ഇഞ്ചിവില ഡബിള്‍ സെഞ്ചുറിയിലേക്ക് കുതിക്കുമ്പോള്‍ കീശയില്‍നിന്ന് നെഞ്ചിലേക്ക് ആശങ്കയുടെ എരുവും നീറ്റലും പടരുന്നു. സര്‍ക്കാറൊരു കൊള്ള സംഘമായി അധപ്പതിച്ചതോടെ പൂഴത്തിവെപ്പും കരിഞ്ചന്തയും മൂലം സര്‍വ്വ മേഖലയിലും വിലക്കയറ്റം വാണം പോലെ മേലോട്ട്. നിത്യോപയോഗ സാധനങ്ങളുടെ വിലയെല്ലാം മത്സരിച്ച് മുന്നേറുമ്പോഴും വിപണിയില്‍ ഇടപെടാനോ ആശ്വാസം പകരാനോ സര്‍ക്കാറിന് മനസ്സില്ല.
കോഴിയിറച്ചി വില കിലോക്ക് വില 250 ലേക്ക് കടന്നതോടെ വ്യാപാരികള്‍ തന്നെ കോഴിക്കോട് ഉള്‍പ്പെടെയുളള ജില്ലകളില്‍ സമരം ആരംഭിച്ചു. കോഴിമുട്ടക്കും വില കുത്തനെ ഉയര്‍ന്നിട്ടുണ്ട്. ഏഴു രൂപ വരെയാണ് ഒന്നിന്റെ വില. ട്രോളിംഗ് നിരോധനത്തോടെ നല്ല മീന്‍ കിട്ടാക്കനിയായെന്നു മാത്രമല്ല, വില മത്തിക്കും ഐലക്കും പോലും 300 കടന്നു. അരിക്കും പയറിനും തുടങ്ങി ധാന്യങ്ങള്‍ക്കെല്ലാം 10 മുതല്‍ 20 രൂപ വരെ കൂടി. ഇഞ്ചി വില കിലോക്ക് 60 രൂപയില്‍ നിന്നാണ് 180 ആയത്. ബീന്‍സ്, ക്യാരറ്റ്, മുരിങ്ങക്കായ, വെളുത്തുള്ളി തുടങ്ങിയവയെല്ലാം സെഞ്ച്വറി കടന്നു. പച്ച മുളകിന് പോലും 90 രൂപയായപ്പോള്‍ കഴിഞ്ഞ മാസം 28 രൂപയുണ്ടായിരുന്ന ചെറിയ ഉള്ളിക്ക് 50 മുതല്‍ 80 രൂപ വരെയാണ് സംസ്ഥാനത്തെ വിവിധ നഗരങ്ങളിലെ വില.
വെളുത്തുള്ളിക്ക് 45ല്‍ നിന്നാണ് മൂന്നിരട്ടിയോളം കൂടി 130 രൂുപയായത്. 20 രൂപയുണ്ടായിരുന്ന വെണ്ടക്ക് 40 പിന്നിട്ടു. 20 രൂപയില്‍ നിന്നാണ് ക്വാളി ഫ്‌ളവര്‍ 60 രൂപയിലെത്തിയത്. കഴിഞ്ഞ മാസം 50 രൂപയായിരുന്ന മുരിങ്ങക്കായക്ക് 100 രൂപയായി. 65 രൂപയുണ്ടായിരുന്ന ബീന്‍സിനും 70 രൂപയായിരുന്ന ക്യാരറ്റിനുമെല്ലാം 100 രൂപ പിന്നിട്ടപ്പോള്‍ 20 രൂപക്ക് താഴെയായിരുന്ന തക്കാളി 50 – 60 രൂപയായി. പഴ വിപണിയില്‍ തൊട്ടാല്‍ മധുരത്തിന് പകരം കൈപ്പാണ്. ഓറഞ്ച് വില 60ല്‍ നിന്ന് 100 രൂപ കൂടി 160 ആയി. ആപ്പിളിന് 220 മുതല്‍ 240 വരെയാണ്. മുന്തിരിയും സെഞ്ച്വറിയടിച്ചു.
