psc exams – Chandrika Daily

ആലപ്പുഴയിൽ നാളെ അവധി; പിഎസ് സി പരീക്ഷകളും മാറ്റി

webdesk14 — Tue, 22 Jul 2025 09:17:24 +0000

ആലപ്പുഴ: അന്തരിച്ച മുൻ മുഖ്യമന്ത്രി വി എസ് അച്യുതാനന്ദനോടുള്ള ആദരസൂചകമായി ആലപ്പുഴ ജില്ലയിൽ നാളെ അവധി. ജില്ലയിലെ സർക്കാർ ഓഫീസുകൾക്കും പ്രൊഫഷണൽ കോളജുകൾ ഉൾപ്പെടെയുള്ള വിദ്യാഭ്യാസ സ്ഥാപനങ്ങൾക്കും അവധിയായിരിക്കും. നാളെ വൈകീട്ട് ആലപ്പുഴ വലിയ ചുടുകാട്ടിലാണ് വി എസ് അച്യുതാനന്ദന്റെ സംസ്കാരം നിശ്ചയിച്ചിട്ടുള്ളത്.

തിരുവനന്തപുരത്തെ പൊതുദർശനം പൂർത്തിയാക്കി രാത്രിയോടെ വി എസിന്റെ ഭൗതികദേഹം ആലപ്പുഴ പുന്നപ്ര പറവൂരിലെ വീട്ടിലെത്തിക്കും. നാളെ രാവിലെ 9 മുതല്‍ സിപിഎം ജില്ലാ കമ്മിറ്റി ഓഫിസില്‍ വി എസ് അച്യുതാനന്ദന്റെ മൃതദേഹം പൊതു ദര്‍ശനത്തിന് വെക്കും. തുടര്‍ന്ന് രാവിലെ 10 മുതല്‍ ആലപ്പുഴ കടപ്പുറത്തെ പൊലീസ് റിക്രിയേഷന്‍ ഗ്രൗണ്ടിലും പൊതുദര്‍ശനമുണ്ടാകും. ഉച്ചകഴിഞ്ഞ് മൂന്നിന് വലിയ ചുടുകാട്ടില്‍ ഔദ്യോഗിക ബഹുമതികളോടെയാണ് സംസ്‌കാരം.

പിഎസ്‍സി നാളെ (2025 ജൂലൈ 23 ബുധനാഴ്ച) നടത്താനിരുന്ന പരീക്ഷകൾ മാറ്റി വെച്ചു. പൊതുമരാമത്ത് / ജലസേചന വകുപ്പുകളിലെ സെക്കന്റ് ഗ്രേഡ് ഓവർസിയർ/ഡ്രാഫ്റ്റ്സ്മാൻ (സിവിൽ )(നേരിട്ടുള്ള നിയമനം -കാറ്റഗറി നമ്പർ 8/2024), ജലസേചന വകുപ്പിലെ സെക്കന്റ് ഗ്രേഡ് ഓവർസിയർ /ഡ്രാഫ്റ്റ്സ്മാൻ (സിവിൽ- പട്ടിക വർഗ്ഗക്കാർക്കു മാത്രം – കാറ്റഗറി നമ്പർ 293/2024), കേരള സംസ്ഥാന പട്ടിക ജാതി/ പട്ടിക വർഗ്ഗ വികസന കോർപ്പറേഷനിലെ ട്രേസർ, (നേരിട്ടുള്ള നിയമനം, കാറ്റഗറി നമ്പർ – 736/2024) തസ്തികകളിലേക്കുള്ള പരീക്ഷകളാണ് മാറ്റിവെച്ചത്.

പുതുക്കിയ തീയതി പിന്നീട് അറിയിക്കും. അതേസമയം നാളെ നടത്തുവാൻ നിശ്ചയിച്ചിട്ടുള്ള പിഎസ്‍സി അഭിമുഖങ്ങള്‍ക്ക് മാറ്റമില്ല.

നിപ്പ ; കോഴിക്കോട് പിഎസ്‍സി പരീക്ഷാ കേന്ദ്രങ്ങൾക്ക് മാറ്റം

webdesk15 — Sat, 23 Sep 2023 17:17:35 +0000

കോഴിക്കോട് നിപ ബാധയെ തുടർന്ന് പി എസ് സി പരീക്ഷ കേന്ദ്രങ്ങൾക്ക് മാറ്റം വന്നിട്ടുണ്ടെന്ന് പി എസ് സി ജില്ലാ ഓഫീസർ അറിയിച്ചു. കണ്ടെയ്ൻമെന്റ് സോണുകളിലെ പരീക്ഷ കേന്ദ്രങ്ങൾക്കാണ് മാറ്റമുള്ളതായി അറിയിച്ചിരിക്കുന്നത്. കോഴിക്കോട് ജിഎച്ച്എസ്എസ് ബേപ്പൂരിലെ സെന്റർ 1 ജിവിഎച്ച്എസ്എസ് കുറ്റിച്ചിറയിലേക്കും സെന്റർ 2 കാലിക്കറ്റ് ഗേൾസ് വിഎച്ച്എസ്എസ് കുണ്ടുങ്ങലിലേക്കുമാണ് മാറ്റിയത്. മത്സരാർത്ഥികൾക്ക് പഴയ അഡ്മിഷൻ ടിക്കറ്റുമായി പുതുക്കിയ കേന്ദ്രങ്ങളിൽ പരീക്ഷക്കെത്താമെന്നും പി എസ് സി ജില്ലാ ഓഫീസർ അറിയിച്ചു. സെപ്റ്റംബര്‍ 26 ന് നടക്കേണ്ട് പി എസ് സി പരീക്ഷയുടെ കേന്ദ്രങ്ങളാണ് മാറ്റിയത്.

യോഗ്യതയുണ്ടായിട്ടും നിയമനം നൽകിയില്ല: പി.എസ്.സി ചെയർമാൻ പങ്കെടുത്ത ചടങ്ങിൽ ഉദ്യോഗാർഥികളുടെ പ്രതിഷേധം

adil — Fri, 15 Jan 2021 16:13:46 +0000

പി.എസ്.സി ചെയർമാൻ പങ്കെടുത്ത നിയമന ഉത്തരവ് കൈമാറൽ ചടങ്ങിനിടെ റാങ്ക് ലിസ്റ്റിൽ നിന്നും പുറത്താക്കപ്പെട്ട ഉദ്യോഗാർഥികളുടെ പ്രതിഷേധം. എല്ലാ യോഗ്യതയുമുണ്ടായിട്ടും തങ്ങൾക്ക് നിയമനം നൽകാതെ പി.എസ്.സി വഞ്ചിച്ചെുവെന്ന് ആരോപിച്ചാണ് ഉദ്യോഗാർഥികൾ പരിപാടി നടന്ന പി.ഡബ്ല്യു.ഡി റസ്റ്റ് ഹൗസിന് മുന്നിൽ പ്രതിഷേധിച്ചത്.
വയനാട് ജില്ലയിലെയും മലപ്പുറം ജില്ലയിലെ നിലമ്പൂർ, കാളികാവ്, വണ്ടൂർ, അരീക്കോട് ബ്ലോക്കുകളിലെയും പാലക്കാട് ജില്ലയിലെ അട്ടപ്പാടി ബ്ലോക്കിലെയും വനാന്തരങ്ങളിലെയും വനാതിർത്തികളിലെയും സെറ്റിൽമെന്റ് കോളനികളിൽ വസിക്കുന്ന പട്ടികവർഗ വിഭാഗത്തിൽപ്പെട്ട ഉദ്യോഗാർഥികൾക്കായി കാറ്റഗറി നമ്പർ 8/2020, 9/2020 എന്നീ തസ്തികകളിലേക്ക് എഴുത്ത് പരീക്ഷയില്ലാതെ നടത്തിയ നിമനത്തിലാണ് വനത്തിനുള്ളിൽ താമസിക്കുന്നവരടക്കമുള്ള ഉദ്യോഗാർഥികൾ പുറത്തായത്.
മതിയായ യോഗ്യതകളുണ്ടായിട്ടും തങ്ങളെ തഴഞ്ഞ പി.എസ്.സിയുടെ നിലപാടിൽ പ്രതിഷേധിച്ചായിരുന്നു ഉദ്യോഗാർഥികളുടെ സമരം. ഫിസിക്കൽ ടെസ്റ്റിൽ മിനിമം മൂന്നെണ്ണത്തിൽ വിജയിക്കണമെന്ന മാനദണ്ഡം പി.എസ്.സി മഖുവിലക്കെടുത്തില്ലെന്നും ഇവർ കുറ്റപ്പെടുത്തി. വനത്തിലോ വനത്തിന് സമീപത്തോ താമസിക്കുന്നവർക്കെന്ന് ഉത്തരവിൽ പറഞ്ഞിട്ടും നഗരങ്ങളിലടക്കം താമസിക്കുന്നവർക്ക് നിയമനാനുമതി നൽകിയെന്നും ഇവർ പറയുന്നു. ഐ.റ്റി.ഡി.പിയും വനംവകുപ്പും ഇതിൽ ഒത്തുകളിച്ചുവെന്നും ഉദ്യോഗാർഥികൾ ആരോപിച്ചു.
സമരത്തിന് ഐക്യദാർഡ്യം പ്രകടിപ്പിച്ച് യൂത്ത് കോൺഗ്രസ്, കെ.എസ്.യു പ്രവർത്തകരും സ്ഥലത്തെത്തിയിരുന്നു. വയനാട് ജില്ലാ പഞ്ചായത്ത് പ്രസിഡന്റും യൂത്ത് കോൺഗ്രസ് വയനാട് ജില്ലാ പ്രസിഡന്റുമായ സംഷാദ് മരക്കാർ, ജില്ലാ പഞ്ചായത്തംഗവും കെ.എസ്.യു വയനാട് ജില്ലാ പ്രസിഡന്റുമായ അമൽ ജോയ് തുടങ്ങിയവർ പ്രതിഷേധത്തിനെത്തിയവർക്ക് പിന്തുണയുമായി എത്തി.

