രാജ്യത്തെ നൂറിലധികം വിമാനത്താവളങ്ങളുടെ ഉടമസ്ഥത, നടത്തിപ്പ് അവകാശം കേന്ദ്ര വ്യോമയാന മന്ത്രാലയത്തിനു കീഴിലുള്ള എയര്‍പോര്‍ട്ട് അതോറിറ്റിക്കാണ്. ഇതില്‍ 25-ഓളം വിമാനത്താവളങ്ങളെ സ്വകാര്യവത്കരിക്കാനാണ് തീരുമാനം. എയര്‍പോര്‍ട്ട് അതോറിറ്റി ഒഫ് ഇന്ത്യയുടെ വരുമാനം കൂട്ടാനും വിമാനത്താവളങ്ങളെ ലോകനിലവാരത്തിലേക്ക് ഉയര്‍ത്താനുമാണ് സ്വകാര്യവത്കരണം എന്നാണ് കേന്ദ്ര സര്‍ക്കാര്‍ നിലപാട്.

ആദ്യ ഘട്ടത്തില്‍ ആറു വിമാനത്താവളങ്ങളാണ് സ്വകാര്യവത്കരിക്കാന്‍ തീരുമാനിച്ചത്. തിരുവനന്തപുരം, ലക്നൗ, അഹമ്മദാബാദ്, ജയ്പുര്‍, മംഗലാപുരം, ഗുവാഹതി എന്നിവയാണ് ആദ്യ ഘട്ട സ്വകാര്യവത്കരണത്തില്‍ ഉള്‍പ്പെടുത്തിയത്. അദാനി എന്റര്‍പ്രൈസസ് ആണ് ഇതിനുള്ള കരാര്‍ നേടിയത്. തിരുവനന്തപുരം, ജയ്പൂര്‍, ഗുവാഹത്തി വിമാനത്താവളങ്ങള്‍ ഇതുവരെ അദാനി ഗ്രൂപ്പിന് കൈമാറിയിട്ടില്ല.

വിമാനത്താവളത്തിന്റെ നടത്തിപ്പാവകാശം അദാനി ഗ്രൂപ്പിന് നല്‍കാനുള്ള കേന്ദ്ര സര്‍ക്കാര്‍ നടപടികള്‍ തടയണമെന്ന് ആവശ്യപ്പെട്ട് സംസ്ഥാന സര്‍ക്കാരും കെഎസ്ഐഡിസിയും നേരത്തെ ഹൈക്കോടതിയെ സമീപിച്ചിരുന്നു. എന്നാല്‍, ഹര്‍ജികള്‍ ഹൈക്കോടതി തള്ളിയിരുന്നു. ചീഫ് ജസ്റ്റിസ് അധ്യക്ഷനായ ബെഞ്ചിന്റേതായിരുന്നു നടപടി.

വൈദ്യുതി വിതരണ മേഖല സ്വകാര്യവത്കരിക്കുന്നത് കേന്ദ്രസര്‍ക്കാരിന്റെ ദീര്‍ഘനാളായുള്ള ആവശ്യമാണ്. കഴിഞ്ഞ 11, 12 തിയ്യതികളില്‍ ചേര്‍ന്ന സംസ്ഥാന വൈദ്യുതി മന്ത്രിമാരുടെ യോഗത്തില്‍ കേന്ദ്രസര്‍ക്കാര്‍ നിലപാട് ആവര്‍ത്തിച്ചു.’സംസ്ഥാന വൈദ്യുതി ബോര്‍ഡുകള്‍ സ്വാകാര്യ ഏജന്‍സികള്‍ക്ക് വൈദ്യുതി മൊത്ത വിതരണം നടത്തുക. ഒരു മേഖലയില്‍ മൂന്നോ നാലോ ഏജന്‍സികളെ ചുമതലപ്പെടുത്തുക എന്നിവയാണ് കേന്ദ്രത്തിന്റെ തീരുമാനം. വൈദ്യുതി വിതരണ മേഖല സ്വാകാര്യവല്‍കരിക്കുന്നത് തോന്നുംപോലെയുള്ള ചാര്‍ജ്ജ് വര്‍ധനവിന് വഴിവെക്കും.

ഐആര്‍സിടിസിയ്ക്ക് നടത്തിപ്പ് ചുമതല ലഭിക്കുന്നതോടെ ടിക്കറ്റുകളുടെ വില്‍പ്പന ഉള്‍പ്പെടെ ഇവരുടെ നിയന്ത്രണത്തിലാകും. ഐആര്‍സിടിസിയില്‍ നിന്ന് നിശ്ചിത തുക റെയില്‍വേ ഈടാക്കുകയും ചെയ്യും. രാജധാനി, ശതാബ്ദി എക്‌സ്പ്രസുകളും സ്വകാര്യമേഖലയ്ക്ക് ലഭിക്കുമെന്നാണ് റിപ്പോര്‍ട്ടുകള്‍.

പാസഞ്ചര്‍ ട്രെയിനുകള്‍ ഏറ്റെടുക്കാന്‍ താത്പര്യമുള്ള സ്വകാര്യ ഓപ്പറേറ്റര്‍മാരെ റെയില്‍വേ പിന്നീട് തെരഞ്ഞെടുക്കും.
ട്രെയിനുകളുടെ സ്വകാര്യവത്കരണത്തിന് പുറമെ ഏഴ് നിര്‍മാണ യൂണിറ്റുകളെ ഒരു കുടക്കീഴിലാക്കാനും റെയില്‍വേ പദ്ധതിയിടുന്നുണ്ട്. ഇന്ത്യന്‍ റെയില്‍വേസ് റോങിങ് സ്‌റ്റോക്ക് കമ്പനി രൂപീകരിച്ച ശേഷമായിരിക്കും ഏഴ് നിര്‍മാണകേന്ദ്രങ്ങളും ഒരൊറ്റ സ്ഥാപനമാക്കുക. ഓരോ യൂണിറ്റിനും ഓരോ സിഇഓമാരും ഉണ്ടാകും. ഇവയ്ക്ക് പുറമെ റായ്ബറേലിയില്‍ ആധുനിക കോച്ച് ഫാക്ടറി നിര്‍മിക്കാനും റെയില്‍വേയ്ക്ക് പദ്ധതിയുണ്ട്.