റേഷന്‍ കടകള്‍ ഇ പോസ് സംവിധാനത്തിന്റെ തകരാര്‍ മൂലം കുത്തഴിഞ്ഞതോടെ സാധാരണക്കാര്‍ പോലും ബദല്‍ മാര്‍ഗം തേടുകയാണ്. മാട്ടിറച്ചി വില വര്‍ധിപ്പിക്കാനുള്ള അണിയറ നീക്കവും ആരംഭിച്ചിട്ടുണ്ട്. തൊട്ടടുത്ത സംസ്ഥാനങ്ങളായ തമിഴ്‌നാട്ടിലും കര്‍ണ്ണാടകയിലും കേരളത്തിലെ പച്ചക്കറി, കോഴി വിലയെല്ലാം പാതിയിലും താഴെ നില്‍ക്കുമ്പോഴാണ് ഭക്ഷ്യ സിവില്‍ സപ്ലൈസ് വകുപ്പിനെ നോക്കുകുത്തിയാക്കി സംസ്ഥാനത്ത് അവശ്യ സാധന വില കുതിച്ചുയരുന്നത്.

ലോക വിഡ്ഢിദിനത്തില്‍ ഒരു ജനതയെ മുഴുവന്‍ വിഡ്ഢികളാക്കാന്‍ ശ്രമിച്ച് സ്വയം വിഡ്ഢിയാകാനുള്ള നിയോഗം കേരളത്തിലെ പിണറായി സര്‍ക്കാരിനല്ലാതെ മറ്റാര്‍ക്കുമില്ല. സാധാരണ ജനം ചോദിക്കുന്നത് ഇനിയെങ്ങനെ ജീവിക്കുമെന്നാണ്. പെട്രോള്‍, ഡീസല്‍, കുടിവെള്ളം, വൈദ്യുതി, യാത്രാനിരക്ക് കെട്ടിട നികുതി, വസ്തു നികുതി, ഭൂമി രജിസ്‌ട്രേഷന്‍, സ്റ്റാമ്പ് ഡ്യൂട്ടി, വാഹനങ്ങള്‍ക്ക് സെസ് എന്നിങ്ങനെ എല്ലാ മേഖലകളിലും വലിയതോതിലുള്ള വിലക്കയറ്റം സൃഷ്ടിച്ചുകൊണ്ടാണ് പുതിയ സാമ്പത്തിക വര്‍ഷത്തിന് ഇന്ന് തുടക്കമിടുന്നത്. ലോകത്തെവിടെയും സര്‍ക്കാരുകള്‍ സാമ്പത്തിക ഞെരുക്കത്തിലേക്ക് പോകുമ്പോള്‍ അതിനെ അതിജീവിക്കാനുള്ള പുതിയ പദ്ധതികള്‍ ആസൂത്രണം ചെയ്യുകയാണ് പതിവ്. അത് ഓരോ സര്‍ക്കാരുകളുടേയും ഭാവനാപൂര്‍ണമായ ഇടപെടലില്‍ നിന്നുണ്ടാകുന്നതാണ്. എന്നാല്‍ ഇവിടെ ജനത്തെ പിഴിഞ്ഞ് ഖജനാവ് നിറക്കുക എന്ന തികച്ചും വിചിത്രമായ നടപടിയിലേക്ക് കേരളത്തിലെ ഇടതുസര്‍ക്കാര്‍ നീങ്ങിയിരിക്കുന്നു. ജീവിതം പെരുവഴിയിലായവര്‍ക്കിടയിലൂടെ പരിഹാസ്യമായൊരു പ്രതിരോധ ജാഥ നടത്തിയിട്ടു കാര്യമില്ല, അവരുടെ പ്രശ്‌നങ്ങളിലേക്ക് ഇറങ്ങിച്ചെല്ലണം. അതിനു കഴിയാത്തൊരു സര്‍ക്കാരാണ് കേരളം ഭരിക്കുന്നത്.