പി.എസ്.സി പരീക്ഷാ തട്ടിപ്പ്: കുറ്റപത്രം സമര്‍പ്പിക്കാതെ ക്രൈംബ്രാഞ്ച് ഒത്തുകളി; പ്രതികള്‍ക്ക് ജാമ്യം

ചന്ദ്രിക വെബ് ഡെസ്‌ക്‌ — Wed, 30 Oct 2019 03:43:36 +0000

തിരുവനന്തപുരം: യൂണിവേഴ്‌സിറ്റി കോളജ് കുത്തു കേസിലെയും പിഎസ്സി പരീക്ഷാ തട്ടിപ്പു കേസിലെയും പ്രതികളായ എ.എന്‍.നസീമിനും ശിവരഞ്ജിത്തിനും ജാമ്യം ലഭിച്ചു. കോളജിലെ കുത്തുകേസില്‍ ഇരുവര്‍ക്കും നേരത്തെ ജാമ്യം ലഭിച്ചിരുന്നു. പരീക്ഷാ തട്ടിപ്പുകേസിലും ജാമ്യം ലഭിച്ചതിനെത്തുടര്‍ന്നാണ് ജയില്‍ മോചിതരായത്. രണ്ടു കേസുകളും അന്വേഷിക്കുന്ന ക്രൈംബ്രാഞ്ച് ഇതുവരെ കുറ്റപത്രം സമര്‍പ്പിച്ചിട്ടില്ല.നിശ്ചിത സമയത്തിനുള്ളില്‍ കുറ്റപത്രം സമര്‍പ്പിക്കാത്തതിനാലാണ് പ്രതികള്‍ക്കു ജാമ്യം ലഭിച്ചതെന്ന് ആരോപണമുണ്ട്.
എന്നാല്‍ ക്രൈംബ്രാഞ്ച് അധികൃതര്‍ ഇതു നിഷേധിച്ചു. ഫൊറന്‍സിക്, സൈബര്‍ റിപ്പോര്‍ട്ടുകള്‍ ലഭിച്ചതിനുശേഷമേ കുറ്റപത്രം സമര്‍പ്പിക്കാന്‍ കഴിയൂ എന്ന് അന്വേഷണ ഉദ്യോഗസ്ഥനായ ഡിവൈഎസ്പി ഹരികൃഷ്ണന്‍ പറഞ്ഞു. ചോദ്യപേപ്പര്‍ ചോര്‍ത്തി നല്‍കിയ ആളെ അറസ്റ്റു ചെയ്യാനുണ്ട്. പരീക്ഷാ തട്ടിപ്പു കേസിലെ മറ്റു പ്രതികള്‍ക്ക് ജാമ്യം ലഭിച്ചിട്ടില്ല. ജൂലൈ 12നാണ് യൂണിവേഴ്‌സിറ്റി കോളജിലെ മൂന്നാം വര്‍ഷ പൊളിറ്റിക്‌സ് വിദ്യാര്‍ഥി അഖില്‍ ചന്ദ്രനു കുത്തേറ്റത്. കുത്തുകേസില്‍ ശിവരഞ്ജിത്ത് ഒന്നാം പ്രതിയും നിസാം രണ്ടാം പ്രതിയുമാണ്. കോളജിലെ തര്‍ക്കമാണ് കത്തികുത്തില്‍ കലാശിച്ചത്.
പിഎസ്സി സിവില്‍ പൊലീസ് ഓഫിസര്‍ പരീക്ഷയില്‍ വാച്ച് ഉപയോഗിച്ച് തട്ടിപ്പു നടത്തിയതായി കണ്ടെത്തിയതിനെത്തുടര്‍ന്നാണ് ഇരുവര്‍ക്കുമെതിരെ കേസെടുത്തത്. യൂണിവേഴ്‌സിറ്റി കോളജില്‍ വിദ്യാര്‍ഥിക്കു കുത്തേറ്റ സംഭവത്തിനു പിന്നാലെയാണ് പരീക്ഷാ തട്ടിപ്പിന്റെ വിവരങ്ങള്‍ പുറത്തു വന്നത്. ശിവരഞ്ജിത്ത് കെഎപി 4 ബറ്റാലിയന്‍(കാസര്‍കോട്) റാങ്ക് ലിസ്റ്റില്‍ ഒന്നാം സ്ഥാനക്കാരനും, പ്രണവ് രണ്ടാം സ്ഥാനക്കാരനുമായിരുന്നു. പിഎസ്സി പിന്നീട് ഇരുവരെയും അയോഗ്യരാക്കിയിരുന്നു.

