ന്യൂഡല്‍ഹി: രാഷ്ട്രപതി തെരഞ്ഞെടുപ്പില്‍ പ്രതിപക്ഷ പാര്‍ട്ടികള്‍ സ്ഥാനാര്‍ത്ഥിയെ നിര്‍ത്തുമെന്ന് സൂചന. നാളെ ഡല്‍ഹിയില്‍ ചേരുന്ന പ്രതിപക്ഷ പാര്‍ട്ടികളുടെ യോഗത്തില്‍ ഇതുസംബന്ധിച്ച അന്തിമ തീരുമാനം ഉണ്ടാകുമെന്നാണ് വിവരം.
മുന്‍ ലോക്‌സഭാ സ്പീക്കര്‍ മീരാ കുമാര്‍, മുതിര്‍ന്ന കോണ്‍ഗ്രസ് നേതാവും മുന്‍ കേന്ദ്രമന്ത്രിയുമായ സുശീല്‍ കുമാര്‍ ഷിന്‍ഡെ എന്നിവരുടെ പേരുകളാണ് പ്രതിപക്ഷം പരിഗണിക്കുന്നത്. ബിഹാര്‍ ഗവര്‍ണറും ദളിത് സമുദായംഗവുമായ രാം നാഥ് കോവിന്ദിനെ സ്ഥാനാര്‍ത്ഥിയാക്കിയ ബി.ജെ.പിക്ക് അതേ നിലയില്‍ തന്നെയുള്ള എതിരാളിയെ നിര്‍ത്താനാണ് പ്രതിപക്ഷം ആലോചിക്കുന്നത്.
ഈ സാഹചര്യത്തിലാണ് മീരാ കുമാറിന്റെയും ഷിന്‍ഡേയുടേയും പേര് പരിഗണിക്കുന്നത്. ദളിത് സമുദായംഗങ്ങള്‍ എന്നതിനു പുറമെ സജീവ രാഷ്ട്രീയക്കാരുമാണ് എന്നതാണ് ഇവരുടെ പ്രത്യേകത. നിലവിലെ സാഹചര്യത്തില്‍ ബി.ജെ.പി നേതൃത്വത്തിലുള്ള എന്‍.ഡി.എക്കാണ് രാഷ്ട്രപതി തെരഞ്ഞെടുപ്പില്‍ മുന്‍തൂക്കം. വിജയിച്ചില്ലെങ്കിലും ബി.ജെ.പി സ്ഥാനാര്‍ത്ഥിക്ക് വാക്ക് ഓവര്‍ നല്‍കേണ്ടതില്ലെന്ന തൃണമൂല്‍ കോണ്‍ഗ്രസിന്റെയും ഇടതുപക്ഷത്തിന്റെയും നിലപാടാണ് സ്ഥാനാര്‍ത്ഥിയെ നിര്‍ത്താന്‍ പ്രതിപക്ഷത്തെ പ്രേരിപ്പിക്കുന്നത്. നിര്‍ദേശം കോണ്‍ഗ്രസും തത്വത്തില്‍ അംഗീകരിച്ചതായാണ് വിവരം.
ആദ്യ ഘട്ടത്തില്‍ നിലപാട് വ്യക്തമാക്കാതിരുന്ന, എന്‍.ഡി.എ ഘടകക്ഷി കൂടിയായ ശിവസേന ബി.ജെ.പി സ്ഥാനാര്‍ത്ഥിയെ പിന്തുണക്കുമെന്ന് വ്യക്തമാക്കിയതോടെ ബി.ജെ.പി ക്യാമ്പിന്റെ ആത്മവിശ്വാസം വര്‍ധിച്ചിട്ടുണ്ട്. എന്‍. ഡി. എക്ക് മാത്രമായി ഇലക്ടറല്‍ കോളജില്‍ 48 ശതമാനത്തോളം വോട്ടുണ്ട്. ചന്ദ്രശേഖര റാവുവിന്റെ തെലുങ്കാന രാഷ്ട്രസമിതിയും എ. ഐ. എ. ഡി.എം.കെയിലെ ഇരു വിഭാഗങ്ങളും കോവിന്ദിനെ പിന്തുണക്കുമെന്ന് വ്യക്തമാക്കിയിട്ടുണ്ട്. ഇതോടെ അവസാന നിമിഷത്തില്‍ മാറ്റങ്ങള്‍ ഉണ്ടായില്ലെങ്കില്‍ 60 ശതമാനത്തിനടുത്ത് വോട്ടുകള്‍ കോവിന്ദിന് ലഭിച്ചേക്കും.
അതേസമയം ജെ.ഡി.യു, സമാജ്് വാദിപാര്‍ട്ടി തുടങ്ങിയ കക്ഷികള്‍ ഇതുവരെ നിലപാട് വ്യക്തമാക്കിയിട്ടില്ല. ബിഹാര്‍ മുഖ്യമന്ത്രിയും ജെ.ഡി.യു നേതാവുമായി അടുത്ത ബന്ധം പുലര്‍ത്തുന്ന നേതാവാണ് മുന്‍ ബിഹാര്‍ ഗവര്‍ണര്‍ കൂടിയായ രാം നാഥ് കോവിന്ദ്. അതേസമയം തന്നെ ജെ. ഡി.യുവിലെ മുതിര്‍ന്ന നേതാവും മുന്‍ ദേശീയ ജനറല്‍ സെക്രട്ടറിയുമായ ശരദ് യാദവ് പ്രതിപക്ഷത്തിനൊപ്പം ഉറച്ചു നില്‍ക്കുന്ന നേതാവുമാണ്.
പ്രതിപക്ഷം ദളിത് സമുദായംഗത്തെ സ്ഥാനാര്‍ത്ഥിയാക്കിയാല്‍ പിന്തുണക്കുമെന്ന് ബി.എസ്.പി നേതാവ് മായാവതി കഴിഞ്ഞ ദിവസം വ്യക്തമാക്കിയിരുന്നു. നാളെ വൈകീട്ട് 4.30ന് ചേരുന്ന പ്രതിപക്ഷ പാര്‍ട്ടികളുടെ യോഗത്തില്‍ തന്നെ അന്തിമ തീരുമാനം ഉണ്ടാകുമെന്നാണ് കണക്കുകൂട്ടല്‍.

