രാഷ്ട്രീയ പ്രബുദ്ധതക്ക് പേരുകേട്ട കേരളത്തിലെ പ്രതിനിധികള്‍ വെച്ചുപുലര്‍ത്തുന്ന ഈ സമീപനം സംസ്ഥാനത്തിനാകെ അപമാനം വരുത്തിവെക്കുന്നതാണ്. യെച്ചൂരിക്കെതിരെ കേരളത്തില്‍ നിന്നുള്ള പ്രതിനിധികള്‍ നടത്തിയ രൂക്ഷവിമര്‍ശനങ്ങളും ഇതോട് ചേര്‍ത്തു വായിക്കേണ്ടതാണ്.
പാര്‍ട്ടി കോണ്‍ഗ്രസില്‍ അവതരിപ്പിച്ച കരടു രാഷ്ട്രീയ പ്രമേയത്തില്‍ ഭേദഗതി വരുത്താന്‍ സാധിച്ചിട്ടുണ്ടെങ്കിലും രണ്ടാം തവണയും ജനറല്‍ സെക്രട്ടറിയായി തെരഞ്ഞെടുക്കപ്പെട്ട സീതാറാം യെച്ചൂരിക്ക് മുന്നിലുള്ളത് ദുര്‍ഘടമായ പാതയാണ്. പോളിറ്റ് ബ്യൂറോയിലും കേന്ദ്ര കമ്മറ്റിയിലുമുള്ള മുന്‍തൂക്കമുപയോഗിച്ച് തങ്ങളുടെ താല്‍പര്യങ്ങള്‍ സംരക്ഷിക്കാനുള്ള ശ്രമങ്ങള്‍ കാരാട്ടും സംഘവും നടത്തിക്കൊണ്ടിരിക്കുമെന്ന കാര്യത്തില്‍ സംശയമില്ല. ഇപ്പോള്‍ തന്നെ പല നേതാക്കളുടേയും സംസാരഭാഷയും ശരീര ഭാഷയും നിലപാടിനേറ്റ തിരിച്ചടി തങ്ങള്‍ അംഗീകരിച്ചിട്ടില്ലെന്ന് വ്യക്തമാക്കുന്ന തരത്തിലുള്ളതാണ്. കരടു പ്രമേയത്തില്‍ നിന്ന് ധാരണ എന്ന പദം മാറ്റിയതുകൊണ്ട് കോണ്‍ഗ്രസുമായി ധാരണ ഉണ്ടാക്കിക്കൊള്ളണമെന്നില്ലെന്ന വൃന്ദകാരാട്ടിന്റെ പ്രസ്താവനതന്നെ ഇതിനുദാഹരണമാണ്. അപ്രതീക്ഷിതമായി ജനറല്‍ സെക്രട്ടറി പദത്തിലേക്ക് ഉയര്‍ന്നുവന്ന വിശാഖ പട്ടണം കോണ്‍ഗ്രസില്‍നിന്ന് വ്യത്യസ്തമായി കൂടുതല്‍ കരുത്തനായാണ് യെച്ചൂരിയുടെ രണ്ടാം വരവ്. ഹൈദരാബാദ് സമ്മേളനത്തില്‍ ലഭിച്ച മുന്‍തൂക്കം വഴി പി.ബിയിലും സി.സിയിലും കൂടുതല്‍ സ്വാധീനമുണ്ടാക്കാന്‍ അദ്ദേഹത്തിന് സാധിച്ചിട്ടുണ്ട്. പക്ഷെ പാര്‍ട്ടിക്ക് ഭരണം കൈയ്യിലുള്ള ഏക സംസ്ഥാനമായ കേരളത്തില്‍ നിന്ന് ലഭിക്കുന്ന പിന്തുണ മുന്നോട്ടുള്ള പാതയില്‍ അദ്ദേഹത്തിന് ഏറെ നിര്‍ണായകമായിരിക്കും.
സ്വാതന്ത്ര്യാനന്തര ഭാരതം ഏറ്റവും കറുത്തിരുണ്ട സാഹചര്യങ്ങളിലൂടെ കടന്നു പോകുമ്പോള്‍ പുരോഗമന പ്രസ്ഥാനമെന്ന് അവകാശവാദമുന്നയിക്കുന്ന സി.പി.എമ്മിനെ പോലുള്ള ഒരു പ്രസ്ഥാനം മുഖ്യ ശത്രുവിനെ തീരുമാനിക്കുന്നതില്‍ ഇപ്പോഴും തമ്മിലടിച്ചുകൊണ്ടിരിക്കുന്നത് ആ പാര്‍ട്ടി ചെന്നുപെട്ടിരിക്കുന്ന ആശയ ദാരിദ്ര്യത്തിന്റെ ആഴം വ്യക്തമാക്കിത്തരുന്നതാണ്. രാജ്യത്തിന്റെ നിലനില്‍പ്പു തന്നെ ചോദ്യം ചെയ്യപ്പെടുമ്പോള്‍ പ്രത്യയശാസ്ത്രപരമായ ശാഠ്യത്തിന്റെ മേല്‍ അള്ളിപ്പിടിച്ച് ജനാധിപത്യ മതേതരത്വ കൂട്ടായ്മക്ക് തുരങ്കം വെക്കുന്നതിലൂടെ അവര്‍ പരോക്ഷമായി ഫാസിസ്റ്റുകള്‍ക്ക് ചുവന്നപരവതാനി വിരിച്ചു കൊടുക്കുകയായിരുന്നു ഇത്രയും കാലം. ഹൈദരാബാദ് പാര്‍ട്ടി കോണ്‍ഗ്രസിന്റെ തീരുമാനം ആശ്വാസം പകരുന്നതാണെങ്കിലും അത് വളരേ നേരിയ മുന്‍തൂക്കത്തില്‍ മാത്രമാണെന്നത് ആശങ്ക അവശേഷിപ്പിക്കുന്നുണ്ട്.