യൂണിവേഴ്‌സിറ്റി അസിസ്റ്റന്റ് വിജ്ഞാപനം തയ്യാറാവുന്നു; ബിരുദക്കാര്‍ക്ക് സുവര്‍ണാവസരം

ചന്ദ്രിക വെബ് ഡെസ്‌ക്‌ — Fri, 09 Nov 2018 05:30:11 +0000

കോഴിക്കോട്: സംസ്ഥാനത്തെ വിവിധ യൂണിവേഴ്‌സിറ്റികളില്‍ അസിസ്റ്റന്റുമാരെ നിയമിക്കുന്നതിനുള്ള വിജ്ഞാപനം പി.എസ്.സി ഉടന്‍ പ്രസിദ്ധീകരിക്കും. അസിസ്റ്റന്റ് നിയമനം പി.എസ്.സിക്ക് വിട്ടതിന് ശേഷം രണ്ടാം തവണയാണ് പി.എസ്.സി വിജ്ഞാപനം പ്രസിദ്ധീകരിക്കുന്നത്. നിലവിലുള്ള ലിസ്റ്റിന്റെ കാലാവധി 2019 ഓഗസ്റ്റില്‍ അവസാനിക്കാനിരിക്കെയാണ് പി.എസ്.സി പുതിയ വിജ്ഞാപനം പ്രസിദ്ധീകരിക്കുന്നത്. കഴിഞ്ഞ വിജ്ഞാപനത്തിന്റെ അടിസ്ഥാനത്തിലെ റാങ്ക് ലിസ്റ്റില്‍ ഇതുവരെ 1829 പേര്‍ക്ക് നിയമനശുപാര്‍ശ ലഭിച്ചു.

സെക്രട്ടറിയേറ്റ് അസിസ്റ്റന്റിന് തുല്യമായ ഉന്നത ജോലിയാണ് യൂണിവേഴ്‌സിറ്റി അസിസ്റ്റന്റ്. തുടക്കത്തില്‍ തന്നെ 30,000 രൂപയിലധികമാണ് ശമ്പളം. പരീക്ഷ ആറ് മാസത്തിനകം നടക്കും. 10 വിഷയങ്ങളില്‍ നിന്നും 10 ചോദ്യങ്ങള്‍ ഉള്‍പ്പെടുന്ന 100 മാര്‍ക്കിന്റെ പരീക്ഷയാണുള്ളത്.

ക്വാണ്ടിറ്റേറ്റീവ് ആപ്റ്റിറ്റിയൂഡ്, മെന്റല്‍ എബിലിറ്റി/ടെസ്റ്റ് ഓഫ് റീസണിങ്, ജനറല്‍ സയന്‍സ്, കറന്റ് അഫയേഴ്‌സ്, ഇന്ത്യ-പൊതുവിവരങ്ങള്‍, കേരള-പൊതുവിവരങ്ങള്‍, ഭരണഘടന, ജനറല്‍ ഇംഗ്ലീഷ്, പ്രദേശിക ഭാഷ, സൈബര്‍ നിയമങ്ങള്‍ എന്നീ 10 വിഷയങ്ങളില്‍ നിന്നാണ് ചോദ്യങ്ങളുണ്ടാവുക.