ജനാധിപത്യ പ്രക്രിയയിലൂടെ തിരഞ്ഞെടുക്കപ്പെട്ട സര്‍ക്കാരിന്റെ പ്രാഥമിക ഉത്തരവാദിത്വങ്ങളില്‍പെടുന്നതാണ് ജനം എങ്ങനെ ജീവിക്കുന്നു എന്ന് പരിശോധിക്കേണ്ടത്. കേരളം ഒരു ഉപഭോക്തൃ സംസ്ഥാനമാണ്. ഇവിടെ വന്‍കിട ഫാക്ടറികള്‍ ഇല്ല. വ്യാപകമായി കൃഷിയില്ല. ആധുനിക സമൂഹത്തിന് ചേരുന്ന വിധമുള്ള ഉത്പാദന സംരംഭങ്ങളില്ല. ഇങ്ങനെ ഇല്ലായ്മയില്‍ കഴിയുന്ന ചെറിയ സംസ്ഥാനത്ത് പുതിയ ആശയങ്ങള്‍ രൂപപ്പെടുത്തി ജനത്തിന് ആശ്വാസം നല്‍കേണ്ട കടമ സര്‍ക്കാരിനുണ്ട്. വന്‍കിട കോര്‍പറേറ്റുകള്‍ അടക്കമുള്ളവര്‍ 21000ല്‍ പരം കോടിയുടെ നികുതി കുടിശിക വരുത്തിയിരിക്കുന്ന സാഹചര്യത്തില്‍ പിടിച്ചുനില്‍ക്കാന്‍ 4000 കോടിക്കുവേണ്ടി സാധാരണക്കാരന്റെ പോക്കറ്റില്‍ കയ്യിടുന്ന ഈ നടപടിയെ ക്രൂരമെന്നും നിന്ദ്യമെന്നും വിശേഷിപ്പിക്കാവുന്നതിനപ്പുറം മറ്റെന്തൊക്കെയോ ആണ്. ഒരു സര്‍ക്കാര്‍ കൊള്ളക്കാരായി മാറിയാല്‍ പ്രതിപക്ഷത്തിന് കയ്യുംകെട്ടി നോക്കിയിരിക്കാനാവില്ല. ജനത്തെ ചേര്‍ത്തുപിടിക്കാന്‍ സര്‍ക്കാരിന് കഴിഞ്ഞില്ലെങ്കില്‍ അത് കണ്ടില്ലെന്നു നടിക്കാന്‍ പ്രതിപക്ഷത്തിനും ആവില്ല. സര്‍ക്കാര്‍ ഉത്തരവാദത്തോടെ പ്രവര്‍ത്തിച്ചില്ലെങ്കില്‍ പ്രതിപക്ഷത്തിന് കടുത്ത സമരമുറകളിലേക്ക് നീങ്ങേണ്ടിവരും. എല്ലാ വിഭാഗം ജനത്തെയും ഒരുപോലെ അപകടത്തിലാക്കുന്ന നികുതി നിര്‍ദേശങ്ങള്‍ ആരുടെ തലയില്‍ ഉദിച്ചതായാലും അത് കേരളത്തിന് ഒരിക്കലും ഗുണകരമാവില്ല.