പ്രകാശ് കാരാട്ടിനു നിലപാടു മാറ്റം, ബി.ജെ.പിയെ തോല്‍പിക്കാന്‍ കോണ്‍ഗ്രസ്സിനെ പിന്തുണക്കാം

chandrika — Sat, 24 Mar 2018 06:16:10 +0000

കോണ്‍ഗ്രസിനോടുള്ള നിലപാടില്‍ അയവുവരുത്തി പ്രകാശ് കാരാട്ട്. ബിജെപിയെ പരാജയപ്പെടുത്താന്‍ കഴിയുന്ന സ്ഥലങ്ങളിലെല്ലാം സിപിഎം കോണ്‍ഗ്രസിനെ പിന്തുണയ്ക്കണമെന്ന് പ്രകാശ് കാരാട്ട് വ്യക്തമാക്കി. പീപ്പിള്‍സ് ഡെമോക്രസിയില്‍ എഴുതിയ ‘Utharpradesh portents’ എന്ന ലേഖനത്തിലാണ് ഇത്തരത്തിലൊരു പരാമര്‍ശം പ്രകാശ് കാരാട്ട് നടത്തിയിരിക്കുന്നത്.
യു.പി ലോക്‌സഭാ ഉപതിരഞ്ഞെടുപ്പ് ഫലങ്ങള്‍ ഭാവിയില്‍ തിരഞ്ഞെടുപ്പ് തന്ത്രങ്ങള്‍ മെനയുന്നതില്‍ പാര്‍ട്ടിക്ക് വലിയ പാഠങ്ങള്‍ നല്‍കുന്നുണ്ടെന്നും പ്രകാശ് കാരാട്ട് പറയുന്നു.

രാജ്യത്തെ പ്രധാന പ്രതിപക്ഷ കക്ഷികളെല്ലാം ഒന്നിച്ചാല്‍ ബിജെപിയെ പരാജയപ്പെടുത്താം. ഇതിലൂടെ മറ്റ് ചെറുകക്ഷികള്‍ക്കും പ്രതിപക്ഷ സഖ്യത്തെ പിന്തുണച്ച് മാറ്റങ്ങള്‍ കൊണ്ടുവരാനാകുമെന്നും പ്രകാശ് കാരാട്ട് അഭിപ്രായപ്പെട്ടു.

കോണ്‍ഗ്രസിനോട് സഖ്യം ചേരുന്നതില്‍ നേരത്തെ പ്രകാശ് കാരാട്ട് കടുത്ത എതിര്‍പ്പ് പറഞ്ഞിരുന്നു.പോളിറ്റ് ബ്യൂറോ യോഗങ്ങളിലും കേന്ദ്ര കമ്മറ്റിയിലും ഈ എതിര്‍പ്പ് അദ്ദേഹം വ്യക്തമാക്കിയിരുന്നു. 2018ല്‍ ആദ്യം പുറത്തിറക്കിയ കരടുരേഖയിലും കോണ്‍ഗ്രസുമായി സഖ്യത്തിനില്ലെന്ന് പാര്‍ട്ടി നേതൃത്വം വ്യക്തമാക്കിയിട്ടുണ്ട്. അതേസമയം, യെച്ചൂരി വിഭാഗം കോണ്‍ഗ്രസുമായി സഖ്യം വേണമെന്ന നിലപാടായിരുന്നു നേരത്തെ സ്വീകരിച്ചിരുന്നത്.