റാങ്ക് ലിസ്റ്റില്‍ ഉള്‍പ്പെട്ട മുഴുവന്‍ പേര്‍ക്കും ജോലി ഉറപ്പാക്കണം: റാങ്ക് ഹോള്‍ഡേഴ്‌സ് കൂട്ടായ്മ

chandrika — Mon, 01 Oct 2018 10:21:04 +0000

കോഴിക്കോട്: എല്‍.ഡി.സി റാങ്ക് ലിസ്റ്റില്‍ ഉള്‍പ്പെട്ട മുഴുവന്‍ പേര്‍ക്കും ജോലി ഉറപ്പാക്കണമെന്ന് റാങ്ക് ഹോള്‍ഡേഴ്‌സ് കൂട്ടായ്മ ആവശ്യപ്പെട്ടു. കോഴിക്കോട് ജില്ലയിലെ എല്‍.ഡി.സി റാങ്ക് ജേതാക്കളുടെ കൂട്ടായ്മയായ ‘ചിറകി’ന്റെ ജില്ലാ തല സംഗമം എന്‍.ജി.ഒ ഹാളില്‍ നടന്നു. എന്‍.ജി.ഒ യൂണിയന്‍ സംസ്ഥാന സെക്രട്ടറിയറ്റ് അംഗം രാജചന്ദ്രന്‍ സംഗമം ഉദ്ഘാടനം ചെയ്തു.

മുഴുവന്‍ റാങ്ക് ജേതാക്കള്‍ക്കും ജോലി നേടിക്കൊടുക്കുന്നതിനുള്ള പ്രവര്‍ത്തനങ്ങളുമായി മുന്നോട്ട് പോവാന്‍ യോഗം തീരുമാനിച്ചു. ജില്ലാ സെക്രട്ടറി ദിനചന്ദ്രന്‍ സ്വാഗതം പറഞ്ഞ ചടങ്ങില്‍ ജില്ലാ പ്രസിഡന്റ് സൈജല്‍ അഹമ്മദ് അധ്യക്ഷത വഹിച്ചു. ട്രഷറര്‍ ഷിബിന്‍, വര്‍ക്കിങ് കമ്മിറ്റി അംഗങ്ങളായ അതുല്‍, പ്രസാദ്, തപന്‍, അമൃത, അപര്‍ണ, വിശ്വനാഥ്, അനീഷ്, വൈശാഖ് തുടങ്ങിയവര്‍ സംസാരിച്ചു.സരിത റോബിന്‍ നന്ദി പറഞ്ഞു.

പി.എസ്.സി പരീക്ഷയും ഇനി ഓണ്‍ലൈന്‍ വഴിയാവുന്നു

chandrika — Fri, 20 Jul 2018 12:04:24 +0000

കോഴിക്കോട്: കേരള പബ്ലിക് സര്‍വിസ് കമ്മിഷന്റെ എഴുപത് ശതമാനം പ്രവര്‍ത്തനങ്ങളും ആറുമാസത്തിനകം ഓണ്‍ലൈന്‍ വഴിയാക്കുന്നു. കൂടുതല്‍ ഉദ്യോഗാര്‍ഥികള്‍ പരീക്ഷ എഴുതുന്ന ലോവര്‍ ഡിവിഷന്‍ ക്ലാര്‍ക്ക്്്, പൊലീസ് തുടങ്ങിയ തസ്തിക ഒഴിയുള്ളവയുടെ പരീക്ഷകളാവും ആദ്യം ഓണ്‍ലൈന്‍ സംവിധാനത്തിലാക്കുക. ഇതിനായി സംസ്ഥാനത്തെ എന്‍ജിനിയറിങ് കോളജുകള്‍, ഐ.ടി.ഐകള്‍, സി-ഡിറ്റ് സെന്ററുകള്‍ തുടങ്ങിയവയുടെ സാങ്കേതിക സംവിധാനങ്ങളാവും ഉപയോഗപ്പെടുത്തുക. കേരള പബ്ലിക് സര്‍വിസ് കമ്മിഷന്റെ പരീക്ഷയുമായി ബന്ധപ്പെട്ട ഒരു ചര്‍ച്ചയില്‍ ചെയര്‍മാന്‍ അഡ്വ. എം.കെ. സക്കീറാണ് പുതിയ സാധ്യതകളെ സംബന്ധിച്ച് മാധ്യമങ്ങളോട് സംവദിച്ചത്.