വര്‍ഷങ്ങളായി കേരളം ദുരിതത്തിലാണ്. തുടര്‍ച്ചയായ പ്രളയങ്ങളും കോവിഡ് വിതച്ച ജീവിത ദുരിതങ്ങളും മനുഷ്യന്റെ ജീവിതം തന്നെ താറുമാറാക്കിയ ഒരു കാലത്ത് ഇരുചക്ര വാഹനത്തില്‍ 100 രൂപക്ക് പെട്രോള്‍ അടിക്കാന്‍ പോകുന്നവന്റെ പോക്കറ്റില്‍ കയ്യിട്ട് രണ്ടു രൂപ പിടിച്ചുവാങ്ങുന്ന നടപടിയെ ‘കൊള്ള’ എന്നു തന്നെ വിളിക്കണം. സംസ്ഥാന ബജറ്റില്‍ പെട്രോളിനും ഡീസലിനുമടക്കം നികുതി ചുമത്തിക്കൊണ്ടുള്ള തീരുമാനം ധനമന്ത്രി കെ.എന്‍ ബാലഗോപാല്‍ പ്രഖ്യാപിച്ച നിമിഷം മുതല്‍ ഇതുവരെ യു.ഡി.എഫ് ആവശ്യപ്പെട്ടത് ഈ അശാസ്ത്രീയ നികുതികള്‍ പിന്‍വലിക്കണം എന്നാണ്. എന്തുകൊണ്ട് നികുതികള്‍ പിന്‍വലിക്കണം, എന്തുകൊണ്ട് ഇത് നടപ്പിലാക്കാന്‍ പാടില്ല എന്നീ വിഷയങ്ങളില്‍ യു.ഡി.എഫിന് വ്യക്തമായ നിലപാടുണ്ട്. അത് കേവലം രാഷ്ട്രീയ പ്രതികരണങ്ങളല്ല. സംസ്ഥാനത്തെ ജനങ്ങളുടെ ജീവിത സാഹചര്യവും സാമ്പത്തിക നിലവാരവും വിശദമായി പഠിച്ചുകൊണ്ടാണ് യു.ഡി.എഫ് ഈ നികുതിഭാരത്തെ അംഗീകരിക്കില്ലെന്ന് പറഞ്ഞതും അതിനെതിരായി ശക്തമായ സമരപരിപാടികളുമായി രംഗത്തെത്തിയതും. സമരം ചെയ്തവരെ ജയിലില്‍ അടച്ചാണ് സര്‍ക്കാര്‍ പ്രതികാരം ചെയ്തത്.
നിയമസഭയില്‍ ഇക്കാര്യത്തില്‍ തുറന്ന ചര്‍ച്ച ഉണ്ടായില്ല എന്നത് ഖേദകരമാണ്. അതിനിടയാക്കിയ സാഹചര്യം നമുക്കെല്ലാം അറിയാം. ഇതുമായി ബന്ധപ്പെട്ട് പ്രതിപക്ഷനേതാവ് വി.ഡി സതീശനുമായോ ഉപനേതാവ് പി.കെ കുഞ്ഞാലികുട്ടി അടക്കമുള്ള നേതാക്കളുമായി തുറന്ന സംവാദത്തിന് മുഖ്യമന്ത്രിയോ ധനമന്ത്രിയോ തയ്യാറായില്ല എന്നതാണ് വസ്തുത. അതിനുള്ള കാരണമാകട്ടെ, ജനദ്രോഹത്തില്‍ നിന്ന് പിന്നോട്ടില്ല എന്ന വ്യക്തമായ സന്ദേശം തന്നെയായിരുന്നു. ഒരു വര്‍ഷത്തില്‍ മൂന്നോ നാലോ തവണ നിയമസഭാസമ്മേളനം ചേരാറുണ്ടെങ്കിലും അതില്‍ ഏറെ പ്രധാനം ബജറ്റ് സമ്മേളനം തന്നെയാണ്. മുന്‍കാലങ്ങളില്‍ പല സര്‍ക്കാരുകളും ബജറ്റില്‍ പ്രഖ്യാപിച്ച പല തീരുമാനങ്ങളും പിന്നീട് നിയമസഭയിലെ ചര്‍ച്ചകളുടെ അടിസ്ഥാനത്തില്‍ പിന്‍വലിച്ചിട്ടുണ്ട്. അതൊരു തോറ്റുകൊടുക്കലോ കീഴടങ്ങലോ ആയി ഒരു സര്‍ക്കാരുകളും കണ്ടിട്ടില്ല. ജനത്തിന്റെ താല്‍പര്യം സംരക്ഷിക്കുന്ന സര്‍ക്കാര്‍ പ്രതിപക്ഷത്തെ കണ്ണും കാതും തുറന്നു കേള്‍ക്കുക എന്നത് ജനാധിപത്യത്തിലെ ഏറ്റവും മനോഹരമായ അനുഭവങ്ങളിലൊന്നാണ്. പിണറായി സര്‍ക്കാരാകട്ടെ പ്രതിപക്ഷത്തെ എങ്ങനെ കേള്‍ക്കാതിരിക്കാം, സഭാസമ്മേളനം എങ്ങനെ പൂര്‍ത്തിയാക്കാതെ പിരിച്ചുവിടാം, നികുതി ചര്‍ച്ചയില്‍നിന്ന് ജനശ്രദ്ധ മാറാന്‍ മറ്റെന്തെല്ലാം വിവാദങ്ങള്‍ ഉയര്‍ത്തിക്കൊണ്ടുവരാം എന്നിങ്ങനെയുള്ള തന്ത്രങ്ങളാണ് പുറത്തെടുത്തത്. അതിന്റെ ഭാഗമായി തന്നെയാണ് തുടര്‍ച്ചയായി അടിയന്തര പ്രമേയങ്ങള്‍ക്ക് അനുമതി നിഷേധിച്ചുകൊണ്ടും പ്രതിപക്ഷ പ്രതിഷേധങ്ങളെ അടിച്ചമര്‍ത്തിക്കൊണ്ടും സഭാസമ്മേളനം പകുതിയില്‍ പിരിച്ചുവിട്ടത്.

പ്രതിപക്ഷം വായ തുറക്കുമ്പോള്‍ പാര്‍ലമെന്റില്‍ എങ്ങനെയാണോ നരേന്ദ്രമോദിയും ബി.ജെ.പിയും ഭയപ്പെടുന്നത് അതിനു സമാനമായി തന്നെയാണ് കേരളത്തില്‍ പിണറായിയും എല്‍.ഡി.എഫും നിലകൊള്ളുന്നത്. 20,000 കോടി എങ്ങനെയാണ് അദാനിയുടെ കമ്പനിയില്‍ എത്തിയത് എന്ന ചോദ്യം ഉന്നയിച്ച രാഹുല്‍ഗാന്ധിയെ അയോഗ്യനാക്കിയ അതേ നയം തന്നെയാണ് മറ്റൊരു തരത്തില്‍ കേരളത്തില്‍ പ്രയോഗിച്ചുകൊണ്ടിരിക്കുന്നത്. രാഹുലിനെ എങ്ങനെയാണോ മോദി ഭയപ്പെടുന്നത് അതുപോലെ പിണറായിയും കേരളത്തിലെ പ്രതിപക്ഷത്തെ ഭയക്കുന്നു.

പട്ടിണിക്കാരന്റെയും പാവപ്പെട്ടവന്റെയും തൊഴിലാളിയുടെയും പാര്‍ട്ടി എന്ന് അവകാശപ്പെടുന്ന സി.പി.എമ്മും അതിന്റെ നേതാക്കളും കേരള ചരിത്രത്തില്‍ ഇതുവരെ ഉണ്ടായിട്ടില്ലാത്തവിധം ഭീമമായ നികുതിഭാരം സാധാരണക്കാരന്റെ തലയില്‍ അടിച്ചേല്‍പ്പിച്ചിട്ട് എന്ത് സാമൂഹ്യസുരക്ഷയാണ് ഇവിടെ നടപ്പിലാക്കുന്നത് എന്ന ചോദ്യം ബാക്കിയാകുന്നു. പിണറായി കേരളത്തിന്റെ മുഖ്യമന്ത്രിയായിട്ട് ഏഴ് വര്‍ഷത്തോളമാകുന്നു. ഇതിനിടയില്‍ സാമൂഹ്യ പ്രതിബദ്ധതയോടെ, ദീര്‍ഘകാല അടിസ്ഥാനത്തില്‍ കേരളത്തിന് പ്രയോജനം ചെയ്യുന്ന ഏതെങ്കിലും ഒരു പദ്ധതിക്ക് തുടക്കം കുറിച്ചിട്ടില്ല. പ്രളയത്തിന്റെയും കോവിഡിന്റെയും മറപിടിച്ച് നേടിയ ഭരണത്തുടര്‍ച്ചയുടെ അഹന്തയില്‍ ജനത്തെ ഇങ്ങനെ ദ്രോഹിച്ചുകൊണ്ട് എത്രകാലം മുന്നോട്ടുപോകാനാകുമെന്ന് മുഖ്യമന്ത്രിയും സി.പി.എം നേതൃത്വവും ഇനിയെങ്കിലും ചിന്തിക്കണം. വിലക്കയറ്റം കൊണ്ട് ജനം പൊറുതിമുട്ടുന്ന അവസ്ഥയിലേക്കാണ് കേരളം നീങ്ങുന്നത്. ഇക്കാര്യത്തില്‍ മുസ്‌ലിംലീഗിന് ഒരു നിലപാടേ ഉള്ളൂ. അത് കേരളത്തിലെ സാധാരണ ജനത്തിന്റെ വികാരമാണ്. തെറ്റ് തിരുത്താന്‍ സര്‍ക്കാരിനുമുന്നില്‍ ഇനിയും സമയമുണ്ട്. എല്ലാ നികുതികളും പിന്‍വലിച്ച് ജനഹിതം മനസിലാക്കാന്‍ ഇനിയെങ്കിലും തയാറാകണം.

പാവപ്പെട്ടവരും സാധാരണക്കാരും സമ്പന്നരും എന്നുവേണ്ട സമൂഹത്തിലെ മുഴുവന്‍ ആളുകളെയും ഗുരുതരമായി ബാധിക്കുന്നതാണ് ഇത്തവണത്തെ സംസ്ഥാനസര്‍ക്കാര്‍ ബജറ്റ്. വിലക്കയറ്റം പിടിച്ചുനിര്‍ത്താനെന്ന പേരില്‍ പ്രസംഗിച്ചു തുടങ്ങിയ ബജറ്റ് അതേവിലക്കയറ്റത്തിന് ആക്കം വര്‍ധിപ്പിക്കുന്നതായത് ബജറ്റിന്റെ സാമാന്യനിയമം പോലും ബാലഗോപാലിന് അറിയില്ലെന്നതിന്‍രെ സൂചനയായി. പെട്രോള്‍, ഡീസല്‍വില വര്‍ധനയില്‍ പൈസയുടെ വര്‍ധന വന്നാല്‍പോലും മുമ്പ് ഭാരതബന്ദ് നടത്തിയവരാണ് ഈ ബജറ്റിന് പിന്നിലെ ഇടതുമുന്നണിക്കാര്‍. വിലക്കയറ്റം പിടിച്ചുനിര്‍ത്തുമെന്ന് പറഞ്ഞ് അധികാരത്തിലേറിയവര്‍ 200ഉം 300ഉംഇരട്ടി വില വര്‍ധിച്ചപ്പോള്‍ കയ്യുംകെട്ടിനോക്കിയിരിക്കുകയായിരുന്നു ഇതുവരെ. എന്നാല്‍ ചെറിയൊരു ആശ്വാസമെങ്കിലും പ്രതീക്ഷിച്ചിരുന്ന ജനത്തിന് മേല്‍ ഭാരം കൂട്ടിവെക്കുകയാണ് ബാലഗോപാല്‍ ചെയ്തിരിക്കുന്നത്. സുമാര്‍ 3000 കോടിയുടെ അധികബാധ്യത ജനത്തിന്റെ തലയില്‍ കയറ്റിവെച്ചിട്ട് 2000 കോടി രൂപ വിലക്കയറ്റത്തിന് നീക്കിവെച്ചുകൊണ്ടുള്ള കണക്കിലെ കളി കണ്ട് അന്തം വിട്ടിരിക്കുകയാണ് ജനമാകെ.
