പ്രധാനമന്ത്രി നരേന്ദ്ര മോദിയാണ് എല്ലാ തീരുമാനങ്ങളുമെടുക്കുന്നത്. ഒരാഴ്ച മുമ്പുമാത്രം രൂപവത്കരിച്ച കമ്പനിക്കാണ് കരാര്‍ ലഭിച്ചത്. എന്തുകൊണ്ട് സര്‍ക്കാര്‍ പ്രത്യേക കമ്പനിയെ മാത്രം പിന്തുണച്ചെന്നും അദ്ദേഹം ചോദിച്ചു. നരേന്ദ്ര മോദി രാജ്യത്തെ ഹിന്ദുക്കളെ വഞ്ചിച്ചു. രാമക്ഷേത്രം നിര്‍മിക്കുമെന്നതടക്കമുള്ള വാഗ്ദാനങ്ങളെല്ലാം ലംഘിച്ചു. രാജ്യത്ത് 24 ലക്ഷം ഒഴിവുകളാണ് നികത്തപ്പെടാതെ കിടക്കുന്നത്. രാമക്ഷേത്ര ആവശ്യമുയര്‍ത്തി ഒക്ടോബറില്‍ അയോധ്യ മാര്‍ച്ച് സംഘടിപ്പിക്കുമെന്നും വിശ്വഹിന്ദു പരിഷത്ത് മുന്‍ അധ്യക്ഷന്‍കൂടിയായ തൊഗാഡിയ പറഞ്ഞു.

രാമക്ഷേത്ര നിര്‍മാണത്തിന് അനുകൂല നിലപാട് സ്വീകരിച്ചില്ലെങ്കില്‍ 2019ലെ തെരഞ്ഞെടുപ്പില്‍ ബി.ജെ.പിയെ പിന്തുണക്കില്ല. ഉത്തര്‍പ്രദേശിലടക്കം ഭൂരിപക്ഷം സംസ്ഥാനത്തും ബി.ജെ.പി ഭരണത്തിലുണ്ടായിട്ടും ക്ഷേത്രം നിര്‍മിക്കുന്നില്ല. അധികാരമേറി നാലുവര്‍ഷമായിട്ടും അയോധ്യ സന്ദര്‍ശിക്കാന്‍പോലും മോദി തയാറായിട്ടില്ല. ഇത് ഹൈന്ദവരോടുള്ള വഞ്ചനയാണെന്ന് തൊഗാഡിയ പറഞ്ഞു.

ഗുവാഹട്ടി: തീവ്ര ഹിന്ദു നേതാവായ പ്രവീണ്‍ തൊഗാഡിയയുടെ പ്രഭാഷണത്തിന് അസമില്‍ വിലക്ക്. പുതുതായി രൂപവത്കരിച്ച ആന്താരാഷ്ട്രീയ ഹിന്ദു പരിഷത്തിന്റെ (എഎച്ച്പി) പ്രസിഡന്റായ പ്രവീണ്‍ തൊഗാഡിയ പങ്കെടുക്കുന്ന ഗുവാഹട്ടിയിലെ യോഗം അസം പൊലീസ് തടഞ്ഞു. സംസ്ഥാനത്തെ മതന്യൂനപക്ഷ സമുദായങ്ങളുടെ വികാരം വ്രണപ്പെടുത്തുമെന്നും വര്‍ഗീയ കലാപത്തിന് കാരണമായേക്കുമെന്നുമുള്ള കാരണം ചൂണ്ടിക്കാട്ടിയാണ് നടപടി. വിശ്വഹിന്ദു പരിഷത്തിന്റെ മുന്‍ പ്രസിഡന്റ് ഇന്നലെയായിരുന്നു ഗുവാഹട്ടിയില്‍ എഎച്ച്പി യോഗത്തില്‍ പങ്കെടുക്കേണ്ടിയിരുന്നത്. പ്രത്യേക അനുമതിയില്ലാതെ എവിടെയും പ്രസംഗിക്കാന്‍ പാടില്ലെന്ന് പൊലീസ് അറിയിച്ചിട്ടുണ്ട്.