ആര്‍.എസ്. എസ് ഫാസിസ്റ്റ് സംഘടനയല്ല ‘കോണ്‍ഗ്രസുമായി സഖ്യമെന്ന് ആരും ധരിക്കേണ്ട’ കാരാട്ട്

chandrika — Wed, 07 Mar 2018 13:47:40 +0000

രാജ്യത്തെ മതേതര സങ്കല്‍പങ്ങള്‍ക്ക് മേല്‍ സംഘപരിവാര ഭീഷണി തുടരുന്നതിനിടെ ഫാസിസത്തെ ചെറുക്കാന്‍ ഇടതുപക്ഷം കോണ്‍ഗ്രസ്സിനോട് സഖ്യപ്പെടില്ലെന്ന് ആവര്‍ത്തിച്ച് സി.പി.എം മുന്‍ ജനറല്‍ സെക്രട്ടറിയും മുതിര്‍ന്ന നേതാവുമായ പ്രകാശ് കാരാട്ട്. ‘മാധ്യമം’ പത്രപ്രവര്‍ത്തകന്‍ കെ. എസ് ശ്രീജിത്തിന് അനുവദിച്ച അഭിമുഖത്തിലാണ് പ്രകാശ് കാരാട്ട് തന്റെ നിലപാട് ആവര്‍ത്തിച്ചത്. ത്രിപുര തെരഞ്ഞെടുപ്പിന്റെ പാശ്ചാത്തലത്തില്‍ സി.പി.എമ്മിലെ കാരാട്ട് പക്ഷത്തിന്റെയും കേരള ഘടകത്തിന്റെയും നിലപാടുകള്‍ ശക്തമായി വിമര്‍ശിക്കപ്പെട്ടിരുന്നു.

ഫാസിസ്റ്റ് പ്രവണത കാണിക്കുന്ന ഈ സ്വേഛാധിപത്യ വാദികളെ ഫാസിസ്റ്റ് എന്ന് വിളിക്കല്ലേ എന്ന നിലപാടും കാരാട്ട് ആവര്‍ത്തിക്കുന്നുണ്ട്. അത് തന്നെയാണ് കേരള സി.പി.എമ്മിന്റെ നിലപാടും. എന്നാല്‍ ഈ നിലപാടിനെതിരായണ് അതിനെതിരെയാണ് സെക്രട്ടറി യെച്ചൂരിയും ബംഗാള്‍ ഘടകവും നില കൊള്ളുന്നത്.

ആര്‍.എസ്.എസന്റെ ഫാസിസ്റ്റ് സ്വഭാവത്തെയും ആര്‍.എസ്.എസ്. ഫാസിസ്റ്റ് സംഘടനയാണോ അല്ലയോ എന്നതും സംബന്ധിച്ച സംഭാഷണമാണ് പ്രകാശ് കാരാട്ടുമായുള്ള അഭിമുഖത്തിന്റെ സിംഹ ഭാഗവും. ”ഇത്രയൊക്കെ രാജ്യത്ത് സംഭവിച്ചിട്ടും ആര്‍.എസ്.എസ്. ഫാഷിസ്റ്റ് സംഘടന തന്നെ എന്നതില്‍ സി.പി.എമ്മിന് സംശയമാണോ” എന്ന ചോദ്യത്തിന് അദ്ദേഹം നല്‍കുന്ന മറുപടി: ”Fascistic എന്നാല്‍ like Fascist എന്നാണര്‍ത്ഥം. ഫാസിസ്റ്റ് അല്ല. അതിെന്റ ചില സ്വഭാവങ്ങള്‍ ഉണ്ടെന്നര്‍ത്ഥം.”എന്നാണ്. തുടര്‍ന്നുള്ള അഭിമുഖഭാഗങ്ങളില്‍ ഫാസിസം എന്താണെന്നും സേച്ഛാധിപത്യവാദം എന്താണെന്നും സംബന്ധിച്ച വിച്ഛേദനവും അദ്ദേഹം നടത്തുന്നു. തന്റെ നിലപാട് സാധുകരിച്ച് കാരാട്ട് ഇങ്ങനെയും വിശദീകരിക്കുന്നു. ”We didnt say Its a Fascist organisation. Its got fascistic features.”.