ഓട്ടോതൊഴിലാളികള്‍ക്കും വാഹനഉപഭോക്താക്കള്‍ക്കാകെയും തിരിച്ചടിയാണ് ഇന്ധനവിലയിലെസെസ്. 2 രൂപയാണ് മൊത്തം ഇന്ധനവിലയില്‍ കൂടുക. ഇതുമൂലം സംഭവിക്കുന്നതാകട്ടെ മൊത്തത്തില്‍ വിപണിയിലെ വിലക്കുതിപ്പും. ലിറ്ററിന് 2 രൂപ കൂടുമ്പോള്‍ വാടക ഇനത്തില്‍ വര്ധിക്കുന്നത് പതിനായിരങ്ങളാകും. ഇത് നിത്യോപയോഗവസ്തുക്കളുടെ മേല്‍ വ്യാപാരികള്‍ അടിച്ചേല്‍പിക്കും. ഇതോടെ വിലക്കയറ്റത്തിന് ജനം ഇരയാകും.
കോവിഡിന് ശേഷം പതുക്കെ മെച്ചപ്പെട്ടുവന്ന വിപണിയാണ് ഇപ്പോള്‍ തിരിച്ചുപോക്കിനൊരുങ്ങുന്നത്. ഇന്ധനവിലയിലെ വര്‍ധന കാരണം വാഹന ഉപയോഗം കുറയുകയില്ലെന്നതാണ് മറ്റൊരു പ്രത്യേകത.
ഭൂമിയുടെ കച്ചവടത്തെയും കൈമാറ്റത്തെയും നികുതി വര്‍ധന വര്‍ധിക്കുന്നതോടെ നിര്‍മാണപ്രവര്‍ത്തനവും നിലക്കും. പാവപ്പെട്ട നിര്‍മാണത്തൊഴിലാളികളെയാണ് അത് ബാധിക്കുക. ഭൂമിയുടെ ന്യായവില 20 ശതമാനം വര്‍ധിപ്പിച്ചത് രജിസ്‌ട്രേഷന്‍ ഫീ വര്‍ധിക്കാനിടയാക്കും. 2010ല്‍ ന്യായവില ഏര്‍പെടുത്തിയതിന് ശേഷം 250 ശതമാനം വര്‍ധനവാണ് ഇതോടെ സംഭവിച്ചിരിക്കുന്നത്.
ഒരു കൈകൊണ്ട് കൊടുത്ത് മറുകൈ കൊണ്ട് എടുക്കുക എന്ന് കേട്ടിട്ടുണ്ട്. ഇവിടെയാകട്ടെ ഒരു കൈ കൊണ്ട് ചെറിയൊരു തുക കൊടുത്ത് മറുകൈകൊണ്ട് വന്‍തുകപോക്കറ്റടിക്കുകയാണ് സര്‍ക്കാര്‍ചെയ്തിരിക്കുന്നത്.
വാഹനങ്ങളുടെ നികുതി വര്‍ധിച്ചത് കാരണം വാഹനങ്ങളുടെ വില്‍പനയെ ബാധിക്കുന്നത് ഈ രംഗത്തെ വലിയൊരു വിഭാഗം തൊഴിലിനെ ഗുരുതരമായി ബാധിക്കും. പതിവുപോലെ മദ്യപന്മാരിലാണ് സര്‍ക്കാര്‍വീണ്ടും പോക്കറ്റടിയുമായി എത്തിയത്. സെസ് വര്‍ധിച്ചത് 500 രൂപക്ക് മുകളില്‍ മദ്യം വാങ്ങുന്നവരെയാണ് ബാധിക്കുക.