വിവിധ സ്ഥലങ്ങളില്‍ വളരെ പ്രകോപനപരമായ പ്രഭാഷണങ്ങള്‍ നടത്തിയിട്ടുണ്ടെന്നും അത്തരം പ്രഭാഷണങ്ങള്‍ ന്യൂനപക്ഷ സമുദായങ്ങളുടെ വികാരത്തെ വ്രണപ്പെടുത്തുകയും അവരുടെ ഇടയില്‍ അരക്ഷിതാവസ്ഥ സൃഷ്ടിക്കുകയും ചെയ്യുമെന്നുമുള്ള റിപ്പോര്‍ട്ടിന്റെ അടിസ്ഥാനത്തിലാണ് യോഗം തടഞ്ഞത്. ക്രമസമാധാനം മുന്‍നിര്‍ത്തിയാണ് നടപടിയെന്നും പൊലീസ് പറഞ്ഞു. ജൂലായ് 17 മുതല്‍ രണ്ടു മാസത്തേക്ക് വിലക്ക് നിലനില്‍ക്കും.

അഹമ്മദാബാദില്‍ അനിശ്ചിത കാല നിരഹാരത്തിനൊരുങ്ങുകയാണ് മുന്‍ വി.എച്.പി നേതാവ് പ്രവീണ്‍ തൊഗാഡിയ. അതേസമയം നാളെ നിരാഹാര സമരം തുടങ്ങാനിരിക്കെ പ്രാധാനമന്ത്രിക്കെതിരായ ആക്രമണവും അദ്ദേഹം ശക്തമാക്കി. നമ്മുടെ പെണ്‍കുട്ടികള്‍ ഇവിടെ അരക്ഷിതരാണ്. പക്ഷെ പ്രധാനമന്ത്രി വിദേശത്ത് ടൂറിലാണ്.

വി.എച്.പി വാക്താവായ മറ്റൊരു നേതാവ് കൂടി സംഘടന വിട്ട് പ്രവീണ്‍ തൊഗാഡിയക്കൊപ്പം ചേര്‍ന്നിട്ടുണ്ട്. ഗുജറാത്തിലെ മുഴുവന്‍ പ്രവര്‍ത്തകരും ഈ തീപ്പൊരി നേതാവിനൊപ്പമാണെന്നും അദ്ദേഹം പറയുന്നു.

നമ്മുടെ സൈനികര്‍ അതിര്‍ത്തികളില്‍ സുരക്ഷിതരല്ല, കര്‍ഷകര്‍ ആത്മഹത്യ ചെയ്യുന്നു, നമ്മുടെ മക്കള്‍ വീടുകളില്‍ സുരക്ഷിതരല്ല എങ്കിലും നമ്മുടെ പ്രധാനമന്ത്രി വിദേശ യാത്രയിലാണ്. സ്വീഡന്‍, യു.കെ രാജ്യങ്ങളിലെ അഞ്ചു ദിവസത്തെ പര്യടനത്തിനായി മോദി ഇന്നു യാത്ര തിരിച്ചു.

കോണ്‍ഗ്രസ്സും കമ്മ്യൂണിസ്റ്റുകളും, ബുദ്ധിജീവികളും തന്റെ ശത്രുക്കളാണ്. അവരെനിക്ക് എതിരായാണ് പ്രവര്‍ത്തിക്കുന്നതും. പക്ഷേ, തന്നെ കൊല്ലുമോ എന്ന് പേടിക്കുന്നത് താന്‍ കൂടെയുള്ളവരെക്കുറിച്ചാണ്. പിറകില്‍ നിന്ന് കുത്താന്‍ മിടുക്കരാണവര്‍. പ്രവീണ്‍ തൊഗാഡിയക്ക് സംഭവിച്ചതുപോലെ തനിക്കും സംഭവിക്കാമെന്നും പ്രമോദ് മുത്തലിക് പറഞ്ഞു.