പുതിയ സാധ്യതകള്‍ ഉപയോഗപ്പെടുത്തിയാല്‍ ആദ്യ ഘട്ടത്തില്‍ 40,000 പേര്‍ക്ക് ഓണ്‍ലൈനായി പരീക്ഷ എഴുതാന്‍
സാധിക്കുമെന്നും അദ്ദേഹം അവകാശപ്പെട്ടു. സംസ്ഥാനത്തെ പി.എസ്.സി ഓഫിസുകളില്‍ ഇപ്പോള്‍ തന്നെ 3600 പേര്‍ക്ക് ഓണ്‍ലൈനായി പരീക്ഷ എഴുതാന്‍ സംവിധാനമുണ്ട്.

കൂടാതെ ഓണ്‍സ്‌ക്രീന്‍ മാര്‍ക്കിങ് സംവിധാനവും കേരളത്തില്‍ നടപ്പിലാക്കാനും പദ്ധതിയുണ്ട്. ഇതിനായി രാജസ്ഥാനില്‍ നടപ്പാക്കി വിജയിച്ച എഴുത്തുപരീക്ഷയുടെ മൂല്യനിര്‍ണയത്തിലെ പുതിയ രീതിയായ ഓണ്‍സ്‌ക്രീന്‍ മാര്‍ക്കിങ് സംവിധാനമാവും ഉപയോഗപ്പെടുത്തുക.

മാറ്റിവച്ച പി.എസ്.സി പരീക്ഷകളുടെ തിയ്യതി പ്രഖ്യാപിച്ചു

chandrika — Tue, 26 Jun 2018 05:10:08 +0000

തിരുവനന്തപുരം: മാറ്റിവച്ച പി.എസ്.സി പരീക്ഷകള്‍ ഈ മാസം 28നും 29നും നടക്കും. പി.എസ്.സി 2018 ജൂണ്‍ ഏഴിന് രാവിലെ 7.30 മുതല്‍ 9.15 വരെ നടത്താന്‍ നിശ്ചയിച്ചതും മാറ്റിവച്ചതുമായ ഇന്ത്യന്‍ സിസ്റ്റം ഓഫ് മെഡിസിന്‍/ഇന്‍ഷുറന്‍സ് മെഡിക്കല്‍ സര്‍വീസ് വകുപ്പിലെ മെഡിക്കല്‍ ഓഫീസര്‍ (ആയുര്‍വേദ)/അസിസ്റ്റന്റ് ഇന്‍ഷുറന്‍സ് മെഡിക്കല്‍ ഓഫീസര്‍ (ആയുര്‍വേദ) (കാറ്റഗറി നം. 541/2017) തസ്തികയിലേക്കുള്ള ഒ.എം.ആര്‍ പരീക്ഷ 28ന് രാവിലെ 7.30 മുതല്‍ 9.15 വരെ നടത്തും.

പി.എസ്.സി ജൂണ്‍ 13ന് രാവിലെ 7.30 മുതല്‍ 9.15 വരെ നടത്താന്‍ നിശ്ചയിച്ചതും മാറ്റിവച്ചതുമായ ഇന്‍ഡസ്ട്രിയല്‍ ട്രെയിനിങ് വകുപ്പിലെ ജൂനിയര്‍ ഇന്‍സ്ട്രക്ടര്‍ (മെക്കാനിക്ക് റെഫ്രിജറേഷന്‍ ആന്‍ഡ് എയര്‍ കണ്ടീഷനിങ്) (കാറ്റഗറി നം. 002/2017) തസ്തികയിലേക്കുള്ള ഒ.എം.ആര്‍ പരീക്ഷ 29ന് രാവിലെ 7.30 മുതല്‍ 9.15 വരെ നടത്തും. ഉദ്യോഗാര്‍ഥികളുടെ പരീക്ഷാ കേന്ദ്രങ്ങള്‍ക്കോ സമയത്തിനോ റജിസ്റ്റര്‍ നമ്പരിനോ മാറ്റമില്ല.