ചെലവുകള്‍ ചുരുക്കിയും നികുതി കൂടുതല്‍ കാര്യക്ഷമമായി പിരിച്ചെടുത്തും സാമ്പത്തികപ്രതിസന്ധിയെ മറികടക്കുന്നതിന് പകരം മുട്ടാപ്പോക്ക് വിദ്യയുമായാണ് എരിതീയിലെ സര്‍ക്കാരിന്റെ എണ്ണയൊഴിക്കല്‍.അടുത്ത വര്‍ഷമാണ് പൊതുതെരഞ്ഞെടുപ്പെന്നതാകാം ഇടതുമുന്നണിയെക്കൊണ്ട് ഇതൊക്കെ ചെയ്യിപ്പിച്ചത്. കിറ്റ് കൊടുത്ത് ജനത്തെ പാട്ടിലാക്കി അധികാരത്തിലേറാമെന്ന തന്ത്രം ഇനിയെത്ര കാലം വിലപ്പോവുമെന്നത് ജനത്തിന്റെ ഓര്‍മശേഷി പോലിരിക്കും.

ആളുകള്‍ അധികവും ചെറുകിട കച്ചവടക്കാരെ ആശ്രയിക്കാതെ കിഴിവും കടവും എടുക്കാനാണ ്താല്‍പര്യം കാട്ടുന്നത്. അടുത്ത ഒരുവര്‍ഷത്തിലധികം കാലം ബ്രിട്ടന്‍ സാമ്പത്തികമാന്ദ്യത്തിലേക്ക് പോകുമെന്നാണ ്പറയുന്നത്. ഇത് പരിഹരിക്കാനാകാതെയാണ് പഴയ പ്രധാനമന്ത്രി ലിസ് ട്രസിന് ചുമതലയേറ്റ് മാസങ്ങള്‍ക്കകം രാജിവെച്ചോടേണ്ടിവന്നത്. പല പുതിയ വാഗ്ദാനങ്ങളും ഋഷി സുനക് നല്‍കുന്നുണ്ടെങ്കിലും സാമ്പത്തിക പ്രയാസത്തിലുഴറുകയാണ് രാജ്യം. കഴിഞ്ഞദിവസമാണ ്‌വിദേശവിദ്യാര്‍ത്ഥികള്‍ക്കുള്ള വിസ റദ്ദാക്കുമെന്ന് സുനക് പ്രഖ്യാപിച്ചത്. കേരളമടക്കമുള്ള സ്ഥലങ്ങളില്‍നിന്ന് നിരവധി പേരാണ ്ബ്രിട്ടനില്‍ തുടര്‍പഠനത്തിനും ജോലിക്കുമായി ചെല്ലുന്നത്. ഇത് വലിയ പ്രതിസന്ധിയിലേക്ക് നീങ്ങുമെന്നാണ ്‌റിപ്പോര്‍ട്ട്.
2023ല്‍ വിലക്കയറ്റം 22 ശതമാനത്തിലേക്കെത്തുമെന്നാണ ്ഒരു പ്രവചനം. ഇന്ത്യയെപോലെ ബ്രിട്ടനും വിലക്കയറ്റത്തിന്റെ പിടിയിലമര്‍ന്നേക്കുമെന്നും ലോകത്ത് വരാനിരിക്കുന്ന മാന്ദ്യത്തിന്റെ ഭാഗമാണിതെന്നും സാമ്പത്തികവിദഗ്ധര്‍ ചൂണ്ടിക്കാട്ടുന്നു. കച്ചവടക്കാരും ഇതോടെ വലിയ ആശങ്കയിലാണ്.
പണപ്പെരുപ്പം തുടരുന്നത് രാജ്യത്തെ വലിയ തോതില്‍ ബാധിച്ചേക്കും. വിദേശത്ത് സൈനികാവശ്യങ്ങള്‍ക്കും മറ്റുമായി പണം ചെലവിടുന്നതിനാണ് ഇനി രാജ്യത്തെ ഭരണകൂടം ശ്രദ്ധവെക്കുന്നത്. സാമ്പത്തിക പ്രതിസന്ധി ഇതുപോലെ ബാധിച്ച മറ്റൊരു കാലം അടുത്തൊന്നും ബ്രിട്ടനിലുണ്ടായിട്ടില്ല.