തെരഞ്ഞെടുപ്പിന് പിന്തുണ തേടി അമിത് ഷാ കഴിഞ്ഞ ദിവസം ബാന്ദ്രയിലെ വസതിയിലെത്തി ഉദ്ധവ് തക്കറെയുമായി കൂടിക്കാഴ്ച നടത്തിയിരുന്നെങ്കിലും സ്ഥാനാര്‍ത്ഥിയെ അറിഞ്ഞ ശേഷം തീരുമാനമറിയിക്കാമെന്നായിരുന്നു മറുപടി.
എന്‍ഡിഎയിലെ രണ്ടാമത്തെ വലിയ കക്ഷിയായ ശിവസേനക്ക് മഹാരാഷ്ട്രയില്‍ 63 എംഎല്‍എമാരും 18 ലോകസഭാ എംഎപിമാരും മൂന്നു രാജ്യസഭാംഗങ്ങളുമാണുള്ളത്. കഴിഞ്ഞ രണ്ട് തെരഞ്ഞെടുപ്പുകളിലും യുപിഎ സ്ഥാനാര്‍ത്ഥികളായ പ്രതിഭ പാട്ടീലിനെയും പ്രണബ് മുഖര്‍ജിയെയുമാണ് സേന പിന്തുണച്ചിരുന്നത്.

ജൂണ്‍ 24നാണ് മോദിയുടെ വിദേശയാത്ര തുടങ്ങുന്നത്. പോര്‍ച്ചുഗലാണ് ആദ്യം സന്ദര്‍ശിക്കുക. തുടര്‍ന്ന് യു.എസിലെത്തുന്ന മോദി പ്രസിഡണ്ട് ഡൊണാള്‍ഡ് ട്രംപുമായി കൂടിക്കാഴ്ച നടത്തും. ഇതിനു ശേഷം നെതര്‍ലാന്റ് കൂടി സന്ദര്‍ശിച്ച ശേഷം 27ന് രാത്രി മാത്രമേ ഡല്‍ഹിയില്‍ തിരിച്ചെത്തൂ. ജൂലൈ 17നാണ് രാഷ്ട്രപതി തെരഞ്ഞെടുപ്പ് നടക്കുന്നത്.
പ്രതിപക്ഷ കക്ഷികളുടെ കൂടി പിന്തുണയോടെ പൊതു സമ്മതനായ രാഷ്ട്രപതി സ്ഥാനാര്‍ത്ഥിയെ നിശ്ചയിക്കുന്നതിനുള്ള നീക്കവും ബി.ജെ.പി നടത്തുന്നുണ്ട്.
എല്‍.ജെ.പി നേതാവ് രാം വിലാസ് പസ്വാനുമായും സമാജ്‌വാദി പാര്‍ട്ടിയിലെ മുലായംസിങ് ഗ്രൂപ്പ് നേതാവ് നരേഷ് അഗര്‍വാളുമായും കേന്ദ്രമന്ത്രി വെങ്കയ്യ നായിഡു ഇന്നലെ ചര്‍ച്ച നടത്തി. പ്രധാനമന്ത്രിയുടെ തീരുമാനത്തിനൊപ്പം നില്‍ക്കുമെന്നാണ് എന്‍.ഡി.എ സഖ്യ കക്ഷി കൂടിയായ എല്‍.ജെ.പിയുടെ നിലപാട്. ബി.ജെ.പി സ്ഥാനാര്‍ത്ഥിയെ പിന്തുണക്കാന്‍ മുലായം സന്നദ്ധത പ്രകടിപ്പിച്ചിട്ടുണ്ടെങ്കിലും രാഷ്ട്രീയക്കാരെ തന്നെ പ്രസിഡണ്ട് സ്ഥാനാര്‍ത്ഥിയാക്കണമെന്ന ഉപാധി വച്ചതായാണ് അറിവ്. കോണ്‍ഗ്രസ്, തൃണമൂല്‍ കോണ്‍ഗ്രസ്, സി.പി.എം, ബി.ജെ.ഡി എന്നീ കക്ഷികളുമായും ബി.ജെ.പി നിയോഗിച്ച മൂന്നംഗ സമിതി കഴിഞ്ഞ ദിവസങ്ങളില്‍ ചര്‍ച്ച നടത്തിയിരുന്നു.