ഉത്തര കര്‍ണാടകയില്‍ താന്‍ നില്‍ക്കുന്നത് അവിടത്തെ ആര്‍.എസ്.എസ് നേതാവ് മഗ്‌നേഷ് ഭണ്ഡേ, മുന്‍ മുഖ്യമന്ത്രി ജഗദീഷ് ഷെട്ടാര്‍, ദര്‍വാദ് എംപി പ്രഹ്ലാദ് ജോഷി എന്നിവര്‍ക്ക് ഇഷ്ടമല്ല. തന്നെ അവിടെ നിന്നും ഒഴിവാക്കണമെന്ന് ആഗ്രഹമുള്ളവരാണെന്നും മുത്തലിക്ക് പറയുന്നു. ഹിന്ദുഐക്യത്തിനു വേണ്ടിയാണ് അവര്‍ നില്‍ക്കുന്നത്. പരസ്പരം ഐക്യമില്ലാത്തവര്‍ എങ്ങനെയാണ് ഹിന്ദുഐക്യമുണ്ടാക്കുന്നത്? 40 വര്‍ഷം ആര്‍.എസ്.എസ്സിനു വേണ്ടി പ്രവര്‍ത്തിച്ച് ഞാനെന്റെ ജീവിതം പാഴാക്കി. എന്നെപ്പോലുള്ള ആയിരങ്ങള്‍ അവരുടെ കൂടെയുണ്ടായിരിക്കാം, പക്ഷേ അവര്‍ക്കൊന്നും ഇപ്പോള്‍ ഒന്നും ചെയ്യാന്‍ കഴിയില്ല. തന്റെ വഴി ശരിയായ ഹിന്ദുത്വത്തിലൂന്നിയതാണെന്നും മുത്തലിക് കൂട്ടിച്ചേര്‍ത്തു.

ആര്‍.എസ്.എസിന്റേയും ബജ്‌റംഗ്ദളിന്റേയും നേതാവായിരുന്ന മുത്തലിക് ആര്‍.എസ്.എസില്‍ നിന്ന് തെറ്റിപ്പിരിഞ്ഞ് ശിവസേനയിലെത്തുകയായിരുന്നു. പിന്നീട് ശ്രീരാമസേനയിലേക്കെത്തി നേതാവായി മാറുകയായിരുന്നു.

രാജസ്ഥാന്‍, ഗുജറാത്ത് എന്നിവിടങ്ങളിലെ പൊലീസ് തന്നെ വേട്ടയാടുകയാണെന്നും വ്യാജഏറ്റുമുട്ടലിലൂടെ തന്നെ കൊല്ലാന്‍ പദ്ധതിയുണ്ടെന്നും തൊഗാഡിയ വെളിപ്പെടുത്തിയിരുന്നു. ആസ്പത്രിയില്‍ ചികിത്സയില്‍ കഴിഞ്ഞിരുന്ന തൊഗാഡിയയെ ചോദ്യം ചെയ്യാന്‍ രാജസ്ഥാന്‍ പൊലീസ് എത്തിയതിന് പിന്നാലെ തൊഗാഡിയയെ കാണാനില്ലായിരുന്നു. തുടര്‍ന്ന് അബോധാവസ്ഥയിലായ തൊഗാഡിയയെ പാര്‍ക്കില്‍ നിന്ന് കണ്ടെത്തുകയായിരുന്നു. പിന്നീട് നടത്തിയ വാര്‍ത്താസമ്മേളനത്തിലാണ് ഡല്‍ഹിയിലെ ബോസാണ് ഇതിന് പിന്നിലെന്ന് മോദിയെ പരോക്ഷമായി തൊഗാഡിയ കുറ്റപ്പെടുത്തുന്നത്. താന്‍ ഏറ്റുമുട്ടലില്‍ കൊല്ലപ്പെടാന്‍ സാധ്യതയുണ്ടെന്നും തൊഗാഡിയ പറഞ്ഞിരുന്നു.