ന്യൂഡല്‍ഹി: ഡിജിറ്റല്‍ ഇടപാടുകള്‍ പ്രോത്സാഹിപ്പിക്കാന്‍ മോദി സര്‍ക്കാര്‍ കൊണ്ടുപിടിച്ചു ശ്രമിക്കുമ്പോഴും രാഷ്ട്രപതി തെരഞ്ഞെടുപ്പില്‍ മത്സരിക്കണമെങ്കില്‍ നോട്ട് തന്നെ വേണം. നാമനിര്‍ദേശ പത്രികക്കൊപ്പം കെട്ടിവെക്കേണ്ട തുകയാണ് പണമായിത്തന്നെ വേണമെന്ന് അധികൃതര്‍ ശാഠ്യം പിടിക്കുന്നത്.
15,000 രൂപയാണ് മത്സരാര്‍ത്ഥികള്‍ കെട്ടിവെക്കേണ്ടത്. ഡബിറ്റ്, ക്രഡിറ്റ് കാര്‍ഡുകള്‍ ഉപയോഗിച്ചോ ചെക്ക് ആയോ മൊബൈല്‍ വാലറ്റുകള്‍ മുഖേനയോ തുക നല്‍കിയാല്‍ സ്വീകരിക്കാന്‍ കഴിയില്ലെന്നാണ് അധികൃതരുടെ വിശദീകരണം. 15 പേരാണ് ഇതുവരെ നാമനിര്‍ദേശ പത്രിക നല്‍കിയത്. ഇതില്‍ എഴുപേരുടെ അപേക്ഷ പ്രാഥമിക മാനദണ്ഡങ്ങള്‍ പാലിക്കാത്തതിനാല്‍ തള്ളിയിരുന്നു. ശേഷിച്ചവരെല്ലാം നോട്ടിന്റെ രൂപത്തില്‍ തന്നെയാണ് തുക നല്‍കിയിരിക്കുന്നത്.
പണം എണ്ണിത്തിട്ടപ്പെടുത്തുന്നതിനും കള്ളനോട്ട് പരിശോധിക്കുന്നതിനും ഒരു ബാങ്ക് ഉദ്യോഗസ്ഥനെ ചുമതലപ്പെടുത്തിയിട്ടുണ്ട്. നേരിട്ടു നല്‍കുന്നതിനു പുറമെ റിസര്‍വ് ബാങ്കിലും പണമടക്കാം. ഇതിന്റെ രസീത് നാമനിര്‍ദേശ പത്രികക്കൊപ്പം ഉള്‍കൊള്ളിക്കണമെന്ന് മാത്രം. ജൂലൈ 17നാണ് രാഷ്ട്രപതി തെരഞ്ഞെടുപ്പ് നടക്കുക. ജൂലൈ 20ന് വോട്ടെണ്ണും.

അതേസമയം സ്ഥാനാര്‍ഥിയുടെ പേര് നിര്‍ദേശിക്കാതെ സമവായ ചര്‍ച്ചക്ക് എത്തിയ കേന്ദ്രസര്‍ക്കാര്‍ നിലപാടിനോട് യെച്ചൂരി എതിര്‍പ്പ് പ്രകടിപ്പിച്ചു. കേന്ദ്രം പൊതുസ്ഥാനാര്‍ഥിയുടെ പേര് നിര്‍ദേശിച്ചില്ലെന്നും. അതില്ലാതെ എങ്ങനെയാണ് ചര്‍ച്ച നടക്കുകയെന്നും സിപിഎം ജനറല്‍ സെക്രട്ടറി ചോദിച്ചു. വിഷയം മന്ത്രിമാരുമായി ചര്‍ച്ചചെയ്തതായും മതേതര മൂല്യങ്ങളില്‍ വിശ്വസിക്കുന്ന വ്യക്തിയാകണമെന്നും ഭരണഘടന സംരക്ഷിക്കുമെന്ന് ഉറപ്പുമുള്ള വ്യക്തിയാകണം പൊതുസ്ഥാനാര്‍ത്ഥിയെന്നും യെച്ചൂരി വ്യക്തമാക്കി.

ഇക്കാര്യം ചര്‍ച്ച ചെയ്യാനായി തന്നെ സമീപിച്ച കേന്ദ്രമന്ത്രിമാരായ വെങ്കയ്യ നായിഡുവിനോട് അരുണ്‍ ജെയ്റ്റ്‌ലിയോടും ആവശ്യപ്പെട്ടിട്ടുണ്ടെന്നും യെച്ചൂരി പറഞ്ഞു. ചര്‍ച്ചക്കുശേഷം വാര്‍ത്താലേഖകരോട് സംസാരിക്കവെയാണ് യെച്ചൂരി ഇക്കാര്യം പറഞ്ഞത്.